IYAʼ náa océano Atlántico najpátuma náa edxu̱u̱ barco rí na̱jkha̱ Europa. Mbáa bi̱ na̱jkha̱ ikhí nindxu̱u̱ George Young, bi̱ narmáʼáan a̱jkiu̱u̱n rí niʼngo̱o̱ niʼni náa Brasil ga̱jma̱a̱ numuu Reino. * Mú índo̱ xtáa ra̱jkha̱, nandxa̱ʼwáminaʼ ga̱jma̱a̱ ñajunʼ nuxi̱ʼ rí nikhánúu maʼni: España ga̱jma̱a̱ Portugal, náa xóó tsejuiʼtáraʼa ajngáa rí májánʼ. Índo̱ gáʼga̱nú, mariyaʼ awan mu ndxájulú Joseph F. Rutherford maxná discurso rí nagájnuu náa Biblia ga̱jma̱a̱ maxnáraʼa mbá 300,000 tratados.

Ndxájulú Young ni̱jkha̱nú náa Lisboa (Portugal) nákha tsiguʼ 1925. Nákha ikhú, xkujndu dí rígá náa xuajen nindxu̱u̱ gakhi̱i̱. Revolución republicana nákha tsiguʼ 1910 niʼni gámbáa rí nutañajunʼ Xa̱bu̱ Ñajunʼ ga̱jma̱a̱ niʼni gámbáa ñajunʼ rí nuni bi̱ kuwa náa guʼwá ndxajkun Católica. Ikha jngó xa̱bu̱ xuajen nuni asndu rí eñún, mú dí ra̱májánʼ narígá má xúʼko̱ náa xuajen.

Índo̱ ndxájulú George Young gíʼdoo má xawii xúgíʼ mu ndxájulú Rutherford maxná mbá discurso, Xa̱bu̱ Ñajunʼ nigruigi̱i̱n policías muñewa̱a̱n numuu rí xa̱bu̱ nigíʼ muriyaʼ kaʼyííʼ ñajunʼ ndrígóo Xa̱bu̱ Ñajunʼ. Secretario náa Sociedad Bíblica Británica ga̱jma̱a̱ Extranjera niʼthúu̱n ndxájulú Young rí maraʼnuu mbaʼa xkujndu. Maski ajndu xúʼko̱, ninda̱ʼa̱ permiso mu majmaa gimnasio ndrígóo Escuela Secundaria Camões, ga̱jma̱a̱ nitháán rí ma̱ndoo.

Ni̱ʼkha̱nú nákha 13 ñajunʼ gu̱nʼ mayo, mbiʼi rí mixná discurso, ga̱jma̱a̱ xa̱bu̱ ra̱ʼkhá tháán niguáʼthi̱i̱n. Mbaʼa i̱yi̱i̱ʼ tima náa guʼwá mba̱ʼu̱ ga̱jma̱a̱ anuncios náa periódicos náa naʼthí ga̱jma̱a̱ numuu discurso rí kayá edxu̱u̱ “Xú káʼnii gakuwáanʼ kámuu mbiʼi náa tsu̱du̱u̱ Ku̱ba̱ʼ”. Xa̱bu̱ sia̱nʼ náa i̱ʼwáʼ religión nacha̱ niriyaʼ mbá i̱yi̱i̱ʼ náa periódico ndrígu̱ún mu muthún xa̱bu̱ rí niguwáʼ “gaʼyee bi̱ minduwiinʼ”. Náa xkrugoo gimnasio, ma̱ngaa nixnaraʼa mbaʼa folletos náa naʼthí rí nduwaʼ nindxu̱u̱ kiʼsngáa rí maxná ndxájulú Rutherford.

Maski ajndu xúʼko̱, mbá a̱jma̱ mil xa̱bu̱ niguwáʼ ga̱jma̱a̱ xóó imbá taphi̱i̱n táʼngu̱u̱n gátu̱ʼu̱u̱n. Tikhun xa̱bu̱ ra̱ʼkhá tháán nindúún mbuyáá rí asndu nitsimún náa escalera rí kiʼni ga̱jma̱a̱ ñuu dí rígá náa níjniúu gimnasio ga̱jma̱a̱ eʼwíínʼ nitri̱gi̱i̱n tsu̱du̱u̱ ajua̱nʼ náa nuni ejercicio.

Mú raʼkháa xúgíʼ nigájnuu májánʼ. Xa̱bu̱ sia̱nʼ nindxa̱ʼwa̱ ga̱jma̱a̱ nini gámbáa xílí. Mú, ndxájulú Rutherford tákiʼnáa ga̱jma̱a̱ nitsimuu náa inuu mesa mu xa̱bu̱ mudxawíín. Índo̱ niguámbóo, inu maʼni tikhu nduʼun, itháan rí mbá mil a̱jma̱ ciento xa̱bu̱ niniñaʼ mbiʼñún ga̱jma̱a̱ náa kuwa mu makhánun i̱yi̱i̱ʼ ndrígóo Biblia. Periódico O Século niríyaʼ imbo̱o̱ mbiʼi i̱yi̱i̱ʼ náa niʼthí ga̱jma̱a̱ numuu discurso.

Nákha gu̱nʼ septiembre tsiguʼ 1925, nigi̱ʼdu̱u̱ nigájnuu náa Portugal i̱yi̱i̱ʼ náa ajngáa portugués ndrígóo La Torre del Vigía, rí xúgi̱ najmaʼnuʼ xóo Bi̱ Nayejngoo (nákha ikhú náa Brasil nigájnuu má náa ajngáa portugués revista rígi̱). Ikhú, mbáa bi̱ Naʼnigajmaa  Biblia bi̱ xtáa náa Brasil bi̱ mbiʼyuu Virgílio Ferguson nigíʼdu̱u̱ niríyaʼ awan mu maʼga̱ gáxtáa náa Portugal ga̱jma̱a̱ mayambáá mu miʼtáraʼa ga̱jma̱a̱ numuu Reino. Ikhaa ga̱jma̱a̱ George Young niñajunʼ mbóó náa mbá sucursal chíʼgíʼ ndrígu̱ún bi̱ Nunigajmaa Biblia náa Brasil. Virgílio ga̱jma̱a̱ a̱ʼgiu̱u̱, Lizzie, tájyúuʼ índo̱ nirajtuun barco mu magún Portugal mu ikhí muxkama̱a̱ mbu̱júu̱. Májánʼ rí niguánu nákha ikhú, numuu rí inuu maʼga̱ gáʼtaraʼa ndxájulú Young náa i̱ʼwáʼ xuajen, xó má náa Unión Soviética.

Índo̱ soldados nigíʼ mbáa Xa̱bu̱ Ñajunʼ bi̱ i̱ndó ikhaa gagiʼdoo tsiakii, nirígá itháan xkujndu ga̱jma̱a̱ ñajunʼ rí nuʼni. Mú ndxájulú Ferguson niwi̱ji̱ jmbu. Ndiyááʼ xóo mambáñun mbá nguáthi̱i̱n bi̱ Nunigajmaa Biblia ga̱jma̱a̱ rí xúniñaʼ runi ñajunʼ ndrígu̱ún, ga̱jma̱a̱ ninda̱ʼa̱ permiso mu marigá reunión náa goʼwóo. Nákha gu̱nʼ octubre tsiguʼ 1927, Xa̱bu̱ Ñajunʼ nitháán rí ma̱ndoo.

Nákha tsiguʼ rí nigi̱ʼi̱ Xa̱bu̱ Ñajunʼ bugi̱, mbá a̱jkhu̱ ciento a̱jma̱ skiñúʼ gu̱wi̱nʼ xa̱bu̱ niniraʼmáʼ mbiʼñún náa La Torre del Vigía. Ma̱ngaa ga̱jma̱a̱ numuu tratados ga̱jma̱a̱ folletos, rí gajkhun ni̱jkha̱nú asndu itháan mitsínguánʼ náa naʼtáñajunʼ Imperio portugués: Angola, Azores, Cabo Verde, Goa (India), Madeira, Mozambique ga̱jma̱a̱ Timor Oriental.

Nákha tsiguʼ 1929, ni̱ʼkha̱nú náa Lisboa mbáa xa̱bu̱ guabaaʼ bi̱ nañajunʼ náa ixi̱ ri̱ʼi̱ bi̱ mbiʼyuu Manuel da Silva Jordão. Nákha xóó xtáa náa Brasil, niʼdxaun mbá discurso rí nixná ndxájulú Young. Núkhu ndiʼyoo dí rígi̱ nindxu̱u̱ gajkhun, ga̱jma̱a̱ ra̱ʼkhá tháán nindoo mambáyúu ndxájulú Ferguson mu maʼtáruʼun itháan xa̱bu̱ ga̱jma̱a̱ numuu Reino. Ikha jngó, Manuel ninindxu̱u̱ colportor, xóo egumbiʼñún precursores nákha ikhú. Numuu rí xóo egájnuu ga̱jma̱a̱ xóo ejuixná i̱yi̱i̱ʼ rí nagájnuu náa Biblia awan rígá xúgíʼ, congregación ndrígóo Lisboa niʼni itháan mba̱a̱.

A̱ngiu̱lú Ferguson ndiyóoʼ matangi̱i̱n Brasil nákha tsiguʼ 1934. Mú tsígáʼ rí gajkhun nijuiʼdu má náa Portugal. Maski ajndu nirígá wéñuʼ xkujndu náa Europa ga̱jma̱a̱ numuu guerra civil española ga̱jma̱a̱ raga̱jma̱ Guerra náa Xúgíʼ Numbaaʼ, mbá nguéjmi̱i̱n a̱ngiu̱lú portugueses niʼngu̱u̱n niguájun jmbu náa Dios. Nguáthá mbiʼi, a̱ngiu̱lú bugi̱ ninindxu̱ún xó mbá rutsi̱i̱ cha̱mbu̱ʼ. Mú aguʼ ndrígu̱ún nika̱ma̱a̱ nákha tsiguʼ 1947 índo̱ ni̱ʼkha̱nú timbáa misionero bi̱ nijuiʼsngáá náa Galaad, John Cooke. Asndu nákha ikhú, ni̱jkha̱ raʼni itháan mbaʼin publicadores. Ga̱jma̱a̱ ni̱jkha̱ raja má xúʼko̱ maski ajndu nákha tsiguʼ 1962 Xa̱bu̱ Ñajunʼ nitsiji ñajunʼ ndrígúlú. Nákha gu̱nʼ diciembre tsiguʼ 1974, índo̱ Xa̱bu̱ Ñajunʼ niniʼnuʼ ñajunʼ ndrígu̱ún xa̱bi̱i̱ Jeobá, nikuwa itháan rí gu̱wa̱ʼ i̱jtsu̱ mil publicadores náa xuajen mba̱a̱ rúʼko̱.

Rí mbiʼi xúgi̱, itháan rí mbá a̱jma̱ skiñúʼ gu̱wa̱ʼ mil publicadores etaraʼa ga̱jma̱a̱ numuu Reino ndrígóo Dios náa Portugal ga̱jma̱a̱ náa mbaʼa xuajen náa nuthi portugués, xóo Azores ga̱jma̱a̱ Madeira. Náa ikhiin kuwa mangiin tikhun e̱jín xíñúʼ bi̱ nikuwa náa discurso ndrígóo ndxájulú Rutherford nákha tsiguʼ 1925.

Nuxnáa núma̱aʼ Jeobá ga̱jma̱a̱ a̱ngiu̱lú bi̱ nikuwa jmbu bi̱ nidu tsígáʼ ndrígóo Reino ga̱jma̱a̱ tsiakii ga̱jma̱a̱ ninindxu̱ún xóo niʼthí Pablo, xa̱bi̱i̱ Cristo Jesús náa xuajen mba̱ʼu̱ (Rom. 15:15, 16). (I̱yu̱lú rí nixtagixi̱i̱ náa Portugal).