GA̱JMA̱A̱ numuu xkujndu dí narígá náa “iwáá mbiʼi” rí kuwáanʼlu naʼni itháan gakhi̱i̱, bi̱ ni̱ndxu̱lú xa̱bi̱i̱ Jeobá ndaʼyúlú itháan rí maʼngo̱o̱ a̱jkiu̱lú (2 Tim. 3:1-5). Xa̱bu̱ numbaaʼ náa kuwaanʼlú i̱ndó nandún kuyamijná ikhiin, tsíñún gunimbánii xkujndu ga̱jma̱a̱ tsíñewa̱a̱n rí nuni. Ikhiin ni̱ndxu̱ún xa̱bu̱ bi̱ tséʼngo̱o̱ a̱jkiu̱ún. Ikha jngó, xúgiáanʼ bi̱ ni̱ndxu̱lú cristiano gíʼmáanʼ muraximíjna̱: “Lá ni̱ndxu̱ʼ xóo xa̱bu̱ numbaaʼ bi̱ tséʼngo̱o̱ a̱jkiu̱u̱n ráʼ. Ndiéjunʼ eyoo gáʼthúu̱n rí maʼngo̱o̱ a̱jkiu̱nʼ rá. Xú káʼnii gándoo gáni rí cualidad rígi̱ rí májánʼ wéñuʼ marigá má xúʼko̱ náa ikhúúnʼ rá.”

Náa Biblia, rí maʼngo̱o̱ a̱jkia̱nʼ nandoo gáʼthúu̱n itháan ki xóo maʼngaaʼ matraʼníí xkujndu rí mingíjyúuʼ. Nandoo gáʼthúu̱n rí maʼngaaʼ mu xátanimbáti̱ga̱ rí xtaʼti̱i̱n. Índo̱ naʼngo̱o̱ a̱jkiu̱lú, tsindxa̱ʼwa̱míjna̱ i̱ndó ga̱jma̱a̱ numuu rí ndaʼyulú ikháanʼ, ma̱ngaa nundxa̱ʼwa̱míjna̱ ga̱jma̱a̱ numún eʼwíínʼ, asndu bi̱ naʼniulú dí ra̱májánʼ. Tsíyulú muniʼñáʼ rambáxulú gajmiúlú ga̱jma̱a̱ kuaʼthi̱i̱n rí mambaxíiʼ gajmiúlú. Ikha jngó tséʼniulú tsiánguá rí náa Ajngá rawunʼ Dios naʼthí rí maʼngo̱o̱ a̱jkiu̱lú na̱ʼkha̱ náa ngajua (1 Cor. 13:4). * Ma̱ngaa na̱ʼkha̱ náa rí naxná “xi̱ʼ kaʼwu” (Gál. 5:22, 23). Ikha jngó, ndiéjunʼ eʼyúlú mu maʼngo̱o̱ a̱jkiu̱lú rá.

Mu maʼngo̱o̱ a̱jkiu̱lú, gíʼmáanʼ munda̱ʼa̱a̱ Jeobá rí maxnúlúʼ xi̱ʼ kaʼwu ndrígóo, ikhaa naxnún bi̱ nakumu̱ún kuyáá (Luc. 11:13). Ikha jngó maski ajndu xi̱ʼ kaʼwu ndrígóo gíʼdoo tsiakii, ndayóoʼ muʼnimbánii ga̱jma̱a̱ muʼgíʼ muʼni rí nunda̱ʼa̱ (Sal. 86:10, 11). Xóo muʼthá, tsejtsi gíʼmáanʼ muʼnimíjna̱ xó má eʼngo̱o̱ mu maʼngo̱o̱ a̱jkiu̱lú mu cualidad rígi̱ marigá náa a̱jkiu̱lú. Maski ajndu xúʼko̱, ndayóoʼ muʼnimíjna̱ itháan mu marigá má xúʼko̱ náa a̱jkiu̱lú. Ndiéjunʼ i̱ʼwáʼ rí ma̱ndoo mambáyulúʼ rá.

Ma̱ndoo muguaʼdáá rí maʼngo̱o̱ a̱jkiu̱lú á mu nduʼyaridáá xkri̱da jmbu ndrígóo Jesús. Índo̱ apóstol Pablo niʼthí ga̱jma̱a̱ numuu rí “muriʼkumijná rí xú káʼnii nindxulú”, ma̱ngaa rí “gaʼngo̱o̱ a̱jkiu̱lú”, niʼthún cristianos: “Tsímáá rí na̱ʼkha̱ náa Cristo gáʼtañajunʼ náa a̱jkia̱la” (Col. 3:10, 12, 15). Mu tsímáá rúʼko̱ “gáʼtañajunʼ” náa a̱jkiu̱lú, gíʼmáanʼ mbuʼyaridáá fe ndrígóo Jesús rí Dios má gaʼnimbánuu xkujndu rí naʼni maxmiéjunʼlú índo̱ gáʼga̱nú mbiʼi. Á mu nduʼyaridáá Cristo, nimbá xáʼngo̱o̱ gáʼni muʼnimbáti̱ga̱ rí muʼni mba̱a̱ a̱jkiu̱lú, tséʼniuu ndiéjunʼ má gárígá náa kuwáanʼlu (Juan 14:27; 16:33).

Maski ajndu ra̱ʼkhá tháán eyulú ma̱ʼkha̱ numbaaʼ nuxi̱ʼ rí Dios ekudaminaʼ, najmañulúʼ rí gíʼmaa maʼngo̱o̱ a̱jkiu̱lú índo̱ nduʼyaridáá  rí xóo eʼngo̱o̱ a̱jkiu̱u̱n kaʼyulú. Náa Santas Escrituras naʼthúlúʼ: “Jeobá na̱nguá ejyúuʼ ga̱jma̱a̱ numuu rí naʼthí maʼni, xóo eyáá tikhun xa̱bu̱, mú ikhaa naʼngo̱o̱ a̱jkiu̱u̱n numuu rí nimbáa tsíyoo mandáti̱ga̱a̱; ikhaa nandoo rí xúgínʼ maguanu mata̱nga̱a̱ a̱jkiu̱ún” (2 Ped. 3:9). Lá ragájkhun rí mundxaʼwamíjna̱ xóo eʼngo̱o̱ a̱jkiu̱u̱n Jeobá naxkaxáanʼ mu mangáanʼ maʼngo̱o̱ a̱jkiu̱lú kuʼñúún eʼwíínʼ ráʼ. (Rom. 2:4.) Ga̱jma̱a̱ numuu rígi̱, guʼyáá tikhuu náa mbaʼyóoʼ maʼngo̱o̱ a̱jkiu̱lú.

Mbaʼa xkujndu rí nuraʼníí tsejtsí mbiʼi naʼni makujmaa á mu naʼngo̱o̱ a̱jkiu̱lú. Mbá xkri̱da, á mu nduʼyáá rí gíʼdoo numuu mbá rí kuaʼdáá muʼthá, itháan májánʼ rí maʼngo̱o̱ a̱jkiu̱lú mu xúrujturígú káñúnʼ rí nutamijná eʼwíínʼ (Sant. 1:19). Mbáa ma̱ngaa mbaʼyóoʼ maʼngo̱o̱ a̱jkiu̱lú índo̱ kuwáanʼ gajmiúlú a̱ngiu̱lú bi̱ naguʼún nuni rí ikháanʼ tsénigulú. Xákiʼnáanʼ, itháan májánʼ mundxaʼwamíjna̱ xóo eʼngo̱o̱ a̱jkiu̱u̱n Jeobá ga̱jma̱a̱ Jesús índo̱ rígá rí tséʼngulú gúʼnimbánii. Ikhiin tsiyexi̱i̱ dí naʼnitígu̱lú xóo dí ragíʼdoo wéñuʼ numuu. Ikhiin nduyáá rí májánʼ ga̱jma̱a̱ tsiakii rí nuʼni mu muʼni itháan májánʼ (1 Tim. 1:16; 1 Ped. 3:12).

Ma̱ngaa ma̱ndoo makujmaa á mu naʼngo̱o̱ a̱jkiu̱lú índo̱ mbáa naʼthí rí ni̱ʼni̱ o niʼthá dí ra̱májánʼ. Á mu xúʼko̱ rígá, ra̱mingíjyúuʼ gáʼni rí makiʼnáanʼ o mbuʼyááʼ rí muʼthá. Mú náa Ajngá rawunʼ Dios naʼthúlúʼ rí gíʼmaa mundxaʼwamíjna̱ i̱mba̱ núthu: “Itháan májánʼ bi̱ naʼngo̱o̱ a̱jkiu̱u̱n ki xóo bi̱ nakuximinaʼ. Itháan májánʼ índo̱ naguámbáa ki xóo índo̱ nagi̱ʼdu̱u̱. Itháan májánʼ bi̱ naʼngo̱o̱ a̱jkiu̱u̱n ki xóo bi̱ nakuximinaʼ” (Ecl. 7:8, 9). Ikha jngó á mu mbá xkujndu nindxu̱u̱ ragájkhun, gíʼmaa maʼngo̱o̱ a̱jkiu̱lú mu mbuʼyáá rí guriʼña̱a̱. Rúʼko̱ rí niʼni Jesús índo̱ ikhaa nitsijmaa (Mat. 11:19).

Xa̱bu̱ bi̱ guáʼdiin e̱ji̱n gíʼmaa maʼngo̱o̱ a̱jkiu̱ún índo̱ ndayóoʼ muxprigún e̱jñún índo̱ nuni dí ra̱májánʼ, rí nandún muni ga̱jma̱a̱ rí naguʼwún nuni. Gundxaʼwamíjna̱ ga̱jma̱a̱ numuu mbáa ndxájulú bi̱ xtáa náa Betel náa Escandinavia bi̱ mbiʼyuu Mattias. Nákha ikhaa nindxu̱u̱ dxámá, xúgíʼ mbiʼi nutsijmaa náa escuela ga̱jma̱a̱ numuu rí naʼnimbo̱o̱. Nákha ginii, anu̱u̱ ga̱jma̱a̱ ru̱dúu̱ tséyáá nditháan ga̱jma̱a̱ numuu rígi̱. Mú ndiyóoʼ munimíjna̱ ga̱jma̱a̱ numuu xkujndu rí nigiʼdoo aʼdiún, numuu rí ikhaa nánguá eʼnimbo̱o̱ májánʼ náa rí gajkhun. Anu̱u̱, Gillis, narmáʼáan a̱jkiu̱u̱n: “Ndiyóoʼ maʼngo̱o̱ wéñuʼ a̱jkiu̱xuʼ”. Mattias naraximínáʼ xóo graxe̱ rígi̱: “Tsáa nindxu̱u̱ Dios rá. Á mu Biblia raʼkháa Ajngá rawunʼ xá. Xú káʼnii eʼyáá á mu Dios naʼthúlú muʼni rígi̱ o ríñun rá.” Ma̱ngaa naʼthúu̱n anu̱u̱: “I̱ndó numuu rí tsenimbooʼ rí nunimbala ikháanʼ ikha jngó nuta númuʼ ráʼ.”

Gillis naʼthí: “Nguáná aʼdiúxu naʼthí sngañuʼ, raʼkháa ga̱jma̱a̱ numuu ru̱dúu̱ o ga̱jma̱a̱ numuʼ ikhúúnʼ, naʼthí ga̱jma̱a̱ numuu rí gajkhun, rí gajkhun gíʼdoo aʼkhúun rí ikhaa gíʼdoo xkujndu rígi̱”. Ndiéjunʼ niʼni Gillis rá. “Mbaʼa nuthu niʼgúnʼ ga̱jmu̱ʼ ga̱jma̱a̱ nutamíjnáxu mba̱yu̱ʼ hora. Rí nani nadxawun ga̱jma̱a̱ nguáná naniu̱u̱ graxe̱ mu makro̱ʼo̱ʼ májánʼ  rí eku̱mu̱u̱ ga̱jma̱a̱ rí nandxa̱ʼwáminaʼ. Mbá miʼtsú nirígá rí ni̱thu̱u̱n mu mandxaʼwáminaʼ mbá xngaa o mbá mbiʼi índo̱ mutamíjnáxu mbu̱júu̱. Nguáná ndiyóoʼ mathu̱u̱n rí ndayóoʼ i̱ʼwáʼ mbiʼi mu mandxa̱ʼwa̱mínáʼ ga̱jma̱a̱ numuu rí niʼthúnʼ. Ga̱jma̱a̱ numuu rí túniʼñáʼxu rutamíjná, Mattias nigíʼdu̱u̱ nikro̱ʼo̱o̱ ga̱jma̱a̱ nigruigú rí nisngááxu ga̱jma̱a̱ numuu rí Jesús niʼtsiwáanʼ, ga̱jma̱a̱ numuu bi̱ kaʼyoo maʼtáñajunʼ ma̱ngaa ga̱jma̱a̱ numuu ngajua ndrígóo Dios. Niyéjkha̱ mba̱yu̱ʼ tsiguʼ, ga̱jma̱a̱ mbaʼa nuthu niʼniuu mingíjyúuʼ, mú ngajua rí gíʼdoo náa Jeobá mañu mañúú ni̱jkha̱ ra̱ja̱a̱. A̱ʼgiu̱ʼ ga̱jma̱a̱ ikhúúnʼ ra̱ʼkhá tháán gagi kuwáanʼxu ga̱jma̱a̱ numuu rí niʼngo̱o̱ a̱jkiu̱xuʼ ku̱ya̱a̱ Mattias numuu rí índo̱ nikhi̱i̱ nimbáyúu ga̱jma̱a̱ ni̱jkha̱nú náa a̱jkiu̱u̱n”.

Gillis ga̱jma̱a̱ a̱ʼgiu̱u̱ nikumu̱ún kuyáá Jeobá ga̱jma̱a̱ niʼngo̱o̱ a̱jkiu̱ún índo̱ nimbayíí aʼdiún. Ikhaa naʼthí: “Mbaʼa nuthu ni̱thu̱u̱n Mattias rí ikhúúnʼ ga̱jmu̱ʼ ru̱dúu̱ nanduxu ku̱ya̱a̱ wéñuʼ rí asndu nunda̱ʼa̱a̱xu Jeobá mambáyúu makro̱ʼo̱o̱”. Ra̱ʼkhá tháán edxún xa̱bu̱ gajmii bugi̱ rí niʼngo̱o̱ a̱jkiu̱ún kuyáá aʼdiún.

Cristianos bi̱ gajkhun mangiin gíʼmaa maʼngo̱o̱ a̱jkiu̱ún índo̱ nuñewu̱u̱n bi̱ kuwa náa guʼwún o índo̱ bi̱ nambáxu̱u̱n gajmiún guáʼdáá mbá nandii gakhi̱i̱. Guʼyáá ga̱jma̱a̱ numuu Ellen, * bi̱ ma̱ngaa xtáa náa Escandinavia.

Naʼni mbá migiñuʼ tsiguʼ, ajmbio̱o̱ Ellen niʼniuu mbá nandii rí niʼni gachúu ngáñuʼ, ikha jngó naʼniuu mingíjyúuʼ magaʼwíínʼ a̱jkiu̱u̱n, nánguá edxuu, nándáa rí eʼni gawúunʼ. Rígi̱ naʼni maʼni néʼngo̱o̱ Ellen. Ikhaa naʼthí: “Ndiyóoʼ maʼngo̱ʼ wéñuʼ a̱jkiu̱nʼ ga̱jma̱a̱ matajkáan má xúʼko̱”. Ga̱jma̱a̱ naʼthí xóó: “Texto rí naniguʼ wéñuʼ, rí itháan naʼni̱i̱ a̱jkiu̱nʼ nindxu̱u̱ Filipenses 4:13, náa naʼthí: ‹Náa xúgíʼ rí nandoʼ mani gúʼdoo tsiakii rí na̱ʼkha̱ náa Dios›”. Ga̱jma̱a̱ numuu tsiakii rúʼko̱, Ellen naʼngo̱o̱ a̱jkiu̱u̱n ga̱jma̱a̱ ndaʼyoo rí Jeobá nambáyúu (Sal. 62:5, 6).

Mú, xkri̱da rí itháan májánʼ nindxu̱u̱ Jeobá bi̱ naʼngo̱o̱ wéñuʼ a̱jkiu̱u̱n (2 Ped. 3:15). Náa Biblia nuxkamaa mbaʼa nuthu náa nasngájma rí ikhaa niʼngo̱o̱ a̱jkiu̱u̱n (Neh. 9:30; Is. 30:18). Mbá xkri̱da, mbuʼyáá xú káʼnii niʼni índo̱ Abrahán niraxu̱u̱ náa numuu rí maʼni gámbáa Sodoma. Timbá, ikhaa táriʼña nacha̱, rí niʼni nigíʼ edxu̱u̱ maʼdxun índo̱ Abrahán niraxu̱u̱ ga̱jma̱a̱ índo̱ niʼthúu̱n rí naʼni maxmiéjunʼ. Nda̱wa̱á Jeobá nisngájma rí niʼdxawun índo̱ niʼthúu̱n mbu̱júu̱ rí niʼni maxmiéjunʼ, ga̱jma̱a̱ niʼthúu̱n rí ikhaa xáʼni gámbáa Sodoma á mu kuwa ikhí mbá gu̱wi̱nʼ xa̱bu̱ bi̱ nuni rí jmbu (Gén. 18:22-33). ¡Nindxu̱u̱ mbá xkri̱da májánʼ rí ikhaa niʼngo̱o̱ a̱jkiu̱u̱n ga̱jma̱a̱ niñewu̱u̱n rí niʼni!

Nduʼyáá rí gíʼdoo wéñuʼ numuu rí maʼngo̱o̱ a̱jkiu̱lú xúgiáanʼ bi̱ ni̱ndxu̱lú cristianos. Á mu nuʼnimíjna̱ asndu xó má eʼngo̱o̱ mu muguaʼdáá cualidad rígi̱, mbuʼyamajkuíí Anu̱lú bi̱ xtáa mekhuíí bi̱ naʼngo̱o̱ a̱jkiu̱u̱n ga̱jma̱a̱ bi̱ nandoo kaʼyulú, ga̱jma̱a̱ makuwáanʼ náa majñu̱nʼ “bi̱ naʼngo̱o̱ a̱jkiu̱ún mu makhánun rí Dios nikudaminaʼ maxnún” (Heb. 6:10-12).