1. Ndiéjunʼ niʼtáriyaʼ Isaías ga̱jma̱a̱ numuu Jesús, ga̱jma̱a̱ náa numuu naxnúlú tsiakii rí niʼtáriyaʼ xá.

NÁA mbá rí kiʼtáriyaʼ ga̱jma̱a̱ numuu Jesús, Isaías niʼthí: “Ikhaa xánda̱ʼa̱a̱ cuenta i̱ndó xóo kiexu̱u̱ xa̱bu̱, asndu xaxprígúu nimbáa xa̱bu̱ i̱ndó rí naʼdxun kaníí ga̱jma̱a̱ numuu. Ga̱jma̱a̱ índo̱ gánda̱ʼa̱a̱ cuenta náa xa̱bu̱ gíníi maʼni ga̱jma̱a̱ májánʼ” (Is. 11:3, 4). Ajngáa rígi̱ naxnúlú wéñuʼ tsiakii. Náa numuu rá. Numuu rí kuwáanʼ náa mbá numbaaʼ náa xa̱bu̱ nutha numáá mbáa ga̱jma̱a̱ numuu rí nduyáá mbájnii. Xúgiáanʼ nandulúʼ ma̱ʼkha̱nú mbiʼi rí Jesús maʼnimbánuu numulúʼ, Juez bi̱ jmbii xáʼyoo i̱ndó xóo kiexulú.

2. Ndiéjunʼ ikha nixnúlú Jesús, ga̱jma̱a̱ ndiéjunʼ gúʼyáá náa artículo rígi̱ rá.

² Xúgíʼ mbiʼi, nundxa̱ʼwa̱míjna̱ ga̱jma̱a̱ numún eʼwíínʼ xa̱bu̱. Mú, numuu rí ni̱ndxu̱lú xa̱bu̱ aʼkhá, tséjmañulu gúʼyáá májánʼ xóo phú kaʼnii nindxu̱u̱, xóo eʼni Jesús. I̱ndó nuʼthá rí nduʼyáá ga̱jma̱a̱ idulú. Maski ajndu xúʼko̱ índo̱ Jesús nixtáa náa tsu̱du̱u̱ Ku̱ba̱ʼ, nixnúlú ikha rígi̱: “Xúthala dí ra̱májánʼ ga̱jma̱a̱ numuu rí xóo kiexu̱u̱ xa̱bu̱, mú gutala rí májánʼ ga̱jma̱a̱ rí jmbu” (Juan 7:24). Xó má eʼyáá, ikhaa nandoo rí mbuʼyaridáá xkri̱da ndrígóo ga̱jma̱a̱ rí xúʼyáá i̱ndó rí mbájnii. Náa artículo rígi̱, muʼthá ajtsú numuu rí kagujtuminaʼ ga̱jma̱a̱ rí nakumulú: Raza o rí kuwa i̱mba̱  níʼkhá, mbújkha̱a̱ ga̱jma̱a̱ tsigúnʼ xa̱bu̱. Náa mámbá enii rígi̱, mbuʼyáá xú káʼnii gándoo guʼnimbánii ikha ndrígóo Jesús.

3, 4. a) Náa numuu niriʼkuminaʼ apóstol Pedro rí xóo ndiʼñún xa̱bu̱ bi̱ na̱nguá ni̱ndxu̱ún judíos rá. (Atayáá timbá xtiʼkhu.) b) Xú káʼnii nindxu̱u̱ ku̱ma̱ nuxi̱ʼ rí niʼthúu̱n Jeobá Pedro rá.

³ Gundxaʼwamíjna̱ xúgíʼ rí nindxa̱ʼwáminaʼ apóstol Pedro índo̱ nijuiʼtháán maʼga̱ náa Cesarea, náa goʼwóo mbáa xa̱bu̱ bi̱ na̱nguá nindxu̱u̱ judío bi̱ mbiʼyuu Cornelio (Hech. 10:17-29). Xó má eʼwíínʼ judíos bi̱ nikuwa nákha mbiʼi rí nixtáa ikhaa, Pedro ndija̱a̱ náa rí xa̱bu̱ nduñún mitsagiin bi̱ na̱nguá ni̱ndxu̱ún judíos. Mú rígá rí ndiʼyoo rí niʼni mariʼkhu̱u̱ xóo endxa̱ʼwáminaʼ. Mbá xkri̱da, ndiʼyoo mbá visión ndrígóo Dios (Hech. 10:9-16). Ikhí, ndiʼyoo rí nigajtaa mbá rí xóo sábana kaʼnii, náa gajchún mbaʼin xujkhúʼ mitsagiin ga̱jma̱a̱ aʼwá rí niwáán mekhuíí niʼthúu̱n rí magudíin ga̱jma̱a̱ mikhu̱u̱n. Náa ajtsú nuthu rígi̱, niʼni gaʼduunʼ mikhu̱u̱n. Mámbá rí ikhaa niʼni gaʼduunʼ, aʼwá niʼthúu̱n: “Ní xárata rí mitsaga nindxu̱u̱ rí Dios má niʼni kaʼwu̱u̱”. Índo̱ niguámbá visión, apóstol nijngawa̱a̱n ga̱jma̱a̱ tákro̱ʼo̱o̱ rí nindoo gáʼthúu̱n aʼwá rúʼko̱. Mbiʼi má rúʼko̱, niguwáʼ ku̱ñu̱u̱n ajngáa tikhun xa̱bi̱i̱ Cornelio. Xi̱ʼ kaʼwu nixnúu ikha Pedro mu maʼga̱ náa goʼwóo xa̱bu̱ bugi̱.

⁴ Judíos nditháan tsítu̱ʼu̱u̱n náa guʼwún xa̱bu̱ bi̱ na̱nguá ni̱ndxu̱ún judíos. Ikha jngó, á mu Pedro i̱ndó ndiʼyoo xóo kiexu̱u̱, nditháan xáʼga̱ náa goʼwóo Cornelio. Mú, náa numuu ni̱jkha̱ xá. Nimbáyúu rí ndiʼyoo náa visión ga̱jma̱a̱ ikha ndrígóo xi̱ʼ kaʼwu. Nda̱wa̱á rí niʼdxuun rí niʼthí Cornelio, Pedro ni̱jkha̱níi a̱jkiu̱u̱n rí asndu niʼthí rí Dios niʼtámúʼúun maʼthí: “Ikhúúnʼ nda̱yo̱o̱ gajkhun rí Dios tsiraʼwíin xa̱bu̱, ikhaa nagruiguíin bi̱ namiñun kuyáá ga̱jma̱a̱ bi̱ nuni rí jmbu náa xúgíʼ xuajen” (Hech. 10:34, 35). Ku̱ma̱ nuxi̱ʼ rígi̱ rí nigruigú Pedro mambáñun xúgínʼ cristianos. Xú káʼnii rá.

5. a) Ndiéjunʼ eyoo Jeobá makru̱ʼu̱lú xúgiáanʼ bi̱ ni̱ndxu̱lú cristianos rá. b) Maski ajndu nduʼyáá rí Dios tsiraʼwíin xa̱bu̱, ndiéjunʼ nindxu̱u̱ rí ma̱ndoo marigá má xúʼko̱ náa ikháanʼlu rá.

⁵ Ga̱jma̱a̱ numuu Pedro, Jeobá nimbáñun xúgínʼ cristianos mu makru̱ʼu̱u̱n rí ikhaa tsiraʼwíin xa̱bu̱. Dios tséʼniuu á mu mixtiʼkhu raza ndrígu̱ún, xuajñún, tribu ga̱jma̱a̱ ajngún. Ikhaa nagruigúun xúgínʼ xa̱bekha ga̱jma̱a̱ gu̱ʼu̱ bi̱ namiñun kuyáá ga̱jma̱a̱ bi̱ nuni rí jmbu (Gál. 3:26-28; Rev. 7:9, 10). Mbáa xúgiáanʼ bi̱ ni̱ndxu̱lú cristianos nduʼyáá dí rígi̱ gajkhun nindxu̱u̱ ga̱jma̱a̱ nundxa̱ʼwa̱míjna̱ rí tsiraʼwíin xa̱bu̱. Ikha jngó, á mu ndijáanʼ náa rí xa̱bu̱ nduñún eʼwíínʼ xóo rí ni̱ndxu̱ún mbájniin, mbáa náa awúu̱n a̱jkiu̱lú gíwanʼ rígi̱. Asndu Pedro, bi̱ nikánaa ñajunʼ rí mambáñun eʼwíínʼ mu mbuyáá rí Dios tsiraʼwíin xa̱bu̱, nguáthá mbiʼi nda̱wa̱á nisngájma rí xóó ndaʼñún xa̱bu̱ xóo nákha ginii (Gál. 2:11, 14). Ikha jngó, xú káʼnii guʼnimbánii ikha ndrígóo Jesús ga̱jma̱a̱ muniʼñáʼ ruʼñúún xa̱bu̱ xóo kiexu̱u̱n rá.

6. a) Ndiéjunʼ gambáyulú mu muríyaʼ náa a̱jkiu̱lú rí xóo eʼñún xa̱bu̱ rá. b) Ndiéjunʼ nikujmaa náa informe dí nikunguanʼ mbáa ndxájulú rá.

⁶ Mu mbuʼyáá á mu rígi̱ rígá xóó náa awúu̱n a̱jkiu̱lú, ndayóoʼ muʼni mbríguii dí nuʼnilú ga̱jma̱a̱ dí najmañulúʼ náa Ajngá rawunʼ Dios (Sal. 119:105). Ma̱ngaa ma̱ndoo muraxi̱i̱ mbáa bi̱ nambáxulúʼ májánʼ gajmiúlú á mu ndaʼyoo rí xóó nduʼñún eʼwíínʼ ga̱jma̱a̱ rí xóo kiexu̱u̱n (Gál. 2:11, 14). Ma̱ndoo marigá rígi̱ náa ikháanʼlu rí asndu tséʼyáá xú káʼnii e̱ʼni̱. Guʼyáá xkri̱da ndrígóo mbáa ndxájulú bi̱ gajkuáa ñawúunʼ mbá ñajunʼ, ikhaa nikunguanʼ mbá informe náa sucursal ga̱jma̱a̱ numún xa̱bu̱ gajmii bi̱ kuwa jmbu ruñajunʼ káxi̱. Ndxájulú xa̱biya̱ na̱ʼkha̱  náa mbá xuajen chíʼgíʼ, náa mbaʼin xa̱bu̱ tsíñún gúñún. Ndxájulú bi̱ nikunguanʼ informe táʼyoo rí ikhaa ma̱ngaa tsíyoo gáʼñun xa̱bu̱ bi̱ kuwa náa xuajen rúʼko̱. Maski ajndu mbaʼa rí májánʼ dí niʼnirámáʼ ga̱jma̱a̱ numuu ndxájulú buʼko̱, náa iwáá kayuʼ niʼthí: “Maski ajndu na̱ʼkha̱ náa xuajen rúʼko̱, costumbre ndrígóo ga̱jma̱a̱ xóo xtáa nambáñun eʼwíínʼ makru̱ʼu̱u̱n dí mbáa xa̱bu̱ bi̱ na̱ʼkha̱ náa xuajen rúʼko̱ tsíyoo gáʼthi rí ikhaa xtáa xó má kuwa eʼwíínʼ”. Lá nikru̱ʼu̱lú ráʼ. Tséʼniuu káʼnii ñajunʼ gajkuáa ñawúnlú muʼni náa xuajñu Dios, gíʼmaa mbuʼyamijná tsumáá ga̱jma̱a̱ muniʼñáʼ rí eʼwíínʼ mbuyáá á mu xóó rígá náa a̱jkiu̱lú rí nduʼñún xóo kiexu̱u̱n xa̱bu̱. Ndiéjunʼ xóó itháan gándoo muʼni rá.

7. Xú káʼnii gándoo gusngajmá rí nimbáʼtaa xúgíʼ a̱jkiu̱lú rá.

⁷ Á mu numbáʼtaa xúgíʼ a̱jkiu̱lú, ngajua rí kuaʼdáá maʼni gámbáa rí xóo eʼñún eʼwíínʼ rí mbájniin (2 Cor. 6:11-13). Lá naguʼwunlú mambaxúlúʼ gajmiúlú i̱ndó bi̱ nuthi ajngúlú, raza ndrígúlú, xuajñulú, tribu ndrígúlú ráʼ. Á mu xúʼko̱, guʼgíʼ mambaxúlúʼ gajmiúlú eʼwíínʼ bi̱ mixtiʼkun xóo ikháanʼ. Náa numuu rí tséʼthún mu̱ʼgua̱ gúʼtaraʼa gajmiúlú o magún guphiʼtsu náa guʼwúlú o makuwa gajmiún eʼwíínʼ a̱ngiu̱lú rá. (Hech. 16:14, 15.) Á mu nuʼni, náa a̱jkiu̱lú marigá wéñuʼ ngajua ga̱jma̱a̱ maʼni rí xúʼyáá xa̱bu̱ i̱ndó xóo kiexu̱u̱. Mú, ma̱ngaa rígá i̱ʼwáʼ rí xóó maʼniulú mbuʼñún i̱mba̱ núthu eʼwíínʼ, xóo mbújkha̱a̱.

8. Xó má eʼthí náa Levítico 19:15, ndiéjunʼ gándoo gáʼni gachúu rí xóo eʼñún eʼwíínʼ rá.

⁸ I̱mba̱ rí maʼniulú rí mbuʼñún i̱mba̱ núthu eʼwíínʼ nindxu̱u̱ mbújkha̱a̱. Rúʼko̱ eʼthí náa Levítico 19:15 índo̱ naʼthí: “Ragíʼmaa matani dí ra̱májánʼ náa nambánuu xkujndu. Xátani̱i̱ dí raʼkhí bi̱ migínáa ga̱jma̱a̱ xátani̱i̱ rí májánʼ bi̱ gíʼdoo wéñuʼ. Ga̱jma̱a̱ rí jmbu gíʼmaa matanimbánii xkujndu ndrígóo ndxájuaʼ”. Xú káʼnii gándoo gúʼñúún xa̱bu̱ bi̱ guáʼdáá mbújkha̱a̱ o bi̱ migíníi rá.

9. Ndiéjunʼ ajngáa niʼnirámáʼ Salomón ga̱jma̱a̱ ndiéjunʼ ejmañulú rá.

⁹ Ga̱jma̱a̱ numuu xi̱ʼ kaʼwu, Salomón niʼnirámáʼ ajngáa rígi̱ ga̱jma̱a̱ numún xa̱bu̱ aʼkhá: “Xa̱bu̱ gínáa, naguiñunʼ kuyáá bi̱ kuwa mijngii náa xtáa, mú bi̱ gíʼdoo wéñuʼ gíʼdiin mbaʼin bi̱ nambáxu̱u̱ gajmíi̱n” (Prov. 14:20). Ndiéjunʼ ejmañuluʼ náa proverbio rígi̱ rá. Rí á mu tsiñewumíjna̱ mbuʼyááʼ mambáxulúʼ gajmiúlú a̱ngiu̱lú bi̱ guáʼdáá mbújkha̱a̱ ga̱jma̱a̱ muniʼñáʼ rambáxulú gajmiúlú bi̱ raguáʼdáá. Ndíjkha jngó migamíi mbuʼñún eʼwíínʼ rí guáʼdáá numún ga̱jma̱a̱ numuu mbújku̱ún xá.

10. Náa biʼyaa xkujndu rí niʼthí Santiago rá.

¹⁰ Á mu nduʼñún eʼwíínʼ ga̱jma̱a̱ numuu mbújku̱ún, mbáa muʼni rí xambáxu̱u̱n náa congregación. Nákha siglo timbá, discípulo Santiago niʼthí rí xkujndu rígi̱ niʼni markuajimíjná náa congregación (atraxnuu Santiago 2:3, 4). * Xúniʼñáʼ dí rígi̱ marigá náa congregación ndrígúlú. Xú káʼnii gúʼni gaʼduunʼ tsáʼkhá rígi̱ rá.

11. Lá ma̱ndoo mambaxúlúʼ gajmiúlú Jeobá á mu kuaʼdáá o na̱nguá kuaʼdáá mbújkha̱a̱ ráʼ. Arathá.

¹¹ Gíʼmáanʼ mbuʼñún a̱ngiu̱lú xó má eʼñún Jeobá. Ikhaa tséngajo̱o̱ kaʼñún numuu rí guáʼdáá o raguáʼdáá. Rí mambáxulúʼ gajmiúlú Dios tséyóóʼ má maguaʼdáá o xaguáʼdáá. Gajkhun rí Jesús niʼthí rí “maʼni mingíjyúuʼ rí xa̱bu̱ bi̱ gíʼdoo wéñuʼ mato̱ʼo̱o̱ náa reino dí rígá mekhuíí”, mú táʼthi rí xándoo (Mat. 19:23). Ma̱ngaa Jesús niʼthí: “Gagi kuwáanʼ  ikháanʼ, bi̱ migínáanʼ, numuu rí ikháanʼ kaʼyala reino ndrígóo Dios” (Luc. 6:20). Gajkhun má, ga̱jma̱a̱ numuu rígi̱ tándoo gáʼthí rí xúgínʼ xa̱bu̱ bi̱ migíníi mudxawíín ga̱jma̱a̱ maguma tsajkurámiinʼ. Gajkhun má nikuwa mbaʼin bi̱ migíníi bi̱ tánindxu̱ún xa̱bi̱i̱. Xándoo muʼthálú rí mbáa xa̱bu̱ nambáxu̱u̱ ga̱jma̱a̱ Jeobá o na̱nguá numuu rí gíʼdoo mbújkha̱a̱.

12. Ndiéjunʼ eʼthúún Biblia bi̱ guáʼdáá mbújkha̱a̱ ga̱jma̱a̱ bi̱ migíníi rá.

¹² Náa xuajñu Jeobá kuwa mbaʼin a̱ngiu̱lú xa̱bekha ga̱jma̱a̱ gu̱ʼu̱ bi̱ nandún kuyáá ma̱ngaa nuni ñajunʼ ga̱jma̱a̱ xúgíʼ a̱jkiu̱ún. Tikhun guáʼdáá mbújkha̱a̱ ga̱jma̱a̱ eʼwíínʼ migíníi. Biblia naxnún ikha rígi̱ bi̱ guáʼdáá mbújkha̱a̱: “Rí makumún kuyáá Dios raʼkháa náa riqueza dí ragájkhun” (atraxnuu 1 Timoteo 6:17-19). * Ikhú má naʼthúún xúgínʼ xa̱bi̱i̱ Dios, tséʼniuu á mu guáʼdáá o á mu migíníi, rí migamíi rí manigu̱nʼ wéñuʼ mbújkha̱a̱ (1 Tim. 6:9, 10). Á mu nduʼyáá májánʼ ga̱jma̱a̱ nduʼñún a̱ngiu̱lú xóo eʼñún Jeobá, xúʼñún i̱ndó á mu guáʼdáá mbújkha̱a̱ o na̱nguá. Mú, lá májánʼ nindxu̱u̱ rí mbuʼñún ga̱jma̱a̱ numuu tsigúnʼ xáʼ. Guʼyáá.

13. Ndiéjunʼ eʼthúlú náa Biblia ga̱jma̱a̱ rí xóo gíʼmaa magumii xa̱bu̱ guanii rá.

¹³ Biblia naʼthúlúʼ mbaʼa nuthu rí guʼyamajkún xó má kaʼyoo bi̱ guanii. Náa Levítico 19:32 naʼthúlúʼ: “Gíʼmaa matuxaʼ náa xtaʼwún mu mutrigi̱i̱n xa̱bu̱ guanuu, ga̱jma̱a̱ gíʼmaa matasnga̱jmá gamajkhu náa xa̱bu̱ nikhi̱i̱, ga̱jma̱a̱ gíʼmaa matani numuu rí namíñaʼ xtayáá Dios ndrígáʼ”. Náa Proverbios 16:31 naʼthúlúʼ rí “ngiʼxá nindxu̱u̱ mbá corona rí mitsaan wéñuʼ índo̱ rígá náa kamba̱a̱ rí jmbu”. Ga̱jma̱a̱ apóstol Pablo niʼthúu̱n Timoteo rí xáʼtha numuu mbáa xa̱bu̱ nikhi̱i̱, itháan májánʼ rí maxnúu xtágabu ‹xóo mbáa anu̱u̱› (1 Tim. 5:1, 2). Maski ajndu Timoteo gajkuáa ñawúunʼ mbá ñajunʼ rí gíʼdoo numuu náa a̱ngiu̱lú bugi̱, ndiyóoʼ rí mbaʼyamajkún ga̱jma̱a̱ magaʼwíínʼ a̱jkiu̱u̱n kaʼñún.

14. Nguánáa gándoo guxpríguii mbáa xa̱bu̱ bi̱ itháan nikhi̱i̱ ki xóo ikháanʼlu rá.

¹⁴ Ndiéjunʼ gárígá á mu mbáa ndxájulú nikhi̱i̱ nakudaminaʼ aʼkhá maski ajndu ndaʼyoo dí ra̱májánʼ nindxu̱u̱ o naʼni mamidxu̱u̱ mbá rí tsénigu̱ʼ Dios rá. Jeobá xánda̱ʼa̱a̱ cuenta ga̱jma̱a̱ numuu rí xóo kiexu̱u̱, ikha jngó xáʼni mba̱a̱ a̱jkiu̱u̱n kaʼyoo mbáa bi̱ nikudaminaʼ aʼkhá mba̱a̱ i̱ndó numuu rí nindxu̱u̱ xa̱bu̱ nikhi̱i̱. Guʼyáá rí naʼthí náa Isaías 65:20: “Bi̱ nakudaminaʼ aʼkhá, majuiʼthá tsríguíi maski ajndu gíʼdoo mbá ciento tsiguʼ”. Nuxkamaa mbá ikha rí nambánii ga̱jma̱a̱ visión ndrígóo Ezequiel (Ezeq. 9:5-7). Ikha jngó, rí itháan gíʼdoo numuu muʼni rí musngajmá gamajkhu náa Jeobá, “bi̱ Niʼni má tsiguʼ xtáa” (Dan. 7:9, 10, 13, 14). Ikha jngó, xámiñulu muxpríguii mbáa bi̱ ndayóoʼ, tséʼniuu má nguáthá tsiguʼ gíʼdoo (Gál. 6:1).

15. Ndiéjunʼ ejmañulú ga̱jma̱a̱ numuu apóstol Pablo rí xóo mbiʼyamajkún a̱ngiu̱lú jiáma rá.

¹⁵ Ga̱jma̱a̱ xú káʼnii gíʼmaa mbuʼñún jiáma rá. Guʼyáá ga̱jma̱a̱ numuu Timoteo. Apóstol Pablo nixnúu xtágabu rígi̱: “Nimbáa xáʼyaʼ xóo nda̱a̱ numaʼ numuu rí dxámá ni̱ndxa̱ʼ. Rí matani, atagíʼ xkri̱da náa bi̱ naguáju̱n jmbu xóo rí naratá, rí natani, gaʼndaʼ xtañún eʼwíínʼ, araʼdáá fe ga̱jma̱a̱ atatsaʼwáminaʼ rí májánʼ” (1 Tim. 4:12). Índo̱ apóstol niʼnirámáʼ ajngáa rígi̱, Timoteo mbáa gíʼdoo itháan rí 30 tsiguʼ. Mú Pablo nixnúu mbá ñajunʼ rí itháan mba̱a̱. Tséʼniuu má náa numuu nixnúu xtágabu rúʼko̱, rí najmañulú kaʼwu  dí ragíʼmaa mbuʼñún a̱ngiu̱lú jiáma i̱ndó ga̱jma̱a̱ numún tsigúnʼ. Garmáʼáan a̱jkiu̱lú rí Jesús ma̱ngaa niʼtáraʼa nákha ikhaa gíʼdoo itháan rí 30 tsiguʼ.

16, 17. a) Xú káʼnii eyáá bi̱ kuya̱ edxu̱u̱ á mu mbáa ndxájulú naʼnimbánuu rí naʼthí náa Biblia mu mani̱ndxu̱u̱ mbáa siervo ministerial o bi̱ mbayá edxu̱u̱ rá. b) Xú káʼnii xkujndu gándoo gárígá rí eni náa kuwaanʼ o rí nundxa̱ʼwa̱míjna̱ ga̱jma̱a̱ rí xóo eʼthí náa Biblia rá.

¹⁶ Náa tikhuu xuajen, tsiyamajkhún wéñuʼ jiáma. Á mu rígi̱ narígá náa kuwáanʼ, mbáa maʼni rí bi̱ kuya̱ edxu̱u̱ xáʼndún guthi rí mani̱ndxu̱ún siervos ministeriales o bi̱ mbu̱ya̱ edxu̱u̱. Bi̱ kuya̱ edxu̱u̱ gíʼmaa marmáʼáan a̱jkiu̱ún rí náa Biblia tséʼthi nguáthá tsiguʼ gíʼmaa magiʼdoo mbáa ndxájulú mu makánaa mbá ñajunʼ (1 Tim. 3:1-10, 12, 13; Tito 1:5-9). Á mu mbáa bi̱ kayá edxu̱u̱ nagíʼ mbá xtángoo rí xóo eni náa xuajñu, na̱nguá xtáa raʼni xó má eʼsngáa náa Biblia. Bi̱ kuya̱ edxu̱u̱ ragíʼmaa mbuñún jiáma xóo ekumún ikhiin o rí naguʼwún nuni náa xuajñún, gíʼmaa munimbaníí xó má eʼthí náa Ajngá rawunʼ Dios (2 Tim. 3:16, 17).

¹⁷ Á mu bi̱ kuya̱ edxu̱u̱ naguʼwún nuni xó má erígá náa xuajñún ki xóo muni rí naʼthí náa Biblia, mbáa xúthi rí a̱ngiu̱lú ma̱ndoo mani̱ndxu̱ún siervos ministeriales o bi̱ mbu̱ya̱ edxu̱u̱. Náa mbá xuajen, mbáa siervo ministerial bi̱ nañajunʼ májánʼ gíʼdoo mba̱a̱ ñajunʼ náa congregación. Maski ajndu bi̱ kuya̱ edxu̱u̱ nduyáá rí ndxájulú bugi̱ naʼnimbánuu rí na̱ʼkha̱ raʼthí náa Biblia mu mani̱ndxu̱u̱ mbáa bi̱ kayá edxu̱u̱, mú ikhiin túthi. Tikhun bi̱ kuya̱ edxu̱u̱ bi̱ itháan guanuu nithi rí ndxájulú bugi̱ kaʼníí dxámá nindxu̱u̱ mu mani̱ndxu̱u̱ mbáa bi̱ mbayá edxu̱u̱. Phú gíná nindxu̱u̱, rí ndxájulú bugi̱ tákánúu ñajunʼ rígi̱ ga̱jma̱a̱ numuu rí xóo kiexu̱u̱. Gajkhun má dí rígi̱ nindxu̱u̱ mbá xkri̱da, mú náa informe nasngájma rí xúʼko̱ kaʼnii endxaʼwamíjna̱ mbaʼin bi̱ kuya̱ edxu̱u̱ náa mbaʼa xuajen. Gíʼdoo wéñuʼ numuu rí ikháanʼ mumbáyumíjná náa Biblia raʼkháa xóo eni náa kuwáanʼlu o xóo endxaʼwáá edxu̱lúʼ. I̱ndó xúʼko̱ muʼnimbulúʼ rí naʼthí Jesús ga̱jma̱a̱ muniʼñáʼ ruʼyáá xóo kiexu̱u̱n.

18, 19. Ndiéjunʼ gíʼmaa muʼni mu mbuʼñún eʼwíínʼ xó má eʼñún Jeobá rá.

¹⁸ Maski ajndu ni̱ndxu̱lú xa̱bu̱ aʼkhá, ma̱ndoo majmañulúʼ mbuʼñún májánʼ eʼwíínʼ kí xóo mbuʼyáá rí xóo kiexu̱u̱n, xó má eʼñún Jeobá (Hech. 10:34, 35). Ikha jngó, gíʼmáanʼ muʼni tsiakimijnalú xúgíʼ mbiʼi ga̱jma̱a̱ muʼgíʼ muʼnimbánii rí naʼthí náa Ajngá rawunʼ Dios. Á mu nuʼni, kuwáanʼ ruʼnimbulú xtángoo ndrígóo Jesús rí muniʼñáʼ ruʼñúún eʼwíínʼ rí xóo kiexu̱u̱n (Juan 7:24).

¹⁹ Inuu má, Jesucristo bi̱ nindxu̱u̱ rey ndrígúlú manda̱ʼa̱a̱ cuenta náa xúgínʼ xa̱bu̱ numbaaʼ, xáʼyoo rí xóo kiexu̱u̱n ni má rí gáʼdxuun ga̱jma̱a̱ numún (Is. 11:3, 4). Phú mitsaan ganindxu̱u̱ rúʼko̱.