Lá nitagíʼ edxa̱ʼ índo̱ nitraxnuu números rí ndiʼkhún nigájnuu náa Bi̱ Nayejngoo ráʼ. Atayáá á mu majmañaaʼ matriʼña̱a̱ graxe̱ rígi̱:

Náa numuu rí xa̱bu̱ bi̱ guáʼdiin e̱ji̱n bi̱ naguwáʼ i̱mba̱ níʼkhá gíʼmaa mbuyáá ajngáa rí nuthi e̱jñún mu mumbañún mambaxúún gajmiún Dios rá.

Mbáa e̱ji̱n ma̱ndoo majmañún ajngáa rí nuthi náa escuela o náa kuwa. Rí marata̱ mbaʼa ajngáa nayambáá wéñuʼ. Xa̱bu̱ bi̱ guáʼdiin e̱ji̱n gíʼmaa muraʼwi̱i̱ magún náa mbá congregación náa nuthi ajngáa rí kuwa o náa ajngún. Gíʼmaa mbuyáá májánʼ náa ekru̱ʼu̱u̱n itháan májánʼ e̱jñún ga̱jma̱a̱ náa ma̱ndoo mambaxúún itháan májánʼ gajmiún Dios. Xa̱bu̱ bi̱ guáʼdiin e̱jñún nugíʼ ginii mu mumbañún e̱jñún makuwa májánʼ gajmiún Dios ki xóo muni rí nandún ikhiin (w17.05, ináa 9 asndu 11).

Jesús niraxu̱u̱ Pedro: “Lá nandaʼ xta̱yo̱ʼ itháan ki xóo rígi̱ ráʼ.” Ndiéjunʼ nindoo gáʼthi índo̱ niʼthí “rígi̱” xá. (Juan 21:15)

Asndu xóo Jesús nindoo gáʼthi e̱gi̱ʼ bi̱ kuwa ikhí o náa naxtangujui̱i̱n e̱gi̱ʼ. Nda̱wa̱á rí nikháñuu Jesús, Pedro nitanga̱a̱ mu maguwíin e̱gi̱ʼ. Bi̱ cristianos gíʼmaa mbuyáá májánʼ á mu ñajunʼ gíwa̱nʼ náa a̱jkiu̱ún (w17.05, ináa 22 ga̱jma̱a̱ 23).

Ndiéjunʼ gíʼmaa mbaʼyoo mbáa cristiano á mu maraʼwíí majmuu mbá ajua̱nʼ mu mañeuminaʼ náa eʼwíínʼ xa̱bu̱ rá.

Vida ndrígu̱ún xa̱bu̱ nindxu̱u̱ mitsúʼkháan náa inuu Jeobá. Jesús na̱nguá niʼthún xa̱bi̱i̱ rí mbuyááʼ mbáa espada mu mumbáyumíjná (Luc. 22:36, 38). Xa̱bi̱i̱ Dios nuni̱i̱ “chidiuún [...] xóo reja ndrígóo arado”. Vida ndrígóo mbáa xa̱bu̱ gíʼdoo wéñuʼ numuu ki xóo rí maraʼdáá wéñuʼ mbújkha̱a̱. Gíʼmaa mbuʼyamajkuíí ku̱ma̱ ndrígu̱ún eʼwíínʼ ga̱jma̱a̱ gíʼmaa muʼgíʼ mbá májánʼ xkri̱da (2 Cor. 4:2) (w17.07, ináa 31 ga̱jma̱a̱ 32).

Náa numuu rí nindxu̱u̱ mixtiʼkhu xóo eʼthí Mateo ga̱jma̱a̱ Lucas rí xóo nixtáa Jesús rá.

Mateo naʼthí itháan ga̱jma̱a̱ numuu José. Mbá xkri̱da, naʼthí xú káʼnii nikumu̱u̱ índo̱ niʼdxuun rí María kagu̱ ewáan ada̱ ga̱jma̱a̱ índo̱ mbáa ángel niʼthún rí magañún náa Egipto ga̱jma̱a̱ nda̱wa̱á matangi̱i̱n. Lucas naʼthí itháan ga̱jma̱a̱ numuu María. Mbá xkri̱da, naʼthí rí nirígá índo̱ ikhaa ni̱jkha̱ gáʼyoo Elisabet ga̱jma̱a̱ xú káʼnii nikumu̱u̱ índo̱ Jesús niguanúu náa templo (w17.08, ináa 32).

Ndiéjunʼ rí niraʼnuu Biblia mba̱yu̱ʼ tsiguʼ rá.

Tikhuu ajngáa rí nijmaa náa Biblia nixtiʼkhuu nda̱wa̱á. Xa̱bu̱ Ñajunʼ niriʼkuíí ajngún xa̱bu̱. Asndu táʼnduun rí miʼtájuíi Biblia náa ajngún xa̱bu̱ (w17.09, ináa 19 asndu 21).

Xú káʼnii nindxu̱u̱ ngajua rí itháan mba̱a̱ rá.

Índo̱ rígi̱ naku̱mu̱u̱ náa ikha rí jmbu, ajngáa agápe nindxu̱u̱ ngajua rí itháan mba̱a̱. Maski ajndu rígi̱ maʼni rí maʼndaʼ xtayáá mbáa, mú itháan ma̱ndoo matasnga̱jmá índo̱ nataniu̱u̱n rí májánʼ eʼwíínʼ ga̱jma̱a̱ xáraʼti̱i̱n rí murtanga̱a̱ rí nataniu̱u̱n (w17.10, ináa 7).