NÁA numuu nirígá rígi̱ rá. Matala náa numuu. Nigumún 29 ñajunʼ gu̱nʼ julio tsiguʼ 1929 ga̱jma̱a̱ ndi̱ju̱u̱n náa mbá xuajen rí kaʼyoo Bulacán, náa Filipinas. Nákha ikhú, náa xuajen rúʼko̱ nda̱a̱ mbújkha̱a̱ ga̱jma̱a̱ na̱nguá guáʼdááxu wéñuʼ. Nguáthá tsiguʼ nda̱wa̱á, índo̱ ikhúúnʼ ni̱ndxu̱ʼ mbáa dxámá, nigi̱ʼdu̱u̱ nirígá guerra. Soldados bi̱ kuwa náa Japón nitu̱ʼu̱u̱n náa Filipinas, mú xuajñuxu gíʼ mitsínguánʼ, ikha jngó nda̱a̱ rí niniuxu. Na̱nguá kuaʼdááxu radio, televisión ni má periódicos, i̱ndó nudxáwiinxu rí nuthi xa̱bu̱.

Ikhúúnʼ ni̱ndxu̱ʼ bi̱ maʼni ragajmi̱i̱n náa mbá migiñuʼ a̱ngui̱nʼ. Xiʼñúnʼ nigún ku̱ñu̱u̱n mu maxtáá gajmíi̱nʼ nákha ikhúúnʼ gúʼdoo migiñuʼ tsiguʼ. Maski ajndu ni̱ndxu̱xu̱ʼ católicos, xiʼñúuʼ nandoo majmañuu wéñuʼ ga̱jma̱a̱ gíʼdoo i̱yi̱i̱ʼ ndrígóo religión rí nuxnáá bi̱ nambáxu̱u̱ gajmíi̱n. Narmáʼáan a̱jkiu̱nʼ rí nisngájmuʼ folleto rí nagumbiʼyuu Protección, Seguridad ga̱jma̱a̱ Descubierta rí nirawíi xa̱bi̱i̱ Jeobá, náa ajngáa tagalo, * ma̱ngaa mbá Biblia. Niniguʼ wéñuʼ magúxnuu Biblia, mú itháan niniguʼ a̱jkhu̱ evangelios. Rúʼko̱ nixkaxi̱i̱ a̱jkiu̱nʼ mu mbayarídoo Jesús (Juan 10:27).

Guerra rí niʼni Japón niguámbá nákha 1945. Mú ikhú anu̱ʼ ga̱jma̱a̱ ru̱dúʼ nithu̱nʼ maʼgáaʼ mu maxtáá gajmíi̱nʼ. Xiʼñúuʼ niʼtámuʼuʼ rí matangu̱u̱n gajmíi̱nʼ ikhiin, ikha jngó ni̱jkháʼ gáxtáá gajmíi̱nʼ.

Nguáthá mbiʼi nda̱wa̱á, gu̱nʼ diciembre tsiguʼ 1945, tikhun xa̱bi̱i̱ Jeobá bi̱ naguwáʼ náa xuajin Angat nigún gutaraʼa asndu náa xuajñuxu. Mbáa xa̱bu̱ nikhi̱i̱ ni̱jkha̱ náa guʼwúxu ga̱jma̱a̱ niʼthúxu rí naʼkha̱ raʼthí náa Biblia ga̱jma̱a̱ numuu “iwáá mbiʼi” (2 Tim. 3:1-5). Niʼthúxu rí muʼguá gunigajmaa Biblia gajmiúxu̱ mbá nguéjmi̱i̱n xa̱bu̱ bi̱ nagimbúun náa mbá xuajen rí gíʼ mijngii. Anu̱ʼ ga̱jma̱a̱ ru̱dúʼ táguun, mú ikhúúnʼ ni̱jkhá. Kuwa mbá skíñúʼ xa̱bu̱ ikhí ga̱jma̱a̱ tikhun nuni graxe̱ ga̱jma̱a̱ numuu Biblia.

Tákro̱ʼo̱ʼ xúgíʼ rí nuthi, ikha jngó nitha maʼgáaʼ. Inuu magajnúʼ índo̱ nigi̱ʼdi̱i̱ nini ajmúú. Ajmúú rúʼko̱  niniguʼ wéñuʼ rí asndu niguanúʼ. Índo̱ niguámbu̱u̱n nini ajmúú, nitajkháan ga̱jma̱a̱ nituxu rí mu̱ʼguáxu náa mbá reunión náa xuajen Angat rí marigá imbo̱o̱ domingo.

Ndiyóoʼ mu̱ʼguáxu mbá migiñuʼ kilómetros mu mu̱ʼguáxu náa guʼwún a̱ngiu̱lú Cruz, náa marigá reunión. Nikuwa mbá a̱jma̱ skiñúnʼ gu̱wi̱nʼ xa̱bu̱ ga̱jma̱a̱ niʼniuʼ tsiánguá índo̱ ndi̱ñu̱u̱n rí e̱ji̱n nutariyaʼ ku̱ma̱ rí itháan mingíjyúuʼ rí na̱ʼkha̱ náa Biblia. Nda̱wa̱á rí ni̱jkhá mbá nguáthá reunión, ndxájulú Damian Santos, mbáa precursor nikhi̱i̱ ga̱jma̱a̱ bi̱ ninindxu̱u̱ mbáa Xa̱bu̱ Ñajunʼ niʼthúunʼ rí maguanúʼ migú náa goʼwóo. Kañiʼ mbruʼun nitamíjna̱xu ga̱jma̱a̱ numuu Biblia.

Nákha ikhú, mbaʼánʼ ni̱jkha̱ rajmañuxu nacha̱ kiʼsngáa rí najmañulúʼ ginii náa Biblia. Tséʼni mba̱yu̱ʼ rí na̱jkuáxu náa reunión índo̱ niraxuxu á mu nanduxu majngúxu iyááʼ. Ikhúúnʼ nitha rí nandoʼ, numuu rí nda̱yo̱o̱ májánʼ rí nandoʼ mani̱ndxu̱ʼ ñumbáá ndrígóo Cristo (Col. 3:24). Ni̱jkuáxu náa mbá mañu rí gíʼ mijngii ga̱jma̱a̱ ikhí nijngúxu iyááʼ ajmáanʼxu nákha 15 ñajunʼ gu̱nʼ febrero tsiguʼ 1946.

Nikru̱ʼu̱xu rí xúgi̱ rí nijngúxu iyááʼ, gíʼmaa mbuyarídaxu Jesús ga̱jma̱a̱ mutaráʼaxu. Anu̱ʼ nditháan tániguʼ rúʼko̱ ga̱jma̱a̱ niʼthí: “Dxámá kayúʼ ni̱ndxa̱ʼ mu marataráʼa. Rí nixumanʼ náa mañu xáʼni rí manindxa̱ʼ mbáa bi̱ naʼtáraʼa”. Ni̱thu̱u̱n rí Dios nandoo rí muʼtáraʼa ajngáa rí májánʼ ndrígóo Reino (Mat. 24:14). Nda̱wa̱á ni̱thu̱u̱n: “Gíʼmuu rí manimbánuu ajngóoʼ rí nini náa Dios”. Ikhú niʼthúunʼ ajngáa rí nitha ginii. Ikhaa táʼndoo rí ikhúúnʼ mataráʼa. Rígi̱ nindxu̱u̱ timbá aʼphu̱ rí niniʼñúʼ xúgíʼ mu maxkamaa metas rí mani ñajunʼ Dios.

A̱ngiu̱lú Cruz nithu̱nʼ rí maʼgá gáxtáá gajmíi̱nʼ náa Angat. Nixnuxu tsiakii ikhúúnʼ ga̱jma̱a̱ Nora, aʼdiún bi̱ giʼtha mu mani̱ndxu̱xuʼ precursores. Nájmáanʼxu nigíʼdi̱i̱ nini̱ndxu̱xu̱ʼ precursor nákha 1 ñajunʼ gu̱nʼ noviembre tsiguʼ 1947. Nora ni̱jkha̱ gáyambáá imbo̱o̱ xuajen, ga̱jma̱a̱ ikhúúnʼ niguanúʼ mu mataráʼa náa xuajen Angat.

Nayéjkha má ajtsú tsiguʼ rani̱ndxu̱ʼ precursor regular índo̱ Earl Stewart, mbáa ndxájulú bi̱ xtáa náa sucursal, nixná mbá discurso náa inún mbá witsu ciento xa̱bu̱ náa xuáá dí rígá náa xuajen Angat. Discurso nijuiʼthá náa ajngáa inglés ga̱jma̱a̱ ikhúúnʼ nitha nda̱wa̱á kayuʼ rí gíʼdoo itháan numuu náa ajngáa tagalo. Káaʼ mbá juwan tsiguʼ ni̱jkhá náa escuela, mú bi̱ nisngúxu nithuxu náa ajngáa inglés. Imbo̱o̱ rí nimbáyuʼ mu majmañuʼ itháan májánʼ inglés rí magúxnuu mbaʼa i̱yi̱i̱ʼ rí na̱ʼkha̱ náa Biblia náa ajngáa rúʼko̱, numuu rí na̱nguá guáʼdááxu mbaʼa náa ajngáa tagalo. Rí nijmañuʼ nimbáyuʼ mu matajuíi discurso náa ajngáa inglés.

Mbiʼi rí nitájuíi discurso ndrígóo ndxájulú Stewart, ikhaa niʼthí náa congregación rí sucursal nda̱ñínʼ a̱jmi̱i̱n precursor mu magún guñajunʼ náa Betel. Ndayóoʼ mixtiambáá numuu rí misioneros magún náa Asamblea “Aumento de la Teocracia”, rí nirígá nákha tsiguʼ 1950 náa xuajen Nueva York (Estados Unidos). Ikhúúnʼ ninindxu̱ʼ mbáa bi̱ nijuiʼtháán maʼga̱, ikha jngó niniʼñúʼ mbu̱júu̱ʼ xúgíʼ rí naniʼnúʼ mu maʼgá gáyambáá náa Betel.

Nigíʼdu̱u̱ niñajunʼ náa Betel nákha 19 ñajunʼ gu̱nʼ junio tsiguʼ 1950. Betel rígá náa mbá guʼwá wayuu ga̱jma̱a̱ wájun mba̱ʼu̱ ixi̱ mbájndi guʼwá, náa mbá mbaaʼ rí naʼni mbá hectárea. Ikhí nikuwa mbá docena jiáma bi̱ niñajunʼ ikhú. Miʼcha̱ ikhúúnʼ nayambáá náa cocina. Nda̱wa̱á, xóo mbá a las 9 nani plancha náa nagaʼwu̱u̱ xtíin. Rí wakhííʼ ikháá má kayuʼ nindxu̱u̱. Nixtáá rañejunʼ náa Betel maski ajndu misioneros niguwáanʼ rí nigún náa asamblea internacional. Naniratoo revistas mu muxunguanʼ náa correo, ga̱jma̱a̱ nani suscripciones ga̱jma̱a̱ ninindxu̱ʼ recepcionista; nani xúgíʼ rí nundo̱ʼo̱ʼ mani.

Nákha tsiguʼ 1952, ikhúúnʼ gajmíi̱nʼ mbá majuiin a̱ngiu̱lú filipinos nituxu mbá ajngáa rí májánʼ wéñuʼ. Nituxu muʼguá náa clase número 20 náa Escuela ndrígóo Galaad. Mbaʼa rí ndiya̱a̱xu náa Estados Unidos ninindxu̱u̱ nuxi̱ʼ rí nditháan tuniʼnúʼxu. Ninindxu̱u̱ mixtiʼkhu ki xóo rí nuniʼnúʼxu náa xuajñuxu.

Mbá xkri̱da, ndiyóoʼ majmañuxu majmuxu ajua̱nʼ rí na̱ʼkhu̱u̱ aguʼ ga̱jma̱a̱ rí na̱nguá eniʼnúʼxu nditháan. Ma̱ngaa, mixtiʼkhu nindxu̱u̱ náa kúwáanʼxu. Mbóo  miʼcha̱ nigájnuʼ náa calle ga̱jma̱a̱ miʼxá kri̱ga̱ xúgíʼ. Timbá miʼtsú rí nda̱yo̱o̱ idiʼ, ikhú ndi̱yo̱o̱ rí miweʼtsi wéñuʼ.

Mú xúgíʼ rígi̱ nda̱a̱ rí nindxu̱u̱, tsimbriguii nditháan xóo rí maʼgá náa Escuela ndrígóo Galaad. Bi̱ nisngúxu nijmún mbaʼa kiʼsngáa rí májánʼ wéñuʼ. Nimbáyuxu mu majmañuxu munigajmaa májánʼ. Rí nijmañuʼ náa Galaad nimbáyuʼ majmañuʼ mani itháan májánʼ ñajunʼ Dios.

Nda̱wa̱á rí niguámbá, nithu̱nʼ maʼgá gáyambáá xóo precursor especial náa xuajen Bronx, náa xuajen Nueva York. Ikha jngó nákha gu̱nʼ julio tsiguʼ 1953 nindoo nixtáá náa Asamblea “Sociedad del Nuevo Mundo”, rí nirígá má ikhí. Índo̱ niguámbá asamblea, nitangu̱ún náa xuajen Filipinas mu manimbánuu imbo̱o̱ ñajunʼ rí gúʼdoo.

A̱ngiu̱lú bi̱ kuwa náa sucursal nithu̱nʼ rí mani̱ndxu̱ʼ circuito, rí maʼgá náa mámbá congregación. Rúʼko̱ gáyambáá mu maʼgá kidxuuʼ Cristo, bi̱ ni̱jkha̱ náa mámbá xuajen mitsinguánʼ wéñuʼ mu mañawu̱u̱n mugiu̱u̱ Jeobá (1 Ped. 2:21). Náa kaʼyoʼ maʼgá nindxu̱u̱ xuajen Luzón, ku̱ba̱ʼ rí itháan mba̱a̱ rí gíwanʼ náa tapo̱o̱ iyaʼ náa Filipinas. Ma̱ngaa náa xuajen ma̱jkha̱ʼ ndrígóo Bulacán, Nueva Écija, Tarlac ga̱jma̱a̱ Zambales. Mú maʼgá náa tikhuu xuajen, ndiyóoʼ manújngoʼ mbaʼa kúbá náa Sierra Madre. Carro na̱nguá e̱jkha̱nú ikhí, ikha jngó nandu̱ʼu̱u̱n xa̱bu̱ bi̱ nagún kudúún ixi̱ mba̱ʼu̱ náa carro rí mba̱ʼu̱ rí muniñuuʼ matsimuʼ tsu̱du̱u̱ ixi̱ mba̱ʼu̱. Mbaʼin niniñuʼ maʼgá, maski ajndu gakhi̱i̱ ninindxu̱u̱.

Mbaʼa congregación ninindxu̱u̱ nuxi̱ʼ ga̱jma̱a̱ ma̱jkha̱ʼ. A̱ngiu̱lú nuxna̱a̱ wéñuʼ núma̱aʼ numuu rí nimbáñun mu muriyaʼ awan rí xóo muni reunión ga̱jma̱a̱ rí xóo mutaraʼa itháan májánʼ.

Nda̱wa̱a̱ nithu̱nʼ maʼgá i̱mba̱ níʼkhá xuajen rí kaʼyoo xúgíʼ Bicol ga̱jma̱a̱ rígá mbaʼa grupos mitsínguánʼ. Ikhí nikuwa precursores especiales bi̱ nitaraʼa náa xuajen rí nditháan tsetaraʼa. Náa mbá guʼwá rí nixtáá, mbóó baño rígá, nindxu̱u̱ mbóo iñáʼ rí trámáʼ a̱jma̱ xajpa mu mafruwan rajkuáaʼ. Índo̱ nigadúun, xajpa nijpátuaʼan náa iñáʼ ga̱jma̱a̱ nda̱wa̱á nijpatuʼun mangúún. Ndijyúuʼ mu mani kaʼwuminaʼ, mu magíʼdu̱u̱ mani ñajunʼ rí kaʼyoʼ.

Nákha ikhú nigíʼdu̱u̱ nindxa̱ʼwa̱mínáʼ ga̱jma̱a̱ numuu Nora. Ikhaa nigíʼdu̱u̱ ninindxu̱u̱ precursora náa xuajen Bulacán, ga̱jma̱a̱ rí xúgi̱ nindxu̱u̱ precursora especial náa xuajen Dumaguete. Ni̱jkhá gáyóo ga̱jma̱a̱ nda̱wa̱á nitamíjna̱xu ga̱jma̱a̱ carta. Nákha tsiguʼ 1956 nidamíjna̱xu. Timbá xmáná rí nidamíjna̱xu, ni̱jkuáxu náa mbá congregación rí gíwanʼ náa tapo̱o̱ iyaʼ rí nagumbiʼyuu Rapu Rapu. Ndiyóoʼ  matsimuxu náa kúbá ga̱jma̱a̱ mu̱ʼguáxu mbaʼ wéñuʼ, mú nidxuxu rí nájmáanʼxu, ikhúúnʼ ga̱jmu̱ʼ a̱ʼgiu̱ʼ, mumbáñunxu a̱ngiu̱lú bi̱ kuwa mitsínguánʼ.

Naʼni má a̱jkhu̱ tsiguʼ rí na̱jkuá náa mámbá congregación índo̱ nithuxu rí muʼguá guñajunʼxu náa Betel. Ni̱jkuánúxu gu̱nʼ enero tsiguʼ 1960, ga̱jma̱a̱ ikhí má kúwáanʼxu asndu xúgi̱. Ra̱ʼkhá tháán nijmañuʼ rí niñajunʼ gajmíi̱nʼ a̱ngiu̱lú bi̱ guáʼdáá mbá ñajunʼ rí gíʼdoo numuu. Mixtiʼkhu ñajunʼ rí naʼni Nora náa Betel.

Rí mayambáá náa Betel naʼni mba̱yo̱o̱ xú káʼnii ejkha̱ ra̱ja̱ ñajunʼ rí naguma náa Filipinas. Nákha xóó tseniʼgúnʼ ga̱jma̱a̱ nákha timbá aʼphu̱ ni̱ʼkhá kuwa mbá 10,000 bi̱ nutaraʼa náa xúgíʼ xuajen mba̱ʼu̱. Rí xúgi̱ kuwa itháan rí 200,000, mangiin mbaʼin betelitas bi̱ nuyambáá náa miʼtáraʼa.

Numuu rí ñajunʼ ni̱jkha̱ ra̱ja̱ itháan, ndiya̱a̱xu rí ndayóoʼ maʼni itháan mba̱a̱ Betel. Ikha jngó Cuerpo Gobernante nindu̱ʼu̱xu rí mbuʼyáaʼxu mbaaʼ náa maguma imbo̱o̱ nuxi̱ʼ sucursal rí itháan mba̱a̱. Superintendente ndrígóo imprenta ga̱jma̱a̱ ikhúúnʼ ni̱jkuáxu náa mámbá guʼwá mu muraxu̱u̱n xa̱bu̱ á mu mbáa nandoo magu̱jua̱ mbayuuʼ. Nimbáa tsíyoo gagujua, ga̱jma̱a̱ mbáa niʼthúxu: “Bi̱ ni̱ndxu̱xu̱ʼ chino tsegujuaxu, mangáanʼ nutsixu”.

Mú mbóo mbiʼi mbáa bi̱ xtáa mijngii ikhí niraxuxu á mu nanduxu mutsi mbayuuʼ numuu rí nandoo maʼga̱ gáxtáa náa Estados Unidos. Ga̱jma̱a̱ rúʼko̱ niʼni rí magi̱ʼdu̱u̱ marigá i̱ʼwáʼ rí tándoo gúnimbuxuʼ. Imba̱a̱ niʼthúxu rí nandoo magu̱jua̱ mbayuuʼ ga̱jma̱a̱ niʼthún eʼwíínʼ rí mugujua mangiin. Asndu nindoo mutsixu mbayuuʼ chino bi̱ tándoo gágu̱jua̱ nákha ginii. Nguáthá mbiʼi mbaaʼ niʼni itháan mba̱a̱. Nda̱yo̱o̱ kaʼwu dí rúʼko̱ nindoo Jeobá marigá.

Nákha tsiguʼ 1950, ikhúúnʼ ni̱ndxu̱ʼ bi̱ itháan dxámá náa guʼwá Betel. Mú rí xúgi̱ ikhúúnʼ ga̱jmu̱ʼ a̱ʼgiu̱ʼ ni̱ndxu̱xu̱ʼ bi̱ itháan guanuu náa Betel. Tsigáwiinʼ a̱jkiu̱nʼ rí ni̱jkhá náa kidxuuʼ Cristo asndu náa má ni̱jkha̱ kañún. Gajkhun má rí anu̱ʼ nixkriñunʼ náa goʼwóo, mu Jeobá nixnúʼ mbaʼin a̱ngui̱nʼ. Nda̱yo̱o̱ gajkhun rí Jeobá naxnúʼ xúgíʼ rí ndayóoʼ, tséʼniuu asndu xú káʼnii má ñajunʼ rí gundríguxu. Ikhúúnʼ ga̱jmu̱ʼ Nora nadxuxu wéñuʼ náa Dios ga̱jma̱a̱ numuu xúgíʼ rí májánʼ rí nixnúxu, ga̱jma̱a̱ muxnu̱u̱n tsiakii eʼwíínʼ rí ‹mbuyáá xú káʼnii nindxu̱u̱› Jeobá (Mal. 3:10).

Mbá miʼtsú, Jesús niʼthúu̱n Mateo Leví bi̱ naguxi̱i̱ mbújkha̱a̱ rí maʼga̱ kidxuuʼ. Xú káʼnii niriʼña̱a̱ xá. Náa Biblia naʼthí “niniñu mba xugui, nituxu nika gajma Jesús” (Luc. 5:27, 28). Ikhúúnʼ nindoo niniʼñúʼ xúgíʼ kidíiʼ mu maʼgá kidxuuʼ Jesús, ga̱jma̱a̱ xúgíʼ a̱jkiu̱nʼ na̱thu̱u̱n rí eʼwíínʼ muni má xúʼko̱ ga̱jma̱a̱ dí maguma tsajkurámiinʼ wéñuʼ.