1, 2. Ndiéjunʼ jngó rí naxmiéjúnʼ tikhun xa̱bu̱ buanii índo̱ e̱jñún nandún muxnaximi̱jna̱ ga̱jma̱a̱ majngún iyááʼ rá.

XÚGÍʼ tsiguʼ mbaʼin bi̱ nunigajmaa Biblia nuxnaximi̱jna̱ náa Jeobá ga̱jma̱a̱ najngún iyááʼ. Mbaʼin rí ikhiin ni̱ndxu̱ún jiáma bi̱ nigaji̱i̱n náa rí gajkhun ga̱jma̱a̱ niraʼwi̱i̱ mbá rí májánʼ muni (Sal. 1:1-3). Xa̱bu̱ buanii bi̱ ni̱ndxu̱ún xa̱bi̱i̱ Jeobá nandún rí maʼga̱nú mbiʼi rí e̱jñún majngún iyááʼ (atayáá ma̱ngaa 3 Juan 4).

² Mú rígá tikhuu rí naʼni maxmiéjúnʼ xa̱bu̱ buanii. Mbáa nuniʼnúnʼ tikhun jiáma bi̱ nijngún iyááʼ mu nda̱wa̱á nikumu̱ún rí nda̱a̱ rí embáñun á mu nunimbu̱ún ikha ndrígóo Dios. Tikhun asndu niniñaaʼ runi ñajunʼ Jeobá. Ikha jngó, xa̱bu̱ buanii namiñun rí e̱jñún muriʼkhuíí xóo endxaʼwamíjna̱ nda̱wa̱á rí nijngún iyááʼ ga̱jma̱a̱ ní xáʼndun gúyáá nditháan rí gajkhun. Rúʼko̱ rí nirígá náa xuajen Efeso nákha siglo timbá. Jesús niʼthúu̱n: “Nánguá eyaʼ xta̱yo̱ʼ xóo nákha ginii” (Rev. 2:4). Ndiéjunʼ gándoo muni xa̱bu̱ buanii mu xárígá rígi̱, mu e̱jñún  magaji̱i̱n ‹náa rí makáwíin› xá. (1 Ped. 2:2.) Guʼyáá rí nigíʼnuu Timoteo.

3. a) Nguáná ninindxu̱u̱ cristiano Timoteo, ga̱jma̱a̱ ndiéjunʼ niʼni ga̱jma̱a̱ rí nijmañuu xá. b) Ndiéjunʼ ajtsú enii rí niʼthúu̱n Pablo Timoteo rá.

³ Mbáa Timoteo nininuʼ kiʼsngáa ndrígóo Jesús nákha tsiguʼ 47, nákha timbá miʼtsú ni̱ʼkha̱ Pablo náa xuajen Listra. Maski ajndu nákha nindxu̱u̱ mbáa dxámá, nigíʼ niʼni rí nijmañuu, ga̱jma̱a̱ a̱jma̱ tsiguʼ nda̱wa̱á nigíʼdu̱u̱ ni̱jkha̱ ga̱jma̱a̱ Pablo. Mbá gu̱wa̱ʼ imajun tsiguʼ nda̱wa̱á, Pablo niʼnirámáʼ: “Ikháánʼ, atani má xúʼko̱ rí nijmañaʼ ga̱jma̱a̱ nitanimbaaʼ, numuu rí natayáá tsáa niʼsngáaʼ, ga̱jma̱a̱ rí asndu nákha chíʼgínʼ nitatsiʼnuʼ ajngóo Dios [Escrituras Hebreas], rí maʼni majmañaaʼ matanikríyaminaʼ ga̱jma̱a̱ fe rí xtaʼdáá náa Cristo Jesús” (2 Tim. 3:14, 15). Guʼyáá ajtsú enii ajngáa rígi̱: 1)“Nitatsiʼnuʼ ajngóo Dios”, 2)“nitanimbaaʼ” ga̱jma̱a̱ 3)“maʼni majmañaaʼ matanikríyaminaʼ ga̱jma̱a̱ fe rí xtaʼdáá náa Cristo Jesús”.

4. Ndiéjunʼ rí embáyaʼ ikháánʼ mu marasngúún e̱jña̱ʼ bi̱ majkhinʼ rá. (Atayáá timbá xtiʼkhu.)

⁴ Xa̱bu̱ buanii bi̱ ni̱ndxu̱ún cristianos nandún rí e̱jñún muniʼnuʼ “ajngóo Dios”, rí xúgi̱ na̱ʼkha̱ Escrituras Hebreas ga̱jma̱a̱ Escrituras Griegas Cristianas. Asndu e̱ji̱n majkhinʼ, xó má ejmañuu mámbáa, ma̱ndoo majmañún ga̱jma̱a̱ numún xa̱bu̱ bi̱ na̱ʼkha̱ náa Biblia. Xuajñu Jeobá naxná mbaʼa libros, folletos ga̱jma̱a̱ videos náa mbaʼa ajngáa mu xa̱bu̱ buanii ma̱ndoo majmúún mu mumbañún e̱jñún. Xú káʼnii nindxu̱u̱ tikhuu dí rígá náa ajngáaʼ. Garmáʼáan a̱jkiu̱lú rí naʼthí náa Santas Escrituras gíʼdoo wéñuʼ numuu mu mu̱ʼgua̱nú mambáxulúʼ májánʼ gajmiúlú Jeobá.

5. a) Ndiéjunʼ rí niʼnimbo̱o̱ Timoteo rá. b) Náa numuu ma̱ndoo muʼthá rí Timoteo niʼnimbo̱o̱ rí Jesús nindxu̱u̱ Mesías rá.

⁵ Raʼkháa i̱ndó marasngúún e̱jña̱ʼ ajngóo Dios, xóo muʼthá rí marathu̱u̱n ga̱jma̱a̱ numún xa̱bu̱ bi̱ na̱ʼkha̱ raʼthí náa Biblia ga̱jma̱a̱ rí nirígá. Timoteo ma̱ngaa ‹niʼnimbo̱o̱›. Náa texto griego rí nigájnuu ginii, ajngáa rúʼko̱ nandoo gáʼthúu̱n “matanimbaaʼ rí gajkhun nindxu̱u̱”. Timoteo nininuʼ Escrituras Hebreas asndu nákha chíʼgíʼ. Mú nguáthá mbiʼi nda̱wa̱á, ikhaa ndiʼyoo rí Jesús nindxu̱u̱ Mesías. Ikhaa ndiʼyoo mújúnʼ rígi̱ rí nijngúun iyááʼ ga̱jma̱a̱ ni̱jkha̱ gáʼtaraʼa ga̱jma̱a̱ Pablo.

6. Xú káʼnii gándoo xa̱bu̱ nikhi̱i̱ mambáyúu a̱ʼdióo ‹maʼnimbo̱o̱› rí xtáa rajmañuu náa Biblia xá.

⁶ Xú káʼnii gándoo gáʼni mbáa xa̱bu̱ nikhi̱i̱ mu mambáyúu a̱ʼdióo mu ‹maʼnimbo̱o̱› xó má Timoteo rá. Gíʼmaa rí maʼngo̱o̱ a̱jkiu̱u̱n. A̱ʼdióo xáʼnimbo̱o̱ mbá nachaá, ma̱ngaa xáʼni numuu rí anu̱u̱ o ru̱dúu̱ nduyáá májánʼ rí nunimbu̱ún. Mu munimbu̱ún rí naʼthí náa Biblia, ada̱ gíʼmaa ‹mandxa̱ʼóo májánʼ edxu̱u̱› (atraxnuu Romanos 12:1). * Xa̱bu̱ buanii guáʼdáá wéñuʼ numuu muni rígi̱, itháan índo̱ e̱jñún nuniu̱u̱n graxe̱. Guʼyáá mbá xkri̱da.

7, 8. a) Xú káʼnii esngájma rí naʼngo̱o̱ a̱jkiu̱u̱n mbáa xa̱bu̱ nikhi̱i̱ índo̱ naʼsngóo wáxioo xá. b) Nguáná ndiyóoʼ matani mba̱a̱ a̱jkia̱nʼ ikháánʼ gajmiáanʼ e̱jña̱ʼ rá.

⁷ Mbáa ndxájulú bi̱ mbiʼyuu Thomas gíʼdaa mbáa wáxá bi̱ gíʼdoo 11 tsiguʼ. Ikhaa naʼthí rí a̱ʼdióo nguáná naʼniuu graxe̱ xóo rígi̱: “Lá Jeobá nijmuu evolución mu maʼni xúgíʼ rí ndaʼya ráʼ.” Ga̱jma̱a̱  “náa numuu rí tséʼni votar ga̱jma̱a̱ muʼni i̱ʼwáʼ mu muʼni̱i̱ itháan májánʼ xuajñulú rá.” Nguáná, Thomas, gíʼmaa marugoo rawunʼ mu xáriʼña̱a̱ rí phú ikhaa. Índo̱ najuiʼthá rí mbáa xa̱bu̱ gíʼdoo aʼkhúun nindxu̱u̱ numuu rí ndiyáá xúgíʼ rí niʼni xa̱bu̱ asndu rí itháan ma̱jkha̱ʼ.

⁸ Rí maʼngo̱o̱ a̱jkiu̱ún nindxu̱u̱ rí itháan gíʼdoo numuu náa cristianos. Ga̱jma̱a̱ Thomas ndaʼyoo rí ndayóoʼ cualidad rígi̱ mu maʼsngóo wáxioo (Col. 3:12). Ndaʼyoo rí ndayóoʼ mba̱yu̱ʼ mbiʼi ga̱jma̱a̱ rí mutamijná má xúʼko̱. Gíʼmaa maʼniuu rí mandxaʼwáminaʼ wáxioo mu maʼnimbo̱o̱ rí xtáa rajmañuu náa Biblia nindxu̱u̱ gajkhun. Ikhaa naʼthí: “Ikhúúnʼ ga̱jmu̱ʼ a̱ʼgiu̱ʼ nanduxu mbu̱ya̱a̱ á mu aʼdiúxu naʼnimbo̱o̱ rí xtáa rajmañuu ga̱jma̱a̱ á mu gajkhun nindxu̱u̱, itháan índo̱ nuʼthá ga̱jma̱a̱ rí gíʼdoo wéñuʼ numuu. Ga̱jma̱a̱ májánʼ nindxu̱u̱ rí gíʼdoo graxe̱. Maxmiéjunʼ á mu xúgíʼ ndaʼyoo rí nindxu̱u̱ májánʼ rí asndu tsiraxi nditháan”.

9. Xú káʼnii gándoo guni xa̱bu̱ buanii mu muthún e̱jñún rí naʼthí náa Biblia rá.

⁹ Índo̱ xa̱bu̱ buanii naʼngo̱o̱ a̱jkiu̱ún, e̱ji̱n mañu mañúú ejkha̱ rajmañún rí “ma̱ja̱nʼ ga̱jma̱a̱ rí mbaʼ, rí mitsidaanʼ ga̱jma̱a̱ rí mi̱jnu̱ʼ” ndrígóo fe (Efes. 3:18). Ma̱ndoo mbuʼyáaʼ mbá rí xánindxu̱u̱ mingíjyúuʼ makru̱ʼu̱u̱n. Á mu e̱ji̱n nunimbu̱ún rí nagún rajmañún, itháan gáʼnduun muthún compañeros ndrígu̱ún ga̱jma̱a̱ eʼwíínʼ xa̱bu̱ (1 Ped. 3:15). Mbá xkri̱da, lá ma̱ndoo majmúún Biblia ndiéjunʼ erígá índo̱ nakháñulú rá. Lá májánʼ eyáá xá. * Nakujmaa rí ndayóoʼ maʼngo̱o̱ a̱jkiu̱ún mu muthún e̱jñún kiʼsngáa rí na̱ʼkha̱ náa Biblia, mú xánindxu̱u̱ ndíí (Deut. 6:6, 7).

10. Ndiéjunʼ rí gíʼdoo numuu muni xa̱bu̱ buanii bi̱ guáʼdiin e̱ji̱n rá.

¹⁰ Mú e̱ji̱n mbuyáá rí nindxu̱u̱ gajkhun, ma̱ngaa gíʼdoo wéñuʼ numuu rí xa̱bu̱ buanii muxna mbá májánʼ xkri̱da. Stephanie, bi̱ gíʼdiin ajtsíin wa̱ʼxa̱ʼ naʼthí: “Asndu nákha majkhinʼ naraximínáʼ: ‹Lá nathu̱u̱n náa numuu rí ikhúúnʼ nanimbooʼ rí Jeobá xtáa ga̱jma̱a̱ rí nindxu̱u̱ jmbii ga̱jma̱a̱ nandoo kaʼyulú xáʼ. Lá nduyáá rí ikhúúnʼ nandoʼ ka̱yo̱o̱ gajkhun xáʼ.› Xándoo magúʼthu̱u̱n rí ikhiin munimbu̱ún á mu ikhúúnʼ tsenimbooʼ”.

11, 12. Ndiéjunʼ nindxu̱u̱ ku̱ma̱, ga̱jma̱a̱ náa numuu nuʼthá rí tsíyoo gáʼthi rí na̱jkha̱ rakhi̱i̱ mbáa xa̱bu̱ rá.

¹¹ Xó má ndiʼyáá, Timoteo 1) nininuʼ Santas Escrituras ga̱jma̱a̱ 2) niʼnimbo̱o̱ rí nijmañuu. Mú, ndiéjunʼ nindoo gáʼthi Pablo índo̱ niʼthúu̱n rí ajngóo Dios ‹ma̱ndoo maʼnikríyaʼ› xá.

¹² Náa volumen 2 ndrígóo libro Perspicacia naʼthí rí náa Biblia, ku̱ma̱ najma̱a̱ “mu mundxaʼwamíjna̱ rí májánʼ ga̱jma̱a̱ makru̱ʼu̱lú mu muʼnimbánii xkujndu, muʼni níjni o muʼni gaʼduunʼ gamíi, muxkamaa tikhuu rí nandulúʼ muʼni o muʼthúún eʼwíínʼ rí muni ikháá má. Mixtiʼkhu nindxu̱u̱ rí skagunʼ”. Náa Biblia naʼthí rí “náa a̱jkiu̱u̱n dxámá gíwanʼ rí nindxu̱u̱ skágunʼ; mú á mu nataxpriguii ga̱jma̱a̱ xkuiya maʼni rí matsíngunʼ náa ikhaa” (Prov. 22:15). Mú mixtiʼkhu nindxu̱u̱ rí skágunʼ ga̱jma̱a̱ rí ku̱ma̱. Ku̱ma̱ nindxu̱u̱ mbá rí nasngájma rí nandxa̱ʼóo májánʼ edxu̱u̱. Ikha jngó rí nandxa̱ʼóo májánʼ edxu̱u̱ mbáa xa̱bu̱ tsíyoo gáʼthi numuu rí nikhi̱i̱, rí phú ikhaa rí  mamiñúu kaʼyoo Jeobá ga̱jma̱a̱ maʼnimbo̱o̱ ikha ndrígóo (atraxnuu Salmo 111:10). *

13. Xú káʼnii gándoo mbáa dxámá masngájma rí ‹nandxa̱ʼóo májánʼ edxu̱u̱ ga̱jma̱a̱ dí rígi̱ ma̱ndoo maʼnikríyaaʼ› xá.

¹³ Jiáma bi̱ nundxa̱ʼwa̱a̱ májánʼ edxu̱ún rí na̱ʼkha̱ náa Dios na̱nguá ni̱ndxu̱ún “xóo bi̱ na̱jkha̱ kagu̱u̱n iyaʼ gi̱jyooʼ ñuʼún” ga̱jma̱a̱ rí nandún muni o rí nutsudiín bi̱ nambáxu̱u̱ gajmiún (Efes. 4:14). Rí phú ikhaa, kuwa rajmañún “mundxa̱ʼwa̱a̱ májánʼ edxu̱ún” (Heb. 5:14). Nusngajma rí nundxa̱ʼwa̱a̱ májánʼ edxu̱ún índo̱ nuraʼwíí májánʼ rí muni asndu índo̱ na̱nguá eñún anu̱ún o eʼwíínʼ xa̱bu̱ buanii (Filip. 2:12). Ku̱ma̱ rígi̱ ndayóoʼ mu maʼni káwíin (atraxnuu Proverbios 24:14). * Ndiéjunʼ gándoo gáʼni mbáa xa̱bu̱ nikhi̱i̱ mu mambáñun e̱ji̱i̱n majmañún mundxa̱ʼwa̱a̱ májánʼ edxu̱ún xá. Rí mbaʼyoo rí e̱ji̱i̱n mbuyáá májánʼ rí ikhaa eʼnimbo̱o̱. Rí naʼthí ga̱jma̱a̱ rí naʼni gíʼmaa masngájmuun rí naʼnimbánuu xó má eʼthí náa Biblia (Rom. 2:21-23).

14, 15. a) Ndiéjunʼ gíʼmaa mandxaʼwáminaʼ dxámá bi̱ nandoo majngúun iyááʼ rá. b) Xú káʼnii gándoo gátambáyii a̱ʼdiáaʼ mandxaʼwáminaʼ rí gámbáyúu á mu naʼnimbo̱o̱ rí naʼthí náa Biblia rá.

¹⁴ Mú raʼkháa i̱ndó rí anu̱ún muthún e̱jñún rí májánʼ ga̱jma̱a̱ dí ra̱májánʼ. Itháan májánʼ muniu̱u̱n mundxaʼwamíjna̱ ga̱jma̱a̱ graxe̱ xóo rígi̱: “Náa numuu rí Biblia naʼthúlúʼ dí ra̱májánʼ muʼni mbá rí nakujmaa rí nagui̱i̱ wéñuʼ rá. Ndiéjunʼ eʼni matanimbaaʼ rí naʼthí náa Biblia mambáyaʼ má xúʼko̱ rá.” (Is. 48:17, 18.)

¹⁵ Índo̱ mbáa ada̱ naʼthí majngúun iyááʼ, anu̱u̱ ga̱jma̱a̱ ru̱dúu̱ gíʼmaa mumbayíí mandxaʼwáminaʼ rí gáʼyoo maʼni  á mu nandoo maʼni rígi̱ rí gíʼdoo wéñuʼ numuu. Xú káʼnii eʼyoo xá. Ndiéjunʼ gámbáyúu xá. Ga̱jma̱a̱ xkujndu rá. Ndíjkha jngó itháan májánʼ nindxu̱u̱ rí gambáyúu ki xóo xkujndu rá. (Mar. 10:29, 30.) Gíʼdoo wéñuʼ numuu rí ada̱ mandxaʼwáminaʼ rígi̱ nákha xóó tséjngúun iyááʼ. Á mu anu̱u̱ ga̱jma̱a̱ ru̱dúu̱ numbayíí mandxaʼwáminaʼ ndiéjunʼ rí gámbáyúu á mu naʼnimbo̱o̱ ga̱jma̱a̱ ndiéjunʼ gágíʼnuu á mu tséʼnimbo̱o̱, xúʼko̱ mbaʼyoo rí itháan májánʼ maʼnimbo̱o̱ má xúʼko̱ rí naʼthí náa Biblia (Deut. 30:19, 20).

16. Ndiéjunʼ gándoo muni xa̱bu̱ buanii á mu aʼdiún nánguá eʼnimbo̱o̱ nda̱wa̱á rí nijngúun iyááʼ xá.

¹⁶ Ndiéjunʼ gándoo muni̱ xa̱bu̱ buanii á mu aʼdiún nánguá eʼnimbo̱o̱ nda̱wa̱á rí nijngúun iyááʼ xá. Mbá xkri̱da, mbáa dxámá magíʼdu̱u̱ manigu̱ʼ dí rígá náa numbaaʼ rígi̱ o mbáa magi̱ʼdu̱u̱ maraximínáʼ á mu itháan májánʼ maʼnimbo̱o̱ ikha ndrígóo Biblia (Sal. 73:1-3, 12, 13). Xa̱bu̱ buanii gíʼmaa mbuyáá rí xóo gúní ikhiin mambáñun e̱jñún muni ñajunʼ Jeobá o na̱nguá. Mugíʼ rí xúgiʼdu̱u̱n gajmiún, tséʼniuu á mu wanuu o majkhinʼ e̱jñún. Gíʼmaa muni rí mbuyáá rí nandún kuñúún ga̱jma̱a̱ nandún mumbañún.

17, 18. Á mu mbáa dxámá naʼniuu mingíjyúuʼ maʼnimbo̱o̱, ndiéjunʼ gándoo muni anu̱ún mu mumbayíí xá.

¹⁷ Dxámá bi̱ nijngúun má iyááʼ niʼthí rí maʼndoo kaʼyoo Jeobá ga̱jma̱a̱ maʼni ñajunʼ ki xóo i̱ʼwáʼ (atraxnuu Marcos 12:30). Dios tseʼyoo rígi̱ xóo mbá gitsíin, ga̱jma̱a̱ xúʼko̱ má gíʼmaa muni xúgínʼ bi̱ nixnaximi̱jna̱ náa ikhaa (Ecl. 5:4, 5). Xa̱bu̱ buanii gíʼmaa mbuyáá nguáná gándoo guxna kumi̱i̱n e̱jñún. Mú ginii ndayóoʼ munigajmaa i̱yi̱i̱ʼ rí naguwíi xuajñu Jeobá mu majmúún xa̱bu̱ buanii. Rígi̱ gambáñun mu muthún e̱jñún rí gáʼyooʼ muni ga̱jma̱a̱ rí májánʼ gakhánun rí mani̱ndxu̱ún xa̱bi̱i̱ Jeobá bi̱ nixnaximi̱jna̱ náa ikhaa ga̱jma̱a̱ nijngúun má iyááʼ.

¹⁸ Mbá xkri̱da, xa̱bu̱ buanii muxkamaa mbaʼa rí gíʼdoo numuu náa “Los padres preguntan” náa volumen 1 ndrígóo libro Los jóvenes preguntan. Naʼthí: “Xátatsa̱ʼwa̱a̱ edxa̱ʼ rí a̱ʼdiáaʼ nánguá eyoo gáʼyoo nditháan religión. Nguáná dxámá i̱ndó ndayóoʼ mandxaʼwáminaʼ májánʼ”. Mbáa rígi̱ narígá índo̱ nutsudaa bi̱ nambáxu̱u̱ gajmíi̱n, rí xtáa mbáwíi o numuu rí ndaʼyoo rí eʼwíínʼ jiáma nakhánun nacha̱ ñajunʼ náa congregación. Náa apéndice xóó naʼthí: “Xkujndu rígi̱ na̱nguá e̱ʼkha̱ numuu rí nánguá gíʼdoo fe. Rí phú naʼni rí dxámá naʼniuu mingíjyúuʼ maʼnimbánuu rí xtáa raʼnimbo̱o̱”. Náa apéndice naʼthúún xa̱bu̱ buanii ndiéjunʼ gúni á mu aʼdiún naʼniuu mingíjyúuʼ maʼnimbo̱o̱ rí gajkhun.

19. Xú káʼnii gándoo muni xa̱bu̱ buanii mu e̱jñún majmañún munikríyami̱jna̱ rá.

¹⁹ Xa̱bu̱ buanii guáʼdáá ñajunʼ rí munimbanuu e̱jñún “xóo eʼthí náa xtángoo ga̱jma̱a̱ xó má endxa̱ʼóo edxu̱u̱ Jeobá” (Efes. 6:4). Xó má ndiʼyáá, raʼkháa i̱ndó musngúún rí naʼthí náa Biblia, ma̱ngaa gíʼmaa mumbañún munimbu̱ún rí kuwa rajmañún. E̱ji̱n gíʼmaa mbuyáá májánʼ rígi̱ ga̱jma̱a̱ maxkaxi̱ín muxnaximi̱jna̱ náa Jeobá ga̱jma̱a̱ muni ñajunʼ ga̱jma̱a̱ xúgíʼ a̱jkiu̱ún. Rí Biblia ga̱jma̱a̱ xi̱ʼ kaʼwu ga̱jma̱a̱ tsiakii rí nuni xa̱bu̱ buanii mambáñun e̱jñún mu majmañún munikríyami̱jna̱.