1. a) Ndiéjunʼ xkujndu eraʼníí rá. b) Náa numuu rí xtáa gagi Jeobá ga̱jma̱a̱ numún xa̱bi̱i̱ bi̱ naguáju̱n jmbu rá. (Atayáá xtiʼkhu rí na̱ʼkha̱ náa gi̱ʼdu̱u̱.)

XÓ MÁ eʼyáá xúgiáanʼ, náa numbaaʼ rígi̱ rígá wéñuʼ xkujndu. Mbaʼánʼ rí ikháanʼ guáʼdáá wéñuʼ nandii rí gakhi̱i̱. Tikuáanʼ rí ikháanʼ kuwáanʼ ruñewu̱u̱n ana̱la, maski ajndu mangáanʼ guaniáanʼ. Tikhun kuwa ruñajunʼ wéñuʼ mu mumbañún bi̱ kuwa náa guʼwún rí nda̱ñúnʼ raʼkháa rí maguaʼdáá wéñuʼ. Ga̱jma̱a̱ nduʼyáá rí mbaʼin na̱nguá eraʼníí mbóó xkujndu, nuraʼníí mbaʼa. Xúgíʼ rígi̱ naʼni rí maʼni néʼngu̱u̱n ga̱jma̱a̱ nunimbáti̱ga̱ mba̱a̱ mbiʼi ma̱ngaa mbújkha̱a̱. Maski ajndu xúʼko̱, guáʼdáá mbá fe gujkhuʼ náa rí naʼthí Dios maxná nda̱wa̱á. Jeobá nadxuu kaʼyala xúgiáanʼ ikháanʼ.

2. a) Xú káʼnii exnúlú tsiakii Isaías 40:29 rá. b) Ndiéjunʼ dí ra̱májánʼ dí ragíʼmaa muʼni rá.

² Maski ajndu xúʼko̱, lá naku̱ma̱ʼ rí nguáná xkujndu naʼni magajtoo tsiakii ndrígáʼ ráʼ. Á mu xúʼko̱ tagíʼnii, raʼkháa i̱ndó ikháánʼ tagíʼnii rígi̱. Náa Biblia naʼthí ga̱jma̱a̱ numún tikhun xa̱bu̱ bi̱ nikuwa nákha wajyúúʼ bi̱ nikumu̱ún rí xáʼngu̱u̱n guraʼníí xkujndu (1 Rey. 19:4; Job 7:7). Mú takanajkúnʼ, rí phú nini, ninda̱ʼa̱a̱ Jeobá rí maxnún tsiakii ga̱jma̱a̱ ikhaa tániñunʼ numuu rí “naxnúu tsiakii bi̱ nánguá eʼngo̱o̱” (Is. 40:29). Mú, tikhun xa̱bi̱i̱ Dios rí mbiʼi xúgi̱ nundxa̱ʼwa̱míjna̱ rí itháan májánʼ muraʼníí xkujndu índo̱  “mbu̱ya̱a̱ xúnʼ mbá chíʼgíʼ náa rí gajkhun”, nduyáá rí ñajunʼ Jeobá nindxu̱u̱ gakhi̱i̱ wéñuʼ ki xóo mbá rí májánʼ. Ikha jngó, nuniñaʼ ruraxnuu Biblia, nánguá egún reunión ga̱jma̱a̱ nánguá etaraʼa, rúʼko̱ rí nandoo Satanás muʼni.

3. a) Xú káʼnii gándoo guʼni gaʼduunʼ tsiakii rí naʼni Satanás mu makaguabáanʼ rá. b) Ndiéjunʼ gúʼyáá náa artículo rígi̱ rá.

³ Gixa̱a̱ ndaʼyoo májánʼ rí muʼni ñajunʼ Jeobá naʼni rí makuwáanʼ gujkhuʼ. Ga̱jma̱a̱ ikhaa tsíyoo rí makuwáanʼ gujkhuʼ. Ikha jngó, índo̱ ikháánʼ gáku̱ma̱ʼ rí néʼngaʼ ga̱jma̱a̱ numuu rí natani ga̱jma̱a̱ rí natraʼníí, xarájñaʼ náa Jeobá. Rí phú gándoo matani, ataxúʼmaminaʼ náa ikhaa. Garmáʼáan a̱jkia̱nʼ rí naʼthí náa Biblia: “Ikhaa gáʼni rí maguajún jmbu, ga̱jma̱a̱ rí maguajún gujkhuʼ” (1 Ped. 5:10; Sant. 4:8). Náa artículo rígi̱, mbuʼyáá a̱jma̱ enii rí ma̱ndoo maʼni rí xúʼni̱ itháan ñajunʼ Dios. Ma̱ngaa muʼthá xú káʼnii gambáyulú ikha rí na̱ʼkha̱ náa Biblia mu maʼngulú. Mú ginii guʼyáá rí naʼthí náa Isaías 40:26-31, rí naʼsngúlúʼ xú káʼnii exnúlú tsiakii Jeobá.

4. Ndiéjunʼ gándoo gajmañulú náa Isaías 40:26 rá.

⁴ (Atraxnuu Isaías 40:26). * Nimbáa nda̱wa̱a̱ tsáa eʼngo̱o̱ gaguxnuu a̱ʼgua̱a̱n bi̱ kuwa mekhuíí. Científicos nakumu̱ún rí i̱ndó náa galaxia ndrígúlú, náa Vía Láctea, ma̱ndoo makuwá itháan rí 400 mil millones a̱ʼgua̱a̱n. Ga̱jma̱a̱ Jeobá naxná mbiʼñún xúgínʼ ikhiin. Ndiéjunʼ ejmañulú ga̱jma̱a̱ numuu rígi̱ rá. Á mu Dios naxmiéjunʼ kaʼyoo rí niʼni, ndiéjunʼ ku̱mu̱u̱ ikhaa ga̱jma̱a̱ numaʼ, rí natani ñajunʼ numuu rí nandaʼ xtayáá, raʼkháa numuu rí ikhaa niʼníín mu matani xúʼko̱ xá. (Sal. 19:1, 3, 14.) Anu̱lú bi̱ nandoo kaʼyulú naniníínʼ májánʼ. Jesús niʼthí: “Asjndo tsun idxaʼla kixnu mba xugui” (Mat. 10:30). Ga̱jma̱a̱ mbáa bi̱ niʼnirámáʼ salmos niʼthí: “Jeobá ndaʼyoo xúgíʼ rí eraʼníí bi̱ nda̱a̱ rí ekieʼkhun” (Sal. 37:18). Xóo muʼthá, naninuʼ tsáʼkhá rí xtaa ratraʼníí ga̱jma̱a̱ ma̱ndoo maxnáʼ tsiakii mu maʼngaaʼ matraʼníí xúgíʼ.

5. Náa numuu nduʼyáá májánʼ rí Jeobá ma̱ndoo maxnúlúʼ tsiakii rí ndayúlú rá.

⁵ (Atraxnuu Isaías 40:28). * Náa Jeobá naku̱mu̱u̱ xúgíʼ tsiakii. Atatsaʼwáminaʼ nguáthá tsiakii exnúu A̱jkha̱ʼ. Bi̱ naʼnirámáʼ ciencia David Bodanis niʼthí rí mámbá segundo A̱jkha̱ʼ naʼni marigá wéñuʼ combustible xó má mbaʼa wéñuʼ bombas atómicas. Imba̱a̱ científico ndiʼyoo rí A̱jkha̱ʼ naʼni rí marigá “tsiakii mámbá segundo mu marigá rí nda̱ñúnʼ xa̱bu̱ numbaaʼ náa mbá a̱jma̱ ciento mil tsiguʼ”. Á mu Jeobá naxnúu tsiakii A̱jkha̱ʼ, tsáa gándoo gáʼthi rí ikhaa xáʼngo̱o̱ gáxnulú tsiakii mu maʼngulú muraʼníí asndu xú káʼnii xkujndu rá.

6. a) Náa numuu rí niʼthí Jesús rí yoko ndrígóo nindxu̱u̱ guabaaʼ rá. b) Ndiéjunʼ embáyulú ikháanʼ índo̱ nduʼyáá rígi̱ rá.

⁶ (Atraxnuu Isaías 40:29). * Rí muʼni ñajunʼ Jeobá naʼni makuwáanʼ gagi. Jesús niʼthúún xa̱bi̱i̱ ndrígóo: “Gurigula yugüiʼ [o yoko]”. Ga̱jma̱a̱ niʼthí xóó: “Aʼkue ri muxkamala naʼ ri mbaya xuʼ nimiaʼla. Ranguijiu-ma muʼgua juyaʼla yugüiʼ, jame huipi-ma ri jaguloʼ” (Mat. 11:28-30). ¡Phú gajkhun nindxu̱u̱ ajngáa rígi̱! Nguáná, nagáanʼ wéñuʼ índo̱ na̱jkua̱ reunión ga̱jma̱a̱ índo̱ na̱jkua̱ gúʼtaraʼa. Mú índo̱ nagutangáanʼ náa guʼwúlú nakumulú rí kuaʼdáá itháan tsiakii ga̱jma̱a̱  kuwáanʼ xawii mu maʼngulú muraʼníí xkujndu. Nduʼyáá rí yoko ndrígóo Jesús na̱nguá mingíjyúuʼ mu̱ʼgua̱ kuʼyúlú ga̱jma̱a̱ guabaaʼ nindxu̱u̱.

7. Arathá mbá experiencia rí nasngájma rí gajkhun nindxu̱u̱ ajngáa rí na̱ʼkha̱ náa Mateo 11:28-30.

⁷ Guʼyáá rí nigíʼnuu mbáa ndxájulú a̱ʼgu̱ bi̱ néʼngo̱o̱ má xúʼko̱, naxmiéjunʼ wéñuʼ ga̱jma̱a̱ na̱ʼkhu̱ wéñuʼ edxu̱u̱. Nakru̱ʼu̱lú rí xóo xtáa naʼniuu mingíjyúuʼ maʼga̱ náa nagimbáanʼ. Mú mbóo mbiʼi, nda̱wa̱á rí niʼni tsiakimínaʼ maʼga̱ náa Reunión Pública, niʼnirámáʼ: “Discurso niʼthí ga̱jma̱a̱ numún bi̱ nakaguabiinʼ. Rí niʼthí bi̱ nixná discurso ninindxu̱u̱ mitsaan wéñuʼ rí asndu nimbiyaʼ. Ndi̱yo̱o̱ májánʼ rí gíʼmaa maxtáá náa reunión”. Ndxájulú bugi̱ nidxuu wéñuʼ rí niʼni tsiakimínáʼ mu maxtáa náa reunión.

8, 9. Ndiéjunʼ nindoo gáʼthi Pablo ga̱jma̱a̱ ajngáa “na̱jkhá ragúʼdoo itháan tsiakii índo̱ guabúnʼ” rá.

⁸ (Atraxnuu Isaías 40:30). * Tséʼniuu rí ejmañulú muʼni ga̱jma̱a̱ xóo xa̱bu̱ ni̱ndxu̱lú, tsiakii ndrígúlú nartumuu. Rígi̱ nindxu̱u̱ mbá rí xúgiáanʼ gíʼmaa majmañulúʼ. Gundxa̱ʼwámi̱jna̱ ga̱jma̱a̱ numuu apóstol Pablo. Maski ajndu ninindxu̱u̱ mbáa xa̱biya̱ bi̱ najmaa maʼni mbaʼa rí eyoo mu táʼngo̱o̱ gáʼni xúgíʼ. Índo̱ niʼthúu̱n Dios rí naʼni maxmiéjunʼ, ikháá má niriʼña̱a̱: “Na̱jkhá ragúʼdoo itháan tsiakii índo̱ guabúnʼ”. Pablo nikro̱ʼo̱o̱ májánʼ ga̱jma̱a̱ niʼthí: “Índo̱ guabúnʼ, ikhú nagúʼdoo tsiakii” (2 Cor. 12:7-10). Ndiéjunʼ nindoo gáʼthi xá.

⁹ Pablo nikro̱ʼo̱o̱ rí xájmaa maʼni mbaʼa á mu nda̱wa̱a̱ tsáa bi̱ itháan najmañuu mu mambáyúu. Xi̱ʼ kaʼwu ndrígóo Dios ma̱ndoo maxnúu tsiakii índo̱ gákumu̱u̱ rí nakáguabaaʼ. Mú raʼkháa i̱ndó rúʼko̱. Ma̱ngaa maʼndoo maʼnirataa mu maʼni rí nimbá miʼtsú xáʼngo̱o̱ gáʼni mbáwíi. Xúʼko̱ má gíʼnulú mangáanʼ. Ma̱ndoo makuwáanʼ gujkhuʼ ga̱jma̱a̱ numuu tsiakii ndrígóo Dios.

10. Xú káʼnii Jeobá nimbáyúu David mu maʼngo̱o̱ maraʼnuu xkujndu rá.

¹⁰ Salmista David nikumu̱u̱ mbaʼa nuthu tsiakii ndrígóo Dios. Ikhaa niʼnirámáʼ: “Ga̱jma̱a̱ numaaʼ maʼngo̱ʼ magayúʼ náa xa̱bu̱ sia̱nʼ; ga̱jma̱a̱ numuu Dios ndrígóʼ maʼngo̱ʼ matsimuʼ náa mbá xtátsí” (Sal. 18:29). Tikhuu xkujndu nindxu̱u̱ xóo mbá xtátsí rí xáʼngo̱o̱ gúʼni gajmiúlú. Ndayúlú rí Jeobá mambáyulúʼ.

11. Xú kaʼnii embáyulú xi̱ʼ kaʼwu mu maʼngulú muraʼníí xkujndu rá.

¹¹ (Atraxnuu Isaías 40:31). * Índo̱ bi̱yú nagún itháan rijma̱a̱ ga̱jma̱a̱ nuriyaʼ awan mu magún mitsínguánʼ, tseni ga̱jma̱a̱ i̱ndó tsiakii rí guáʼdáá. Ga̱jma̱a̱ xu̱ʼ giñánʼ naʼni rí magún ratsimún ga̱jma̱a̱ tséjmún wéñuʼ tsiakii ndrígu̱ún. Ikha jngó, índo̱ natraʼníí xkujndu mingíjyúuʼ, garmáʼáan a̱jkia̱nʼ xtañún bi̱yú. Atanda̱ʼa̱a̱ Jeobá rí maxnáʼ tsiakii índo̱ rí gáʼyaaʼ ga̱jma̱a̱ ‹xi̱ʼ kaʼwu ndrígóo› (Juan 14:26). Ga̱jma̱a̱ garmáʼáan a̱jkia̱nʼ rí gíʼmaa matanda̱ʼa̱a̱ má xúʼko̱ índo̱ rí gáʼyaaʼ, ga̱jma̱a̱ kañiʼ mbiʼi. Gundxa̱ʼwámi̱jna̱ rí kuwáanʼ ruguaʼnii mbá náa rí mbaʼyóoʼ munda̱ʼa̱a̱ tsiakii Jeobá: Índo̱ nuguáʼdáá xkujndu gajmiúlú mbáa ndxájulú. Náa numuu narígá rígi̱ rá.

12, 13. a) Náa numuu narígá xkujndu náa a̱ngiu̱lú rá. b) Ndiéjunʼ eʼsngúlúʼ ga̱jma̱a̱ numuu Jeobá rí xóo nigíʼnuu José rá.

¹² Naguáʼdáá xkujndu gajmiúlú a̱ngiu̱lú numuu rí xúgiáanʼ ni̱ndxu̱lú xa̱bu̱ aʼkhá. Ikha jngó, nguáná eʼwíínʼ a̱ngiu̱lú muni o muthi mbá rí maʼni makiʼnáanʼ, ga̱jma̱a̱ nguáná ikháanʼ muʼni rí ikhiin makiʼníin. Rígi̱ ma̱ndoo mani̱ndxu̱u̱ mbá tsáʼkhá mba̱a̱. Xó má náa i̱ʼwáʼ, Jeobá naniñuʼ musngájma rí kuwáanʼ jmbu ga̱jma̱a̱ najmañulúʼ muñajunʼ mbá kajuáanʼ gajmiúlú xa̱bi̱i̱ bi̱ nandoo  kaʼñún maski ajndu ni̱ndxu̱ún xa̱bu̱ aʼkhá.

¹³ Jeobá tserikhoo rí xa̱bi̱i̱ muraʼníí tsáʼkhá, xó má eʼsngúlúʼ rí xóo nigíʼnuu José. Índo̱ ninindxu̱u̱ dxámá nigún ku̱ya̱a̱ náa Egipto numuu rí a̱ngui̱i̱n nigujua̱a̱ xóo mbáa yumbáá numuu rí nixígu̱u̱n kuyáá (Gén. 37:28). Mbáa Dios nigáwunʼ wéñuʼ índo̱ ndiʼyoo rí bi̱ nambáxu̱u̱ ga̱jma̱a̱ nini gínáa, bi̱ ninindxu̱u̱ jmbii. Mú nda̱a̱ rí niʼni ga̱jma̱a̱ nda̱a̱ má rí niʼni nda̱wa̱á nákha ninigámaa rí nindoo mabóoʼ ga̱jma̱a̱ a̱ʼgiu̱u̱ Potifar ga̱jma̱a̱ nixudaʼ guʼwá e̱jua̱nʼ. Mú, lá niniñuʼ Dios José ráʼ. Na̱nguá. Náa Biblia naʼthí rí ‹Jeobá niʼni rí magajnúu májánʼ› xúgíʼ rí niʼni (Gén. 39:21-23).

14. Xú káʼnii embáyulú mu xákiʼnáanʼ rá.

¹⁴ Guʼyáá i̱mba̱ numuu. Nguéjmi̱i̱n xa̱bu̱ niguaʼniin xóo nigíʼnuu imba̱a̱ bi̱ nimbáxu̱u̱ ga̱jma̱a̱ Dios, ikhaa nigumbiʼyuu David. Mú ikhaa tániñuʼ maʼni gámbáa sia̱nʼ rí gíʼdoo. Niʼnirámáʼ: “Atatsíñaʼ rajmanguaʼ ga̱jma̱a̱ rí nakásngañaʼ; xákiʼnán i̱ndó mu matani dí raʼkhí” (Sal. 37:8). Imbo̱o̱ rí gíʼdoo itháan numuu rí muʼni gaʼduunʼ rí nakiʼnáanʼ, xóo muʼthá, muníʼñaʼ mbá kayuʼ, mbuʼyaridáá Jeobá, bi̱ “tseʼni gínáanʼ ga̱jma̱a̱ numuu aʼkhá ndrígúluʼ” (Sal. 103:10). Mú, á mu tsekiʼnáanʼ, mambáyulúʼ mu makuwáanʼ májánʼ. Rígi̱ maʼni rí xákuwáanʼ májánʼ rí xáʼngulú gúʼyáxulú, ga̱jma̱a̱ maʼniuu nandii náa xkígúlú, chámbúlú ga̱jma̱a̱ maʼni rí xándoo gumixúlú o maʼni xa̱ʼ awúnlú. Índo̱ nakiʼnáanʼlú, tsendxaʼwáá májánʼ edxu̱lúʼ. Ga̱jma̱a̱ nda̱wa̱á rí nikiʼnáanʼ wéñuʼ maʼni rí maxmiéjunʼlú má xúʼko̱ mba̱yu̱ʼ mbiʼi. Mú, náa Biblia naʼthí rí “mbáa bi̱ guabaaʼ a̱jkiu̱u̱n naʼni rí maxtáa májánʼ” (Prov. 14:30). Índo̱ mbáa ndxájulú naʼni gawúnlú, ndiéjunʼ gáyambáá mu mambaxíiʼ gajmiúlú xá. Rí muʼgíʼ muʼnimbánii xtágabu rí na̱ʼkha̱ náa Biblia.

15, 16. Ndiéjunʼ gándoo muʼni á mu mbáa naʼni gawúnlú rá.

¹⁵ (Atraxnuu Efesios 4:26). * Tséʼniulú tsiánguá rí xa̱bu̱ numbaaʼ nuniulú dí ra̱májánʼ. Mú á mu mbáa ndxájulú o mbáa bi̱ kuʼyáá naʼniulú o naʼthúlúʼ mbá rí maʼni gawúnlú wéñuʼ, ma̱ndoo makáguabáanʼ. Gundxaʼwamíjna̱ rí tséʼngulú gambumulú rí nirígá. Lá muyexíi má xúʼko̱ sia̱nʼ mba̱yu̱ʼ tsiguʼ ráʼ. O lá muʼgími̱jna̱ muʼni rí naʼthí xtágabu rí na̱ʼkha̱ náa Biblia rí muʼnimbánii mbá nacha̱ ráʼ. Á mu nuniʼñánʼ manújngoo mba̱yu̱ʼ, itháan gaʼniulúʼ mingíjyúuʼ mumbaxííʼ gajmiúlú.

¹⁶ Atatsaʼwáminaʼ rí mbáa ndxájulú niʼni gawáanʼ ga̱jma̱a̱ ikháánʼ tsíyoo gambumaʼ rí nirígá. Ndiéjunʼ gambáyaaʼ mu mambaxííʼ ga̱jma̱ʼ xá. Timbá, aratájkáan ga̱jma̱a̱ xúgíʼ  a̱jkia̱nʼ náa Jeobá ga̱jma̱a̱ atanda̱ʼa̱a̱ rí mambáyaʼ mu maratha̱a̱n májánʼ ndxájulú. Garmáʼáan a̱jkia̱nʼ rí ikhaa ma̱ngaa nambáxu̱u̱ ga̱jma̱a̱ Dios ga̱jma̱a̱ rí Dios nandoo kaʼyoo (Sal. 25:14). Jeobá nangajo̱o̱ kaʼñún bi̱ nambáxu̱u̱ gajmíi̱n ga̱jma̱a̱ xúʼko̱ gíʼthu̱u̱n muʼni mangáanʼlu (Prov. 15:23; Mat. 7:12; Col. 4:6). Nda̱wa̱á, atatsaʼwáminaʼ májánʼ ndiéjunʼ gárata. Xáku̱ma̱ʼ rí ndxájulú niʼni gawáanʼ gajunʼ. Ga̱jma̱a̱ atayáá rí mbáa mangáán nitani̱ rí mbajoo ajngáa rígi̱. Ma̱ndoo matagíʼdi̱i̱ maratha̱a̱n: “Mbáa guabúunʼ wéñuʼ, mú, índo̱ nirathu̱nʼ ri̱xi̱, niku̱mu̱ʼ xúgi̱ kaʼnii”. Á mu tambánuu, atayááʼ imbo̱o̱ mbiʼi mu mambaxíiʼ ga̱jma̱ʼ. Ma̱ngaa atanda̱ʼa̱a̱ Jeobá rí maʼni tsajkurámááʼ ndxájulú. Ga̱jma̱a̱ arathá kháñii rí mambáyaʼ ma̱ta̱ya̱a̱ káʼnii rí májánʼ eʼni bi̱ niʼni gawáánʼ. Garigá má rí garigá, Jeobá manigu̱ʼ tsiakii rí natani mu mambaxííʼ ga̱jma̱ʼ ndxájuaʼ bi̱ nambáxu̱u̱ ga̱jma̱a̱ Dios.

17. a) Á mu nixuʼdámíjná mbá aʼkhá, xú káʼnii embáyulú Jeobá mu maʼndoo makuwáanʼ májánʼ rá. b) Náa numuu rí gíʼmaa muʼniñámíjná rí ikhaa mambáyulúʼ xá.

¹⁷ Tikhun a̱ngiu̱lú nakumu̱ún dí rakáʼñun muni ñajunʼ Jeobá numuu rí nixudami̱jna̱ mbá aʼkhá mba̱a̱. Rí naʼni gawúunʼ ma̱ndoo maʼni rí xákuwa tsímáá, xákuwa gagi ga̱jma̱a̱ ní xaguaʼdáá tsiakii. Rey David niʼthí xúgi̱ kaʼnii ga̱jma̱a̱ numuu rí nikumu̱u̱: “Índo̱ niguanúʼ wíí, niguuʼ itsu̱ʼ numuu rí nixtáá gíná xúgíʼ mbiʼi. Numuu rí mbiʼi ga̱jma̱a̱ mbruʼun ñawáanʼ niʼni mikewun náa ikhúúnʼ”. David niʼngo̱o̱ niraʼnuu xkujndu xóo mbáa xa̱biya̱, mbáa xa̱biya̱ bi̱ nambáxu̱u̱ ga̱jma̱a̱ Dios, xó má Jeobá nindoo. Niʼnirámáʼ: “Mani majphúʼ náa Jeobá xúgíʼ dí xkawiʼ wéñuʼ rí nini [...]. Ga̱jma̱a̱ ikháánʼ mínaʼ nitani̱ mba̱a̱ a̱jkia̱nʼ ga̱jma̱a̱ numuu aʼkhúnʼ” (Sal. 32:3-5). Á mu ikháánʼ nitaxúdaminaʼ mbá aʼkhá mba̱a̱, Jeobá nandoo mambáyaʼ mu maraxtaa májánʼ. Mu, maʼngaaʼ matanimbánii, ikháánʼ gíʼmaa matatsiʼñáminaʼ mumbayááʼ náa congregación (Prov. 24:16; Sant. 5:13-15). Xátani rí mbajyúuʼ, numuu dí rúʼko̱ maʼni rí maraxtaa kámuu. Mú, ndiéjunʼ gátani á mu ku̱ma̱ ndrígáʼ naʼni gawáánʼ wéñuʼ nda̱wa̱á rí Dios niʼni mba̱a̱ a̱jkiu̱u̱n kaʼyaʼ rá.

18. Xú káʼnii embáñun xkri̱da ndrígóo Pablo bi̱ nakumu̱ún dí rakáʼñun muni ñajunʼ Dios rá.

¹⁸ Nguáná Pablo niʼni maxmiéjunʼ dí ra̱májánʼ rí niʼni nákha ginii. Ikhaa niʼthí: “Numuu rí ikhúúnʼ ni̱ndxu̱ʼ bi̱ itháan chíʼgíʼ náa apóstol, ga̱jma̱a̱ rakáʼyoʼ magumbiʼyuu apóstol, numuu rí nixkúún bi̱ kuwa náa congregación ndrígóo Dios”. Mú, ikhaa xóó niʼthí: “Numuu rí májánʼ wéñuʼ a̱jkiu̱u̱n Dios ikhúúnʼ má ni̱ndxu̱ʼ” (1 Cor. 15:9, 10). Jeobá nigruiguíi Pablo maski ajndu nikudaminaʼ aʼkhá nákha ginii ga̱jma̱a̱ nindoo rí ikhaa mbaʼyoo májánʼ rígi̱. Á mu ikháánʼ nitanga̱a̱n ga̱jma̱a̱ xúgíʼ a̱jkia̱nʼ ga̱jma̱a̱ dí ra̱májánʼ rí nitani̱ nákha ginii ga̱jma̱a̱ nitani̱ majphú náa inuu Jeobá ga̱jma̱a̱ náa bi̱ kuya̱ edxu̱u̱ á mu ndiyóoʼ matani, ma̱ndoo ma̱ta̱ya̱a̱ májánʼ rí Dios magaʼwíínʼ a̱jkiu̱u̱n kaʼyaʼ. Ikha jngó, ga̱ku̱ma̱ʼ rí Jeobá niʼni mba̱a̱ a̱jkiu̱u̱n kaʼyaʼ ga̱jma̱a̱ atrígú rí niʼni ga̱jma̱a̱ numaaʼ (Is. 55:6, 7).

19. Náa biʼyáá nindxu̱u̱ texto rí kaʼyoo tsiguʼ 2018, ga̱jma̱a̱ náa numuu mani̱ndxu̱u̱ májánʼ rá.

¹⁹ Ma̱ndoo muguaʼthi̱i̱n rí gamiéjunʼ maʼga̱ ra̱ja̱ itháan índo̱ gártumuu mbiʼi ndrígóo numbaaʼ rígi̱. Mú ga̱ku̱ma̱ʼ rí Jeobá gáxnáʼ rí gáʼyaaʼ mu xátani guabaminaʼ, numuu rí “naxnúu tsiakii bi̱ nánguá eʼngo̱o̱ ga̱jma̱a̱ naʼni rí magiʼdoo wéñuʼ bi̱ nánguá gíʼdoo tsiakii” (Is. 40:29; Sal. 55:22; 68:19). Náa xúgíʼ tsiguʼ 2018, marmáʼáan a̱jkiu̱lú rí gíʼdoo wéñuʼ numuu mámbá rí gúʼgua náa reunión ga̱jma̱a̱ índo̱ gúʼyáá náa Guʼwá nagimbáanʼ ajngáa rí kaʼyoo tsiguʼ rígi̱: “Bi̱ guáʼthi̱i̱n náa Jeobá muguaʼdáá tsiakii” (Is. 40:31).