1. Náa numuu eʼthá rí kuwáanʼ náa mbiʼi kiejunʼ rá.

KUWÁANʼ náa mbiʼi kiejunʼ. Xó má niʼtáriyaʼ náa Biblia, Jeobá xtáa ragímbíin mbaʼin xa̱bu̱ “bi̱ naguwáʼ náa xúgíʼ xuajen mba̱ʼu̱, xuajen majkhaʼ ga̱jma̱a̱ náa xúgíʼ ajngáa”. Bi̱ mbaʼin xa̱bu̱ bugi̱ ni̱ndxu̱ún “mbá xuajin bi̱ gíʼdoo tsiakii” itháan rí migiñuʼ millón xa̱bu̱ bi̱ kuwa gagi “kuwa runi ñajuunʼ mbiʼí mbruʼun náa templo” (Rev. 7:9, 15; Is. 60:22). Nimbá miʼtsú na̱nguá nikuwa wéñuʼ xa̱bu̱ bi̱ nandún kuyáá Dios ga̱jma̱a̱ xa̱bu̱ numbaaʼ.

2. Ndiéjunʼ ngajua rí guáʼdáá xa̱bu̱ bi̱ narájñunʼ náa Dios rá. (Atayáá timbá xtiʼkhu.)

² Mú náa Biblia ma̱ngaa niʼthí rí mbiʼi xúgi̱ xa̱bu̱ marájñunʼ náa Dios ga̱jma̱a̱ maguaʼdáá mbá ngajua dí ra̱májánʼ, rí maʼndún kuyamijná i̱ndó ikhiin. Apóstol Pablo niʼnirámáʼ rí náa “iwáá mbiʼi”, mbaʼin “maʼndún kuyamijná i̱ndó ikhiin”, “manigunʼ wéñuʼ mbújkha̱a̱” ga̱jma̱a̱ “maʼndún muni rí nanigunʼ ikhiin ki xóo rí nandoo Dios” (2 Tim. 3:1-4). Rí nandún kuyamijná i̱ndó ikhiin nindxu̱u̱ mixtiʼkhu ki xóo rí maʼndún kuyáá Dios. Xa̱bu̱ bi̱ nandún kuyamijná i̱ndó ikhiin na̱nguá kuwa tsímáá xóo rí guáʼthi̱i̱n. Ngajua rúʼko̱ naʼni rí xa̱bu̱ maʼndún kuyamijná i̱ndó ikhiin ga̱jma̱a̱ naʼniún mingíjyúuʼ makuwa.

3. Ndiéjunʼ gúʼyáá náa artículo rígi̱, ga̱jma̱a̱ náa numuu rá.

 ³ Pablo ndiʼyoo rí maʼndún kuyamijná i̱ndó ikhiin majmaʼnuʼ wéñuʼ ga̱jma̱a̱ mani̱ndxu̱u̱ gamíi náa bi̱ ni̱ndxu̱lú cristianos. Ikha jngó nixnúlú xtágabu rí marájñulú náa bi̱ nusngajma ngajua dí ra̱májánʼ (2 Tim. 3:5). Maski ajndu maʼniaʼ mingíjyúuʼ rí matatsiʼñáanʼ raratamíjná gajmiáanʼ xa̱bu̱ buʼko̱. Mú, xú káʼnii gándoo gúʼni gaʼduunʼ rí xóo endxaʼwamíjna̱ xa̱bu̱ bi̱ kuwa náa kuwáanʼ ga̱jma̱a̱ muʼni tsiakimíjna̱ mu muʼni rí naniguʼ Jeobá Dios bi̱ nandoo kaʼyulú rá. Guʼyáá xú káʼnii mixtiʼkhu nindxu̱u̱ ngajua ndrígóo Dios rí nandulúʼ muguaʼdáá ga̱jma̱a̱ ngajua rí na̱ʼkha̱ raʼthí náa 2 Timoteo 3:2-4. Rígi̱ gambáyulú mundxaʼwamíjna̱ mu mbuʼyáá ngajua rí ma̱ndoo muguaʼdáá ga̱jma̱a̱ rí maʼni makuwáanʼ tsímáá.

4. Náa numuu eʼyáá dí májánʼ nindxu̱u̱ rí maʼndulú kuʼyamijná ikháanʼ rá.

⁴ Xó má ndiʼyáá, Pablo niʼnirámáʼ: “Xa̱bu̱ maʼndún kuyamijná i̱ndó ikhiin”. Lá rúʼko̱ eyoo gáʼthi dí ra̱májánʼ nindxu̱u̱ rí maʼndulú kuʼyamijná i̱ndó ikháanʼ ráʼ. Na̱nguá. Kaʼyoo rí maʼndulú kuʼyamijná. Xúʼko̱ má niʼniáanʼ Jeobá. Jesús niʼthí: “Gaʼne akianʼ-xtaya xabo numbagajmaʼ, asjndo xoma ri eʼne akianʼ xtayaminaʼ (Mar. 12:31). Á mu na̱nguá eyulú kuʼyamijná ikháanʼ, xándoo gaʼndulúʼ kuʼñúún eʼwíínʼ xa̱bu̱. Ma̱ngaa náa Biblia naʼthí: “Xa̱bu̱ bi̱ ninigúnʼ gíʼmaa rí maʼndoo kaʼyoo a̱ʼgiu̱u̱ xó má eyoo kaʼyaminaʼ. Bi̱ nandoo kaʼyoo a̱ʼgiu̱u̱ xúʼko̱ má eyoo kaʼyaminaʼ ikhaa, numuu rí nimbáa xa̱bu̱ na̱nguá wiyuʼ kaʼyaminaʼ; rí naʼni, naxniʼtsuminaʼ, ga̱jma̱a̱ nañewuminaʼ májánʼ wéñuʼ” (Efes. 5:28, 29). Ikha jngó májánʼ nindxu̱u̱ rí maʼndulú kuʼyamijná xóo rí kaʼyoo.

5. Xú káʼnii ni̱ndxu̱ún xa̱bu̱ bi̱ nandún kuyamijná wéñuʼ rá.

⁵ Rí maʼndulú kuʼyamijná i̱ndó ikháanʼ rí na̱ʼkha̱ raʼthí náa 2 Timoteo 3:2 rakáʼyoo ga̱jma̱a̱ na̱nguá nindxu̱u̱ májánʼ. Nindxu̱u̱ mbá ngajua rí ra̱májánʼ ga̱jma̱a̱ i̱ndó nandxa̱ʼwáminaʼ ga̱jma̱a̱ numuu ikhaa. Bi̱ nandún kuyamijná itháan nundxa̱ʼwa̱míjna̱ i̱ndó ga̱jma̱a̱ numún ikhiin itháan ki xóo rí kaʼyoo (atraxnuu Romanos 12:3). * Naxmiéjunʼ wéñuʼ ga̱jma̱a̱ numún ikhiin ki xóo náa eʼwíínʼ. Ga̱jma̱a̱ índo̱ narígá mbá dí raʼkhí, nuthi rí eʼwíínʼ guáʼdáá aʼkhún ki xóo muthi rí ikhiin nikiéʼkhun. Xa̱bu̱ bugi̱ bi̱ i̱ndó nandún kuyamijná ikhiin na̱nguá kuwa gagi.

6. Ndiéjunʼ erígá índo̱ xa̱bu̱ nandún kuyáá Dios rá.

⁶ Tikhun bi̱ najmañún nakumu̱ún rí índo̱ Pablo niʼthí xú káʼnii gánindxu̱ún xa̱bu̱ náa iwáá mbiʼi, niʼthí ginii ga̱jma̱a̱ numún bi̱ nandún kuyamijná i̱ndó ikhiin numuu dí rígi̱ naʼni muni dí ra̱májánʼ rí na̱ʼkha̱ nda̱wa̱á. Mú, xa̱bu̱ bi̱ nandún kuyáá Dios nusngajma cualidad mixtiʼkhu wéñuʼ. Náa Biblia nambánii ngajua rí kuaʼdáá náa ikhaa ga̱jma̱a̱ gagi, tsímáá, rí maʼngo̱o̱ wéñuʼ a̱jkiu̱lúʼ, rí manindxu̱lúʼ xa̱bu̱ májánʼ a̱jkiu̱u̱n, muʼni rí májánʼ, fe, rí manindxu̱lúʼ xa̱bu̱ guabáanʼ, rí muñewa̱a̱n rí muʼni (Gál. 5:22, 23). Bi̱ niʼnirámáʼ mbá salmo niʼni ajmúú: “¡Gagi xtáa xuajin índo̱ Dios ndrígóo nindxu̱u̱ Jeobá!” (Sal. 144:15). Jeobá nindxu̱u̱ mbáa Dios gagi, ga̱jma̱a̱ xa̱bi̱i̱ nusngajma cualidad rúʼko̱. Ma̱ngaa, ikhiin kuwa gagi numuu rí nuxna rí guáʼdáá mu mumbañún eʼwíínʼ, raʼkháa xóo bi̱ nandún kuyamijná i̱ndó ikhiin ga̱jma̱a̱ i̱ndó nundxa̱ʼwa̱míjna̱ rí mundrigú (Hech. 20:35).

7. Á mu nandulúʼ mbuʼyáá xú káʼnii eyulú kuʼyáá Dios, ndiéjunʼ guraximíjna̱ rá.

⁷ Xú káʼnii gándoo gúʼyáá rí ngajua rí guáʼdáá naʼni itháan mba̱a̱ ki xóo ngajua rí kuaʼdáá náa Dios rá. Gundxaʼwamíjna̱ náa xtágabu rí na̱ʼkha̱ náa Filipenses 2:3, 4. Ikhí naʼthí rí cristianos ragíʼmaa muni nimbá  ‹rí maʼni mugi̱ʼdu̱u̱n o rí muni mbaʼumíjna̱›, rí phú gíʼmaa muni rí mani̱ndxu̱ún ‹xa̱bu̱ gua̱ba̱ʼ mu mbuyáá rí eʼwíínʼ itháan guáʼdáá numún ki xóo ikhiin›. Ma̱ngaa naʼthí dí ragíʼmaa ‹maxmiéjunʼ kuyamíjna̱ i̱ndó ga̱jma̱a̱ numún ikhiin, gíʼmaa maxmiéjunʼ kuñún eʼwíínʼ›. Ma̱ndoo muraximíjna̱: “Lá naʼgíʼ nani rígi̱ náa vida ndrígóʼ ráʼ. Lá naxmiéjunʼ mani rí nandoo Dios ráʼ. Lá ndaʼyaaʼ xú káʼnii mambáñun bi̱ kuwa náa congregación ga̱jma̱a̱ náa nataráʼa ráʼ.” Rí muxná rí ndayóoʼ miʼskhoo nindxu̱u̱. Mbáa mbaʼyóoʼ muʼnimi̱jna̱ wéñuʼ ga̱jma̱a̱ muniʼñáaʼ ruʼni rí tsénigulú. Mú nda̱a̱ imbo̱o̱ rí maʼni makuwáanʼ itháan tsímáá xóo rí mbuʼyáá rí kuwáanʼ ruʼni rí naniguʼ bi̱ phú minaʼ Rey.

8. Ndiéjunʼ rí exkaxi̱i̱n muni tikhun a̱ngiu̱lú ga̱jma̱a̱ numuu rí nandún kuyáá Dios rá.

⁸ Rí nandún kuʼyáá Dios ga̱jma̱a̱ rí nandún muni itháan ñajuunʼ naxkaxi̱i̱n tikhun cristianos muniñaʼ carreras rí ma̱ndoo mudaʼ mba̱a̱ mbújkha̱a̱. Mbáa ndxájulú bi̱ mbiʼyuu Ericka nindxu̱u̱ médico, mú táyááʼ magiʼdoo itháan ñajunʼ náa thana. Rí phú niʼni, ninindxu̱u̱ precursora regular ga̱jma̱a̱ niñajunʼ ga̱jma̱a̱ ajmbio̱o̱ náa mbaʼa xuajen mba̱ʼu̱. Ikhaa naʼthí: “Niguáʼdááxu mbaʼa experiencias náa nuthi i̱mba̱ ajngáa ga̱jma̱a̱ niguáʼdíinxu bi̱ nimbáxuxu gajmiúxu̱. Xúgíʼ rígi̱ niʼni magiʼdoo itháan numuu náa vida ndrígúxu̱. Nanigajmaa má xúʼko̱ ga̱jma̱a̱ numuu thana, mú rí itháan naʼniuʼ maxtáá gagi rí majmuʼ mbiʼi ga̱jma̱a̱ tsiakii ndrígóʼ mu mani thanún xa̱bu̱ ga̱jma̱a̱ ajngá rawunʼ Dios ga̱jma̱a̱ mayambáá náa congregación”.

9. Náa numuu rí na̱nguá kuwa tsímáá bi̱ nanigu̱nʼ wéñuʼ mbújkha̱a̱ rá.

⁹ Pablo ma̱ngaa niʼthí ga̱jma̱a̱ numún bi̱ “manigunʼ wéñuʼ mbújkha̱a̱”. Niʼni nguáthá tsiguʼ rí mbáa precursor bi̱ xtáa náa Irlanda niʼthúu̱n ga̱jma̱a̱ numuu Dios mbáa xa̱bu̱. Xa̱bu̱ bugi̱ niguwíi mbújkha̱a̱ náa billetera ga̱jma̱a̱ asndu nadxuu niʼthí: “¡Rígi̱ nindxu̱u̱ dios ndrígóʼ!”. Maski ajndu eʼwíínʼ tsethi, mbaʼin xa̱bu̱ nundxa̱ʼwa̱míjna̱ ikhaa kayúʼ xóo xa̱bu̱ bugi̱. Nanigu̱nʼ wéñuʼ mbújkha̱a̱ ga̱jma̱a̱ rí nanigu̱nʼ mutsi. Mú náa Biblia naʼthúlúʼ: “Mbáa bi̱ naniguʼ wéñuʼ plata maʼndoo magiʼdoo itháan plata, mbáa bi̱ naniguʼ wéñuʼ mbújkha̱a̱ xagiʼmuu ga̱jma̱a̱ mbújkha̱a̱ rí gíʼdoo” (Ecl. 5:10). Bi̱ nanigu̱nʼ wéñuʼ mbújkha̱a̱ itháan gáʼnduun maguaʼdáá ga̱jma̱a̱ maʼndún mbuyááʼ má xúʼko̱ asndu náa makhánun. Mú rígi̱ maʼni maguaʼdáá “wéñuʼ xkujndu” (1 Tim. 6:9, 10).

10. Ndiéjunʼ eʼthí Biblia ga̱jma̱a̱ numuu mbújkha̱a̱ ga̱jma̱a̱ rí tsingíná rá.

¹⁰ Gajkhun má rí xúgiáanʼ ndayúlú mbújkha̱a̱, numuu rí nambáyulúʼ (Ecl. 7:12). Mú, lá maʼndoo maxtáa gagi mbáa á mu gíʼdoo nguátháá mu maxtáa ga̱jma̱a̱ xáʼ. Xúʼko̱ (atraxnuu Eclesiastés 5:12). * Agur, a̱ʼdióo Jaqué, nindo̱ʼo̱o̱ Dios: “Xátani rí maʼni migínún ní rí magúʼdoo wéñuʼ. I̱ndó atatsíñuʼ miʼkhu ganitsu rí kaʼyoʼ”. Ra̱mingíjyúuʼ mbuʼyáá náa numuu rí na̱nguá nindoo mani̱ndxu̱u̱ mbáa xa̱bu̱ gínáa. Ikhaa má niʼthí rí táʼndoo maxkajxi̱i̱ a̱jkiu̱u̱n rí maʼni kúwáʼ numuu rí xúʼko̱ xáʼyamajkhuu Dios. Mú náa numuu nindo̱ʼo̱o̱ rí xágiʼdoo wéñuʼ xá. Ikhaa niʼthúu̱n: “Mu xagiʼmuuʼ wéñuʼ ga̱jma̱a̱ mata rí tséniʼníínʼ ga̱jma̱a̱ xáta̱: ‹Tsáa nindxu̱u̱ Jeobá rá.›” (Prov. 30:8, 9). Mbáa nuniʼnúuʼ xa̱bu̱ bi̱ nakumu̱ún kuyáá mbújkha̱a̱ ki xóo rí makumún kuyáá Dios.

11. Ndiéjunʼ niʼthí Jesús ga̱jma̱a̱ numuu mbújkha̱a̱ rá.

¹¹ Bi̱ nanigu̱nʼ mbújkha̱a̱ xándoo muni rí naniguʼ Dios. Jesús niʼthí: “Nimba xabo maxaxo majma naʼ inu ajmi xabo ri mbo miʼtsu, numu ri mba maxaxo gaʼyo, imba tsi maʼne akuinjaʼyo, o maʼnemajanmineʼ inu mba,  imba tsi maxaxo gaʼyo. Maxaxo gajmaʼla naʼ inu Dios xi maguihuanʼ-güeño akianʼla-juya riqueza”. Jesús ndiʼkhú niʼthún: “Maxuʼya-güeñaʼla ri mapu-ihua guiʼdo numu naʼ numba rigueʼ, naʼ ri indo ruxi iʼko, jame indo iyo iʼka, naʼ indo kuʼhua ituʼun nuni kuʼhua. Guʼyala ri mapu-ihua guiʼdo numu mikui, naʼ ni ruxi maxiko, ni iyo maxaʼka, ni naʼ maxatuʼun kuʼhua muni kuʼhua” (Mat. 6:19, 20, 24).

12. Náa numuu rí xáʼni mingíjyúuʼ muʼni ñajunʼ Dios á mu na̱nguá kuaʼdáá wéñuʼ rá. Araxná mbá xkri̱da.

¹² Mbaʼin naguanu nduyáá rí nakuwa gagi ga̱jma̱a̱ naguapiin itháan mu muni ñajunʼ Jeobá á mu tseguáʼdáá wéñuʼ. Náa Estados Unidos, mbáa ndxájulú bi̱ mbiʼyuu Jack nigiʼdoo mbá guʼwá mitsaan ga̱jma̱a̱ mbá ñajunʼ, mú nigujua̱ goʼwóo mu mani̱ndxu̱u̱ precursor ga̱jma̱a̱ a̱ʼgiu̱u̱. Ikhaa naʼthí: “Niʼniuxu mingíjyúuʼ muniʼñáʼ guʼwúxu rí mitsaan ga̱jma̱a̱ mbaaʼ rí guáʼdááxu. Mú nákha ginii, mámbá rí natangu̱u̱n náa goʼwóoʼ nixmiéjunʼ wéñuʼ ga̱jma̱a̱ numuu xkujndu ndrígóo ñajunʼ. Mú a̱ʼgiu̱ʼ bi̱ nindxu̱u̱ precursora xtáa má xúʼko̱ gagi. Ikha niʼthí: ‹Gúʼdaa mbáa patrón bi̱ itháan májánʼ›. Xúgi̱ rí mangúún ni̱ndxu̱ʼ precursor, nájmáanʼxu nuñajunʼxu gajmiúxu̱ ikháá má xa̱bu̱, Jeobá”.

13. Ndiéjunʼ gambáyulú mbuʼyáá májánʼ rí endxaʼwáá edxu̱lúʼ ga̱jma̱a̱ numuu mbújkha̱a̱ rá.

¹³ Ndiéjunʼ gambáyulú mbuʼyáá xóo phú endxaʼwáá edxu̱lúʼ ga̱jma̱a̱ numuu mbújkha̱a̱ rá. Gíʼmaa mundxaʼwamíjna̱ májánʼ: “Lá xóo xtáá nasngájma rí nanimboʼ rí naʼthí náa Biblia ga̱jma̱a̱ numuu mbújkha̱a̱ ráʼ. Lá itháan gíʼdoo numuu rí magúʼdoo itháan mbújkha̱a̱ ráʼ. Lá naxmiéjunʼ itháan rí magúʼdoo wéñuʼ ki xóo rí mambáxuʼ ga̱jmu̱ʼ Jeobá ga̱jma̱a̱ bi̱ kuwa náa xtáá ráʼ. Lá nda̱yo̱o̱ májánʼ rí Jeobá maxnúʼ rí ndayóoʼ ráʼ”. Ma̱ndoo mbuʼyáá májánʼ rí Dios nimbá miʼtsú xániñúnʼ bi̱ nakumu̱ún kuyáá ikhaa (Mat. 6:33).

14. Xóo gíʼmaa mbuʼyáá rí nanigulúʼ muʼni rá.

¹⁴ Xó má nijuiʼtáriyaʼ, xúgi̱ mbaʼin xa̱bu̱ “maʼndún muni rí nanigunʼ ikhiin”. Xó má na̱nguá nindxu̱u̱ raʼkhí rí maʼndulú kuʼyamijná xó má kaʼyoo ga̱jma̱a̱ rí maguaʼdáá mbújkha̱a̱ xó má kaʼyoo, ma̱ngaa na̱nguá má raʼkhí nindxu̱u̱ rí muʼni gagimijná xó má kaʼyoo. Tikhun xa̱bu̱ nakumu̱ún rí gíʼmaa muniñaʼ xúgíʼ rí nanigu̱nʼ muni ga̱jma̱a̱ rí májánʼ xóo kuwa. Mú raʼkháa rúʼko̱ rí naʼsngáa Jeobá. Náa Biblia naʼthúún xa̱bi̱i̱ bi̱ ni̱ndxu̱ún jmbiin náa Dios: “Ayuʼ, ga̱jma̱a̱ gagi giʼtsu ganitsu  ndrígáʼ ma̱ngaa ga̱jma̱a̱ gagi a̱jkia̱nʼ gígi̱i̱n vino ndrígáʼ” (Ecl. 9:7).

15. Ndiéjunʼ eyoo gáʼthúu̱n “maʼndún muni rí nanigunʼ ikhiin” xá.

¹⁵ Índo̱ náa 2 Timoteo 3:4 naʼthí ga̱jma̱a̱ numún bi̱ nanigu̱nʼ muni rí nandún ikhiin, nandoo gáʼthúu̱n bi̱ nuniñaʼ mbájkhu Dios. Náa versículo rígi̱ tséʼthi rí muni rí nanigu̱nʼ ikhiin itháan ki xóo náa Dios, numuu rí rúʼko̱ nandoo gáʼthúu̱n rí maʼndún kuyáá wáa kayuʼ. Naʼthí rí “maʼndún muni rí nanigunʼ ikhiin ki xóo rí nandoo Dios”. Mbáa xa̱bu̱ bi̱ najmañuu naʼthí rí versículo rígi̱ “tsíyoo gáʼthúu̱n rí ikhiin mangiin maʼndún kuyáá Dios wáa kayuʼ. Nandoo gáʼthúu̱n rí tsíñún kuyáá nditháan”. Ajngáa rígi̱ naʼthí ga̱jma̱a̱ numún bi̱ nanigu̱nʼ muni rí nandún ikhiin. Ajngáa rí “maʼndún muni rí nanigunʼ ikhiin” nasngájma májánʼ ‹rí manigunʼ wéñuʼ› “mba xugui ri riga naʼ tsudu numba” (Luc. 8:14).

16, 17. Xú káʼnii ndiʼyoo Jesús dí rígá náa numbaaʼ rá.

¹⁶ Jesús ndiʼyoo xó má gíʼmaa dí rígá náa numbaaʼ. Ikhaa nixtáa náa “ndxa tsigun” ga̱jma̱a̱ ma̱ngaa “pu-mba ndxa neʼne” (Juan 2:1-10; Luc. 5:29). Índo̱ niguámbá vino náa ndxa̱a̱ gatsigúnʼ, niʼni mbá milagro ga̱jma̱a̱ iyaʼ nirtaxi̱i̱ vino. Imbo̱o̱ mbiʼi, índo̱ xa̱bu̱ nitanumáá ga̱jma̱a̱ numuu rí nikuiʼtsu ga̱jma̱a̱ rí niʼga̱a̱n, nisngájma kaʼwu dí raʼkhí nindxu̱u̱ rúʼko̱ (Luc. 7:33-36).

¹⁷ Maski ajndu xúʼko̱, Jesús tájmuu mbiʼi ndrígóo mu maʼni rí naniguʼ. Nigíʼ ginii Jeobá ga̱jma̱a̱ niʼni xúgíʼ rí niʼngo̱o̱ mu mambáñun eʼwíínʼ. Mu mbaʼin ma̱ndoo makáwíin ikhaa nimínuuʼ wéñuʼ índo̱ nidujmaa náa ixi̱. Ikhaa niʼthún xúgínʼ xa̱bi̱i̱: “Juhuala gagui tsanʼla miʼtan xkahuiyaʼla, muxkahuiñaʼla jame muten mba xugui ri ramajan numaʼla ri minduhua gajma numuʼ. Gaʼdxaʼla jame gajuhuala gagui numu ri mapu-mba ri riga mudaʼla mikui, numu ri xkuaʼni-ma nixkahuin gaʼyo tsi nijuhua huajiu naki ri majuhua ikanʼla” (Mat. 5:11, 12).

18. Ndiéjunʼ graxe̱ gambáyulú mbuʼyáá nguáthá eyulú kuʼyáá rí nanigulúʼ muʼni rá.

¹⁸ Ndiéjunʼ gambáyulú mbuʼyáá nguáthá enigulúʼ kuʼyáá rí nanigulúʼ muʼni rá. Guraximíjna̱: “Lá rí mani gagiminaʼ itháan gíʼdoo numuu ki xóo reunión ga̱jma̱a̱ rí mataráʼa ráʼ. Lá nandoʼ maniʼñúʼ tikhuu rí naniguʼ numuu rí nandoʼ mani ñajunʼ Dios ráʼ. Índo̱ naraʼwíí xóo mani gagiminaʼ, lá naraximínáʼ á mu naniguʼ Jeobá ráʼ.” Á mu gajkhun nandulúʼ kuʼyáá Dios, muʼni gaʼduunʼ rí nduʼyáá rí tsénigu̱ʼ, xúʼko̱ má ma̱ngaa rí nakumulú rí xániguʼ (atraxnuu Mateo 22:37, 38).

19. Tsíin xa̱bíi bi̱ nditháan xáʼndoo makuwa gagi rá.

¹⁹ Numbaaʼ ndrígóo Satanás naʼni rí mumíniiʼ xa̱bu̱ numbaaʼ náa mbá majun mil tsiguʼ. Xúgi̱ rí kuwáanʼ náa iwáá mbiʼi asndu índo̱ rí mambáa xúgíʼ dí xtáa rarígá náa Ku̱ba̱ʼ, kuwa wéñuʼ xa̱bu̱ náa tsu̱du̱u̱ Ku̱ba̱ʼ bi̱ nundxa̱ʼwa̱míjna̱ i̱ndó ga̱jma̱a̱ numún ikhiin, náa mbújkha̱a̱ ga̱jma̱a̱ rí nanigu̱nʼ muni. Ra̱ʼkhá tháán eñún muni rí gíwanʼ náa a̱jkiu̱ún ga̱jma̱a̱ rí ma̱ndoo muguaʼdáá. Xa̱bu̱ buʼko̱ nditháan xákuwa gagi. Mú, náa Biblia naʼthí: “Gagi xtáa bi̱ gíʼdaa Dios ndrígóo Jacob xóo bi̱ mambáyúu, bi̱ gíʼthu̱u̱n náa Jeobá Dios ndrígóo” (Sal. 146: 5).

20. Xú káʼnii ngajua rí xtaʼdáá náa Dios niʼni rí maraxtaa gagi rá.

²⁰ Bi̱ ni̱ndxu̱lú xa̱bi̱i̱ Jeobá nandulúʼ kuʼyáá má xúʼko̱ mámbá mbiʼi. Ga̱jma̱a̱ mámbá tsiguʼ, mbaʼin wéñuʼ xa̱bu̱ naguanu nuniʼniiʼ ga̱jma̱a̱ nandún kuyáá. Rígi̱ esngájma rí Reino ndrígóo Dios xtáa má raʼtáñajunʼ ga̱jma̱a̱ nacha̱ maʼni tsajkurámáánʼ rí nimbá miʼtsú tundxaʼwamíjna̱. Rí muʼni rí nandoo Jeobá ga̱jma̱a̱ rí mbuʼyáá rí ikhaa naniguʼ rí nuʼni maʼni makuwáanʼ tsímáá xúgi̱ ga̱jma̱a̱ kámuu mbiʼi. Náa imbo̱o̱ artículo, mbuʼyáá tikhuu cualidad rí na̱ʼkha̱ náa rí maʼndulú kuʼyamijná i̱ndó ikháanʼ ga̱jma̱a̱ mbuʼyáá xú káʼnii nindxu̱u̱ mixtiʼkhu cualidad rí nusngajma xa̱bi̱i̱ Jeobá.