1, 2. Ndiéjunʼ rí gáʼni rí makuwa mbá kambáxu̱u̱n xa̱bu̱ tsiguʼ 2018, ga̱jma̱a̱ ndíjkha jngó nindxu̱u̱ mbá mbiʼi kiejunʼ rá. (Atayáá timbá xtiʼkhu.)

ÍNDO̱ gáʼni 31 ñajunʼ gu̱nʼ marzo tsiguʼ 2018, índo̱ garámaʼ A̱jkha̱ʼ, ra̱ʼkhá tháán mbaʼin xa̱bi̱i̱ Dios ga̱jma̱a̱ xa̱bu̱ bi̱ nanigu̱nʼ munigajmaa magún náa reunión rúʼko̱ mu muniku̱ma̱a̱ Ganitsuwañu Señor. Mámbá tsiguʼ najmaku̱ma̱a̱ rí xú nikháñu Cristo, nda̱a̱ imbo̱o̱ mbiʼi rí makuwa mbá kambáxu̱u̱n xa̱bu̱.

² I̱ndó nandoo nundxa̱ʼwáá edxu̱lúʼ xú káʼnii Jeobá ga̱jma̱a̱ Jesús nadxún wéñuʼ índo̱ nduyáá rí mbaʼin xa̱bu̱ bi̱ kuwa náa xúgíʼ tsu̱du̱u̱ Ku̱ba̱ʼ nagún náa reunión kiejunʼ rígi̱. Náa Biblia niʼtáriyaʼ rí “mbaʼin xa̱bu̱” rí nimbáa xa̱bu̱ tséʼngo̱o̱ gaguxnuu “náa xúgíʼ xuajen mba̱ʼu̱, xuajen majkhaʼ ga̱jma̱a̱ náa xúgíʼ ajngáa” muthi: “Náa Dios gíʼmáanʼ rí niguma káwáanʼ, bi̱ gíiʼ náa trono ga̱jma̱a̱ Aʼdá múgú” (Rev. 7:9, 10). Mitsaan nindxu̱u̱ rí mbaʼin xa̱bu̱ muxnáá gamajkhu Jeobá ga̱jma̱a̱ Jesús mámbá tsiguʼ índo̱ najmaku̱ma̱a̱ rí nikháñuu.

3. Xú káʼnii nindxu̱u̱ graxe̱ rí muriʼña̱a̱ náa artículo rígi̱ rá.

³ Náa artículo rígi̱, muriʼña̱a̱ a̱jkhu̱ graxe̱. Timbá, xú káʼnii gándoo guʼniratamijná índo̱ gáʼni Conmemoración ga̱jma̱a̱ xú káʼnii  gambáyulú rá. Raga̱jma̱, náa numuu rí Conmemoración nayambáá mu xa̱bi̱i̱ Dios makuwa mbá jnduʼ rá. Ragajtsú, xú káʼnii gándoo gúʼni mu makuwáanʼ mbá kambáxulú rá. Ga̱jma̱a̱ rí maʼni a̱jkhu̱, lá maʼga̱nú mbóo mbiʼi rí muʼniku̱ma̱a̱ iwáá mbiʼi rí nikháñu Jesús rá. Á mu xúʼko̱, nguáná gáʼni rá.

4. Ndíjkha gíʼdoo numuu rí muʼni xúgíʼ mu makuwáanʼ náa Conmemoración rá.

⁴ Ndíjkha gíʼdoo wéñuʼ numuu makuwáanʼ náa Conmemoración rá. Garmáʼáan a̱jkiu̱lú rí mu̱ʼgua̱ reunión nindxu̱u̱ rí mbuʼyamajkuíí Dios. Mbáa Jeobá ga̱jma̱a̱ Jesús nduyáá májánʼ tsíin ni̱ndxu̱ún bi̱ nuni tsiakimi̱jna̱ makuwa náa reunión rí gíʼdoo wéñuʼ numuu náa tsiguʼ rígi̱. Nandulúʼ mbuyáá rí muʼnimi̱jna̱ makuwáanʼ ikhí á mu nda̱a̱ mbóo rí gakhi̱i̱ rí guraʼníí o i̱ʼwáʼ. Índo̱ nusngájma ga̱jma̱a̱ rí kuwáanʼ ru̱ʼni̱ rí reunión gíʼdoo itháan numuu náa ikháanʼlu, nandulúʼ rí Jeobá magiʼdoo mbiʼyulú náa “libro rí naʼni marmáʼáan a̱jkiu̱u̱n”. Libro rígi̱ rí ma̱ngaa nagumbiʼyuu, “libro ndrígóo vida”, na̱ʼkha̱ mbiʼñún bi̱ Jeobá nandoo makuwá kámuu mbiʼi (Mal. 3:16; Rev. 20:15).

5. Índo̱ inuu marigá Conmemoración, xú káʼnii gándoo gúʼyáá á mu kuaʼdáá fe rá.

⁵ Índo̱ inu marigá Conmemoración, ma̱ndoo muríyaʼ mbiʼi muʼtájkáan ga̱jma̱a̱ mbuʼyáá xú káʼnii embáxulú gajmiúlú Jeobá (atraxnuu 2 Corintios 13:5). * Xú káʼnii gándoo muʼni rá. Pablo niʼthí rí gíʼmáanʼ mbuʼyáá á mu kuaʼdáá fe. Ikha jngó májánʼ nindxu̱u̱ rí muraxi̱mi̱jna̱: “Lá nanimbooʼ rí gajkhun xtáá náa xuajñu Jeobá rí najmuu mu maguma rí nandoo ráʼ. Lá nani xúgíʼ asndu xó má eʼngoʼ mu mataráʼa ga̱jma̱a̱ masngáa ajngáa májánʼ ndrígóo Reino ráʼ. Lá nasngajmá ga̱jma̱a̱ rí nani rí gajkhun nanimbo̱o̱ʼ rí xtáá náa iwáá mbiʼi ga̱jma̱a̱ rí nacha̱ má Satanás ní xáʼtañajunʼ ráʼ. Lá naku̱mu̱ʼ ka̱yo̱o̱ Jeobá ga̱jma̱a̱ Jesús ikháá má xóo nákha nixnaxíminaʼ ráʼ.” (Mat. 24:14; 2 Tim. 3:1; Heb. 3:14.) Rí mundxaʼwamíjna̱ ga̱jma̱a̱ numuu graxe̱ rígi̱ mambáyulúʼ maʼngulú ‹musngajmá› má xúʼko̱ xóo ni̱ndxu̱lú.

6. a) Xú káʼnii gándoo gúʼni mu ma̱ndoo makuwáanʼ kámuu mbiʼi rá. b) Xú káʼnii eʼnirataminaʼ xúgíʼ tsiguʼ mbáa bi̱ kayá edxu̱u̱ índo̱ inuu marigá Conmemoración rá. c) Xú káʼnii gándoo guʼyaridáá xkri̱da ndrígóo ndxájulú bugi̱ rá.

⁶ Mbá rí xóo muʼniratamijná mu makuwáanʼ náa Conmemoración nindxu̱u̱ rí muraxnuu i̱yi̱i̱ʼ rí na̱ʼkha̱ náa Biblia náa naʼthí rí gíʼdoo numuu mbiʼi rígi̱ ga̱jma̱a̱ mundxaʼwamíjna̱ ga̱jma̱a̱ numuu rúʼko̱ (atraxnuu Juan 3:16; 17:3). I̱ndó ma̱ndoo makuwáanʼ kámuu mbiʼi á mu nuniʼnííʼ Jeobá ga̱jma̱a̱ á mu kuaʼdáá fe náa Jesús, A̱ʼdióo bi̱ mbáwíi. Mu muʼniratamijná náa Conmemoración, mbaʼyóoʼ muʼnigajmaa ga̱jma̱a̱ numuu rí mambáyulúʼ mu̱ʼgua̱ kanuu itháan mijngii náa ikhiin. Guʼyáá rí naʼni mbáa bi̱ kayá edxu̱u̱ bi̱ najmañuu wéñuʼ. Asndu niʼníí má tsiguʼ naguxi̱i̱ artículos ndrígóo Bi̱ Nayejngoo rí naʼthí ga̱jma̱a̱ numuu Conmemoración ga̱jma̱a̱ ngajua rí nasngájmulúʼ Jeobá ga̱jma̱a̱ Jesús. Mámbá tsiguʼ índo̱ inuu magi̱ʼdu̱u̱ xmáná rúʼko̱, naʼnigajmaa mbu̱júu̱ artículo rígi̱ ga̱jma̱a̱ nandxa̱ʼwáminaʼ dí ra̱ʼkhá tháán gíʼdoo numuu reunión kiejunʼ rígi̱. Nguáná, nakudaʼ mbóó o a̱jma̱ artículo náa i̱yi̱i̱ʼ rí niguxi̱i̱. Ndiyóoʼ maguxnuu mbu̱júu̱ rígi̱, rí maguxnuu Biblia índo̱ marigá Conmemoración ga̱jma̱a̱ rí mandxaʼwáminaʼ rí naguxnuu naʼni majmañuu i̱ʼwáʼ rí nuxi̱ʼ xúgíʼ tsiguʼ. Mú, rí itháan gíʼdoo numuu rí naku̱mu̱u̱ rí itháan nandoo kaʼyoo Jeobá ga̱jma̱a̱ Jesús. Rí muʼnigajmaa xúgi̱ kaʼnii ma̱ngaa ma̱ndoo maʼni rí maʼndulú kuʼyáá ga̱jma̱a̱ mangajulú kuʼyáá itháan, ga̱jma̱a̱ rúʼko̱ xóó mambáyulúʼ índo̱ gakuwáanʼ náa Conmemoración.

7. a) Ndiéjunʼ ninda̱ʼa̱ Jesús índo̱ niʼtájkáan nákha mbruʼun rí magumariyaʼ Ganitsuwañu Señor rá. b) Xú káʼnii eʼyáá rí Jeobá niriʼña̱a̱ rí niʼtájkáan Jesús rá.

⁷ Mbruʼun rí niniriyaʼ ganitsuwañu Señor, Jesús ninda̱ʼa̱ índo̱ niʼtájkáan rí xa̱bi̱i̱ makuwá mbá kambáxu̱u̱n xó má ikhaa ga̱jma̱a̱ Anu̱u̱ (atraxnuu Juan 17:20, 21). Jeobá niriʼña̱a̱ rí niʼtájkáan A̱ʼdióo bi̱ itháan nandoo kaʼyoo. Nda̱a̱ imbo̱o̱ reunión, xóo Conmemoración rí nasngájma kaʼwu rí xa̱bi̱i̱ Jeobá kuwáanʼ mbá kambáxulú. Mbiʼi rúʼko̱ nawi̱i̱n wéñuʼ xa̱bu̱ náa xuajen mba̱ʼu̱ ga̱jma̱a̱ razas ga̱jma̱a̱ nusngajma rí Jeobá nikunguanʼ A̱ʼdióo. Náa tikhuu xuajen, reunión rí nuni i̱ʼwáʼ religión na̱nguá kujmaa rígi̱ ga̱jma̱a̱ asndu naguiñunʼ kuyamijná. Mú Jeobá ga̱jma̱a̱ Jesús nduyáá rí mitsaan wéñuʼ rí makuwa kambáxu̱u̱n.

8. Xú káʼnii ajngáa ga̱jma̱a̱ numuu rí makuwá mbá kambáxu̱u̱n niʼthúu̱n Jeobá Ezequiel rá.

⁸ Xa̱bi̱i̱ Jeobá tséʼniulú tsiánguá rí makuwáanʼ mbá kambáxulú. Jeobá niʼthúu̱n gaʼyee Ezequiel rí maʼtáriyaʼ náa mbá ajngáa rí marigá xúʼko̱ kaʼnii. Ajngáa rígi̱ naʼthí rí a̱jma̱ ixi̱, “ixi̱ ndrígóo Judá” ga̱jma̱a̱ ixi̱ rí “maʼga̱ náa inuu José”, maʼga̱nú maʼni̱i̱ mbóó (atraxnuu Ezequiel 37:15-17). * Náa sección “Graxe̱ rí nuni bi̱ nuraxnuu”, Bi̱ Nayejngoo rí kaʼyoo gu̱nʼ julio tsiguʼ 2016 niʼthí: “Jeobá niʼthúu̱n Ezequiel mbá ajngáa rí májánʼ: Niʼtáriyaʼ rí xa̱bi̱i̱ matangi̱i̱n náa Ku̱ba̱ʼ rí Niʼthí maxnún ga̱jma̱a̱ mani̱ndxu̱ún mbu̱júu̱ mbóó xuajen. Ga̱jma̱a̱ ajngáa rígi̱, ma̱ngaa niʼtáriyaʼ rí mani̱ndxu̱u̱ mbóó xuajñu Dios rí marigá náa iwáá mbiʼi”.

9. Xú káʼnii kujmaa kaʼwu rí nambánuu xúgíʼ tsiguʼ náa Conmemoración rí niʼtáriyaʼ Ezequiel rá.

⁹ Nákha tsiguʼ 1919, Jeobá ginii niríyaʼ awan ga̱jma̱a̱ nigímbíin bi̱ kaxtaʼwíin bi̱ ni̱ndxu̱ún xóo “ixi̱ ndrígóo Judá”. Nda̱wa̱á, kidxu̱únʼ ikhiin nigún itháan xa̱bu̱ bi̱ guaʼthi̱i̱n makuwá náa tsu̱du̱u̱ Ku̱ba̱ʼ rí ni̱ndxu̱ún xóo ixi̱ rí “maʼga̱ náa inuu José”. Jeobá niʼthí rí maʼni rí mawa̱a̱ a̱jma̱ ixi̱ ga̱jma̱a̱ maʼni̱i̱ “imbóó ixi̱” náa ñawúunʼ (Ezeq. 37:19). Ikhaa niʼni rí bi̱ kaxtaʼwíin ga̱jma̱a̱ “iʼhuinʼ mugu” maguanu mani̱ndxu̱ún xóo bi̱ kuwa náa ‹mbá gúláa› (Juan 10:16; Zac. 8:23). Rí mbiʼi xúgi̱ nájma̱ grupo kuwa mbá kambáxu̱u̱n náa majñu̱ʼ mbáwíi Rey, Jesucristo bi̱ niguma mba̱a̱, bi̱ Dios nixná mbiʼyuu “xa̱bi̱ʼ David” rí niʼtáriyaʼ Ezequiel (Ezeq. 37:24, 25). Náa xúgíʼ tsiguʼ, rí niʼtáriyaʼ Ezequiel nakujmaa kaʼwu rí xú káʼnii nambáxu̱u̱n májánʼ bi̱ kaxtaʼwíin bi̱ xóó kuwa náa tsu̱du̱u̱ Ku̱ba̱ʼ índo̱ nawi̱i̱n gajmiún eʼwíínʼ mugu̱ mu muni ku̱ma̱a̱ rí nikháñu Cristo. Ndiéjunʼ gíʼmaa muʼni ikháanʼ rí xúgi̱ mu muñewa̱a̱n ga̱jma̱a̱ muʼni rí makuwáanʼ mbá kambáxulú rá.

10. Xú káʼnii gándoo gakuwáanʼ mbá kambáxulú’ náa xuajñu Dios rá.

¹⁰ Mbá rí xóo muni mu makuwa mbá kambáxu̱u̱n xa̱bi̱i̱ Dios rí mani̱ndxu̱ún xa̱bu̱ guabiinʼ. Nákha nixtáa Jesús náa tsu̱du̱u̱ Ku̱ba̱ʼ, niʼthún xa̱bi̱i̱ rí gíʼmaa mani̱ndxu̱ún xa̱bu̱ guabiinʼ (Mat. 23:12). Xa̱bu̱ náa xúgíʼ numbaaʼ nguáná nakumu̱ún rí itháan guáʼdáá numún ki xóo eʼwíínʼ. Mú á mu ikháanʼ ni̱ndxu̱lú xa̱bu̱ guabáanʼ, mbuʼyamajkún a̱ngiu̱lú bi̱ nuxna ikha náa congregación. Á mu nandulúʼ rí makuwaanʼ mbá kambáxulú, gíʼdoo wéñuʼ numuu rí muʼnimbulúʼ. Mú rí itháan gíʼdoo numuu rí manindxu̱lúʼ xa̱bu̱ guabáanʼ rúʼko̱  rí manigu̱ʼ Jeobá, numuu rí ikhaa “tsíyoo gáʼñun bi̱ nuʼni mbaʼumíjna̱, mú ikhaa nandoo kaʼñún xa̱bu̱ gua̱bi̱nʼ” (1 Ped. 5:5).

11. Xú káʼnii embáyulú mundxaʼwamíjna̱ rí eyoo gáʼthúu̱n rí najmaa náa Conmemoración mu makuwáanʼ mbá kambáxulú rá.

¹¹ Rí maʼni raga̱jma̱ rí xóo makuwáanʼ mbá kambáxulú nindxu̱u̱ rí mundxaʼwamíjna̱ tsu̱ma̱ rí eyoo gáʼthúu̱n pan ga̱jma̱a̱ vino dí narígá náa Conmemoración. Gíʼmaa muʼni nákha xóó tsekina mú itháan rí mbruʼun rúʼko̱ (1 Cor. 11:23-25). Pan rí na̱nguá gíʼdoo levadura nandoo gáʼthúu̱n xuyuʼ Jesús rí na̱nguá gíʼdoo aʼkhá rí nixnáxi̱ xóo tsigijñaʼ, ga̱jma̱a̱ vino nandoo gáʼthúu̱n eʼdiuu rí nixídíí. Raʼkháa i̱ndó makru̱ʼu̱lú ndiéjunʼ eyoo gáʼthúu̱n rúʼko̱. Garmáʼáan a̱jkiu̱lú rí tsigijñaʼ ndrígóo Jesús nisngájma a̱jma̱ rí itháan mba̱a̱ rí xóo nandoo kaʼyulú: Ngajua rí nisngájma Jeobá rí nixnáxi̱ A̱ʼdióo mu maʼni káwáanʼ ga̱jma̱a̱ ngajua rí Jesús nisngájma rí nixnáxi̱i̱ vida ndrígóo ga̱jma̱á numulúʼ. Rí mundxaʼwamíjna̱ tsu̱ma̱ rí nandoo kaʼyulú wéñuʼ gíʼmaa maʼndulú kuʼñúún mangáanʼ. Ga̱jma̱a̱ ngajua rí kuaʼdáá náa Jeobá ma̱ngaa náa a̱ngiu̱lú nindxu̱u̱ xó mbá ñuu rí naruwáanʼlú ma̱ngaa naʼni rí makuwáanʼ itháan kambáxulú.

12. Náa xkri̱da ndrígóo rey ga̱jma̱a̱ ñumbáá ndrígóo, xú káʼnii niniñuʼ kaʼwu Jesús rí Jeobá gíʼthu̱u̱n rí muʼni mba̱a̱ a̱jkiu̱lú kuʼñúún a̱ngiu̱lú rá.

¹² Rí maʼni ajtsú numuu mu makuwáanʼ kambáxulú nindxu̱u̱ rí muʼni mba̱a̱ a̱jkiu̱lú kuʼñúún eʼwíínʼ ga̱jma̱a̱ xúgíʼ a̱jkiu̱lú. Índo̱ nuʼni mba̱a̱ a̱jkiu̱lú kuʼñúún bi̱ nuni gawúnlú, nusngajmá rí nuxná núma̱aʼ Jeobá rí ma̱ndoo maʼni mba̱a̱ a̱jkiu̱u̱n kaʼyoo aʼkhá ndrígúlú ga̱jma̱a̱ numuu tsigijñaʼ rí nixná Cristo. Gundxaʼwamíjna̱ náa xkri̱da rí nigíʼ Jesús rí kiʼnirámáʼ náa Mateo 18:23-34. Guraximíjna̱: “Lá naxkaxu̱u̱n xkri̱da rígi̱ rí mani dí Jesús niʼsngáa ráʼ. Lá naʼngo̱o̱ a̱jkiu̱nʼ ga̱jma̱a̱ nakroʼoʼ kañún a̱ngiu̱lú ráʼ. Lá nani mba̱a̱ a̱jkiu̱nʼ ka̱ñu̱u̱n bi̱ nuni gawúunʼ ráʼ.” Gajkhun má rí tikhu aʼkhá nindxu̱u̱ itháan mitsáʼkháan ki xóo i̱ʼwáʼ. Ma̱ngaa rí xa̱bu̱ aʼkhá ni̱ndxu̱lú naʼniulú mingíjyúuʼ muʼni mba̱a̱ a̱jkiu̱lú índo̱ nuni gawúnlú. Mú ajngáa rí niʼthí Jesús nasngájma rí Jeobá gíʼthu̱u̱n muʼnilú (atraxnuu Mateo 18:35). Jesús nisngájma kaʼwu rí Jeobá xáʼni mba̱a̱ a̱jkiu̱u̱n kaʼyulú á mu tséʼni mba̱a̱ a̱jkiu̱lú  kuʼñúún a̱ngiu̱lú índo̱ rígá mbá numuu mu muʼni. Rígi̱ rí itháan gíʼdoo numuu mundxaʼwamíjna̱ tsu̱ma̱. Índo̱ nuʼnimbulúʼ kuʼyáá Jesús ga̱jma̱a̱ nuʼni mba̱a̱ a̱jkiu̱lú kuʼñúún eʼwíínʼ, nuñewa̱a̱n ga̱jma̱a̱ nuʼni rí makuwáanʼ mbá kambáxulú.

13. Xú káʼnii eʼni mu makuwa mbá kambáxulú índo̱ kuwáanʼ tsímáá gajmiúlú a̱ngiu̱lú rá.

¹³ Índo̱ nuʼni mba̱a̱ a̱jkiu̱lú kuʼñúún a̱ngiu̱lú, nakuwáanʼ tsímáá gajmiúlú ikhiin. Garmáʼáan a̱jkiu̱lú rí apóstol Pablo niʼthí rí gíʼmaa muʼnimi̱jna̱ ga̱jma̱a̱ xúgíʼ a̱jkiu̱lú “makuwáanʼ mbá jnduʼ náa espíritu rí naʼni makuwáanʼ tsímáá” (Efes. 4:3). Índo̱ gárígá Conmemoración ga̱jma̱a̱ itháan índo̱ gáʼni wakhííʼ rí muʼniriyaaʼ, gundxaʼwamíjna̱ tsu̱ma̱ xú káʼnii eʼniún eʼwíínʼ. Guraximíjna̱: “Lá nakujmaa kaʼwu rí xóo naʼni nasngájma rí tsiyéjkhá sia̱nʼ ráʼ. Lá nduyáá eʼwíínʼ rí nani asndu xó má eʼngoʼ mu marigá rí tsímáá ga̱jma̱a̱ rí makuwáanʼ mbá jnduʼ rá.” Tsiguʼ rígi̱, gundxaʼwamíjna̱ náa graxe̱ rígi̱ rí itháan gíʼdoo numuu.

14. Xú káʼnii gándoo musngajmá rí naʼngo̱o̱ a̱jkiu̱lú kuʼñúún eʼwíínʼ ga̱jma̱a̱ ngajua rá.

¹⁴ Rí maʼni a̱jkhu̱ numuu xóo makuwáanʼ mbá kambáxulú nindxu̱u̱ rí musngájma ngajua xó má eʼni Jeobá, Dios bi̱ nandoo kaʼyulú (1 Juan 4:8). Nditháan xúʼthá xóo ajngáa rígi̱: “Nda̱yo̱o̱ má rí gíʼmuu maʼndo̱ʼ ka̱ñu̱u̱n a̱ngiu̱lú, mú tsembaxuʼ gajmíi̱nʼ”. Rí mundxaʼwamíjna̱ xúʼko̱ káʼnii na̱nguá eʼnimbulúʼ xtágabu rí Pablo nixnúún cristianos rí gíʼmaa ‹maʼngo̱o̱ a̱jkiu̱ún kuyamijná› (Efes. 4:2). Guʼyáá dí raʼkháa i̱ndó niʼthí rí gíʼmaa maʼngo̱o̱ a̱jkiu̱lú kuʼñúún eʼwíínʼ, ma̱ngaa gíʼmaa maʼndulú ‹kuʼyamijná›. Lá ragájkhun rí mixtiʼkhu nindxu̱u̱ nájma̱ rígi̱ ráʼ. Jeobá ni̱ʼkha̱ kagu̱u̱n náa congregación mixtiʼkhu enii xa̱bu̱ (Juan 6:44). Ikha jngó ikhaa gíʼdoo mbaʼa numuu mu maʼndoo kaʼñún. Mú, xú káʼnii gándoo gúʼthá rí mbáa ndxájulú rakáʼyoo maʼndulú kuʼyáá rá. Ragíʼmaa muʼthá rí nimbáa rakáʼyoo ngajua rí Jeobá naʼthúlúʼ musngájma (1 Juan 4:20, 21).

15. Náa numuu eʼyáá rí marigá iwáá Conmemoración rá.

¹⁵ Maʼga̱nú mbóo mbiʼi rí muʼni iwáá Conmemoración. Náa numuu eʼyáá rá. Pablo niʼnirámáʼ náa inún cristianos bi̱ kaxtaʼwíin rí mámbá tsiguʼ rí nuni ku̱ma̱a̱ rí nikháñu Jesús nuthi “má xúʼko̱ ga̱jma̱a̱ numuu Señor, asndu índo̱ ikhaa gáʼkha̱a̱” (1 Cor. 11:26). Índo̱ Jesús niʼtáriyaʼ ga̱jma̱a̱ numuu rí martumuu mbiʼi, ma̱ngaa niʼthí índo̱ gáʼkha̱nú. Ga̱jma̱a̱ numuu índo̱ garigá majphú mba̱a̱ ga̱ʼkhu̱ ikhaa niʼthí: “Aʼkue ri makujma seña drigo Ade Xabo mikui, aʼkue ri mapu-maʼda akuin xabo tsi naguhua mba xugui rijñu xabo tsi juhua naʼ tsudu numba, jame mbuya Ade Xabo ri naʼka naʼ tsudu dun mikui gajma tsiake jame gajma gloria ri pumba. Jame majungüinʼ ángel drigo tsi mundi iʼmbi, muguimbun tsi niraʼhuin naʼ mba ako iko guiña naʼ ndambarigo raun miku, asjndo naʼ ndambarigo imba raun miku” (Mat. 24:29-31). Jesús magímbíin “bi̱ kaxtaʼwíin” índo̱ gáʼga kagui̱i̱n mekhuíí bi̱ xóó naguanún náa tsu̱du̱u̱ Ku̱ba̱ʼ. Rígi̱ garigá nda̱wa̱á rí marigá majphú mba̱a̱ gaʼkhu, mú ginii magi̱ʼdu̱u̱ Armagedón. Náa guerra rúʼko̱, Jesús ga̱jma̱a̱ 144,000 muni gámbíin reyes bi̱ kuwa náa tsu̱du̱u̱ Ku̱ba̱ʼ (Rev. 17:12-14). Conmemoración rí marigá ginii nákha xóó tséʼkha̱ Jesús mu maʼga̱ kagu̱u̱n mekhuíí bi̱ kaxtaʼwíin, rígi̱ mani̱ndxu̱u̱ iwáá.

16. Náa numuu rí ikháánʼ tsíyaaʼ mandáti̱ga̱ʼ Conmemoración rí marigá tsiguʼ rígi̱ rá.

¹⁶ Guʼnimíjna̱ rí xándáti̱gu̱lú Conmemoración dí marigá 31 ñajunʼ gu̱nʼ marzo tsiguʼ 2018. Ga̱jma̱a̱ gunda̱ʼa̱a̱ rí mambáyulúʼ makuwáanʼ mbá kambáxulú náa xuajñu (atraxnuu Salmo 133:1). * Xámbumulú rí ma̱ʼkha̱nú mbiʼi rí iwáá gakuwáanʼ náa Conmemoración. Gusngajmá rí mbuʼyamajkuíí wéñuʼ rí kuwaanʼ mbá kambáxulú náa Conmemoración.