XÚʼKO̱, xúgíʼ numbaaʼ nandún makuwá tsímáá. Mú náa iwáá mbiʼi rígi̱ nindxu̱u̱ “mingíjyúuʼ makuwáanʼ” (2 Tim. 3:1). Rígá mbaʼa rí naʼni rí xa̱bu̱ xákuwa tsímáá, xóo dí ra̱májánʼ, rí naʼniún nandii, rí nda̱a̱ ñajunʼ o rí nakháñun mbáa bi̱ nandún kuyáá. Asndu xa̱bi̱i̱ Dios ma̱ndoo makáguabiinʼ ga̱jma̱a̱ mañu mañú gáʼgá randáti̱gu̱u̱n rí gagi. Á mu xúʼko̱ kaʼnii egíʼniin, xú káʼnii gaʼngulú guraʼníí rá.

Mu muriʼña̱a̱ graxe̱ rígi̱, ginii gíʼmaa makru̱ʼu̱lú ndiéjunʼ phú nindxu̱u̱ rí gagi ga̱jma̱a̱ xú káʼnii tikhun xa̱bu̱ guáʼdáá gagi maski ajndu nuraʼníí xkujndu. Nda̱wa̱á mbuʼyáá ndiéjunʼ gúʼni mu muguaʼdáá o mu maʼga ra̱ja̱a̱ itháan.

Rí maraxtaa gagi tsímbriguii ga̱jma̱a̱ rí maʼdxaʼ. Muʼgíʼ mbá xkri̱da. Mbáa xa̱bu̱ bi̱ naʼga̱a̱n wéñuʼ iya najnga̱a̱ mbáa nanduʼwá wéñuʼ. Mú índo̱ nánguá ejnga̱a̱, naniñuʼ randuʼwá ga̱jma̱a̱ narmáʼáan a̱jkiu̱u̱n rí xóó gíʼdoo wéñuʼ xkujndu. Mú rí nadxuu nindxu̱u̱ mbá xngaa. Raʼkháa mbá gagi gajkhun (Prov. 14:13).

Rí gagi nindxu̱u̱ mixtiʼkhu wéñuʼ. Nindxu̱u̱ mbá rí naku̱mu̱u̱ asndu náa awúu̱n a̱jkia̱nʼ o rí naku̱ma̱ʼ índo̱ natrigú mbá rí májánʼ. Rí maku̱ma̱ʼ dí xtaa gagi nandoo gáʼthúu̱n rí maku̱mu̱lú rí kuwáanʼ tsímáá tséʼniuu má asndu xú káʼnii má xkujndu rí guraʼníí (1 Tes. 1:6). Mbáa xa̱bu̱ ma̱ndoo maku̱mu̱u̱ dí ra̱májánʼ ga̱jma̱a̱ numuu mbáa maski ajndu xúʼko̱ ma̱ndoo maxtáa gagi. Mbá xkri̱da, apóstoles nijuixnún numuu rí nithi ga̱jma̱a̱ numuu Cristo, mú náa Biblia naʼthí rí “A’kue nigajna na’ inu xabo tsi nduyaikun xabo xuajin Pu-nadxun ri huatiamakunʼ numu ri ndiyaminiʼ gajma rimatiʼ gajma numu Mbiʼyu Jesús” (Hech. 5:41). Gajkhun má rí tákuwa gagi ga̱jma̱a̱ numuu rí nijuixnún, numuu rí niguájun jmbu náa inu Dios.

Nimbáa nda̱wa̱a̱ tsáa niguma ga̱jma̱a̱ gagi ni má tséʼkha̱ ikhaa. Náa numuu rá. Numuu rí gagi najma̱a̱ náa xi̱ʼ kaʼwu ndrígóo Dios. Xi̱ʼ rígi̱ nambáyulúʼ muriʼkhumijná ‹xóo xa̱bu̱ ni̱ndxu̱lú›, rí na̱ʼkha̱ náa gagi (Efes. 4:24; Gál. 5:22). Ga̱jma̱a̱ índo̱ guáʼdáá gagi naʼngulú nuraʼníí itháan májánʼ rí naʼni maxmiéjunʼlú náa vida ndrígúlú.

Índo̱ Jeobá niʼni numbaaʼ nindoo rí xúgíʼ mani̱ndxu̱u̱ májánʼ, raʼkháa xúgíʼ dí ra̱májánʼ rí nduʼyáá xúgi̱. Maski ajndu gajkhun nindxu̱u̱ rí xa̱bu̱ nuni dí ra̱májánʼ, mú ikhaa na̱nguá nindáti̱go̱o̱ gagi. Náa ajngá rawunʼ Dios naʼthí: “Tsiakii ga̱jma̱a̱ gagi rígá náa xtáa” (1 Crón. 16:27). Ma̱ngaa a̱jkiu̱u̱n xtáa gagi índo̱ ndaʼyoo rí xa̱bi̱i̱ nuni dí májánʼ (Prov. 27:11).

Xú káʼnii gándoo guʼyaridáá xkridoo Jeobá rá. Xaxmiéjunʼlú wéñuʼ índo̱ tsegájnu májánʼ xó má rí guáʼthi̱i̱n magajnúu. Mú xúʼnimbáti̱ga̱ rí gagi, guʼnimíjna̱ mbuʼyáá rí májánʼ rí kuaʼdáá xúgi̱ ga̱jma̱a̱ gaʼngulú muguaʼthi̱i̱n rí maʼni̱i̱ májánʼ. *

 Náa Biblia nuxkamaa mbaʼa xkri̱da ndrígu̱ún xa̱bi̱i̱ Dios bi̱ tandáti̱gu̱u̱n gagi índo̱ niraʼníí xkujndu mingíjyúuʼ. Mbáa rí ikhiin ninindxu̱u̱ Abrahán. Ikhaa ndiyóoʼ maraʼnuu xkujndu rí nini eʼwíínʼ xa̱bu̱ ga̱jma̱a̱ rí nigíʼ muxiyáa (Gén. 12:10-20; 14:8-16; 16:4, 5; 20:1-18; 21:8, 9). Mú nditháan tandati̱go̱o̱ gagi. Náa numuu rí na̱nguá rá. Numuu rí nindxa̱ʼwáminaʼ májánʼ rí maxtáa náa ku̱ba̱ʼ mitsaan náa maʼtáñajunʼ Mesías (Gén. 22:15-18; Heb. 11:10). Jesús niʼthí: “Pu-niguiʼdo gagui tatiaʼla Abraham ri mbaʼyo mbiʼi ri maxtaloʼ” (Juan 8:56). Mangáanʼ ma̱ndoo mbuyaridáá xkri̱da ndrígóo Abrahán á mu nundxa̱ʼwa̱míjna̱ ga̱jma̱a̱ gagi náa xúgíʼ rí májánʼ rí marigá nda̱wa̱á (Rom. 8:21).

Xó má Abrahán, apóstol Pablo ga̱jma̱a̱ bi̱ nambáxu̱u̱ ga̱jma̱a̱ Silas nindxa̱ʼwa̱míjna̱ náa rí nikudaminaʼ maʼni Dios. Numuu rí niguáʼdáá mbá fe gujkhuʼ, niguáʼdáá gagi índo̱ niraʼníí xkujndu mingíjyúuʼ. Mbóo mbiʼi, nijuixnún ga̱jma̱a̱ nixudiinʼ guʼwá e̱jua̱nʼ. Náa Biblia naʼthí rí “rido niganu tikunduʼun, Pablo eʼne tsakun gajma Silas, nusien alabanza naʼ inu Dios” (Hech. 16:23-25). Ma̱ngaa tsiakii rí nini mu muguaʼthi̱i̱n rí marigá nda̱wa̱á, niguáʼdáá gagi numuu rí kuwa rumíniʼ ga̱jma̱a̱ numuu Cristo. Á mu nandulúʼ mbuʼyaridáá xkri̱da ndrígu̱ún, gíʼmaa mbuʼyáá má xúʼko̱ rí májánʼ nindxu̱u̱ rí muʼni ñajunʼ Dios ga̱jma̱a̱ fe (Filip. 1:12-14).

Rí mbiʼi xúgi̱ guáʼdáá mbaʼa xkri̱da ndrígu̱ún a̱ngiu̱lú bi̱ niguáʼdáá gagi maski ajndu niraʼníí xkujndu. Mbá xkri̱da, nákha gu̱nʼ noviembre tsiguʼ 2013, supertifón Haiyan niʼni gámbáa xuajen Filipinas. Niguma gámbáa guʼwún itháan rí mbá mil xa̱bi̱i̱ Jeobá. Rígi̱ nigíʼnuu mbáa ndxájulú bi̱ nagumbiʼyuu George, bi̱ xtáa náa xuajen Tacloban. Niʼthí: “Maski ajndu nirígá xúgíʼ rígi̱, a̱ngiu̱lú nikuwa gagi. Tséxkamaa ajngáa mu mata gagi dí kuáʼdaxu”. Á mu nundxa̱ʼwa̱míjna̱ náa xúgíʼ rí Jeobá niʼni ga̱jma̱á numulúʼ ga̱jma̱a̱ nuxnáa núma̱aʼ, xándáti̱gu̱lú gagi maski ajndu nuraʼníí xkujndu mingíjyúuʼ. Ndiéjunʼ i̱ʼwáʼ nixnulú Jeobá mu makuwáanʼ gagi rá.

Mbá rí itháan gíʼdoo numuu rí kuaʼdáá mu makuwáanʼ gagi nindxu̱u̱ rí mambaxúlúʼ májánʼ gajmiúlú Jeobá. Nuniʼnííʼ bi̱ naʼtáñajunʼ náa xúgíʼ numbaaʼ. Ikhaa nindxu̱u̱ Dios ndrígúlú, Anu̱lú ga̱jma̱a̱ bi̱ nambáxulúʼ gajmiúlú (Sal. 71:17, 18).

I̱mba̱ numuu mu muguaʼdáá gagi nindxu̱u̱ rí kuwáanʼ nduʼyáá ga̱jma̱a̱ muʼni rí nanigulúʼ náa vida ndrígúlú (Ecl. 3:12, 13). Ma̱ngaa, rí Jeobá ni̱jkha̱ kaguáanʼ náa ikhaa, nduʼyáá ndiéjunʼ nindxu̱u̱ rí naniguʼ ga̱jma̱a̱ ndiéjunʼ eyoo muʼni (Col. 1:9, 10). Ga̱jma̱a̱ numuu ikhaa, vida ndrígúlú gíʼdoo numuu ga̱jma̱a̱ najuiʼthá xóo makuwáanʼ nda̱wa̱á. Mú, mbaʼin xa̱bu̱ na̱nguá ekru̱ʼu̱u̱n xóo nindxu̱u̱ vida. Pablo niʼtáriyaʼ índo̱ niʼthí: “‹Idaʼ na̱nguá ndiʼyoo, ni má chaʼwan na̱nguá niʼdxuun, asndu na̱nguá nindxa̱ʼwa̱míjna̱ náa a̱jkiu̱ún xa̱bekha rí Dios niʼniratoo náa bi̱ nandún kuyáá›. Numuu rí náa ikháanʼlu Dios nisngájmulú ga̱jma̱a̱ xi̱ʼ kaʼwu ndrígóo” (1 Cor. 2:9, 10). Rí makru̱ʼu̱lú rí kuaʼti̱i̱n ga̱jma̱a̱ rí nandoo Dios muʼni nindxu̱u̱ i̱mba̱ numuu mu maku̱mu̱lú rí kuaʼdáá gagi.

Guʼyáá i̱ʼwáʼ rí Jeobá niʼni ga̱jma̱a̱ numuu xuajñu. Nixná xúgíʼ rí gíʼdoo mu maʼni mba̱a̱ a̱jkiu̱u̱n ga̱jma̱a̱ numuu aʼkhá ndrígúlú (1 Juan 2:12) Ga̱jma̱a̱ numuu rí nagáwíínʼ a̱jkiu̱u̱n kaʼyulúʼ naxnúlú makuwáanʼ náa numbaaʼ nuxi̱ʼ rí gíʼ mijngii ma̱ʼkha̱ (Rom. 12:12). Rí xúgi̱ Jeobá naxnúlú xuajñu rí mitsaan náa ma̱ndoo mbuʼyamajkuíí (Sal. 133:1). Ma̱ngaa náa Biblia naʼtulúʼ rí Jeobá nañewu̱u̱n xuajñu náa Satanás ga̱jma̱a̱ náa xa̱bu̱ wéñiʼ (Sal. 91:11). Á mu nundxa̱ʼwa̱míjna̱ náa xúgíʼ rí Dios gáʼnii tsajkurámáánʼ, makuwaanʼ itháan gagi (Filip. 4:4).

Lá ma̱ndoo muguaʼdáá itháan gagi ráʼ. Jesús niʼthí: “Xkuaʼni nitanʼla, ikajngo  maguaʼdala gagui ri guʼdoʼ, jame mapu-maguaʼdala gagui” (Juan 15:11). Ajngáa rígi̱ nasngájmulúʼ rí ma̱ndoo makuwáanʼ gagi má xúʼko̱. Rí gagi nindxu̱u̱ xóo mbá aguʼ. Á mu nandulúʼ rí aguʼ maʼni itháan mba̱a̱, mbaʼyóoʼ muxuʼdáʼ itháan ixi̱. Ikhaa má kayúʼ, á mu nandulúʼ rí gagi ndrígúlú mbaja̱a̱, mbaʼyóoʼ muxníʼtsii ga̱jma̱a̱ xi̱ʼ ndrígóo Dios. Ikha jngó gúnda̱ʼa̱a̱ má xúʼko̱ Jeobá maxnúlúʼ xi̱ʼ ndrígóo ga̱jma̱a̱ gundxaʼwamíjna̱ rí nuraxnuu náa Biblia, rí nigumaraʼmáʼ ga̱jma̱a̱ xi̱ʼ kaʼwu ndrígóo Jeobá (Sal. 1:1, 2; Luc. 11:13).

I̱mba̱ numuu mu muguaʼdáá itháan gagi nindxu̱u̱ rí muʼgíʼ muʼni rí naniguʼ Jeobá (Sal. 35:27; 112:1). Náa numuu rí nuʼthá rígi̱ rá. Numuu rí ikhaa niʼniáanʼ mu muʼni rí nandoo. Náa Biblia naʼthúlúʼ: “Gamiñáʼ xtayáá Dios bi̱ gajkhun ga̱jma̱a̱ atatsimbaaʼ rí naʼtáñajunʼ. Numuu dí rígi̱ kaʼyoo maʼni xa̱biya̱” (Ecl. 12:13). Ikha jngó rí muʼni ñajunʼ Jeobá maʼni rí makuwáanʼ itháan gagi. *

Á mu kuaʼdáá gagi, raʼkháa i̱ndó maku̱mu̱lú májánʼ náa awúu̱n a̱jkiu̱lú, ga̱jma̱a̱ mbuʼyáaʼ i̱ʼwáʼ rí mambáyulúʼ. Mbá xkri̱da, índo̱ gagi eʼni ñajunʼ anu̱lú bi̱ xtáa mekhuíí maski ajndu nuraʼníí xkujndu, nuʼni gaʼdxíí a̱jkiu̱u̱n (Deut. 16:15; 1 Tes. 5:16-18). Gagi rí gajkhun na̱jkha̱ kaguáanʼ muʼni gaʼduunʼ rí xúʼyáaʼ muguaʼdáá mbújkha̱a̱ ga̱jma̱a̱ naxkaxáanʼ muʼni tsiakimíjna̱ itháan ga̱jma̱a̱ numuu Reino (Mat. 13:44). Ga̱jma̱a̱ tsiakii rí guʼni maʼni muguaʼdáá itháan gagi, maʼni makuwáanʼ itháan májánʼ náa ikháanʼlu ga̱jma̱a̱ muʼni rí makuwa gagi eʼwíínʼ xa̱bu̱ (Hech. 20:35; Filip. 1:3-5).

Ma̱ngaa, á mu nuʼni muguaʼdáá itháan gagi, rúʼko̱ gáʼni mu makuwáanʼ májánʼ mu xáʼniulu nandii. Náa Biblia naʼthí: “Índo̱ a̱jkiu̱lú nadxuu nindxu̱u̱ xóo mbá thana májánʼ” (Prov. 17:22). Mbáa médico bi̱ najmañuu májánʼ bi̱ naʼsngáa náa Universidad dí rígá Nebraska (Estados Unidos) niʼthí mbá rí nambriguii ga̱jma̱a̱ Biblia. Niʼthí: “Á mu rí mbiʼi xúgi̱ ikháánʼ xtaa tsímáá ga̱jma̱a̱ xtaa májánʼ ga̱jma̱a̱ vida ndrígáʼ, mbáa nda̱wa̱á nánguá gáʼniaʼ nandii”.

Xó má ndiʼyáá, maski ajndu kuwáanʼ náa mbiʼi mingíjyúuʼ, ma̱ndoo muguaʼdáá gagi rí gajkhun. Mú mbaʼyóoʼ muguaʼdáá xi̱ʼ kaʼwu índo̱ guʼtájkáan, rí muʼnigajmaa Biblia ga̱jma̱a̱ mundxaʼwamíjna̱ dí kuwáanʼ ruraxnuu. Ma̱ngaa, á mu nandulúʼ makuwáanʼ itháan gagi, gíʼmaa mundxaʼwamíjna̱ ga̱jma̱a̱ rí gaguma tsajkurámáánʼ, rí mbuʼyaridáá fe ndrígu̱ún xa̱bi̱i̱ Dios ga̱jma̱a̱ muʼni tsiakimijna muʼni rí nandoo Jeobá. Xúʼko̱ gándoo gakuwáanʼ xó má eʼthí náa Salmo 64:10: “Xa̱bu̱ bi̱ naʼni rí jmbu maʼdxuu náa Jeobá ga̱jma̱a̱ phú gajkhun mambáyuminaʼ náa ikhaa”.