1, 2. a) Ndiéjunʼ ethi mbaʼin a̱ngiu̱lú ga̱jma̱a̱ numuu rí mambaxúlúʼ gajmiúlú Jeobá rá. b) Xú káʼnii graxe̱ rí itháan gíʼdoo numuu gúʼyáá rá.

MBÁA ndxájulú bi̱ xtáa náa Canadá naʼthí: “Rí mambaxúʼ ga̱jmu̱ʼ Jeobá naʼni maxtáá itháan tsímáá ga̱jma̱a̱ nambáyuʼ maraʼnuu rí na̱ʼkha̱nú tsejtsi mbiʼi”. Mbáa ndxájulú bi̱ xtáa Brasil naʼthí: “Ikhúúnʼ ga̱jmu̱ʼ a̱ʼgiu̱ʼ kuwáanʼxu gagi mbá skíñúʼ ajtsú tsiguʼ rí nidamíjnáxu, numuu rí nuni tsiakimíjna̱xu mambaxúxu gajmiúxu̱ Jeobá”. Ga̱jma̱a̱ mbáa ndxájulú bi̱ xtáa Filipinas naʼthí rí numuu rí nambáxu̱u̱ ga̱jma̱a̱ Jeobá xtáa tsímáá ikhaa ga̱jma̱a̱ nambáxu̱u̱ májánʼ gajmíi̱n xúgínʼ a̱ngiu̱lú.

² Xó má eʼyáá, rí mambaxúlúʼ gajmiúlú Jeobá nayambáá wéñuʼ. Gajkhun má rí xúgiáanʼ nandulúʼ mambaxúlúʼ gajmiúlú Jeobá. Ikha jngó, mbáa nuraximíjna̱ xú káʼnii gándoo gumbaxúlú gajmiúlú Jeobá. Guʼyáá rígi̱. Mú ginii ndayóoʼ makru̱ʼu̱lú májánʼ rí naʼsngáa Biblia ga̱jma̱a̱ numuu mbáa xa̱bu̱ bi̱ nambáxu̱u̱ ga̱jma̱a̱ Jeobá. Náa artículo rígi̱, muriʼña̱a̱ ajtsú graxe̱ rí gíʼdoo numuu. Timbá, ndiéjunʼ eyoo gáʼthúu̱n rí manindxa̱ʼ mbáa xa̱bu̱ bi̱ nambáxu̱u̱ ga̱jma̱a̱ Jeobá. Raga̱jma̱, ndiéjunʼ xkri̱da embáyulú mu mambaxúlúʼ itháan gajmiúlú Jeobá. Ga̱jma̱a̱ ragajtsú, xú káʼnii gambáyulú muguaʼdáá “ku̱ma̱ ndrígóo Cristo” rá.

3. Xú káʼnii eʼthí náa Biblia rí xú káʼnii mixtiʼkhu nindxu̱u̱ mbáa xa̱bu̱ numbaaʼ ga̱jma̱a̱ mbáa xa̱bu̱ bi̱ nambáxu̱u̱ ga̱jma̱a̱ Jeobá rá.

³ Apóstol Pablo niʼthí xú mixtiʼkhu nindxu̱u̱ “mbáa xa̱bu̱ bi̱ nambáxu̱u̱ ga̱jma̱a̱ Jeobá” ga̱jma̱a̱ “xa̱bu̱ numbaaʼ” (atraxnuu 1 Corintios 2:14-16). * Niʼthí rí “xa̱bu̱ numbaaʼ” tsegruigú “xi̱ʼ ndrígóo Dios, numuu rí tséjmaa eʼyoo ikhaa; ga̱jma̱a̱ xáʼga̱nú maninuʼ”. Mú, “mbáa xa̱bu̱ bi̱ nambáxu̱u̱ ga̱jma̱a̱ Jeobá” ndaʼyoo “májánʼ xúgíʼ dí rígá” ga̱jma̱a̱ gíʼdoo “ku̱ma̱ ndrígóo Cristo”. Mú, Pablo niʼsngúlúʼ rí ganindxu̱lú mbáa xa̱bu̱ bi̱ nambáxu̱u̱ ga̱jma̱a̱ Jeobá. Xú káʼnii mixtiʼkhu rígá náa a̱jma̱ enii xa̱bu̱ bugi̱ rá.

4, 5. Xú káʼnii nindxu̱u̱ mbáa xa̱bu̱ numbaaʼ rá.

⁴ Guʼyáá ginii xú káʼnii endxa̱ʼwáminaʼ mbáa xa̱bu̱ numbaaʼ. Nagíʼ mbayááʼ rí nandoo numuu rí naniñaminaʼ maʼga̱ kayáa maʼni rí eʼni numbaaʼ rígi̱, rí Pablo nixná mbiʼyuu “espíritu dí rígá náa xa̱bu̱ bi̱ tsénimbu̱ún” (Efes. 2:2). Xi̱ʼ rígi̱ naxkaxi̱i̱n mbaʼin wéñuʼ xa̱bu̱ mu maʼga̱ kagu̱u̱n muni rí xóo kuwa runi eʼwíínʼ. Rí narígá, rí nuni rí nakumu̱ún rí nindxu̱u̱ májánʼ ga̱jma̱a̱ na̱nguá enimíjna̱ mu munimbu̱ún xtángoo ndrígóo Dios. Xó má rí narígá, rí xa̱bu̱ numbaaʼ naxmiéjunʼ rí xóo ejmaʼniiʼ ga̱jma̱a̱ rí mbayáaʼ magiʼdoo itháan mbújkha̱a̱, o maʼga̱ kidxuuʼ rí naku̱mu̱u̱ rí mambáyúu.

⁵ Xa̱bu̱ numbaaʼ naʼni “rí naʼni xuwiʼ” (Gál. 5:19-21). Náa timbá carta ndrígóo congregación dí nirígá Corinto, Pablo niʼthí xú káʼnii ni̱ndxu̱ún xa̱bu̱: Nuxudami̱jna̱ náa nagiʼdu̱u̱n xa̱bu̱, nugíʼ nuruiʼthi̱i̱n xa̱bu̱, nuni rí xa̱bu̱ xúnimbu̱ún, nagún kudamijná náa guʼwá ñajunʼ, na̱nguá eyamajkuíí Xa̱bu̱ Ñajunʼ ga̱jma̱a̱ i̱ndó nduyááʼ rí mu̱phu̱ ga̱jma̱a̱ rí muwa̱a̱n. Ma̱ngaa, tsenimi̱jna̱ muni gaʼduunʼ tsáʼkhá (Prov. 7:21, 22). Discípulo Judas niʼthí rí tikhun naguánu mandáti̱gu̱u̱n ‹rí nambáxu̱u̱n gajmiún Jeobá› (Jud. 18, 19).

6. Xú káʼnii nindxu̱u̱ mbáa xa̱bu̱ bi̱ nambáxu̱u̱ ga̱jma̱a̱ Jeobá rá.

⁶ Mbáa xa̱bu̱ bi̱ nambáxu̱u̱ ga̱jma̱a̱ Jeobá nindxu̱u̱ mixtiʼkuii. Naxmiéjunʼ wéñuʼ mambáxu̱u̱ ga̱jma̱a̱ Dios ga̱jma̱a̱ nagíʼ ndaʼyaridoo (Efes. 5:1). Rígi̱ eyoo gáʼthúu̱n rí magíʼ mandxa̱ʼóo edxu̱u̱ xóo Jeobá ga̱jma̱a̱ mbaʼyoo xó má ikhaa eʼyoo. Gajkhun xtáa Dios náa ikhaa. Ndaʼyamajkuu xtángoo ndrígóo xúgíʼ mbiʼi rí xtáa (Sal. 119:33; 143:10). Nagíminaʼ magiʼdoo “xi̱ʼ kaʼwu” ki xóo maʼni “rí naʼni xuwiʼ” (Gál. 5:22, 23). Xkri̱da rígi̱ mambáyulúʼ makru̱ʼu̱lú májánʼ ndiéjunʼ eyoo gáʼthúu̱n rí manindxa̱ʼ mbáa xa̱bu̱ bi̱ nambáxu̱u̱ ga̱jma̱a̱ Jeobá. Índo̱ mbáa naniguʼ wéñuʼ ajmúú, nuthi rí naniguʼ maʼdu̱u̱. Xúʼko̱ má kayuʼ, xa̱bu̱ bi̱ nangajo̱o̱ rí na̱ʼkha̱ náa Dios nutháán rí nindxu̱u̱ mbáa xa̱bu̱ bi̱ nambáxu̱u̱ ga̱jma̱a̱ Jeobá.

7. Ndiéjunʼ eʼthí náa Biblia ga̱jma̱a̱ numún xa̱bu̱ bi̱ nambáxu̱u̱n gajmiún Jeobá rá.

⁷ Jesús niʼthí rí xa̱bu̱ bi̱ nambáxu̱u̱n gajmiún Jeobá kuwa gagi. Náa Mateo 5:3 naʼthí: “Gagi kuwa bi̱ nduyáá rí ndañúnʼ mbuyáaʼ Dios, numuu dí ikhiin kaʼñúún Reino bi̱ xtáa mekhuíí”. Ga̱jma̱a̱ náa Romanos 8:6 naʼthí náa numuu rí itháan májánʼ nindxu̱u̱ rí mambaxáʼ ga̱jma̱ʼ Jeobá. Naʼthí: “Numuu rí á mu nundxa̱ʼwa̱míjna̱ náa xuwiʼ nandoo gáʼthúu̱n rí makhañúlúʼ, mú á mu nundxa̱ʼwa̱míjna̱ náa espíritu nandoo gáʼthúu̱n vida ga̱jma̱a̱ tsímáá”. Á mu nuʼnimi̱jna̱ mambaxúlúʼ gajmiúlú Jeobá, makuwáanʼ tsímáá gajmiúlú Dios ga̱jma̱a̱ maxtáa  tsímáá a̱jkiu̱lú, ga̱jma̱a̱ nda̱wa̱á makuwáanʼ kámuu mbiʼi.

8. Náa numuu rí gíʼmaa muʼnimíjna̱ mambaxúlúʼ gajmiúlú Jeobá rá.

⁸ Náa numbaaʼ náa kuwáanʼ nindxu̱u̱ gamíi rí ní xambáxulú gajmiúlú Jeobá. Kuwáanʼ náa xa̱bu̱ bi̱ na̱nguá endxa̱ʼwa̱a̱ edxu̱ún xóo Dios, ikha jngó ndayóoʼ muʼnimi̱jna̱ mu muñewa̱a̱n ku̱ma̱ ndrígúlú. Índo̱ mbáa xa̱bu̱ nánguá embáxu̱u̱ ga̱jma̱a̱ Dios, ga̱jma̱a̱ naniñaminaʼ maʼni ga̱jma̱a̱ nandxa̱ʼwáminaʼ xóo eʼni xa̱bu̱. Ndiéjunʼ gambáyulú muʼni gaʼduunʼ mu xuguáʼnii rígi̱ rá. Ga̱jma̱a̱ xú káʼnii gúʼni mu muguaʼdáá itháan xi̱ʼ ndrígóo Dios rá.

9. a) Ndiéjunʼ gambáyulú manindxu̱lúʼ xa̱bu̱ bi̱ nambáxu̱u̱ ga̱jma̱a̱ Jeobá rá. b) Ndiéjunʼ xkri̱da rí májánʼ gúʼyáá xúgi̱ rá.

⁹ Xó má e̱ji̱n najmañún mbaʼa rí májánʼ índo̱ nduyaridáá xkri̱da ndrígu̱ún anu̱ún, mangáanʼ najmañulúʼ mambaxúlúʼ itháan gajmiúlú Jeobá rí mbuʼyaridáá xkri̱da ndrígu̱ún bi̱ nambáxu̱u̱n májánʼ gajmiún Jeobá. Mú ma̱ngaa bi̱ nuni xóo eni xa̱bu̱ numbaaʼ naʼsngúlú dí ragíʼmaa muʼni (1 Cor. 3:1-4). Náa Biblia, nuxkamaa a̱jma̱ enii xkri̱da. Náa artículo rígi̱ mbuʼyáá májánʼ xkridoo Jacob, María ga̱jma̱a̱ Jesús. Xúʼko̱ gajmañulú mu mambaxúlúʼ itháan gajmiúlú Jeobá.

10. Xú káʼnii nisngájma Jacob rí nimbáxu̱u̱ ga̱jma̱a̱ Jeobá rá.

¹⁰ Guʼyáá ginii xkri̱da ndrígóo Jacob. Rí maxtáa niʼniuu mingíjyúuʼ, ikháá má kayúʼ xóo kuwáanʼ rí mbiʼi xúgi̱. Ndxájuu Esaú, bi̱ na̱nguá nimbáxu̱u̱ ga̱jma̱a̱ Jeobá, nindoo maxíyáa. Ma̱ngaa jmégiu̱u̱ nigíʼ maʼni nduwaaʼ mbaʼa nuthu. Mú Jacob ninindxu̱u̱ mbáa xa̱bu̱ bi̱ nimbáxu̱u̱ ga̱jma̱a̱ Jeobá maski ajndu nixtáa gajmíi̱n mbaʼin xa̱bu̱ numbaaʼ. Nigiʼdoo fe náa rí Dios nikudaminaʼ náa Abrahán, ga̱jma̱a̱ niñewu̱u̱n má xúʼko̱ bi̱ kuwa náa goʼwóo, rí nigiʼdoo wéñuʼ numuu náa rí niʼthí maʼni Dios (Gén. 28:10-15). Ajngáa rí niʼthí ga̱jma̱a̱ rí niʼni nisngájma rí ningajo̱o̱ wéñuʼ xtángoo ga̱jma̱a̱ rí  nandoo Jeobá. Mbá xkri̱da, índo̱ nindxa̱ʼwáminaʼ rí Esaú maxnúu, niʼtákáñuu Dios rí maʼni kríyaaʼ. Rígi̱ niʼthúu̱n: “Ikháánʼ má niratá: ‹Ikhúúnʼ maniaʼ rí májánʼ ga̱jma̱a̱ mani rí bi̱ gaguwá’ náa ikháánʼ manindxu̱ún xóo jui̱ʼi̱ dí rígá náa lamáa, dí xa’ngulú guraxnu numuu rí mba’in›” (Gén. 32:6-12). Rí xóo nixtáa Jacob niniñuʼ kaʼwu rí nigiʼdoo fe náa rí nikudaminaʼ maʼni Jeobá náa ikhaa gajmíi̱n bi̱ nikuwa nákha wajyúúʼ.

11. Ndiéjunʼ esngájma rí María nimbáxu̱u̱ ga̱jma̱a̱ Jeobá rá.

¹¹ Guʼyáá xúgi̱ xkri̱da ndrígóo María. Náa numuu niríyaʼ Jeobá mu mani̱ndxu̱u̱ ru̱dúu̱ Jesús rá. Numuu rí ninindxu̱u̱ mbáa bi̱ nimbáxu̱u̱ ga̱jma̱a̱ Jeobá. Nduʼyáá ga̱jma̱a̱ numuu ajmúú rí niʼni náa Jeobá índo̱ ni̱jkha̱ gáʼñun bi̱ kaʼñún Zacarías ga̱jma̱a̱ Elisabet (atraxnuu Lucas 1:46-55). Rí niʼthí María nasngájma rí nigiʼdoo ngajua náa Ajngá rawunʼ Dios ga̱jma̱a̱ nininuʼ májánʼ Escrituras Hebreas (Gén. 30:13; 1 Sam. 2:1-10; Mal. 3:12). Ga̱jma̱a̱ índo̱ ikhaa ga̱jma̱a̱ José nidamijná, túbuunʼ asndu índo̱ nixtáa Jesús. Rígi̱ nasngájma rí nájmi̱i̱n ndiyáá rí itháan gíʼdoo numuu rí nandoo Jeobá ki xóo muni rí nandún ikhiin (Mat. 1:25). Mba̱yu̱ʼ tsiguʼ, María nigíʼ májánʼ edxu̱u̱ náa xúgíʼ rí niʼni ga̱jma̱a̱ rí niʼthí Jesús. Ma̱ngaa “taʼnebumaminaʼ numu mba xugui rigueʼ naʼ aun akuin” (Luc. 2:51). Nixmiéjunʼ wéñuʼ ga̱jma̱a̱ numuu rí niʼthí Dios rí ma̱ʼkha̱ Mesías. Májánʼ eʼni rí mbuʼyaridáá xkri̱da ndrígóo ga̱jma̱a̱ mundxaʼwáá edxu̱lúʼ xú káʼnii gúʼni ginii rí nandoo Dios náa vida ndrígúlú.

12. a) Xú káʼnii mbríguii Jesús xóo Anu̱u̱ rá. b) Xú káʼnii gándoo gúʼyaridáá xkridoo Jesús rá. (Atayáá timbá xtiʼkhu).

¹² Rí xúgi̱ guʼthá ga̱jma̱a̱ numuu Jesús. Ikhaa nindxu̱u̱ mbáa xa̱bu̱ bi̱ nimbáxu̱u̱ ga̱jma̱a̱ Jeobá bi̱ nixtáa náa tsu̱du̱u̱ Ku̱ba̱ʼ. Xúgíʼ mbiʼi rí nixtáa ga̱jma̱a̱ xóo rí niʼtáraʼa nisngájma rí nindoo mbaʼyáridoo xkridoo Anu̱u̱, Jeobá. Xóo nindxa̱ʼóo edxu̱u̱, rí nikumu̱u̱ ga̱jma̱a̱ rí niʼni nisngájma rí niniñaminaʼ maxná ikhoo xtángoo ga̱jma̱a̱ maʼni rí naniguʼ Jeobá (Juan 8:29; 14:9; 15:10). Mbá xkri̱da, guʼnimbánii rí niʼthí Isaías ga̱jma̱a̱ numuu rí nagáwiinʼ a̱jkiu̱u̱n Dios ga̱jma̱a̱ rí niʼnirámáʼ Marcos rí xóo nikumu̱u̱ Jesús (atraxnuu Isaías 63:9; * Marcos 6:34). Lá ni̱ndxu̱lú xóo Jesús ga̱jma̱a̱ nagáwíínʼ a̱jkiu̱lú kuʼñúún bi̱ nda̱ñúnʼ ráʼ. Lá nuʼnimíjna̱ xóo ikhaa mu muʼtáraʼa ga̱jma̱a̱ muʼsngáa ga̱jma̱a̱ numuu Reino ráʼ. (Luc. 4:43.) Á mu nuʼni nusngájma rí ni̱ndxu̱lú mbáa xa̱bu̱ bi̱ nambáxu̱u̱ ga̱jma̱a̱ Jeobá.

13, 14. a) Xú káʼnii xkri̱da májánʼ exnulú xúgi̱ xa̱bu̱ bi̱ nambáxu̱u̱n gajmiún Jeobá xó má Cristo rá. b) Arathá mbáʼ experiencia.

¹³ Rí mbiʼi xúgi̱ mbaʼin niguánu ninindxu̱ún xóo xa̱bu̱ nindxu̱u̱ Cristo. Xa̱bu̱ bugi̱ bi̱ nambáxu̱u̱n gajmiún Jeobá nutaraʼa ga̱jma̱a̱ gagi, nundrigúun a̱ngiu̱lú ga̱jma̱a̱ nagáwiinʼ a̱jkiu̱ún kuñún eʼwíínʼ, ga̱jma̱a̱ i̱ʼwáʼ rí májánʼ rí eni. Xó má ikháanʼ, nunimíjna̱ mu muxprigúmijná ga̱jma̱a̱ mani̱ndxu̱ún míjínʼ xa̱bu̱. Mbáa ndxájulú bi̱ xtáa Brasil bi̱ nagumbiʼyuu Rachel naʼthí: “Nákha ginii naniguʼ maʼgíiʼ xtíin xóo rí nugíʼ xa̱bu̱ numbaaʼ. Xtíñúʼ tsékujmaa májánʼ. Mú índo̱ nijmañuʼ rí gajkhun ni̱jkhánú nikroʼoʼ rí gíʼmaa maniminaʼ mu mani̱ndxu̱ʼ mbáa xa̱bu̱ bi̱ nambáxu̱u̱ ga̱jma̱a̱ Jeobá. Niʼniuʼ mingíjyúuʼ mariʼkuminaʼ mú nixtáá itháan gagi ga̱jma̱a̱ nixtáá itháan májánʼ”.

¹⁴ Xóo rí nixtáa mbáa ndxájulú bi̱ xtáa náa Filipinas bi̱ nagumbiʼyuu Reylene ninindxu̱u̱ mixtiʼkhu. Maski ajndu nindxu̱u̱  xa̱bi̱i̱ Dios, nixnúu itháan numuu náa rí maʼnigajmaa ga̱jma̱a̱ rí magiʼdoo mbá ñajunʼ májánʼ mu magiʼdoo wéñuʼ. Ikhaa naʼthí: “Metas rí nigúʼdoo mañú ni̱jkha̱ randátigo̱o̱. Mú núkhu ni̱jkhánú ndi̱yo̱o̱ dí rígá rí ndayóoʼ náa vida ndrígóʼ, mbá rí gíʼdoo itháan numuu ki xóo ñajunʼ rí gúʼdoo. Ikha jngó niʼgíʼ nini ñajunʼ Jeobá mbu̱júu̱”. Asndu nákha ikhú, Reylene nindxu̱u̱ mbá májánʼ xkri̱da ndrígóo mbáa bi̱ gíʼdoo fe náa rí nakudaminaʼ maʼni Jeobá rí naʼthí náa Mateo 6:33, 34. Ikhaa naʼthí rí gajkhun má rí Jeobá mañewu̱u̱n. Mbáa kuwa tikhun a̱ngiu̱lú náa congregación bi̱ nini xúʼko̱ kayuʼ. Índo̱ nduʼyáá xú káʼnii eyaridáá Cristo, lá ragájkhun rí nandulúʼ mbuʼyaridáá xkri̱da ndrígu̱ún xáʼ. (1 Cor. 11:1; 2 Tes. 3:7.)

15, 16. a) Ndiéjunʼ gíʼmaa muʼni mu manindxu̱lúʼ xóo Cristo rá. b) Xú káʼnii gándoo gajmañulú rí xóo nindxa̱ʼwáminaʼ Jesús rá.

¹⁵ Xú káʼnii gándoo guʼyaridáá xkri̱da ndrígóo Cristo rá. Náa Biblia naʼthúlúʼ náa 1 Corintios 2:16 rí gíʼmaa muguaʼdáá “ku̱ma̱ ndrígóo Cristo”. Ga̱jma̱a̱ náa Romanos 15:5 naʼthúlúʼ rí mundxaʼwáá edxu̱lúʼ “xó má Cristo Jesús”. Ikha jngó mu manindxu̱lúʼ xóo Cristo, ndayóoʼ mbuʼyáá xóo nindxu̱u̱, xóo endxa̱ʼwáminaʼ ga̱jma̱a̱ rí naʼni. Rí itháan naxmiéjunʼ ikhaa nindxu̱u̱ rí mambaxúu májánʼ ga̱jma̱a̱ Dios. Rí manindxu̱lúʼ xóo Jesús naʼni rí mu̱ʼgua̱nú itháan mijngii náa Jeobá. Ikha jngó gíʼdoo wéñuʼ numuu majmañulúʼ mundxaʼwami̱jna̱ xóo Jesús.

¹⁶ Ndiéjunʼ gambáyulú muʼnimbánii rá. Discípulos ndrígóo Jesús ndiyáá niʼni milagro, ndiyáá xú káʼnii nixná discurso, ndiyáá xú káʼnii niʼni gajmíi̱n mbaʼin enii xa̱bu̱ ga̱jma̱a̱ xóo niʼnimbánuu ikha ndrígóo Dios. Nithi: “Ikanʼxoʼ ndiyaxoʼ mba xugui ri niʼni” (Hech. 10:39). Gajkhun má rí ikháanʼ xándoo gúʼyáá Jesús. Mú Jeobá naʼthúlúʼ náa Mateo, Marcos, Lucas ga̱jma̱a̱ Juan mu mbuʼyáá kaʼwu xú káʼnii xa̱bu̱ ninindxu̱u̱. Á mu nuraxnuu ga̱jma̱a̱ nundxa̱ʼwa̱míjna̱ rí naʼthí ikhí, majmañulúʼ mbaʼa xóo nindxa̱ʼwáminaʼ Jesús. Ga̱jma̱a̱ xúʼko̱ gándoo guʼnimbánii xtágabu rígi̱: “Mbuyaridáá tsumáá rí niʼni ikhaa” ga̱jma̱a̱ “gundxaʼwamíjna̱” xó má Cristo (1 Ped. 2:21; 4:1).

17. Náa numuu rí nambáyulúʼ mundxaʼwamíjna̱ xóo Jesús rá.

¹⁷ Náa numuu rí nambáyulúʼ mundxaʼwamíjna̱ xóo Jesús rá. Mu makru̱ʼu̱lú muʼgíʼ mbá xkri̱da. Rí mu̱ʼphu̱ ganitsu nambáyúu xuyulú. Xúʼko̱ má kayuʼ, rí muguaʼdáá ku̱ma̱ ndrígóo Cristo nambáyulúʼ mu mambaxúlúʼ itháan gajmiúlú Jeobá. Ikha jngó mañu mañu na̱jkua̱nú nduʼyáá rí ikhaa maʼni asndu xú káʼnii má eyoo. Ga̱jma̱a̱ rígi̱ nambáyulúʼ mu muraʼwíí rí muʼni ga̱jma̱a̱ muguaʼdáá ku̱ma̱ májánʼ ga̱jma̱a̱ rí naniguʼ Dios. Gajkhun má xtágabu rígi̱ gambáyulú muʼni rígi̱: “Guʼyaridáá Señor Jesucristo” (Rom. 13:14).

18. Ndiéjunʼ nijmañulúʼ náa artículo rígi̱ ga̱jma̱a̱ numuu rí manindxu̱lúʼ mbáa xa̱bu̱ bi̱ nambáxu̱u̱ ga̱jma̱a̱ Jeobá rá.

¹⁸ Náa artículo rígi̱, niʼthá rí nandoo gáʼthúu̱n rí manindxa̱ʼ mbáa xa̱bu̱ bi̱ nambáxu̱u̱ ga̱jma̱a̱ Jeobá. Ma̱ngaa ndiʼyáá nguáthá eʼsngúlúʼ xkri̱da ndrígu̱ún xa̱bu̱ bi̱ nimbáxu̱u̱n gajmiún Jeobá. Ga̱jma̱a̱ nijmañulúʼ rí nambáyulúʼ mu mambaxúlúʼ gajmiúlú Jeobá rí maguaʼdáá “ku̱ma̱ ndrígóo Cristo”. Mú rígá xóó rí mbuʼyáá ga̱jma̱a̱ numuu rígi̱. Mbá xkri̱da, xú káʼnii eʼyáá á mu nambáxulúʼ gajmiúlú Jeobá rá. Ndiéjunʼ gándoo muʼni mu mambaxúlúʼ itháan gajmiúlú Jeobá rá. Ga̱jma̱a̱ xú káʼnii gambáyulú rí mambaxúlúʼ gajmiúlú Jeobá rá. Náa imbo̱o̱ artículo mambáyulúʼ muriʼña̱a̱ graxe̱ rígi̱.