1, 2. a) Ndiéjunʼ ni̱jkha̱nú ndiʼyoo mbáa ndxájulú rá. b) Ndiéjunʼ niʼni mu maʼnimbánuu xkujndu xá.

ROBERT nijngúun iyááʼ nákha gíʼdoo 15 tsiguʼ, mú ikhaa na̱nguá eʼyoo rí gíʼdoo wéñuʼ numuu rí gajkhun. Ikhaa naʼthí: “Nimbá miʼtsú na̱nguá nini rí xkawiʼ, mú nani ñajunʼ Jeobá numuu rí gíʼmuun mani. Nakujmaa rí nambáxuʼ ga̱jmu̱ʼ Jeobá numuu rí na̱jkhá xúgíʼ reunión ga̱jma̱a̱ nani precursor auxiliar mbaʼa nuthu rí mbá tsiguʼ. Mú nda̱yo̱o̱ dí rígá mbá rí ndayóoʼ”.

² Na̱nguá nikro̱ʼo̱o̱ náa numuu rí xúʼko̱ ku̱mu̱u̱ asndu índo̱ ninigúnʼ. Nguáná, ikhaa ga̱jma̱a̱ a̱ʼgiu̱u̱ nuni graxe̱ ga̱jma̱a̱ numuu Biblia. A̱ʼgiu̱u̱ nindxu̱u̱ mbáa bi̱ nambáxu̱u̱ ga̱jma̱a̱ Jeobá, ga̱jma̱a̱ ndaʼyoo rí mariʼña̱a̱. Mú ikhaa natiyuʼ má xúʼko̱ numuu rí tsejmañuu gáriʼña̱a̱ ga̱jma̱a̱ naku̱mu̱u̱ rí nda̱a̱ rí ejmañuu. Ikha jngó nindxa̱ʼwáminaʼ: “Á mu nandoʼ mani̱ndxu̱ʼ mbáa bi̱ nayéjkha edxu̱u̱ náa a̱ʼgiu̱ʼ, rígá rí ndayóoʼ mani”. Ga̱jma̱a̱ niʼni. Ikhaa naʼthí: “Nigíʼdu̱u̱ ninigajmaa má xúʼko̱ Biblia, ga̱jma̱a̱ ni̱jkhánú nimbáxuʼ itháan ga̱jmu̱ʼ Jeobá”. Xúʼko̱ ni̱jkha̱nú nikro̱ʼo̱o̱ rí gajkhun ga̱jma̱a̱ rí itháan gíʼdoo numuu rí mambáxu̱u̱ májánʼ ga̱jma̱a̱ Jeobá.

3. a) Ndiéjunʼ eʼsngúlúʼ rí nigíʼnuu Robert rá. b) Ndiéjunʼ graxe̱ gúʼyáá rá.

³ Rí nigíʼnuu Robert naʼsngúlú ikha rí itháan gíʼdoo numuu. Mbáa nuniʼnuʼ tikhuu rí naʼthí náa Biblia, rí mu̱ʼgua̱ náa xúgíʼ reunión  ga̱jma̱a̱ rí muʼtáraʼa ga̱jma̱a̱ congregación. Mú rígi̱ tsíyoo gáʼthúu̱n rí manindxu̱lúʼ mbáa xa̱bu̱ bi̱ nambáxu̱u̱ ga̱jma̱a̱ Jeobá. Mbáa asndu nikhánulú itháan ñajunʼ muʼni, mu índo̱ nduʼyáá májánʼ rí kuwáanʼ ru̱ʼni̱ nuxkamaa rí xóó rígá rí ndayóoʼ muriʼkhu̱u̱ (Filip. 3:16). Mbá rí mambáyulúʼ mu muñajunʼ má xúʼko̱ nindxu̱u̱ rí mbuʼyáá ajtsú graxe̱ rí itháan gíʼdoo numuu náa artículo rígi̱. Timbá, ndiéjunʼ gambáyulú mbuʼyáá á mu nambáxulúʼ gajmiúlú Jeobá rá. Raga̱jma̱, ndiéjunʼ gíʼmáanʼ muʼni mu mambáxulúʼ itháan gajmiúlú Jeobá rá. Ga̱jma̱a̱ ragajtsú, ndiéjunʼ gambáyulú xúgíʼ mbiʼi rí gakuwáanʼ mu mambaxúlúʼ itháan májánʼ gajmiúlú Jeobá rá.

4. Tsíin gíʼmaa munimbánii xtágabu ndrígóo Efesios 4:23, 24 rá.

⁴ Mu manindxu̱lúʼ xa̱bi̱i̱ Dios, ndiyóoʼ muriʼkhu̱u̱ mbaʼa rí xóo kuwáanʼ. Ga̱jma̱a̱ mbaʼyóoʼ muriʼkhumijná má xúʼko̱ nda̱wa̱á rí nijngúlú iyááʼ. Náa Biblia naʼthúlúʼ: “Gíʼmaa muriʼkhumijnála ga̱jma̱a̱ tsiakii ndrígóo edxa̱la” (Efes. 4:23, 24). Náa griego rí na̱ʼkha̱ náa Biblia, ajngáa “muriʼkhumijnála” nasngájma rí gíʼmaa muʼni má xúʼko̱. Numuu rí ni̱ndxu̱lú xa̱bu̱ aʼkhá, xúgiáanʼ ndayóoʼ muriʼkhu̱u̱ má xúʼko̱ xóo kuwáanʼ. Asndu má bi̱ nuyegun mba̱yu̱ʼ tsiguʼ runi ñajunʼ Jeobá gíʼmaa muñewa̱a̱n mu mambaxúún má xúʼko̱ gajmiún (Filip. 3:12, 13).

5. Ndiéjunʼ graxe̱ gándoo gambáyulú mbuʼyáá nguáthá xi̱ʼ kuaʼdáá náa Dios rá.

⁵ Mu mambaxúlúʼ má xúʼko̱ gajmiúlú Jeobá, ndayóoʼ mbuʼyáá káʼnii e̱ʼni̱. Tséʼniuu má á mu ni̱ndxu̱lú jiáma o xa̱bu̱ guanii, xúgiáanʼ ma̱ndoo muraximíjna̱ rígi̱: “Lá nda̱yo̱o̱ rí nambáxuʼ itháan ga̱jmu̱ʼ Jeobá ráʼ. Lá nakujmún itháan rí ni̱ndxu̱ʼ xóo nindxu̱u̱ Cristo ráʼ. Ndiéjunʼ esngájma rí nani ga̱jma̱a̱ xóo ni̱ndxu̱ʼ náa reunión rá. Ndiéjunʼ esngájma rí natha ga̱jma̱a̱ numuu rí nandoʼ mani rá. Ndiéjunʼ esngájma xóo xa̱bu̱ ni̱ndxu̱ʼ índo̱ nanigajmaa rí xóo eʼgíʼ xtíñúʼ, xóo enirataminaʼ ga̱jma̱a̱ xóo eriʼña̱a̱ índo̱ nuxnuʼ xtágabu rá. Xú káʼnii eni índo̱ naraʼnuu tsáʼkhá rá. Lá niniʼñúʼ xúgíʼ rí nijmañuʼ nákha ginii mu mani̱ndxu̱ʼ mbáa bi̱ najmañuu itháan ráʼ.” (Efes. 4:13.) Rí mundxaʼwamíjna̱ xóo eriʼña̱a̱ graxe̱ rígi̱ nambáyulúʼ mbuʼyáá nguáthá ejkha̱ rajmañulú ga̱jma̱a̱ numuu Dios.

6. Mu mbuʼyáá á mu nambáxulúʼ gajmiúlú Jeobá, ndiéjunʼ gáʼyóóʼ muʼni rá.

⁶ Mu mbuʼyáá á mu nambáxulúʼ gajmiúlú Jeobá, mbáa nguáná mbaʼyóoʼ rí eʼwíínʼ cristianos mumbayúlú. Apóstol Pablo niʼthí rí xa̱bu̱ numbaaʼ tseʼyoo rí á mu rí naʼni tsénigu̱ʼ Dios. Mú xa̱bu̱ bi̱ nambáxu̱u̱ ga̱jma̱a̱ Jeobá ndaʼyoo xó má eʼyoo Dios ga̱jma̱a̱ ndaʼyoo rí ikhaa tsíyoo gáʼyoo dí xóo kuwa runi xa̱bu̱ numbaaʼ (1 Cor. 2:14-16; 3:1-3). Numuu rí bi̱ kuya̱ edxu̱u̱ guáʼdáá ku̱ma̱ ndrígóo Cristo, mbaʼa nuthu naguánu nakru̱ʼu̱u̱n á mu mbáa tseʼyoo rí gíʼdoo numuu rí mambáxu̱u̱ ga̱jma̱a̱ Jeobá. Á mu rígi̱ gagiʼnulu ikháanʼ ga̱jma̱a̱ bi̱ kuya̱ edxu̱u̱ nugíʼ mumbayúlú, lá nuʼnimbánii xtágabu rí nuxnulu xáʼ. Rí muʼni makujmáanʼ rí nambáxulúʼ gajmiúlú Jeobá (Ecl. 7:5, 9).

7. Xú káʼnii eʼyáá dí raʼkháa i̱ndó muguaʼdáá ku̱ma̱ ndrígóo Biblia mu mambaxúlúʼ má xúʼko̱ gajmiúlú Jeobá rá.

⁷ Garmáʼáan a̱jkiu̱lú dí raʼkháa i̱ndó ndayóoʼ maguaʼdáá ku̱ma̱ ndrígóo Biblia mu mambaxúlúʼ gajmiúlú Jeobá. Rey Salomón nijmañuu wéñuʼ ga̱jma̱a̱ numuu Jeobá. Tikhu ajngáa rí niʼthí ni̱jkha̱nú nigumaraʼmáʼ náa Biblia. Mú ikhaa nda̱wa̱á niʼni tígo̱o̱ náa Jeobá (1 Rey. 4:29, 30; 11:4-6). Raʼkháa i̱ndó muguaʼdáá ku̱ma̱ ndrígóo Biblia ma̱ngaa ndayóoʼ rí mambaxúlúʼ má xúʼko̱ gajmiúlú Dios (Col. 2:6, 7). Xú káʼnii gúʼni rá.

8, 9. a) Ndiéjunʼ gambáyulú mu mambaxúlúʼ má xúʼko̱ gajmiúlú Jeobá rá. b) Náa numuu rí nuʼnigajmaa ga̱jma̱a̱ nundxa̱ʼwa̱míjna̱ rá. (Atayáá timbá xtiʼkhu).

⁸ Pablo niʼthún má xúʼko̱ cristianos bi̱ nikuwa nákha siglo timbá rí ndayóoʼ mambaxúún gajmiún Jeobá. Niʼthún rí ndayóoʼ munimi̱jna̱ mu  majmañún itháan májánʼ (Heb. 6:1). Rí xúgi̱ ma̱ngaa ndayóoʼ muʼni rí niʼthí Pablo. Ikha jngó, gíʼdoo wéñuʼ numuu muʼnigajmaa libro rí nagumbiʼyuu “Guni rí Dios ma̱ndoo kaʼyala”. Rí muʼni mambáyulúʼ mbuʼyáá xú káʼnii guʼnimbaníí náa vida ndrígúlú ikha ndrígóo Biblia. Á mu niguámbulúʼ má niʼnigajmaa, ma̱ndoo muʼnigajmaa i̱ʼwáʼ i̱yi̱i̱ʼ mu mambáyulúʼ maʼni itháan gujkhuʼ fe ndrígúlú (Col. 1:23). Ma̱ngaa, gíʼmaa muʼtájkáan ga̱jma̱a̱ mundxaʼwamíjna̱ xú káʼnii guʼnimbánii rí nijmañulúʼ.

⁹ Rí muʼni mu muʼnigajmaa ga̱jma̱a̱ mundxaʼwamíjna̱ mani̱ndxu̱u̱ rí maxkaxáanʼ gajkhun mu muʼni rí naniguʼ Jeobá ga̱jma̱a̱ rí muʼnimbulúʼ kuʼyáá (Sal. 40:8; 119:97). Ma̱ngaa ikhú má najmañulúʼ muʼni gaʼduunʼ rí tseniñulú mambaxúlúʼ gajmiúlú Jeobá (Tito 2:11, 12).

10. Ndiéjunʼ gándoo muni jiáma mu maguanu mambaxúún itháan gajmiún Jeobá rá.

¹⁰ Á mu ni̱ndxa̱ʼ mbáa dxámá o dxáʼgú, lá natayáá má rí eyaʼ matani náa xuajñu Dios ráʼ. Mbáa ndxájulú bi̱ nañajunʼ náa Betel naguʼwun maʼtámíjná gajmíi̱n jiáma bi̱ inuu majngún iyááʼ náa mbá asamblea dí circuito. Naraxu̱u̱n ndiéjunʼ eñún muni náa xuajñu Dios. Rí nuriʼña̱a̱ mbaʼin nasngájma rí nandún muni nda̱wa̱á, rí muni ñajunʼ Jeobá. Tikhun nandún muni ñajunʼ káxi̱ o magún i̱mba̱ níʼkhá náa ndayóoʼ miʼtáraʼa. Mú nguáná naxkamiin tikhun jiáma rí tséyáá rí guriʼña̱a̱. Mbáa rúʼko̱ erígá numuu rí nakumu̱ún rí tséyóoʼ má muni itháan ñajunʼ Dios. Ikha jngó, jiáma ndayóoʼ muraximíjna̱: “Lá na̱jkhá náa reunión ga̱jma̱a̱ nataráʼa numuu dí rúʼko̱ eyoo mani anu̱ʼ ga̱jma̱a̱ ru̱dúʼ rá. Lá nambáxuʼ májánʼ ga̱jmu̱ʼ Jeobá ráʼ.” Xúgiáanʼ ndayóoʼ mbuʼyááʼ ndiéjunʼ ñajunʼ gúʼni náa xuajñu Dios, tséʼniuu á mu jiáma o xa̱bu̱ guaniáanʼ. Rígi̱ gambáyulú mu mambaxúlúʼ itháan gajmiúlú Jeobá (Ecl. 12:1, 13).

11. a) Ndiéjunʼ gíʼmaa muʼni mu mambáxulu itháan gajmiúlú Jeobá rá. b) Káʼnii xkri̱da ndrígóo Biblia rí ma̱ndoo mbuʼyaridáá rá.

¹¹ Índo̱ gúʼyáá rí ndayóoʼ muriʼkhumijná, nacha̱ gíʼmaa muriʼkumi̱jná. Rígi̱ ra̱ʼkhá tháán gíʼdoo numuu. Numuu rí gamíi nindxu̱u̱ vida ndrígúlú (Rom. 8:6-8). Ikha jngó, rí manindxa̱ʼ mbáa bi̱ najmañuu itháan raʼkháa rúʼko̱ eyoo gáthúu̱n rí manindxa̱ʼ mbáa xa̱bu̱ jmbii. Ga̱jma̱a̱ Jeobá naxnúlú xi̱ʼ ndrígóo mu mambáyulúʼ. Maski ajndu xúʼko̱ gíʼmáanʼ muʼnimíjna̱. Mba̱yu̱ʼ tsiguʼ, John Barr, bi̱ ni̱jkha̱nú ninindxu̱u̱ Cuerpo Gobernante, niʼthí tikhuu rí na̱ʼkha̱ náa Lucas 13:24 ga̱jma̱a̱ niʼthí rí mbaʼin cristianos xándoo gátu̱ʼu̱u̱n náa xkrugua rí na̱nguá ma̱ja̱nʼ numuu rí tséndxaʼwamíjna̱ májánʼ rí ikhiin maʼngu̱u̱n muni. Gíʼmáanʼ manindxu̱lúʼ xóo Jacob, bi̱ nixmínaʼ má xúʼko̱ ga̱jma̱a̱ mbáa ángel asndu índo̱ rí ikhaa niʼni tsajkurámááʼ (Gén. 32:26-28). Rí muʼnigajmaa Biblia maʼndoo maʼni mitsaan. Mú ragíʼmaa muraxnuu xóo mbá novela, rí kiʼni gajunʼ mu muʼni gagimijná. Gíʼmaa muʼnigajmaa májánʼ mu muxkamaa rí gíʼdoo numuu rí mambáyulúʼ majmañulúʼ muʼni itháan.

12, 13. a) Ndiéjunʼ gambáyulú mundxaʼwáá edxu̱lúʼ “xó má Cristo” rá. b) Xú káʼnii embáyulú xkri̱da ga̱jma̱a̱ xtágabu ndrígóo Pedro rá. c) Ndiéjunʼ gíʼmaa muʼni mu mambaxúlúʼ itháan gajmiúlú Jeobá rá. (Atayáá náa kúgumaʼá “ Ndiéjunʼ gíʼmaa muʼni mu mambaxúlúʼ má xúʼko̱ gajmiúlú Jeobá rá.”)

¹² Índo̱ nuʼnimíjna̱ mu mambáxulu itháan gajmiúlú Jeobá, xi̱ʼ kaʼwu naxnúlú tsiakii mu muriʼkhu̱u̱ xóo endxaʼwáá edxu̱lúʼ. Xúʼko̱ mañu mañú na̱jkuánu nundxa̱ʼwáá edxu̱lúʼ itháan xóo nindxu̱u̱ Cristo (Rom. 15:5). Ma̱ngaa, xi̱ʼ nambáyulúʼ mu muʼni gámbáa rí i̱ndó ikháanʼ nandulúʼ muʼni ga̱jma̱a̱ manindxu̱lúʼ xóo xa̱bu̱ nindxu̱u̱ Dios (Gál. 5:16, 22, 23). Á mu nduʼyáá rí nandulúʼ muguaʼdáá o nandulúʼ muʼni rí nuni xa̱bu̱ numbaaʼ, xakanajkulú. Gunda̱ʼa̱a̱ má xúʼko̱ Jeobá xi̱ʼ kaʼwu, ga̱jma̱a̱ mambáyulúʼ mu muʼgíʼ edxu̱lúʼ náa rí májánʼ (Luc. 11:13). Garmáʼáan a̱jkiu̱lú rí niʼni apóstol Pedro. Nirígá mbaʼa nuthu rí táʼni xóo xa̱bu̱ bi̱ nambáxu̱u̱ ga̱jma̱a̱ Jeobá (Mat. 16:22, 23; Luc. 22:34, 54-62; Gál. 2:11-14). Mú takanajkoʼ. Rí Dios nimbáyúu, mañu mañú nindxa̱ʼóo edxu̱u̱ xóo Cristo. Ga̱jma̱a̱ mangáanʼ ma̱ndoo muʼni.

 ¹³ Asndu Pedro niʼthí nda̱wa̱á xú káʼnii xa̱bu̱ gíʼmaa manindxu̱lúʼ, xóo rí muxprígumíjná, rí maʼngulú ga̱jma̱a̱ rí maʼndulú kuʼyamíjna̱ (atraxnuu 2 Pedro 1:5-8). * Rí muʼni “mbá tsiakii” mu muguaʼdáá cualidad rí mambáyulúʼ mu mambaxúlúʼ má xúʼko̱ gajmiúlú Jeobá. Májánʼ gáʼni rí xúgíʼ mbiʼi muraximíjna̱: “Ndiéjunʼ gáʼyóóʼ mani xúgi̱ mu mambaxúʼ itháan ga̱jmu̱ʼ Jeobá rá.”

14. Xú káʼnii gambáyulú rí mambaxúlúʼ gajmiúlú Jeobá rá.

¹⁴ Rí mundxaʼwáá edxu̱lúʼ xóo Cristo mambáyulúʼ xóo gúʼthá, xóo gúʼni náa nuñajunʼ o náa escuela ga̱jma̱a̱ rí muraʼwíí muʼni tsejtsí mbiʼi. Rígi̱ gáʼni rí muʼgíʼ muʼnimíjna̱ mu mu̱ʼgua̱ kidxuuʼ Cristo. Á mu ni̱ndxu̱lú mbáa xa̱bu̱ bi̱ nambáxu̱u̱ ga̱jma̱a̱ Jeobá xúniʼñáʼ rí nimbá maʼnigachúu. Índo̱ gúraʼní tsáʼkhá muʼnigaʼduunʼ ga̱jma̱a̱ índo̱ guraʼwíí rí muʼni, muraximíjna̱: “Ndiéjunʼ ikha rí na̱ʼkha̱ náa Biblia mambáyuʼ mu maraʼwi̱i̱ rí mani rá. Ndiéjunʼ gáʼni Cristo á mu ikhaa gíʼdoo xkujndu rígi̱ xá. Ndiéjunʼ rí garaʼwíí manigu̱ʼ Jeobá rá.” Gíʼmáanʼ maguʼwunlú mundxaʼwamíjna̱ xúgi̱ kaʼnii. Guʼyáá tikhuu xkri̱da rí mambáyulúʼ. Náa mámbá xkujndu, mbuʼyáá mbá ikha ndrígóo Biblia rí mambáyulúʼ mu muraʼwíí mbá rí májánʼ muʼni.

15, 16. Arathá tikhuu xkri̱da rí xú káʼnii gambáyulú mundxaʼwáá edxu̱lúʼ xóo Cristo índo̱ guraʼwíí rí muʼni xóo: a) Índo̱ mbuʼyáá tsáa gúʼyáa; b) índo̱ gúraʼwíí tsíin gumbaxúlú gajmiúlú.

¹⁵ Índo̱ guraʼwíí tsáa gúʼyáa. Nuxkamaa ikha náa 2 Corintios 6:14, 15 (atraxnuu). * Rí niʼthí Pablo nasngájma kaʼwu rí mbáa xa̱bu̱ bi̱ nambáxu̱u̱ ga̱jma̱a̱ Jeobá xándoo mbayáa mbáa xa̱bu̱ kaníí. Xú káʼnii guʼnimbánii ikha rígi̱ índo̱ guraʼwíí tsáa gúʼyáa rá.

¹⁶ Índo̱ gúraʼwíin bi̱ mambaxúlúʼ gajmiúlú. Guʼyáá ikha rí na̱ʼkha̱ náa 1 Corintios 15:33 (atraxnuu). * Xa̱bu̱ bi̱ nambáxu̱u̱ ga̱jma̱a̱ Jeobá ni xámbaxu̱u̱ gajmíi̱n bi̱ migamíi muni gachíí rí nambáxu̱u̱ ga̱jma̱a̱ Dios. Gundxaʼwamíjna̱ xú káʼnii guʼnimbánii ikha rígi̱ náa mixtiʼkhu xkujndu rí guraʼníí. Mbá xkri̱da, xú káʼnii embáyuʼ mu maraʼwi̱i̱ xóo gájmuʼ Internet rá. Ndiéjunʼ gáni índo̱ gáʼthúnʼ mbáa xa̱bu̱ bi̱ tsíniʼníiʼ maʼtsíin ga̱jmu̱ʼ náa Internet rá.

17-19. a) Ndiéjunʼ gúʼni gaʼduunʼ á mu nambáxulúʼ gajmiúlú Jeobá rá. b) Ndiéjunʼ guʼgími̱jna̱ muʼni á mu nambáxulúʼ gajmiúlú Jeobá rá. c) Xú káʼnii embáyulú rí mambaxúlúʼ gajmiúlú Jeobá índo̱ kuaʼdáá xkujndu gajmiúlú mbáaʼ rá.

¹⁷ Rí marikhulú mu xambáxulú itháan gajmiúlú Jeobá. Nuxkamaa mbá ajngáa rí gíʼdoo wéñuʼ numuu náa Hebreos 6:1 (atraxnuu). * Índo̱  Pablo naʼthí gi̱i̱ rí gíʼmaa muʼni gaʼduunʼ “rí nánguá ejmaa”, nandoo gáʼthúu̱n xúgíʼ rí nuʼni rí xambáyulú mu mambaxúlúʼ itháan gajmiúlú Jeobá. Ajngáa rígi̱ ma̱ndoo mambáyulúʼ muriʼña̱a̱ mbaʼa graxe̱ rí nuʼni náa vida ndrígúlú. Mbá xkri̱da: “Lá mambáyuʼ rígi̱, o xambáyuʼ nditháan ráʼ. Lá gíʼmuu magruigu ñajunʼ rígi̱ mu madaaʼ itháan mbújkha̱a̱ ráʼ. Náa numuu dí ragíʼmaa maʼgá náa mbá grupo bi̱ nagíʼ maʼni májánʼ numbaaʼ rá.”

¹⁸ Ñajunʼ rí muʼni náa xuajñu Dios. Náa discurso rí Jesús nixná náa Kúbá, niʼthí mbá ikha kaʼwu ga̱jma̱a̱ numuu ñajunʼ rí gíʼmaa muʼni (Mat. 6:33). Xa̱bu̱ bi̱ nambáxu̱u̱ ga̱jma̱a̱ Jeobá nagíʼ ginii Reino náa vida ndrígóo. Índo̱ nuʼnimbánii ikha rígi̱ nambáyulúʼ muraʼwíí muʼni xóo rígi̱: “Lá maʼgá náa universidad ráʼ. Lá magruigú mbá ñajunʼ ráʼ.”

¹⁹ Índo̱ tsembánii rí nuʼthá. Mbá rí mambáyulúʼ índo̱ tsembánii mbá rí nuʼthá gajmiúlú mbáa xa̱bu̱ nindxu̱u̱ rí muʼnimbánii xtágabu rí Pablo nixnúún náa congregación ndrígóo Roma (Rom. 12:18). Bi̱ na̱jkua̱ kidxuuʼ Cristo nuʼni tsiakimíjna̱ mu ‹xákiʼnáanʼlu gajmiúlú xúgínʼ xa̱bu̱›. Xú káʼnii eʼni índo̱ kuáʼdáá xkujndu gajmiúlú mbáa rá. Lá naʼniulú mingíjyúuʼ muniʼñáʼ rí imba̱a̱ maʼthí o maʼni, o najmaʼniáanʼ xóo mbáa xa̱bu̱ bi̱ nda̱yáaʼ mambaxíʼ gajmíi̱n eʼwíínʼ rá. (Sant. 3:18.)

20. Náa numuu rí nandaʼ ikháánʼ mambaxáʼ má xúʼko̱ ga̱jma̱ʼ Jeobá rá.

²⁰ Xó má esngájma xkri̱da rígi̱, rí mundxaʼwamíjna̱ náa ikha ndrígóo Biblia masngájma rí nambáxulúʼ gajmiúlú Jeobá á mu nuraʼwíí májánʼ rí muʼni. Rígi̱ nayambáá mu makuwáanʼ itháan tsímáá. Robert, bi̱ niʼthá ga̱jma̱a̱ numuu náa nigi̱ʼdu̱u̱ artículo, naʼthí: “Índo̱ ni̱jkhánú nimbáxuʼ májánʼ ga̱jmu̱ʼ Jeobá, ninindxu̱ʼ itháan májánʼ xa̱bu̱. Nikumuʼ rí nixtáá itháan májánʼ ga̱jma̱a̱ itháan gagi”. Xúʼko̱ má gambáyulú á mu nuxnáá itháan numuu rí mambaxúlúʼ má xúʼko̱ gajmiúlú Jeobá. Xúʼko̱, rí xúgi̱ makuwáanʼ itháan májánʼ ga̱jma̱a̱ nda̱wa̱á maguaʼdáá mbá “vida rí phú nindxu̱u̱ gajkhun” (1 Tim. 6:19).