1, 2. a) Ndiéjunʼ rí nandulú xúgiáanʼ rá. b) Ndiéjunʼ rí ma̱ndoo mbuʼyáá gajkhun rá.

XUGIÁÁNʼ nandulú rí maʼndún kuyulúʼ ga̱jma̱a̱ rí muniulúʼ rí májánʼ. Índo̱ nduyáá rí tsíñu gúyulú ga̱jma̱a̱ dí nuniulú dí ra̱májánʼ, ma̱ndoo makuwaanʼ gíná ga̱jma̱a̱ mundxaʼwamíjna̱ rí tséjmáanʼ nditháan.

² Jeobá ndaʼyoo dí rígi̱ nakumu̱ún xúgínʼ xa̱bu̱ (Sal. 33:5). Ma̱ndoo mbuyáá gajkhun rí Jeobá nandoo kaʼyulú wéñuʼ ga̱jma̱a̱ nandoo rí magumáanʼ rí májánʼ. Nduyaaʼ kaʼwu rígi̱ náa Xtángoo rí Jeobá nixnúu Moisés mu maxnúu xuajen Israel. Á mu ikháanʼ xtaa gíná ga̱jma̱a̱ numuu dí nitagíʼnii mbá dí raʼkhí, mani a̱jkia̱a̱nʼ rí matanigajmaa Xtangoo ndrígóo Moisés * náa naʼthí ga̱jma̱a̱ numuu rí Jeobá naxmiéjúnʼ kaʼñúún xa̱bi̱i̱.

3. a) Xó má naʼthí náa Romanos 13:8-10, ndiéjunʼ exkamaa índo̱ nuʼnigajmaa Xtángoo ndrígóo Moisés rá. b) Xú kaʼnii graxe̱ rí guriʼña̱a̱ náa artículo rígi̱ rá.

³ Índo̱ nuʼnigajmaa Xtángoo ndrígóo Moisés, nduʼyáá rí Dios nandoo kaʼyulú wéñuʼ (atraxnuu Romanos 13:8-10). * Náa artículo rígi̱, mbuʼyáá tikhu Xtángoo rí Jeobá nixnúu xuajen Israel ga̱jma̱a̱ muriʼña̱a̱ graxe̱ rígi̱: Náa numuu ma̱ndoo muʼthá  rí Xtángoo kuajtuminaʼ ga̱jma̱a̱ ngajua rá. Náa numuu ma̱ndoo muʼthá rí niʼni marigá rí jmbu rá. Xú kaʼnii ndiyóoʼ majmúún xtángoo rígi̱ bi̱ niguáʼdáá mbá ñajunʼ rá. Ga̱jma̱a̱ tsíin ni̱ndxu̱ún bi̱ phú niñewu̱u̱n Xtángoo rígi̱ rá. Xóo gáxtiʼña̱a̱ graxe̱ rígi̱ mambáyulú mu maʼni̱i̱ a̱jkiu̱lú ga̱jma̱a̱ maʼni rí mu̱ʼgua̱ kanuu itháan náa Anu̱lú bi̱ xtáa mekhuíí (Hech. 17:27; Rom. 15:4).

4. a) Náa numuu ma̱ndoo muʼtá rí Xtángoo ndrígóo Moisés kuajtuminaʼ ga̱jma̱a̱ ngajua rá. b) Xó má naʼthí náa Mateo 22:36-40, xú kaʼnii kiʼtáñajunʼ rí Jesús niʼthí rá.

⁴ Náa numuu ma̱ndoo muʼtá rí Xtángoo ndrígóo Moisés kuajtuminaʼ ga̱jma̱a̱ ngajua rá. Numuu rí Jeobá naʼni xúgíʼ ga̱jma̱a̱ ku̱ma̱ rúʼko̱ dí nindxu̱u̱ ngajua (1 Juan 4:8). Náa itháan rí mbá seiscientos kiʼtáñajunʼ rí kagu̱ náa Xtángoo najuiʼthá a̱jma̱ rí gíʼdoo itháán numuu: Maʼndaaʼ xtayáá Dios ga̱jma̱a̱ maʼndaaʼ xtayáá xa̱bu̱ numbaaʼ ga̱jma̱ʼ (Lev. 19:18; Deut. 6:5; atraxnuu Mateo 22:36-40). * Ikha jngó, tséʼniulú tsiánguá rí mámbá rígi̱ nasngájma ngajua ndrígóo Dios. Guʼyáá tikhu xkri̱da.

5, 6. a) Ndiéjunʼ eyoo Jeobá rí muni bi̱ nidamijná rá. b) Ndiéjunʼ rí Jeobá ndaʼyoo má xúʼko̱ rá. Arathá mbá xkri̱da.

⁵ Xtángoo rí xúni̱ nduwamíjná bi̱ nidamijná ga̱jma̱a̱ rí muñewu̱u̱n e̱ji̱n. Jeobá nandoo rí xa̱bu̱ bi̱ nidamijná maʼndún kuyamijná náa xúgíʼ mbiʼi rí gakúwi̱i̱n (Gén. 2:24; Mat. 19:3-6). Rí muxudamijná aʼkhá gajmiún mbáa bi̱ túyáa nindxu̱u̱ mbá dí raʼkhí kayuʼ dí ma̱ndoo maʼni mbáa. Ikha jngó tséʼniulú tsiánguá rí náa juwan kiʼtáñajunʼ naʼthí dí ragíʼmaa muni rígi̱ (Deut. 5:18). Rí mataxuʼdáminaʼ aʼkhá ga̱jma̱ʼ mbáa bi̱ tíyáa nindxu̱u̱ asndu xóo mataxuʼdáminaʼ “aʼkhá náa inuu Dios”, ga̱jma̱a̱ rígi̱ maʼni gawúunʼ wéñuʼ bi̱ ndiyáa (Gén. 39:7-9). Ga̱jma̱a̱ gaʼkhu rí ma̱ʼkha̱ kayóo rígi̱, ma̱ndoo mbajyúuʼ mbayuuʼ tsiguʼ.

⁶ Jeobá ndaʼyoo má xúʼko̱ xóo kuwa xa̱bu̱ gajmii. Náa xuajen Israel dí nirígá nákha wajyúúʼ, ikhiin nikhánún awan rí gu̱ʼu̱ ndayóoʼ mbiʼyaga̱jui̱i̱n. Xa̱bu̱ bi̱ naʼnimbo̱o̱ Xtángoo nandoo kaʼyoo a̱ʼgiu̱u̱, ma̱ngaa xániña̱a̱ʼ ga̱jma̱a̱ mbá dí ragíʼdoo numuu (Deut. 24:1-4; Mat. 19:3, 8). Mú, á mu narígá mbá xkujndu mingíjyúuʼ ga̱jma̱a̱ naniña̱a̱ʼ, mbaʼyóoʼ maxnúu mbá i̱yi̱i̱ʼ náa naʼthí náa numuu rí maniñaaʼ. Rígi̱ nañewu̱u̱n náa mbá nduwaʼ rí ikhaa najuiʼthá dí nikudaminaʼ aʼkhá ga̱jma̱a̱ mbáa. Ma̱ngaa nákha xóó tséxnúu i̱yi̱i̱ʼ rígi̱, xa̱biya̱ ginii mbaʼyoo maʼga̱ náa inún bi̱ kuya̱ edxu̱u̱ náa xuajen, mu xúʼko̱ ikhiin ma̱ndoo muni míjna mumbañún xa̱bu̱ buʼko̱ mu xúniñamijnáá. Jeobá tsírikhoo á mu mbáa israelita naniñaʼ a̱ʼgiu̱u̱ ga̱jma̱a̱ nimbá numuu, mú ndaʼyoo gaʼkhu rí xtáa ranújngoo bi̱ naguanúu ga̱jma̱a̱ nagawúunʼ ma̱ngaa (Mal. 2:13-16).

7, 8. a) Ndiéjunʼ ninda̱ʼa̱ Jeobá rí muni xa̱bu̱ guanii rá. (Atayáá xtiʼkhu rí timbá ináa.) b) Xú káʼnii ikha ejmañuluʼ rá.

⁷ Náa Xtángoo ma̱ngaa naʼthí rí Jeobá ndaʼyoo má xúʼko̱ xóo kuwa e̱ji̱n. Ikhaa raʼkháa i̱ndó niʼthún xa̱bu̱ guanii rí muxnún e̱jñún rí ndañúunʼ, ma̱ngaa rí musngúún ga̱jma̱a̱ numuu ikhaa. Ndiyóoʼ muriyaʼ mbiʼi musngúún mu mbuyamajkuíí xtángoo ndrígóo ikhaa mu xúʼko̱ maʼndún kuyáá (Deut. 6:6-9; 7:13). Mbá numuu rí Jeobá nixnúún castigo xa̱bu̱ israelitas ninindxu̱u̱ rí nuxnaxi̱i̱n e̱jñún xóo tsigijñaʼ (Jer. 7:31, 33). Israelita ragíʼmaa mbuñún e̱jñún xóo mbá rí niʼngu̱u̱n niguáʼdáá o mbá rí nda̱a̱ numuu dí xáʼyoo muñewa̱a̱n, gíʼmaa mbuyáá xóo mbá regalo rí Jeobá  nixnúún ga̱jma̱a̱ rí ndayóoʼ muñewa̱a̱n wéñuʼ (Sal. 127:3).

⁸ Najmañulúʼ: Rí Jeobá ndaʼyoo xú kaʼnii kúwi̱i̱n bi̱ nidamijná. Nandoo rí xa̱bu̱ guanii maʼndún kuñún e̱jñún ga̱jma̱a̱ rí ikhaa manda̱ʼa̱ cuenta xú kaʼnii eñawi̱i̱n.

9-11. Náa numuu rí Jeobá nixná xtángoo rí xáʼyoo manigulúʼ maguaʼdáá rá.

⁹ Xtángoo ga̱jma̱a̱ numuu rí maʼndaaʼ maraʼdáá. Náa gu̱wa̱ʼ kiʼtáñajunʼ naʼthí dí ragíʼmaa magua̱ʼa̱ maraʼdáá, xóo muʼthá rí manigua̱a̱ʼ maraʼdáá wéñuʼ rí gíʼdoo imba̱a̱ xa̱bu̱ (Deut. 5:21; Rom. 7:7). Náa xtángoo rígi̱ Jeobá niʼsngúún mbá ikhaa rí gíʼdoo wéñuʼ numuu xa̱bi̱i̱: Rí gíʼmaa muñewa̱a̱n xóo endxaʼwamíjna̱ ga̱jma̱a̱ xóo ekumún ma̱ngaa a̱jkiún. Ikhaa ndaʼyoo rí índo̱ naguma mbá dí ra̱májánʼ ginii nda̱ja̱a̱ náa a̱jkiu̱u̱n xa̱bu̱ (Prov. 4:23). Á mu mbáa israelita naniñuuʼ rí mbaja̱a̱ dí ra̱májánʼ náa a̱jkiu̱u̱n rúʼko̱ gasngájma rí na̱nguá gíʼdoo ngajua náa eʼwíínʼ. Rúʼko̱ nigíʼnuu rey David. Ikhaa na̱nguá ninindxu̱u̱ mbáa xa̱bu̱ ra̱májánʼ, mu mbá mbiʼi ninigiu̱u̱ʼ wéñuʼ mbáa a̱ʼgiu̱u̱ xa̱bu̱, ga̱jma̱a̱ rúʼko̱ niʼni rí makudaminaʼ aʼkhá (Sant. 1:14, 15). Nibóo̱ʼ ga̱jma̱a̱ a̱ʼgu̱ buʼko̱, nigíʼ maʼni nduwaaʼ ajmbio̱o̱ ga̱jma̱a̱ nda̱wa̱á niʼni rí makhañúu náa nuxmijná (2 Sam. 11:2-4; 12:7-11).

¹⁰ Jeobá ndaʼyoo dí rígá náa a̱jkiu̱lú, ikha jngó índo̱ mbáa israelita nanújnguramúuʼ xtángoo rígi̱, ikhaa ndaʼyoo (1 Crón. 28:9). Náa xtángoo rígi̱ naʼthúún xa̱bi̱i̱ rí xúgíwánʼ náa a̱jkiu̱ún mbá dí ra̱májánʼ rí ma̱ndoo maʼga kagui̱i̱n muxudami̱jna̱ aʼkhá. Phú gajkhun rí Jeobá nindxu̱u̱ mbáa Anu̱lú bi̱ nakro̱ʼo̱o̱ ga̱jma̱a̱ májánʼ a̱jkiu̱u̱n.

¹¹ Najmañulúʼ: Jeobá ndaʼyoo a̱jkiu̱lú ga̱jma̱a̱ xóo phú ni̱ndxu̱lú (1 Sam. 16:7). Xándoo murkaʼwu mbá rí nundxa̱ʼwa̱míjna̱, rí nakumulú o mbá rí nuʼni. Ndayáʼ mbá rí májánʼ náa ikháanʼ ga̱jma̱a̱ nambáyulúʼ mu manindxu̱lúʼ mbáa májánʼ xa̱bu̱. Mú ma̱ngaa nandoo rí ikháanʼ mbuʼyáá mbá dí ra̱májánʼ dí gíwanʼ náa a̱jkiu̱lú ga̱jma̱a̱ muriʼyáaʼ mu xáʼga̱ kaguáanʼ muʼni mbá dí raʼkhí (2 Crón. 16:9; Mat. 5:27-30).

12. Ndiéjunʼ rí itháan naʼthí náa Xtangoo ndrígóo Moisés rá.

¹² Náa Xtángoo ndrígóo Moisés nakujmaa rí Jeobá nandoo kaʼyoo rí jmbu (Sal. 37:28; Is. 61:8). Ikhaa nisngájma xóo phú nindxu̱u̱ rí mataniu̱u̱n rí májánʼ o rí jmbu eʼwíínʼ. Niʼni tsajkurámíi̱nʼ israelitas índo̱ ninimbu̱u̱n xtángoo ndrígóo, mu naniñuuʼ rí mumíniiʼ índo̱ tsénimbu̱ún. Mbuʼyáá xóo imbá gijma̱ rí mbá gu̱wa̱ʼ kiʼtáñajunʼ.

13, 14. a) Ndiéjunʼ eʼthí náa a̱jma̱ kiʼtáñajunʼ rí ginii rá. b) Xú káʼnii embáñun israelitas índo̱ nunimbu̱ún xtángoo rúʼko̱ rá.

¹³ Xtángoo náa naʼthí rí i̱ndó Jeobá ndaʼyóoʼ mbuʼyamajkuíí. A̱jma̱ kiʼtáñajunʼ rí ginii naʼthúún israelitas rí mbuyamajkuíí i̱ndó Dios ga̱jma̱a̱ rí xándoo mbuyamajkún xándú (Éx. 20:3-6). Á mu bi̱ israelitas nuni rígi̱ raʼkháa mu mambáyúu Jeobá, nindxu̱u̱ mu mambáñún má ikhiin. Ikhiin nakuwa májánʼ índo̱ naguájún jmbu náa Dios, mu naguáʼníí dí ra̱májánʼ índo̱ nduyamajkhún eʼwíínʼ dioses ndrígu̱ún i̱ʼwáʼ xuajen.

¹⁴ Gundxaʼwamíjna̱ rí niguáʼníí xa̱bu̱ xuajen Canaán. Ikhiin ndiyamajkhún xándú, raʼkháa Dios bi̱ gajkhun (Sal. 115:4-8). Rí xóo nduyamajkhún dios ndrígu̱ún nindxu̱u̱ rí nuni aʼkhá rí xkawiʼ wéñuʼ xóo rí nurima̱ʼ ga̱jma̱a̱ rí e̱jñún nuxnaxi̱i̱n xóo tsigijñaʼ. Xúʼko̱ má índo̱ bi̱ israelitas niniñaaʼ runimbúún kuyáá Jeobá ga̱jma̱a̱ ndiyamajkhún xándú, nini gíníi bi̱ kuwa náa guʼwún (2 Crón. 28:1-4). Bi̱ niguáʼdáá mbá ñajunʼ niniñaaʼ xtángoo ndrígóo Jeobá rí nindxu̱u̱ jmbu ga̱jma̱a̱ nini gíníi bi̱ nda̱a̱ rí eʼngu̱u̱n muni  (Ezeq. 34:1-4). Jeobá niʼthúu̱n xuajñu rí maxnún castigo numuu rí nuni gíníi gu̱ʼu̱ ga̱jma̱a̱ e̱ji̱n (Deut. 10:17, 18; 27:19). Mú, niʼni tsajkurámiinʼ índo̱ naguáju̱n jmbu ga̱jma̱a̱ índo̱ nuni rí májánʼ (1 Rey. 10:4-9).

15. Ndiéjunʼ rí ejmañuluʼ ga̱jma̱a̱ numuu Jeobá rá.

¹⁵ Najmañulúʼ: Jeobá na̱nguá gíʼdoo aʼkhúun náa xa̱bu̱ bi̱ nuthi rí nuni ñajunʼ mu tsénimbu̱ún ikha ndrígóo ga̱jma̱a̱ nuni gíníi xa̱bi̱i̱. Maski ajndu xúʼko̱, ikhaa nandoo kaʼyulú ga̱jma̱a̱ ndaʼyoo índo̱ numíniiʼ mbá dí ra̱májánʼ. Ikhaa nagawúunʼ itháán índo̱ numíʼniiʼ ki xóo mbáa a̱ʼgu̱ bi̱ ndaʼyoo rí namínuʼ a̱ʼdióo (Is. 49:15). Dios nda̱a̱ rí eʼniún bi̱ nuni dí ra̱májánʼ xúgi̱, mú á mu tsítanga̱a̱ a̱jkiu̱ún, ikhaa maʼni gámbíin mbiʼi rí kaʼyoo.

16-18. a) Xú kaʼnii nijmaa Xtángoo ndrígóo Moisés rá. b) Ndiéjunʼ rí ejmañuluʼ rá.

¹⁶ Náa Xtángoo ndrígóo Moisés mbaʼa xóo nijmaa náa xuajen Israel. Bi̱ kuya̱ edxu̱u̱ raʼkháa i̱ndó ndiyóoʼ mumbañún xa̱bu̱ mbuyáá rí nandoo Dios, ma̱ngaa rí xóo kuwa ga̱jma̱a̱ índo̱ narígá mbá dí ra̱májánʼ. Ikha jngó ndiyóoʼ majmúún májánʼ xtángoo rígi̱ mu muni dí jmbu. Guʼyáá tikhu xkri̱da.

¹⁷ Á mu mbáa israelita naxíyáa mbáa xa̱bu̱, xa̱bu̱ buʼko̱ tséxi̱yáa mbá nacha̱. Bi̱ kuya̱ edxu̱u̱ náa xuajen mbaʼyóoʼ mbuyáá xú kaʼnii phú nirígá ga̱jma̱a̱ nda̱wa̱á muthi á mu kaʼyoo makhañúu o na̱nguá (Deut. 19:2-7, 11-13). I̱mba̱, ma̱ngaa ndiyóoʼ munimbánii mixtiʼkhu xkujndu dí narígá, xóo ga̱jma̱a̱ numuu rí guáʼdáá asndu xkujndu náa bi̱ nidamijná (Éx. 21:35; Deut. 22:13-19). Índo̱ bi̱ kuya̱ edxu̱u̱ nuni rí jmbu ga̱jma̱a̱ á mu israelitas nunimbánii Xtángoo, xúgínʼ nambáñun ga̱jma̱a̱ xuajen ndaʼyamajkuu Jeobá (Lev. 20:7, 8; Is. 48:17, 18).

¹⁸ Najmañulúʼ: Rí Jeobá naxmiéjunʼ xóo kuwáanʼ. Nandoo rí muʼniu̱u̱n rí májánʼ eʼwíínʼ. Ga̱jma̱a̱ ikhaa ndaʼyoo rí nuʼthá ma̱ngaa rí nuʼni asndu índo̱ kuwáanʼ ndajkuáanʼ náa guʼwúlú (Heb. 4:13).

19-21. a) Xú káʼnii ndiyóoʼ muniu̱u̱n xuajñún Dios bi̱ kuya̱ edxu̱u̱ ga̱jma̱a̱ bi̱ nunimbaníí xkujndu rá. b) Xú kaʼnii xtángoo rí tséniñuuʼ marigá dí ra̱májánʼ rá. c) Xú kaʼnii ikha najmañulúʼ rá.

¹⁹ Xuajen dí tri̱ga̱ mijngii náa Israel xa̱bu̱ bi̱ nikuwa ikhí niguʼwún mudrigú mbújkha̱a̱ ga̱jma̱a̱ numuu mbá rí muni. Jeobá táʼndoo rí xa̱bi̱i̱ muni xúʼko̱ kaʼnii xóo má nuni xa̱bu̱ xuajen rúʼko̱, ikha jngó niʼthún bi̱ kuya̱ edxu̱u̱ ga̱jma̱a̱ bi̱ nunimbaníí xkujndu rí xúraʼwíin xa̱bu̱. Ma̱ngaa niʼthúún rí xáʼni gújkhuʼ a̱jkiu̱ún ga̱jma̱a̱ rí maʼndún kuyáá rí jmbu (Deut. 1:13-17; 16:18-20).

²⁰ Numuu rí Jeobá nagáwiinʼ a̱jkiu̱u̱n, ikha jngó nixná xtángoo náa naʼthí rí gíʼmaa maguma rí jmbu. Mbá xkri̱da, náa Xtángoo naʼthí rí xándoo maguma tsu̱di̱i̱ mbáa. Ikhaa ma̱ndoo mbaʼyoo tsáa nindxu̱u̱ bi̱ nakrui̱ga̱a̱ (Deut. 19:16-19; 25:1). Ma̱ngaa mu miʼtá rí gíʼdoo aʼkhúun, bi̱ nakruiga mbaʼyóoʼ magiʼdiin a̱jmi̱i̱n bi̱ ndiyáá (Deut. 17:6; 19:15).  Mú, ndiéjunʼ gárígá á mu israelita niʼni mbá dí ra̱májánʼ mu káaʼ mbáwíi bi̱ ndiʼyoo xtáa rá. Ikhaa xáku̱mu̱u̱ rí makríyaʼ numuu rí Jeobá ndiʼyoo má xúgíʼ. Ma̱ngaa xabuanii nikhánún rí mutañajunʼ náa guʼwún ga̱jma̱a̱ rí munimbánii xkujndu, mú rígá tikhu xkujndu náa ndaʼyoo munimbánii bi̱ kuya̱ edxu̱u̱ náa xuajen (Deut. 21:18-21).

²¹ Najmañulúʼ: Jeobá nindxu̱u̱ bi̱ nagíʼ mbá májánʼ xkri̱da, numuu rí ikhaa nimbá miʼtsu táʼni nimbá dí ra̱májánʼ (Sal. 9:7). Naʼni tsajkurámiinʼ bi̱ naguájun jmbu ga̱jma̱a̱ á mu nunimbánii xtángoo ndrígóo, mu naxnún castigo bi̱ nanújngorámunʼ ikha ndrígóo (2 Sam. 22:21-23; Ezeq. 9:9, 10). Mbáa tikhun nuni dí ra̱májánʼ ga̱jma̱a̱ nakujmaa rí tsékánún castigo, mú Jeobá maxnún castigo mbiʼi rí kaʼyoo (Prov. 28:13). Á mu tsítanga̱a̱ a̱jkiu̱ún nánguá má mbayuuʼ guanuu mu mbuyáá dí ‹ra̱májánʼ nindxu̱u̱ dí makiéʼkulú náa inuu Dios bi̱ ndaʼya› (Heb. 10:30, 31).

22-24. a) Tsíin phú nañewu̱u̱n Xtángoo rá. b) Ndiéjunʼ ejmañuluʼ ga̱jma̱a̱ numuu Jeobá rá. c) Ndiéjunʼ rí naʼthúlúʼ náa Éxodo 22:22-24 rá.

²² Bi̱ phú nañewu̱u̱n Xtángoo ni̱ndxu̱ún e̱jín dxuáʼa, gu̱ʼú xuáʼa̱ ga̱jma̱a̱ bi̱ naguwáʼ i̱mba̱ níʼkhá. Xúgínʼ bi̱ nunimbaníí xkujndu náa Israel gíʼmaa munimbu̱u̱n ikha rígi̱: “Xátani̱i̱ dí raʼkhí mbáa bi̱ na̱ʼkhá, ni má mbáa aʼdá dxuáʼa bi̱ nda̱wa̱a̱ anu̱u̱, ga̱jma̱a̱ xátrigukáyíí xtíñuu mbáa a̱ʼgú xuáʼa̱ mu matani xtíñaaʼ” (Deut. 24:17). Jeobá naxmiéjunʼ kaʼñún bi̱ itháán gíníi ga̱jma̱a̱  maxnún castigo bi̱ nuni gíníi (atraxnuu Éxodo 22:22-24). *

²³ Mu maxtie̱wu̱u̱n bi̱ kuwa náa mbá guʼwá, Xtángoo naʼthí rí xándoo mubúúnʼ bi̱ kuyamijná (Lev. 18:6-30). Xuajen dí rígá mijngii nuni rígi̱ ga̱jma̱a̱ nduyáá rí májánʼ nindxu̱u̱. Mú xuajñu Jeobá gíʼmaa mbaʼyoo rígi̱, xóo má eʼyoo ikhaa mbá rí xkawiʼ wéñuʼ.

²⁴ Najmañulúʼ: Jeobá nandoo rí bi̱ nixnúún ñajunʼ rí mbu̱ya̱ edxu̱u̱ gíʼmaa rí maxmiéjunʼ kuñún bi̱ nuñewu̱u̱n. Ma̱ngaa nditháan tsíyoo gáʼyoo rí xa̱bu̱ mutsijmiin gu̱ʼu̱ ga̱jma̱a̱ nandoo rí marigá rí jmbu náa xa̱bi̱i̱, itháán náa bi̱ tséʼngu̱u̱n guñeumíjna̱ i̱ndó ikhiin.

25, 26. a) Náa numuu nuʼthá rí ngajua ga̱jma̱a̱ rí jmbu nindxu̱u̱ xóo maraxtaa ga̱jma̱a̱ rí mbiya̱ xi̱ʼ rá. b) Ndiéjunʼ guʼyáá náa i̱mba̱ artículo rá.

²⁵ Ma̱ndoo muʼthá rí ngajua ga̱jma̱a̱ rí jmbu nindxu̱u̱ xóo maraxtaa ga̱jma̱a̱ rí mbiya̱ xi̱ʼ: Nájma̱ rígi̱ gíʼdoo wéñuʼ numuu. Índo̱ nduʼyáá rí xúgíʼ rí naʼni Dios nindxu̱u̱ jmbu rúʼko̱ naʼni rí maʼndulú kuʼyáá itháan. Ga̱jma̱a̱ índo̱ nandulú kuʼyáá Dios ga̱jma̱a̱ xtángoo ndrígóo rí nindxu̱u̱ jmbu, rúʼko̱ naʼni dí maʼndulú kuʼñúún eʼwíínʼ ga̱jma̱a̱ muʼniu̱u̱n rí májánʼ.

²⁶ Rí nimbánun ga̱jma̱a̱ Xtángoo ndrígóo Moisés rúʼko̱ niʼni rí Jeobá nindoo nimbáxu̱u̱n gajmíi̱n israelitas. Mú, rígi̱ nánguá nigiʼdoo numuu índo̱ Jesús niʼnimbánuu ga̱jma̱a̱ nixtiʼkuriya̱a̱ʼ ga̱jma̱a̱ mbá rí itháán májánʼ (Rom. 10:4). Apóstol Pablo niʼthí rí: “Xtángoo ninindxu̱u̱ mbá ndájkua rí ma̱ʼkha̱ mbaʼa rí májánʼ” (Heb. 10:1). Náa i̱mba̱ artículo majuiʼthá ga̱jma̱a̱ numuu tikhu rí mitsaanʼ ma̱ngaa rí gíʼdoo numuu rí maguaʼdáá ngajua ga̱jma̱a̱ rí marigá rí jmbu náa congregación.