Anu̱ʼ nigumbiʼyuu John Mills, nijngúun iyááʼ nakha tsíguʼ 1913 náa xuajen Nueva York, índo̱ ikhaa nigiʼdoo 25 tsiguʼ. Ndxájulú Russell nixná discurso ndrígóo bautismo. Nguáthá tsíguʼ nda̱wa̱á, anu̱ʼ ni̱jkhá gaxtáa náa isla ndrígóo Trinidad, náa ndiyáa mbá a̱ʼgu̱ bi̱ mbiʼyuu Constance Farmer. Ikhí nimbáyúu William Brown * mu magrigu “Foto-Drama de la Creación” asndu 1923, índo̱ ndxájulú Brown ga̱jma̱a̱ a̱ʼgiu̱u̱ nigún gúyambáá náa África Occidental. Aniu̱ʼ, bi̱ kixtaʼwíin mu magúun mekhuíí, niguanún náa Trinidad.

Aniu̱ʼ niguáʼdiin mbá mijna guwiinʼ e̱ji̱i̱n. Aʼdá giʼnii nixná mbiʼí Rutherford xóo má mbiʼyuu bi̱ nayéjkha̱ edxu̱u̱ náa Sociedad Watch Tower mbiʼi rúʼko̱. Nda̱wa̱á nigumún ikhúúnʼ nákha 30 ñajunʼ gu̱nʼ diciembre tsiguʼ 1922. Nixna mbiʼyuʼ Woodworth (mú, nuthu̱nʼ Worth) numuu rí Clayton Woodworth nigumbiʼyuu bi̱ naʼni The Golden Age (rí xúgi̱ najmaʼnuuʼ xóo ¡Despertad!) ikha jngó xúʼko̱ nixna mbiʼyuʼ mangúún. Nixuʼmáanʼxu mu mu̱ʼguáxu náa guʼwá kiʼsngáa, mu rí itháán nini ninindxu̱u̱ rí nixkaxáaʼnxu munixu̱ʼ ñajunʼ Jeobá. Ru̱dúʼ nijmañuu wéñuʼ maʼsngúxu ga̱jma̱a̱ numuu Biblia. Ga̱jma̱a̱ anu̱ʼ ninigu̱u̱ʼ wéñuʼ maʼthúxu̱ʼ historias rí na̱ʼkha̱ náa Biblia ga̱jma̱a̱ naʼniwíin májánʼ wéñuʼ xa̱bu̱ bi̱ na̱ʼkha̱ raʼthí náa Biblia rúʼko̱ nañambáá mu matatsaʼwa̱a̱ itháán edxaaʼ.

Tsiakii rí nini niyambáá wéñuʼ. Rí mbá witsanʼxu bi̱ nindxuxu jiáma káaʼ ajtsáanʼ ni̱jkuáxu náa Escuela ndrígóo Galaad ga̱jma̱a̱ ajtsíin a̱ngui̱i̱n gu̱ʼu̱ ninindxu̱ún precursoras mba̱yu̱ʼ tsiguʼ náa xuajen Trinidad ga̱jma̱a̱ Tobago. Xóo nisngúxu ga̱jma̱a̱ xkri̱da ndrígu̱ún aniuxu̱ niyambáá mu makuwáanʼxu “náa goʼwóo Jeobá” xóo má naʼthí náa Salmo 92:13. Ga̱jma̱a̱ xóo nini ikhiin rúʼko̱ nimbáyuxu mu makuwáanʼ ikhí “náa rexo̱o̱ Dios ndrígúlú”.

 Náa guʼwúxu nigájnuu awan rí ikhí magajnún mu mutaraʼa. Ga̱jma̱a̱ precursores bi̱ nagún ikhí nuthi má xúʼko̱ ga̱jma̱a̱ numuu mbá ndxájulú bi̱ mbiʼyuu George Young, mbáa misionero bi̱ na̱ʼkha̱ náa Canadá bi̱ ni̱ʼkha̱ náa Trinidad. Ma̱ngaa aniu̱ʼ ninigu̱u̱nʼ wéñuʼ muthi ga̱jma̱a̱ numuu Brown bi̱ nikuwa gajmiún nákha ginii, rí ikhaa xúgi̱ xtáa náa África Occidental. Xúgíʼ rígi̱ nixkaxu̱u̱n mu magíʼdu̱u̱ mataraʼa índo̱ nigúʼdoʼ gu̱wa̱ʼ tsíguʼ.

Tsiguʼ rúʼko̱, revistas ndrígúlú naʼthí mbájmbu rí eʼwáʼ religión nindxu̱u̱ nduwaʼ, dí ragíʼmaa maratsi dí tseʼyoo ga̱jma̱a̱ numuu rí política nindxu̱u̱ ra̱májánʼ. Ga̱jma̱a̱ numuu rúʼko̱ mbáa ndxajkun niʼni rí nákha tsiguʼ 1936 maʼni rí Xa̱bu̱ Ñajunʼ bi̱ xtáa náa Trinidad xániñuʼ magajnúu i̱yi̱i̱ʼ ndrígóo Watch Tower. Ikháanʼxu nirkaʼwuxu ga̱jma̱a̱ nijmuxu má xúʼko̱ asndu índo̱ niwámbá. Ma̱ngaa ni̱jkuáxu marchas ga̱jma̱a̱ bicicleta kudáxu tratado ga̱jma̱a̱ letreros. Mbóó gajmiúxu̱ a̱ngiu̱lú bi̱ nutaraʼa ga̱jma̱a̱ mbá carro rí grígu mbá ajua̱nʼ rí nawáán gakhi̱i̱, bi̱ naguwáʼ náa Tunapuna, ni̱jkuáxu asndu náa xuajen rí itháán mitsínguánʼ ndrígóo isla. Rígi̱ niʼni dí manigu̱ʼ mani itháán ñajunʼ Jeobá ikha jngó nijngúnʼ iyááʼ índo̱ nigúʼdoo 16 tsiguʼ.

Xúgi̱ rí nini bi̱ kuwa náa goʼwóoʼ rúʼko̱ nixkaxu̱u̱n rí manigu̱ʼ mani̱ndxu̱ʼ misionero. Nindoʼ mani̱ndxu̱ʼ má xúʼko̱ misionero índo̱ ni̱jkhá gátaráʼa náa isla ndrígóo Aruba nákha tsíguʼ 1944 ga̱jmu̱ʼ ndxájulú Edmund Cummings. Nidxuxu wéñuʼ rí niʼnguxu nini rí mbá guwiinʼ xa̱bu̱ makuwá náa Conmemoración nákha tsiguʼ 1945. Ga̱jma̱a̱ i̱mba̱ tsiguʼ nigi̱ʼi̱ timbá congregación náa isla rúʼko̱.

Nda̱wa̱á nitaróʼoo mbá wáxá bi̱ niñejunʼ ga̱jmu̱ʼ bi̱ mbiʼyuu Oris Williams. Ikhaa tániñaminaʼ maniñuuʼ rí nijmañuu. Mú, rí niʼni gájmaa Biblia nijmañuu rí phú e̱ʼkha̱ raʼthí náa Ajngá rawuunʼ Dios ga̱jma̱a̱ nijngúun iyááʼ nákha 5 ñajunʼ gu̱nʼ enero tsiguʼ 1947. Nda̱wa̱á niniguxu̱ kuyamíjna̱ ga̱jma̱a̱ nidamijnáxu. Nákha noviembre tsiguʼ 1950 ikhaa ninindxu̱u̱ precursora. Nájmáanʼxu ninújnguxu mbiʼi mitsaanʼ wéñuʼ.

Nákha tsiguʼ 1955, nituxu mu̱ʼguáxu náa Escuela ndrígóo Galaad, ikha jngó niniʼñáʼ ñajunʼ ndrígúxu̱, nigujua̱a̱ guʼwúxu ga̱jma̱a̱ eʼwáʼ rí niguáʼdááxu ma̱ngaa niniʼñáxu Aruba. Nákha 29 ñajunʼ gu̱nʼ julio tsiguʼ 1956, nirámuxu clase 27 ndrígóo Galaad ga̱jma̱a̱ nixuʼmáanʼxu náa Nigeria.

Nda̱wa̱á, Oris niʼthí xóo kaʼnii nikumu̱u̱ nákha ginii: “Xi̱ʼ ndrígóo Jeobá nayambáá wéñuʼ mu matraʼníí asndu ndiéjunʼ má náa ñajunʼ rígi̱. Ikhúúnʼ tániguʼ mani̱ndxu̱ʼ misionera. Ikhúúnʼ nindoʼ itháán rí maxtáá náa goʼwóoʼ ga̱jma̱a̱ maguaʼdiin e̱ji̱nʼ. Mú, niriʼkhu̱u̱ xóo nindxa̱ʼo̱o̱ edxu̱ʼ índo̱ ndi̱yo̱o̱ rí ndayóoʼ wéñuʼ miʼtáraʼa ajngáa rí májánʼ. Ikha jngó índo̱ nirámuxu náa Galaad, ikhúúnʼ nindxa̱ʼo̱o̱ má xúʼko̱ edxu̱ʼ xóo gáxtáa xóo gáni náa gáʼga gátaráʼa xóo misionera. Índo̱ nirájtúxu barco rí mbiʼyuu Queen Mary, ndxájulú Worth Thornton, bi̱ nimbáyúu ndxájulú Knorr, niʼtúxu̱ rí muñajunʼxu náa Betel ga̱jma̱a̱ rí xúʼguáxu̱ xóo misionero. Ikhúúnʼ tániguʼ rúʼko̱ ga̱jma̱a̱ nixtáá gíná numuu rí ikhúúnʼ nindoʼ maʼgá xóo misionera. Mú tájyúuʼ má niguʼwunʼ náa ñajunʼ rúʼko̱ ga̱jma̱a̱ ni̱jkhánú niniguʼ. Náa Betel nini mixtiʼkhu ñajunʼ. Rí itháán niniguʼ rí magruiguiin xa̱bu̱ bi̱ naguwáʼ numuu rí xúʼko̱ nandoo naniʼniúún itháán a̱ngiu̱lú bi̱ naguwáʼ. Mbaʼin naguáʼnu mbá yujndíínʼ, nagiinʼ, nakandawúnʼ ga̱jma̱a̱ naxkidxu̱u̱n. Ma̱ngaa naniguʼ rí mambáñún ga̱jma̱a̱ rí ikhiin makuwá májánʼ. Xúgíʼ rígi̱ nindxu̱u̱ ñajuunʼ Jeobá, ikha jngó naʼni rí maxtáá tsímáá”. Xúgíʼ ñajunʼ rí ninixu nimbáyuxu rí mumbáxúxu̱ itháán gajmiúxu̱ Jeobá.

Nákha tsiguʼ 1961 nigimbáanʼxu náa Trinidad ga̱jma̱a̱ ndxájulú Brown niʼthí rí nigíʼnuu náa África. Ma̱ngaa ikhúúnʼ nitha xú kaʼnii ndija̱a̱ ñajunʼ náa Nigeria. Ndxájulú Brown ndiyaruʼún ga̱jma̱a̱ niʼthúu̱n anu̱ʼ: “Johnny, ikháánʼ na̱nguá nidxuʼ náa África, mú a̱ʼdiáaʼ Woodworth ni̱jkha̱”. Ikhú anu̱ʼ niʼthí: “Xátatsiʼñáanʼ matani xúgi̱ kaʼnii Worth”. Tsiakii rí nixnuʼ ikhiin nini rí manimbánuu ñajunʼ ndrígóʼ ga̱jma̱a̱ káxi̱ a̱jkiu̱nʼ.

Ga̱jma̱a̱ mbu̱júu̱ nindoo nixtáá náa clase 37 ndrígóo Galaad nákha tsiguʼ 1962, náa nigumaratúún mbá gu̱wa̱ʼ igu̱nʼ. Ndxájulú Wilfred Gooch, bi̱ ninindxu̱u̱ superintendente ndrígóo sucursal  náa Nigeria, nixtáa náa clase 38 ga̱jma̱a̱ nixuʼmaa maʼga Inglaterra, ga̱jma̱a̱ ikhúúnʼ nixnuʼ ñajunʼ ndrígóo. Ndiyáridoo xkri̱da ndrígóo ndxájulú Brown, mbaʼa nuthu ni̱jkhá náa mbaʼa xuajen náa nindoo niniʼniúnʼ mbaʼin a̱ngiu̱lú ga̱jma̱a̱ nindoʼ ka̱ñu̱u̱n. Maski ajndu ikhiin na̱nguá guáʼdáá wéñuʼ xóo xa̱bu̱ bi̱ kuwa náa xuajen mba̱ʼu̱, rí xóo gagi kúwi̱i̱n nakujmaa kaʼwu rí maraxtaa tsímáá na̱nguá má eyóoʼ maraʼdáá wéñuʼ mbújkha̱a̱. Maski ajndu gíná kúwi̱i̱n, mu nindxu̱u̱ mitsaan ma̱ta̱ya̱a̱ rí náa reunión naguwáʼ kaʼwiin ga̱jma̱a̱ nuniratamijná májánʼ. Mbaʼin naguwáʼ náa asambleas náa carro mba̱ʼu̱ ga̱jma̱a̱ bolekajas, * rígi̱ nindxu̱u̱ xóo autobús mú na̱nguá kaxtuguamáʼán rígi̱ rígá wéñuʼ ikhí. Ga̱jma̱a̱ ikhí kújma̱ ajngáa rí naʼthí xóo rígi̱: “Índo̱ na̱wa̱a̱ mbaʼa eʼtsúu iyaʼ ikhú naguájtaa mbá lamáa”.

¡Phú gajkhun nindxu̱u̱ ajngáa rígi̱! Tsiakii rí naʼni mámbáa xa̱bu̱ nagiʼdoo numuu; ga̱jma̱a̱ ikháanʼxu nunixu rí naʼnguxu. Nákha 1974 Nigeria ninindxu̱u̱ rí maʼni a̱jma̱ país, nda̱wa̱á rí Estados Unidos, rí ni̱jkha̱nú nikuwa mbá 100.000 publicadores. Nakujmaa kaʼwu rí ñajunʼ xtáa ra̱ja̱a̱.

Índo̱ xtáa ra̱ja̱a̱ ñajunʼ rígi̱ ikhú nigíʼdu̱u̱ nirígá guerra náa Nigeria, rí ndijyúuʼ ajtsú tsiguʼ, nigi̱ʼdu̱u̱ 1967 asndu 1970. A̱ngiu̱lú bi̱ nikuwa náa i̱mba̱ ridoo náa mañu Níger, náa Biafra nikúwi̱i̱n mbaʼa igu̱nʼ mitsinguánʼ náa sucursal. Nda̱a̱ xóo maguanúxu wíí, ndiyóoʼ rí muʼguá kudáxu ganitsu espiritual. Xóo má nitha nakha ginii, ninújnguxu náa iyaʼ mbaʼa nutu mu ma̱ndoo manújnguxu nitajkháan ga̱jma̱a̱ niku̱mu̱xu ku̱ya̱a̱ wéñuʼ Jeobá.

Narmáʼáan a̱jkiu̱nʼ kaʼwu mbiʼi rúʼko̱ naku̱mu̱ʼ asndu xóo ri̱xíí nirígá. Migamíi wéñuʼ niʼni: Soldados kuwa asndu náá ga̱jma̱a̱ kuda xawii ajua̱nʼ mu muradíin xa̱bu̱, ga̱jma̱a̱ nirígá wéñuʼ nandii... mámbá nuthu rí nanújnguxu̱ náa mañu naku̱mu̱xu rí mbiʼi rúʼko̱ gakáñuxu. Ninindxu̱u̱ migamíi wéñuʼ manújngáa náa kuwa soldados bi̱ nduyáá xúgíʼ dí narígá. Mú itháán gamíi manújngáa náa i̱mba̱ ridoo mañu. Mbá mbruʼun ninújngo̱ʼ náa mañu ga̱jma̱a̱ mbá canoa náa Asaba asndu Onitsha ma̱ngaa ni̱jkhá náa Enugu mu maxnu̱u̱ tsiakii superintendentes. I̱mba̱ aʼphu̱ ni̱jkhá gáxnu̱u̱ tsiakii bi̱ kuya̱ edxu̱u̱ náa Aba, náa tséniñaaʼ makamuu aguʼ rí mbruʼun. Náa Port Harcourt, ndiyóoʼ mambáxuʼ reunión mbá nacha̱ numuu rí soldados niʼngu̱u̱n nitu̱ʼu̱u̱n náa rexo̱o̱ xuajen Biafra.

Náa reunión ninixu marmáʼáan a̱jkiu̱ún a̱ngiu̱lú rí Jeobá nandoo kaʼñúún ga̱jma̱a̱ rí ikhaa má guñewu̱u̱n, ga̱jma̱a̱ rí ndiyóoʼ maguajún jmbu ma̱ngaa rí makuwá kambáxu̱u̱n xóo cristianos. A̱ngiu̱lú Nigeria niʼngu̱u̱n niraʼníí xkujndu rúʼko̱. Nisngajma rí ngajua ndrígu̱ún nindxu̱u̱ itháán mba̱a̱ ga̱jma̱a̱ nikuwa mbá jnduʼ. Ga̱jma̱a̱ ninindxu̱u̱ mitsaanʼ rí mangáanʼxu nikúwáanʼxu ikhí mbiʼi rúʼko̱.

Nákha tsiguʼ 1969, ndxájulú Milton Henschel niyéjkha̱ edxu̱u̱ náa Asamblea dí narígá náa xúgíʼ numbaaʼ rí ndiyá edxu̱u̱ “Paz en la Tierra” náa Estadio ndrígóo Yankees (Nueva York). Ikhúúnʼ nimbáyúu ga̱jma̱a̱ nijmañuʼ wéñuʼ numuu ikhaa. Ma̱ngaa rúʼko̱ nimbáyuʼ wéñuʼ numuu nákha tsiguʼ 1970 nirígá Asamblea Internacional náa Lagos (Nigeria) rí niyéjkha̱ edxu̱u̱ “Hombres de Buena Voluntad”. Rí marigá mbá asamblea xúgi̱ kaʼnii índo̱ inu niwámbá guerra nindoo nirígá ga̱jma̱a̱ numuu tsiakii ndrígóo Jeobá. Ga̱jma̱a̱ náa asamblea rúʼko̱ nikuwa mbá 121,128 xa̱bu̱ ga̱jma̱a̱ niʼngo̱o̱ nirígá náa mbá 17 ajngáa. Ndxájulú Knorr ga̱jma̱a̱ Henschel ga̱jma̱a̱ eʼwíínʼ a̱ngiu̱lú bi̱ niguwáʼ ga̱jma̱a̱ avión náa Estados Unidos ma̱ngaa Inglaterra, ikhiin ndiyáá xú kaʼnii nijngún iyááʼ mbá 3,775 a̱ngiu̱lú, ninindxu̱ún itháán mbaʼin ki xóo bi̱ nijngún iyááʼ nákhi Pentecostés. Mbiʼi rúʼko̱ ra̱ʼkhá tháán nigúʼdoo ñajunʼ índo̱ nini ratoo xóo marigá asamblea. A̱ngiu̱lú publicadores ni̱jkha̱ raʼni mbaʼin wéñuʼ.

Itháán rí mbá treinta tsiguʼ rí nixtáa náa Nigeria, nguáná nixtáa rañajunʼ xóo superintendente ndrígóo circuito nguáná xóo superintendente de zona náa África Occidental. Misioneros nixnáa wéñuʼ núma̱aʼ ga̱jma̱a̱ numuu ajngáa tsiakii rí nikhánún. Ikhúúnʼ niniguʼ wéñuʼ mathu̱u̱n rí na̱nguá kuwa ndajkuíín. Náa ñajunʼ rígi̱ nisngóʼ rí a̱ngiu̱lú ndañúunʼ muxnún tsiakii náa mambáa rí ikhiin mu maʼngu̱u̱n muni má xúʼko̱ ñajunʼ Jeobá ga̱jma̱a̱ rí xuajñu mawiji̱ gújkhuʼ má xúʼko̱ ma̱ngaa rí makuwíin jnduʼ má xúʼko̱ a̱ngiu̱lú.

 Ga̱jma̱a̱ numuu rí Jeobá nimbáyuxu niʼngu̱xu̱ nini gajmiúxu̱ nandii ga̱jma̱a̱ xkujndu rí nirígá niʼni guerra. Ndi̱ya̱a̱ má xúʼko̱ xóo Jeobá eʼni tsajkurámáanʼxu. Oris niʼthí:

“Nájmáanʼxu niguáʼdááxu nandii rí mbiʼyuu malaria (paludismo) mbaʼa nuthu. Mbá miʼtsu, Worth nikamínduu índo̱ nijkhanú náa hospital ndrígóo Lagos. Ga̱jma̱a̱ nithu̱nʼ rí makhañúu, mu niʼngo̱o̱ niʼni a̱jkiu̱u̱n. Índo̱ ndijui̱i̱ niʼthúu̱n enfermero bi̱ mbiʼyuu Nwambiwe ga̱jma̱a̱ numuu Reino ndrígóo Dios. Nda̱wa̱á ni̱jkuáxu mu musngáá ga̱jma̱a̱ numuu Biblia. Ikhaa nindoo maʼnigajmaa ga̱jma̱a̱ ikhaa ni̱jkha̱nú ninindxu̱u̱ bi̱ kayá edxu̱u̱ náa Aba. Ikhúúnʼ ma̱ngaa nimbáñun xa̱bu̱ mu mani̱ndxu̱ún xa̱bi̱i̱ Jeobá tikhun ninindxu̱ún musulmanes. Niniguxu̱ʼ rí nindoo niniʼniúnʼxu a̱ngiu̱lú bi̱ kuwa náa Nigeria, xóo kuwa, xóo eni ga̱jma̱a̱ ajngáa rí nuthi”.

Rúʼko̱ nindxu̱u̱ i̱mba̱ rí nijmañuxu: Mu maʼnguxu muni ñajunʼ náa i̱mba̱ níʼkhá xuajen ndiyóoʼ maʼnduxu ku̱ñu̱u̱n a̱ngiu̱lú tséʼniuu má xóo xa̱bu̱ ni̱ndxu̱ún.

Nákha tsiguʼ 1987, nikánuxu i̱mba̱ ñajunʼ. Nigájnáanʼxu náa Betel ndrígóo Nigeria nixuʼmáanʼxu náa isla ndrígóo Santa Lucía mu mutaráʼa. Ninindxu̱u̱ mbá ñajunʼ mitsaan wéñuʼ, mú nirígá tikhu rí niʼni mingíjyúuʼ. Náa África, xkujndu ninindxu̱u̱ rí xa̱bekha nudiin mbaʼin gu̱ʼu̱, mú, náa Santa Lucía i̱ndó nudamijná tsénujgúún náa inuu i̱yi̱i̱ʼ. Mú tsiakii ndrígóo Ajngá Rawunʼ Dios nixkaxi̱i̱n mu muriʼkhumijná.

Mámbá tsiguʼ rí na̱jkha̱ ranújngoo tsiakii ndrígúxu̱ ni̱jkha̱ raguámba. Ikhú Cuerpo Gobernante niʼthúxu rí maguwáaʼxu náa sede mundial, ndrígóo Brooklyn (Nueva York) nákha tsiguʼ 2005. Ga̱jma̱a̱ índo̱ niʼni 2015 a̱ʼgiu̱ʼ Oris nikháñuu, rúʼko̱ niʼni rí maxtáá gíná ga̱jma̱a̱ nimbiyaʼ wéñuʼ. Xúgíʼ mbiʼi naxnáá núma̱aʼ Jeobá numuu rí nixniuʼ mbáa a̱ʼgu̱ xúʼko̱ kaʼnii. Ninindxu̱u̱ mbáa a̱ʼgu̱ bi̱ ra̱ʼkhá tháán májánʼ a̱jkiu̱u̱n ga̱jma̱a̱ nindoo kaʼyoʼ wéñuʼ. Nindoʼ ka̱yo̱o̱ ga̱jma̱a̱ xúgíʼ a̱jkiu̱nʼ náa mbá sesenta y ocho tsiguʼ rí nikúwáanʼxu mbóó. Ndiya̱a̱xu rí mu ma̱ndoo makuwáanʼxu gagi ikháanʼxu ga̱jma̱a̱ náa congregación nindxu̱u̱ rí mbuʼyamajkún bi̱ guáʼdáá mbá ñajunʼ, muʼni mba̱a̱ a̱jkiu̱lú kuʼyamijná má xúʼko̱, manindxu̱lúʼ xa̱bu̱ wabaaʼ ga̱jma̱a̱ rí musngajmá cualidad ndrígóo xi̱ʼ kaʼwu.

Índo̱ nikúwáanʼxu gíná o niraʼníí xkujndu, ginii ndiya̱a̱xu Jeobá mu mambáyuxuʼ. Ikhaa nimbáyuxu muriʼkumíjnáxu náa ndiyóoʼ, ga̱jma̱a̱ ndiya̱a̱xu rí nuni mámbá mbiʼi nagájnuu itháan májánʼ. Mú rí itháán májánʼ rí makánulu gíʼ mijngii ma̱ʼkha̱ (Is. 60:17; 2 Cor. 13:11).

Náa Trinidad ga̱jma̱a̱ Tobago, Jeobá niʼni tsájkurámúunʼ ñajunʼ rí nini aniu̱ʼ ga̱jma̱a̱ a̱ngui̱nʼ. Xóo má naʼthí informes rí nigájna̱a̱ xíkhóó mbá 9,892 xa̱bu̱ bi̱ nijngún iyááʼ. Náa Aruba mbaʼin a̱ngiu̱lú niñambáá mu congregación náa nixtáá rañambáá nákha ginii mu mawiji̱ itháán gújkhuʼ. Xúgi̱ náa isla rígi̱ rígá mbá 14 congregación. Náa Nigeria kuwa mbá 381,398 publicadores. Ga̱jma̱a̱ náa isla ndrígóo Santa Lucía ni̱ndxu̱ún mbá 783 xa̱bu̱ bi̱ nuni ñajuunʼ Jeobá.

Rí xúgi̱ gúʼdoo itháán rí 90 tsiguʼ. Salmo 92:14 naʼthí rí bi̱ kuwa náa goʼwóo Jeobá “maʼni mbaʼin má xúʼko̱ asndu índo̱ gáʼkha̱ xngiʼxúún” ga̱jma̱a̱ rí “maʼni mbaʼwi̱i̱n ga̱jma̱a̱ maguaʼdáá má xúʼko̱ tsiakii”. Nadxuʼ wéñuʼ rí vida ndrígóʼ nixnaxí mu mani ñajunʼ Jeobá. Ga̱jma̱a̱ ajngáa tsiakii rí nigruigú nimbáyuʼ mu mani ga̱jma̱a̱ xúgíʼ a̱jkiu̱nʼ ñajunʼ ikhaa. Ga̱jma̱a̱ ngajua ndrígóo ikhaa niniñuuʼ rí maxtáá náa rexo̱o̱ (Sal. 92:13).