1, 2. a) Ndiéjunʼ eʼthí náa Biblia ga̱jma̱a̱ numuu Moisés, ga̱jma̱a̱ dí niʼni xá. b) Ndíjkha rí gíʼdoo numuu manindxu̱lúʼ mbá xa̱bu̱ tséjmangu̱u̱ʼ rá.

NÁA Biblia naʼthí rí Moisés ninindxu̱u̱ “bi̱ itháan guabaaʼ a̱jkiu̱u̱n ki xóo xúgínʼ xa̱bu̱ bi̱ kuwa náa tsu̱du̱u̱ ku̱ba̱ʼ” (Núm. 12:3). Lá rígi̱ nandoo gáʼthúu̱n rí nindxu̱u̱ mbáa xa̱bu̱ bi̱ ragíʼdoo tsiakii ga̱jma̱a̱ namiñuu xáʼ. Numuu rí xúʼko̱ ethi tikhun ga̱jma̱a̱ numuu mbáa xa̱bu̱ wabaʼ a̱jkiu̱u̱n o bi̱ tsíkiʼnáa. Mú raʼkháa xúʼko̱ nindxu̱u̱. Moisés ninindxu̱u̱ mbáa xa̱bi̱i̱ Dios bi̱ nigiʼdoo tsiakii, mbóo a̱jkiu̱u̱n niʼni ga̱jma̱a̱ támiñuu. Ga̱jma̱a̱ tsiakii ndrígóo Jeobá nimbáyúu mu xámiñuu maʼga náa inuu rey ndrígóo Egipto, ninindxu̱u̱ mbá xa̱bu̱ bi̱ nixná ikhúún mbá ajtsú millon xa̱bu̱ náa ku̱ba̱ʼ mixooʼ ga̱jma̱a̱ nimbáyúu xuajen Israel mu muxmijná gajmiún xa̱bu̱ sia̱nʼ.

² Gajkhun má rí ikháanʼ na̱nguá guáʼdáá xkujndu xóo nigiʼdoo Moisés, mu xúgíʼ mbiʼi nakuwáanʼ gajmiúlú xa̱bu̱ o mbá rí naʼni dí makiʼnáanʼlúʼ. Mú, gíʼdoo wéñuʼ numuu rí manindxu̱lúʼ mbáa xa̱bu̱ bi̱ tséjmangu̱u̱ʼ. Jeobá nakudaminaʼ rí “xa̱bu̱ bi̱ májánʼ a̱jkiu̱ún makuwá náa tsu̱du̱u̱ ku̱ba̱ʼ” (Sal. 37:11). Guraximíjna̱: “Lá mata rí ikhúún ni̱ndxu̱ʼ mbáa xa̱bu̱ bi̱ tséjmangu̱u̱ʼ ráʼ. Lá muthi e̱ʼwíinʼ rí xúʼko̱ ni̱ndxu̱ʼ ráʼ.” Mu ma̱ndoo muriʼña̱a̱ graxe̱ rígi̱, ginii ndayóoʼ mbuʼyáá ndiéjunʼ eyoo gáʼthúu̱n rí manindxu̱lúʼ mbáa xa̱bu̱ bi̱ tséjmangu̱u̱ʼ.

3, 4. a) Náa numuu eʼthá rí xájmangulú nindxu̱u̱ asndu xóo matani mbá murráa rá. b) Xú kaʼnii nindxu̱u̱ a̱jkhu̱ cualidad rí ndayulúʼ mu manindxu̱lúʼ mbáa xa̱bu̱ bi̱ tséjmangu̱u̱ʼ ga̱jma̱a̱ náá numuu rá.

³ Rí ma̱nindxa̱a̱ʼ mbáa xa̱bu̱ wabaʼ a̱jkiu̱u̱n o rí xájmangua̱a̱ʼ nindxu̱u̱ asndu xóo matani mbá murráa. Mu, murráa magajnúu mitsaan ndayóoʼ maguma ga̱jma̱a̱ mbaʼa gúmá rí mixtiʼkhu color. Xúʼko̱ má kayuʼ mu ma̱ndoo manindxu̱lúʼ mbá xa̱bu̱ wabaʼ  a̱jkiu̱u̱n, ndayóoʼ muru̱wa̱a̱ mbaʼa cualidad rí mitsaan. Tikhu dí nagájnuriyoʼ itháán nindxu̱u̱ rí manidxa̱a̱ʼ mbáa xa̱bu̱ wabaʼ a̱jkiu̱u̱n, matatsimbaʼ, rí xákiʼnán nacha̱ ga̱jma̱a̱ rí xámiñaʼ. Á mu nandulúʼ muʼni rí nandoo Jeobá ndayóoʼ maguaʼdáá cualidad rígi̱, guʼyáá náá numuu. *

⁴ I̱ndó xa̱bu̱ wabiinʼ ni̱ndxu̱ún bi̱ nunimbu̱u̱n kuyáá Dios ga̱jma̱a̱ nuni rí nandoo ikhaa. Ikhaa nandoo rí manindxu̱lúʼ mbáa xa̱bu̱ bi̱ tsíkiʼnáa nacha̱ (Mat. 5:5; Gál. 5:23). Mú, Gixa̱a̱ nakiʼnáa índo̱ nuʼni rí nandoo Jeobá. Ikha jngó, maski ajndu ni̱ndxu̱lú xa̱bu̱ wabaaʼ o mbáa xa̱bu̱ májáanʼ a̱jkiu̱u̱n, mbaʼin xa̱bu̱ bi̱ kuwa náa numbaaʼ ndrígóo Gixa̱a̱ nakiʼníin kuyulúʼ (Juan 15:18, 19). Ikha jngó ndaʼyóoʼ rí xámiñulúʼ.

5, 6. a) Ndíjkha rí Gixa̱a̱ nawiyuuʼ kaʼñún xa̱bu̱ míjiinʼ rá. b) Xú káʼnii graxe̱ guriʼña̱a̱ rá.

⁵ Mú i̱mba̱ nuthu nindxu̱u̱ rí mataxuxíminaʼ, ma̱nindxa̱a̱ʼ mbáa xa̱bu̱ tsagaguiiʼ ga̱jma̱a̱ xátanimbaaʼ náa Jeobá. Xúʼko̱ kaʼnii Gixa̱a̱. Ikha jngó nawiyuuʼ kaʼñún xa̱bu̱ míjiinʼ o bi̱ tséjmangu̱u̱ʼ, numuu rí xóo kaʼniún nusngajma rí ikhaa nindxu̱u̱ ra̱májánʼ ma̱ngaa nusngajma rí ikhaa nindxu̱u̱ mbáa bi̱ minduwaaʼ, tséʼniuu ma rí gaʼthí ga̱jma̱a̱ rí gáʼni xáʼngo̱o̱ gaʼni rí xa̱bu̱ míjiinʼ muniñaaʼ runi ñajunʼ Jeobá (Job 2:3-5).

⁶ Nguáná gáʼni mingíjyúuʼ rí xájmangulú rá. Ga̱jma̱a̱ ndíjkha rí ndayóoʼ muʼnimíjna̱ rí xájmangulú rá. Mu, muriʼña̱a̱ graxe̱ rígi̱, mbuʼyáá xkri̱da ndrígóo Moisés, bi̱ ajtsíin hebreos ga̱jma̱a̱ Jesús.

7, 8. Xú kaʼnii niʼni Moisés índo̱ a̱ngui̱i̱n túsngajma gamajkhu náa ikhaa xá.

⁷ Índo̱ guáʼdáá mbá ñajunʼ kiejunʼ. Índo̱ guaʼdáá mbá ñajunʼ marigá mbiʼi rí maʼniulú mingíjyúuʼ manindxu̱lúʼ mbáa xa̱bu̱ bi̱ tséjmangu̱u̱ʼ, itháán índo̱ mbáa bi̱ nuʼtáñajuíínʼ tseyamajkhulú o naʼthí dí raʼkhí nindxu̱u̱ mbá rí niraʼwíí muʼni. Lá niguáʼníín mbá miʼtsu xúʼko̱ kaʼnii ráʼ. Xú kaʼnii guʼni á mu mbáa bi̱ kuʼyáá gaʼni rígi̱ rá. Guʼyáá xóo niʼni Moisés.

 ⁸ Jeobá nigíiʼ mu mayéʼga edxu̱u̱ náa Israel ga̱jma̱a̱ niniñuuʼ maʼnirámáʼ xtángoo rí nixnúún xuajen. Nikujmaa kaʼwu rí ikhaa nixtáa ga̱jma̱a̱ Dios. Maski ajndu xúʼko̱, a̱ngui̱i̱n bi̱ nindxu̱u̱ Míriam ga̱jma̱a̱ Aarón, nithi dí raʼkhí ga̱jma̱a̱ numuu a̱ʼgu̱ bi̱ ndiyáa. Asndu tsáa ma̱ndoo makiʼnáa á mu nuni xúʼko̱ kaʼnii. Mú, Moisés na̱nguá nikiʼnáa. Asndu nindo̱ʼo̱o̱ Jeobá rí xáxnúu castigo Míriam (Núm. 12:1-13). Náa numuu rí tákiʼnáa xá.

9, 10. a) Ndiéjunʼ nijmañuu Moisés ga̱jma̱a̱ numuu Jeobá rá. b) Ndiéjunʼ gándoo gajmañún náa xkri̱da ndrígóo Moisés bi̱ nuyegun edxu̱u̱ rá.

⁹ Moisés tákiʼnáa numuu rí nijmañuu wéñuʼ ga̱jma̱a̱ numuu Jeobá. Naʼni xóo mbá a̱jma̱ skiñúnʼ tsiguʼ wapháá, nákhi nixtáa náa Egipto xóo mbáa a̱ʼdióo rey, ninindxu̱u̱ mbáa xa̱bu̱ bi̱ tséjyúuʼ kiʼnáa rí asndu ni̱jkha̱nú nixíyáa mbá xa̱bu̱ numuu rí ikhaa ndiʼyoo rí xa̱bu̱ buʼko̱ xtáa raʼni mbá dí ra̱májánʼ. Ikhaa nikumu̱u̱ rí Dios mbaʼyoo májánʼ rí niʼni. Jeobá nixtáa rambáyúu mbá a̱jma̱ skiñúnʼ tsiguʼ mu makro̱ʼo̱o̱ mayéʼga edxu̱u̱ náa Israel raʼkháa i̱ndó ndayóoʼ rí xámiñuu, ma̱ngaa rí gíʼmaa mani̱ndxu̱u̱ mbáa xa̱bu̱ bi̱ tséjmangu̱u̱ʼ. Mu ma̱ndoo mani̱ndxu̱u̱ xúʼko̱ kaʼnii ndayóoʼ rí mani̱ndxu̱u̱ mbáa xa̱bu̱ wabaaʼ, maʼnimbo̱o̱ ga̱jma̱a̱ rí mani̱ndxu̱u̱ mbáa xa̱bu̱ bi̱ xákiʼnáa nacha̱. Nijmañuu májánʼ rígi̱, ga̱jma̱a̱ ni̱jkha̱nú ninindxu̱u̱ mbáa xa̱bu̱ bi̱ niyéjkha̱ májánʼ edxu̱u̱ (Éx. 2:11, 12; Hech. 7:21-30, 36).

¹⁰ Rí mbiʼi xúgi̱, bi̱ kuya̱ edxu̱u̱ náa mbá guʼwíin ga̱jma̱a̱ bi̱ nuyegun edxu̱u̱ náa guʼwá nagimbáanʼ nindxu̱u̱ májánʼ rí mbuyaridáá xkri̱da ndrígóo Moisés. Á mu ikháán nindxa̱a̱ʼ mbáa dí ikhaa, xákiʼnán nacha̱ índo̱ natayáá rí tséyamajkuaaʼ. Atayáá rí mangáán nakiéʼkáanʼ (Ecl. 7:9, 20). Atasngájma rí natatsimbaaʼ ga̱jma̱a̱ atanimbánii xkujndu xóo má Jeobá eyoo, ma̱ngaa ataniminaʼ rí xákiʼnán nacha̱ (Prov. 15:1). Á mu bi̱ nuyegun edxu̱u̱ nuni xúʼko̱ kaʼnii Jeobá naniguuʼ, nuni rí marigá tsímáá ga̱jma̱a̱ nuxna mbá májánʼ xkri̱da ndiéjunʼ eyoo gáʼthúu̱n dí ma̱nindxa̱a̱ʼ mbá xa̱bu̱ bi̱ tséjmangu̱u̱ʼ.

11-13. Xú kaʼnii xkri̱da niniñaaʼ bi̱ ajtsíin jiáma hebreos rá.

¹¹ Índo̱ nuxkulú. Xúgíʼ tsiguʼ rí ninújngoo mbaʼin xa̱bu̱ ñajunʼ nixkúún xa̱bi̱i̱ Jeobá. Náa numuu rá. Mbáa nithi rí ninujnguramúúnʼ mbá xtángoo, mú rí nuxkulú nindxu̱u̱ numuu rí ikháánʼ niraʼwíí ‹muʼnimbulúʼ kuyáá Dios xóo Xa̱bu̱ Ñajunʼ raʼkháa náa xa̱bu̱› (Hech. 5:29). Mbáa mutsijmáanʼ, muxudanʼlú náa guʼwá e̱jua̱nʼ o asndu muxnulú. Mú ga̱jma̱a̱ tsiakii ndrígóo Jeobá ikháanʼ xátangaán muʼniu̱u̱n dí raʼkhí ga̱jma̱a̱ xáʼyoo muʼni nimbá índo̱ guraʼníí tsáʼkhá.

¹² Gundxaʼwamíjna̱ náa xkri̱da rí niniñaaʼ bi̱ ajtsíin jiáma hebreos bi̱ ni̱jkha̱ kiʼdiin náa Babilonia:  Hananías, Misael ga̱jma̱a̱ Azarías. * Rey Babilonia niʼthún rí musmbati̱gu̱u̱n náa inuu mbáa xándú bi̱ ki̱ʼni̱i̱ ga̱jma̱a̱ oro. Ikhiin nisngajma gamajkhu ga̱jma̱a̱ nitháán náá numuu rí xuyamajkhuíí xándú buʼko̱. Ninimbu̱u̱n kuyáá Dios maski ajndu rey niʼthún rí magruiʼíin náa horno rí nakha. Ikhiin takumu̱ún rí Dios maʼni káwíin mbiʼi má rúʼko̱, mú rúʼko̱ nirígá. Ikhiin nikuwa xawii maguáʼníí asndu xú kaʼnii má rí Jeobá ganiñuʼ marigá (Dan. 3:1, 8-28). Xúʼko̱ nisngajmá rí xa̱bu̱ bi̱ tsékiʼnii tsímíñúún ga̱jma̱a̱ rí na̱nguá kuwa xa̱bu̱ ñajunʼ, gámiin o i̱ʼwáʼ gaʼkhu mani rí muniʼñáaʼ ru̱ʼni̱ ñajunʼ mbáwíi Jeobá (Éx. 20:4, 5).

¹³ Xú kaʼnii gándoo guʼyaridúún ajtsíin hebreos índo̱ tséniñulú muʼni ñajunʼ Jeobá xá. Manindxu̱lúʼ xa̱bu̱ wabaaʼ ga̱jma̱a̱ makumulúʼ kuʼyáá rí ikhaa má gañewunlúʼ (Sal. 118:6, 7). Ga̱jma̱a̱ índo̱ mbáa gaʼthí dí raʼkhí ga̱jma̱a̱ numulúʼ, ikháanʼ muriʼña ga̱jma̱a̱ ajngáa wabaʼ ma̱ngaa gamajkhu (1 Ped. 3:15). Ga̱jma̱a̱ xúʼni̱ nimbá rí maʼni gachúu rí nambáxulúʼ gajmiúlú Anu̱lú bi̱ xtáa mekhuíí.

14, 15. a) Ndiéjunʼ gándoo marigá índo̱ kuwáanʼ néʼngulú rá. b) Xó má naʼthí Isaías 53:7, 10, ndíjkha rí Jesús ninindxu̱u̱ mbá májánʼ xkri̱da mu xákiʼnááʼ maski ajndu néʼngulú rá.

¹⁴ Índo̱ naʼni néʼngulúʼ. Xúgiáanʼ naʼni néʼngulú ga̱jma̱a̱ mixtiʼkhu numuu. Mbá xkri̱da, mbáa naguáʼníí xúʼko̱ kaʼnii numuu rí muʼni mbá examen náa escuela o ga̱jma̱a̱ numuu mbá ñajunʼ ndrígúlú. O mbáa ní xúʼyáá rí guʼni índo̱ gutulú rí ndaʼyoo mutiánʼ mu maguma thanulúʼ o ga̱jma̱a̱ numuu rí mu̱ʼgua̱ má xúʼko̱ náa guʼwá thana mu mbuyáá dí nandii guaʼdálú. Naʼni mingíjyúuʼ rí xákiʼnáanʼ índo̱ nánguá eʼyáá rí muʼni. Mbáa asndu magíʼdu̱u̱ maʼni makiʼnáanʼlúʼ mbá rí nákha ginii tséʼni makiʼnáanʼ. Ga̱jma̱a̱ mbáa mugíʼdi̱i̱ muʼthá ajngáa dí raʼkhí o muʼniu̱u̱n dí raʼkhí eʼwíínʼ. Á mu mbóʼ mbiʼi naʼni néʼngulú wéñuʼ gundxaʼwamíjna̱ ga̱jma̱a̱ numuu Jesús.

¹⁵ Iwáá mbiʼi rí nixtáa náa tsu̱du̱u̱ Ku̱ba̱ʼ, ndiyóoʼ maʼngo̱o̱ wéñuʼ. Ndiʼyoo má rí muxiyáa ga̱jma̱a̱ rí muni mamínuʼ wéñuʼ (Juan 3:14, 15; Gál. 3:13). Gu̱nʼ wapháá nákha inu makhañúu niʼthí rí nixtáa gíná wéñuʼ (Luc. 12:50). Ga̱jma̱a̱ tikhu mbiʼi wapháá rí inu makhañúu niʼthí: ‹a̱jkiu̱u̱n xtáa ramínuuʼ›. Nandoo nduʼyáá rí ninindxu̱u̱ mbáa xa̱bu̱ wabaaʼ ga̱jma̱a̱ rí naʼnimbo̱o̱ kaʼyoo Anu̱u̱ índo̱ niʼthúu̱n: ‹Anu̱ʼ, atani kriñun náa hora rígi̱. Mú, ikhaa má rúʼko̱ numuu ni̱ʼkhá. Anu̱ʼ, atani kaʼwi̱i̱ mbiʼyaaʼ› (Juan 12:27, 28). Índo̱ ni̱jkha̱nú mbiʼi ikhaa támiñuu ga̱jma̱a̱ nixnáximinaʼ náa inún xa̱bu̱ bi̱ tsíñún guyáá Dios, bi̱ tagáwinʼ a̱jkiún nixiyáa. Maski ajndu xúʼko̱ nigíʼnuu, Jesús tákiʼnáa ga̱jma̱a̱ niʼni rí nandoo Dios. Ikhaa nindxu̱u̱ mbá májánʼ xkri̱da rí nandoo gáʼthúu̱n dí xákiʼnáánʼ maski ajndu naʼni néʼngulú (atraxnuu Isaías 53:7, 10). *

16, 17. a) Xú kaʼnii nini̱ apóstoles mu muni rí makiʼnáa Jesús rá. b) Xú kaʼnii gándoo guʼyaridáá Jesús rá.

¹⁶ Iwáá mbruʼun rí Jesús nixtáa náa tsu̱du̱u̱ Ku̱ba̱ʼ, bi̱ nambáxu̱u̱ gajmíi̱n o apóstoles ndrígóo nini rí makiʼnáa. Gundxaʼwamíjna̱ xú kaʼnii nikumu̱u̱ mbruʼun rúʼko̱. Ikhaa ndiʼyoo rí ga̱jma̱a̱ numuu ikhaa ma̱ndoo makáwíin xa̱bu̱, mú ndayóoʼ mawiji̱ jmbu. Lá maʼngo̱o̱ xá. (Rom. 5:18, 19). Mú rí itháán gíʼdoo numuu rí maguma kaʼwii mbiʼyuu Anu̱u̱ (Job 2:4). Índo̱ ikhaa xtáa raʼniriya̱a̱ʼ iwáá ganitsuwañu gajmíi̱n apóstoles ndrígóo bi̱ nandoo kaʼñún  wéñuʼ. Mú ikhiin ‹nigiʼdu̱u̱n numuu rí nandún mbuyáá tsáa rí ikhiin gíʼdoo itháan numuu›. Ikhaa nixprígún má mbaʼa nuthu ga̱jma̱a̱ numuu rígi̱, ¡xúʼko̱ má niʼni mbruʼun rúʼko̱ ma̱ngaa! Maski ajndu xúʼko̱ Jesús tákiʼnáa kaʼñún. Ikhaa nisngájmun ga̱jma̱a̱ májánʼ ma̱ngaa niʼthúún xú kaʼnii gíʼmaa muni. Nda̱wa̱á nixníi̱n numaaʼ numuu rí niguájun jmbu náa ikhaa (Luc. 22:24-28; Juan 13:1-5, 12-15).

¹⁷ Ndiéjunʼ guʼni ikháanʼ á mu xúʼko̱ kaʼnii eguáʼníí rá. Ma̱ndoo mbuʼyaridáá Jesús rí xákiʼnáanʼlú maski ajndu néʼngulú. Guʼnimbulúʼ ikha rígi̱ rí Jeobá nixnulú “Gaʼngo̱o̱ a̱jkia̱la kuyamíjna̱” (Col. 3:13). Xáʼniulu mingíjyúuʼ muʼni rígi̱ á mu nduʼyáá rí xúgiáanʼ nuʼthá o nuʼni rí maʼni ngawún eʼwíínʼ (Prov. 12:18; Sant. 3:2, 5). Ma̱ngaa májánʼ gáʼni rí muʼthúún eʼwíínʼ rí míjiinʼ xa̱bu̱ ni̱ndxu̱ún (Efes. 4:29).

18. a) Xú kaʼnii embañún Jeobá bi̱ tsíkíʼníin mu muraʼwíí májánʼ rí muni rá. b) Ndiéjunʼ rí gíʼmaa muni ikhiin mu Dios mambáñún xá.

¹⁸ Numuu rí xúʼko̱ muraʼwíí májánʼ rí muʼni. Índo̱ mbaʼyóoʼ muraʼwíí mbá rí mingíjyúuʼ rí muʼni, Jeobá má gambáyulú mú gíʼmaa manindxu̱lúʼ mbáa xa̱bu̱ bi̱ tsíkiʼnáa. Ikhaa naʼthí rí madxawun rí gutajkáan xa̱bu̱ bi̱ xúʼko̱ kaʼniún (Sal. 10:17). Raʼkháa i̱ndó rúʼko̱ gaʼni, náa Biblia naʼthí rí ma̱ngaa maxná ikhúún. Naʼthí: “Ikhaa maʼni rí bi̱ guabaaʼ a̱jkiu̱ún makuwá náa xtángoo rí jmbu ga̱jma̱a̱ maʼsngúún bi̱ guabaaʼ a̱jkiu̱ún náa Kambo̱o̱” (Sal. 25:9). Jeobá naxnúlú ikha rúʼko̱ náa Biblia ga̱jma̱a̱ náa i̱ʼwáʼ i̱yi̱i̱ʼ, * video ga̱jma̱a̱ náa nagimbáanʼ rí naʼni “ñumba tsi jmbi, tsi majan indxaʼhuaminaʼ” (Mat. 24:45-47). Mu gíʼmaa manindxu̱lúʼ xa̱bu̱ wabaʼ ga̱jma̱a̱ mbuʼyáá rí ndaʼyulú rí mixtambáyulú, muʼnigajmaa rí Jeobá naxnúlú ga̱jma̱a̱ muʼnimbulúʼ ga̱jma̱a̱ xúgíʼ a̱jkiu̱lú dí najmañulúʼ.

19-21. a) Ndiéjunʼ rí nikiéʼkhun Moisés náa Qadés rá. b) Ndiéjunʼ ejmañuluʼ rí nigíʼnuu xá.

¹⁹ Numuu rí xúʼko̱ xakiéʼkulú wéñuʼ. Gundxaʼwamíjna̱ mbu̱júu̱ ga̱jma̱a̱ numuu Moisés. Mbayuuʼ tsiguʼ ninindxu̱u̱ mbáa xa̱bu̱ bi̱ tsíkiʼnáa ga̱jma̱a̱ niʼni rí nandoo Jeobá. Mú, índo̱ niguámbá rí a̱jma̱ skiñúnʼ tsiguʼ rí nigún israelitas náa ku̱ba̱ʼ mixooʼ, Moisés nikiʼnáa. Ndxájuu dxáʼgú bi̱ nimbáyúu mu makríyaʼ náa Egipto, nikháñuu ga̱jma̱a̱ nijuaʼdi̱i̱ náa Qadés. Ikhú Israelitas nigíʼdi̱i̱ nixieʼkhá mbu̱júu̱ ga̱jma̱a̱ numuu rí na̱nguá guáʼdáá rí ndañúunʼ.  Náa Biblia naʼthí rí ‹xa̱bu̱ xuajen nigíʼdi̱i̱ nixieʼkhá náa Moisés› numuu rí nda̱a̱ iyaʼ. Maski ajndu Jeobá nijmiuu Moisés mu maʼni mbaʼa milagro ga̱jma̱a̱ rí mbayuuʼ tsiguʼ ninindxu̱u̱ mbáa bi̱ nayéjkha̱ edxu̱u̱, ikhiin nuxieʼkhá má xúʼko̱. Ma̱ngaa asndu nini rí xóo Moisés gíʼdoo aʼkhúun rí nda̱a̱ iyaʼ (Núm. 20:1-5, 9-11).

²⁰ Mbiʼi rúʼko̱ Moisés nikiʼnáa wéñuʼ. Ikhaa táʼthi xóo má Jeobá niʼthúu̱n maʼthí, rí phú niʼni, ga̱jma̱a̱ sia̱nʼ niʼthúún israelitas ga̱jma̱a̱ niʼthí rí ikhaa maʼni mbá milagro. Ikhú, nixnúu a̱jma̱ nuthu itsí, ikhú nigájnuu mba̱ji̱nʼ iyaʼ. Rí nikuxi̱minaʼ ga̱jma̱a̱ rí nikásgañu̱u̱ʼ niʼni rí makiéʼkhun (Sal. 106:32, 33). Ga̱jma̱a̱ numuu rí mbá chiʼgíiʼ rí nikiéʼkhun, Jeobá tániñuuʼ mato̱ʼo̱o̱ náa Ku̱ba̱ʼ rí nijuiʼthá makhánun (Núm. 20:12).

²¹ Xú káʼnii ikha rí gíʼdoo numuu ejmañuluʼ rí nigíʼnuu Moisés rá. Timbá, rí gíʼmaa muni mbá tsiakii mu manindxu̱lúʼ ma xúʼko̱ mbáa xa̱bu̱ bi̱ tséjmangu̱u̱ʼ. Á mu tséñaʼwamíjnalú maski ajndu mbá chiʼgíiʼ, rí muʼni mbaʼwumíjnalúʼ maʼni rí muʼthá o muʼni mbá rí rakáʼyoo. Raga̱jma̱, rí maʼni néʼngulú maʼni rí makawabáánʼ, ikha jngó guʼni míjna má xúʼko̱ mu manindxu̱lúʼ mbáa xa̱bu̱ bi̱ tséjmangu̱u̱ʼ tséʼniuu má xóo kuwáanʼ.

22, 23. a) Ndíjkha rí ndayóoʼ muʼni míjna manindxu̱lúʼ má xúʼko̱ mbáa xa̱bu̱ bi̱ tséjmangu̱u̱ʼ rá. b) Ndiéjunʼ eʼthí náa ajngáa ndrígóo Sofonías 2:3 rá.

²² Numuu rí xúʼko̱ maxtie̱wulú. Nánguá má mbayuuʼ guanuu rí Jeobá maʼni gámbíin xúgínʼ xa̱bu̱ bi̱ nuni dí raʼkhí ga̱jma̱a̱ i̱ndó maniñúnʼ makuwíin xa̱bu̱ bi̱ tséjmangu̱u̱ʼ o xa̱bu̱ míjiinʼ. Ikhú náa numbaaʼ marigá dí tsímáá (Sal. 37:10, 11). Lá makuwáánʼ ikháanʼ náa majñúnʼ xa̱bu̱ bi̱ makuwá ikhí ráʼ. Ma̱ndoo makuwáanʼ á mu nuʼni rí Jeobá na̱ndu̱ʼu̱lú muʼni (atraxnuu Sofonías 2:3). *

²³ Náa numuu rí náa Sofonías 2:3 naʼthí rí “mbáa maguma káwáanʼ” rá. Lá rúʼko̱ nandoo gaʼthí rí Jeobá xáʼngo̱o̱ mañewu̱u̱n xa̱bi̱i̱ bi̱ nunimíjna̱ muni rí nandoo ikhaa xá. Na̱nguá. Rígi̱ nandoo gaʼthí rí ikháanʼ mangáanʼ ndayóoʼ muʼni míjna. Ma̱ndoo makáwáanʼ náa “mbiʼi rí makiʼnáa Jeobá” ga̱jma̱a̱ makuwáanʼ kámuu mbiʼi á mu nuʼni míjna manindxu̱lúʼ mbáa xa̱bu̱ bi̱ tséjmangu̱u̱ʼ ga̱jma̱a̱ muʼni rí nandoo Jeobá.