Xú káʼnii gátani mu mambáyaʼ ga̱jma̱a̱ mu manigua̱ʼ rí matanigajmaa Biblia rá.

ATADXUN NÁA AJNGÁA

JOSUÉ ndiyóoʼ maraʼnuu mbá xkujndu mingíjyúuʼ: Rí mbayá ikhúún xa̱bu̱ Israel náa ku̱ba̱ʼ rí nijuiʼthá mixnún. Mu maxkamaa rígi̱ ndiyóoʼ maʼngo̱o̱ maraʼnuu xkujndu gakhi̱i̱. Mú Jeobá má niʼthúu̱n rí magajnúu májánʼ dí gaʼni ga̱jma̱a̱ nixnúu tsiakii mu xámiñuu ga̱jma̱a̱ rí gaʼngo̱o̱. Niʼthúu̱n rí maʼnimbo̱o̱ xtángoo ndrígóo ga̱jma̱a̱ rí maguxnuu tsejtsí mbiʼi mu maʼngo̱o̱ maʼnimbánuu ga̱jma̱a̱ tsu̱ma̱ xúgíʼ rí naʼthí ikhí. Ga̱jma̱a̱ niʼthúu̱n rí á mu naʼni, maxtáa májánʼ ga̱jma̱a̱ majmañuu maʼni (Jos. 1:7, 8).

Náa “mbiʼi gakhi̱i̱” rígi̱ “ga̱jma̱a̱ maʼni mingíjyúuʼ makuwáanʼ”, mangáanʼ mbaʼyóoʼ muraʼníí mbaʼa xkujndu rí itháan mingíjyúuʼ (2 Tim. 3:1). Ikháanʼ mangáanʼ makuwáanʼ májánʼ á mu nuʼni rí Jeobá niʼthúu̱n Josué. Rí muraxnuu Biblia tsejtsí mbiʼi mambáyulúʼ, índo̱ guraʼníí xkujndu ikha ndrígóo gambáyulú.

Ikha jngó, guʼyáá rí mbaʼánʼ dí ikháanʼlu naʼniulú mingíjyúuʼ ga̱jma̱a̱ tikuáanʼ tsénigulú rí muʼnigajmaa. Mú, rí muʼnigajmaa Biblia gíʼdoo wéñuʼ numuu, májánʼ gáʼni rí mbuʼyáá rí naʼthí náa “ atagíʼ matani rígi̱”. Ikhí ma̱ndoo mataxkamaa mbaʼa rí májánʼ rí mambáyaʼ mu manigua̱ʼ matanigajmaa itháan Biblia.

Mbáa salmista niʼni ajmúú: “Maʼgá náa kamba̱a̱ʼ rí naratañájunʼ numuu rí ikhí naʼni̱i̱ a̱jkiu̱nʼ” (Sal. 119:35). Ikháánʼ mangáán ma̱ndoo manigua̱ʼ índo̱ gatanigajmaa Ajngá rawunʼ Dios. Mataxkamaa mbaʼa rí gíʼdoo numuu índo̱ gídxúʼ ratatsinuuʼ májánʼ.

Maski ajndu ikháánʼ xáʼyóoʼ maraxna ikha náa mbá xuajen, xóo ndiyóoʼ maʼni Josué, mu mbaʼyóoʼ matraʼníí xkujndu ndrígáʼ. Ikha jngó, xó má Josué, atanigajmaa̱ rí nigumaraʼmáʼ mu mambáyaʼ ga̱jma̱a̱ atagíʼ matani. Á mu natanimbaníí magajnáaʼ májánʼ ga̱jma̱a̱ majmañaaʼ matani rí májánʼ.

ATAGÍʼ MATANI RÍGI̱

Aratájkáan índo̱ inuu matagíʼdi̱i̱ matanigajmaa. Náa Biblia na̱ʼkha̱ ku̱ma̱ ndrígóo Dios bi̱ gíʼdoo xúgíʼ tsiakii, ikhaa má niʼni rí magumaraʼmáʼ mu mambáyulúʼ. Ikha jngó, índo̱ gátra̱xnuu atanda̱ʼa̱a̱ Dios rí mambáyaʼ makruaʼaʼ, marmáʼáan a̱jkia̱nʼ ga̱jma̱a̱ mataʼgíʼ matani rí gátra̱xnuu (Esd. 7:10).
Atraxi̱mínáʼ. Índo̱ xtaa ratraxnuu Biblia o i̱yi̱i̱ʼ rí nagájnuu náa Biblia, atraxi̱mínáʼ: “Ndiéjunʼ eʼsngóʼ ga̱jma̱a̱ numuu Jeobá rí niguámboʼ nigúxnuu rá. Xú káʼnii kagujtuminaʼ ga̱jma̱a̱ rí phú e̱ʼkha̱ raʼthí náa Biblia rá. Xú káʼnii gándoo majmuʼ versículos rígi̱ mu mambáñún eʼwíínʼ rá.”
Atatsaʼwáminaʼ rí xtaa ratanigajmaa. Índo̱ xtaa ratraxnuu, añajún mbégu̱ʼ ga̱jma̱a̱ atatsaʼwáminaʼ: “Xú eʼni maku̱mu̱ʼ rí naʼthí gi̱i̱ rá. Ndíjkha jngó eʼni maku̱mu̱ʼ xúgi̱ rá. Xú káʼnii embánii ga̱jma̱a̱ rí xóo nixtáá, xóo xtáá xúgi̱ ga̱jma̱a̱ rí xóo gáxtáá nda̱wa̱á rá. Xú gándoo gáʼgíʼ manimbánuu xtágabu rígi̱ ga̱jma̱a̱ ikha ndrígóo Biblia náa vida ndrígóʼ rá.” (Job 23:5; Sal. 49:3.) Atatsaʼwáminaʼ á mu najmañaʼ marata̱ náa numuu rí Jeobá naʼthúu̱n xuajñu rí rígá dí gíʼmaa maʼni gaʼduunʼ ga̱jma̱a̱ ndiéjunʼ gárígá á mu tséʼnimbánuu xtágabu ndrígóo (Deut. 32:28, 29).
Gajmaaʼ rí matatsaʼwamínáʼ índo̱ gátra̱xnuu relatos ndrígóo Biblia. Mbá xkri̱da, lá natatsaʼwáminaʼ ga̱jma̱a̱ numún a̱ngui̱i̱n José índo̱ nigujua̱a̱ náa ñawúunʼ ismaelitas ráʼ. (Gén. 37:18-28.) Ndiéjunʼ tayáá rá. Ndiéjunʼ tadxawíín rá. Ndiéjunʼ yeyaaʼ rá. Atani rí xóo ikháánʼ nindxa̱a̱ʼ mbáa rí ikhiin. Atraxi̱mínáʼ: “Ndiéjunʼ endxaʼwamíjna̱ xá. Ndiéjunʼ ekumún xá.” Rí matatsaʼwamínáʼ xúʼko̱ maʼni dí natraxnuu magiʼdoo numuu, ga̱jma̱a̱ mambáyaʼ ikháánʼ rí xtaa ratanigajmaa.
Gajmaaʼ rí najmaa mu matanigajmaa rí kiʼni mu ma̱ta̱ya̱a̱ itháan. Atatsinuuʼ xúgíʼ dí rígá náa ajngáaʼ, xóo má dí rígá náa internet ga̱jma̱a̱ dí rígá má i̱yi̱i̱ʼ. Atanda̱ʼa̱ rí mu̱mba̱yáaʼ eʼwíínʼ mu majmañaaʼ majmaʼ májánʼ. Mbá xkri̱da, náa Ikha rí munigajmaa xa̱bi̱i̱ Jeobá mataxkamaa mbaʼa temas mixtiʼkhu ga̱jma̱a̱ mbaʼa versículos ndrígóo Biblia. Ma̱ngaa náa folleto Mambáyulúʼ muʼnigajmaa Ajngá rawunʼ Dios, náa mataxkamaa ga̱jma̱a̱ numuu xú káʼnii nindxu̱u̱ ku̱ba̱ʼ, náa tsiguʼ nirígá, mbújkha̱a̱ ga̱jma̱a̱ awan, ga̱jma̱a̱ i̱ʼwáʼ.
Ataniraʼmáʼ rí itháan gíʼdoo numuu. Rúʼko̱ gambayaaʼ mu marmáʼáan a̱jkia̱nʼ rí nijmañaaʼ náa nitanigajmaa. Mú itháan májánʼ gáʼni rí marathu̱u̱n eʼwíínʼ rí nijmañaaʼ. Atatsaʼwáminaʼ: “Lá ma̱ndoo majmuʼ rígi̱ náa mataráʼa ráʼ.” Xúgíʼ rígi̱ ma̱ndoo mambáyaʼ mu marmáʼáan a̱jkia̱nʼ rí gíʼdoo itháan numuu, ga̱jma̱a̱ ma̱ndoo majmaʼ rí nijmañaaʼ mu matambáñun eʼwíínʼ.