1. Ndiéjunʼ niguaʼnii cristianos bi̱ nikuwa nákha siglo timbá rá.

NÁKHA tsiguʼ 62 ga̱jma̱a̱ 64, apóstol Pedro niʼnirámáʼ náa “bi̱ kuwa mbá xngaa bi̱ nijuadríʼiin náa Ponto, Galacia, Capadocia, Asia ga̱jma̱a̱ Bitinia” (1 Ped. 1:1). A̱ngiu̱lú buʼko̱ naguwáʼ mixtiʼkhu xuajen. Nda̱ñúnʼ tsiakii ga̱jma̱a̱ ikha numuu rí nuraʼníí rí Pedro nixná mbiʼyuu mbá ‹aguʼ›, xóo muʼthá, rí majuixkhúún. Ma̱ngaa nikuwa náa tsiguʼ rí migamíi wéñuʼ. Apóstol Pedro niʼnirámáʼ: “Inu mambáa xúgíʼ dí rígá”. Mbiʼi rígi̱ ni̱ʼkha̱nú asndu táʼni gu̱wa̱ʼ tsiguʼ nda̱wa̱á índo̱ Jerusalén niguma gámbáa. Ndiéjunʼ gambáñun cristianos náa tsiguʼ gakhi̱i̱ rúʼko̱ rá. (1 Ped. 4:4, 7, 12.)

2, 3. Náa numuu rí Pedro nixnúún xtágabu cristianos rí mundrígúun a̱ngiu̱lú rá. (Atayáá timbá xtiʼkhu.)

² Pedro nixnúún xtágabu cristianos: “Gundrígúun májánʼ eʼwíínʼ” (1 Ped. 4:9). Náa ajngáa griego, ajngáa rí mundrígúun eʼwíínʼ nandoo gáʼthi rí “maʼndulú kuʼñúún o manindxu̱lúʼ májánʼ a̱jkiu̱lú gajmiúlú bi̱ tsiniʼnuʼ”. Mú guʼyáá rí niʼthún apóstol Pablo rí gíʼmaa mundrígúun “eʼwíínʼ”, xóo muʼthá bi̱ nuniʼnuʼ ga̱jma̱a̱ bi̱ nambáxu̱u̱n. Mú xú káʼnii gambáñun munimbaníí xtágabu rígi̱ xá.

³ Mambáñun mu makuwá mbá kambáxu̱u̱n. Gundxaʼwamíjna̱  ga̱jma̱a̱ numulúʼ ikháanʼ. Índo̱ mbáa ndxájulú niʼthúluʼ mu̱ʼgua̱ náa goʼwóo, lá ragájkhun rí narmáʼáan a̱jkiu̱lú mbiʼi rúʼko̱ ráʼ. Ga̱jma̱a̱ índo̱ niʼtháán mbáa ndxájulú ma̱ʼkha̱ guʼwúlú, lá ragájkhun rí xúgi̱ nambáxulúʼ májánʼ gajmiúlú xáʼ. Rí mundrígúun eʼwíínʼ naʼni rí muniʼnuʼ itháan májánʼ a̱ngiu̱lú. Nákha mbiʼi rí nixtáa Pedro niʼni itháan gakhi̱i̱ ikha jngó ndiyóoʼ rí cristianos makuwa kambáxu̱u̱n. Ikháá má kayúʼ eguaʼnii mangáanʼ náa “iwáá mbiʼi” rígi̱ (2 Tim. 3:1).

4. Ndiéjunʼ graxe̱ gúriʼña̱a̱ náa artículo rígi̱ rá.

⁴ Nguánáa gándoo mundríguíin “eʼwíínʼ” rá. Xú káʼnii gándoo gúni gaʼduunʼ rí narikulú mu mundrígúun eʼwíínʼ rá. Xú káʼnii gándoo gúʼni índo̱ mbáa naʼthúlúʼ mu̱ʼgua̱ náa goʼwóo rá.

5. Xú káʼnii gándoo gundrígúun xa̱bu̱ náa reunión rá.

⁵ Índo̱ kuwáanʼ náa nagimbáanʼ. Jeobá ga̱jma̱a̱ xuajñu nuthulú mu̱ʼgua̱ náa reunión. Ga̱jma̱a̱ ikháanʼ nandulúʼ rí xúgínʼ bi̱ nagún náa Guʼwá náa nagimbáanʼ makumún rí kuwa májánʼ (Rom. 15:7). Rígi̱ gíʼdoo wéñuʼ numuu índo̱ mbáa na̱ʼkha̱ timbá aʼphu̱. Jeobá ma̱ngaa niʼthúu̱n ma̱ʼkha̱, ikha jngó gíʼmaa muríguíi májánʼ. Tséʼniuu asndu xú káʼnii kujmaa o xóo gíʼ xtíñuu (Sant. 2:1-4). Á mu nduʼyáá rí nimbáa ndxájulú tsígi̱ʼi̱ ga̱jma̱a̱, lá ma̱ndoo muʼthán rí muguaʼwún gajmiúlú xáʼ. Mbáa ikhaa maʼndoo mumbáyii mu maʼga̱ raʼyoo i̱yi̱i̱ʼ ga̱jma̱a̱ mbayáaʼ textos rí na̱ʼkha̱ náa Biblia. Rígi̱ nindxu̱u̱ mbá rí xóo muʼnimbulúʼ xtágabu rígi̱: “Guʼgua̱ náa kambu̱ún bi̱ nundrigúun eʼwíínʼ” (Rom. 12:13).

6. Tsíin phú gúʼthún magún náa guʼwúlú rá.

⁶ Índo̱ nuʼtháán mbáa maʼga̱ gakuiʼtsu o maga̱a̱n rí gúxnáá. Nákha wajyúúʼ naguʼwún rí xa̱bu̱ nuthúún eʼwíínʼ mu magún guphiʼtsu náa guʼwún mu musngajma rí nandún makuwá tsímáá gajmiún ga̱jma̱a̱ mambaxúún gajmiún (Gén. 18:1-8; Juec. 13:15; Luc. 24:28-30). Ikháanʼ rá. Tsíin gúʼthún maguwáʼ náa guʼwúlú rá. A̱ngiu̱lú bi̱ kuwa náa congregación ndrígúlú. Ikhiin kuwa tsejtsí mbiʼi gajmiúlú. Ndayúlú muguaʼdiin bi̱ mambaxúlúʼ gajmiúlú bi̱ ni̱ndxu̱ún jmbiin ga̱jma̱a̱ mambaxúlúʼ májánʼ gajmiúlú xúgínʼ ikhiin numuu rí índo̱ gáʼni iwáá mbiʼi majmañulúʼ náa eʼwíínʼ. Nákha tsiguʼ 2011, Cuerpo Gobernante niʼthí rí magi̱ʼdu̱u̱ wapháá rí muʼnigajmaa Bi̱ Nayejngoo bi̱ kuwa náa Betel náa Estados Unidos. Nákha ginii narígá a las 6:45 nda̱wa̱á nirígá a las 6:15 rí wakhííʼ. Náa numuu rá. Xó má niʼthí náa anuncio rí xúʼko̱ gáʼni rí itháan betelitas mambaxúún gajmiún eʼwíínʼ bi̱ kuwa má náa Betel índo̱ gájngoo reunión. Náa i̱ʼwáʼ sucursal nini ikháá kayúʼ. Ga̱jma̱a̱ numuu rígi̱ bi̱ kuwa náa Betel kuwa itháan kambáxu̱u̱n.

7, 8. Xú káʼnii gándoo gundrígúun a̱ngiu̱lú bi̱ naguwáʼ guxna discurso náa Guʼwá nagimbáanʼ rá.

⁷ Índo̱ naguwáʼ guxna discurso náa Guʼwá nagimbáanʼ a̱ngiu̱lú bi̱ kuwa náa i̱ʼwáʼ congregación xóo superintendente de circuito mangiin bi̱ naguwáʼ náa sucursal. Gi̱i̱ ma̱ndoo mundrígúun a̱ngiu̱lú (atraxnuu 3 Juan 5-8). * Mbáa rí xóo ma̱ndoo muʼni muʼthúún rí magún guphiʼtsu gajmiúlú o muwa̱a̱n rí gúxnúún. Náa numuu rí tséʼni xúʼko̱ mangáanʼ rá.

⁸ Mbáa ndxájulú a̱ʼgu̱ bi̱ xtáa náa Estados Unidos narmáʼáan a̱jkiu̱u̱n: “Mba̱yu̱ʼ tsiguʼ ajmbioʼ ga̱jmu̱ʼ ikhúúnʼ nuthu̱u̱nxu maguwáʼ mbaʼin a̱ngiu̱lú bi̱ nuxna discurso gajmiún guʼñún. Nakúwáanʼxu má xúʼko̱ gagi ga̱jma̱a̱ naʼni mumbaxúxu itháan májánʼ gajmiúxu̱ Dios. Nditháan tsigáwiinʼ a̱jkiu̱xuʼ rí nundrígúun a̱ngiu̱lú”.

9, 10. a) Tsíin gáʼyóóʼ muxnún náa makuwá mba̱yu̱ʼ rá. b) Lá ma̱ndoo mundrígúun a̱ngiu̱lú bi̱ guáʼdáá guʼwá ma̱jkha̱ʼ ga̱jma̱a̱ na̱nguá májánʼ ráʼ. Araxná mbá xkri̱da.

⁹ Bi̱ naguanún mba̱yu̱ʼ. Nákha wajyúúʼ  mbaʼin xa̱bu̱ nundrigúun bi̱ nuniʼnuʼ náa guʼwún (Job 31:32; Filem. 22). Ma̱ngaa rí mbiʼi xúgi̱ ndayóoʼ muʼnilú. Mbá xkri̱da, superintendentes de circuito ndañúnʼ náa maguanún. Ma̱ngaa bi̱ nagún náa majuiʼsngúún ga̱jma̱a̱ numuu Biblia ga̱jma̱a̱ bi̱ nuyambáá náa naguma guʼwá. Ma̱ngaa índo̱ narígá gamiéjunʼ tikhun a̱ngiu̱lú nda̱ñúnʼ náa maguanún asndu índo̱ gáguma̱a̱ guʼwún. Xundxa̱ʼwa̱míjna̱ rí i̱ndó bi̱ guáʼdáá guʼwá mba̱ʼu̱ ga̱jma̱a̱ májánʼ ma̱ndoo muxnún náa maguanún. Mbáa asndu niʼni má mbaʼa nuthu rí nuni rígi̱. Lá ma̱ndoo muʼni mangáanʼ maski ajndu na̱nguá kuaʼdáá guʼwá mba̱ʼu̱ ga̱jma̱a̱ májánʼ ráʼ.

¹⁰ Mbáa ndxájulú bi̱ xtáa náa Corea del Sur narmáʼáan a̱jkiu̱u̱n rí náa goʼwóo niguanún tikhun bi̱ nijuiʼsngúún ga̱jma̱a̱ numuu Biblia. Ikhaa niʼnirámáʼ: “Nákha ginii a̱jma̱ a̱jkiu̱nʼ nini numuu rí ndiʼkhún nidamíjnaxu ga̱jma̱a̱ kúwáanʼxu náa mbá guʼwá chíʼgíʼ. Mú mitsaan ninindxu̱u̱ rí niguwáʼ náa guʼwúxu bi̱ nijuiʼsngúún. Ndiya̱a̱xu rí kuwa gagi bi̱ nidamijná índo̱ nuni ñajunʼ Jeobá mbá kambáxu̱u̱n ga̱jma̱a̱ nuñajunʼ mbóó mu muni itháan ñajunʼ Dios”.

11. Náa numuu ndayóoʼ mundrígúun a̱ngiu̱lú bi̱ naguwáʼ gakuwa náa congregación ndrígúlú rá.

¹¹ Índo̱ a̱ngiu̱lú naguwáʼ náa congregación ndrígúlú. Mbáa naguwáʼ gakuwa náa xuajñulú mu mumbayúlú mutaraʼa o ni̱ndxu̱ún precursores bi̱ nixuʼmiin náa congregación ndrígúlú. Índo̱ ndiʼkhún guaʼnu naʼniún mingíjyúuʼ maguʼwún náa i̱mba̱ nuxi̱ʼ xuajen, congregación o náa nuthi i̱mba̱ ajngáa ga̱jma̱a̱ mixtiʼkhu xóo kuwa. Rí muʼthúún magún guphiʼtsu gajmiúlú o muʼthúún muwa̱a̱n mbá rí nuxnún, o rí magajnúlu mu̱ʼgua̱ gajmiúlú mambáyulúʼ mambaxúlúʼ gajmiúlú ga̱jma̱a̱ rí maguʼwún makuwa náa nuxuʼmiin.

12. Xú káʼnii experiencia nasngájma rí mundrígúun a̱ngiu̱lú tséyóoʼ muʼni májánʼ mbá ganitsu rí minumuu wéñuʼ rá.

¹² Mu mundrígúun a̱ngiu̱lú tséyóoʼ muʼni májánʼ ganitsu rí itháan minumuu (atraxnuu Lucas 10:41, 42). Mbáa ndxájulú narmáʼáan a̱jkiu̱u̱n rí índo̱ ikhaa ga̱jma̱a̱ a̱ʼgiu̱u̱ nigíʼdi̱i̱ niyambáá xóo misioneros, kaʼnííʼ xóó tikhuu xa̱bu̱ ga̱jma̱a̱ kuwa gíná. Ikhaa naʼthí: “Mbá wakhííʼ, a̱ʼgiu̱ʼ xtáa gíná wéñuʼ ga̱jma̱a̱ ikhúúnʼ tájmúún gámbáyúu mu maʼdxuu. Ikhú, xóo a las 7:30, nidi̱i̱ xkruguxu. Nindxu̱u̱ mbáa bi̱ naʼnigajmaa Biblia ga̱jma̱a̱ kagu̱ ajtsú láxá ga̱jma̱a̱ nindoo magruiguáanʼxu. Nitha̱a̱nxu manújngoo ga̱jma̱a̱ nixna̱a̱xu mbá vaso iyaʼ nda̱wa̱á ninixu té ga̱jma̱a̱ chocolate. Ikháanʼxu xóó tséjmañuxu mutha ajngáa suajili, ga̱jma̱a̱ ikhaa tséjmañuu maʼthí ajngúxuʼ. Mú, asndu nákha mbiʼi rúʼko̱, nigíʼdi̱i̱ nimbáxuxu gajmiúxu̱ a̱ngiu̱lú bi̱ kuwa ikhí ga̱jma̱a̱ nikúwáanʼxu itháan gagi”.

13. Náa numuu rí májánʼ nindxu̱u̱ rí mundrígúun a̱ngiu̱lú rá.

¹³ Lá naʼniulú mingíjyúuʼ mundrígúun a̱ngiu̱lú ráʼ. Á mu xúʼko̱ kaʼnii, mbáa nguáná nindáti̱gu̱lú rí mambaxúlúʼ májánʼ gajmiúlú eʼwíínʼ ga̱jma̱a̱ rí mambaxúlúʼ gajmiúlú asndu kámuu. Rí mundrígúun a̱ngiu̱lú mayambáá mu xákumulu rí kuwáanʼ ndajkuáanʼ. Mú, ndiéjunʼ gándoo gáʼni rí mbáa xagruigúun a̱ngiu̱lú rá. Guʼyáá mbaʼa enii rí narikulú.

14. Á mu ndayóoʼ mbiʼi ga̱jma̱a̱ tsiakii mu mundrígúun a̱ngiu̱lú o mu̱ʼgua̱ náa guʼwún, ndiéjunʼ gándoo muʼni rá.

¹⁴ Mbiʼi ga̱jma̱a̱ tsiakii rí kuaʼdáá. Bi̱ ni̱ndxu̱lú xa̱bi̱i̱ Jeobá kuaʼdáá wéñuʼ rí muʼni ga̱jma̱a̱ gajkuáa mbaʼa ñajunʼ ñawúnlú. Ikha jngó, tikhun nakumu̱ún rí na̱nguá guáʼdáá mbiʼi ga̱jma̱a̱ tsiakii mu mundrígúun a̱ngiu̱lú. Á mu nundxa̱ʼwa̱míjna̱ xúʼko̱ mbáa mbaʼyóoʼ muríyaʼ májánʼ mbiʼi. Lá ma̱ndoo mbuʼyáá tikhuu rí ndayóoʼ muriʼkhu̱u̱ mu muguaʼdáá itháan mbiʼi ga̱jma̱a̱ tsiakii mu mundrígúun a̱ngiu̱lú o mu̱ʼgua̱ náa guʼwún índo̱ nutulúʼ xáʼ. Náa Biblia naʼthúlúʼ rí xágumulúʼ rí gíʼmaa mundrígúun  a̱ngiu̱lú (Heb. 13:2). Rí muríyaʼ mbiʼi mu makuwáanʼ gajmiúlú a̱ngiu̱lú nindxu̱u̱ májánʼ. Ikha jngó mbaʼyóoʼ muniʼñáʼ ru̱ʼni̱ rí ragíʼdoo wéñuʼ numuu.

15. Náa numuu ma̱ndoo mundxaʼwamíjna̱ rí xándoo gundrígúun a̱ngiu̱lú rá.

¹⁵ Rí nakumulú. Lá nindulúʼ mundrígúun a̱ngiu̱lú mbá miʼtsú mu nikumulú rí xájmáanʼ muʼni ráʼ. Mbáa nati̱yu̱lú o namíñulú numuu rí tséʼyáá ndiéjunʼ gúʼthá ga̱jma̱a̱ bi̱ gaguwáʼ náa guʼwúlú maʼskhún. O mbáa na̱nguá kuaʼdáá wéñuʼ mbújkha̱a̱ ga̱jma̱a̱ makumulúʼ rí xándoo gúxnún ikhaa kayúʼ xóo exnún eʼwíínʼ a̱ngiu̱lú bi̱ kuwa náa congregación. Mú gíʼmaa marmáʼáan a̱jkiu̱lú rí tséyóoʼ má mani̱ndxu̱u̱ mbá guʼwá májánʼ. Rí itháan gíʼdoo numuu rí mani̱ndxu̱u̱ kaʼwu ga̱jma̱a̱ tsímáá bi̱ gáguwáʼ náa guʼwúlú.

16, 17. Ndiéjunʼ gambáyulú á mu naxmiéjunlú mundrígúun a̱ngiu̱lú rá.

¹⁶ Á mu naxmiéjunlú rí mundrígúun a̱ngiu̱lú, raʼkháa i̱ndó ikháanʼ kumulú xúʼko̱. Mbáa bi̱ kayá edxu̱u̱ bi̱ xtáa náa Gran Bretaña naʼthí: “Rí muʼniratamijná mu mundrígúun a̱ngiu̱lú ma̱ndoo makumulúʼ rí namíñulú. Mú, xó má rígá náa xúgíʼ ñajunʼ ndrígóo Jeobá, rí xóo nayambáá ga̱jma̱a̱ rí naʼni makuwáanʼ tsímáá nindxu̱u̱ itháan májánʼ ki xóo rí naxmiéjunlú. Tsímáá xtáá gajmíi̱nʼ a̱ngiu̱lú índo̱ nawánxu café ga̱jma̱a̱ nutamíjnaxu”. Garmáʼáan a̱jkiu̱lú rí maxmiéjunʼlú kuʼñúún bi̱ naguwáʼ gúyulú náa guʼwúlú (Filip. 2:4). Mbaʼin xa̱bu̱ nanigu̱nʼ muthi xú káʼnii nikuwa nákha ginii. Ga̱jma̱a̱ májánʼ rí muʼdxawún índo̱ kuwáanʼ mbá kambáxulú gajmiúlú. Imba̱a̱ bi̱ kayá edxu̱u̱ naʼnirámáʼ: “Rí magúʼdiin a̱ngiu̱lú náa goʼwóʼ nambáyúʼ makro̱ʼo̱ʼ itháan májánʼ xú káʼnii kuwa ga̱jma̱a̱ naniʼnún itháan májánʼ, mu itháan xú káʼnii niniʼnuʼ rí gajkhun”. Á mu naxmiéjunlú kuʼñúún bi̱ naguwáʼ náa guʼwúlú, ma̱ndoo makuwáanʼ tsímáá gajmiúlú.

¹⁷ Mbáa precursora bi̱ naxnún náa makuwá bi̱ najuiʼsngúún ga̱jma̱a̱ numuu Biblia niʼthí: “Nákha ginii nixmiéjunʼ wéñuʼ numuu rí na̱nguá májánʼ goʼwóoʼ ga̱jma̱a̱ gúʼdoo muebles rí wayuu. Mú a̱ʼgiu̱u̱ mbáa ndxájulú bi̱ naʼsngáa niʼni maʼni̱i̱ a̱jkiu̱nʼ. Niʼthúnʼ rí ikhaa ga̱jma̱a̱ a̱ʼgiu̱u̱ ni̱ndxu̱ún circuito, itháan tsímáá gajmiún a̱ngiu̱lú bi̱ nambáxu̱u̱n májánʼ gajmiún Dios ga̱jma̱a̱ na̱nguá guáʼdáá wéñuʼ mbújkha̱a̱ mú xó má ikhiin, nagíminaʼ maʼni ñajunʼ Jeobá ga̱jma̱a̱ xágiʼdoo wéñuʼ. Rígi̱ niʼni marmáʼáan a̱jkiu̱nʼ rí niʼthúxu ru̱dúxu nákha majkiáanʼxu: ‹Itháan májánʼ mbá xúbá yaʼwu náa nandún kuyamijná›” (Prov. 15:17). Ragíʼmaa maxmiéjunʼlú, numuu rí itháan gíʼdoo numuu rí musngajmúún rí nandulúʼ kuʼñúún bi̱ naguwáʼ gúyulu.

18, 19. Xú káʼnii gambáyulú rí mundrígúun a̱ngiu̱lú mu mambaxúlúʼ itháan májánʼ gajmiúlú xá.

¹⁸ Rí xóo eʼñún eʼwíínʼ. Lá xtáa mbáa ndxájulú náa congregación bi̱ tsénigulú xóo nindxu̱u̱ xáʼ. Mbáa xáʼndulú muʼtháán maʼga̱ náa guʼwúlú mbáa ndxájulú bi̱ tsénigulú xóo xa̱bu̱ nindxu̱u̱ o niʼniulúʼ mbá dí ra̱májánʼ nákha ginii rí tsíyoo gágumulu. Á mu nda̱a̱ rí eʼni, rí nakumulú náa xa̱bu̱ buʼko̱ xáʼga̱nú maxtiʼkhuu.

¹⁹ Náa Biblia naʼthí rí mundrígúun a̱ngiu̱lú náa guʼwúlú mambáyulúʼ mambaxúlúʼ májánʼ gajmiúlú eʼwíínʼ mu itháan bi̱ nakiʼníin kuyulúʼ (atraxnuu Proverbios 25:21, 22). * Rí muʼtháán mbáa ndxájulú maʼga̱ náa guʼwúlú maʼni rí maʼga̱ ragumulu xkujndu rí niguáʼdáálu ga̱jma̱a̱ mambaxúlúʼ májánʼ gajmiúlú. Ma̱ngaa, mugíʼdi̱i̱ mbuʼyáá rí Jeobá ndiʼyoo xú káʼnii nindxu̱u̱ ikhaa índo̱ ni̱ʼkha̱ kayáa náa rí gajkhun (Juan 6:44). Índo̱ rí nandulúʼ kuʼñúún eʼwíínʼ naxkaxáanʼ muʼthúún bi̱ tsiguaʼthi̱i̱n, maʼni rí mambaxúlúʼ itháan májánʼ gajmiúlú. Xú káʼnii gándoo gúʼyáá á mu rí nandulúʼ kuʼyáá naxkaxáanʼ muʼni rígi̱ rá. Mbá nindxu̱u̱ rí muʼgíʼ  muʼnimbánii xtágabu rí na̱ʼkha̱ náa Filipenses 2:3, náa naʼthí rí gíʼmaa manindxu̱lúʼ xa̱bu̱ guabaaʼ ga̱jma̱a̱ mbuʼñún rí eʼwíínʼ guáʼdáá itháan numún ki xóo ikháanʼ. Xúgínʼ a̱ngiu̱lú guáʼdáá itháan numún náa ikháanʼ xóo fe ndrígu̱ún, rí naʼngo̱o̱ a̱jkiu̱ún, rí tsímiñun o náa imbo̱o̱ rí naʼngu̱u̱n nuni. Á mu nduʼyááʼ náa rí itháan naʼngo̱o̱ naʼni mbáa ndxájulú, maʼndulú kuʼyáá itháan ga̱jma̱a̱ xáʼniulu mingíjyúuʼ mundríguíi náa guʼwúlú.

20. Á mu nuriʼña mu̱ʼgua̱ náa goʼwóo mbáa ndxájulú, ndiéjunʼ gíʼmaa muʼni ga̱jma̱a̱ náa numuu rá.

²⁰ Salmista David niraxu̱u̱ Jeobá xú káʼnii xa̱bu̱ gíʼmaa mani̱ndxu̱ún bi̱ gáʼthún maguwáʼ náa goʼwóo (Sal. 15:1). Mbá rí ikhaa nindxu̱u̱ rí matanimbánii ajngóo maski ajndu nguáná tsínigulúʼ (Sal. 15:4). Ikha jngó, á mu nuriʼña mu̱ʼgua̱ náa goʼwóo mbáa ndxájulú, ragíʼmaa muʼthá rí xúʼgua̱ ga̱jma̱a̱ mbá rí nda̱a̱ numuu. Á mu nuʼni xúgíʼ tsiakii rí niʼni bi̱ niʼthúluʼ mu̱ʼgua̱ náa goʼwóo maʼni ndíí (Mat. 5:37). Kuwa bi̱ nuriʼña magún mú nda̱wa̱á nánguá egún numuu rí imba̱a̱ niʼthún magún náa goʼwóo ga̱jma̱a̱ nakumu̱ún rí ikhí gáʼni itháan májánʼ. Lá ragájkhun dí rúʼko̱ tsesngájma ngajua ga̱jma̱a̱ gamajkhu ráʼ. Rí gíʼmaa muʼni rí muriʼña mu̱ʼgua̱ náa guʼwún ga̱jma̱a̱ muxnáa núma̱aʼ ga̱jma̱a̱ xúgíʼ a̱jkiu̱lú rí a̱ngiu̱lú gúxnulú (Luc. 10:7). Ga̱jma̱a̱ á mu rígá mbá numuu rí xándoo mu̱ʼgua̱, gúʼtaruʼun nacha̱ bi̱ nitulú mu̱ʼgua̱ náa guʼwún. Xúʼko̱ gusngájma ngajua ga̱jma̱a̱ rí nduʼyamajkhún.

21. Ndiéjunʼ gándoo muʼni mu musngajmá rí nduʼyamajkuíí rí nuni náa xuajen kuwáanʼ rá.

²¹ Ma̱ngaa gíʼdoo numuu rí mbuʼyamajkuíí rí xóo naguʼwún nuni náa kuwa. Náa tikhuu xuajen nda̱a̱ xkujndu rí mbáa maʼga̱ náa goʼwóo imba̱a̱ maski ajndu táʼtaroʼoo, mú náa i̱ʼwáʼ ndayóoʼ mutaraʼa ginii. Náa tikhuu xuajen, bi̱ nundrigúun a̱ngiu̱lú nuxnún ganitsu rí itháan májánʼ, mú náa i̱ʼwáʼ xuajen bi̱ nijuiʼthún magún ga̱jma̱a̱ bi̱ kuwa má ikhí naʼphu ikháá má ganitsu. Náa i̱ʼwáʼ xuajen, bi̱ nuriʼña magún nuyégun i̱ʼwáʼ ganitsu, rígáa náa i̱ʼwáʼ xuajen tséyóóʼ má muyégun. Rígá xuajen náa guáʼthi̱i̱n rí bi̱ nijuiʼthún magún, ginii muthi rí xágún ga̱jma̱a̱ nda̱wa̱á muthi rí magún, mú náa i̱ʼwáʼ xuajen nakujmaa rí á mu tsiriʼña magún nda̱a̱ gamajkhún. Guʼni xúgíʼ rí eʼngo̱o̱ mu bi̱ nuthulú mu̱ʼgua̱ makuwá tsímáá.

22. Ndíjkha rí itháan gíʼdoo numuu mundrígúun “májánʼ eʼwíínʼ” rá.

²² Rí xúgi̱ nindxu̱u̱ gajkhun rí niʼthí: “Inu mambáa xúgíʼ dí rígá” (1 Ped. 4:7). Kuáʼthi̱i̱nlú muraʼníí mbá gamiéjunʼ mba̱a̱ rí nditháan xóó tsírígá. Xó má gáʼga raʼni itháan gakhi̱i̱ mbaʼyóoʼ rí maʼndulú kuʼyamijná itháan. Gíʼdoo numuu rí muʼnimbulúʼ xtángoo rí nixná Pedro rí mundrígúun “májánʼ eʼwíínʼ” (1 Ped. 4:9). Rí mundrígúun a̱ngiu̱lú nindxu̱u̱ ga̱jma̱a̱ mani̱ndxu̱u̱ mbá rí gíʼdoo numuu ga̱jma̱a̱ maʼni rí makuwáanʼ májánʼ.