Nimbáa xa̱bu̱ rí mbiʼi xúgi̱ xáʼngo̱o̱ gáʼyoo xú káʼnii ninindxu̱u̱ Pablo. Xtiʼkhuu apóstol rí nakujmaa náa i̱yu̱lú nindxu̱u̱ mbá xkri̱da, raʼkháa xtiʼkhu rí phú gajkhun nirígá nákha wajyúúʼ.

Mú, rígá rí nasngájma xóo kiexu̱u̱ apóstol Pablo. Mbá xkri̱da, náa número 1 ñajunʼ gu̱nʼ marzo tsiguʼ 1902 náa revista rígi̱, niʼthí rí náa Hechos de Pablo ga̱jma̱a̱ Tecla, mbá rí niguma nákha tsiguʼ 150, nuxkamaa mbá rí xú káʼnii kiexu̱u̱ Pablo ga̱jma̱a̱ rí itháan najmaʼnuʼ: “Mbáa xa̱bu̱ bi̱ na̱nguá mba̱yi̱ʼ, nda̱a̱ wéñuʼ xtátsu edxu̱u̱, ga̱jma̱a̱ na̱nguá jmbu rajkúu, gíʼdoo tsiakii, tsu̱u̱n xkídoo midu, mitsuʼ rakhóo”.

Mbá diccionario naʼthí dí rígá rí naʼthí gajkhun náa Hechos de Pablo ga̱jma̱a̱ Tecla (The Oxford Dictionary of the Christian Church [rí nigájnuu nákha tsiguʼ 1997]). Nguáthá tsiguʼ nda̱wa̱á rí nigumaraʼmáʼ, rígi̱ ndiyamajkuíí wéñuʼ, xóo nasngájma dí rígá mbá 80 i̱yi̱i̱ʼ rí nigumaraʼmáʼ náa griego ga̱jma̱a̱ náa i̱ʼwáʼ ajngáa. Ikha jngó xkri̱da rí najmulú nambánii ga̱jma̱a̱ rí xóo nijuiʼthá nákha wajyúúʼ rí xú káʼnii kiexu̱u̱ apóstol.

Mú ndayóoʼ mbuʼyáá dí rígá rí itháan gíʼdoo numuu ki xóo rí kiexu̱u̱ Pablo. Índo̱ ni̱jkha̱ raʼtáraʼa tikhun nitanumáá: “Índo̱ xtáa ga̱jma̱á ni̱ndxu̱lú nindxu̱u̱ mbáa xa̱bu̱ guabaaʼ ga̱jma̱a̱ rí naʼthí ragíʼdoo numuu” (2 Cor. 10:10). Mú ragíʼmaa magumulú rí ikhaa ni̱jkha̱nú ninindxu̱u̱ cristiano numuu rí Jesús nisngájmaminaʼ náa ikhaa. Ma̱ngaa gíʼmaa mundxaʼwáá edxu̱lúʼ rí káʼnii niʼngo̱o̱ niʼni ‹xóo mbáa bi̱ kaxtaʼwíí› mu maʼga̱ kayóo mbiʼyuu Jesús náa ‹xuajen mba̱ʼu̱› (Hech. 9:3-5, 15; 22:6-8). Ga̱jma̱a̱ gíʼmaa mundxaʼwamíjna̱ nguáthá embáyulú libros rí na̱ʼkha̱ náa Biblia rí nigumaraʼmáʼ ga̱jma̱a̱ xi̱ʼ kaʼwu ndrígóo Dios.

Pablo táʼthi nditháan xú káʼnii kiexu̱u̱ ga̱jma̱a̱ táʼnimbamínáʼ ga̱jma̱a̱ numuu rí niʼni nákha ninindxu̱u̱ cristiano (Hech. 26:4, 5; Filip. 3:4-6). Ikhaa nisngájma rí ninindxu̱u̱ xa̱bu̱ guabaaʼ índo̱ niʼthí rígi̱: “Numuu rí ikhúúnʼ ni̱ndxu̱ʼ bi̱ itháan chíʼgíʼ náa apóstol, ga̱jma̱a̱ rakáʼyoʼ magumbiʼyuu apóstol” (1 Cor. 15:9). Ga̱jma̱a̱ nda̱wa̱á niʼnirámáʼ: “Ikhúúnʼ rí ni̱ndxu̱ʼ xa̱bu̱ bi̱ itháan chíʼgíʼ ki xóo xúgínʼ santos, nijuixnúʼ rígi̱ rí májánʼ wéñuʼ, rí mataráʼa ajngáa rí májánʼ náa i̱ʼwáʼ xuajen rí Cristo gíʼdoo wéñuʼ” (Efes. 3:8). Ajngáa rí niʼtáraʼa Pablo nigiʼdoo itháan numuu ki xóo rí maxmiéjunʼlú rí xú káʼnii kiexu̱u̱.