1. Ndiéjunʼ eñún mbuyáá cristianos nákha e̱jñún xóó tséjngúún iyááʼ xá.

“MBAʼA igu̱nʼ ni̱thu̱u̱n anu̱u̱ ga̱jma̱a̱ ru̱dúʼ rí nandoʼ majngúnʼ iyááʼ, ga̱jma̱a̱ ikhiin nitamijná mbaʼa nuthu ga̱jma̱a̱ ni̱ndxu̱ʼ. Nindúún mbuyáá á mu nakro̱ʼo̱ʼ rí niraʼwíí mani. Ni̱jkha̱nú mbiʼi rí nigiʼdoo wéñuʼ numuu náa vida ndrígóʼ. Nákha 31 ñajunʼ gu̱nʼ diciembre tsiguʼ 1934”. Xúʼko̱ eʼthí mbáa ndxájulú bi̱ mbiʼyuu Blossom Brandt rí nirígá índo̱ nijngúun iyááʼ. Rí mbiʼi xúgi̱, xa̱bu̱ bi̱ guáʼdiin e̱ji̱n nandún mumbañún e̱jñún mu muraʼwi̱i̱ májánʼ rí muni. Rí muni gajííʼ rí majngún iyááʼ e̱jñún maʼni rí xambáxu̱u̱n gajmiún Dios (Sant. 4:17). Mú, nákha xóó tséjngúún iyááʼ, anu̱ún nandún mbuyáá á mu kuwa xawii mu mundrigú ñajunʼ rí mani̱ndxu̱ún xa̱bi̱i̱ Cristo.

2. a) Ndiéjunʼ xkujndu eyáá tikhun superintendentes de circuito rá. b) Ndiéjunʼ gúʼyáá náa artículo rígi̱ rá.

² Tikhun superintendentes de circuito naxmiéjunʼ wéñuʼ numuu rí nuniʼnuʼ jiáma ga̱jma̱a̱ wa̱ʼxa̱ʼ bi̱ guáʼdáá 20 tsigúnʼ bi̱ niganun náa xuajñu Jeobá ga̱jma̱a̱ xóó tséjngúún iyááʼ. Mbaʼin nagún reunión, nagájnún gutaraʼa ga̱jma̱a̱ nuthi rí ni̱ndxu̱ún xa̱bi̱i̱ Jeobá. Mú rígá mbá numuu rí tségíʼ muxnaximi̱jna̱ náa Jeobá  ga̱jma̱a̱ majngún iyááʼ. Náa numuu rá. Nguáná anu̱ún nuthúún rí muguaʼthi̱i̱n. Ndiéjunʼ exkaxi̱i̱n tikhun xa̱bu̱ bi̱ guaʼdiin e̱ji̱n mu muni gajííʼ rí e̱jñún xájngún iyááʼ xá. Náa artículo rígi̱, mbuʼyáá a̱jkhu̱ enii rí naʼni maxmiéjúúnʼ.

3. Náa numuu rí naxmiéjunʼ anu̱u̱ ga̱jma̱a̱ ru̱dúu̱ Blossom rá.

³ Anu̱u̱ ga̱jma̱a̱ ru̱dúu̱ Blossom naxmiéjunʼ á mu aʼdiún gíʼdoo má tsiguʼ mu makro̱ʼo̱o̱ májánʼ ndiéjunʼ eyoo gáʼthúu̱n rí majngúun iyááʼ. Xú káʼnii gándoo gúyáá xa̱bu̱ á mu aʼdiún xtáa xawii mu maxnáximinaʼ náa Jeobá rá.

4. Xú káʼnii embáñun xa̱bu̱ bi̱ guáʼdiin e̱ji̱n mu munimbaníí rí naʼthí Jesús náa Mateo 28:19, 20 rá.

⁴ (Atraxnuu Mateo 28:19, 20). Xó má ndiʼyáá náa artículo ginii, náa Biblia tséʼkha̱ káʼnii tsiguʼ rí ma̱ndoo majnguánʼ iyááʼ. Maski ajndu xúʼko̱, xa̱bu̱ bi̱ guáʼdiin e̱jñún májánʼ eni rí nundxa̱ʼwa̱míjna̱ ndiéjunʼ eyoo gáʼthúu̱n rí manindxa̱ʼ discípulo. Rí na̱ʼkha̱ raʼthí náa Mateo 28:19 nasngájma rí mbáa discípulo nindxu̱u̱ bi̱ najmañuu ga̱jma̱a̱ nakro̱ʼo̱o̱ kiʼsngáa ndrígóo Jesús ga̱jma̱a̱ nagíʼ naʼnimbánuu. Ikha jngó xa̱bu̱ bi̱ ni̱ndxu̱ún Testigos gíʼmiin musngúún e̱jñún asndu nákha dxáñáʼ mu mumbáñuun majngún iyááʼ ga̱jma̱a̱ mani̱ndxu̱ún xa̱bi̱i̱ Cristo. Mú gajkhun má rí mbáa dxáñáʼ tséʼnimbánuu ikha mu majngúun iyááʼ. Mú náa Biblia naʼthí rí asndu e̱ji̱n bi̱ itháan majkhinʼ ma̱ndoo makru̱ʼu̱u̱n ga̱jma̱a̱ mbuyáá rí gíʼdoo numuu rí naʼthí náa Biblia.

5, 6. a) Índo̱ nduʼyáá rí naʼthí náa Biblia ga̱jma̱a̱ numuu Timoteo, xú káʼnii e̱jkua̱nú eʼyáá nguáná nijngúun iyááʼ xá. b) Xú káʼnii gándoo gumbañúún e̱jñún xa̱bu̱ guanii rá.

⁵ Discípulo Timoteo niraʼwíí maʼni ñajunʼ Jeobá índo̱ nindxu̱u̱ dxámá. Apóstol Pablo niʼthí rí Timoteo nininuʼ kiʼsngáa rí na̱ʼkha̱ náa Biblia ‹asndu nákha chíʼgíʼ›, xóó muʼthá, asndu nákha dxáñáʼ. Ru̱dúu̱ ga̱jma̱a̱ xíñúʼ, bi̱ ni̱ndxu̱ún judías, bi̱ nisngáá magiʼdoo ngajua náa Biblia, numuu rí anu̱u̱ tséʼni ñajunʼ Jeobá. Ikha jngó nigiʼdoo mbá fe gujkhuʼ (2 Tim. 1:5; 3:14, 15). Índo̱ nigiʼdoo 20 tsiguʼ o itháan, Timoteo ninindxu̱u̱ mbáa discípulo bi̱ niríyaʼ Pablo mu magajnúu maʼga̱ ga̱jma̱a̱ (Hech. 16:1-3).

⁶ Gajkhun má rí nda̱wi̱i̱n a̱jmi̱i̱n e̱ji̱n bi̱ mbríguun. Mixtiʼkuii nindxu̱u̱ mámbáa. Tikhun xóó majkhinʼ índo̱ naguánu nakru̱ʼu̱u̱n májánʼ ga̱jma̱a̱ nuthi rí nandún majngún iyááʼ. Eʼwíínʼ ndajñúnʼ itháan mu makuwa xawii majngún iyááʼ. Xa̱bu̱ bi̱ guáʼdiin e̱ji̱n nakru̱ʼu̱u̱n dí ragíʼmaa mutsudíín e̱jñún mu majngún iyááʼ, rí phú nuni, numbañún mu maʼga̱ rajmañún xó má eʼngu̱u̱n eni. Xa̱bu̱ buanii maʼndoo makuwá gagi índo̱ mbáa ada̱ naraʼwíí rí májánʼ maʼni Proverbios 27:11 (atraxnuu). * Mú nditháan ragíʼmaa magumún rí e̱jñún mani̱ndxu̱ún discípulos ndrígóo Cristo. Ikha jngó, májánʼ rí muraximíjna̱: “Lá gíʼdoo má wéñuʼ ku̱ma̱ a̱ʼdióʼ mu maxnáximinaʼ náa Dios ga̱jma̱a̱ majngúun iyááʼ ráʼ.”

7. Lá mbaʼyóoʼ maninuʼ káxi̱ Biblia mu ma̱ndoo majngúun iyááʼ xáʼ. Arathá.

⁷ Gajkhun má rí xa̱bu̱ buanii nusngúún rí gajkhun e̱jñún numuu rí nandún muniʼnuʼ májánʼ. Ku̱ma̱ rúʼko̱ gáʼni rí e̱jñún maʼndún muxnaximi̱jna̱ náa Jeobá. Lá rígi̱ eyoo gáʼthúu̱n rí gíʼmaa majmañún káxi̱ mámbá kiʼsngáa ndrígóo Biblia nákha xóó tsexnaximi̱jna̱ ga̱jma̱a̱ majngún iyááʼ xá. Na̱nguá. Xúgínʼ xa̱bu̱ bi̱ najngún iyááʼ gíʼmaa muguaʼdáá má xúʼko̱ ku̱ma̱ jmbu  (atraxnuu Colosenses 1:9, 10). * Mú, lá ndayóoʼ rí mbáa xa̱bu̱ magiʼdoo wéñuʼ ku̱ma̱ mu ma̱ndoo majngúun iyááʼ xáʼ.

8, 9. Ndiéjunʼ ejmañulú ga̱jma̱a̱ numuu Pablo ga̱jma̱a̱ bi̱ nañewu̱u̱n guʼwá e̱jua̱nʼ rá.

⁸ Rí nini mbá guʼwíin bi̱ nikuwa nákha siglo timbá mambáyulúʼ muriʼña̱a̱ graxe̱ rígi̱ (Hech. 16:25-33). Tsiguʼ 50, Pablo ni̱jkha̱ náa xuajen Filipos índo̱ maʼni raga̱jma̱ aʼphu̱ rí ni̱jkha̱ ikhí. Ikhaa ga̱jma̱a̱ Silas nirajtuun ga̱jma̱a̱ nixudiinʼ náa guʼwá e̱jua̱nʼ ga̱jma̱a̱ numuu rí nini gámiin. Mbruʼun rúʼko̱, mbá gaʼxma niʼni gámbáa guʼwá e̱jua̱nʼ ga̱jma̱a̱ nimbaʼtoo xúgíʼ xkrugua. Bi̱ nañewu̱u̱n guʼwá e̱jua̱nʼ nimíñuu numuu rí nikumu̱u̱ rí nigájnun bi̱ tri̱ʼi̱i̱n náa guʼwá e̱jua̱nʼ rí asndu nigíʼ maxíyaminaʼ. Mú Pablo tániñuʼ maʼni. Ikhaa ga̱jma̱a̱ Silas nitaraʼáá bi̱ nañewu̱u̱n guʼwá e̱jua̱nʼ gajmíi̱n bi̱ kuwa náa goʼwóo. Ndiyáá rí gíʼdoo wéñuʼ numuu rí nijmañún ga̱jma̱a̱ numuu Jesús rí tájyúuʼ má nijngún iyááʼ. Ndiéjunʼ eʼsngúlúʼ rígi̱ rá.

⁹ Mbáa bi̱ niñewu̱u̱n guʼwá e̱jua̱nʼ ninindxu̱u̱ mbáa soldado ndrígóo Roma nákha ginii, ga̱jma̱a̱ táninuʼ rí naʼthí náa Escrituras. Ikha jngó mu ma̱ndoo mani̱ndxu̱u̱ cristiano ndiyóoʼ majmañuu kiʼsngáa ndrígóo Ajngá rawunʼ Dios rí itháan gíʼdoo numuu, ga̱jma̱a̱ makro̱ʼo̱o̱ rí eyoo gáʼthúu̱n rí mani̱ndxu̱u̱ mbáa xa̱bi̱i̱ Jeobá ga̱jma̱a̱ magíʼ maʼnimbo̱o̱ kiʼsngáa ndrígóo Jesús. Tájyúuʼ má índo̱ nigiʼdoo ku̱ma̱ rí itháan gíʼdoo numuu ga̱jma̱a̱ niniguʼ wéñuʼ rí nixkaxi̱i̱ majngúun iyááʼ. Xó má eʼyáá, ndiyóoʼ maʼga̱ rajmañuu má xúʼko̱ nda̱wa̱á rí nijngúun má iyááʼ. Ga̱jma̱a̱ xkri̱da rígi̱, ndiéjunʼ gándoo muni xa̱bu̱ á mu mbáa aʼdiún nandoo majngúun iyááʼ ma̱ngaa nandoo maʼnimbo̱o̱ kaʼyoo xá. Ma̱ndoo muthán rí maʼtámíjná gajmíi̱n bi̱ kuya̱ edxu̱u̱ náa congregación mu mbuyáá á mu ma̱ndoo majngún iyááʼ. * Ikháá má kayúʼ xóo eʼwíínʼ discípulos bi̱ najngún iyááʼ ikhaa maʼga̱ rajmañuu má xúʼko̱ ga̱jma̱a̱ numuu rí naʼthí maʼni Dios asndu kámuu mbiʼi (Rom. 11:33, 34).

10, 11. a) Ndiéjunʼ ekumún tikhun xa̱bu̱ bi̱ guáʼdiin e̱ji̱n rá. b) Náa biʼyaa rí gíʼmaa muxnáá itháan numuu xa̱bu̱ bi̱ guáʼdiin e̱ji̱n rá.

¹⁰ Tikhun xa̱bu̱ nakumu̱ún rí itháan májánʼ rí ginii e̱jñún munigajmaa mbá carrera ga̱jma̱a̱ mbuyáaʼ mbá ñajunʼ májánʼ ga̱jma̱a̱ nda̱wa̱á majngúun iyááʼ. Ga̱jma̱a̱ mbáa májánʼ nindxu̱u̱ rí eñún muni e̱jñún. Mú, lá numbañún e̱jñún mu makuwa tsímáá xáʼ. Ma̱ngaa, lá rúʼko̱ rí naʼsngáa náa Biblia ráʼ. Ndiéjunʼ eyoo Jeobá muʼni ga̱jma̱a̱ vida ndrígúlú rá. (Atraxnuu Eclesiastés 12:1.) *

¹¹ Gíʼdoo wéñuʼ numuu marmáʼáan a̱jkiu̱lú rí numbaaʼ rígi̱ ga̱jma̱a̱ xúgíʼ dí rígá nanújngorámuʼ rí Jeobá nandoo ga̱jma̱a̱ rí xóo nandxa̱ʼóo edxu̱u̱ (Sant. 4:7, 8; 1 Juan 2:15-17; 5:19). Rí mambaxúu itháan májánʼ ga̱jma̱a̱ Dios mañewu̱u̱n náa Satanás, numbaaʼ xkawiʼ rígi̱ ga̱jma̱a̱ ku̱ma̱ xkawiʼ ndrígóo. Á mu xa̱bu̱ buanii bi̱ guáʼdiin e̱ji̱n nuxnáá itháan numuu rí mbuyááʼ  mbújkha̱a̱ mbáa e̱jñún makumún rí itháan gíʼdoo numuu dí rígá náa numbaaʼ ki xóo rí mambaxúún gajmiún Jeobá. Mú nimbáa xa̱bi̱i̱ Jeobá tsíyoo rí numbaaʼ rígi̱ maraʼwíí rí maʼni a̱ʼdióo. I̱ndó ma̱ndoo makuwáanʼ gagi á mu nuʼgíʼ ginii Jeobá náa vida ndrígúlú (atraxnuu Salmo 1:2, 3). *

12. Náa numuu rí tikhun xa̱bu̱ nuthúún e̱jñún rí xóó xájngún iyááʼ xá.

¹² Mbáa ndxájulú a̱ʼgu̱ niʼthúu̱n wáxioo rí xóó xájngúun iyááʼ. Náa numuu rá. Ikhaa má niʼthí: “Ma̱jti̱ʼ mata, mú numuu rí ni̱thu̱u̱n wáxióʼ rí xóó xáʼni numuu rí mbóo mbiʼi muni̱i̱ expulsar”. Xó má ndxájulú bugi̱, tikhun xa̱bu̱ bi̱ guáʼdiin e̱ji̱n nundxa̱ʼwa̱míjna̱ rí e̱jñún xóó xájngún iyááʼ asndu índo̱ maʼni itháan guanii índo̱ gajmañún muraʼwi̱i̱ muni rí májánʼ (Gén. 8:21; Prov. 22:15). Mbáa nundxa̱ʼwa̱míjna̱ rí e̱jñún xándoo gagumiin expulsar numuu rí xóó tséjngúun iyááʼ. Mú kuwa runinduwamijná. Náa numuu rá. (Sant. 1:22.)

13. Á mu mbáa xóó tséjngúun iyááʼ. lá rúʼko̱ eyoo gáʼthúu̱n rí xaxnáxi̱i̱ cuenta náa Jeobá xáʼ. Arathá.

¹³ Gajkhun rí xa̱bu̱ guanii nandún rí e̱jñún muxnaximi̱jna̱ náa Jeobá ga̱jma̱a̱ majngún iyááʼ índo̱ gundxaʼwa̱a̱ májánʼ edxu̱ún. Mú, raʼkhí rí mundxaʼwamíjna̱ rí Jeobá xánda̱ʼa̱a̱ cuenta á mu xóó tséjngúun iyááʼ. Aʼdiún maxnáxi̱i̱ cuenta náa Dios asndu mbiʼi rí ndaʼyoo ndiéjunʼ nindxu̱u̱ májánʼ ga̱jma̱a̱ dí ra̱májánʼ (atraxnuu Santiago 4:17). * Ikha jngó ragíʼmaa muthún rí xóó xájngún iyááʼ, xa̱bu̱ buanii bi̱ májánʼ a̱jkiu̱ún nunimíjna̱ mu muxnún májánʼ xkri̱da. Ma̱ngaa nusngúún asndu nákha majkhinʼ rí gíʼmaa manga̱ju̱u̱n kuyáá xtángoo ndrígóo Jeobá (Luc. 6:40). Rúʼko̱ gambáñun ikhiin, mu maxkajxi̱i̱n rí muniñami̱jna̱ maxnún ikha ndrígóo Dios (Is. 35:8).

14. Xú káʼnii gándoo muni bi̱ kuya̱ edxu̱u̱ náa congregación mu mumbañún bi̱ guáʼdiin e̱ji̱n rá.

¹⁴ Bi̱ kuya̱ edxu̱u̱ náa congregación ma̱ndoo mumbañún xa̱bu̱ bi̱ guáʼdiin e̱ji̱n. Xú káʼnii gándoo gúni xá. Muthún rí májánʼ ga̱jma̱a̱ numuu ñajunʼ ndrígóo Dios. Mbáa ndxájulú a̱ʼgu̱ narmáʼáan a̱jkiu̱u̱n rí índo̱ ikhaa gíʼdoo majun tsiguʼ, ndxájulú Russell nigi̱ʼi̱ mbá gu̱wa̱ʼ nítsu minutos mu maʼtámíjná ga̱jma̱a̱ ikhaa ga̱jma̱a̱ numuu rí nandoo maʼni itháan ñajunʼ Dios. Ndxájulú bugi̱ ninindxu̱u̱ precursora itháan rí ajtsú skíñúʼ tsiguʼ. Rígi̱ nasngájma rí tsiakii rí gúxna eʼwíínʼ ga̱jma̱a̱ rí gúthi nambáyúu wéñuʼ mbáa (Prov. 25:11). I̱ʼwáʼ rí ma̱ndoo muni bi̱ kuya̱ edxu̱u̱ nindxu̱u̱ rí mundu̱ʼu̱u̱n a̱ngiu̱lú gajmiún e̱jñún rí muyambáá náa ñajunʼ dí rígá náa Guʼwá nagimbáanʼ, rí muxnún ñajunʼ rí kaʼyoo muni e̱ji̱n ga̱jma̱a̱ rí najmañún nuni.

15. Xú káʼnii gándoo gúxnún tsiakii eʼwíínʼ a̱ngiu̱lú jiáma ga̱jma̱a̱ wa̱ʼxa̱ʼ rá.

¹⁵ Ga̱jma̱a̱ xú káʼnii gándoo gúyambáá eʼwíínʼ a̱ngiu̱lú rá. Rí maxmiéjunʼ kuñún jiáma ga̱jma̱a̱ wa̱ʼxa̱ʼ, ma̱ngaa gíʼmaa makuwá xawii mu mbuyáá xú káʼnii egún rajmañún. Mbá xkri̱da, lá xtáa mbáa dxámá bi̱ nixná comentario ga̱jma̱a̱ ajngáa rí nikro̱ʼo̱o̱ xáʼ. Lá nigiʼdoo mbá asignación náa reunión xáʼ. Lá niraʼnuu mbá tsáʼkhá náa ndiyóoʼ masngájma fe ndrígóo xáʼ. Lá niríyaʼ awan mu maʼtáraʼa náa escuela xáʼ. Ikha jngó  ragíʼmaa manújngoo mbiʼi mu muʼthúún ga̱jma̱a̱ xúgíʼ a̱jkiu̱lú rí májánʼ nini. Guríyaaʼ awan mu muʼtámíjná gajmiúlú jiáma ga̱jma̱a̱ wa̱ʼxa̱ʼ nákha inuu magi̱ʼdu̱u̱ reunión ga̱jma̱a̱ nda̱wa̱á rí niguámbá. Nayambáá wéñuʼ rígi̱ mu makumún rí kuwa náa “congregación rí mba̱a̱” (Sal. 35:18).

16, 17. a) Ndíjkha rí gíʼdoo numuu rí e̱ji̱n majngún iyááʼ rá. b) Xá káʼnii gakumún xa̱bu̱ bi̱ guáʼdiin e̱ji̱n bi̱ ni̱ndxu̱ún xa̱bi̱i̱ Dios rá. (Atayáá timbá xtiʼkhu.)

¹⁶ Rí matanimbanuu e̱jña̱ʼ “xóo eʼthí náa xtángoo ga̱jma̱a̱ xó má endxa̱ʼóo edxu̱u̱ Jeobá” nindxu̱u̱ mbá ñajunʼ rí itháan gíʼdoo numuu matani ikháánʼ rí ni̱ndxa̱ʼ xa̱bi̱i̱ Dios (Efes. 6:4; Sal. 127:3). E̱jñún israelitas nigumiin náa mbá xuajin rí nixnaximi̱jna̱ muni ñajunʼ Dios. Mú e̱ji̱n bi̱ nagaji̱i̱n náa mbá guʼwíin bi̱ ni̱ndxu̱ún cristianos na̱nguá. Ma̱ngaa rí maʼndún kuyáá Jeobá ga̱jma̱a̱ rí gajkhun na̱nguá nindxu̱u̱ xóo mbá herencia. Asndu mbiʼi rí nagumiin e̱jñún xa̱bu̱ gíʼmaa mumbañún mu mani̱ndxu̱u̱ discípulo ndrígóo Cristo, rí muxnaximi̱jna̱ náa Dios ga̱jma̱a̱ rí majngún iyááʼ. Rígi̱ nindxu̱u̱ rí itháan gíʼdoo numuu. Náa numuu rá. Numuu rí índo̱ nuxnaximi̱jna̱ náa Dios ga̱jma̱a̱ najngún iyááʼ ga̱jma̱a̱ ñajunʼ rí kuwa runi náa Dios maʼni rí makáwíin índo̱ gáʼkha̱ majphú mba̱a̱ gaʼkhu (Mat. 24:13).

¹⁷ Náa timbá kutriga̱, niʼthá ga̱jma̱a̱ numuu mbáa ndxájulú a̱ʼgu̱ bi̱ mbiʼyuu Blossom Brandt. Índo̱ niʼthúu̱n anu̱u̱ ga̱jma̱a̱ ru̱dúu̱ rí nandoo majngúun iyááʼ, ikhiin nindúún mbuyáá á mu xtáa xawii mu maʼni rí itháan gíʼdoo numuu náa vida ndrígóo. Índo̱ ndiyáá rí gajkhun nindxu̱u̱ ikhú nimbayíí. Mbruʼun rí nákha xóó tséjngúun iyááʼ, anu̱u̱ niʼni mbá rí mitsaan. Blossom niʼthí: “Niʼni rí xúgiáanʼ musmbatíguxu ga̱jma̱a̱ nda̱wa̱á niʼtájkáan. Niʼthúu̱n Jeobá rí xtáa wéñuʼ gagi numuu rí wáxioo niraʼwíí maxnáxi vida ndrígóo náa ikhaa”. Nda̱wa̱á rí ninújngoo ajtsú skíñúʼ tsiguʼ niʼthí: “Nditháan xambumuʼ mbruʼun rúʼko̱”. Nandulúʼ rí xúgínʼ xa̱bu̱ bi̱ guáʼdiin e̱ji̱n makuwa gagi índo̱ gúñún e̱jñún nuraʼwíí muxnaximi̱jna̱ ga̱jma̱a̱ majngún iyááʼ mu mani̱ndxu̱ún xa̱bi̱i̱ Jeobá.