1. Nda̱wa̱á rí nixudami̱jna̱ aʼkhá Adán ga̱jma̱a̱ Eva, ndiéjunʼ niʼthí Jeobá ga̱jma̱a̱ numuu xa̱bu̱ sia̱nʼ ndrígúlú rá.

ADÁN ndiʼyoo májánʼ rí a̱bu̱nʼ na̱nguá ethi. Ikha jngó índo̱ mbáa a̱bu̱nʼ niʼthúu̱n Eva, mbáa ikhaa nindxa̱ʼwáminaʼ rí bi̱ naʼthí nindxu̱u̱ mbáa espíritu (Gén. 3:1-6). Nimbáa rí ikhiin túyáá nimbá chíʼgíʼ ga̱jma̱a̱ numuu espíritu bugi̱. Maski ajndu xúʼko̱, Adán niraʼwíí rí xáʼnimbo̱o̱ kaʼyoo Anu̱u̱ mekhuíí ga̱jma̱a̱ niruwaminaʼ ga̱jma̱a̱ bi̱ tséniniiʼ (1 Tim. 2:14). Jeobá nacha̱ niʼthí ga̱jma̱a̱ numuu xa̱bu̱ bi̱ sia̱nʼ bugi̱ bi̱ niʼninduwaʼ Adán ga̱jma̱a̱ Eva, ga̱jma̱a̱ nikudaminaʼ rí maʼnimbáti̱ga̱a̱. Mú ma̱ngaa niʼthí rí marigá mbiʼi rí espíritu rígi̱ maʼni nduwiinʼ xa̱bu̱ bi̱ nandún kuyáá Dios (Gén. 3:15).

2, 3. Náa numuu rí Jeobá táʼthi wéñuʼ ga̱jma̱a̱ numuu Satanás nákha xóó tséʼkha̱ Mesías rá.

² Jeobá, bi̱ ra̱ʼkhá tháán ejmañuu, nimbá miʼtsú na̱nguá niʼthúluʼ xú káʼnii mbiʼyuu ángel bi̱ táʼnimbo̱o̱. * Ga̱jma̱a̱ niraʼwíí rí magiʼthu̱u̱n mbá 2,500 tsiguʼ mu maxnúlúʼ mbuʼyáá ajngáa rí najmuu mu maʼthí ga̱jma̱a̱ numuu ikhaa: Satanás, rí nandoo gáʼthúu̱n “bi̱ Nakuximinaʼ” (Job 1:6). Ajngáa rígi̱ nakujmaa  náa ajtsú libros ndrígóo Escrituras Hebreas: 1 Crónicas, Job ga̱jma̱a̱ Zacarías. Náa numuu rí táʼthi wéñuʼ Jeobá ga̱jma̱a̱ numuu xa̱bu̱ sia̱nʼ nákha xóó tséʼkha̱ Mesías rá.

³ Nakujmaa rí Jeobá tájmuu mbiʼyuu Satanás mu xágiʼdoo numuu. Ikha jngó, náa Escrituras Hebreas tséʼkha̱ ga̱jma̱a̱ numuu ikhaa ga̱jma̱a̱ rí niʼni. Rí phú numuu rí niʼni magumaraʼmáʼ mambáñun xa̱bu̱ muniʼniiʼ Mesías ga̱jma̱a̱ magún kidxuuʼ (Luc. 24:44; Gál. 3:24). Índo̱ bugi̱ ni̱jkha̱nú, Jeobá nijmiuu ikhaa gajmíi̱n discípulos mu muthi rí nduʼyáá xúgi̱ ikháanʼ ga̱jma̱a̱ numuu Satanás ga̱jma̱a̱ ángeles bi̱ numbayíí ikhaa. * Kaʼyoo rí mani̱ndxu̱u̱ xúʼko̱, numuu rí Jeobá majmiuu Jesús ga̱jma̱a̱ bi̱ kaxtaʼwíin mu muni gámbáa Satanás gajmíi̱n xa̱bi̱i̱ (Rom. 16:20; Rev. 17:14; 20:10).

4. Náa numuu dí ragíʼmaa mamiñúlú kuʼyáá wéñuʼ Satanás rá.

⁴ Apóstol Pedro niʼthí rí Gixa̱a̱ nindxu̱u̱ xóo mbáa “león bi̱ nandxaʼwá”, ga̱jma̱a̱ Juan nixná mbiʼyuu “a̱bu̱nʼ” ga̱jma̱a̱ “xujkhú wéñiʼ” (1 Ped. 5:8; Rev. 12:9). Lá rúʼko̱ eyoo gáʼthúu̱n rí gíʼmaa mamiñúlú kuʼyáá wéñuʼ Satanás ráʼ. Na̱nguá, numuu rí tsiakii ndrígóo nartumuu (atraxnuu Santiago 4:7). * Bi̱ numbayúlú ni̱ndxu̱ún Jeobá, Jesús mangiin ángeles bi̱ niguájun jmbu. Rí mumbayulúʼ ma̱ndoo maʼni rí muraʼníí tsáʼkhá. Mú, xóó ma̱ndoo muriʼña̱a̱ ajtsú graxe̱ rí gíʼdoo itháan numuu: Nguáthá tsiakii gíʼdoo Satanás rá. Xú káʼnii eʼni Satanás mu maʼni nduwiinʼ xa̱bu̱ rá. Ga̱jma̱a̱ asndu náa ertumuu tsiakii ndrígóo xá. Guʼyáá graxe̱ rígi̱ ga̱jma̱a̱ guʼyáá ndiéjunʼ ejmañulú náa ikha rígi̱.

5, 6. Náa numuu rí Xa̱bu̱ Ñajunʼ tséʼngu̱u̱n guni rí nda̱ñúnʼ xa̱bu̱ numbaaʼ rá.

⁵ Mbaʼin ángeles niruwami̱jna̱ gajmiún Satanás. Nákha xóó tséʼkha̱ ruʼwa mbiiʼ, niʼni rí tikhun mubúúnʼ gajmiún gu̱ʼu̱. Náa Biblia nagíʼ mbá xkri̱da rí nirígá índo̱ naʼthí ga̱jma̱a̱ numuu xujkhú wéñiʼ bi̱ na̱ʼkha̱ gajmíi̱n itháan rí mbá taphi̱i̱n a̱ʼgua̱a̱n bi̱ kuwa mekhuíí (Gén. 6:1-4; Jud. 6; Rev. 12:3, 4). Índo̱ ángeles niniñaaʼ Jeobá, niniñami̱jna̱ rí Satanás maʼtáñajúúnʼ. Mú, bi̱ nixuximi̱jna̱ bugi̱ raʼkháa i̱ndó ni̱ndxu̱ún ra̱míjínʼ wéñuʼ ga̱jma̱a̱ nuni rí eñún. Satanás ndiʼyáridoo xkri̱da ndrígóo Reino rí na̱ʼkha̱ náa Dios, ga̱jma̱a̱ naʼthí rí nindxu̱u̱ rey. Niʼni rí xa̱bu̱ wéñiʼ mutañajunʼ, nixnúún tsiakii ga̱jma̱a̱ niʼni rí mutañajunʼ náa xúgíʼ numbaaʼ (Efes. 6:12).

⁶ Satanás najmuu organización mu maʼtáñajúúnʼ xúgínʼ xa̱bu̱ bi̱ nutañajunʼ náa numbaaʼ rígi̱. Rí nirígá rígi̱ niguanúu kaʼwu índo̱ Satanás nisngájmuu Jesús “mba xugui numba ri mbaʼo” ga̱jma̱a̱ niʼthúu̱n: “Maxnaʼ mba xuguiñajun ri maratañajun iki, gajma gloria ri riga iki, numu ri ikun huaʼxnaxuʼ, ikajngo asjndo tsa nandoʼ maxnu” (Luc. 4:5, 6). Maski ajndu Gixa̱a̱ gíʼdoo wéñuʼ tsiakii, mbaʼin Xa̱bu̱ Ñajunʼ nuni rí májánʼ ga̱jma̱a̱ numún xa̱bu̱ bi̱ nutañajúúnʼ. Ga̱jma̱a̱ kuwa Xa̱bu̱ Ñajunʼ bi̱ nandún muni rí májánʼ. Mu nda̱wa̱a̱ nimbáa Xa̱bu̱ Ñajunʼ bi̱ ma̱ndoo mariʼkhu̱u̱ rí itháan nda̱ñúnʼ xa̱bu̱ numbaaʼ (Sal. 146:3, 4; Rev. 12:12).

7. Xú káʼnii ejmuu Satanás religión dí ragájkhun ga̱jma̱a̱ náa naxtango̱jo̱o̱ rá. (Atayáá timbá xtiʼkhu.)

⁷ Mu maʼninduwiinʼ “xa̱bu̱ bi̱ kuwa náa xúgíʼ tsu̱du̱u̱ ku̱ba̱ʼ”, Satanás ga̱jma̱a̱ xa̱bu̱ wéñiʼ ndrígio̱o̱ raʼkháa i̱ndó najmiuu Xa̱bu̱ Ñajunʼ ma̱ngaa najmún religión rí minduwaʼ ga̱jma̱a̱ náa naxtango̱jo̱o̱  (Rev. 12:9). Ga̱jma̱a̱ numuu religión rí minduwaʼ, Satanás naʼthí rí minduwaʼ ga̱jma̱a̱ numuu Jeobá. Ga̱jma̱a̱ nakujmaa rí nandoo rí mbaʼin xa̱bu̱ magumún mbiʼyuu Dios (Jer. 23:26, 27). Ga̱jma̱a̱ numuu xúgíʼ rígi̱. Mbaʼin nakumu̱ún rí kuwa ruyamajkuíí Dios, mú kuwa ruyamajkhún xa̱bu̱ wéñiʼ (1 Cor. 10:20; 2 Cor. 11:13-15). Ga̱jma̱a̱ náa naxtango̱jo̱o̱, Satanás najmuu i̱ʼwáʼ nduwaʼ. Mbá xkri̱da, naʼni rí xa̱bu̱ makumún rí á mu naguáʼdáá mbújkha̱a̱ ga̱jma̱a̱ á mu naguáʼdáá i̱ʼwáʼ naʼni makuwá gagi (Prov. 18:11). Bi̱ nunimbu̱ún nduwaʼ rígi̱ nduyááʼ itháan “riqueza” ki xóo muni ñajunʼ Jeobá (Mat. 6:24). Rí nanigu̱nʼ muguaʼdáá wéñuʼ naʼni rí xáʼndun kuyáá Dios (Mat. 13:22; 1 Juan 2:15, 16).

8, 9. a) Ndiéjunʼ a̱jma̱ enii ejmañulú náa xkri̱da ndrígóo Adán, Eva ga̱jma̱a̱ ángeles bi̱ nixuximi̱jna̱ rá. b) Xú káʼnii embáyulú mbuʼyáá nguáthá tsiakii gíʼdoo Satanás rá.

⁸ Xkri̱da ndrígóo Adán, Eva ga̱jma̱a̱ ángeles bi̱ túnimbu̱ún naʼsngúlú a̱jma̱ ikha rí itháan gíʼdoo numuu. Rí timbá nindxu̱u̱ rí muʼnimbulúʼ kuʼyáá Jeobá o muʼnimbulúʼ kuʼyáá Satanás. Gíʼmaa muraʼwíí rí muʼni (Mat. 7:13). Raga̱jma̱ nindxu̱u̱, na̱nguá mba̱a̱ rí mundrígú ga̱jma̱a̱ numuu rí numbáyii Satanás. Adán ga̱jma̱a̱ Eva niʼngu̱u̱n nigíʼ xtángoo numuu rí májánʼ ma̱ngaa dí ra̱májánʼ, ga̱jma̱a̱ xa̱bu̱ wéñiʼ niguáʼdáá tsiakii náa Xa̱bu̱ Ñajunʼ (Gén. 3:22). Mú rí mi̱dxu̱ʼ kidxuuʼ Satanás itháan mba̱a̱ rí gátani numa̱a̱ ki xóo rí naxnáraʼaʼ (Job 21:7-17; Gál. 6:7, 8).

⁹ Xú káʼnii embáyulú rí mbuʼyáá nguáthá tsiakii gíʼdoo Satanás rá. Mbá nindxu̱u̱, naniñulú makru̱ʼu̱lú rí Jeobá nandoo mbuʼyamajkún Xa̱bu̱ Ñajunʼ (1 Ped. 2:17). Gíʼthu̱u̱n rí muʼnimbulúʼ xtángoo ndrígu̱ún índo̱ rí tsenújngorámuuʼ xtángoo ndrígóo ikhaa (Rom. 13:1-4). Mú ma̱ngaa nduʼyáá rí ndayóoʼ muguajún jmbu ga̱jma̱a̱ xumbáyii nimbáa político o partido (Juan 17:15, 16; 18:36). Ma̱ngaa, rí muniʼnúʼ tsiakii ndrígóo Satanás maxkaxáanʼ muʼtáraʼa. Xó má eʼyáá rí nandoo maʼni ga̱jma̱a̱ mbiʼyuu ga̱jma̱a̱ xóo xa̱bu̱ nindxu̱u̱ Jeobá, naxkaxáanʼ muʼsngúún xa̱bu̱ rí gajkhun ga̱jma̱a̱ numuu Dios. Najmulú mbiʼyuu ga̱jma̱a̱ nadxulú rí muʼguá kuʼyúlú. Nduʼyáá rí maʼndulú kuʼyáá Dios nambáyulúʼ itháan ki xóo rí muguaʼdáá mbújkha̱a̱ o muguaʼdáá wéñuʼ i̱ʼwáʼ (Is. 43:10; 1 Tim. 6:6-10).

10-12. a) Xú káʼnii nijmuu Satanás mbá tsáʼkhá mu majpátrigúun mbaʼin ángeles rá. b) Ndiéjunʼ gándoo gajmañulú rí niguáʼniin ángeles buʼko̱ rá.

¹⁰ Mu maʼni rí xa̱bu̱ muni rí nandoo ikhaa, Satanás najmuu mbaʼa tsáʼkhá rí  nambáyúu wéñuʼ. Xó má gúʼyáá, nguáná najmuu tsáʼkhá ga̱jma̱a̱ nguáná ikhaa mínaʼ etsudiín xa̱bu̱.

¹¹ Timbá, guʼyáá xú káʼnii nijmuu Satanás mbá tsáʼkhá mu majpátrigúun mbaʼin ángeles. Mbáa mba̱yu̱ʼ tsiguʼ ndiʼyoo xú káʼnii ni̱ndxu̱ún mu maʼni nduwiinʼ ga̱jma̱a̱ maʼni rí mumbayíí ikhaa. Nikuwa tikhun bi̱ nijpátrígúun náa tsáʼkhá rúʼko̱ ga̱jma̱a̱ nibúunʼ gajmiún gu̱ʼu̱. E̱jñún xándoo muguaʼdíin e̱ji̱n, ma̱ngaa niʼni mbijui̱i̱n wéñuʼ ga̱jma̱a̱ nuni gíníi xa̱bu̱ (Gén. 6:1-4). Mbáa Satanás raʼkháa i̱ndó nijmuu tsáʼkhá rí mubúunʼ gajmiún xa̱bu̱, ma̱ngaa rí nikudaminaʼ rí maʼtáñajúúnʼ xa̱bu̱ numbaaʼ. Mbáa ikhaa nindoo rí xáʼkha̱ ‹bi̱ gáʼkha̱› náa “a̱ʼgu̱” bi̱ Dios nikudaminaʼ (Gén. 3:15). Mú Jeobá ni̱ʼkha̱ kayóo Ruʼwa mbiiʼ ga̱jma̱a̱ xúʼko̱ niʼni gámbáa awan ndrígóo Satanás gajmíi̱n xa̱bu̱ wéñiʼ ndrígio̱o̱.

¹² Ndiéjunʼ gándoo gajmañulú rá. Rí mataba̱ʼ ga̱jma̱ʼ mbáa nagui̱i̱ nindxu̱u̱ mú naʼni gawáanʼ ma̱ngaa najmañulúʼ dí ragíʼmaa mundxaʼwamíjna̱ wéñuʼ i̱ndó ga̱jma̱a̱ numulúʼ. Ángeles bi̱ numbayíí Satanas nikuwa mba̱yu̱ʼ tsiguʼ runi ñajunʼ Jeobá. Maski ajndu nikuwa májánʼ, mbaʼin ángeles niniñaaʼ mbaja̱a̱ rí ra̱májánʼ náa a̱jkiu̱ún. Xúʼko̱ má kayuʼ, mbáa ikháanʼ kuwáanʼ má ru̱ʼni̱ ñajunʼ mba̱yu̱ʼ tsiguʼ náa xuajñu Dios. Mú maski ajndu kuwáanʼ májánʼ, dí ra̱májánʼ ma̱ndoo mbaja̱a̱ náa a̱jkiu̱lú (1 Cor. 10:12). Gíʼdoo wéñuʼ numuu mbuʼyáá má xúʼko̱ a̱jkiu̱lú ga̱jma̱a̱ muʼni gaʼduunʼ rí muʼni mbaʼumíjna̱ ga̱jma̱a̱ ku̱ma̱ dí ra̱májánʼ (Gál. 5:26; atraxnuu Colosenses 3:5). *

13. a) Ndiéjunʼ imbo̱o̱ tsáʼkhá ejmuu Satanás mu majpátrigúun xa̱bu̱ rá. b) Ndiéjunʼ gúʼni mu xajpatríguáanʼ náa tsáʼkhá rúʼko̱ rá.

¹³ Imbo̱o̱ tsáʼkhá rí najmuu Satanás nindxu̱u̱ rí maʼnda̱ʼ matani xawan. Ikhaa nandoo ma̱ta̱ya̱a̱ ga̱jma̱a̱ numún xa̱bu̱ wéñiʼ raʼkháa i̱ndó ga̱jma̱a̱ religión dí ragájkhun, ma̱ngaa náa xúgíʼ rí naxtango̱jo̱o̱ rí nuʼni gagimijná ga̱jma̱a̱. Najmuu películas ga̱jma̱a̱ gitsíin dí rígá náa mbaʼa ajua̱nʼ, ga̱jma̱a̱ i̱ʼwáʼ, mu xawan maʼgui̱i̱. Ndiéjunʼ gíʼmaa muʼni mu xajpatríguáanʼ náa tsáʼkhá rígi̱ rá. Xúguaʼthi̱i̱n rí xuajñu Dios maʼni mbá lista rí nindxu̱u̱ májánʼ ga̱jma̱a̱ rí na̱nguá mu muʼni gagimijná. Mámbáa rí ikháanʼ gíʼmaa maʼsngóo ku̱ma̱ ndrígóo mu muʼnimbánii xtángoo ndrígóo Jeobá (Heb. 5:14). Muraʼwíí muʼni rí májánʼ á mu nuʼnimbánii xtágabu ndrígóo Pablo rí maʼndulú kuʼyáá Dios ‹rí xáʼni a̱jma̱ inulú›  (Rom. 12:9). Guraximíjna̱: “Á mu bi̱ nasngóo ga̱jma̱a̱ numuu Biblia ndaʼyoo rí eni gagiminaʼ ga̱jma̱a̱, lá mandxaʼwáminaʼ rí naʼgíʼ nanimbánuu rí nataráʼa o ni̱ndxu̱ʼ mbáa xa̱bu̱ bi̱ a̱jma̱ inuu ráʼ.” Á mu nuʼni rí nuʼtáraʼa xajpátriguáanʼ náa tsáʼkhá ndrígóo Satanás (1 Juan 3:18).

14. a) Xú káʼnii eʼni tsudáanʼ Satanás rá. b) Xú káʼnii gándoo gúʼni gaʼduunʼ rá.

¹⁴ Guʼyáá xú káʼnii etsudáanʼ Satanás mu xakuwáanʼ jmbu náa Jeobá. Mbá xkri̱da, ma̱ndoo maʼniún rí Xa̱bu̱ Ñajunʼ xúniñulú muʼtáraʼa. Xúʼko̱ má kayuʼ, ma̱ndoo maʼni rí bi̱ nuñajunʼ gajmiúlú o bi̱ nuʼnigajmaa gajmiúlú munduʼwajmáanʼ numuu rí nandulúʼ muʼnimbulúʼ ikha ndrígóo Dios (1 Ped. 4:4). Ma̱ngaa ma̱ndoo maʼni rí bi̱ kuʼñúún mutulú rí xúʼgua̱ náa nagimbáanʼ numuu rí naxmiéjunʼ kuyulúʼ (Mat. 10:36). Xú káʼnii gándoo gúʼni gaʼduunʼ índo̱ nutsudáanʼ xá. Timbá, nduʼyáá rí xúʼko̱ má garigá numuu rí Satanás naxmínaʼ ga̱jma̱á ni̱ndxu̱lú (Rev. 2:10; 12:17). Raga̱jma̱, xúniʼñáʼ rí xkujndu rígi̱ maʼni muʼnimbáti̱ga̱ rí gíʼdoo numuu: Rí Satanás naʼthí rí i̱ndó nuʼni ñajunʼ Dios numuu rí ikhaa nambáyulúʼ ga̱jma̱a̱ rí xúʼnimbulú kuʼyáá índo̱ nutsudáanʼ (Job 1:9-11; 2:4, 5). Ragajtsú numuu, gunda̱ʼa̱a̱ Jeobá rí maxnúlúʼ tsiakii mu maʼngulú. Garmáʼáan a̱jkiu̱lú rí ikhaa xániñulú nditháan (Heb. 13:5).

15. Lá ma̱ndoo matsudáanʼ Satanás muʼni mbá rí tsíyulú ráʼ. Arathá.

¹⁵ Satanás xándoo gatsudáanʼ muʼni mbá rí tsíyulú (Sant. 1:14). Mbaʼin xa̱bu̱ nuni rí nandoo ikhaa rí asndu tséyáá rí ikhaa eyamajkuíí. Mú, índo̱ najmañún rí gajkhun, gíʼmaa muraʼwi̱i̱ tsáa eñún mbuyamajkuíí (Hech. 3:17; 17:30). Á mu nandulúʼ muʼnimbulúʼ kuʼyáá Dios, nda̱a̱ imbo̱o̱ rí Satanás ma̱ndoo maʼni mu xuguajún jmbu náa inuu Dios (Job 2:3; 27:5).

16, 17. a) Xú káʼnii i̱ʼwáʼ rí Satanás gajmíi̱n xa̱bu̱ wéñiʼ xándoo muni rá. b) Náa numuu rí ragíʼmáanʼ mamiñúlú índo̱ muʼtájkáan gakhi̱i̱ rá.

¹⁶ Rígá i̱ʼwáʼ rí Satanás gajmíi̱n xa̱bu̱ wéñiʼ xándoo muni. Mbá xkri̱da, náa Biblia tséxkamaa nimbá náa naʼthí rí ikhiin mbuyáá xú káʼnii endxaʼwáá edxu̱lúʼ ga̱jma̱a̱ rí gíwanʼ a̱jkiu̱lú. I̱ndó Jeobá ga̱jma̱a̱ Jesús maʼngu̱u̱n mbuyáá rígi̱ (1 Sam. 16:7; Mar. 2:8). Mú, ndiéjunʼ erígá índo̱ nuʼtájkáan gakhi̱i̱ rá. Lá gíʼmaa mamiñúlú kuʼyáá Gixa̱a̱ gajmíi̱n xa̱bu̱ wéñiʼ rí mudxawíín rí muʼtájkáan ga̱jma̱a̱ majmúún rígi̱ mu muniulúʼ dí ra̱májánʼ xáʼ. Na̱nguá. Xó má tsímiñulú muʼni ñajunʼ Jeobá numuu rí Gixa̱a̱ ma̱ndoo mbaʼyulu, ma̱ngaa ragíʼmaa mamiñúlú índo̱ nuʼtájkáan gakhi̱i̱ numuu rí ikhaa ma̱ndoo maʼdxawunlu. Náa Biblia naʼthí rí mbaʼin xa̱bi̱i̱ Dios nitajkháan gakhi̱i̱, ga̱jma̱a̱ nda̱a̱ náa nasngájma rí ikhiin nimiñun rí Satanás maʼdxawún (1 Rey. 8:22, 23; Juan 11:41, 42; Hech. 4:23, 24). Á mu nuʼni mbá tsiakii mu muʼni xóo rí naniguʼ Dios, nduʼyáá májánʼ rí Jeobá xániñuʼ rí Gixa̱a̱ maʼniulú nimbá dí ra̱májánʼ kayuʼ (atraxnuu Salmo 34:7). *

¹⁷ Gíʼmáanʼ muniʼnííʼ xa̱bu̱ sia̱nʼ ndrígúlú, mú xáʼyóoʼ mamiñúlú kuʼyáá. Maski ajndu ni̱ndxu̱lú xa̱bu̱ aʼkhá, ma̱ndoo muʼni gajmiúlú ga̱jma̱a̱ tsiakii ndrígóo Jeobá (1 Juan 2:14). Á mu nuʼni gajmiúlú Gixa̱a̱, ikhaa marájñuunʼ náa ikháanʼ (Sant. 4:7; 1 Ped. 5:9). Xó má eʼyáá rí jiáma ga̱jma̱a̱ wa̱ʼxa̱ʼ ni̱ndxu̱ún bi̱ nandoo maʼni rí majngutíguíin. Ndiéjunʼ rí gáʼyóóʼ muni ikhiin mu muni gaʼduunʼ tsáʼkhá ndrígóo Gixa̱a̱ xá. Muriʼña̱a̱ graxe̱ rígi̱ náa imbo̱ʼ artículo.