1, 2. a) Xú káʼnii ekumulú índo̱ nduʼyáá xkri̱da ndrígu̱ún bi̱ tsíniñaʼ rutaraʼa náa kuwa mbaʼin xa̱bu̱ bi̱ tsíñún gudxuun, ga̱jma̱a̱ náa numuu rá. (Atayáá timbá xtiʼkhu.) b) Ndiéjunʼ niʼthí Jesús ga̱jma̱a̱ numuu rí mbáa maʼtáraʼa “na xuajñu” rá. (Atayáá náa nota.)

SERGIO GA̱JMA̱A̱ OLINDA ni̱ndxu̱ún xa̱bu̱ gajmii ga̱jma̱a̱ ni̱ndxu̱ún precursores, ikhiin guáʼdáá itháan rí 80 tsigúnʼ ga̱jma̱a̱ kuwa náa Estados Unidos. Numuu rí na̱ʼkhu̱ xtiñún, naʼniún mingíjyúuʼ magún. Maski ajndu xúʼko̱, ikhiin naguanu a las 7 rí miʼcha̱ náa xuáá náa kuwa mbaʼin xa̱bu̱, naguáju̱n mijngii náa naguáju̱n autobús ga̱jma̱a̱ nuxnaruʼun xa̱bu̱ i̱yi̱i̱ʼ rí nagájnuu náa Biblia. Mba̱yu̱ʼ tsiguʼ má rí kuwa runi rígi̱ mú mbaʼin xa̱bu̱ tsénimbu̱ún kuñún mú ikhiin naguáju̱n má xúʼko̱ ga̱jma̱a̱ nunduʼwa gajmiún bi̱ nduñún. Índo̱ naxnúu a las 12, mañúú egúun náa guʼwún. Rí i̱mba̱ néjtsuu, matangi̱i̱n a las 7 rí miʼcha̱. A̱ngiu̱lú bugi̱ nutaraʼa ajngóo reino mbá majun mbiʼi rí mámbá xmáná rí xúgíʼ tsiguʼ

² Xó má ikhiin, mbaʼin cristianos bi̱ kuwa jmbu náa xúgíʼ numbaaʼ nayegun mba̱yu̱ʼ tsiguʼ náa xuajen náa rí nguáthi̱i̱n xa̱bu̱ endrigú ajngáa rígi̱. Á mu xúʼko̱ tagiʼnii mangáán  nuxnaʼxu tsiakii numuu rí naʼngaʼ. * Xkri̱da ndrígáʼ naxnún tsiakii mbaʼin xa̱bi̱i̱ Dios, asndu bi̱ kuwa runi mba̱yu̱ʼ ñajunʼ Dios. Mbá xkri̱da, atayáá xú káʼnii ethi tikhun superintendentes de circuito: “Índo̱ nataráʼa gajmíi̱nʼ a̱ngiu̱lú bi̱ kuwa jmbu, xkri̱da ndrígu̱ún naxnúʼ tsiakii”, “rí kuwa jmbu naxnúʼ tsiakii mu mataráʼa má xúʼko̱” ga̱jma̱a̱ “xkri̱da ndrígu̱ún na̱jkha̱nú asndu náa a̱jkiu̱nʼ”.

3. Xú káʼnii nindxu̱u̱ ajtsú graxe̱ rí mbuʼyáá, ga̱jma̱a̱ náa numuu rá.

³ Náa artículo rígi̱, mbuʼyáá ajtsú graxe̱ rígi̱: Ndiéjunʼ gáʼnii rí nguáná makáguabáanʼ rá. Xú káʼnii gája̱a̱ rí nuʼtáraʼa rá. Ndiéjunʼ gambáyulú mu xúniʼñáʼ ruʼtáraʼa rá. Graxe̱ rígi̱ maxkaxáanʼlu mu mambúlú ñajunʼ rí Jesús niʼthá ñajunlú muʼni.

4. a) Xú káʼnii nikumu̱u̱ Pablo rí mbaʼin xa̱bu̱ táʼnduun mani̱ndxu̱ún cristianos rá. b) Náa numuu rí nikumu̱u̱ xúʼko̱ xá.

⁴ Rí muʼtáraʼa náa rí nimbáa xa̱bu̱ tsíyoo gáʼdxuun ga̱jma̱a̱ numuu Reino naʼni makáguabáanʼ. Á mu ikháánʼ natagíʼnii rígi̱, mbáa nakruaʼaʼ májánʼ xú káʼnii nikumu̱u̱ Pablo. Ikhaa niʼtáraʼa xóo mbá skíñúʼ gu̱wa̱ʼ tsiguʼ, nimbáñun xa̱bu̱ mu mani̱ndxu̱ún cristianos (Hech. 14:21; 2 Cor. 3:2, 3). Mú táʼngo̱o̱ gáʼni rí mbaʼin judíos mani̱ndxu̱ún cristianos. Mbaʼin turiguíi Pablo ga̱jma̱a̱ asndu nixkháá (Hech. 14:19; 17:1, 4, 5, 13). Ikhaa ndiʼyoo rí xóo niriʼña xa̱bu̱ niʼni gawúunʼ wéñuʼ. Ikhaa niʼthí: “Naxmiéjunʼ wéñuʼ ga̱jma̱a̱ na̱ʼkhu̱ má xúʼko̱ a̱jkiu̱nʼ” (Rom. 9:1-3). Náa numuu nikumu̱u̱ xúʼko̱ xá. Numuu rí niniguʼ wéñuʼ maʼtáraʼa ga̱jma̱a̱ nindoo kaʼñún wéñuʼ xa̱bu̱. Ra̱ʼkhá tháán nixmiéjunʼ kaʼñún judíos, ikha jngó, rúʼko̱ niʼni magawúunʼ wéñuʼ índo̱ ndiʼyoo rí na̱nguá nindúún gundrigú rí nigáwiinʼ a̱jkiu̱u̱n kaʼñún Dios.

5. a) Ndiéjunʼ exkaxáanʼ muʼtáraʼa rá. b) Náa numuu rí nguáná nakumulú rí nakáguabáanʼ rá.

⁵ Xó má Pablo, nuʼtáraʼa numuu rí naxmiéjunlú wéñuʼ kuʼñúún xa̱bu̱ (Mat. 22:39; 1 Cor. 11:1). Nduʼyáá rí bi̱ nuraʼwi̱i̱ muni ñajunʼ Jeobá mbaʼa rí májánʼ gundrigú. Ikha jngó nandulúʼ rí xa̱bu̱ bi̱ kuwa mijngii náa kuwáanʼlu mbuyáá rígi̱. Ikha jngó tséniʼñáaʼ ruʼtáruʼun rí gajkhun ga̱jma̱a̱ numuu Jeobá ma̱ngaa rí nandoo maʼni ga̱jma̱a̱ numún xa̱bu̱ numbaaʼ. Rúʼko̱ nindxu̱u̱ xóo mbá regalo rí na̱jkua̱ kuʼyúlú muxnún ga̱jma̱a̱ nuʼthúún rí mundrigú. Índo̱ ikhiin nuni gaʼduunʼ, ikháanʼ nagawúnlú xóo nikumu̱u̱ Pablo. Náa numuu ekumulú xúʼko̱ rá. Raʼkháa numuu rí ndayúlú fe, nakumulú xúʼko̱ numuu rí nanigulúʼ muʼtáraʼa ga̱jma̱a̱ nandulúʼ kuʼñúún xa̱bu̱. Ikha jngó tséniʼñáaʼ ruʼtáraʼa maski ajndu nguáná nakáguabáanʼ. Mbáa ndxájulú bi̱ mbiʼyuu Elena, bi̱ nindxu̱u̱ precursora mbá skíñúʼ witsu tsiguʼ, naʼthí: “Naʼniuʼ mingíjyúuʼ mataráʼa, mú nda̱yo̱o̱ kaʼwu rí nindxu̱u̱ mbá ñajunʼ rí itháan májánʼ rí ma̱ndoo mani”. Lá ragájkhun rí mbaʼánʼ ma̱ndoo mundxaʼwamíjna̱ ikháá kayúʼ ráʼ.

6. Ndiéjunʼ graxe̱ rí gáxti̱ʼña̱a̱ rá.

⁶ Tséʼniuu má xú káʼnii nindxu̱u̱ xuajen náa nuʼtáraʼa, ma̱ndoo maga̱ja̱a̱ ñajunʼ rí nuʼni. Náa numuu nduʼyáá májánʼ rígi̱ rá. Mu muriʼña̱a̱ graxe̱ rígi̱ rí gíʼdoo wéñuʼ numuu, mbuʼyáá a̱jma̱ xkri̱da rí Jesús niʼthí ga̱jma̱a̱ numuu rí ndayóoʼ muʼtáraʼa má xúʼko̱ (Mat. 13:23). Timbá rí ikhaa nindxu̱u̱ ga̱jma̱a̱ numuu mbá ixu̱u̱ uva.

7. a) Tsáa nindxu̱u̱ bi̱ nañajunʼ, ixu̱u̱ uva ga̱jma̱a̱ ñawúunʼ ixu̱u̱ uva rá. b) Xú káʼnii nindxu̱u̱ graxe̱ rí ndayóoʼ muriʼña̱a̱ rá.

 ⁷ (Atraxnuu Juan 15:1-5, 8). Jesús má niʼthí rí ikhaa nindxu̱u̱ ixu̱u̱ “uva”, Anu̱u̱ bi̱ “nañajun” ga̱jma̱a̱ xa̱bi̱i̱ ni̱ndxu̱ún “mba xugui ñau” ixu̱u̱ uva. Nda̱wa̱á niʼthún apóstoles: “Naguma mba Tateʼ rido ri riga-güeño ri najma naʼ ikanʼla, aʼkue ri makujma ri tsi nasjngun ñajuanʼla”. * Mú ndiéjunʼ nindoo gáʼthi “riga-güeño ri najma naʼ ikanʼla” rá. Nákha ikhú, Jesús táʼthi rí eyoo gáʼthi rúʼko̱, mú niʼthí mbá rí gíʼdoo wéñuʼ numuu rí mambáyulúʼ mbuʼyáá rígi̱.

8. a) Náa numuu eʼyáá rí majma̱a̱ náa ikháanʼ na̱nguá eyoo gáʼthúu̱n rí muʼsngúún xa̱bu̱ rá. b) Xú káʼnii nindxu̱u̱ rí na̱ndu̱ʼu̱lú Dios muʼni rá.

⁸ Jesús niʼthí rígi̱ ga̱jma̱a̱ numuu Anu̱u̱: “Xugui ñau [ixu̱u̱] uva ri tsijma xjndu naʼ Ikun, magruigüi”. Xóo muʼthá, mu Jeobá mbaʼyulú xóo xa̱bi̱i̱, gíʼmaa muʼtáraʼa má xúʼko̱ (Mat. 13:23; 21:43). Ikha jngó índo̱ naʼthí rí marigá rí majma̱a̱ náa ikháanʼ na̱nguá eyoo gáʼthúu̱n muʼsngúún xa̱bu̱ (Mat. 28:19). Náa numuu rí na̱nguá rá. Numuu dí rúʼko̱ maʼndoo gáʼthi rí a̱ngiu̱lú bi̱ naguáju̱n jmbu bi̱ na̱nguá esngúún xa̱bu̱ numuu rí nutaraʼa náa na̱nguá eñún gúdxuun mani̱ndxu̱ún xóo ñawúunʼ ixu̱u̱ uva rí nda̱a̱ rí ejmaa rí niʼthí Jesús. Mú raʼkháa xúʼko̱ phú nindxu̱u̱, numuu rí na̱nguá xóo muʼni kañún xa̱bu̱ mu mudxawíín ajngáa rígi̱. Ma̱ngaa Jeobá nandoo kaʼyulú ga̱jma̱a̱ xándoo kaʼyulú numuu rí tséʼni mbá rí ikháanʼ xándoo muʼnilú. Ikhaa tsendu̱ʼu̱lú muʼni mbá rí xáʼngulú muʼni (Deut. 30:11-14).

9. a) Xú káʼnii nindxu̱u̱ ñajunʼ rí gíʼmaa muʼni mu marigá rí majma̱a̱ náa ikháanʼ rá. b) Ndiéjunʼ xkri̱da gúʼyáá, ga̱jma̱a̱ náa numuu rá.

⁹ Ndiéjunʼ nindxu̱u̱ rí gíʼmaa majma̱a̱ náa ikháanʼ rá. Nindxu̱u̱ mbá rí xúgiáanʼ ma̱ndoo muʼnilú. Ga̱jma̱a̱, ndiéjunʼ ñajunʼ rí Jeobá nixnúlú muʼni xúgiáanʼ bi̱ ni̱ndxu̱lú xa̱bi̱i̱ rá. Rí muʼtáraʼa ga̱jma̱a̱ numuu Reino (Mat. 24:14). * Rígi̱ nasngájma náa xkri̱da ndrígóo bi̱ naʼdu. Guyáá.

10. a) Ndiéjunʼ eyoo gáʼthúu̱n tsígáʼ ga̱jma̱a̱ ku̱ba̱ʼ náa xkri̱da ndrígóo bi̱ naʼdu rá. b) Ndiéjunʼ exná planta ndrígóo trigo rá.

¹⁰ (Atraxnuu Lucas 8:5-8, 11-15). Náa xkri̱da ndrígóo bi̱ naʼdu, tsígáʼ nindxu̱u̱ “ajnga raun Dios”, xóo muʼthá, ajngóo ndrígóo Reino. Ku̱ba̱ʼ nandoo gáʼthúu̱n a̱jkiu̱ún xa̱bu̱. Tsígáʼ rí nijpátrígú náa ku̱ba̱ʼ májánʼ nixkrígú ajmu̱u̱ ga̱jma̱a̱ nirtaximínaʼ mbá planta nuxi̱ʼ. Mbá xkri̱da, mbá planta ndrígóo trigo. Nda̱wa̱á nixná mbá ciento nuthu itháan tsígáʼ. Mú ndiéjunʼ rí naxná planta ndrígóo trigo rá. Lá naxná planta rí itháan ma̱jkha̱ʼ ráʼ. Na̱nguá, rí naxná nindxu̱u̱ tsígáʼ nuxi̱ʼ, rí nda̱wa̱á na̱jkha̱nú naxná nuxi̱ʼ iñuu trigo. Náa xkri̱da rígi̱, mbá tsígáʼ naxná mbá ciento tsígáʼ. Xú káʼnii kagujtuminaʼ rígi̱ ga̱jma̱a̱ ñajunʼ ndrígúlú rá.

11. a) Xú káʼnii kagujtuminaʼ xkri̱da ndrígóo bi̱ naʼdu ga̱jma̱a̱ ñajunʼ rí eʼni rá. b) Xú káʼnii eʼni mu marigá tsígáʼ nuxi̱ʼ ndrígóo Reino rá.

¹¹ Gundxa̱ʼwámi̱jna̱ rí nguáthá tsiguʼ kidíiʼ anu̱lú, ru̱dúlú o tikhun xa̱bi̱i̱ Jeobá nisngúlú rí gajkhun. Ra̱ʼkhá tháán nidxún índo̱ ndiyáá rí nindrígú ajngóo ndrígóo Reino. Ma̱ndoo muʼthá rí nidu tsígáʼ náa mbá ku̱ba̱ʼ májánʼ. Tsígáʼ ni̱jkha̱ ragaja̱a̱ asndu índo̱ xtáa xawii mu maxná xndúu. Ndiéjunʼ rá. Xó má mbá planta naxná tsígáʼ nuxi̱ʼ, raʼkháa planta nuxi̱ʼ, mangáanʼ nuxná tsígáʼ ndrígóo Reino, raʼkhíin nuxunʼ  discípulos. * Xú káʼnii exná rígi̱ rá. Índo̱ nuʼtáraʼa numuu Reino. Mámbá rí nuʼtáraʼa numuu ajngáa rígi̱, nindxu̱u̱ xóo rí muʼdaʼ ikháá má tsígáʼ rí nijuiʼdu náa a̱jkiu̱lú (Luc. 6:45; 8:1). Ikha jngó, xkri̱da rígi̱ naʼsngúlú rí marigá rí majma̱a̱ náa ikháanʼ á mu naʼngulú nuʼtáraʼa má xúʼko̱.

12. a) Ndiéjunʼ ejmañulu ga̱jma̱a̱ numuu xkri̱da ndrígóo ixu̱u̱ uva ga̱jma̱a̱ bi̱ naʼdu rá. b) Xú káʼnii embáyaʼ ikháánʼ rígi̱ rá.

¹² Ndiéjunʼ ejmañulú ga̱jma̱a̱ numuu nájma̱ xkri̱da rígi̱, numuu ixu̱u̱ uva ga̱jma̱a̱ xa̱bu̱ bi̱ naʼdu rá. Rí marigá rí majma̱a̱ náa ikháanʼ tsíyoo gáʼthi rí xú káʼnii guriʼña xa̱bu̱ bi̱ muʼtáruʼun, nandoo gáʼthúu̱n rí xúniʼñáʼ ruʼni rígi̱. Pablo niʼthí rígi̱: “Mámbáa xa̱bu̱ magruigú rí madaʼ xó má ñajunʼ rí niʼni” (1 Cor. 3:8). Xó má eʼyáá, marigá rí makhánulúʼ ga̱jma̱a̱ numuu ñajunʼ rí eʼni, raʼkháa rí muguaʼthi̱i̱n marigá índo̱ nuʼtáraʼa. Mbáa ndxájulú bi̱ mbiʼyuu Matilda, bi̱ naʼni má mbá skíñúʼ tsiguʼ rí nindxu̱u̱ precursora, naʼthí: “Nadxuʼ wéñuʼ índo̱ nda̱yo̱o̱ rí Jeobá maʼni tsajkurámáanʼ ga̱jma̱a̱ numuu tsiakii rí eʼni”.

13, 14. Xó má eʼthí náa Romanos 10:1, 2, náa numuu rí tániñuʼ raʼtáraʼa Pablo índo̱ xa̱bu̱ táʼnduun gúdxawíín ajngáa ndrígóo Reino rá.

¹³ Ndiéjunʼ gambáyulú mu marigá rí majma̱a̱ má xúʼko̱ náa ikháanʼ rá. Ndiʼyáá má xú káʼnii nikumu̱u̱ Pablo índo̱ mbaʼin judíos táʼnduun gúdxawíín ajngáa ndrígóo Reino. Mú takanajkoʼ. Guʼyáá rí niʼthí nda̱wa̱á náa carta rí nikuʼmá náa cristianos bi̱ kuwa náa Roma ga̱jma̱a̱ numuu rí xú káʼnii nikumu̱u̱ ga̱jma̱a̱ numún judíos. Niʼthí: “Rí phú nandoo a̱jkiu̱nʼ ga̱jma̱a̱ rí natha kháñuu Dios ga̱jma̱a̱ numún ikhiin nindxu̱u̱, mu makáwíin. Numuu rí ikhúúnʼ ma̱ndoo mata rí ikháanʼ nandala ku̱ya̱a̱ Dios; mú raʼkháa náa ku̱ma̱ jmbu” (Rom. 10:1, 2). Náa numuu rí tániñuʼ raʼtáruʼun xá.

¹⁴ Timbá, niʼthí rí nixkaxi̱i̱ a̱jkiu̱u̱n maʼni numuu rí xúʼko̱ phú nindoo a̱jkiu̱u̱n,  xóo muʼthá, numuu rí nindoo gajkhun rí tikhun judíos maguma káwíin (Rom. 11:13, 14). Raga̱jma̱, nisngájma rí niʼthá kháñuu Dios rí mambáñun judíos rí mundrigú ajngóo ndrígóo Reino. Ga̱jma̱a̱ ragajtsú, xóó niʼthí: “Nangajuala ku̱ya̱a̱ Dios”. Pablo ndiʼyoo rí xú káʼnii nindxu̱u̱ mámbáa xa̱bu̱. Ga̱jma̱a̱ ikhaa ni̱jkha̱nú ndiʼyoo májánʼ rí ngajua rí phú ikhaa ma̱ndoo maʼni rí mbáa xa̱bu̱ mani̱ndxu̱u̱ mbáa cristiano bi̱ ma̱ngaa magiʼdoo ngajua.

15. Xú káʼnii gándoo guʼyaridáá xkridoo Pablo rá. Arathá tikhuu rí xú káʼnii eni a̱ngiu̱lú.

¹⁵ Xú káʼnii gándoo guʼyaridáá má xúʼko̱ xkri̱da ndrígóo Pablo rá. Ginii, mbaʼyóoʼ magiwa̱nʼ náa a̱jkiu̱lú rí nandulúʼ muxkamiin ‹bi̱ nandún makuwá kámuu mbiʼi›. Raga̱jma̱, guʼtákáñii Jeobá mambáʼtoo a̱jkiu̱ún xa̱bu̱ bi̱ gajkhun nandún majmañún ga̱jma̱a̱ numuu ikhaa (Hech. 13:48; 16:14). Silvana bi̱ nindxu̱u̱ mbáa precursora itháan rí mbá skíñúʼ gu̱wa̱ʼ tsiguʼ, naʼthí: “Nákha xóó tséjkhánú náa xkrugua, na̱ndo̱ʼo̱o̱ Jeobá rí mambáyuʼ mandxa̱ʼo̱o̱ májánʼ edxu̱ʼ”. Mangáanʼ guʼtákáñii Dios rí ángeles magún kudáanʼ náa kuwa xa̱bu̱ bi̱ májánʼ a̱jkiu̱ún (Mat. 10:11-13; Rev. 14:6). Mbáa ndxájulú bi̱ mbiʼyuu Robert, bi̱ naʼni mbá skíñúʼ gu̱wa̱ʼ tsiguʼ rí nindxu̱u̱ precursor naʼthí: “Ra̱ʼkhá tháán májánʼ rí natiejunʼ gajmiáanʼ ángeles bi̱ nduyáá ndiéjunʼ erígá náa vida ndrígu̱ún xa̱bu̱”. Ga̱jma̱a̱ ragajtsú, nuʼgími̱jna̱ mbuʼyáá rí májánʼ náa xa̱bu̱. Mbáa bi̱ kayá edxu̱u̱ bi̱ mbiʼyuu Carl, bi̱ naʼni itháan má rí mbá a̱jma̱ skiñúʼ gu̱wa̱ʼ tsiguʼ má nijngúun iyááʼ, naʼthí: “Ndaʼyáaʼ asndu xú káʼnii má rí gasngájma rí xa̱bu̱ gíʼdoo mbá májánʼ a̱jkiu̱u̱n, á mu nanduʼwá, á mu guabaaʼ eyexi, o naʼni mbá graxe̱ rí gajkhun nandoo mbaʼyoo”. Á mu nuʼni rígi̱, muʼtáraʼa má xúʼko̱ xó má niʼni Pablo.

16, 17. a) Ndiéjunʼ ikha gándoo gajmañulú rí naʼthí náa Eclesiastés 11:6 rá. b) Arathá mbá xkri̱da rí xú káʼnii gándoo gambáñun ñajunʼ rí kuwáanʼ ru̱ʼni̱ bi̱ nduyulú.

¹⁶ Maski ajndu nguáná ajngáa rí nuʼtáraʼa tséjkha̱nú náa a̱jkiu̱ún xa̱bu̱, ragíʼmaa mbuʼyáá asndu xóo nda̱a̱ numuu rí muʼdu tsígáʼ (atraxnuu Eclesiastés 11:6). * Gajkhun má rí mbaʼin xa̱bu̱ tsedxawunlú, mú nduyulú. Nduyáá rí májánʼ xtíñúlú eʼgíʼ, rí májánʼ a̱jkiu̱lú ga̱jma̱a̱ rí nadxulú má xúʼko̱. Mbáa nda̱wa̱á rí xóo eʼnilú maʼni rí tikhun xa̱bu̱ mundxa̱ʼwa̱a̱ i̱mba̱ núthu edxu̱ún ga̱jma̱a̱ numulú. Rúʼko̱ rí ndiyáá Sergio ga̱jma̱a̱ Olinda, bi̱ niʼthá ga̱jma̱a̱ numún náa kutriga̱ timbá.

¹⁷ Ikhaa naʼthí: “Túʼgua̱xu xuáá mba̱yu̱ʼ mbiʼi ga̱jma̱a̱ numuu rí niʼniuxu nandii. Índo̱ nigutangáanʼxu, xa̱bu̱ nuraxuxu ndiéjunʼ nigíʼniinxu ga̱jma̱a̱ rí ndiñáanʼxu”. Ga̱jma̱a̱ Olinda nanduʼwá índo̱ naʼthí: “Xa̱bu̱ bi̱ nagún ku̱ñu̱u̱n carro nuraxáanʼxu ga̱jma̱a̱ tikhun nutuxu asndu náa trigi̱i̱n: ‹Májánʼ ñajunʼ rí kuwáanʼ runila›. Asndu nindu̱ʼu̱xu revistas”. Mbá mbiʼi, xa̱bu̱ gajmii bugi̱ niʼniún tsiánguá rí nigíʼniin. Mbáa xa̱bu̱ niwi̱ji̱ náa exhibidor ga̱jma̱a̱ nixnúún ri̱ʼi̱ ga̱jma̱a̱ nixníin núma̱aʼ ga̱jma̱a̱ numuu ñajunʼ rí kuwa runi.

18. Náa numuu rí nandaʼ marataráʼa má xúʼko̱ rá.

¹⁸ Náa Biblia naʼthí: “Xáyáa xa̱ʼ”. Xúʼko̱ kaʼnii, índo̱ gakuwáanʼ ruʼdu tsígoʼ Reino, muyambáá mbá chíʼgíʼ náa ñajunʼ rí “miʼtaraʼa” náa xúgíʼ xuajen (Mat. 24:14). Mú itháan gakuwáanʼ gagi índo̱ gúʼyáá rí naniguʼ Jeobá rí kuwáanʼ ru̱ʼni̱, numuu rí ikhaa nandoo kaʼñún xúgínʼ bi̱ tsíniñaʼ rutaraʼa.