1, 2. a) Náa numuu rí naʼngu̱u̱n jiáma ga̱jma̱a̱ wa̱ʼxa̱ʼ muni gajmiún Satanás ga̱jma̱a̱ xa̱bu̱ wéñiʼ rá. (Atayáá timbá xtiʼkhu.) b) Ndiéjunʼ gúʼyáá náa artículo rígi̱ rá.

APÓSTOL PABLO niʼthí rí cristiano nindxu̱u̱ xóo mbáa soldado bi̱ naxmínaʼ ga̱jma̱a̱ imba̱a̱. Mú raʼkháa xúʼko̱ nindxu̱u̱ guerra ndrígúlú. Bi̱ guáʼdáanʼ sia̱nʼ ni̱ndxu̱ún Satanás ga̱jma̱a̱ xa̱bu̱ wéñiʼ. Maski ajndu na̱nguá xóo mbuʼñún, ikhiin gajkhun kuwa ga̱jma̱a̱ najmañún wéñuʼ muxmijná. Nakujma rí asndu xóo xáʼngulú gúʼnilu gajmiúlú, itháan bi̱ ni̱ndxu̱ún jiáma. Mú, lá xúʼko̱ nindxu̱u̱ ráʼ. Lá maʼngu̱u̱n jiáma bugi̱ muni gajmiún xa̱bu̱ bi̱ tsekujmiin ráʼ. Maʼngu̱u̱n, ga̱jma̱a̱ xúʼko̱ má kuwa runi. Xú káʼnii eʼngu̱u̱n eni rígi̱ xá. Numuu rí naguáʼdáá “má xúʼko̱ tsiakii náa Señor” Jeobá. Ma̱ngaa, numuu rí ni̱ndxu̱ún soldados bi̱ najmañún, najmún “xúgíʼ ajua̱nʼ rí na̱ʼkha̱ náa Dios” (atraxnuu Efesios 6:10-12). *

² Índo̱ Pablo niʼthí ga̱jma̱a̱ numuu rígi̱, mbáa xtáa randxa̱ʼwáminaʼ  ajua̱nʼ rí nugíʼ soldados romanos (Hech. 28:16). Índo̱ gúʼyáá mbá májánʼ xkri̱da rígi̱, guʼyáá rí nuthi tikhun jiáma ga̱jma̱a̱ numuu xkujndu rí eraʼníí ga̱jma̱a̱ xú káʼnii embáñun rí majmúún ajua̱nʼ ndrígu̱ún cristianos.

3, 4. Xú káʼnii embriguii rí gajkhun rí na̱ʼkha̱ náa Biblia ga̱jma̱a̱ cinturón ndrígu̱ún soldados romanos rá.

³ (Atraxnuu Efesios 6:14). * Índo̱ Pablo niʼthí rí mbaʼyóoʼ ‹muguaʼdáá náa smidulú rí gajkhun›, nindoo gáʼthi ga̱jma̱a̱ numuu cinturón rí nugíʼ soldados romanos. Cinturón rígi̱ gíʼdoo placa rí nindxu̱u̱ metal rí nañewu̱u̱n smídúu ga̱jma̱a̱ kiʼni mu mambáyúu magu̱ coraza. Ma̱ngaa náa xtá gíʼdoo ganchos rí migujkhuʼ náa najuaʼan espada ga̱jma̱a̱ chílú. Rí mayéʼga mbá cinturon rí xtoʼóo májánʼ náa smídúu naʼni rí soldado xámiñuu mu maʼga̱ gaxmínaʼ.

⁴ Xúʼko̱ má embriguii, rí gajkhun rí najmañulúʼ náa Ajngá rawunʼ Dios nañewulú náa rí naʼni gawúnlú rí naʼsngáa religión dí ragájkhun (Juan 8:31, 32; 1 Juan 4:1). Índo̱ itháan eyulú kuʼyáá dí gajkhun, itháan xáʼniulu mingíjyúuʼ majmulúʼ rí “jmbu dí nañewu̱u̱n” a̱jkiu̱lú, xóo muʼthá, makuwáanʼ xó má e̱nda̱ʼa̱ xtángoo ndrígóo Dios (Sal. 111:7, 8; 1 Juan 5:3). Ma̱ngaa á mu nakru̱ʼu̱lú májánʼ ajngáa rí gajkhun, xáʼni mingíjyúuʼ muʼthá ga̱jma̱a̱ numuu náa inún xa̱bu̱ bi̱ tsíñún gúdxuun (1 Ped. 3:15).

5. Náa numuu rí gíʼmaa muʼthá má xúʼko̱ rí gajkhun rá.

⁵ Á mu rí kuaʼdáá náa smídulu “dí gajkhun” rí na̱ʼkha̱ náa Biblia, makuwáanʼ xó má eʼsngáa ikhí ga̱jma̱a̱ muʼthá má xúʼko̱ rí gajkhun. Náa numuu nuʼni gaʼduunʼ nduwaʼ rá. Numuu rí nindxu̱u̱ mbá tsáʼkhá rí najmuu Satanás. Bi̱ naʼni nduwaʼ naʼni gachíminaʼ má ikhaa ga̱jma̱a̱ naʼni gawúunʼ eʼwíínʼ (Juan 8:44). Ikha jngó, maski ajndu ni̱ndxu̱lú xa̱bu̱ aʼkhá nuʼni asndu xó má eʼngulu mu xúʼni̱ nduwaʼ nditháan (Efes. 4:25). Gajkhun má rí nguáná maʼni mingíjyúuʼ. Abigail, bi̱ gíʼdoo 18 tsiguʼ naʼthí: “Mbáa nguáná nakujmaa rí xágiʼdoo numuu muʼthá rí gajkhun, itháan índo̱ rí nduwaʼ ma̱ndoo mambáyaʼ”. Mú náa numuu rí naʼniminaʼ mu xáʼni nduwaʼ xá. Ikhaa naʼthí: “Numuu rí xúʼko̱ gúʼdoo mbá ku̱ma̱ májánʼ náa iduu Jeobá, náa anu̱ʼ, náa ru̱dúʼ ga̱jma̱a̱ bi̱ nambáxuʼ gajmíi̱nʼ nduyáá rí natha rí gajkhun”. Ga̱jma̱a̱ mbáa dxáʼgú bi̱ gíʼdoo 23 tsiguʼ bi̱ nagumbiʼyuu Victoria naʼthí: “Índo̱ naratá rí gajkhun ga̱jma̱a̱ naratá rí natanimbaaʼ mutsijmáán. Mú nañambáá wéñuʼ: Ma̱ndoo matanimbaaʼ xtayaminaʼ, maku̱ma̱ʼ rí xtaa mijngii ga̱jma̱ʼ Jeobá ga̱jma̱a̱ xa̱bu̱ bi̱ nandún kuyaaʼ mbuyamajkuaʼ”. Xánindxu̱u̱ ndíí á mu natruʼwáá májánʼ smídaaʼ ga̱jma̱a̱ cinturón rí gajkhun.

6, 7. Xú káʼnii embriguii rí jmbu ga̱jma̱a̱ mbá coraza rá.

⁶ Nákha siglo timbá, mbá coraza rí najmún soldados romanos kiʼni ga̱jma̱a̱ ajua̱nʼ ndrígóo hierro rí krunguxi. Tikhuu na̱jkha̱ kraʼá ga̱jma̱a̱ nagomiʼ mu magujtuun xa̱ʼ awúún ga̱jma̱a̱ smídún, ga̱jma̱a̱ i̱ʼwáʼ na̱jkha̱ náa xpajpún. Ajua̱nʼ rígi̱ nuruʼwa̱a̱ ga̱jma̱a̱ xtá rí gíʼdoo ganchos ga̱jma̱a̱ ajua̱nʼ ndrígóo metal rí naxtoʼwóo ga̱jma̱a̱. Gajkhun má rí coraza tséniñuʼ mabañimínaʼ májánʼ soldado, mú ma̱ngaa narikhoo espada ga̱jma̱a̱ flecha mu xáʼni gawúunʼ a̱jkiu̱u̱n ga̱jma̱a̱ i̱ʼwáʼ dí rígá náa awúu̱n. Ikha jngó ra̱ʼkhá tháán nigiʼdoo numuu mbuyáá tsumáá á mu ajua̱nʼ kaxtoʼwóo májánʼ ga̱jma̱a̱ á mu kugúwunʼ májánʼ.

⁷ Coraza nandoo gáʼthúu̱n xtángoo ndrígóo Dios rí nañewu̱u̱n a̱jkiu̱lú (Prov. 4:23). Xó má mbáa soldado xariʼkhu̱u̱ coraza mu magíʼ mbá rí na̱nguá májánʼ, mangáanʼ xuriʼkhu̱u̱ xtángoo ndrígóo Dios ga̱jma̱a̱ ku̱ma̱ ndrígúlú  ikháanʼ. Ku̱ma̱ ndrígúlú nartumuu ga̱jma̱a̱ xáʼngo̱o̱ gañeunlú xó má kaʼyoo (Prov. 3:5, 6). Ikha jngó, gíʼdoo wéñuʼ numuu mbuʼyáá tsu̱ma̱ rí ajua̱nʼ ndrígóo coraza mañewu̱u̱n májánʼ a̱jkiu̱lú.

8. Ndíjkha gíʼdoo numuu muʼnimbulúʼ xtángoo ndrígóo Jeobá rá.

⁸ Lá naku̱ma̱ʼ nguáná rí xtángoo ndrígóo Dios na̱nguá eniñaʼ matani rí nandaʼ ráʼ. Daniel, bi̱ gíʼdoo 21 tsiguʼ naʼthí: “Bi̱ nusngóʼ ga̱jma̱a̱ bi̱ nanigajmaa gajmíi̱nʼ nunduʼwajmún numuu rí nani rí naʼthí náa Biblia. Nirígá mbiʼi rí nánguá nikumuʼ kayamínaʼ ga̱jma̱a̱ nixtáá gíná wéñuʼ”. Ndiéjunʼ nimbáyúu mu maxtáa májánʼ xá. Ikhaa naʼthí: “Nda̱wa̱á ni̱jkhánú ndi̱yo̱o̱ xú káʼnii eyambáá rí matanimbaaʼ xtángoo ndrígóo Jeobá. Tikhun ‹bi̱ nimbáxuʼ gajmíi̱nʼ› nigi̱ʼdi̱i̱ nijmún drogas ga̱jma̱a̱ eʼwíínʼ niniñaaʼ runigajmaa. Ra̱májánʼ wéñuʼ rí nigíʼniin. Jeobá nañewu̱nlú”. Mbáa dxáʼgú bi̱ gíʼdoo 15 tsiguʼ bi̱ mbiʼyuu Madison, ikhaa naʼthí: “Naʼniuʼ gakhi̱i̱ manimbooʼ ka̱yo̱o̱ Jeobá ga̱jma̱a̱ xáni xóo rí nuni bi̱ nanigajmaa gajmíi̱nʼ xóo rí nanigu̱nʼ ikhiin”. Ndiéjunʼ eʼni mu maʼngo̱o̱ maraʼnuu rígi̱ xá. Ikhaa nariʼña̱a̱: “Nani marmáʼáan a̱jkiu̱nʼ rí nayéjkha mbiʼyuu Dios ga̱jma̱a̱ rí tsáʼkhá rí nagíʼ Satanás nindxu̱u̱ rí najmuu mu majpátrigun. Índo̱ naʼngoʼ naraʼnuu mbá tsáʼkhá naʼni rí maxtáá tsímáá”.

9-11. a) Xú káʼnii raxtá rí najngrúʼulú bi̱ ni̱ndxu̱lú cristianos rá. b) Ndiéjunʼ gíʼmaa muʼni mu muʼtáraʼa itháan májánʼ rá.

⁹ (Atraxnuu Efesios 6:15). * Soldado bi̱ tsingróʼoo botas na̱nguá xtáa xawii mu maʼga̱ gaxmínaʼ. Botas nindxu̱u̱ xóo raxtá rí krunguxi ajtsú xtá rí nagiwa̱nʼ májánʼ rajkúu mbáa soldado. Ki̱ʼni̱ májánʼ mu maʼngo̱o̱ itháan mba̱yu̱ʼ.

¹⁰ Soldados romanos najngruʼun botas mu magún guxmijná náa guerra, mú bi̱ ni̱ndxu̱lú cristianos nuʼgíʼ mbá raxtá rí muʼtáraʼa ajngáa rí tsímáá (Is. 52:7; Rom. 10:15). Maski ajndu xúʼko̱ ndayúlú tsiakii mu muʼthá índo̱ nandoo. Mbáa dxámá bi̱ gíʼdoo 20 tsiguʼ bi̱ mbiʼyuu Bo, ikhaa naʼthí: “Nákha ginii namiñuʼ matarúʼun bi̱ nanigajmaa gajmíi̱nʼ. Mbáa mu nati̱yu̱ʼ. Tséyóo náa numuu nikumuʼ xúʼko̱. Rí xúgi̱ naniguʼ wéñuʼ matarúʼun bi̱ guáʼdáá ikháá má tsiguʼ xóo rí gúʼdoo ikhúúnʼ”.

¹¹ Mbaʼin jiáma nduyáá rí nutaraʼa itháan májánʼ índo̱ nuniratamijná. Ndiéjunʼ gándoo gátani ikháánʼ rá. Julia, bi̱ gíʼdoo 16 tsiguʼ naʼthí: “Índo̱ na̱jkháaʼ gánigajmaa, kagu̱ má xúʼko̱ i̱yi̱i̱ʼ náa amuʼ, ga̱jma̱a̱ nadxawun rí nuthi ga̱jma̱a̱ rí nunimbu̱ún bi̱ nanigajmaa gajmíi̱nʼ. Rúʼko̱ nambáyuʼ mandxa̱ʼwa̱mínáʼ rí xóo ma̱ndoo mambáñun. Á mu ninirataminaʼ májánʼ, ma̱ndoo mathu̱u̱n rí mambáñun”. Mbáa dxáʼgú bi̱ gíʼdoo 23 tsiguʼ bi̱ mbiʼyuu Makenzie, ikhaa naʼthí: “Á mu májánʼ a̱jkia̱nʼ ga̱jma̱a̱ á mu májánʼ etadxawíín, ma̱ta̱ya̱a̱ rí egíʼnii bi̱ natanigajmaa gajmiáanʼ. Naʼgíʼ nagúxnuu xúgíʼ i̱yi̱i̱ʼ rí nagájnuu ga̱jma̱a̱ numún jiáma ga̱jma̱a̱ wa̱ʼxa̱ʼ. Xúʼko̱ gándoo gasngajmún mbá rí mambáñun rí na̱ʼkha̱ náa Biblia o náa jw.org”. Xó má eʼyáá rí muʼniratamijná mu muʼtáraʼa, nindxu̱u̱ xóo rí majngrúʼulú raxtá rí naraʼnulú májánʼ.

12, 13. Ndiéjunʼ nindxu̱u̱ tikhuu “dí ra̱májánʼ” rí najmuu Satanás náa ikháanʼlu rá.

¹² (Atraxnuu Efesios 6:16). * Escudo rí kuya̱ romanos nindxu̱u̱ mba̱a̱ rí nañewu̱u̱n náa xpajpún asndu náa ragómiuún. Najmaa mu marikhoo espada ga̱jma̱a̱ flecha ga̱jma̱a̱ i̱ʼwáʼ ajua̱nʼ.

 ¹³ Tikhuu “dí ra̱májánʼ” rí Satanás ma̱ndoo majmuu náa ikháánʼ nindxu̱u̱ nduwaʼ ga̱jma̱a̱ numuu Jeobá, rí tsixmiéjunʼ kaʼyaʼ ga̱jma̱a̱ rí tsíyoo kaʼyaʼ. Mbáa dxáʼgú bi̱ mbiʼyuu Ida bi̱ gíʼdoo 19 tsiguʼ naʼthí: “Nguáná naku̱mu̱ʼ rí Jeobá mitsínguánʼ xtáa náa ikhúúnʼ ga̱jma̱a̱ rí tsíyoo mambaxúʼ ga̱jmu̱ʼ”. Xú káʼnii eʼni ga̱jma̱a̱ rí naku̱mu̱u̱ xá. Ikhaa naʼthí: “Reunión nindxu̱u̱ xóo mbá inyección rí mambáyúu fe ndrígóʼ. Nákha ginii i̱ndó na̱jkhá gáʼgunʼ ga̱jma̱a̱ nditháan tsikuxí ñawúunʼ. Nikumuʼ rí nimbáa tseʼyamajkhuu comentario rí naxna. Mú rí xúgi̱ nanirataminaʼ májánʼ mu maʼgá náa nagimbáanʼ ga̱jma̱a̱ naʼgíʼ nariʼña̱a̱ a̱jma̱ o ajtsú nuthu. Xóó naʼniuʼ mingíjyúuʼ, mu índo̱ rí naʼgíʼ nani, naʼni maxtáá itháan májánʼ. Ma̱ngaa a̱ngiu̱lú nuxnuʼ itháan tsiakii. Mámbá rí nagájnaʼ náa reunión naku̱mu̱ʼ rí Jeobá nandoo kaʼyoʼ”.

14. Ndiéjunʼ rí gíʼdoo numuu eʼsngúlúʼ rí nigíʼnuu Ida rá.

¹⁴ Rí nigíʼnuu Ida naʼsngúlúʼ mbá rí gíʼdoo numuu. Escudo rí kuda soldados romanos nindxu̱u̱ mba̱a̱, mú escudo ndrígóo fe ma̱ndoo maʼni itháan mba̱a̱ o itháan chíʼgíʼ. Ikháanʼ kaʼyulú muʼni̱i̱ mba̱a̱ o muʼni̱i̱ chíʼgíʼ (Mat. 14:31; 2 Tes. 1:3). Ikha jngó gíʼdoo wéñuʼ numuu rí muʼni maʼni itháan gújkhúʼ fe ndrígúlú.

15, 16. Xóo embríguii rí kuaʼti̱i̱n ga̱jma̱a̱ mbá casco rá.

¹⁵ (Atraxnuu Efesios 6:17). * Casco ndrígu̱ún soldados romanos kiʼni gajunʼ mu mañewu̱u̱n edxu̱u̱, aphuu ga̱jma̱a̱ inuu. Tikhuu casco gíʼdoo ñuñuu mu muyégun náa ñawúunʼ.

 ¹⁶ Xó má casco nañewu̱u̱n náa edxu̱u̱ soldado, “rí naʼni muguaʼthi̱i̱n rí makáwáanʼ” nañewu̱u̱n ku̱ma̱ ndrígúlú, xóo rí nundxa̱ʼwa̱míjna̱ (1 Tes. 5:8; Prov. 3:21). Rí kuaʼti̱i̱n mambáyulúʼ mbuʼyáá rí naʼthí Dios maxná ga̱jma̱a̱ awáán gúʼyáá xkujndu (Sal. 27:1, 14; Hech. 24:15). Mu casco rí na̱ʼkha̱ náa Dios mañewu̱nlú gíʼmaa murígulú raʼkháa rí mbuʼyáá kuejñúlú. Xó muʼthá, rí kuaʼti̱i̱n gíʼmaa mbuʼyáá rí gajkhun nindxu̱u̱.

17, 18. a) Xú káʼnii gándoo gáʼni Satanás mu xájmulú casco rí na̱ʼkha̱ náa Dios rá. b) Xú káʼnii gándoo gusngajmá rí tseʼniñamíjná mu maʼni nduwánʼ Satanás rá.

¹⁷ Satanás ma̱ndoo maʼni rí ikháanʼ xájmulú casco rí na̱ʼkha̱ náa Dios. Xú káʼnii eʼni xá. Gundxaʼwamíjna̱ rí niʼni ga̱jma̱a̱ numuu Jesús. Mbáa ndiʼyoo májánʼ rí Jesús gíʼthu̱u̱n maʼtáñajunʼ nda̱wa̱á náa numbaaʼ rígi̱. Mú ginii ndiyóoʼ mamínuʼ ga̱jma̱a̱ makhañúu, ga̱jma̱a̱ nda̱wa̱á magiʼthu̱u̱n mbiʼi rí niʼthí má Jeobá maʼtáñajunʼ. Ikha jngó Gixa̱a̱, nigíʼ tsáʼkhá náa inuu mu maʼni itháan nacha̱ rí gíʼthu̱u̱n maʼni. Niʼthúu̱n rí á mu i̱ndó ndaʼyamajkuu mbá miʼtsú ma̱ndoo magiʼdoo nacha̱ xúgíʼ rígi̱ (Luc. 4:5-7). Ikhaa kayúʼ, Satanás ndaʼyoo rí Jeobá nakudaminaʼ maxnúlúʼ mbá numbaaʼ nuxi̱ʼ. Mú ginii ndayóoʼ muguaʼthi̱i̱n ga̱jma̱a̱ mbáa asndu muraʼníí xkujndu. Ikha jngó Gixa̱a̱ nagíʼ tsáʼkhá inulú mu makuwáanʼ májánʼ xúgi̱. Nandoo rí mbuʼyáaʼ ginii mbújkha̱a̱ ga̱jma̱a̱ muniʼñáaʼ kidíiʼ Reino (Mat. 6:31-33).

¹⁸ Mbaʼin jiáma ga̱jma̱a̱ wa̱ʼxa̱ʼ bi̱ ni̱ndxu̱ún cristianos tsiniñami̱jna̱ rí maʼni nduwiinʼ Satanás. Mbá xkri̱da, mbáa dxáʼgú bi̱ gíʼdoo 20 tsiguʼ bi̱ mbiʼyuu Kiana naʼthí: “Nda̱yo̱o̱ rí i̱ndó Reino ndrígóo Dios maʼngo̱o̱ maʼnimbánuu xúgíʼ xkujndu ndrígúlú”. Ndiéjunʼ eyambáá rí kuaʼti̱i̱n rí xóo nundxa̱ʼwa̱míjna̱ ga̱jma̱a̱ rí nuʼni rá. Ikhaa nariʼña̱a̱: “Rí marigá Ku̱ba̱ʼ mitsaan nambáyuʼ mu maʼgíiʼ manimbánuu metas rí gúʼdoo. Na̱nguá ejmuʼ rí najmañuʼ nani mu magúʼdoo mbújkha̱a̱ o maʼgánú magúʼdoo itháan ñajunʼ náa mbá empresa. Rí phú nani, najmuʼ mbiʼi ndrígóʼ ga̱jma̱a̱ tsiakii ndrígóʼ mu mani itháan ñajunʼ Dios”.

19, 20. Xú káʼnii gándoo gúʼni mu majmulúʼ itháan májánʼ Ajngá rawunʼ Dios rá.

¹⁹ Índo̱ Pablo niʼnirámáʼ carta náa inún efesios, bi̱ soldados romanos najmún mbá espada mu muxmijná gajmiún mbáa, rí mbaʼ naʼni 50 centímetros. Soldados ma̱ndoo majmúún májánʼ espada á mu nuniratamijná xúgíʼ mbiʼi.

²⁰ Pablo niʼni mbriguii Ajngá rawunʼ Dios xó mbá espada rí Jeobá nixnúlú. Ikha jngó gíʼdoo rí majmulúʼ májánʼ índo̱ numbáyii rí nuʼnimbulúʼ o índo̱ nuʼgíʼ nuriʼkhu̱u̱ rí endxaʼwamíjna̱ (2 Cor. 10:4, 5; 2 Tim. 2:15). Xú káʼnii gándoo majmañaaʼ majmaʼ itháan májánʼ rá. Sebastian, bi̱ gíʼdoo 21 tsiguʼ naʼthí: “Índo̱ nagúxnuu Biblia naniraʼmáʼ mbá versículo náa mámbá capítulo ga̱jma̱a̱ mbá lista ndrígóo texto rí naniguʼ. Ga̱jma̱a̱ xúʼko̱ mbóó endxaʼwamínáʼ ga̱jmu̱ʼ Jeobá”. Daniel, bi̱ niʼthá ga̱jma̱a̱ numuu náa kutriga̱ 8, naʼthí: “Índo̱ xtáá ragúxnuu Biblia na̱jkhá raraʼwi̱i̱ versículos rí gambáñun xa̱bu̱ náa natarúʼun. Nda̱yo̱o̱ rí májánʼ eriʼña̱ índo̱ nduyáá dí ra̱ʼkhá tháán enigua̱ʼ Biblia ga̱jma̱a̱ natani asndu xó má eʼngo̱o̱ mu matambáñun”.

21. Ndíjkha jngó ragíʼmaa mamiñúlú kuʼyáá Satanás gajmíi̱n xa̱bu̱ wéñiʼ ndrígio̱o̱ xá.

²¹ Rí nuthi jiáma ga̱jma̱a̱ wa̱ʼxa̱ʼ náa artículo rígi̱ nasngájma dí ragíʼmaa mamiñúlú kuʼyáá Satanás ga̱jma̱a̱ xa̱bu̱ wéñiʼ. Ikhiin guáʼdáá tsiakii, mú maʼngulú muʼni gajmiúlú. Ga̱jma̱a̱ ma̱ndoo makhañún. Nacha̱ má gaxtuguariʼin ga̱jma̱a̱ nándáa rí guni índo̱ gáʼtañajunʼ Cristo mbá Mil tsiguʼ. Nda̱wa̱á maguma gámbíin (Rev. 20:1-3, 7-10). Nuniʼnííʼ bi̱ gíʼdáanʼ sia̱nʼ ga̱jma̱a̱ tsáʼkhá ndrígóo ma̱ngaa rí nandoo maʼni. Mú ma̱ndoo muguajún jmbu náa inuu Jeobá ga̱jma̱a̱ tsiakii ndrígóo mambáyulúʼ mu muguajún jti̱i̱n Gixa̱a̱.