1, 2. a) Ndiéjunʼ niʼthún Jesús xa̱bi̱i̱ índo̱ inuu makhañúu xá. (Atayáá timbá xtiʼkhu.) b) Ndíjkha jngó gíʼdoo numuu mbuʼyáá májánʼ náa numuu rí nuʼtáraʼa rá. c) Ndiéjunʼ gúʼyáá rá.

MBRUʼUN rí inuu makhañúu Jesús niʼthímijna mba̱yu̱ʼ gajmíi̱n apóstoles ndrígio̱o̱. Niʼthún rí nandoo kaʼñún wéñuʼ. Ga̱jma̱a̱ xó má ndiʼyáá náa artículo rí ninújngoo ikhaa niʼthí rí nindxu̱u̱ xóo mbá ixu̱u̱ uva. Xúgi̱ kaʼnii nixnúún tsiakii xa̱bi̱i̱ mu xúniñaʼ rutaraʼa, xóo muʼthá, rí mutaraʼa má xúʼko̱ ga̱jma̱a̱ numuu Reino (Juan 15:8).

² Mú Jesús raʼkháa i̱ndó niʼthún rí gíʼmaa muni, ma̱ngaa niʼthún náa numuu gíʼmaa muni. Niʼthún náa numuu dí ragíʼmaa muniñaʼ rutaraʼa. Ndíjkha jngó gíʼdoo numuu mbuʼyáá májánʼ náa numuu e̱ʼni̱ rígi̱ rá. Numuu dí rígi̱ maxkaxáanʼ ‹muʼtáraʼa náa xúgíʼ xuajen› (Mat. 24:13, 14). Ikha jngó, mbuʼyáá a̱jkhu̱ numuu rí naxná náa Biblia mu muʼtáraʼa. Ma̱ngaa muʼthá ga̱jma̱a̱ numuu mbá a̱jkhu̱ regalo rí naxnúlú Jeobá mu xúniʼñáʼ ruʼtáraʼa.

3. a) Xó má eʼthí náa Juan 15:8, náa numuu rí nuʼtáraʼa rá. b) Ndiéjunʼ eyoo gáʼthúu̱n uvas náa xkri̱da rí nigíʼ Jesús, ga̱jma̱a̱ náa numuu nindxu̱u̱ mbá xkri̱da májánʼ rá.

³ Rí gíʼdoo itháan numuu mu muʼtáraʼa nindxu̱u̱ rí xúʼko̱ nuʼni  mba̱a̱ Jeobá ga̱jma̱a̱ nuʼni kaʼwi̱i̱ mbiʼyuu (atraxnuu Juan 15:1, 8). Guʼyáá rí náa xkri̱da rígi̱ Jesús niʼthí rí Anu̱u̱ nindxu̱u̱ xóo mbáa xa̱bu̱ bi̱ naʼdu uvas. Ikhaa niʼthí rí nindxu̱u̱ xóo ixu̱u̱ uva ga̱jma̱a̱ niʼthí rí xa̱bi̱i̱ ni̱ndxu̱ún xóo ñawúunʼ ixu̱u̱ uva (Juan 15:5). Ikha jngó uvas nindxu̱u̱ mbá májánʼ xkri̱da rí nuni majma̱a̱ cristianos ga̱jma̱a̱ numuu Reino. Jesús niʼthún apóstoles ndrígio̱o̱: “Naguma mba Tateʼ rido ri riga-güeño ri najma naʼ ikanʼla”. Ikháanʼlu nuʼni mba̱a̱ Jeobá índo̱ nuʼtáraʼa numuu Reino asndu xó má eʼngo̱o̱, xó má mbáa bi̱ naʼdu nagruigú gamajkhu índo̱ ixu̱u̱ naxná májánʼ uvas (Mat. 25:20-23).

4. a) Xú káʼnii eʼni kaʼwi̱i̱ mbiʼyuu Dios rá. b) Xú káʼnii ku̱ma̱ʼ ikháánʼ rí xtaʼdáá ñajunʼ rí matani kaʼwi̱i̱ mbiʼyuu Dios rá.

⁴ Xó má ndiʼyáá, índo̱ nuʼtáraʼa ma̱ngaa nuʼni kaʼwi̱i̱ mbiʼyuu Dios. Xú káʼnii eʼni rá. Gajkhun má rí na̱nguá xóo muʼni̱i̱ itháan mitsúʼkháan, numuu rí mitsúʼkháan má nindxu̱u̱. Mú guʼyáá rí niʼthí gaʼyee Isaías: “Jeobá bi̱ gíʼdiin mbaʼin ejército, ikhaa nindxu̱u̱ Bi̱ ikháanʼ gíʼmaa mbu̱ya̱a̱ xóo santo” (Is. 8:13). Ikha jngó, mbá rí xóo muʼni kaʼwi̱i̱ mbiʼyuu Dios rí mbuʼyáá rí nindxu̱u̱ kiejunʼ, rí nda̱wa̱a̱ tsáa mbiʼyuu xúʼko̱ kaʼnii, ga̱jma̱a̱ mumbáñuun xa̱bu̱ makru̱ʼu̱u̱n rí nindxu̱u̱ kaʼwii (Mat. 6:9). Mbá xkri̱da, índo̱ nuʼthá xú káʼnii xa̱bu̱ nindxu̱u̱ Jeobá ga̱jma̱a̱ rí naʼthí maʼni ga̱jma̱a̱ numún xa̱bu̱ numbaaʼ, numbáyii mbiʼyuu Dios náa nduwaʼ ndrígóo Satanás ga̱jma̱a̱ rí naʼni gámaa o naʼni tsu̱du̱u̱ (Gén. 3:1-5). Ma̱ngaa nuʼni kaʼwi̱i̱ mbiʼyuu índo̱ nuʼgíʼ mumbáñuun xa̱bu̱ náa kuwáanʼ mu mbuyáá rí Dios kaʼyoo magruigú “gloria, gamajkhu ga̱jma̱a̱ tsiakii” (Rev. 4:11). Rune, bi̱ ninindxu̱u̱ precursor mbá gu̱wa̱ʼ imajun tsiguʼ, naʼthí: “Naxna̱a̱ núma̱aʼ bi̱ Niʼni xúgíʼ numuu rí niniñuʼ mani̱ndxu̱ʼ xa̱bi̱i̱. Naxkaxu̱u̱n mataráʼa má xúʼko̱”.

5. a) Xó má eʼthí náa Juan 15:9, 10, náa numuu eʼtáraʼa rá. b) Xú káʼnii niʼthí Jesús rí ndayóoʼ maʼngulú rá.

⁵ (Atraxnuu Juan 15:9, 10). Imbo̱o̱ numuu mu muʼtáraʼa nindxu̱u̱ rí nandulúʼ kuʼyáá Jeobá ga̱jma̱a̱ Jesús (Mar. 12:30; Juan 14:15). Jesús raʼkháa i̱ndó niʼthún xa̱bi̱i̱ rí makuwá náa ngajua rúʼko̱, niʼthí rí makuwá má xúʼko̱ ikhí. Náa numuu rá. Numuu rí ndayóoʼ maʼngulú mu manindxu̱lúʼ mbáa cristiano gajkhun náa xúgíʼ tsiguʼ. Jesús niʼthí má xúʼko̱ rí ndayóoʼ maʼngulú índo̱ nijmuu ajngáa makuwáanʼ má xúʼko̱ ikhí Juan 15:4-10.

6. Xú káʼnii esngajmá rí nandulúʼ makuwáanʼ má xúʼko̱ náa ngajua ndrígóo Cristo rá.

⁶ Xú káʼnii esngájma rí nandulúʼ makuwáanʼ má xúʼko̱ náa ngajua ndrígóo Cristo ga̱jma̱a̱ rí maʼndoo kaʼyulú má xúʼko̱ xá. Rí muʼnimbánii rí naʼtáñajunlú. Xóo muʼthá, Jesús na̱ndu̱ʼu̱lú muʼnimbulúʼ kuʼyáá. Ikhaa tsendu̱ʼu̱lú muʼni itháan ki xóo rí ikhaa naʼngo̱o̱ naʼni, numuu rí ikhaa má niʼthí xóó: “Xoma ri ninimbanuloʼ mangun ri niʼtañajuinʼ Tateʼ, jame naʼne akuinʼ jayo”. Nakujmaa kaʼwu rí ikhaa nixná mbá májánʼ xkri̱da (Juan 13:15).

7. Xú káʼnii kagujtuminaʼ rí muʼnimbulúʼ ga̱jma̱a̱ ngajua rá.

⁷ Jesús nisngájma kaʼwu dí rígá mbá rí kagujtuminaʼ, rí muʼnimbulúʼ ga̱jma̱a̱ ngajua índo̱ niʼthún apóstoles: “Tsi guidaʼ idxu ri natañajunloʼ, jame naʼnembanu, tsuʼkue tsi naʼne akuin-jaʼyeʼ” (Juan 14:21). Ga̱jma̱a̱, índo̱ nuʼnimbánii rí niʼtáñajunʼ Jesús rí mu̱ʼgua̱ ga̱jma̱a̱ muʼtáraʼa, ma̱ngaa nusngájma rí nandulúʼ kuʼyáá Dios. Náa numuu rá. Numuu rí naʼtáñajunlú muʼni Cristo nambánii ga̱jma̱a̱ rí endxa̱ʼwáminaʼ Anu̱u̱ (Mat. 17:5;  Juan 8:28). Rí xóo esngajmá ngajua, Jeobá ga̱jma̱a̱ Jesús naʼni rí xúniñaʼ raʼndúún kuyulúʼ.

8, 9. a) Náa biʼyaa i̱mba̱ numuu kuaʼdáá mu muʼtáraʼa rá. b) Náa numuu rí naxkaxáanʼ mu muʼtáraʼa má xúʼko̱ rí naʼthí náa Ezequiel 3:18, 19 ga̱jma̱a̱ 18:23 rá.

⁸ Rí maʼni ajtsú numuu rí nuʼtáraʼa, nindxu̱u̱ numuu rí nandulúʼ muʼtáruʼun xa̱bu̱. Náa Biblia naʼthí rí Noé “niʼtáraʼa rí jmbu” (atraxnuu 2 Pedro 2:5). * Nakujmaa kaʼwu rí ajngáa rí niʼtáraʼa ma̱ngaa na̱ʼkha̱ raʼthí ga̱jma̱a̱ numuu rí maguma gámbáa. Náa numuu eʼthá xúʼko̱ kaʼnii rá. Guʼyáá rí niʼthí Jesús: “Numu ri xo neʼne mbiʼi ri naki ri maxnu mendaʼko ruʼhua ri napeʼtso xabo, jame naʼhuan iya, nunigüinʼ jame nuxnatsigunmijne, asjndo mbiʼi ri nitoʼo Noé naʼ aun arca. Tafruʼun [o túnimbu̱ún] asjndo naʼ nixnu mendaʼko ruʼhua, nika jagun mba xuguinʼ. Xkuaʼni gaʼne ri maʼka Ade Xabo manga” (Mat. 24:38, 39). Maski asndu xa̱bu̱ túdxawíín, Noé niʼnimbánuu káxi̱ rí maʼtáruʼun xa̱bu̱.

⁹ Rí mbiʼi xúgi̱, nuʼtáraʼa numuu Reino mu xa̱bu̱ mbuyáá ndiéjunʼ rí nandoo Dios maʼni náa xa̱bu̱ numbaaʼ. Xó má Jeobá, nandulúʼ ga̱jma̱a̱ xúgíʼ a̱jkiu̱lú rí xa̱bu̱ mudxawíín ajngáa rígi̱ ga̱jma̱a̱ makuwa má xúʼko̱ (Ezeq. 18:23). Ma̱ngaa, índo̱ nuʼtáraʼa mámbá guʼwá ga̱jma̱a̱ náa nanújngun mbaʼin xa̱bu̱ nayambáá mu muʼthúún itháan mbaʼin xa̱bu̱ rí Reino ndrígóo Dios ma̱ʼkha̱ gáʼni gámbáa numbaaʼ xkawiʼ rígi̱ (Ezeq. 3:18, 19; Dan. 2:44; Rev. 14:6, 7).

10. a) Náa biʼyaa i̱mba̱ numuu kuaʼdáá mu muʼtáraʼa xóo eʼthí náa Mateo 22:39 rá. b) Arathá xú káʼnii Pablo ga̱jma̱a̱ Silas nimbayíí mbáa bi̱ nañewu̱u̱n guʼwá e̱jua̱nʼ náa xuajen Filipos.

¹⁰ Guʼyáá imbo̱o̱ numuu rí nuʼtáraʼa: Nandulúʼ kuʼñúún xa̱bu̱ numbaaʼ gajmiúlú (Mat. 22:39). Nduʼyáá rí xa̱bu̱ nuriʼkhu̱u̱ rí xóo endxa̱ʼwa̱a̱ edxu̱ún índo̱ rígá rí nuraʼníí náa vida ndrígu̱ún. Numuu rí nandulúʼ kuʼñúún, rígi̱ naxkaxáanʼ mu xúniʼñáʼ ruʼtáruʼun. Gundxaʼwamíjna̱ rí nigíʼnuu apóstol Pablo ga̱jma̱a̱ Silas náa xuajen Filipos. Xa̱bu̱ bi̱ sia̱nʼ gajmiún nixudiinʼ náa guʼwá e̱jua̱nʼ. Mú índo̱ niʼni tikhu nduʼun nda̱a̱ tsu̱ma̱ niʼxma náa guʼwá e̱jua̱nʼ ga̱jma̱a̱ xúgíʼ xkrugua nimbaʼto. Xa̱bu̱ bi̱ nañewu̱u̱n guʼwá e̱jua̱nʼ nikumu̱u̱ rí xúgínʼ bi̱ tri̱ʼi̱i̱n ikhí nigáñun, ikha jngó nigíʼ maxíyaminaʼ. Mú Pablo niʼthúu̱n rí xáʼni. Nixmiéjunʼ wéñuʼ rí asndu niraxi̱: “¿Nala ri iʼyo maneloʼ ri majriñu-ra?”. Ikhiin nithán: “Gajumaʼ xtaya Señor Jesucristo, ikajngo majriña” (Hech. 16:25-34).

11, 12. a) Ndiéjunʼ eʼsngúlúʼ ga̱jma̱a̱ numuu rí muʼtáraʼa rí niʼni xa̱bu̱ bi̱ niñewu̱u̱n guʼwá e̱jua̱nʼ rá. b) Náa numuu rí nandulúʼ muʼtáraʼa má xúʼko̱ rá.

¹¹ Ndiéjunʼ eʼsngúlúʼ rígi̱ ga̱jma̱a̱ numuu rí nuʼtáraʼa rá. Guʼyáá rí bi̱ nañewu̱u̱n guʼwá e̱jua̱nʼ niriʼkhuu xóo nindxa̱ʼwáminaʼ  ga̱jma̱a̱ ninda̱ʼa̱ rí mixtambáyii nda̱wa̱á rí niʼxma. Xúʼko̱ má xúgi̱, mbáa kuwa tikhun xa̱bu̱ rí nákha ginii na̱nguá nidxawíín ajngáa rí naʼthí náa Biblia mu nda̱wa̱á muriʼkhumijná ga̱jma̱a̱ munda̱ʼa̱ rí mixtambáñuun índo̱ gaguaʼnii mbá gamiéjunʼ. Mbá xkri̱da, tikhun xa̱bu̱ nakumu̱ún rí nándáa rí muni índo̱ nda̱a̱ tsu̱ma̱ enimbáti̱ga̱ ñajunʼ ndrígu̱ún, nuniñami̱jna̱a̱, nuthúún rí guáʼdáá mbá nandii gakhi̱i̱ o índo̱ nakháñuu mbáa bi̱ nandún kuyáá. Índo̱ narígá rígi̱, kuwa xa̱bu̱ bi̱ nugi̱ʼdi̱i̱ nuraximíjna̱ náa numuu rí kuwáanʼ. Mbáa asndu nuraximíjna̱ xóo bi̱ niñewu̱u̱n guʼwá e̱jua̱nʼ: “¿Nala ri iʼyo maneloʼri majriñu-ra?”. Índo̱ nuxkamin náa nuʼtáraʼa, mbáa ikhú maʼndún mudxawíín ajngáa rí na̱jkua̱ kuʼyúlú, rí kuaʼti̱i̱n marigá nda̱wa̱á.

¹² Ikha jngó, á mu tséniʼñáaʼ ruʼtáraʼa, ma̱ndoo muʼthúún mbá ajngáa rí maʼni̱i̱ a̱jkiu̱ún xa̱bu̱ índo̱ gáʼnduun gudxawíín (Is. 61:1). Charlotte, bi̱ naʼni má mbá skíñúʼ gu̱wa̱ʼ imigiñuʼ tsiguʼ rí naʼtáraʼa káxi̱, naʼthí: “Kuwa xa̱bu̱ bi̱ tséyáá náa magún. Nda̱ñúnʼ mudxawíín ajngáa rí na̱jkua̱ kuʼyúlú”. Ga̱jma̱a̱ mbáa ndxájulú bi̱ mbiʼyuu Ejvor, bi̱ naʼni má mbá skíñúʼ gu̱wa̱ʼ a̱jkhu̱ tsiguʼ rí nindxu̱u̱ precursora, ikhaa naʼthí: “Xúgi̱ ra̱ʼkhá tháán kuwa xa̱bu̱ bi̱ naxmiéjunʼ wéñuʼ. Ikhúúnʼ nandoʼ mambáñun ga̱jma̱a̱ rúʼko̱ naxkaxu̱u̱n mataraʼa”. Rí maʼndulú kuʼñúún xa̱bu̱ numbaaʼ gajmiúlú naxkaxáanʼ mu xúniʼñáʼ ruʼtáraʼa.

13, 14. a) Xú káʼnii nindxu̱u̱ rí Jeobá naʼthí maxná rí naʼthí náa Juan 15:11 rá. b) Xú káʼnii gándoo maku̱mu̱lú ikháá má gagi rí nikumu̱u̱ Jesús rá. c) Xú káʼnii eyambáá gagi náa nuʼtáraʼa rá.

¹³ Mbruʼun má rúʼko̱ nákha inuu makhañúu Jesús náa tsu̱du̱u̱ Ku̱ba̱ʼ, ikhaa ma̱ngaa niʼthún apóstoles mbaʼa rí Jeobá maxnún rí mambáñun mu xúniñaʼ rutaraʼa. Ndiéjunʼ nindxu̱u̱ rá. Ga̱jma̱a̱ xú káʼnii embáyulú rá.

¹⁴ Rí gagi. Lá xáʼngulú ikháanʼ guʼnimbánii rí niʼtáñajunlú Jesús muʼni ráʼ. Maʼngulú. Nda̱wa̱á rí niʼthí ga̱jma̱a̱ numuu ixu̱u̱ uva, Jesús niʼthí rí muguaʼdáá ikháá má gagi á mu nuʼtáraʼa numuu Reino (atraxnuu Juan 15:11). Náa numuu rá. Xó má ndiʼyáá, ikhaa niʼthí rí nindxu̱u̱ xóo ixu̱u̱ uva ga̱jma̱a̱ xa̱bi̱i̱ ni̱ndxu̱ún xóo ñawúunʼ ixu̱u̱ uva. Ñawúunʼ ixu̱u̱ naxmátraʼa iyaʼ ga̱jma̱a̱ xúgíʼ rí mambáyúu planta índo̱ kajua̱a̱ ga̱jma̱a̱ ixu̱u̱ uva. Xúʼko̱ má, mangáanʼ makumulú rí kuwáanʼ gagi xóo rí naku̱mu̱u̱ Jesús índo̱ naʼni má xúʼko̱ rí nandoo Anu̱u̱ ga̱jma̱a̱ índo̱ makuwáanʼ mbá kambáxulú gajmiúlú ikhaa ga̱jma̱a̱ guʼyaridáá tsumáá rí niʼni (Juan 4:34; 17:13; 1 Ped. 2:21). Hanne, bi̱ nindxu̱u̱ precursora itháan rí a̱jma̱ skiñúʼ tsiguʼ naʼthí: “Gagi rí naku̱mu̱ʼ índo̱ na̱jkhá gátaráʼa naxkaxu̱u̱n mani má xúʼko̱ ñajunʼ Jeobá”. Xúʼko̱ kaʼnii nindxu̱u̱, gagi rígi̱ naxnúlú tsiakii mu xúniʼñáʼ ruʼtáraʼa, ma̱ngaa náa naʼni mingíjyúuʼ wéñuʼ muʼtáraʼa (Mat. 5:10-12).

15. a) Ndiéjunʼ nindxu̱u̱ rí makhánulúʼ eʼthí náa Juan 14:27 rá. b) Xú káʼnii embáyulú rí tsímáá mu xúniʼñáʼ ruʼtáraʼa rá.

¹⁵ Rí tsímáá (atraxnuu Juan 14:27). Ikhaa má mbruʼun rúʼko̱, Jesús niʼthún apóstoles: “Tsímáá ndrígóʼ naxnala”. Xú káʼnii embáyulú tsímáá ndrígóo mu muʼtáraʼa má xúʼko̱ rá. Índo̱ naʼngulú náa nuʼtáraʼa, nduʼyáá rí Jeobá ga̱jma̱a̱ Jesús nanigu̱nʼ rí eʼni. Ga̱jma̱a̱ rúʼko̱ naʼni rí makuwáanʼ tsímáá má xúʼko̱ (Sal. 149:4; Rom. 5:3, 4; Col. 3:15). Mbáa ndxájulú bi̱ nagumbiʼyuu Ulf, bi̱ niʼni káxi̱ ñajunʼ Jeobá mbá a̱jma̱ skíñúʼ iwitsu tsiguʼ,  naʼthí: “Nda̱wa̱á rí na̱jkhá gátaráʼa naʼni néʼngo̱ʼ, mú ñajunʼ rígi̱ naʼni maxtáá tsímáá ga̱jma̱a̱ naʼni magiʼdoo numuu vida ndrígóʼ”. Mangáanʼ nuxnáa wéñuʼ núma̱aʼ rí kuwáanʼ tsímáá má xúʼko̱.

16. a) Ndiéjunʼ nindxu̱u̱ rí makhánulúʼ eʼthí náa Juan 15:15 rá. b) Ndiéjunʼ ndiyóoʼ muni apóstoles mu mambaxúún má xúʼko̱ gajmiún Jesús rá.

¹⁶ Rí mambáxulúʼ gajmiúlú Jesús. Nda̱wa̱á rí Jesús niʼthún apóstoles rí makuwa gagi, niʼthún rí gíʼdoo wéñuʼ numuu maʼndún kuyamijná (Juan 15:11-13). Nda̱wa̱á niʼthún: “Migüiʼ ñajuanʼla”. Rí mambaxúún gajmiún Jesús ¡nindxu̱u̱ mbá regalo kiejunʼ wéñuʼ! Ga̱jma̱a̱ ndiéjunʼ ndiyóoʼ muni má xúʼko̱ mu mambaxúún gajmiún xá. Rí xúniñaʼ rutaraʼa (atraxnuu Juan 15:14-16). A̱jma̱ tsiguʼ ginii, Jesús niʼthún muthi: “Ninguiyu-ma tsi naʼtañajun mikui” (Mat. 10:7). Ikha jngó, mbruʼun índo̱ inuu makhañúu náa Ku̱ba̱ʼ, nixnúún tsiakii mu maʼngu̱u̱n ga̱jma̱a̱ xúniñaʼ rutaraʼa (Mat. 24:13; Mar. 3:14). Rí munimbánii kiʼtáñajunʼ rígi̱ ninindxu̱u̱ mingíjyúuʼ, mú maʼngu̱u̱n munimbaníí ga̱jma̱a̱ xúʼko̱ ma̱ndoo mambaxúún gajmiún Jesús. Ga̱jma̱a̱ rígá imbo̱o̱ regalo rí na̱ʼkha̱ náa Jeobá rí mambáñun.

17, 18. a) Ndiéjunʼ nindxu̱u̱ rí makhánulúʼ eʼthí náa Juan 15:16 rá. b) Xú káʼnii gambáñun rí makhánun xa̱bi̱i̱ Jesús rá. c) Xú káʼnii nindxu̱u̱ rí naxná Jeobá rí naxnúlú tsiakii mbiʼi xúgi̱ rá.

¹⁷ Rí maxtiʼña̱a̱ rí nuʼtájkáan. Jesús niʼthún apóstoles rí mámbá rí gúnda̱ʼa̱ munda̱ʼa̱ ga̱jma̱a̱ mbiʼyuu, ga̱jma̱a̱ Jeobá má gáxnúún (Juan 15:16). Mbá ajngáa rígi̱ nixnúún wéñuʼ tsiakii. * Gajkhun má rí inuu makhañúu Jesús, rígi̱ xóó tsíkru̱ʼu̱u̱n májánʼ ikhiin. Mú ikhaa mambáñun má xúʼko̱. Índo̱ gunda̱ʼa̱a̱ Jeobá rí mambáñun mu mutaraʼa ga̱jma̱a̱ numuu Reino, ikhaa mariʼñún rí nutajkáan. Táʼni má mba̱yu̱ʼ índo̱ ndiyáá xú káʼnii niriʼña̱a̱ (Hech. 4:29, 31).

¹⁸ Xúʼko̱ má erígá xúgi̱. Á mu tséniʼñáaʼ ruʼtáraʼa, ma̱ndoo mambaxúlúʼ gajmiúlú Jesús. Ma̱ngaa, nduʼyáá májánʼ rí Jeobá mariʼña̱a̱ índo̱ gunda̱ʼa̱a̱ rí mambáyulúʼ mu muraʼníí xúgíʼ rí na̱ʼkha̱nú inulú índo̱ nuʼtáraʼa (Filip. 4:13). Ra̱ʼkhá tháán exnáa núma̱aʼ Jeobá numuu rí nariʼñulú rí nuʼtájkáan ga̱jma̱a̱ rí nambáxulúʼ gajmiúlú Jesús. Xúgíʼ rígi̱ naxnúlú tsiakii mu xúniʼñáʼ ruʼtáraʼa (Sant. 1:17).

19. a) Náa numuu rí tséniʼñáaʼ ruʼtáraʼa rá. b) Ndiéjunʼ gambáyulú mambúlú ñajunʼ rí Dios niʼtáñajunlú muʼni rá.

¹⁹ Xó má ndiʼyáá náa artículo rígi̱, nuʼtáraʼa má xúʼko̱ numuu rí nandulúʼ muʼni mba̱a̱ Jeobá ga̱jma̱a̱ muʼni kaʼwi̱i̱ mbiʼyuu, musngájma rí nandulúʼ kuʼyáá Jeobá ga̱jma̱a̱ Jesús, muʼtáruʼun xa̱bu̱ ga̱jma̱a̱ musngájma rí nandulúʼ kuʼñúún xa̱bu̱ numbaaʼ gajmiúlú. Ma̱ngaa, rí nundrígú náa Jeobá rí nindxu̱u̱ gagi, tsímáá ga̱jma̱a̱ rí mambaxúlúʼ gajmiúlú Jesús ga̱jma̱a̱ rí naxtiʼña̱a̱ rí nuʼtájkáan, naxnúlú tsiakii mu mambúlú ñajunʼ rí ikhaa niʼtáñajunlú muʼni. Jeobá naniguʼ wéñuʼ índo̱ ndaʼyoo xúgíʼ tsiakii rí nuʼni mu xúniʼñáʼ ruʼtáraʼa.