JESÚS niʼtáriyaʼ rí xa̱bi̱i̱ mugimbóó mba̱a̱ wéñuʼ índo̱ gáʼni iwáá mbiʼi (Mat. 9:37; 24:14). Ajngáa rígi̱ xtáa rambánuu náa xuajen ndrígóo Transcarpatia (Ucrania). Náa ajtsú xuajen dí rígá mijngii, rígá mbá 50 congregación ga̱jma̱a̱ itháan rí 5,400 bi̱ nutaraʼa. * Á mu nuraxnuu xúgínʼ xa̱bu̱ bi̱ kuwa náa ajtsú xuajen, náa rí mbá a̱jkhui̱i̱n xa̱bu̱ mbáa nindxu̱u̱ xa̱bi̱i̱ Jeobá.

Xú káʼnii ni̱ndxu̱ún xa̱bu̱ náa xuajen rúʼko̱ rá. “Gi̱i̱ xa̱bu̱ nduyamajkuíí Biblia, nduyamajkuíí rí jmbu, kuwa mbá kambáxu̱u̱n náa mbá guʼwíin ga̱jma̱a̱ nunimíjna̱ mu mumbañún eʼwíínʼ”, eʼthí mbáa ndxájulú bi̱ mbiʼyuu Vasile. Ma̱ngaa naʼthí: “Raʼkháa xúgíʼ rí eʼnimbulúʼ nunimbu̱ún, mú índo̱ natasngájmún mbá texto ndrígóo Biblia nugíʼ edxu̱ún mudxawíín”.

Gajkhun, índo̱ nuʼtáraʼa náa mbá xuajen náa kuwa mbaʼin bi̱ nutaraʼa, a̱ngiu̱lú nuraʼníí tikhuu xkujndu. Mbá xkri̱da, náa mbá congregación kuwa mbá 134 bi̱ nutaraʼa ga̱jma̱a̱ i̱ndó mbá 50 guʼwá rígá mu mutaraʼa. Ndiéjunʼ eni á mu nuraʼníí rígi̱ xá.

Mbaʼin a̱ngiu̱lú nuni mbá tsiakii mba̱a̱ mu magún náa xuajen náa rí itháan ndayóoʼ bi̱ mutaraʼa. Mbáa ndxájulú bi̱ gíʼdoo 90 tsiguʼ bi̱ mbiʼyuu Ionash naʼthí: “Náa congregación ndrígúxu̱, xtáa mbáa bi̱ naʼtáraʼa náa a̱jma̱ guʼwá náa xuajen rí kaʼyoo. Ikhúúnʼ xúgi̱ nataráʼa náa mbá xuajen, mú nákha xóó tséʼniuʼ gakhi̱i̱ nandii, ma̱ngaa na̱jkhá mbá xuajen náa rí na̱nguá kaʼyuxu rí naʼni 160 kilómetros rí mitsínguánʼ mu miʼtáraʼa náa húngaro”. Bi̱ nutaraʼa ndayóoʼ muni tsiakimijna magún náa xuajen rúʼko̱. Ionash naʼthí: “Mu maʼgá ga̱jma̱a̱ tren, ndiyóoʼ magúxunʼ a las 4 rí miʼcha̱. Ga̱jma̱a̱ nda̱wa̱á nataráʼa asndu a las 6 rí wakhííʼ, ikhú índo̱ tren natanga̱a̱. Nani rígi̱ a̱jma̱ o ajtsú aʼphu̱ rí mbá xmáná”. Lá naku̱mu̱u̱ ndxájulú buʼko̱ rí nindxu̱u̱ ndíí tsiakii rí naʼni xáʼ. Ikhaa naʼthí: “Rí mataráʼa xúʼko̱ niʼni maxtáá wéñuʼ gagi. Ga̱jma̱a̱ nisngúún rí gajkhun mbá guʼwíin xa̱bu̱ bi̱ kuwa náa mbá xuajen mitsínguánʼ wéñuʼ”.

Nakru̱ʼu̱lú rí tikhun a̱ngiu̱lú bi̱ kuwa náa congregación rígi̱ xáʼngu̱u̱n magún mitsínguánʼ wéñuʼ, mú xúgínʼ, asndu bi̱ guanii, nunimíjna̱ muguánu náa kuwa xa̱bu̱. Rí nirígá, náa Conmemoración tsiguʼ 2017 náa ajtsú xuajen rígi̱ niʼni itháan mbaʼin ki xóo bi̱ nutaraʼa, xóo muʼthá, mbá taphi̱i̱n xa̱bu̱ bi̱ kuwa ikhí. Gajkhun, asndu náa má guyambáá ndayóoʼ xóó muguaʼdáá “má xúʼko̱ rí [muʼni] náa ñajunʼ ndrígóo Señor” (1 Cor. 15:58).