NÁA numbaaʼ rígi̱ rígá wéñuʼ xkujndu, mingíjyúuʼ eʼni makuwáanʼ tsímáá. Ga̱jma̱a̱ maski ajndu kuwáanʼ tsímáá mbá chíʼgíʼ, miʼskhaa eʼni rí makuwáanʼ tsímáá má xúʼko̱. Ndiéjunʼ ikha rí na̱ʼkha̱ náa Biblia ma̱ndoo mambáyulúʼ mu makuwáanʼ phú tsímáá, ga̱jma̱a̱ xándáti̱gu̱lú rá. Ga̱jma̱a̱ xú káʼnii gándoo gumbáñuun eʼwíínʼ makuwíin tsímáá rá.

Mu makuwáanʼ phú tsímáá, ndayóoʼ makuwaanʼ májánʼ. Ma̱ngaa gíʼdoo numuu rí maguaʼdíin bi̱ mambaxúlúʼ májánʼ gajmiúlú. Mú, rí itháan gíʼdoo numuu, rí mambaxúlúʼ májánʼ wéñuʼ gajmiúlú Dios mu xándáti̱gu̱lú rí tsímáá. Guʼyáá xú káʼnii gándoo gúʼni.

Á mu nuʼnimbulúʼ xtángoo ga̱jma̱a̱ ikha jmbu ndrígóo Jeobá, nusngájma rí nakumulú kuʼyáá ga̱jma̱a̱ nandulúʼ makuwáanʼ tsímáá gajmiúlú ikhaa (Jer. 17:7, 8; Sant. 2:22, 23). Ikhú, Dios nakuʼmaminaʼ náa ikháanʼ ga̱jma̱a̱ naʼni tsajkurámáanʼ ga̱jma̱a̱ rí tsímáá náa awúu̱n a̱jkiu̱lú. Isaías 32:17 naʼthí: “Á mu narígá rí jmbu marigá rí tsímáá; ga̱jma̱a̱ náa rí jmbu ní xárígá gamíi kámuu mbiʼi”. Ikha jngó á mu nuʼnimbulúʼ kuʼyáá Jeobá ga̱jma̱a̱ xúgíʼ a̱jkiu̱lú, makuwáanʼ tsímáá ikháanʼ (Is. 48:18, 19).

Mu makuwáanʼ má xúʼko̱ tsímáá, Jeobá ma̱ngaa naxnúlú mbá regalo rí májánʼ wéñuʼ: Xi̱ʼ kaʼwu (Hech. 9:31).

Índo̱ Pablo niʼthí ga̱jma̱a̱ numuu “xi̱ʼ kaʼwu”, niʼnirámáʼ rí tsímáá náa ragajtsú enii náa lista (Gál. 5:22, 23). Ikha jngó á mu nandulúʼ makuwáanʼ phú tsímáá, gíʼmaa muniʼñáʼ rí xi̱ʼ kaʼwu mañajunʼ náa ikháanʼ. Guʼyáá a̱jma̱ rí ma̱ndoo muʼni mu xi̱ʼ kaʼwu ndrígóo Dios ma̱ndoo mambáyulúʼ.

 Timbá, gíʼmaa maguʼunlú muraxnuu Ajngá rawunʼ Dios (Sal. 1:2, 3). Índo̱ nundxa̱ʼwáá edxu̱lúʼ ajngáa rí na̱ʼkha̱ náa Biblia, xi̱ʼ kaʼwu nambáyulúʼ makru̱ʼu̱lú xú káʼnii eʼyoo Jeobá xúgíʼ. Mbá xkri̱da, najmañulúʼ rí eʼni mu marigá tsímáá ga̱jma̱a̱ ndíjkha gíʼdoo numuu rígi̱ eʼyoo ikhaa. Á mu nuʼgíʼ nuʼnimbánii rí ejmañulú náa Ajngá rawunʼ, makuwáanʼ itháan tsímáá (Prov. 3:1, 2).

Raga̱jma̱, gíʼmaa muʼthá káñii Jeobá ga̱jma̱a̱ munda̱ʼa̱a̱ rí maxnúlúʼ xi̱ʼ ndrígóo (Luc. 11:13). Bi̱ nduyááʼ rí Jeobá mambáñun, ikhaa naʼthúún rígi̱: “Tsímáá rí na̱ʼkha̱ náa Dios rí itháan gíʼdoo tsiakii, mañewu̱u̱n a̱jkia̱la ga̱jma̱a̱ rí nundxaʼwamíjna̱ ga̱jma̱a̱ numuu Cristo Jesús” (Filip. 4:6, 7). Á mu nunda̱ʼa̱a̱ má xúʼko̱ xi̱ʼ ndrígóo, Jeobá mambáyulúʼ mu maʼni marigá rí tsímáá náa a̱jkiu̱lú, rí naxnún bi̱ i̱ndó nambáxu̱u̱ májánʼ gajmíi̱n (Rom. 15:13).

Biblia nambáñun mbaʼin wéñuʼ xa̱bu̱ muriʼkhumijná ga̱jma̱a̱ rí makuwá phú tsímáá gajmiún Jeobá, xó má ikhiin gajmiún bi̱ kuwa mbájndi náa ikhiin. Guʼyáá a̱jma̱ xkri̱da.

Náa congregación cristiana rí mbiʼi xúgi̱, kuwa xa̱bu̱ bi̱ nakiʼníin mbá nacha̱, naʼngo̱o̱ a̱jkiu̱ún, tségi̱ʼdu̱u̱n gajmiún xa̱bu̱ ga̱jma̱a̱ itháan míjínʼ xa̱bu̱ * (Prov. 29:22). Guʼyáá ga̱jma̱a̱ numún a̱jmi̱i̱n xa̱bi̱i̱ Jeobá bi̱ nixtambáñun mu muxpriguíí rí xóo ni̱ndxu̱ún ga̱jma̱a̱ nijmañún muniu̱u̱n rí májánʼ eʼwíínʼ.

Rí xóo xa̱bu̱ nindxu̱u̱ David niʼni gachúu rí xóo naʼthí. Nákha xóó tséxnaximinaʼ náa Dios, naguʼwun naʼthá numún xa̱bu̱ ga̱jma̱a̱ tseʼyamajkún bi̱ kuwa náa goʼwóo. Mbóo mbiʼi ndiʼyoo rí gíʼmaa mariʼkuminaʼ. Ndiéjunʼ nimbáyúu mu mani̱ndxu̱u̱ mbáa xa̱bu̱ guabaaʼ xá. Ikhaa naʼthí: “Nigíʼdu̱u̱ ninimbánuu ikha rí na̱ʼkha̱ náa Biblia. Rí nirígá, ikhúúnʼ ga̱jma̱a̱ bi̱ kuwa náa goʼwóoʼ nigíʼdi̱i̱xu nduyamajkumijná itháan”.

Rí xóo nigaja̱a̱ Rachel niʼni mani̱ndxu̱u̱ xó má kaʼnii. Ikhaa naʼthí: “Rí xúgi̱ xóó naku̱mu̱ʼ rí nakasngañuʼ numuu rí nigaju̱u̱n náa  mbá guʼwá náa xúgínʼ nagiʼdu̱u̱n má xúʼko̱”. Xú káʼnii niʼni mu mani̱ndxu̱u̱ mbáa xa̱bu̱ guabaaʼ xá. Ikhaa nariʼña̱a̱: “Na̱ndo̱ʼo̱o̱ má xúʼko̱ rí Jeobá mambáyuʼ”.

David ga̱jma̱a̱ Rachel nindxu̱u̱ a̱jma̱ xkri̱da rí erígá índo̱ mbáa nagíʼ naʼnimbánuu ikha rí na̱ʼkha̱ náa Biblia ga̱jma̱a̱ rí mbáyááʼ rí mambáyúu xi̱ʼ kaʼwu. Maski ajndu kuwáanʼ náa mbá numbaaʼ náa narígá rí xkawiʼ, nakujmaa kaʼwu rí ma̱ndoo muguaʼdáá tsímáá náa awúu̱n a̱jkiu̱lú ga̱jma̱a̱ muʼni rí makuwáanʼ mbá kambáxulú náa guʼwúlú ga̱jma̱a̱ náa congregación. Ikha jngó, Jeobá na̱ndu̱ʼu̱lú rí “xákiʼnáanʼ” gajmiúlú xúgínʼ xa̱bu̱ (Rom. 12:18). Xú káʼnii gándoo gúʼni rá. Ga̱jma̱a̱ xú káʼnii gambáyulú rí muʼni tsiakimíjna̱ mu manindxu̱lúʼ xa̱bu̱ guabaaʼ rá.

Índo̱ nuʼtáraʼa, nuʼthúún rí xa̱bu̱ mudxawíín ga̱jma̱a̱ numuu Reino ndrígóo Dios (Is. 9:6, 7; Mat. 24:14). Ga̱jma̱a̱ nadxulú rí mbaʼin xa̱bu̱ nundrigú ajngáa rígi̱ rí tsímáá. Núma̱aʼ má ga̱jma̱a̱ numuu ikhaa rí xa̱bu̱ nánguá exmiéjúnʼ wéñuʼ o nánguá ekiʼníin ga̱jma̱a̱ numuu xúgíʼ rí narígá náa kuwa. Rí xúgi̱ guáʼthi̱i̱n rí makhánun nda̱wa̱á ga̱jma̱a̱ nunimbánii xtágabu rígi̱: “Atayááʼ rí tsímáá ga̱jma̱a̱ ayuʼ kidxuuʼ” (Sal. 34:14).

Gajkhun má dí raʼkháa xúgínʼ xa̱bu̱ enigu̱nʼ índo̱ nuʼtáruʼun, índo̱ eʼni timbá miʼtsú (Juan 3:19). Maski ajndu xúʼko̱, xi̱ʼ kaʼwu ndrígóo Dios nambáyulúʼ muʼthúún ga̱jma̱a̱ májánʼ ma̱ngaa ga̱jma̱a̱ gamajkhu. Xúʼko̱, eʼnimbaníí ikha rí nixná Jesús índo̱ nuʼtáraʼa: “Índo̱ gáta̱ʼa̱la náa guʼwá, guraxi̱i̱; ga̱jma̱a̱ á mu guʼwá kaʼyoo magruigú, ga̱ʼkha̱ náa ikhaa rí tsímáá rí nandala ma̱ʼkha̱; mú á mu na̱nguá kaʼyoo magruigú, gátanga̱a̱ náa ikháanʼ rí tsímáá” (Mat. 10:11-13). Rí muʼni rí niʼthí Jesús naʼni rí magajnáʼ tsímáá náa goʼwóo xa̱bu̱ ga̱jma̱a̱ mbáa nda̱wa̱á ma̱ndoo mumbáyii xa̱bu̱.

Cristianos ma̱ngaa nuʼni rí makuwáanʼ tsímáá índo̱ nuʼthúún ga̱jma̱a̱ gamajkhu Xa̱bu̱ Ñajunʼ, ga̱jma̱a̱ bi̱ nakiʼníin ga̱jma̱a̱ ñajunʼ rí nuʼni. Guʼyáá mbá xkri̱da. Mbáa Xa̱bu̱ Ñajunʼ náa mbá xuajen mba̱a̱ náa África nandxa̱ʼwáminaʼ dí ra̱májánʼ ga̱jma̱a̱ tseniñúnʼ muni Guʼwá náa magimbíin. Mu mambanúu xkujndu rígi̱, nixuʼmaa mbáa ndxájulú bi̱ ninindxu̱u̱ misionero ikhí mu maʼthúu̱n xa̱bu̱ ede̱ náa xuajen mba̱a̱ náa Londres (Inglaterra) ñajunʼ rí nuʼni ga̱jma̱a̱ rí tséʼyáaʼ xkujndu. Ndiéjunʼ nirígá rá.

Ndxájulú naʼthí: “Índo̱ ni̱jkhánú ikhí, ndi̱yo̱o̱ xtíñuu bi̱ nagruiguíin xa̱bu̱ ga̱jma̱a̱ ndi̱yo̱o̱ rí na̱ʼkha̱ náa mbá tribu bi̱ nuthi mbá ajngáa rí ikhúúnʼ nijmañuʼ. Ikhú niraxi̱i̱ ga̱jma̱a̱ ajngóo. Niʼniuu tsiánguá ga̱jma̱a̱ niraxuʼ náa numuu ni̱jkhá. Ga̱jma̱a̱ gamajkhu ni̱thu̱u̱n rí nandoʼ matamíjná ga̱jmu̱ʼ xa̱bu̱ ede̱. Ikhaa niʼtároʼoo ga̱jma̱a̱ teléfono, ikhú nigájnuu ga̱jma̱a̱ niraxu̱u̱n ga̱jma̱a̱ ajngóo. Nda̱wa̱á nigíʼ edxu̱u̱ maʼdxun rí ni̱thu̱u̱n ga̱jma̱a̱ numuu ñajunʼ rí eni xa̱bi̱i̱ Jeobá”.

Rí niʼthí ndxájulú bugi̱ ga̱jma̱a̱ gamajkhu niʼngo̱o̱ niʼni rí xa̱bu̱ ede̱ bugi̱ ni xandxaʼwáminaʼ dí ra̱májánʼ. Nguáthá mbiʼi nda̱wa̱á, Xa̱bu̱ Ñajunʼ náa xuajen mba̱a̱ rúʼko̱ niniñuʼ rí muni Guʼwá náa magimbíin. ¡Ra̱ʼkhá tháán nidxún a̱ngiu̱lú! Nakujmaa kaʼwu rí muʼthúún eʼwíínʼ ga̱jma̱a̱ gamajkhu maʼni rí makuwáanʼ tsímáá.

Rí mbiʼi xúgi̱, xa̱bi̱i̱ Dios kuwáanʼ náa mbá paraíso rí na̱ʼkha̱ náa ikhaa náa rígá rí tsímáá. Ga̱jma̱a̱ muʼni rí marigá má xúʼko̱ á mu nuʼnimi̱jna̱ maguaʼdáá rí naxná xi̱ʼ kaʼwu. Mú rí itháan gíʼdoo numuu rí Jeobá maʼni tsajkurámáanʼ wéñuʼ ga̱jma̱a̱ makuwáanʼ tsímáá kámuu náa numbaaʼ nuxi̱ʼ (2 Ped. 3:13, 14).