1, 2. a) Ndiéjunʼ nindxu̱u̱ rí itháan gíʼdoo numuu rí kuaʼdáá ikháanʼ rá. b) Náa biʼyaa kiʼsngáa rí gíʼdoo itháan numuu, ga̱jma̱a̱ xú káʼnii gambáyulú rá. (Atayáá timbá xtiʼkhu.)

NDIÉJUNʼ rí itháan gíʼdoo numuu náa ikháanʼlu rá. Lá manigulúʼ muriʼkhuíí ga̱jma̱a̱ mbá rí xóo ragíʼdoo numuu ráʼ. Mú, ikháanʼ rí ni̱ndxu̱lú xa̱bi̱i̱ Dios nduʼyáá rí itháan gíʼdoo numuu rí mambáxulu gajmiúlú Jeobá, ga̱jma̱a̱ xúriʼkuíí nditháan. Ma̱ngaa nandulúʼ kuʼyáá wéñuʼ Biblia, rúʼko̱ naʼni rí mambáxulu májánʼ gajmiúlú Anu̱lú bi̱ xtáa mekhuíí (Col. 1:9, 10).

² Gundxaʼwamíjna̱ náa xúgíʼ rí naʼsngúlú náa Ajngá rawunʼ, rí nindxu̱u̱ Biblia, bi̱ Naʼsngáa itháan májánʼ. Naʼthúlúʼ xú káʼnii mbiʼyuu ga̱jma̱a̱ ndiéjunʼ eyoo gáʼthúu̱n, ma̱ngaa nasngájmulúʼ xú káʼnii xa̱bu̱ nindxu̱u̱. Ikhaa naʼthúlúʼ ga̱jma̱a̱ numuu tsigijñaʼ kiejunʼ índo̱ nixnáxi̱i̱ A̱ʼdióo bi̱ nandoo kaʼyoo, bi̱ nindxu̱u̱ Jesús. Ma̱ngaa naʼthúlúʼ ga̱jma̱a̱ numuu Reino mesiánico ga̱jma̱a̱ rí bi̱ kaxtaʼwíin magúun mekhuíí ma̱ngaa “eʼwíínʼ mugu̱” makuwa náa Ku̱ba̱ʼ mitsaan (Juan 10:16). Ma̱ngaa naʼsngúlú xú káʼnii gakuwáanʼ itháan májánʼ ga̱jma̱a̱ rí xóo gúʼni. Xúgíʼ kiʼsngáa rígi̱ gíʼdoo wéñuʼ numuu náa ikháanʼ numuu rí naniñulú muʼgua̱ kanuu náa  bi̱ Niʼniáanʼ ga̱jma̱a̱ naʼni magiʼdoo itháan numuu vida ndrígúlú.

3. Ndiéjunʼ eyoo gáʼthúu̱n ajngáa: “Aratsi̱ rí gajkhun” rá.

³ Índo̱ Biblia naʼthí rí gíʼmaa mu̱ʼtsi̱ rí gajkhun, lá nandoo gáʼthúu̱n rí gíʼmaa muxnáá mbújkha̱a̱ mu makhánulúʼ ráʼ. Na̱nguá. Jeobá nixná rí gíʼdoo asndu nixnáa A̱ʼdióo bi̱ nandoo kaʼyoo mu makhañúu ga̱jma̱a̱ numulúʼ. Índo̱ ikhaa ndaʼyoo rí mbáa nda̱yáaʼ rí gajkhun, nambáyúu mu maxkamaa ga̱jma̱a̱ nditháan tsíndo̱ʼo̱o̱ mbújkha̱a̱. Xúʼko̱ niʼni mbáa xa̱bu̱ bi̱ mbiʼyuu Simón, nixnároʼo mbújkha̱a̱ apóstol Pedro mu majmañuu maxnún xi̱ʼ kaʼwu eʼwíínʼ, ikhú Pedro nixprígúu: “Gakhañáʼ ga̱jma̱a̱ mbújkha̱ʼ, numuu rí nitatsaʼwáá edxa̱ʼ rí ma̱ndoo maratsi ga̱jma̱a̱ mbújkha̱a̱ rí naxná Dios” (Hech. 8:18-20). Ndiéjunʼ eyoo gáʼthúu̱n ajngáa: “Aratsi̱ rí gajkhun rá”.

4. Ndiéjunʼ gajmañulú ga̱jma̱a̱ numuu rí gajkhun náa artículo rígi̱ rá.

⁴ (Atraxnuu Proverbios 23:23). * Mu muxkamaa rí gajkhun náa Ajngá rawunʼ Dios ndayóoʼ tsiakii. Ga̱jma̱a̱ gíʼmaa muʼnimíjna̱ mu xándáti̱gu̱lú nimbá. Xó má niʼthí bi̱ niʼnirámáʼ Proverbios, índo̱ gákánulúʼ rí gajkhun, gíʼmaa muñewa̱a̱n wéñuʼ rí xúgujua o muniʼñáʼlú. Mbuʼyáá ndiéjunʼ eyoo gáʼthúu̱n rí mu̱ʼtsi̱ rí gajkhun ga̱jma̱a̱ nguáthá “gúʼni numáá” mu makánalú. Rúʼko̱ gambáyulú muxnáá itháan numuu ga̱jma̱a̱ maxnúlúʼ tsiakii rí xúgujua nditháan. Xó má gúʼyáá, rí mu̱ʼtsi̱ rí gajkhun gíʼdoo wéñuʼ numuu.

5, 6. a) Xú káʼnii gándoo gúʼtsi rí gajkhun á mu nda̱a̱ mbújkha̱a̱ rá. Arathá mbá xkri̱da. b) Xú káʼnii eyambáá rí mu̱ʼtsi̱ rí gajkhun rá.

⁵ Asndu índo̱ rígá mbá rí nakhánulú xúʼkhiín, mbáa mbaʼyóoʼ mbuʼyáá káʼnii gúʼni ikháanʼ. Ajngáa hebrea rí naʼtájuíi “aratsi̱” rí na̱ʼkha̱ náa Proverbios 23:23 ma̱ngaa nandoo gáʼthúu̱n rí “makánaʼ”. Náa ajngáa rígi̱ nandoo gáʼthi rí makánaʼ mbá índo̱ gátani tsiakiminaʼ o matriʼkuíí mbá rí gíʼdoo wéñuʼ numuu. Gúʼgíʼ mbá xkri̱da, rí náa xua̱ rígá mbá letrero náa naʼthí dí rígá ndxáma rí xaratsi. Lá maʼga̱nú matramaaʼ ikhaa ndxáma náa mesa ndrígúlú rá. Na̱nguá. Maski asndu xáratsi, mbaʼyóoʼ muríyaʼ mbiʼi ga̱jma̱a̱ tsiakii mu mu̱ʼgua̱ náa xuáá mu makánulú. Xúʼko̱ má kayúʼ, rí mu̱ʼtsi̱ rí gajkhun xáʼyóoʼ muxnáá mbújkha̱a̱, mú gíʼmaa muʼni tsiakimijna mu makhánulúʼ.

⁶ (Atraxnuu Isaías 55:1-3). * Ajngá rawunʼ Jeobá rí na̱ʼkha̱ náa libro ndrígóo Isaías nambáyulúʼ makru̱ʼu̱lú ndiéjunʼ eyoo gáʼthúu̱n rí mu̱ʼtsi̱ rí gajkhun. Náa ajngáa rígi̱, Dios naʼni mbríguii ajngóo xóo iyaʼ, leche ga̱jma̱a̱ vino. Ajngáa gajkhun rí na̱ʼkha̱ náa Dios naʼni maʼni̱i̱ a̱jkiu̱lú, nindxu̱u̱ xóo iyaʼ wéʼtsí rí muʼwa̱a̱n. Ma̱ngaa, xó má leche naʼni makuwáanʼ ga̱jma̱a̱ nayambáá mu maʼga̱ ragajáanʼ índo̱ xóó majkiáanʼ, Ajngá rawunʼ Jeobá naxníʼtsulu ga̱jma̱a̱ nayambáá mu muniʼniiʼ itháan Jeobá. Xú káʼnii eʼni mbríguii vino ga̱jma̱a̱ Ajngá rawunʼ Jeobá rá. Náa Biblia, vino naʼni mbríguii xóo gagi (Sal. 104:15). Ikha jngó, índo̱ Dios naʼthúlúʼ rí mu̱ʼtsi̱ vino, numuu rí nandoo rí makuwaanʼ gagi xó má eʼthí náa xtángoo ndrígóo (Sal. 19:8). Ga̱jma̱a̱ xkri̱da rígi̱, Jeobá nambáyulúʼ mu makru̱ʼu̱lú ndiéjunʼ  eyambáá rí majmañulúʼ rí gajkhun ga̱jma̱a̱ rí muʼnimbánii. Ikha jngó, guʼyáá mbáa witsu enii rí nimbáyulúʼ mu muniʼñáʼ, mu ma̱ndoo mu̱ʼtsi̱ rí gajkhun.

7, 8. a) Náa numuu rí ndayóoʼ muríyaʼ mbiʼi mu muʼtsi rí gajkhun rá. b) Ndiéjunʼ niraʼwíí maʼni mbáa wáxá bi̱ naʼnigajmaa, ga̱jma̱a̱ ndiéjunʼ nirígá nda̱wa̱á rá.

⁷ Mbiʼi. Rígi̱ rí gíʼmaa muʼni xúgiáanʼ mu mu̱ʼtsi̱ rí gajkhun. Ndayóoʼ mbiʼi mu muʼdxawíín ajngóo Reino, rí muraxnuu Biblia ga̱jma̱a̱ i̱yi̱i̱ʼ rí nigájnuu náa Biblia, rí muʼnigajmaa ndajkuáanʼ, rí muʼniratamijná náa reunión ga̱jma̱a̱ rí mu̱ʼgua̱ ikhí. Mbiʼi rúʼko̱ gíʼmaa magajnúu náa rí na̱nguá gíʼdoo numuu (atraxnuu Efesios 5:15, 16). * Nguáthá mba̱yu̱ʼ gájyúuʼ mu majmañaaʼ kiʼsngáa rí ndiʼkhún ejmañaaʼ náa Biblia rá. Mámbáa xa̱bu̱ mixtiʼkhu xóo ejmañuu. Tsétumuu rí ma̱ndoo majmañulúʼ ga̱jma̱a̱ numuu rí xóo xa̱bu̱ nindxu̱u̱ Jeobá ga̱jma̱a̱ rí niʼni (Rom. 11:33). Timbá i̱yi̱i̱ʼ rígi̱, Bi̱ Nayejngoo náa ajngáa inglés niʼni mbríguii rí gajkhun ga̱jma̱a̱ “mbáa chíʼgíʼ ri̱ʼi̱” ga̱jma̱a̱ niʼthí: “Xáʼnda̱ʼ káaʼ mbóo ri̱ʼi̱, á mu Dios niʼni marigá wéñuʼ. Atagímboo má xúʼko̱; atayáaʼ má xúʼko̱”. Guraximíjna̱: Nguáthá mbaʼa ri̱ʼyu̱ʼ rí gajkhun gúʼdoo rá. Índo̱ gakuwaanʼ kámuu mbiʼi, majmañulúʼ má xúʼko̱ ga̱jma̱a̱ numuu Jeobá. Rí mbiʼi xúgi̱, rí itháan gíʼdoo numuu rí majmulúʼ májánʼ mbiʼi mu ma̱ndoo mu̱ʼtsi̱ rí gajkhun rí gáʼyóóʼ. Mbuʼyáá ga̱jma̱a̱ numuu mbá, bi̱ nandoo maxkamaa rí gajkhun.

⁸ Mbáa ndxáʼgú Japonesa bi̱ mbiʼyuu Mariko * ni̱ʼkha̱ gaxtáa náa xuajen Nueva York (Estados unidos) mu maʼnigajmaa mbá Escuela. Nákha ikhú, ikhaa xtáa náa mbá religión dí rígá náa Japón. Mbáa Precursora nixkamaa índo̱ xtáa raʼtáraʼa mámbá guʼwá. Índo̱ Mariko nigíʼdu̱u̱ nijmañuu rí gajkhun, ra̱ʼkhá tháán gagi nixtáa asndu nindo̱ʼo̱o̱ mbáa precursora rí maʼsngóo ajma̱ʼ nuthu rí mbá xmáná. Maski asndu naʼnigajmaa wéñuʼ ga̱jma̱a̱ nañejunʼ tapha mbiʼi, nacha̱ nigíʼdu̱u̱ ni̱jkha̱a̱ reunión. Ma̱ngaa, ndiyóoʼ maríya mbiʼi mu majmañuu rí gajkhun, niniñuʼ tikhu ñajunʼ ndrígóo. Rí maʼni rígi̱ nimbáyúu mu maʼniniiʼ itháan nacha̱ Jeobá. Táʼni mbá tsiguʼ índo̱ nijngúun iyááʼ. Nákha tsiguʼ 2006, majun igu̱nʼ nda̱wa̱á, ninindxu̱u̱ precursora ga̱jma̱a̱ xóó xtáa raʼni ñajunʼ rúʼko̱.

9, 10. a) Xú káʼnii endxaʼwáá edxu̱lúʼ ga̱jma̱a̱ numuu mbújkha̱a̱ índo̱ nu̱ʼtsi̱ rí gajkhun rá. b) Ndiéjunʼ niniñuʼ mbáa dxáʼgú ga̱jma̱a̱ xú káʼnii eku̱mu̱u̱ xá.

⁹ Rí kuaʼdáá. Mu mu̱ʼtsi̱ rí gajkhun, mbáa mbaʼyóoʼ muniʼñáʼ mbá ñajunʼ rí naxnúlú mba̱a̱ mbújkha̱a̱ náa nuni numulú mba̱a̱ wéñuʼ. Gundxaʼwamíjna̱ ga̱jma̱a̱ numuu Pedro ga̱jma̱a̱ Andrés, bi̱ nirawíin e̱gi̱ʼ. Índo̱ Jesús niʼthún rí ‹murawíin egi̱ʼ bi̱ nindxu̱ún xa̱bu̱›, niniñaʼ amaʼ ga̱jma̱a̱ nigún gajmiún (Mat. 4:18-20). Gajkhun má, raʼkháa rígi̱ eyoo gáʼthúu̱n rí xúgínʼ bi̱ gajmañún rí gajkhun mbaʼyóoʼ muniñaʼ ñajunʼ ndrígu̱ún, numuu rí ndayóoʼ muda̱ʼ mbújkha̱a̱ ga̱jma̱a̱ muñewu̱u̱n bi̱ kuwa náa guʼwún (1 Tim. 5:8). Mbáa ma̱ngaa mbaʼyóoʼ muriʼkhu̱u̱ xóo kuwa ga̱jma̱a̱ rí xóo nduyáá mbújkha̱a̱. Jesús niʼthí kaʼwu índo̱ niʼthí rí muniʼñáʼ ruraxi̱i̱ rí ‹gíʼdoo numuu náa tsu̱du̱u̱ Ku̱ba̱› ga̱jma̱a̱ muraxi̱i̱ rí ‹gíʼdoo numuu náa mekhuíí› (Mat. 6:19, 20). Guʼyáá ga̱jma̱a̱ numuu mbáa dxáʼgú.

¹⁰ María nigíʼdu̱u̱ niʼtsíin golf nákha xóó ragíʼdoo tsiguʼ mu maʼga̱ náa escuela. Náa secundaria nijuixná mbá beca mu maʼga̱ náa universidad numuu rí najmañuu maʼtsíin. Golf nigiʼdoo wéñuʼ numuu náa ikhaa ga̱jma̱a̱ nindoo majmañuu maʼtsíin itháan  májánʼ ga̱jma̱a̱ mada̱ʼ wéñuʼ mbújkha̱a̱. Ikhú nigíʼdu̱u̱ niʼnigajmaa Biblia. Niniguʼ wéñuʼ rí xtáa rajmañuu rí gajkhun, ga̱jma̱a̱ rí xóo embáyúu mariʼkuminaʼ. Ikhaa niʼthí: “Índo̱ nanimbánuu itháan xtángoo ndrígóo Biblia, itháan gagi xtáá”. Nikro̱ʼo̱o̱ rí maʼni mingíjyúuʼ mbayáaʼ Dios ga̱jma̱a̱ rí mbayáaʼ magiʼdoo (Mat. 6:24). Ikha jngó niniñuʼ raʼtsíin ga̱jma̱a̱ táʼndoo majmaʼniiʼ ma̱ngaa rí magiʼdoo wéñuʼ. Rí xúgi̱ nindxu̱u̱ precursora ga̱jma̱a̱ “xtáa itháan tsímáá”.

11. Índo̱ gúʼtsi̱ rí gajkhun, ndiéjunʼ gúni bi̱ nambáxulúʼ gajmiúlú o bi̱ kuʼñúún rá.

¹¹ Bi̱ nambáxulúʼ gajmiúlú ga̱jma̱a̱ bi̱ kuʼñúún. Índo̱ nuraʼwíí muʼnimbánii ikha ndrígóo Biblia, ma̱ndoo mariʼkhuu rí xóo nambáxulúʼ gajmiúlú tikhun. Náa numuu rá. Jesús niʼthúu̱n Jeobá ga̱jma̱a̱ numún xa̱bi̱i̱ “Atani kaʼwu̱u̱n náa rí gajkhun; ajngáaʼ nindxu̱u̱ gajkhun” (Juan 17:17). “Atani kaʼwu̱u̱n” ma̱ngaa nandoo gáʼthúu̱n “atani wájíínʼ”, índo̱ nundrígú rí gajkhun, nuʼni wajimíjná náa numbaaʼ, numuu rí nánguá eʼni xóo eni ikhí. Xa̱bu̱ nduyulú mixtiʼkuáanʼ numuu rí xóo e̱ndxa̱ʼwáá edxu̱lúʼ nariʼkhuu ga̱jma̱a̱ nuʼnimbánii rí naʼthí náa Biblia. Tsiyulu muʼni wajimíjná, mu tikhun bi̱ nambáxulúʼ gajmiúlú o bi̱ kuʼñúún narajñunʼ náa ikháanʼ o nakiʼníin kuyulú numuu rí nuʼnigajmaa. Rígi̱ tséʼniulú tsiánguá, numuu rí Jesús niʼthí: “Bi̱ makiʼníin kuyáá mbáa xa̱bu̱ mani̱ndxu̱ún bi̱ kuwa má náa goʼwóo” (Mat. 10:36). Mú niʼthí rí maguma tsajkurámáanʼ á mu nuʼtsi rí gajkhun ki xóo rí muniʼñáʼ (atraxnuu Marcos 10:28-30). *

12. Ndiéjunʼ nigíʼnuu mbáa judío ga̱jma̱a̱ numuu rí gajkhun rá.

¹² Mbáa judío bi̱ kayá edxu̱u̱ náa mbá ñajunʼ, bi̱ mbiʼyuu Aarón nijmañuu asndu nákha chíʼgíʼ dí ragíʼmaa muríya mbiʼyuu Dios. Mu ikhaa ra̱ʼkhá tháán niniguʼ rí maninuʼ rí gajkhun ga̱jma̱a̱ numuu Dios, mbóo mbiʼi mbáa xa̱bi̱i̱ Jeobá niʼsngóo rí a̱jkhu̱ consonantes rí najmaa náa mbiʼyuu náa ajngáa hebreo najmiin tikhun vocales ga̱jma̱a̱ ma̱ndoo muʼthá “Jeobá”. Nidxuu wéñuʼ rí ni̱jkha̱ náa sinagoga mu maʼthúún rí nijmañuu náa bi̱ nusngáa mú ikhiin tánigunʼ rí nijmañuu rí gajkhun ga̱jma̱a̱ numuu Dios, nindujtáʼ ga̱jma̱a̱ nixkriyaʼ. Ma̱ngaa nigiʼdoo xkujndu gajmíi̱n bi̱ kaʼñún. Mu rígi̱ táʼni rí maniñuʼ raniniiʼ má xúʼko̱ Jeobá. Nijngúun iyááʼ ga̱jma̱a̱ tániñuʼ raʼni ñajunʼ Jeobá kámuu. Xó má Aarón, nandulúʼ muniʼñáʼ xúgíʼ rí kuaʼdáá o xóo rí muriʼkhui̱i̱ rí mambáxulú gajmiúlú bi̱ kuʼñúún mu makuwáanʼ má xúʼko̱ náa rí gajkhun.

13, 14. Á mu nandulúʼ mu̱ʼtsi̱ rí gajkhun, xú káʼnii gáʼyóóʼ muriʼkhu̱u̱ rí nundxa̱ʼwáá edxu̱lúʼ ga̱jma̱a̱ rí eʼni rá. Araxná mbá xkri̱da.

¹³ Dí raʼkhí endxaʼwamíjna̱ ga̱jma̱a̱ rí nuʼni. Á mu nandulúʼ mundrígú rí gajkhun ga̱jma̱a̱ muʼnimbulúʼ rí naʼthí ikhí, mbaʼyóoʼ muriʼkhuíí xóo e̱ndxa̱ʼwáá edxu̱lúʼ ga̱jma̱a̱ rí xóo nuʼni. Pedro niʼthí rígi̱: “Xóo e̱ji̱n bi̱ nunimbu̱ún, guniʼñáʼ runi dí ra̱májánʼ rí nini nákha ginii nákha xóó tséya̱a̱”. Ga̱jma̱a̱ niʼthí xóó: “Ganindxalaʼ mikaʼwáan wéñuʼ náa xúgíʼ rí nuni̱” (1 Ped. 1:14, 15). Mbá xkri̱da, náa xuajen corinto xa̱bu̱ nuni aʼkhá, xa̱bu̱ bi̱ nindrigú rí gajkhun ndiyóoʼ muriʼkhu̱u̱ wéñuʼ xóo kuwa (1 Cor. 6:9-11). Ikha jngó, rí mbiʼi xúgi̱ mbaʼin wéñuʼ a̱ngiu̱lú niniñaaʼ dí ra̱májánʼ rí kuwa runi mu ma̱ndoo maguaʼdáá rí gajkhun. Ma̱ngaa Pedro niʼthún Cristianos nákha mbiʼi rí nixtáa: “Numuu rí nijngoo má mbiʼi dí ikháanʼla nini dí nandún xa̱bu̱ numbaaʼ nákha asndu nda̱a̱  majthi̱ʼ nini aʼkhá, ga̱jma̱a̱ nákha kuwáanʼ raʼndala mubala wéñuʼ gajmiála mbáa, ma̱ngaa nawanla wéñuʼ vino, ga̱jma̱a̱ nákha ni̱jkua̱la náa ndxa̱a̱ túñewa̱a̱n rí nini, nawanla mbanda̱ʼkho iya najnga̱a̱ ga̱jma̱a̱ nduyamajkún xándú dí ragíʼmaa” (1 Ped. 4:3).

¹⁴ Naʼni mba̱yu̱ʼ tsiguʼ, Devynn ga̱jma̱a̱ Jasmine nanigu̱nʼ muwa̱a̱n wéñuʼ iya najnga̱a̱. Devynn najmañuu nañajunʼ májánʼ náa contabilidad, mú ga̱jma̱a̱ numuu rí naʼga̱a̱n wéñuʼ iya najnga̱a̱ táʼngo̱o̱ gáñewu̱u̱n ñajunʼ rí gíʼdoo. Jasmine nijmaʼniiʼ xóo mbáa xa̱bu̱ bi̱ nakiʼnáa wéñuʼ ga̱jma̱a̱ nixnamíjná gajmíi̱n eʼwíínʼ. Mbóo mbiʼi rí ikhaa najnga̱a̱, niraʼnún xa̱bu̱ gajmii bi̱ nindxúu̱n misionero. Ikhiin niʼtháán rí musngáá ga̱jma̱a̱ Biblia. Mú, índo̱ nitangi̱i̱n mbá xmáná nda̱wa̱á náa guʼwún, Devynn ga̱jma̱a̱ Jasmine kuwa rajngi̱i̱n. Taguaʼti̱i̱n nditháan rí misionero maxmiéjúnʼ kuñún rí asndu matangi̱i̱n gúñún. Imbo̱o̱ mbiʼi rí nitangi̱i̱n, ninindxu̱u̱ mixtiʼkhu wéñuʼ. Asndu nákha nigíʼdi̱i̱ runigajmaa, Devynn ga̱jma̱a̱ Jasmine ninigu̱nʼ wéñuʼ ga̱jma̱a̱ núkhu ninimbaníí rí kuwa rajmañún. Asndu xóó táʼni ajtsú igu̱nʼ índo̱ niriyaʼ awan mu muniñaʼ raʼwa̱a̱n iya najnga̱a̱ ga̱jma̱a̱ nda̱wa̱á nidamijná xóo phú kaʼyoo. Náa xuajñu, xúgínʼ xa̱bu̱ ndiyáá rí niriʼkumijnáa ga̱jma̱a̱ rúʼko̱ niʼni rí manigu̱nʼ munigajmaa Biblia.

15. Ndiéjunʼ gaʼniulúʼ mingíjyúuʼ muniʼñáʼ índo̱ gajmañulú rí gajkhun, ga̱jma̱a̱ náa numuu rá.

¹⁵ Costumbres rí tséʼkha̱ náa Biblia. Tikhun xa̱bu̱ tséʼniún mingíjyúuʼ muniñaʼ tikhu costumbre índo̱ nduyáá rí Dios tsénigu̱ʼ rígi̱. Mú eʼwíínʼ naʼniún mingíjyúuʼ makuwá náa rí gajkhun, mbáa xáʼndun muniñaʼ costumbre numuu rí nutsudíín bi̱ kuñún, bi̱ nuñajunʼ gajmiún ga̱jma̱a̱ bi̱ nambáxu̱u̱n gajmiún. Ga̱jma̱a̱ maʼndoo maʼni itháan mingíjyúuʼ á mu nuni ndxo̱o̱ mbáa bi̱ kuyáá bi̱ nikháñu má (Deut. 14:1). Xkri̱da ndrígu̱ún eʼwíínʼ a̱ngiu̱lú ma̱ndoo mambáyulúʼ muriʼkhu̱u̱ xóo kuwaanʼ. Guʼyáá rí nini tikhun bi̱ kuwa náa xuajen Éfeso nákha timbá siglo.

16. Ndiéjunʼ nini tikhun xa̱bu̱ efesios mu mu̱tsi̱ rí gajkhun rá.

¹⁶ Náa xuajen Éfeso rí nirígá nákha wajyúúʼ nijmaʼnuuʼ wéñuʼ ga̱jma̱a̱ numuu rí nuni xawan. Ndiéjunʼ nini xa̱bu̱ bi̱ kuwa náa Éfeso mu maguánú mani̱ndxu̱ún cristianos rá. Náa Biblia naʼthí: “Mbaʼin bi̱ nini magia niguwáʼ kudúún libro ndrígu̱ún ga̱jma̱a̱ nitsikha̱a̱ náa inún xúgínʼ xa̱bu̱. Ga̱jma̱a̱ niriyaʼ cuenta mu mbuyáá nguáthá numuu xúgíʼ, ikhú ndiyáá rí naʼni mbá 50 mil mbújkha̱a̱ plata. Xúʼko̱ ni̱jkha̱ ragaja̱a̱ ga̱jma̱a̱ tsiakii ajngá rawunʼ Dios ga̱jma̱a̱ nirígá má xúʼko̱” (Hech. 19:19, 20). Cristianos bi̱ nikuwa jmbu, nini gámbáa libros maski ajndu ra̱ʼkhá tháán minumuu, mu ga̱jma̱a̱ numuu rí nini, ra̱ʼkhá tháán niguma tsajkurámiinʼ.

17. a) Ndiéjunʼ rí ndiyóoʼ muniñaʼ mu ma̱ndoo muguaʼdáá rí gajkhun rá. b) Ndiéjunʼ graxe̱ gúriʼña̱a̱ náa imbo̱ʼ artículo rá.

¹⁷ Ndiéjunʼ nitatsíñánʼ ikháán mu makánaaʼ rí gajkhun rá. Xúgiáanʼ nuríyaʼ mbiʼi mu makhánulúʼ “ri̱ʼi̱” rí gajkhun. Tikhun ndiyóoʼ muniñaʼ xúgíʼ rí guáʼdáá ga̱jma̱a̱ rí maxtiʼkhu̱u̱ xóo embáxu̱u̱n gajmiún bi̱ kuñún ga̱jma̱a̱ bi̱ nambáxu̱u̱n gajmiún. Mbaʼin ndayóoʼ muriʼkhuíí xóo endxa̱ʼwa̱a̱ edxu̱ún ga̱jma̱a̱ rí nuni, ga̱jma̱a̱ mbáa mbaʼyóoʼ muniñaʼ costumbres rí tséʼkha̱ náa Biblia. Tséʼniuu asndu xú káʼnii má rí gúʼni, ga̱jma̱a̱ numuu rí gajkhun. Mú rí itháan gíʼdoo numuu rí kuaʼdáá nindxu̱u̱ rí mambáxulu gajmiúlú Jeobá. Índo̱ nundxa̱ʼwa̱míjna̱ ga̱jma̱a̱ rí xóo nambáyulúʼ rí muniʼnúʼ rí gajkhun, xándoo muʼthá rí mbáa ma̱ndoo magu̱jua̱. Xú káʼnii gáʼndoo gárígá rúʼko̱ rá. Ga̱jma̱a̱ ndiéjunʼ gambáyulú mu xúʼni rúʼko̱ rá. Muriʼña̱a̱ graxe̱ rúʼko̱ náa imbo̱o̱ artículo.