1. Náa numuu rí ndayúlú xúgiáanʼ rí maʼni̱i̱ a̱jkiu̱lú rá.

XÚGIÁANʼ ndayúlú rí maʼni̱i̱ a̱jkiu̱lú. Mbáa nguáná naxmiéjunlú, nadaʼ a̱jkiu̱lú ga̱jma̱a̱ na̱ʼkha̱nú gamiéjunʼ náa vida ndrígúlú. Mbáa numíniiʼ ga̱jma̱a̱ numuu rí guaniáanʼ, kuaʼdáá nandii o índo̱ nakháñuu mbáa bi̱ kuʼyáá. Tikuáanʼ ndayóoʼ maʼngulú índo̱ eʼwíínʼ xa̱bu̱ nuni gínáanʼ. Ga̱jma̱a̱ xa̱bu̱ numbaaʼ nagún runi rí itháan ra̱májánʼ. Gajkhun nduʼyáá rí kuwáanʼ “mbiʼi gakhi̱i̱ ga̱jma̱a̱ [...] mingíjyúuʼ”, rúʼko̱ nasngájma rí kuwáanʼ náa “iwáá mbiʼi” ga̱jma̱a̱ mámbá mbiʼi rí nanújngoo na̱jkha̱ rartumuu rí mambáa numbaaʼ rígi̱ (2 Tim. 3:1). Maski ajndu xúʼko̱, mbáa kuaʼti̱i̱n mba̱yu̱ʼ tsiguʼ rí mambanúu rí niʼthí Jeobá ga̱jma̱a̱ naguáʼdáá itháan xkujndu. Mú náa gándoo guxkamaa rí maʼni̱i̱ a̱jkiu̱lú rá.

2, 3. a) Ndiéjunʼ eʼyáá ga̱jma̱a̱ numuu Habacuc rá. b) Ndíjkha jngó gíʼmaa mbuʼyáá libro ndrígóo Habacuc rá.

² Mu muxkamaa rí naxtiʼña̱a̱ náa graxe̱ rígi̱, guʼyáá náa libro ndrígóo Habacuc. Náa Biblia naʼthúlúʼ káxi̱ xú káʼnii nixtáa Habacuc. Mbáa mbiʼyuu nandoo gáʼthúu̱n “Nagruaʼwánʼ ga̱jma̱a̱ ngajua”. Rígi̱ nandoo gáʼthúu̱n a̱jma̱ xkri̱da. Mbá, rí Jeobá nagruaʼwánʼ mu maʼni̱i̱ a̱jkiu̱lú, ga̱jma̱a̱ i̱mba̱ rí xa̱bu̱ nurajtuun xaʼ ñawúunʼ ga̱jma̱a̱ rí nakumu̱ún kuyáá. Libro ndrígóo Habacuc naxnúlú tsiakii. Gaʼyee niʼthúu̱n Dios ga̱jma̱a̱ niraxu̱u̱. Jeobá niriʼña̱a̱ ga̱jma̱a̱ nigíwanʼ náa  a̱jkiu̱u̱n mu maʼnirámáʼ rí niʼtímijná ga̱jma̱a̱, numuu rí ni̱jkha̱nú ndiʼyoo dí rígi̱ gambáyulú (Hab. 2:2).

³ Rí niʼtímijná Habacuc ga̱jma̱a̱ Jeobá náa Biblia i̱ndó naʼthí ga̱jma̱a̱ numuu gamiéjunʼ rí nigiʼdoo gaʼyee. Libro ndrígóo na̱ʼkha̱ “xúgíʼ rí nigumaraʼmáʼ nákha wajyúúʼ” ga̱jma̱a̱ kiʼniraʼmáʼ náa Ajngá rawunʼ Dios “mu maʼngo̱o̱ a̱jkiu̱lú ga̱jma̱a̱ maʼni̱i̱ a̱jkiu̱lú rí naʼthí náa Escrituras rí nda̱wa̱á kuaʼti̱i̱n rí májánʼ” (Rom. 15:4). Libro rígi̱ a̱jma̱ enii rí nambáyulúʼ. Timbá, numuu rí nambáyulúʼ mbuʼyáá ndiéjunʼ eyoo gáʼthúu̱n rí makumulúʼ kuʼyáá Jeobá. Raga̱jma̱, naʼthúlúʼ rí ma̱ndoo makuwáanʼ tsímáá, maski ajndu kuaʼdáá xkujndu ga̱jma̱a̱ numíniiʼ. Ga̱jma̱a̱ numuu a̱jma̱ ikha rígi̱, guʼyáá rí naʼthí náa Habacuc.

4. Náa numuu rí nixmiéjunʼ Habacuc rá.

⁴ (Atraxnuu Habacuc 1:2, 3). * Habacuc nixtáa mbóo mbiʼi gakhi̱i̱. Nixtáa gíná wéñuʼ numuu rí xa̱bu̱ ni̱ndxu̱ún xkawiinʼ ga̱jma̱a̱ nuxnún a̱ngiu̱ún. Nguáná gámbáa dí ra̱májánʼ rá. Ndíjkha jngó nda̱a̱ rí niʼni Jeobá rá. Gaʼyee bugi̱ i̱ndó ndaʼyoo dí ra̱májánʼ ga̱jma̱a̱ tsingíná, ga̱jma̱a̱ bi̱ nikiéʼkhun ni̱ndxu̱ún má israelitas. Nikumu̱u̱ rí nda̱wa̱a̱ tsáa mambáyúu. Mú, mbiʼi rúʼko̱ niʼthá kháñuu Jeobá rí mambáyúu. Mbáa nigíʼdu̱u̱ nindxa̱ʼwáminaʼ rí Jeobá taxmiéjunʼ ga̱jma̱a̱ numuu rí xtáa rarígá ga̱jma̱a̱ rí tséʼnimbánuu nacha̱. Lá niguánu nikumulú xúʼko̱ mbá miʼtsú xóo mbáa xa̱bi̱i̱ Dios bi̱ niwi̱ji̱ jmbu bugi̱ ráʼ.

5. Ndiéjunʼ ikha rí gíʼdoo numuu na̱ʼkha̱ náa libro ndrígóo Habacuc rá. (Atayáá timbá xtiʼkhu.)

⁵ Lá Habacuc nánguá nikumu̱u̱ kaʼyoo Jeobá ga̱jma̱a̱ rí niʼthí maʼni xáʼ. Na̱nguá. Rí nikumu̱u̱ kaʼyoo Jeobá ga̱jma̱a̱ raʼkháa náa mbáa xa̱bu̱ numbaaʼ nasngájma rí ikhaa ndiʼyoo rí maʼni. Gajkhun má rí maxmiéjunʼ numuu rí tákro̱ʼo̱o̱ náa numuu rí Dios táʼni nimbá ga̱jma̱a̱ niniñuʼ rí ikhaa mamínuʼ. Rí Jeobá nimbáyúu Habacuc mu maʼnirámáʼ rí nixmiéjunʼ naʼsngúlú mbá ikha rí gíʼdoo numuu. Ragíʼmaa mamiñúlú muʼtháán rí naʼni maxmiéjunʼlú o rí tsikru̱ʼu̱lú. Mú Dios naʼthúlúʼ rí muʼtháán xúgíʼ rí naʼni maxmiéjunʼlú (Sal. 50:15; 62:8). Náa Proverbios 3:5 naxnúlú tsiakii ajngáa rígi̱: “Ga̱ku̱ma̱ʼ xtayáá Jeobá ga̱jma̱a̱ xúgíʼ a̱jkia̱nʼ, xáku̱ma̱ʼ i̱ndó dí na̱ʼkha̱ náa edxa̱ʼ ikháánʼ”. Mbáa Habacuc nininuʼ májánʼ ajngáa rígi̱ ga̱jma̱a̱ xúʼko̱ má niʼni.

6. Ndíjkha jngó rí gíʼdoo numuu muʼtájkáan rá.

⁶ Habacuc nikumu̱u̱ kaʼyoo Jeobá bi̱ nambáxu̱u̱ ga̱jma̱a̱ bi̱ nindxu̱u̱ Anu̱u̱. Ikha jngó ginii niʼthúu̱n Jeobá. Tandxaʼwáminaʼ rí ni̱ʼkha̱ náa edxu̱u̱ ga̱jma̱a̱ rí niʼni maxmiéjunʼ wéñuʼ, ikha jngó niʼthúu̱n Dios rí nikumu̱u̱ ga̱jma̱a̱ rí niʼni maxmiéjunʼ. Xúʼko̱ niniñuʼ mbá májánʼ xkri̱da. Jeobá naʼdxuun rí nuʼtájkáan ga̱jma̱a̱ naʼthúlúʼ rí makumulúʼ kuʼyáá ikhaa rí muʼtháán xúgíʼ rí naxmiéjunlú (Sal. 65:2). Á mu nuʼni xúʼko̱, makumulúʼ rí ikhaa nagruaʼwánʼ índo̱ nariʼña̱a̱ rí nuʼtájkáan ga̱jma̱a̱ naxnúlú ikha ndrígóo (Sal. 73:23, 24). Mambáyulúʼ makumulúʼ xú káʼnii eyoo ikhaa, tséʼniuu má asndu xú káʼnii rí naʼni maxmiéjunʼlú. Rí muʼtá káñii Jeobá ga̱jma̱a̱ xúgíʼ a̱jkiu̱lú ikhú nusngajmá rí nakumulú kuʼyáá.

7. Xú káʼnii nikumu̱u̱ Jeobá ga̱jma̱a̱ gamiéjunʼ rí nigiʼdoo Habacuc rá.

⁷ (Atraxnuu Habacuc 1:5-7). * Habacuc  niniñuʼ xkujndu náa ñawúunʼ Jeobá. Mú mbáa ikhú niraximínáʼ xú káʼnii gáriʼña̱a̱. Numuu rí Jeobá nindxu̱u̱ xóo mbáa xa̱bu̱ nikhi̱i̱ bi̱ nakro̱ʼo̱o̱ kaʼñún e̱ji̱i̱n ga̱jma̱a̱ nambáñun, táríyúu gaʼyee ga̱jma̱a̱ numuu rí nixiéʼkha. Dios ndiʼyoo rí naxmiéjunʼ wéñuʼ. Náa ajngáa rí na̱jkha̱ náa inún israelitas bi̱ táguajun jmbu, Jeobá niʼthúu̱n ndiéjunʼ gárígá nda̱wa̱á. Mbáa Habacuc ninindxu̱u̱ timbáa xa̱bu̱ bi̱ Jeobá nisngájmuu xú káʼnii gámbáa numbaaʼ xkawiʼ rúʼko̱.

8. Náa numuu rí Habacuc niʼniuu tsiánguá rí niriʼña̱a̱ Jeobá rá.

⁸ Jeobá niʼni mbaʼyoo Habacuc rí xtáa xawii mu maʼnimbánuu. Xa̱bu̱ buʼko̱ bi̱ xkawiinʼ wéñuʼ ga̱jma̱a̱ bi̱ nuxnún a̱ngiu̱ún maguánu mambíin. Ajngáa rígi̱ “náa mbiʼi rí kuwáanʼ”, Jeobá niʼthí rí mambáa nákha mbiʼi rí nixtáa Habacuc ga̱jma̱a̱ xa̱bu̱ bi̱ nikuwa ikhú. Mú, lá rúʼko̱ rí nigi̱ʼthu̱u̱n Habacuc majuixtiʼña̱a̱ ráʼ. Xúʼko̱. Rí Jeobá niʼthí nandoo gáʼthúu̱n rí mamínuʼ itháan xuajen Judá. Xa̱bu̱ caldeos o babilonios nuni gíníi wéñuʼ eʼwíínʼ ga̱jma̱a̱ nuxnún, ki xóo náa xuajen rí nixtáa Habacuc, bi̱ nuniʼnuʼ má xtángoo ndrígóo Dios. Náa numuu rí Jeobá nijmiuu mbá xuajen bi̱ na̱nguá eyamajkuíí ga̱jma̱a̱ bi̱ nuni gíníi eʼwíínʼ mu muni gámbáa xuajñu xá. Á mu ikháanʼ guʼdxawíínʼ rí najuixtiʼña̱a̱ rígi̱, xú káʼnii gakumulú rá.

9. Ndiéjunʼ graxe̱ niʼni Habacuc rá.

⁹ (Atraxnuu Habacuc 1:12, 13; * 1:14, 17). Habacuc nikro̱ʼo̱o̱ rí Jeobá majmiuu Babilonia mu maʼni gámbíin xa̱bu̱ xkawiinʼ, maski ajndu xúʼko̱ Habacuc niʼniuu tsiánguá. Mú, ikhaa nikruiguminaʼ índo̱ niʼthúu̱n Jeobá rí nindxu̱u̱ “Itsí” ndrígóo (Deut. 32:4; Is. 26:4). Habacuc niʼniminaʼ má xúʼko̱ mu maku̱mu̱u̱ kaʼyoo Dios ga̱jma̱a̱ maʼngo̱o̱ a̱jkiu̱u̱n. Rígi̱ niʼni rí maku̱mu̱u̱ kaʼyoo mbu̱júu̱ ikhaa ga̱jma̱a̱ rí maʼni graxe̱ xóo rígi̱: Náa numuu niniñuʼ rí xuajen Judá magún runi rí itháan xkawiʼ xá. Ndíjkha jngó táʼnimbánuu nacha̱ xá. Á mu nindxu̱u̱ bi̱ gíʼdoo Xúgíʼ tsiakii, ndíjkha jngó niniñuʼ rí marigá itháan tsingíná xá. Náa numuu rí nda̱a̱ rí niʼni maski ajndu nirígá dí ra̱májánʼ rá. Numuu rí Dios nindxu̱u̱ ‹Kaʼwii› ga̱jma̱a̱ iduu nindxu̱u̱ ‹kaʼwu mu mbaʼyoo dí ra̱májánʼ›.

10. Xó má rí nigíʼnuu Habacuc, ndiéjunʼ gándoo gugíʼnii mangáanʼ rá.

¹⁰ Mbáa nguáná nakumulú xóo Habacuc. Nuʼdxawíín rí Jeobá naʼthúlúʼ. Nakumulú kuʼyáá ga̱jma̱a̱ nuraxnuu Ajngóo, ga̱jma̱a̱ rígi̱ naʼni rí muguaʼthi̱i̱n mbá rí májánʼ nda̱wa̱á. Náa xuajñu Jeobá nundrígú ikha rí xú káʼnii gáʼni nda̱wa̱á. Maski ajndu xúʼko̱, mbáa nuraximíjna̱: “Nguáná gámbá tsingíná rá.” Guʼyáá rí niʼni Habacuc ga̱jma̱a̱ rí ma̱ndoo majmañulúʼ.

11. Nda̱wa̱á rí niʼdxuun rí niʼthí Jeobá, ndiéjunʼ rí niraʼwíí maʼni Habacuc rá.

¹¹ (Atraxnuu Habacuc 2:1). * Rí Habacuc niʼtámíjná ga̱jma̱a̱ Jeobá niʼni maxtáa tsímáá. Ikha jngó nigi̱ʼthu̱u̱n rí Jeobá maʼnimbánuu. Rígi̱ raʼkháa i̱ndó nikumu̱u̱ mbá xngaa, numuu rí nda̱wa̱á niʼthí mbu̱júu̱ rí magiʼthu̱u̱n mu “maxtáá tsímáá náa mbiʼi gamiéjunʼ” (Hab. 3:16). Eʼwíínʼ xa̱bi̱i̱ Dios bi̱ niguájun jmbu niʼngo̱o̱ a̱jkiu̱ún ga̱jma̱a̱ nikumu̱ún kuyáá. Xkri̱da ndrígu̱ún naxnúlú tsiakii ga̱jma̱a̱ muguaʼthi̱i̱n rí Jeobá maʼnimbánuu (Miq. 7:7; Sant. 5:7, 8).

12. Ndiéjunʼ ikha ejmañuluʼ ga̱jma̱a̱ rí xóo xa̱bu̱ nindxu̱u̱ Habacuc rá.

 ¹² Ndiéjunʼ ejmañuluʼ ga̱jma̱a̱ rí xóo xa̱bu̱ nindxu̱u̱ Habacuc rá. Timbá, rí xúniʼñáʼ ruʼthá káñii Jeobá, tséʼniuu má asndu xú káʼnii xkujndu guraʼníí. Raga̱jma̱ rí gíʼmaa mudxawíín rí ikhaa naʼthúlúʼ náa ajngáa rawunʼ ga̱jma̱a̱ náa xuajñu. Ga̱jma̱a̱ ragajtsú rí gíʼmaa maʼngulú maguáʼthi̱i̱n rí ikhaa maʼnimbánuu ga̱jma̱a̱ rí makumulúʼ kuʼyáá rí maʼni̱i̱ a̱jkiu̱lú náa gamiéjunʼ rí kuaʼdáá índo̱ gagájnuu mbiʼi rí kaʼyoo. Á mu nuʼni xúgíʼ rígi̱ xóo niʼni Habacuc, makuwáanʼ tsímáá, rígi̱ gambáyulú mu maʼngulú. Rí maguáʼthi̱i̱n marigá nda̱wa̱á mambáyulúʼ mu maʼngulú, ga̱jma̱a̱ rígi̱ gáʼni rí makuwáanʼ gagi maski ajndu narígá xkujndu. Rí kuaʼti̱i̱n marigá nda̱wa̱á nambáyulúʼ makumulúʼ kuʼyáá Anu̱lú bi̱ xtáa mekhuíí, rí maʼnimbánuu rí naʼthí maʼni (Rom. 12:12).

13. Ndiéjunʼ niʼthúu̱n Jeobá Habacuc rá.

¹³ (Atraxnuu Habacuc 2:3). * Mú Jeobá nidxuu a̱jkiu̱u̱n kaʼyoo Habacuc rí magiʼthu̱u̱n rí ikhaa maʼnimbánuu. Bi̱ gíʼdoo xúgíʼ tsiakii naninuʼ májánʼ xkujndu rí nigiʼdoo Habacuc. Ikha jngó niʼni maʼni̱i̱ a̱jkiu̱u̱n índo̱ niʼthúu̱n rí maxtiʼña̱a̱ graxe̱ rí niʼni. Xáʼni mba̱yu̱ʼ, rí xúgíʼ gamiéjunʼ rí gíʼdoo mandáti̱ga̱a̱. Gajkhun niʼthúu̱n: “Araʼthi̱i̱n ga̱jma̱a̱ ga̱ku̱ma̱ʼ xta̱yo̱ʼ. Maski ajndu nakujmaa rí tsixtiʼña̱a̱ nacha̱ mú maxtiʼña̱a̱”. Jeobá niʼni marmáʼáan a̱jkiu̱u̱n rí niríyaʼ má mbiʼi maʼnimbánuu rí niʼthí maʼni ga̱jma̱a̱ niʼthúu̱n rí magiʼthu̱u̱n má xúʼko̱. Ga̱jma̱a̱ xáʼni nduwaʼ.

14. Ndiéjunʼ rí guraʼwíí muʼni índo̱ guraʼníí xkujndu rá.

¹⁴ Á mu naʼngulú naguaʼti̱i̱n rí Jeobá manimbánuu ga̱jma̱a̱ nuʼgíʼ edxu̱lúʼ rí naʼthí, makuwáanʼ tsímáá ga̱jma̱a̱ makumulúʼ kuʼyáá maski ajndu nuraʼníí xkujndu. Jesús niʼthí rí xúʼgíʼ edxu̱lúʼ náa mbiʼi rí Dios xóó tsesngájma nguáná gáʼni (Hech. 1:7). Gakumulú kuʼyáá Jeobá rí ndaʼyoo májánʼ náa phú mbiʼi gáʼnimbánuu. Ikha jngó, xákanajkulú ga̱jma̱a̱ guguaʼthi̱i̱n má xúʼko̱, guguaʼdáá fe ga̱jma̱a̱ gáʼngo̱o̱ a̱jkiu̱lú. Mú gajmulú májánʼ mbiʼi mu muʼni ñajunʼ Jeobá rí asndu xó má eʼngo̱o̱ (Mar. 13:35-37; Gál. 6:9).

15, 16. a) Ndiéjunʼ rí itháan gíʼdoo numuu rí nuxkamaa náa libro ndrígóo Habacuc rá. b) Ndiéjunʼ eʼsngúlúʼ ga̱jma̱a̱ numuu rí marigáa nda̱wa̱á rá.

¹⁵ Dios niʼthí rí xa̱bu̱ bi̱ májánʼ maxtáa numuu rí “naʼni rí jmbu” ga̱jma̱a̱ rí náa “ku̱ba̱ʼ majmaʼnuʼ gloria ndrígóo Jeobá” (Hab. 2:4, 14). Ikha jngó, Dios maxnún xa̱bu̱ rí makuwa kámuu mbiʼi bi̱ gáʼngo̱o̱ a̱jkiu̱ún ga̱jma̱a̱ bi̱ gakumu̱ún kuyáá ikhaa.

¹⁶ Rí na̱ʼkha̱ raʼthí náa Habacuc 2:4 nindxu̱u̱ mbá ajngáa rí nambáñun xúgínʼ. Mú apóstol Pablo ndiʼyoo rí gíʼdoo numuu versículo rígi̱ ikha jngó niʼthí ajtsú nuthu ga̱jma̱a̱ numuu rígi̱ (Rom. 1:17; Gál. 3:11; Heb. 10:38). Á mu guáʼdáá fe ga̱jma̱a̱ nakumulú kuʼyáá Dios, makuwáanʼ ruʼyáá xú káʼnii gambánuu rí naʼthí maʼni, asndu xú káʼnii má gamiéjunʼ rí guraʼníí. Jeobá naʼtulúʼ rí muʼnimi̱jna̱ mu makhánulúʼ rí marigá nda̱wa̱á, mú raʼkháa xóo kuwáanʼ xúgi̱.

17. Ndiéjunʼ eʼthúlú náa libro ndrígóo Habacuc rá.

¹⁷ Náa libro ndrígóo Habacuc na̱ʼkha̱ mbá májánʼ ikha rí mambáyulúʼ xúgiáanʼ bi̱ kuwaanʼ iwáá mbiʼi. Jeobá naʼthí rí bi̱ xa̱bu̱ míjínʼ maxnún makuwa kámuu mbiʼi á mu nakumu̱ún kuyáá. Ikha jngó, guʼni rí mbaja̱a̱ fe ndrígúlú ga̱jma̱a̱ gakumulú kuʼyáá Dios, tséʼniuu asndu xú káʼnii má xkujndu rí guraʼníí ga̱jma̱a̱ gamiéjunʼ rí guguaʼdáá. Jeobá naʼthúlúʼ náa Habacuc rí maxtáa ga̱jma̱á ni̱ndxu̱lú ga̱jma̱a̱ maʼni káwáanʼ. Na̱ndu̱ʼu̱lú rí maku̱mu̱lú kuʼyáá ikhaa ga̱jma̱a̱ rí muguaʼthi̱i̱n má xúʼko̱ asndu índo̱ gáʼga̱nú mbiʼi rí Reino ndrígóo gáʼtañajunʼ náa  xúgíʼ tsu̱du̱u̱ Ku̱ba̱ʼ. Ikhú náa xúgíʼ numbaaʼ makuwá tsímáá xa̱bu̱ ga̱jma̱a̱ mbuyamajkuíí ikhaa (Mat. 5:5; Heb. 10:36-39).

18. Xú káʼnii nimbáyúu Habacuc ajngáa rí niʼthí Jeobá rá.

¹⁸ (Atraxnuu Habacuc 3:18, 19; * 3:16, 17). Ajngóo Jeobá nimbáyúu wéñuʼ Habacuc. Ikhaa nindxa̱ʼwáminaʼ ga̱jma̱a̱ numuu rí niʼni Dios náa xa̱bu̱ nákha wajyúúʼ, ga̱jma̱a̱ rúʼko̱ nimbáyúu mu maku̱mu̱u̱ kaʼyoo itháan Jeobá. Maski ajndu ndiʼyoo rí mamínuʼ mbá nguáthá mbiʼi, ikhaa ndiʼyoo májánʼ rí Jeobá gáʼnimbánuu nacha̱. ¡Ra̱ʼkhá tháán niʼni̱i̱ a̱jkiu̱u̱n! Rí niʼni maxmiéjunʼ ginii niʼni maku̱mu̱u̱ kaʼyoo Jeobá. Ni̱jkha̱nú niʼnirámáʼ ajngáa rí nisngájma rí nikumu̱u̱ kaʼyoo Jeobá rí nuxkamaa náa Biblia. Tikhun xa̱bu̱ bi̱ najmañún nuthi rí ajngáa rí na̱ʼkha̱ náa versículo 18 nandoo gáʼthúu̱n rí Habacuc maʼdxuu wéñuʼ a̱jkiu̱u̱n ga̱jma̱a̱ numuu Dios ndrígóo. Lá ragájkhun rí xkri̱da ndrígóo naxnúlú mbá májánʼ ikha ráʼ. Jeobá raʼkháa i̱ndó nakudaminaʼ rí maʼni, ma̱ngaa naʼthúlúʼ rí xtáa raʼni asndu xú káʼnii má mu maʼnimbánuu.

19. Ndiéjunʼ gándoo muʼni mu mundrígú ikháá má ajngáa rí nigruigú Habacuc rá.

¹⁹ Ajngáa rí na̱ʼkha̱ náa libro ndrígóo Habacuc gíʼdoo wéñuʼ numuu: Rí gíʼmáanʼ makumulúʼ kuʼyáá Jeobá (Hab. 2:4). Ndiéjunʼ gambáyulú mu makumulúʼ kuʼyáá má xúʼko̱ rá. Rí mambaxúlúʼ itháan májánʼ gajmiúlú. Mú gíʼmaa muʼnimbánii ajtsú rígi̱. Timbá, rí muʼthá káñii má xúʼko̱ Dios ga̱jma̱a̱ muʼtháán xúgíʼ rí naxmiéjunlú. Raga̱jma̱, rí muʼnimbánii Ajngóo ga̱jma̱a̱ ikha rí naxnúlú náa xuajñu. Ga̱jma̱a̱ ragajtsú, muguaʼthi̱i̱n ga̱jma̱a̱ fe ga̱jma̱a̱ maʼngo̱o̱ a̱jkiu̱lú mu mbuʼyáá xú káʼnii gaʼnimbánuu. Rígi̱ rí niʼni Habacuc. Maski ajndu libro ndrígóo nigíʼdu̱u̱ gíná, mú índo̱ námbáa nisngájma rí nixtáa gagi ga̱jma̱a̱ rí nikumu̱u̱ kaʼyoo Dios. Guʼyaridáá xkri̱da ndrígóo ga̱jma̱a̱ xúʼko̱ gakumulú rí Jeobá nagruaʼwánʼ. Ajngáa rígi̱ naʼni̱i̱ a̱jkiu̱lú maski ajndu kuwaanʼ náa mbá numbaaʼ xkawiʼ.