XÚGIÁANʼ nuxnáa núma̱aʼ numuu rí eʼwíínʼ naxmiéjunʼ kuyulúʼ ga̱jma̱a̱ rí mbuyamajkulú. Mú, ndiéjunʼ gándoo muʼni mu muʼniu̱u̱n xúʼko̱ kaʼnii eʼwíínʼ rá.

Náa Biblia najmuu muʼni rí májánʼ o muguaʼdáá gamajkhulúʼ rí nandoo gáʼthúu̱n rí gajkhun maxmiéjunʼlú kuʼñúún eʼwíínʼ, rí nakujmaa náa ajngáa guabaaʼ ga̱jma̱a̱ rí nuʼniu̱u̱n eʼwíínʼ xóo gíʼmaa. Rí muʼni rí májánʼ raʼkháa i̱ndó muguaʼdáá gamajkulú. Nindxu̱u̱ itháan, numuu rí naxkaxáanʼ ngajua ga̱jma̱a̱ rí makru̱ʼu̱lú xóo ekru̱ʼu̱u̱n eʼwíínʼ. Ma̱ngaa nindxu̱u̱ mbá rí na̱ʼkha̱ náa xi̱ʼ kaʼwu ndrígóo Dios, rí cristianos gíʼmaa muʼnimbaníí (Gál. 5:22, 23). Ikha jngó guʼyáá xú káʼnii esngájma Jeobá ga̱jma̱a̱ Jesús cualidad rígi̱ ga̱jma̱a̱ xú káʼnii gúʼyaridáá xkri̱da ndrígu̱ún.

Rí muʼni rí májánʼ kagujtuminaʼ ga̱jma̱a̱ rí manindxu̱lúʼ xa̱bu̱ májánʼ a̱jkiu̱u̱n. * Jeobá nasngájma cualidades rígi̱ náa xúgínʼ xa̱bu̱, asndu “bi̱ tséxna̱a̱ núma̱aʼ ga̱jma̱a̱ xa̱bu̱ bi̱ ra̱míjínʼ” (Luc. 6:35). Mbá xkri̱da, Jeobá “naʼni magajnúu a̱jkha̱ʼ náa xa̱bu̱ ra̱míjínʼ ga̱jma̱a̱ bi̱ míjínʼ ga̱jma̱a̱ xúʼko̱ má eʼni maxnúu ruʼwa náa xa̱bu̱ bi̱ nuni rí jmbu ga̱jma̱a̱ bi̱ tseni rí jmbu” (Mat. 5:45). Asndu mangiin bi̱ na̱nguá enimbu̱ún rí Jeobá niʼnii nambáñun xúgíʼ rí ikhaa naxnún xa̱bu̱ mu makuwá ga̱jma̱a̱ nakuwa tsímáá.

Guʼyáá xkri̱da rí itháan májánʼ rí nixná Jeobá náa Adán ga̱jma̱a̱ Eva. Nguáthá mbiʼi rí nixudami̱jna̱ aʼkhá, ikhiin “nixmí inúu higo” mu muruguáá xuñúnʼ. Mú Dios ndiʼyoo rí mbaʼñúnʼ mbá xtíin rí kaʼyoo numuu rí ni xákuwá náa rexo̱o̱ ixi̱ ri̱ʼi̱ Edén, numuu rí Ku̱ba̱ʼ nijuiʼthá tsriguii ga̱jma̱a̱ rígá wéñuʼ “tsuwanʼ ga̱jma̱a̱ iná xkawiʼ”. Ikha jngó, ndiʼyoo rí mbaʼñúnʼ ga̱jma̱a̱ niʼni “xtíin rí mbi̱jua̱ ga̱jma̱a̱ xtún xujkhúʼ” (Gén. 3:7, 17, 18, 21).

Maski ajndu Jeobá naʼniún rí májánʼ “xa̱bu̱ ra̱míjínʼ ga̱jma̱a̱ bi̱ míjínʼ”, nandoo mbaʼyamajkún itháan xa̱bi̱i̱ bi̱ ni̱ndxu̱ún jmbiin. Mbá xkri̱da, mbiʼi rí nixtáa gaʼyee Zacarías, mbáa ángel nixmiéjunʼ numuu rí niwi̱ji̱ ñajunʼ rí maguma̱a̱ templo ndrígóo Jerusalén. Dios niʼdxaun ga̱jma̱a̱ niriʼñuu “ajngáa májánʼ, ajngáa rí naʼni̱i̱ a̱jkiu̱lú” (Zac. 1:12, 13). Xúʼko̱ má kayuʼ niʼni ga̱jma̱a̱ gaʼyee Elías. Mbóo mbiʼi, ikhaa nixtáa gíná rí asndu nindo̱ʼo̱o̱ Jeobá rí maniñuʼ makhañúu. Dios ndiʼyoo májánʼ rí nikumu̱u̱, ga̱jma̱a̱ numuu rúʼko̱ rí nikunguanʼ mbáa ángel mu maxnúu tsiakii. Ma̱ngaa niʼthúu̱n rí na̱nguá xtáa mbáwíi. Ikha jngó, ajngáa rígi̱ niʼni̱i̱ a̱jkiu̱u̱n ga̱jma̱a̱ nimbáyúu rí nigruigú, Elías tániñuʼ raʼni ñajunʼ rí nijuixnáá (1 Rey.  19:1-18). Mú, tsáa bi̱ phú itháan ndiʼyaridoo májánʼ Dios bi̱ niʼniún rí májánʼ eʼwíínʼ rá.

Nákha Jesús nixtáa raʼtáraʼa náa tsu̱du̱u̱ Ku̱ba̱ʼ, nijmaʼniiʼ numuu rí ndiʼyamajkhún xa̱bu̱ ga̱jma̱a̱ májánʼ a̱jkiu̱u̱n. Nimbá miʼtsú táʼni gújkhuʼ a̱jkiu̱u̱n ga̱jma̱a̱ taʼtañajúnʼ xa̱bu̱. Ikhaa nikro̱ʼo̱o̱ kaʼñún xa̱bu̱, ga̱jma̱a̱ niʼthí: “Aguwaʼ náa ikhúúnʼ, xúgiáanʼ bi̱ nuñajunʼ wéñuʼ ga̱jma̱a̱ bi̱ kuda eʼda, ga̱jma̱a̱ ikhúúnʼ mani rí muda̱a̱ xa la” (Mat. 11:28-30). Ikha jngó xa̱bu̱ nagún kidxuuʼ asndu náa má ejkha̱. Rí nigáwiinʼ a̱jkiu̱u̱n kaʼñún nixkaxi̱i̱ maxniʼtsun, mani thanún bi̱ naʼniún nandii ga̱jma̱a̱ “mbaʼa rí nigíʼdu̱u̱ niʼsngúún” ga̱jma̱a̱ numuu Anu̱u̱ (Mar. 6:34; Mat. 14:14; 15:32-38).

Jesús nikro̱ʼo̱o̱ májánʼ rí xóo ekumún xa̱bu̱. Nigruiguíin májánʼ bi̱ nduyááʼ, maski asndu nguáná ikhaa táguapaa (Luc. 9:10, 11). Mbá miʼtsú, mbáa a̱ʼgu̱ bi̱ nagajtaa eʼdiuu mbá gu̱wa̱ʼ ijma̱ tsiguʼ nikuʼmaminaʼ ga̱jma̱a̱ nixkajma xtíñuu Jesús numuu rí nindoo maguma thanáá. Ikhaa na̱nguá kaʼyoo maʼni xúʼko̱, numuu rí mitsagaa nindxu̱u̱ náa inuu Xtángoo (Lev. 15:25-28). Mú Jesús na̱nguá niríyúu. Rí niʼni, ga̱jma̱a̱ ajngáa guabaaʼ niʼthúu̱n a̱ʼgu̱ bugi̱: “A̱ʼdióoʼ, fe ndrígáʼ niʼni maʼni̱i̱ a̱jkia̱nʼ. Ayuuʼ tsímáá, niʼni̱i̱ má nandii xkawiiʼ rí xtaʼdáá” (Mar. 5:25-34). ¡Ra̱ʼkhá tháán gamajkhu nigiʼdoo Jesús!

Xkri̱da rí ndiʼyáá niniñuʼ kaʼwu rí muʼni rí májánʼ nindxu̱u̱ mbá cualidad rí nasngájma rí xóo nuʼni. Mú muʼni rígi̱, Jesús niʼthí xkri̱da ndrígóo samaritano. Maski ajndu samaritanos ga̱jma̱a̱ judíos tsembáxu̱u̱n májánʼ, samaritano bi̱ naʼthí náa historia rígi̱ nigáwiinʼ a̱jkiu̱u̱n niʼni judío bi̱ nirikháá náa kamba̱a̱, nixnáá ga̱jma̱a̱ asndu inuu makhañúu. Niʼni thanuu náa nigawúunʼ, ni̱jkha̱ kayáa náa mbá guʼwá ga̱jma̱a̱ niʼni numuu xa̱bu̱ bi̱ mañewu̱u̱n. Asndu niʼthúu̱n rí ikhaa gáʼni numuu rí gáʼyooʼ xóó (Luc. 10:29-37).

Gajkhun má, rí muʼni rí májánʼ nusngájma ga̱jma̱a̱ rí nuʼni, mú ma̱ngaa nakujmaa índo̱ nuʼthá ajngáa rí naxná tsiakii. Gajkhun má rí maski ajndu “náa a̱jkiu̱u̱n xa̱bu̱ rígá rí naxmiéjunʼ wéñuʼ”, náa Biblia naʼthí rí “ajngáa májánʼ naʼni maxtáa gagi” (Prov. 12:25). Rí muʼni rí májánʼ ga̱jma̱a̱ rí manindxu̱lúʼ xa̱bu̱ májánʼ a̱jkiu̱u̱n maxkaxáanʼ muxnún tsiakii eʼwíínʼ ga̱jma̱a̱ ajngáa rí maʼniún makuwa tsímáá ga̱jma̱a̱ musngajmúún rí naxmiéjunlú kuʼñúún. Rígi̱ gáxnún itháan tsiakii mu muraʼníí xkujndu náa vida ndrígu̱ún (Prov. 16:24).

Numuu rí nigumáanʼ “xó má kaʼnii ikhaa”, xúgiáanʼ ma̱ndoo muguaʼdáá cualidad rígi̱ (Gén. 1:27). Guʼyáá tikhuu xkri̱da rí na̱ʼkha̱ náa Biblia. Mbáa soldado bi̱ mbiʼyuu Julio ni̱jkha̱ kayáa apóstol Pablo náa Roma. Soldado bugi̱ niʼniuu rí májánʼ Pablo ga̱jma̱a̱ “niniñuʼ maʼga̱ mu maxtáa gajmíi̱n bi̱ nambáxu̱u̱ ga̱jma̱a̱ rí muñewa̱a̱n” náa xuajen Sidón (Hech. 27:3). Nguáthá mbiʼi nda̱wa̱á, xa̱bu̱ bi̱ kuwa náa isla rí mbiʼyuu Malta nigáwiinʼ a̱jkiu̱u̱n kuyáá Pablo ga̱jma̱a̱ eʼwíínʼ xa̱bu̱ bi̱ nikáwíin náa iyaʼ. Nigíʼ aguʼ mu matagúnʼ ga̱jma̱a̱ nini xúgíʼ rí nindoo mu mumbañún (Hech. 28:1, 2). Rí nini ninindxu̱u̱ májánʼ wéñuʼ. Mú rí muʼni rí májánʼ nandoo gáʼthúu̱n itháan ki xóo rí muʼniu̱u̱n rí májánʼ eʼwíínʼ.

Á mu nandulúʼ mbuʼyamajkuíí káxi̱ Jeobá, gíʼmaa muʼni rí cualidad rígi̱ rí na̱ʼkha̱ náa Dios marigá xúgíʼ mbiʼi náa ikháanʼ ga̱jma̱a̱ rí xóo kuwaanʼ. Gajkhun má rí nguáná maʼni gakhi̱i̱ muʼni rí májánʼ náa eʼwíínʼ. Náa numuu rá. Numuu rí nguáná naguiñunʼ  kuyulúʼ ga̱jma̱a̱ numuu ñajunʼ rí nuʼnilú, numuu rí natiyulú o namíñulú o numuu rí i̱ndó naxmiéjunlú kuʼyamijná i̱ndó ikháanʼ. Mú maʼngulú muʼni gajmiúlú rígi̱ á mu nduʼyááʼ xi̱ʼ kaʼwu ndrígóo Jeobá ga̱jma̱a̱ á mu nduʼyaridáá xkridoo (1 Cor. 2:12).

Ndiéjunʼ gambáyulú mbuʼyáá náa gándoo muʼni rí itháan májánʼ ga̱jma̱a̱ numún eʼwíínʼ rá. Gíʼmaa muraximíjna̱: “Lá naʼgíʼ májánʼ edxu̱ʼ mu madxun rí gúthunʼ eʼwíínʼ ráʼ. Lá xtáá xawii mu mba̱yo̱o̱ ndiéjunʼ eñúnʼ eʼwíínʼ ráʼ. Lá nirígá mbá rí májánʼ rí nini, ga̱jma̱a̱ numuu mbáa bi̱ na̱nguá ka̱yo̱o̱ o mbáa bi̱ nambáxuʼ ga̱jmu̱ʼ ráʼ.” Ma̱ngaa, ma̱ndoo muʼgími̱jna̱ metas, xóo rí muniʼnúʼ májánʼ eʼwíínʼ, mú itháan májánʼ a̱ngiu̱lú bi̱ kuwa náa congregación ndrígúlú. Xúʼko̱ mbuʼyáá xóo kuwa ga̱jma̱a̱ rí nda̱ñúnʼ. Nda̱wa̱á, guʼniu̱u̱n eʼwíínʼ xóo rí nandulúʼ magumáanʼ ikháanʼ (Mat. 7:12). Ma̱ngaa gunda̱ʼa̱a̱ Jeobá rí mambáyulúʼ, ga̱jma̱a̱ ikhaa gáʼni tsajkurámaaʼ tsiakii ndrígúlú (Luc. 11:13).

Apóstol Pablo nigíʼ mbá májánʼ xkri̱da rí xóo mbáa naʼni rí májánʼ ga̱jma̱a̱ numún eʼwíínʼ. Náa Biblia naʼthí nigruigúun májánʼ bi̱ niguwáʼ gúyáá (Hech. 28:30, 31). Nixmiéjunʼ kaʼñún xa̱bu̱ ga̱jma̱a̱ nisngájma xóo rí niʼthí ga̱jma̱a̱ rí niʼni. Ikha jngó xa̱bu̱ nanigu̱nʼ makuwa gajmiún. Xúʼko̱ má kayuʼ, rí xóo eʼni maxkaxi̱i̱n eʼwíínʼ manigu̱nʼ mudxawíín rí gajkhun. Á mu nuʼniu̱u̱n rí májánʼ xúgínʼ xa̱bu̱ asndu bi̱ nakiʼníin kuyulúʼ numuu rí nuʼnigajmaa, maʼndoo muʼni rí a̱jkiu̱ún maxkajxi̱i̱n muriʼkhumijná rí xóo xa̱bu̱ ni̱ndxu̱ún (Rom. 12:20). Mbáa nda̱wa̱á xa̱bu̱ bugi̱ manigu̱nʼ mudxawíín rí naʼthí náa Biblia.

Náa Ku̱ba̱ʼ mitsaan, mbaʼin xa̱bu̱ gágabiín ga̱jma̱a̱ makuwa gagi numuu rí timbá aʼphu̱ nindxu̱u̱ rí nduyamajkhún. Náa a̱jkiu̱ún gusngajma rí nuxna̱a̱ núma̱aʼ, ikha jngó xúʼko̱ guniu̱u̱n eʼwíínʼ. Bi̱ nusngajma rí nandún kuñún eʼwíínʼ ga̱jma̱a̱ nduyamajkhún, Jeobá maʼni rí makuwá kámuu mbiʼi. Mú xákuwa ikhí xa̱bu̱ bi̱ tsíñún muni rígi̱ (Sal. 37:9-11). Ikhú náa numbaaʼ ní xarigá gamíi ga̱jma̱a̱ marigá rí tsímáá índo̱ gáxtáa raʼtáñajunʼ Reino ndrígóo Dios. Mú nákha xóó tséjkha̱nú mbiʼi rúʼko̱, xú káʼnii gándoo gambáyulú rí muʼni rí májánʼ rá.

Náa Biblia naʼthí rí xa̱bu̱ bi̱ nduyamajkhún eʼwíínʼ ikhiin má embáñun (Prov. 11:17). Xa̱bu̱ nanigu̱nʼ makuwá gajmiún ga̱jma̱a̱ nugíʼ nduyaridún. Jesús niʼthí: “Numuu rí xó má egiéwanla, xúʼko̱ má gugiewa̱a̱n rí muda̱a̱la” (Luc. 6:38). Ikha jngó, xa̱bu̱ bugi̱ tséʼniún mingíjyúuʼ mambaxúún gajmiún eʼwíínʼ.

Apóstol Pablo nixnúún xtágabu rígi̱ cristianos bi̱ kuwa náa Éfeso: “Ganindxala májáánʼ xa̱bu̱ gajmiála eʼwíínʼ, agaʼwíínʼ a̱jkia̱la kuyamíjna̱, ga̱jma̱a̱ guni mba̱a̱ a̱jkia̱la kuyamíjna̱” (Efes. 4:32). Náa congregación nambáñun wéñuʼ musngajma rí nakru̱ʼu̱u̱n kuyamijná ga̱jma̱a̱ mugíʼ mumbayumíjná. Tsejmun ajngáa rí xóo muni gawúunʼ eʼwíínʼ o tseta numún. Nuthi ajngáa rí xóo muxnún tsiakii eʼwíínʼ ki xóo rí majngruigu̱u̱n runi xtujtaa (Prov. 12:18). Á mu xúʼko̱ erígá náa congregación nda̱ja̱a̱ itháan.

Rí muʼni rí májánʼ nindxu̱u̱ mbá cualidad rí nusngájma náa rí nuʼthá ga̱jma̱a̱ rí nuʼni. Índo̱ nuʼni rí májánʼ, nusngajmá ngajua ga̱jma̱a̱ rí Jeobá tsejmídúu (Efes. 5:1). Ma̱ngaa nuʼni rí marigá itháan májánʼ náa congregación ga̱jma̱a̱ nuʼni rí xa̱bu̱ manigu̱nʼ mudxawíín rí gajkhun. Ikha jngó, guʼnimíjna̱ mu muʼgíʼ májánʼ xkri̱da ga̱jma̱a̱ cualidad rí mitsaan wéñuʼ.