1, 2. a) Ndiéjunʼ niriʼñuu Jesús Pedro índo̱ niʼthúu̱n rí gagáwíínʼ a̱jkiu̱u̱n kaʼyaminaʼ rá. (Atayáá timbá xtiʼkhu.) b) Náa numuu rí niriʼñuu xúʼko̱ xá.

XA̱BI̱I̱ Jesús niʼniún tsiánguá rí ndiʼkhún niguámbu̱u̱n nidxawíín. Nikumu̱ún rí Jesús magíʼ reino náa Israel, mú ikhaa niʼthún rí mamínuuʼ ga̱jma̱a̱ rí makhañúu. Apóstol Pedro niʼthúu̱n: “Señor, agaʼwíínʼ a̱jkia̱nʼ xtayaminaʼ; ikháánʼ na̱nguá kaʼyaʼ matraʼníí rígi̱”. Jesús niriʼñuu: “¡Ayuʼ kaníí Satanás! Natani majngráduunʼ, numuu rí na̱nguá tatsaʼwáá edxa̱ʼ xó má Dios, i̱ndó natatsaʼwáminaʼ xóo mbáa xa̱bu̱” (Mat. 16:21-23; Hech. 1:6).

² Xúʼko̱ kaʼnii nisngájma Jesús rí mbá nuthu nindxu̱u̱ xóo endxa̱ʼwáminaʼ numbaaʼ ndrígóo Satanás ga̱jma̱a̱ rí xóo endxa̱ʼóo edxu̱u̱ Dios (1 Juan 5:19). Rí Pedro niʼthúu̱n Jesús nisngájma ku̱ma̱ ndrígóo numbaaʼ. Mú Jesús ndiʼyoo rí Jeobá nandxa̱ʼwáminaʼ i̱mba̱ núthu. Ndiʼyoo rí Jeobá nindoo rí ikhaa maʼnirataminaʼ mu mamínuʼ ga̱jma̱a̱ makhañúu. Ajngáa rí niʼthí Jesús nisngájma rí niʼni gaʼduunʼ xóo endxa̱ʼóo edxu̱u̱ numbaaʼ numuu rí ndaʼyoo xó má Anu̱u̱ eʼyoo.

3. Náa numuu rí naʼniulú gakhi̱i̱ muʼni gaʼduunʼ rí xóo nandxa̱ʼóo edxu̱u̱ numbaaʼ ga̱jma̱a̱ rí xóo ndaʼyoo Jeobá rá.

 ³ Ga̱jma̱a̱ ikháanʼlu rá. Lá nundxa̱ʼwáá edxu̱lúʼ xóo Dios o xóo endxa̱ʼóo edxu̱u̱ numbaaʼ ráʼ. Gajkhun má rí nuʼnimbánii xtángoo ndrígóo Jeobá. Mú xú káʼnii endxaʼwamíjna̱ rá. Lá nuʼgími̱jna̱ mbuʼyáá xó má endxa̱ʼóo edxu̱u̱ Dios ráʼ. Mu maʼngulú, ndayóoʼ muʼnimíjna̱ má xúʼko̱. Mú tséyóoʼ muʼni tsiakimíjna̱ mu mundxaʼwáá edxu̱lúʼ xóo endxa̱ʼóo edxu̱u̱ numbaaʼ, numuu rí xi̱ʼ ndrígóo rígá mbájndi (Efes. 2:2). Ma̱ngaa rí xóo endxa̱ʼóo edxu̱u̱ numbaaʼ ma̱ndoo manigulúʼ ga̱jma̱a̱ natsudáanʼ mundxaʼwamíjna̱ i̱ndó ga̱jma̱a̱ numulúʼ. Ga̱jma̱a̱ rí mingíjyúuʼ nindxu̱u̱ mundxaʼwáá edxu̱lúʼ xóo Jeobá, mú tséʼniulú gakhi̱i̱ mundxaʼwáá edxu̱lúʼ xóo náa numbaaʼ.

4. a) Ndiéjunʼ guguaʼnii á mu nuʼniñámíjná rí náa numbaaʼ maʼniulú mundxaʼwáá edxu̱lúʼ xóo ikhaa rá. b) Xú káʼnii gambáyulú artículo rígi̱ rá.

⁴ Á mu nuʼniñámíjná rí numbaaʼ maʼniulú mundxaʼwáá edxu̱lúʼ xóo eyoo ikhaa, maʼni rí mundxaʼwáá edxu̱lúʼ i̱ndó ga̱jma̱a̱ numulúʼ ga̱jma̱a̱ maʼndulú muraʼwíí i̱ndó ikháanʼ rí májánʼ o dí ra̱májánʼ (Mar. 7:21, 22). Ikha jngó gíʼdoo wéñuʼ numuu mundxaʼwáá edxu̱lúʼ xóo Jeobá, raʼkháa xóo xa̱bu̱ numbaaʼ. Artículo rígi̱ mambáyulúʼ mú xúʼni̱ dí rígá náa numbaaʼ. Mbuʼyáá náa numuu rí tsirikulu nimbá rí mbuʼyáá xó má eyoo Dios, rí phú naʼni, nambáyulúʼ wéñuʼ. Ma̱ngaa muʼthá rí xú káʼnii gúʼni gaʼduunʼ rí xundxaʼwáá edxu̱lúʼ dí rígá náa numbaaʼ. Náa imbo̱o̱ artículo mbuʼyáá, xú káʼnii gundxaʼwáá edxu̱lúʼ xóo Dios náa mbaʼa rí muʼni.

5. Náa numuu rí tikhun xa̱bu̱ tsíñún rí eʼwíínʼ muthún rí gíʼmaa mundxaʼwamíjna̱ xá.

⁵ Tikhun xa̱bu̱ tsíñún rí eʼwíínʼ muthún káʼnii gíʼmaa muni o mundxaʼwamíjna̱ xóo endxa̱ʼwa̱a̱ edxu̱ún ikhiin. Nuthi: “Tsíyóóʼ rí nimbáa mandxaʼwáminaʼ ga̱jma̱a̱ numuʼ”. Mbáa rí nandún gúthi rí ikhiin má eraʼwíí rí muni ga̱jma̱a̱ na̱nguá má nindxu̱u̱ ra̱májánʼ. Tsíñún makumún rí eʼwíínʼ nutañajúnʼ ga̱jma̱a̱ rí nuriya kaʼñúnʼ rí guáʼdáá ikhiin rí naʼni makujmiin mixtiʼkuiin náa eʼwíínʼ xa̱bu̱. *

6. a) Ndiéjunʼ libertad exnúlú Jeobá rá. b) Lá nindxu̱u̱ mbá libertad rí muʼni asndu xú káʼnii má rí nandulúʼ ráʼ.

⁶ Mú, rí majmañulúʼ mundxaʼwáá edxu̱lúʼ xóo Jeobá tsíyoo gáʼthúu̱n rí muʼni gaʼduunʼ rí nakumulú o rí xóo xa̱bu̱ ni̱ndxu̱lú. Xó má eʼthí 2 Corintios 3:17, “náa rígá espíritu ndrígóo Jeobá, na̱nguá kaxtuʼwájmáanʼ”. Na̱nguá má kaxtuʼwájmáanʼ, ma̱ndoo manindxu̱lúʼ xó má eyulú ikháanʼ ga̱jma̱a̱ ma̱ndoo muʼni rí nandulúʼ ga̱jma̱a̱ rí nanigulúʼ. Xúʼko̱ niʼniáanʼ Dios. Rí xándoo muʼni rí libertad ndrígúlú maʼniulú muʼni asndu xú káʼnii má rí nandulúʼ (atraxnuu 1 Pedro 2:16). * Índo̱ nuraʼwíí muʼni rí májánʼ ga̱jma̱a̱ dí ra̱májánʼ, Jeobá nandoo rí muʼnimbulúʼ ikha ndrígóo rí naxnúlú náa Ajngóo. Lá rúʼko̱ nandoo gáʼthúu̱n rí xániñulú muʼni xúgíʼ o nambáyulúʼ dxe̱ʼ.

7, 8. Náa numuu nuʼthá rí mundxaʼwáá edxu̱lúʼ xóo Jeobá ragákhi̱i̱ nindxu̱u̱ rá. Araxná mbá xkri̱da.

⁷ Guʼyáá mbá xkri̱da. Xa̱bu̱ buanii nugíʼ nusngúún e̱jñún rí májánʼ mu ikhiin muthi rí gajkhun, muñajunʼ ga̱jma̱a̱ mani̱ndxu̱ún míjínʼ xa̱bu̱. Lá rúʼko̱ eyoo gáʼthúu̱n rí xándoo muni nimbá xáʼ. Na̱nguá. Rí phú nandún rí e̱jñún makuwá májánʼ. Índo̱ gaʼnuu ga̱jma̱a̱ índo̱ gagajnún náa guʼwún, ma̱ndoo  muraʼwi̱i̱ náa magún. Á mu nuraʼwi̱i̱ munimbu̱ún ikha rí nixnúún anu̱ún, xátanga̱a̱ a̱jkiu̱ún ga̱jma̱a̱ rí guraʼwíí muni ga̱jma̱a̱ mambáñun náa mbaʼa xkujndu ga̱jma̱a̱ náa gamiéjunʼ.

⁸ Jeobá nandoo kaʼñún e̱ji̱i̱n ga̱jma̱a̱ nandoo makuwá májánʼ (Is. 48:17, 18). Ikha jngó naxnúlú ikha rí itháan gíʼdoo numuu rí xóo gíʼmaa muʼni ga̱jma̱a̱ rí xú káʼnii gúʼniu̱u̱n xa̱bu̱ numbaaʼ. Náa tema xóo rígi̱, naʼthúlúʼ rí mundxaʼwamíjna̱ xóo ikhaa ga̱jma̱a̱ mbuʼyáá rí gíʼdoo numuu. Lá rúʼko̱ eyoo gáʼthúu̱n rí xáʼyóoʼ mundxaʼwamíjna̱ ikháanʼ rá. Na̱nguá, rí phú naʼni rí mundxaʼwamíjna̱ itháan májánʼ (Sal. 92:5; Prov. 2:1-5; Is. 55:9). Nambáyulúʼ mu muraʼwi̱i̱ rí maʼni makuwáanʼ gagi ga̱jma̱a̱ naniñulú muʼni rí nanigulúʼ (Sal. 1:2, 3). Gajkhun rí mundxaʼwáá edxu̱lúʼ xóo Jeobá nambáyulúʼ.

9, 10. Náa numuu rí nuʼthá rí mundxaʼwáá edxu̱lúʼ xóo Dios itháan májánʼ ki xóo náa numbaaʼ rá.

⁹ I̱mba̱ numuu rí cristianos nandulúʼ majmañulúʼ mundxaʼwáá edxu̱lúʼ xóo Dios, numuu rí itháan májánʼ nindxu̱u̱ ki xóo rí nundxa̱ʼwa̱míjna̱ xa̱bu̱ numbaaʼ. Rígi̱ naxnáruʼulú xtágabu ga̱jma̱a̱ numuu rí xóo makuwáanʼ, xóo rí muʼni, rí xóo mambaxúlúʼ gajmiúlú bi̱ kuʼñúún ga̱jma̱a̱ rí muñajunʼ májánʼ. Mbaʼa rígi̱ tsimbriguii ga̱jma̱a̱ rí xóo endxa̱ʼóo edxu̱u̱ Jeobá. Mbá xkri̱da, mbaʼin xa̱bu̱ náa numbaaʼ mbaʼa rí nandún maguaʼdáá ga̱jma̱a̱ nduyáá rí májánʼ nindxu̱u̱ rí nuxudami̱jna̱ aʼkhá xa̱bu̱. Nguáná nuthúún xa̱bu̱ gajmii rí ma̱ndoo muniñami̱jna̱a̱ ga̱jma̱a̱ numuu mbá dí ragíʼdoo numuu mu makuwá itháan gagi. Lá nayambáá xtágabu rígi̱ náa mbiʼi rí kuwáanʼ ki xóo rí naʼsngáa náa Biblia ráʼ.

¹⁰ Jesús niʼthí: “Dios ndaʼyoo rí á mu nuʼni rí jmbu, manindxu̱lúʼ xa̱bu̱ májáánʼ” (Mat. 11:19). Maski ajndu náa numbaaʼ rígi̱ na̱jkha̱ raxtiʼkhuu wéñuʼ ga̱jma̱a̱ numuu tecnología, mú tséʼngu̱u̱n gúnimbánii xkujndu rí itháan gakhi̱i̱ rí naʼni mu xákuwáanʼ gagi, xó má guerra, rí tsíñún guyamijná xa̱bu̱ o rí nuradímíjná. Ma̱ngaa nuniñaʼ rí xa̱bu̱ muxudami̱jna̱ aʼkhá. Lá nayambáá mu maʼni gámbáa xkujndu rí narígá náa mbá guʼwíin, nandii ga̱jma̱a̱ i̱ʼwáʼ ráʼ. Xó má ethi mbaʼin xa̱bu̱, naʼni rí marigá itháan. Mú cristianos bi̱ nundxa̱ʼwa̱a̱ edxu̱u̱ xóo Dios nakuwa itháan tsímáá, tséʼniuun nandii rí na̱ʼkha̱ náa nuxuda̱mi̱jna̱ aʼkhá ga̱jma̱a̱ nakuwa tsímáá gajmiún a̱ngiu̱ún náa xúgíʼ numbaaʼ (Is. 2:4; Hech. 10:34, 35; 1 Cor. 6:9-11). Lá ragájkhun rí mundxaʼwáá edxu̱lúʼ xóo Dios nindxu̱u̱ itháan májánʼ ki xóo náa numbaaʼ ráʼ.

11. Ndiéjunʼ nimbáyúu Moisés ga̱jma̱a̱ ndiéjunʼ nirígá rá.

¹¹ Xa̱bi̱i̱ Jeobá bi̱ nikuwa nákha wajyúúʼ niguánu ndiyáá rí itháan májánʼ nindxu̱u̱ rí mundxa̱ʼwa̱a̱ edxu̱ún xóo Dios ki xóo náa xa̱bu̱. Guʼyáá ga̱jma̱a̱ numuu Moisés. Nindo̱ʼo̱o̱ Dios rí majmañuu maski ajndu nijuiʼsngáá májánʼ “náa xúgíʼ ku̱ma̱ ndrígu̱ún xa̱bu̱ egipcios” (Hech. 7:22; Sal. 90:12). Ga̱jma̱a̱ niʼthá kháñuu rí maniñuʼ maninuʼ kambo̱o̱ (Éx. 33:13). Ga̱jma̱a̱ numuu rí niniñaminaʼ maxnúu ikha Jeobá, niʼni mbá rí gíʼdoo numuu náa rí niʼthí maʼni Dios. Ma̱ngaa, náa Biblia naʼthí rí nindxu̱u̱ xóo mbáa xa̱bu̱ bi̱ nigiʼdoo itháan fe (Heb. 11:24-27).

12. Náa ndiyáaʼ ku̱ma̱ apóstol Pablo mu maraʼwíí rí maʼni xá.

¹² Apóstol Pablo ninindxu̱u̱ mbáa xa̱bu̱ bi̱ nijmañuu wéñuʼ bi̱ niʼthí a̱jma̱ ajngáa (Hech. 5:34; 21:37, 39; 22:2, 3). Maski ajndu xúʼko̱, índo̱ niraʼwíí rí maʼni táyááʼ ku̱ma̱ dí rígá náa numbaaʼ, ndiyáaʼ náa Ajngá rawunʼ Dios (atraxnuu Hechos  17:2; * 1 Corintios 2:6, 7, 13). * Rígi̱ nimbáyúu mu maʼni ñajunʼ Dios ga̱jma̱a̱ nigi̱ʼthu̱u̱n magruigú rí maxtáa kámuu (2 Tim. 4:8).

13. Tsáa kaʼyoo mandxaʼwáminaʼ xóo endxa̱ʼóo edxu̱u̱ Dios rá.

¹³ Gajkhun má rí xóo nandxa̱ʼóo edxu̱u̱ Dios itháan májánʼ ki xóo náa numbaaʼ. Rí muʼni rí nandoo ikhaa maʼni makuwáanʼ itháan gagi ga̱jma̱a̱ makuwáanʼ itháan májánʼ. Mú Jeobá tsextumáanʼ mu mundxaʼwáá edxu̱lúʼ xóo ikhaa. Ni má “ñumba tsi jmbi, tsi majan indxaʼhuaminaʼ” ni má bi̱ kuya̱ edxu̱u̱ tsetulú rí muʼni (Mat. 24:45; 2 Cor. 1:24). Mámbáa rí ikháanʼ kaʼyulú mundxaʼwáá edxu̱lúʼ xóo endxa̱ʼóo edxu̱u̱ Dios. Xú káʼnii eʼni rá.

14, 15. a) Mu mundxaʼwáá edxu̱lúʼ xóo Jeobá, ndiéjunʼ gíʼmaa muʼni rá. b) Xó má eʼthí náa Romanos 12:2, náa numuu rí gíʼmaa muʼni gaʼduunʼ ku̱ma̱ dí rígá náa numbaaʼ rá. Atagíʼ mbá xkri̱da.

¹⁴ Romanos 12:2 naʼthúlúʼ rí eyoo Dios muʼni: “Guniʼñáanʼ rundáwami̱jna̱ náa numbaaʼ rígi̱; mú itháan májánʼ, muriʼkhuíí xóo endxa̱ʼwa̱a̱ edxa̱la, mu ma̱ndoo mbu̱ya̱a̱ ikháanʼ mínanʼ dí májánʼ ga̱jma̱a̱ dí naniguuʼ ga̱jma̱a̱ xúgíʼ rí jmbu rí e̱nda̱ʼa̱ Dios”. Rígi̱ nandoo gáʼthúu̱n rí ma̱ndoo mundxaʼwáá edxu̱lúʼ xóo Jeobá, tséʼniuu xú káʼnii e̱ndxa̱ʼwáá edxu̱lúʼ nákha xóó tseniʼnúʼ rí gajkhun. Gajkhun má rí xóo xa̱bu̱ ni̱ndxu̱lú o ga̱jma̱a̱ rí nijmañulúʼ náa vida ndrígúlú mambáyulúʼ. Mú edxu̱lúʼ naniñaminaʼ ga̱jma̱a̱ maʼndoo mariʼkuminaʼ má xúʼko̱. Mariʼkhu̱u̱ xóo e̱ndxa̱ʼwáá edxu̱lúʼ á mu nuniʼñámíjná. Á mu nundxa̱ʼwa̱míjna̱ xóo rí nandoo Dios, mu̱ʼguánu mbuʼyáá rí xóo endxa̱ʼóo edxu̱u̱ májánʼ nindxu̱u̱. Rí mambáyulúʼ muʼguánú mundxaʼwáá edxu̱lúʼ xóo endxa̱ʼóo edxu̱u̱ ikhaa.

¹⁵ Mu mundxaʼwáá májánʼ edxu̱lúʼ ragíʼmaa muniʼñáʼ rí numbaaʼ maʼniulú muʼni rí nandoo. Xóo muʼthá, gíʼmaa muʼni gaʼduunʼ ku̱ma̱ʼ rí tsínigu̱ʼ Dios. Rígi̱ gíʼdoo wéñuʼ numuu muʼni. Mu makru̱ʼu̱lú náa numuu, muʼgíʼ mbá xkri̱da. Mbáa xa̱bu̱ bi̱ nandoo maʼni̱i̱ ga̱jma̱a̱ numuu nandii rí gíʼdoo nagíʼdu̱u̱ nañewu̱u̱n rí na̱ʼkhu̱. Ndiéjunʼ gámbáyúu á mu na̱ʼkhu̱ ganitsu rí xámbáyuu xá. Ikháá má kayúʼ, rí mundxaʼwamíjna̱ xóo Dios xambáyulú á mu nuxuʼdáʼ ku̱ma̱ dí rígá náa numbaaʼ.

16. Náa gándoo guñeumíjna̱ rá.

¹⁶ Xándoo gúʼni gaʼduunʼ mbá kayuʼ ku̱ma̱ dí rígá náa numbaaʼ numuu rí kuwáanʼ ikhí (1 Cor. 5:9, 10). Índo̱ nuʼtáraʼa nuʼdxawíín kiʼsngáa dí ra̱májánʼ. Índo̱ na̱nguá xóo muʼni gaʼduunʼ ku̱ma̱ dí rígá náa numbaaʼ, rí ma̱ndoo muʼni nindxu̱u̱ rí xundxaʼwáá edxu̱lúʼ ga̱jma̱a̱ numuu rúʼko̱ ga̱jma̱a̱ muríyaʼ náa edxu̱lúʼ. Xó má niʼni Jesús, gíʼmáanʼ muʼni gaʼduunʼ nacha̱ ku̱ma̱ rí Satanás nandoo mundxaʼwáá edxu̱lúʼ. Ma̱ndoo muñeumíjna̱ rí xóo nandxa̱ʼóo edxu̱u̱ numbaaʼ rígi̱. Guʼyáá xú káʼnii gúʼni (atraxnuu Proverbios 4:23). *

17. Ndiéjunʼ gíʼmaa muʼni mu muʼni gaʼduunʼ ku̱ma̱ dí rígá náa numbaaʼ rá.

¹⁷ Mbá xkri̱da, gíʼmaa muñewa̱a̱n májánʼ tsíin gambáxulúʼ gajmiúlú. Náa Biblia  naʼthúlúʼ á mu nambáxulúʼ gajmiúlú bi̱ na̱nguá eni ñajunʼ Jeobá mu̱ʼguánu mundxaʼwamíjna̱ xóo ikhiin (Prov. 13:20; 1 Cor. 15:12, 32, 33). Ma̱ngaa gíʼmaa muraʼwíí májánʼ rí muʼni gagimijná. Índo̱ nuʼni gaʼduunʼ ku̱ma̱ ndrígu̱ún bi̱ nusngáa evolución, rí nuradímíjná xa̱bu̱ o rí nuxudami̱jna̱ aʼkhá, xúniʼñáʼ rí mato̱ʼo̱o̱ náa edxu̱lúʼ ku̱ma̱ rí tsembríguii ga̱jma̱a̱ “ku̱ma̱ ndrígóo Dios” (2 Cor. 10:5).

18, 19. a) Náa numuu rí gíʼmaa muñeumíjna̱ náa tikhuu ku̱ma̱ dí rígá náa numbaaʼ rá. b) Ndiéjunʼ graxe̱ gíʼmaa muʼni, ga̱jma̱a̱ náa numuu rá.

¹⁸ Ma̱ngaa gíʼmaa mbuʼyáá májánʼ ga̱jma̱a̱ muʼni gaʼduunʼ ku̱ma̱ dí rígá náa numbaaʼ índo̱ na̱ʼkha̱nú inulú. Mbá xkri̱da, nguáná náa mbá noticia ma̱ndoo mambáyúu mbáa político. Mbá reportaje rí gíʼdoo numuu rí naʼthí ga̱jma̱a̱ numuu vida ndrígóo mbáa xa̱bu̱, mbáa nguáná maʼthí xú káʼnii ekumún xa̱bu̱ náa numbaaʼ ga̱jma̱a̱ numuu metas ga̱jma̱a̱ rí naʼngu̱u̱n nuni. Náa tikhuu películas ga̱jma̱a̱ libros, na̱ʼkha̱ raʼthí ajngáa nagui̱i̱ rí xóo nda̱a̱ imbo̱o̱ rí itháan gíʼdoo numuu ki xóo náa ikháánʼ o náa bi̱ xtañún. Mú ku̱ma̱ rígi̱ nanújngorámuʼ kiʼsngáa ndrígóo Biblia rí makuwá tsímáá xa̱bu̱ o bi̱ kuwa náa guʼwún á mu nandún kuyáá ginii Jeobá ki xóo náa i̱ʼwáʼ (Mat. 22:36-39). Ga̱jma̱a̱ tikhuu historias rí muraxnuu e̱ji̱n, maski ajndu xóo májánʼ kujmaa, mú mbáa ikhiin xúyáá rí ku̱ma̱ rúʼko̱ maʼga̱ kagu̱u̱n muni dí ra̱májánʼ.

¹⁹ Rígi̱ na̱nguá eyoo gáʼthúu̱n rí ra̱májánʼ nindxu̱u̱ rí muni gagimijná ga̱jma̱a̱ mbá rí májánʼ. Mú gíʼmaa muraximíjna̱lú: “Lá naʼngoʼ nda̱yo̱o̱ ku̱ma̱ ndrígóo numbaaʼ maski tsékujmaa májánʼ ráʼ. Lá naʼgíʼ mbá awan ndiéjunʼ gúyáá ga̱jma̱a̱ rí guraxnuu e̱ji̱nʼ ráʼ. Lá nani ikhúúnʼ ginún ráʼ. Lá nasngúún e̱ji̱nʼ mundxa̱ʼwa̱a̱ edxu̱ún xóo Jeobá mu muni gaʼduunʼ ku̱ma̱ dí rígá náa numbaaʼ ráʼ.” Á mu nduʼyáá májánʼ rí xóo nandxa̱ʼóo edxu̱u̱ Jeobá ga̱jma̱a̱ ku̱ma̱ dí rígá náa numbaaʼ, muʼni gaʼduunʼ maxná ikhulú dí rígá “náa numbaaʼ”.

20. Tsáa gúniʼñáʼ rí maʼsngóo ku̱ma̱ ndrígúlú rá.

²⁰ Garmáʼáan a̱jkiu̱lú dí rígá a̱jma̱ eni ku̱ma̱: Jeobá ga̱jma̱a̱ numbaaʼ ndrígóo Satanás. Bi̱ gúʼgíʼ ginii ikhaa bi̱ maʼsngúlú. Á mu nuʼsngáá ku̱ma̱ ndrígúlú ga̱jma̱a̱ ku̱ma̱ dí rígá náa numbaaʼ, rígi̱ gáʼsngúlú ga̱jma̱a̱ xúʼko̱ gúʼgua̱nú mundxaʼwamíjna̱ ma̱ngaa muʼni rí xóo nuni eʼwíínʼ xa̱bu̱. Ikha jngó gíʼdoo wéñuʼ numuu muñeumíjna̱ rí nduʼyáá, rí nuraxnuu, rí nuʼdxawíín ga̱jma̱a̱ rí nundxa̱ʼwáá edxu̱lúʼ.

21. Ndiéjunʼ nindxu̱u̱ tema rí itháan gíʼdoo numuu gúʼthá náa imbo̱o̱ artículo rá.

²¹ Xó má rí niʼthá, mu mundxaʼwamíjna̱ xóo Jeobá raʼkháa i̱ndó mbaʼyóoʼ rí muʼni gaʼduunʼ rí naʼni gachúu ku̱ma̱ ndrígúlú. Gíʼdoo wéñuʼ numuu rí muʼsngáá ku̱ma̱ ndrígúlú xóo endxa̱ʼóo edxu̱u̱ Dios. Náa imbo̱o̱ artículo mbuʼyáá xú káʼnii gáʼngulú gúʼni gaʼduunʼ.