1. Xú káʼnii nindxu̱u̱ ngajua rí itháan mba̱a̱, ga̱jma̱a̱ náa numuu rá. (Atayáá timbá xtiʼkhu.)

JEOBÁ nindxu̱u̱ náa Na̱ʼkha̱ ngajua rí itháan mba̱a̱ (1 Juan 4:7). Xóo ngajua rígi̱ na̱ʼkha̱ náa ikha rí jmbu, ga̱jma̱a̱ náa Biblia najmuu ajngáa griego agápe mu maʼthí ga̱jma̱a̱ numuu ikhaa. Ngajua rígi̱ raʼkháa i̱ndó nasngájma rí májánʼ a̱jkiu̱u̱n, ma̱ngaa nasngájma rí nandoo makuwá májánʼ eʼwíínʼ. Mbá diccionario naʼthí rí agápe “i̱ndó ma̱ndoo majmaʼnuʼ índo̱ gasngájma rí naʼni”. Naʼni rí makuwá gagi ga̱jma̱a̱ naʼni rí maguaʼdáá numulúʼ.

2, 3. Xú káʼnii nisngájma Jeobá ngajua náa xa̱bu̱ numbaaʼ rá.

² Jeobá nisngájmun ngajua náa xa̱bu̱ numbaaʼ asndu nákha xóo tséʼnii Adán ga̱jma̱a̱ Eva. Mbá xkri̱da, niʼni Ku̱ba̱ʼ mú makuwá kámuu ga̱jma̱a̱ muguaʼdáá xúgíʼ mu makuwá májánʼ. Xúgíʼ rí niʼni nindxu̱u̱ rí mambáyulúʼ ikháanʼ, raʼkháa ga̱jma̱a̱ numuu ikhaa. Ma̱ngaa, nixnúún xa̱bu̱ numbaaʼ rí ma̱ndoo makuwá kámuu mbiʼi náa Ku̱ba̱ʼ mitsaan.

³ Nda̱wa̱á rí Adán ga̱jma̱a̱ Eva túnimbu̱ún, Jeobá nisngájma rí nindoo kaʼñúún. Ndiʼyoo gajkhun rí e̱ji̱i̱n ikhaa maʼndún kuʼyáá ikha jngó niʼni rí ndiyóoʼ mu ma’ni káwíin (Gén. 3:15; 1 Juan 4:10). Asndu nákha rí Jeobá nikudaminaʼ rí makuʼmaa  mbáa bi̱ Maʼni káwíin, ikhaa ndiʼyoo xóo rí nixnáximinaʼ A̱ʼdióo nijngoo má. Ninújngoo má mbá a̱jkhu̱ mil tsiguʼ nda̱wa̱á, Jeobá nikuʼmáa A̱ʼdióo bi̱ mbáwíi mú maxnáxi̱i̱ náa numbaaʼ maski ajndu rúʼko̱ niʼni rí magawúunʼ wéñuʼ (Juan 3:16). ¡Ra̱ʼkhá tháán exnáa númaa Jeobá ga̱jma̱a̱ numuu rígi̱!

4. Xú káʼnii eʼyáá rí ma̱ndoo musngájma ngajua maski asndu ni̱ndxu̱lú xa̱bu̱ aʼkhá rá.

⁴ Numuu rí nigumawáanʼ xó má nindxu̱u̱ Dios, ikha jngó ma̱ndoo musngájma rí nandulúʼ kuʼñúún eʼwíínʼ. Gajkhun má rí nguáná naʼni mingíjyúuʼ muʼni, numuu rí ni̱ndxu̱lú xa̱bu̱ aʼkhá, mú ma̱ndoo muʼni. Mbá xkri̱da, Abel nisngájma rí nindoo kaʼyoo Dios índo̱ nixnáxi̱ rí itháan májánʼ rí gíʼdoo (Gén. 4:3, 4). Noé nisngájma ngajua náa xa̱bu̱ índo̱ niʼtáruʼun mba̱yu̱ʼ tsiguʼ maski asndu xa̱bu̱ táʼnduun gudxawíín (2 Ped. 2:5). Ga̱jma̱a̱ Abrahán nisngájma rí itháan nindoo kaʼyoo Dios ki xóo rí nikumu̱u̱ rí asndu nigíʼ maxíyáa a̱ʼdióo bi̱ nigumbiʼyuu Isaac (Sant. 2:21). Xó má xa̱bu̱ jmbii bugi̱, mangáanʼ nandulúʼ musngájma ngajua maski asndu mingíjyúuʼ ganindxu̱u̱.

5. Xú káʼnii gándoo gusngajmá ngajua rí gajkhun rá.

⁵ Náa Biblia naʼthí rí ngajua rí gajkhun na̱nguá esngájma ‹i̱ndó ga̱jma̱a̱ ajngáa, nasngájma rí gajkhun nandún kuyamíjna̱› (1 Juan 3:18). Gajkhun, raʼkháa rúʼko̱ eyoo gáʼthúu̱n rí xándoo muʼtháán rí nandulúʼ kuʼyáá mbáa (1 Tes. 4:18). Nandoo gáʼthúu̱n dí raʼkháa i̱ndó maʼngo̱o̱ muʼtháán rí nandulúʼ kuʼyáá. Numuu rí marigá mbiʼi rí mbaʼyóoʼ musngájma á mu gajkhun nandulúʼ kuʼyáá. Mbá xkri̱da, á mu mbáa ndxájulú na̱nguá gíʼdoo ganitsu o xtiin, ikhaa ndayóoʼ itháan ki xóo muxnáá ajngáa tsiakii (Sant. 2:15, 16). Ikhaa má kayuʼ, rí nandulúʼ kuʼyáá Dios ga̱jma̱a̱ eʼwíínʼ xa̱bu̱, raʼkháa i̱ndó nunda̱ʼa̱a̱ Jeobá rí makuʼmiin bi̱ muraxi̱i̱ rí nijuiʼdu, rí phú nuʼni nuyambáá ga̱jma̱a̱ xúgíʼ a̱jkiu̱lú náa najuiʼtaraʼa (Mat. 9:38).

6, 7. a) Ndiéjunʼ nindxu̱u̱ ngajua rí ‹a̱jma̱ inuu› rá. b) Tsíin ninindxu̱ún bi̱ nisngajma ngajua dí minduwaʼ rá.

⁶ Apóstol Juan niʼthí rí gíʼmaa musngajmá rí ‹nandulúʼ kuʼyamíjna̱ ga̱jma̱a̱ gajkhun›. Xóo muʼthá, rí ngajua ndrígúlú ‹xáʼni a̱jma̱ inuu› (Rom. 12:9; 2 Cor. 6:6). Rígi̱ nandoo gáʼthúu̱n rí xáʼyóoʼ muʼthá rí nusngajmá ngajua, á mu nuʼni xúʼko̱ mani̱ndxu̱u̱ xóo rí muʼgíʼ yuu. Á mu nuʼni a̱jma̱ inulu, ngajua ndrígúlú mani̱ndxu̱u̱ minduwaʼ, mbá rí xágiʼdoo numuu.

⁷ Guʼyáá tikhu xkri̱da ndrígu̱ún bi̱ nisngajma ngajua dí minduwaʼ. Índo̱ Satanás niʼtámíjná ga̱jma̱a̱ Eva náa ixi̱ ri̱ʼi̱ Edén, niʼni rí xóo naxmiéjunʼ kaʼyoo. Mú xtáa raʼni a̱jma̱ inuu ga̱jma̱a̱ i̱ndó nandxa̱ʼwáminaʼ ga̱jma̱a̱ numuu ikhaa (Gén. 3:4, 5). I̱mba̱ xkri̱da ndrígóo Ahitofel, bi̱ niʼníí rí nambáxu̱u̱ ga̱jma̱a̱ rey David mú niniñuʼ índo̱ ndiʼyoo rí nánguá xóo mambáyúu (2 Sam. 15:31). Rí mbiʼi xúgi̱, apóstatas ga̱jma̱a̱ eʼwíínʼ xa̱bu̱ “najmún ajngáa gua̱ba̱ʼ ga̱jma̱a̱ nagui̱i̱” mu muni rí eʼwíínʼ cristianos makumún rí nandún kuñún. Mú rí phú nuni i̱ndó nundxa̱ʼwa̱míjna̱ ga̱jma̱a̱ numún ikhiin (Rom. 16:17, 18).

8. Ndiéjunʼ gáʼyooʼ muraximíjna̱lú rá.

⁸ Rí majmulúʼ ngajua mu muʼni nduwiinʼ eʼwíínʼ nindxu̱u̱ raʼkhí kayuʼ. Ma̱ndoo maguma nduwiinʼ xa̱bu̱ numbaaʼ mú Jeobá na̱nguá. Jesús niʼthí rí bi̱ nuni a̱jma̱ inún mudrigú castigo ‹rí itháan gakhi̱i̱› (Mat. 24:51). Ikha jngó, bi̱ ni̱ndxu̱lú xa̱bi̱i̱ Jeobá tsíyulú maʼni a̱jma̱ inulú. Ikha jngó gíʼmaa muraximíjna̱: “Lá ngajua rí nasngajmá nindxu̱u̱ gajkhun, ga̱jma̱a̱ tséndxaʼwamínaʼ i̱ndó ga̱jma̱a̱ numuʼ ikhúúnʼ ma̱ngaa  na̱nguá nindxu̱u̱ minduwaʼ rá.” Gi̱i̱, mbuʼyáá mijna gu̱wa̱ʼ enii rí xóo musngajmá ngajua xánindxu̱u̱ “a̱jma̱ inuu”.

9. Á mu gajkhun nandulúʼ kuʼñúún a̱ngiu̱lú, ndiéjunʼ guʼni rá.

⁹ Guñajunʼ ga̱jma̱a̱ xúgíʼ a̱jkiu̱lú’ maski asndu eʼwíínʼ tséyáá rí nuʼni. Gíʼmaa maʼndulú muʼniu̱u̱n rí májánʼ a̱ngiu̱lú ‹ngu̱ʼwa̱›, xóo muʼthá, rí maski asndu eʼwíínʼ xúyáá rí gúʼni (atraxnuu Mateo 6:1-4). Ananías ga̱jma̱a̱ Safira túni xúʼko̱ kaʼnii. Ikhiin nindúún rí eʼwíínʼ mbuyáá rí nixna mbújkha̱a̱. Ma̱ngaa, tátiñunʼ rí nini nduwaʼ índo̱ nithi nguáthá mbújkha̱a̱ nixna. Ikha jngó Dios nixnúún castigo numuu rí nininduwaʼ (Hech. 5:1-10). Á mu gajkhun nandulúʼ kuʼñúún a̱ngiu̱lú, mu’ni ga̱jma̱a̱ xúgíʼ a̱jkiu̱lú’ ga̱jma̱a̱ numún ikhiin maski asndu eʼwíínʼ xúyáá rí guʼni. Ma̱ndoo majmañulúʼ ga̱jma̱a̱ numuu bi̱ numbañún Cuerpo Gobernante mu nuni májánʼ ganitsu rí na̱ʼkha̱ náa Dios. Ikhiin tsethi ga̱jma̱a̱ numuu ñajunʼ rí kuwa runi.

10. Xú káʼnii gándoo gúxnún gamajkhu eʼwíínʼ rá.

¹⁰ Guʼyamajkún eʼwíínʼ (atraxnuu Romanos 12:10). * Jesús nixná mbá májánʼ xkri̱da índo̱ niʼjñáa rajkúún apóstoles ndrígóo (Juan 13:3-5, 12-15). Ikhiin i̱ndó nikru̱ʼu̱u̱n májánʼ náa numuu rí Jesús niʼni rúʼko̱ índo̱ nindrigú xi̱ʼ kaʼwu (Juan 13:7). Mangáanʼ ndayóoʼ muʼnimíjna̱ wéñuʼ mú manindxu̱lúʼ xa̱bu̱ guabaaʼ xóo Jesús ga̱jma̱a̱ mbuʼyamajkún eʼwíínʼ. Xú káʼnii rá. Rí xúʼni̱ mbaʼumíjna̱ ga̱jma̱a̱ numuu rí niʼnigajmaa itháan ki xó ikhiin, o ga̱jma̱a̱ numuu rí kuáʼdáá o ñajunʼ rí nikhánulú náa xuajñu Jeobá (Rom. 12:3). Ga̱jma̱a̱ xaxígulú kuʼñúún bi̱ nundrigú gamajkhu, gaʼdxulú kuʼñúún Maski ajndu nundxa̱ʼwa̱míjna̱ rí mangáanʼ kaʼyulú gamajkhu ga̱jma̱a̱ numuu rí niguma.

11. Náa numuu rí ndayóoʼ muʼthúún rí májánʼ kuwa runi eʼwíínʼ rá.

¹¹ Guʼthúún rí májánʼ kuwa runi a̱ngiu̱lú. Gíʼmaa mbuʼyááʼ mbiʼi mu muʼthúún rí májánʼ eni eʼwíínʼ, numuu dí rígi̱ nindxu̱u̱ “májánʼ dí mayambáá índo̱ ndayóoʼ” (Efes. 4:29). Mú ndayóoʼ mbuʼyáá májánʼ rí muʼthá rí gajkhun ga̱jma̱a̱ raʼkháa mu mbuʼyamajkuíí wéñuʼ. Ma̱ngaa xúʼthá rí tsekumulú ga̱jma̱a̱ guxnáá xtágabu bi̱ ndayóoʼ (Prov. 29:5). Maʼni a̱jma̱ inulú á mu nuxnáá gamajkhu mbáa mú nda̱wa̱á nuʼthá numáá índo̱ kuwáanʼ gajmiúlú eʼwíínʼ xa̱bu̱. Apóstol Pablo nixná mbá májánʼ xkri̱da rí maʼndulú kuʼyamijná gajkhun. Mbóo mbiʼi, niʼthún rí májánʼ nini cristianos bi̱ kuwa náa Corinto ga̱jma̱a̱ numuu rí májánʼ rí kuwa runi (1 Cor. 11:2). Mú ma̱ngaa nixnúún xtágabu ma̱ngaa niʼthún ga̱jma̱a̱ ajngáa guabaaʼ ga̱jma̱a̱ kaʼwu dí raʼkhí rí kuwa runi (1 Cor. 11:20-22).

12. Xú káʼnii gándoo gusngajmá rí gajkhun nandulúʼ kuʼñúún eʼwíínʼ índo̱ nundrígúun májánʼ xá.

¹² Gundrígúun májánʼ eʼwíínʼ. Jeobá naʼthúlúʼ rí muxnún rí kuaʼdáá a̱ngiu̱lú (atraxnuu 1 Juan 3:17). * Mú gíʼmaa mu’ni xó má rí kaʼyoo. Guraximíjnalú: “Lá nagruíguíin májánʼ i̱ndó bi̱ nambáxuʼ gajmíi̱nʼ ga̱jma̱a̱ bi̱ nda̱yo̱o̱ rí guáʼdáá numún náa congregación ráʼ. Lá na̱thu̱u̱n maguwáʼ i̱ndó bi̱ ma̱ndoo muniuʼ rí májánʼ ikhúúnʼ ráʼ. O lá ndaʼyáaʼ xóo maxnu̱u̱n rí gúʼdoo a̱ngui̱i̱nʼ bi̱ tsiniʼnúnʼ májánʼ o bi̱ xándoo gurtanga̱a̱ rí gániu̱u̱n dxe̱ʼ” (Luc. 14:12-14). Gundxaʼwamíjna̱ rí mbáa ndxájulú ndayóoʼ mixtambáyii numuu rí taraʼwíí  májánʼ rí maʼni o mbáa bi̱ niʼni̱i̱ rí májánʼ nditháan táxnáanʼ núma̱aʼ. Á mu narígá rígi̱, guʼnimbánii xtágabu rígi̱: “Gundrígúun májánʼ eʼwíínʼ ga̱jma̱a̱ xútha nimbá dí raʼkhí”, xóo muʼthá, ga̱jma̱a̱ xúgíʼ a̱jkiu̱lú (1 Ped. 4:9). Rí muʼnimbánii ikha rígi̱ makuwáanʼ tsímáá, numuu rí nuxná ga̱jma̱a̱ mbá numuu májánʼ (Hech. 20:35).

13. a) Náa gáʼndoo gusngajmá rí naʼngo̱o̱ a̱jkiu̱lú rá. b) Xú káʼnii gándoo gumbaʼñún bi̱ guabiinʼ rá.

¹³ Gumbaʼñún bi̱ guabinʼ. Ma̱ndoo musngájma rí ngajua ndrígúlú nindxu̱u̱ gajkhun índo̱ nuʼnimbánii kiʼtáñajunʼ rígi̱: “Gumbáñuun bi̱ gua̱bi̱nʼ, gaʼngo̱o̱ a̱jkia̱la ku̱ñu̱u̱n xúgínʼ” (1 Tes. 5:14). Mbaʼin a̱ngiu̱lú bi̱ guabiinʼ nda̱wa̱á naguáʼdáá fe gujkhuʼ. Mú eʼwíínʼ ndayóoʼ mixtambáñuun má xúʼko̱. Xú káʼnii rá. Rí majmulúʼ Biblia mu muxnún tsiakii, muʼthúún rí magún gutaraʼa gajmiúlú o muríyaʼ mbiʼi mu muʼdxun rí gúthi. Ma̱ngaa raʼkháa i̱ndó mbuʼñún rí a̱ngiu̱lú nakujmiin gújkuíínʼ o guabiinʼ, garmáʼáan a̱jkiu̱lú rí xúgiáanʼ kuaʼdáá rí naʼni gújkiáanʼlu ga̱jma̱a̱ rí naʼni guabáanʼ (2 Cor. 12:9, 10). Xúgiáanʼ ndayóoʼ rí a̱ngiu̱lú mumbayúlú ga̱jma̱a̱ muxnulu tsiakii.

14. Ndiéjunʼ gíʼmaa muʼni mu makuwáanʼ tsímáá gajmiúlú a̱ngiu̱lú rá.

¹⁴ Guʼni rí marigá rí tsímáá. Gíʼmaa muʼni xúgíʼ rí gándoo mu muʼni rí marigá rí tsímáá gajmiúlú a̱ngiu̱lú maski asndu narígá mbiʼi rí tákru̱ʼu̱u̱n rí niʼthún o nigumáanʼ mbá dí raʼkhí (atraxnuu Romanos 12:17, 18). * Á mu nuʼni gawíínʼ mbáa, gíʼmaa munda̱ʼa̱a̱ rí maʼni mba̱a̱ a̱jkiu̱u̱n kaʼyulú, mú gíʼmaa mani̱ndxu̱u̱ gajkhun rí muʼthá. Mbá xkri̱da, raʼkháa mbóó muʼtháán: “Nagáwiinʼ a̱jkiu̱nʼ rí nikiʼnán”, ndayóoʼ mbuʼyáá rí kuaʼdáá aʼkhúlúʼ mangáanʼ ga̱jma̱a̱ muʼthá: “Nagawúnʼ numuu rí nini makiʼnán”. Rí tsímáá gíʼdoo wéñuʼ numuu itháan náa xa̱bu̱ gajmii. Ra̱májánʼ gáʼni rí a̱jmi̱i̱n musngajma rí nandún kuyamijná náa inún mbaʼin xa̱bu̱, mú índo̱ kuwa ndajkúun asndu tsetimijná, nutamijná ajngáa rí muni gawunmíjná o asndu nuxpamidi̱mi̱jna̱.

15. Xú káʼnii gándoo gusngajmá rí gajkhun niʼni mba̱a̱ a̱jkiu̱lú rá.

¹⁵ Guʼni mba̱a̱ a̱jkiu̱lú kuʼñúún eʼwíínʼ. Á mu mbáa naʼni gawúnlú, maski asndu táʼyoo xóo niʼni, gíʼmaa muʼni mba̱a̱ a̱jkiu̱lú ga̱jma̱a̱ muʼgíʼ mambumulú rí niʼniulúʼ. Cristianos nuni rígi̱ “gáʼngo̱o̱ a̱jkia̱la kuyamíjna̱,” ga̱jma̱a̱ “guni tsiakimijna makuwáanʼ mbá jnduʼ náa espíritu rí naʼni makuwáanʼ tsímáá” (Efes. 4:2, 3). Mú mani̱ndxu̱u̱ gajkhun rí niʼni mba̱a̱ a̱jkiu̱lú kuʼyáá, gíʼmaa muxpriguíí a̱jkiu̱lú rí xúʼgua̱ “kuʼyulú sia̱nʼ” (1 Cor. 13:4, 5). Á mu nuyexíi sia̱nʼ, maʼni gachúu rí nambáxulúʼ gajmiúlú a̱ngiu̱lú ga̱jma̱a̱ Jeobá (Mat. 6:14, 15). Imbo̱o̱ rí ma̱ndoo musngajmá rí  nindxu̱u̱ gajkhun rí nuʼni mba̱a̱ a̱jkiu̱lú rí muʼtájkáan ga̱jma̱a̱ numuu bi̱ niʼniulúʼ dí raʼkhí (Luc. 6:27, 28).

16. Xú káʼnii gíʼmaa mbuʼyáá ñajunʼ rí nundrígú náa xuajñu Jeobá rá.

¹⁶ Guʼniginamijná ga̱jma̱a̱ numún eʼwíínʼ. Á mu mbáa nagruigú mbá ñajunʼ náa xuajñu Jeobá, gíʼmaa mbaʼyoo xóo mbá náa masngájma rí nindxu̱u̱ gajkhun ngajua ndrígóo. Xú káʼnii rá. “Mundxaʼwamíjna̱ ga̱jma̱a̱ numún eʼwíínʼ, raʼkháa i̱ndó ga̱jma̱a̱ numulúʼ ikháanʼ” (1 Cor. 10:24). Mbá xkri̱da, numuu rí acomodadores natu̱ʼu̱u̱n ginuu náa narígá asambleas, mbáa maʼndún muni apartar xílí rí itháan májánʼ mu matrigi̱i̱n ikhiin gajmiún bi̱ kuwa náa guʼwún. Mú mbaʼin nuraʼwíí xílí rí na̱nguá májánʼ wéñuʼ náa sección náa kuwa ruñajunʼ. Xúʼko̱ nusngajmá rí na̱nguá endxaʼwamíjna̱ i̱ndó ga̱jma̱a̱ numún ikhiin. Lá rígá náa mbuʼyaridúún xáʼ.

17. Á mu mbáa nakudaminaʼ aʼkhá rí mitsáʼkháan, ndiéjunʼ gaxkajxi̱i̱ maʼni ngajua rí gajkhun xá.

¹⁷ Guʼthá aʼkhá rí nixuʼdamíjná ga̱jma̱a̱ guniʼñáʼ ruʼni. Tikhun cristianos bi̱ nixudami̱jna̱ aʼkhá rí mitsáʼkhúun nigíʼ murkaʼumaʼa mu xagájnuu majkhún ga̱jma̱a̱ xúni̱ gawúunʼ eʼwíínʼ (Prov. 28:13). Mú xúʼko̱ nusngajma rí na̱nguá guáʼdáá ngajua rí gajkhun, numuu rí nunigaumíjná ikhiin ga̱jma̱a̱ nuni gawúunʼ eʼwíínʼ xa̱bu̱. Xi̱ʼ kaʼwu maʼni rí xáñajunʼ májánʼ ga̱jma̱a̱ rí tsímáá ní xárígá náa congregación (Efes. 4:30). Ngajua rí gajkhun maxkajxi̱i̱ cristiano bi̱ nikudaminaʼ aʼkhá rí mitsáʼkhúun maʼthúún bi̱ kuya̱ edxu̱u̱ mu mumbayíí (Sant. 5:14, 15).

18. Nguáthá mba̱a̱ numuu gíʼdoo ngajua rí gajkhun rá.

¹⁸ Cualidad rí guáʼdáá cristianos rí itháan mba̱a̱ nindxu̱u̱ ngajua (1 Cor. 13:13). Rígi̱ nasngájmáanʼ rí gajkhun ni̱ndxu̱lú xa̱bi̱i̱ Jesús, bi̱ nduʼyaridáá Jeobá náa Na̱ʼkha̱ ngajua (Efes. 5:1, 2). Pablo niʼnirámáʼ rí á mu na̱nguá gíʼdoo ngajua nda̱a̱ rí nindxu̱u̱ (1 Cor. 13:2). Ikha jngó gusngajmá má xúʼko̱ ngajua ndrígúlú, raʼkháa i̱ndó ‹rí nuʼthá›, rí ma̱ngaa mani̱ndxu̱u̱ ‹gajkhun›.