NÁA xúgíʼ numbaaʼ, bi̱ kuya̱ edxu̱u̱ nduyáá dí ra̱ʼkhá tháán gíʼdoo numuu ñajunʼ rí nuni náa xuajñu Dios. Ga̱jma̱a̱ xúgiáanʼ nadxulú rí numbayúlú. Mú tséʼni má mba̱yu̱ʼ rí nijuiʼthún a̱ngiu̱lú bi̱ kuya̱ edxu̱u̱ bi̱ itháan guanii rí muxnún ñajunʼ ndrígu̱ún rí gíʼdoo itháan numuu muni bi̱ kuya̱ edxu̱u̱ bi̱ itháan jiáma.

Asndu nákha nixtiʼkhuu rígi̱, superintendentes de circuito ga̱jma̱a̱ instructores nuniñaʼ runi ñajunʼ ndrígu̱ún índo̱ narámunʼ 70 tsigúnʼ. Ma̱ngaa bi̱ kuya̱ edxu̱u̱ bi̱ guáʼdáá 80 tsigúnʼ nuxnún ñajunʼ bi̱ itháan jiáma rí mani̱ndxu̱ún bi̱ mbu̱ya̱ edxu̱u̱ náa Comité ndrígóo Sucursal o bi̱ mbu̱ya̱ edxu̱u̱ náa nagimbáanʼ bi̱ muriyaʼ awan náa eʼwíínʼ bi̱ kuya̱ edxu̱u̱. Xú káʼnii ekumún a̱ngiu̱lú guanii índo̱ narígá rígi̱ rá. Nusngajma rí naguáju̱n jmbu náa Jeobá ga̱jma̱a̱ náa xuajñu.

Ken, bi̱ niyéjkha edxu̱u̱ náa Comité ndrígóo Sucursal mbá a̱jma̱ skiñúʼ imíjna̱ gu̱wa̱ʼ tsiguʼ, narmáʼáan a̱jkiu̱u̱n: “Índo̱ nidxuun awan rí nigi̱ʼi̱, nitha rí májánʼ nindxu̱u̱. Miʼcha̱ rúʼko̱ ni̱thu̱u̱n Jeobá rí ndayúxuʼ mbáa bi̱ mayéʼga̱ edxu̱u̱ náa eʼwíínʼ bi̱ itháan dxámá”.  Mbaʼin a̱ngiu̱lú náa xúgíʼ numbaaʼ nundxa̱ʼwa̱míjna̱ xóo Ken. A̱ngiu̱lú bugi̱ nanigu̱nʼ mumbañún eʼwíínʼ a̱ngiu̱lú, ga̱jma̱a̱ numuu rúʼko̱ rí tikhun a̱ngiu̱lú nikuwa gíná.

Esperandio, bi̱ kayá edxu̱u̱ náa nagimbáanʼ bi̱ naríyaʼ awan náa eʼwíínʼ bi̱ kuya̱ edxu̱u̱ náa congregación ndrígóo, naʼthí rí ginii ikhaa nixtáa gíná. Mú ma̱ngaa ndaʼyoo rí naʼniuu wéñuʼ nandii, ga̱jma̱a̱ ndayóoʼ mañeumínaʼ. Mú ikhaa naʼni má xúʼko̱ ñajunʼ Jeobá ga̱jma̱a̱ nambáñun a̱ngiu̱lú.

Xú káʼnii ekumún a̱ngiu̱lú bi̱ niʼni má mba̱yu̱ʼ rí ni̱ndxu̱ún superintendentes viajantes rá. Allan, bi̱ niʼni ñajunʼ rígi̱ mbá skíñúʼ gu̱wa̱ʼ imigiñuʼ tsiguʼ, ikhaa naʼthí: “Índo̱ nidxuun rígi̱ niʼniuʼ tsiánguá”. Mú ndaʼyoo rí nañambáá wéñuʼ rí maʼniratiin eʼwíínʼ a̱ngiu̱lú bi̱ itháan jiáma ga̱jma̱a̱ tséniñuʼ rañajunʼ.

Russell ninindxu̱u̱ superintendente viajante ga̱jma̱a̱ bi̱ naʼsngáa xú káʼnii mutaraʼa náa mbá a̱jma̱ skiñúʼ tsiguʼ. Naʼthí rí nákha ginii ikhaa ga̱jma̱a̱ a̱ʼgiu̱u̱ nikuwa gíná. Ikhaa naʼthí: “Ndu̱ya̱a̱xu rí gíʼdoo wéñuʼ numuu ñajunʼ ndrígúxu̱ ga̱jma̱a̱ nikumuxu rí xóó kuaʼdáá tsiakii mu munixu ñajunʼ rígi̱”. Rí mbiʼi xúgi̱, nájmi̱i̱n najmún ku̱ma̱ rí guáʼdáá ga̱jma̱a̱ dí najmañún nuni náa congregación dí kuwa, ga̱jma̱a̱ a̱ngiu̱lú nadxún kuñún.

Mbáa ikháanʼlu na̱nguá nikumulú xóo a̱ngiu̱lú bugi̱. Maski ajndu xúʼko̱, rí mbuʼyáá rí naʼthí náa 2 Samuel mambáyulúʼ mu makru̱ʼu̱lú kuʼñúún.

Garmáʼáan a̱jkiu̱lú mbiʼi rí Absalón nikuximínaʼ náa anu̱u̱, David bi̱ nindxu̱u̱ rey. David ndiyóoʼ magajnúu náa Jerusalén mu maʼga̱ náa Mahanaim, náa nagájnuu a̱jkha̱ʼ náa mañu Jordán. Ikhí David gajmíi̱n xa̱bi̱i̱ ndiñúnʼ ganitsu mu mu̱phu̱. Ndiéjunʼ nirígá rá.

Ajtsíin xa̱bu̱ bi̱ kuwa ikhí ninindxu̱ún májánʼ a̱jkiu̱ún ga̱jma̱a̱ nigún kudúún xiyoo, ganitsu ga̱jma̱a̱ tikhuu rí majmúún. Mbáa rí ikhiin ninindxu̱u̱ Barzilai (2 Sam. 17:27-29). Índo̱ Absalón niniñuʼ raʼni xkujndu, David nindoo nitanga̱a̱ Jerusalén, ga̱jma̱a̱ Barzilai ni̱jkha̱ kayáa asndu náa Jordán. David nindo̱ʼo̱o̱ rí maʼga̱ ga̱jma̱a̱ náa Jerusalén ga̱jma̱a̱ niʼthúu̱n rí ikhaa gáʼyoo xóo gakanaa ganitsu, maski ajndu Barzilai tséyóoʼ numuu rí xa̱bu̱ gíʼdoo má nindxu̱u̱ (2 Sam. 19:31-33). Mbáa David ningajo̱o̱ kaʼyoo numuu rí májánʼ xa̱bu̱ nindxu̱u̱ ma̱ngaa numuu rí nixnúu ikha numuu rí najmañuu ga̱jma̱a̱ nikhi̱i̱. Barzilai, ndiʼyoo rí májánʼ gánindxu̱u̱ rí maxtáa ga̱jma̱a̱ mañajunʼ náa goʼwóo rey.

Mú, Barzilai ndiʼyoo rí xáʼngo̱o̱ gáʼga ga̱jma̱a̱ niʼthúu̱n David rí gíʼdoo má 80 tsiguuʼ ga̱jma̱a̱ rí xájmaa mbaʼyoo “ndiéjunʼ nindxu̱u̱ dí májánʼ ga̱jma̱a̱ dí ra̱májánʼ”. Ndiéjunʼ nindoo gáʼthi xá. Mbáa náa xúgíʼ tsiguʼ rí nixtáa xa̱bu̱ bugi̱ nijmañuu wéñuʼ. Ga̱jma̱a̱  mbáa xóó ma̱ndoo maxná májánʼ xtágabu, xó má “bi̱ kuya̱ edxu̱u̱” nixnáá xtágabu rey Rehoboam (1 Rey. 12:6, 7; Sal. 92:12-14; Prov. 16:31). Xúʼko̱, mbáa Barzilai nindoo gáʼthi rí nánguá eʼngo̱o̱ gáʼni numuu rí xa̱bu̱ nikhi̱i̱ má nindxu̱u̱. Asndu ndiʼyoo rí na̱nguá eku̱mu̱u̱ rí xóo miʼtsí rí na̱ʼkhu̱ ga̱jma̱a̱ rí nánguá eʼdxun májánʼ (Ecl. 12:4, 5). Ikha jngó niʼthúu̱n David rí ma̱ndoo maʼga̱ kayáa dxámá Kimham, mbáa a̱ʼdióo nindxu̱u̱ (2 Sam. 19:35-40).

Rí nixtiʼkhuu rí ndiʼyáá náa nagíʼdu̱u̱ artículo rígi̱ nasngájma mbá ku̱ma̱ xóo rí nigiʼdoo Barzilai. Rí xóo niʼni xa̱bi̱i̱ Dios bugi̱ ma̱ndoo mambáyulúʼ mangáanʼ mu mbuʼyáá xóo xtáa ga̱jma̱a̱ xóo naʼngo̱o̱ naʼni mbáa xa̱bu̱. Mú rí mbiʼi xúgi̱ ndiyóoʼ mundxaʼwamíjna̱ ga̱jma̱a̱ numún a̱ngiu̱lú bi̱ kuya̱ edxu̱u̱ bi̱ naguájun jmbu bi̱ kuwa náa xúgíʼ numbaaʼ.

A̱ngiu̱lú bi̱ guanii bugi̱ nduyáá rí naʼngu̱u̱n nuni ga̱jma̱a̱ nakru̱ʼu̱u̱n xú káʼnii eyambáá tikhuu rí nixtiʼkhuu. Á mu nuniñaʼ rí a̱ngiu̱lú jiáma bugi̱ munimbánii ñajunʼ rí ikhiin guáʼdáá, ma̱ndoo muyambáá índo̱ xuajñu Dios gáʼga ragaja̱a̱. A̱ngiu̱lú bi̱ guanii nusngúún bi̱ itháan jiáma, xó má niʼni Barzilai ga̱jma̱a̱ a̱ʼdióo o rí niʼni apóstol Pablo ga̱jma̱a̱ Timoteo (1 Cor. 4:17; Filip. 2:20-22). A̱ngiu̱lú jiáma bugi̱ nisngajma rí ni̱ndxu̱ún “xa̱bekha xóo regalo” ga̱jma̱a̱ ma̱ndoo “maguma májáánʼ [...] rí nindxu̱u̱ xuyuʼ Cristo” (Efes. 4:8-12; atayáá ma̱ngaa Números 11:16, 17, 29).

Náa xúgíʼ numbaaʼ, mbaʼin a̱ngiu̱lú bi̱ nixnúún eʼwíínʼ tikhuu ñajunʼ rí guáʼdáá najmún mbiʼi ndrígu̱ún mu muni itháan ñajunʼ Jeobá.

“Rí xóo xtáá xúgi̱ nambáyuʼ mu matamíjná itháan gajmíi̱nʼ ajmbiún a̱ngiu̱lú bi̱ kuwa náa congregación ndrígúxu̱”, eʼthí Marco, bi̱ ninindxu̱u̱ superintendente viajante mbá gu̱wa̱ʼ imíjna gu̱wa̱ʼ tsiguʼ.

Geraldo, bi̱ ninindxu̱u̱ superintendente viajante mbá skíñúʼ imigiñuʼ tsiguʼ, naʼthí: “A̱ʼgiu̱ʼ ga̱jmu̱ʼ ikhúúnʼ niguáʼdááxu i̱ʼwáʼ metas, xóo rí mumbáñún eʼwíínʼ bi̱ nánguá eni ñajunʼ Jeobá ga̱jma̱a̱ nusngúún eʼwíínʼ xa̱bu̱ ga̱jma̱a̱ numuu Biblia”. Ikhaa naʼthí rí xúgi̱ kuwa rusngúún mbá gu̱wa̱ʼ nítsiin xa̱bu̱ ga̱jma̱a̱ mbaʼin bi̱ nákha ginii nánguá eni ñajunʼ Jeobá nagún mbu̱júu̱ náa nagimbáanʼ.

Allan, bi̱ niʼthá ga̱jma̱a̱ numuu nákha ginii, naʼthí: “Rí xúgi̱ nandoo nutaráʼaxu itháan. Naniguxu mutaráʼa náa kuwa mbaʼin xa̱bu̱, náa naxtango̱jo̱o̱ ga̱jma̱a̱ náa kúwáanʼxu. A̱jmi̱i̱n bi̱ kuwa náa mijngii kuwáanʼxu nigún má náa Guʼwá nagimbáanʼ”.

Lá ikháánʼ ni̱ndxa̱ʼ mbáa ndxájulú bi̱ jmbii ga̱jma̱a̱ rí mba̱yu̱ʼ xtaa má ratani̱ ñajunʼ ga̱jma̱a̱ rí xúgi̱ natrigú i̱mba̱ nuxi̱ʼ ñajunʼ ráʼ. Á mu xúʼko̱, imbo̱o̱ rí xóo matambáyii Jeobá nindxu̱u̱ rí marathu̱u̱n rí najmañaʼ eʼwíínʼ a̱ngiu̱lú bi̱ itháan jiáma. Russell, bi̱ niʼthá ga̱jma̱a̱ numuu, naʼthí: “Jeobá xtáa raʼsngúún ga̱jma̱a̱ najmiuu a̱ngiu̱lú bi̱ itháan jiáma bi̱ majmiin muni ñajunʼ ga̱jma̱a̱ bi̱ maʼngu̱u̱n. Xúgínʼ a̱ngiu̱lú nambáñun rí xú káʼnii ikhiin nusngáa ga̱jma̱a̱ nuñewu̱u̱n mugu̱” (atayáá kúgumaʼá “ Atambáñun a̱ngiu̱lú bi̱ itháan jiáma mu majmúún xúgíʼ tsiakii ndrígu̱ún”).

Á mu ndiʼkhún nitrigú imbo̱o̱ ñajunʼ, atayáá rí gíʼdoo numuu. Ñajunʼ rí nitani̱ ga̱jma̱a̱ xúgíʼ a̱jkia̱nʼ nimbáñun eʼwíínʼ xa̱bu̱ ga̱jma̱a̱ ma̱ndoo matani má xúʼko̱. A̱ngiu̱lú nandún kuyaaʼ ga̱jma̱a̱ maʼndún kuyaaʼ má xúʼko̱.

Mú rí itháan gíʼdoo numuu, ikháánʼ nitani̱ mbá rí Jeobá nditháan xámbumuu. Ikhaa nakudaminaʼ rí xámbumuu kayuʼ “ñajunʼ rí nunila ga̱jma̱a̱ rí nisngajmá rí nanga̱jua̱la ku̱ya̱a̱ mbiʼyuu índo̱ nini ñajunʼ, ma̱ngaa  rí nuni má xúʼko̱ ñajúnʼ santos” (Heb. 6:10). Ajngáa rígi̱ nasngájmulúʼ rí ikhaa raʼkháa i̱ndó narmáʼáan a̱jkiu̱u̱n rí niʼni nákha ginii. Numuu rí Jeobá ndaʼyoo rí xtaʼdáá numaaʼ náa ikhaa, ikhaa tsembumuu rí nitani̱ ga̱jma̱a̱ rí xtaa ratani̱ má xúʼko̱ mu manigu̱ʼ ikhaa.

Mú á mu ikháanʼ túndrígú i̱mba̱ ñajunʼ rá. Maski ajndu xúʼko̱, mbáa rígi̱ mambáyulúʼ mangáanʼ. Xú káʼnii rá.

Mbáa xúgi̱ nuniʼnííʼ mbáa ndxájulú nikhi̱i̱ bi̱ nigruigú i̱mba̱ ñajunʼ, rí najmañuu ikhaa mambáyulúʼ numuu rí nikhi̱i̱. Gunda̱ʼa̱a̱ rí maxnúlúʼ xtágabu ga̱jma̱a̱ ikha. Ma̱ngaa, guʼyáá xú káʼnii ejmuu rí najmañuu náa ñajunʼ rí gíʼdoo xúgi̱.

Á mu ni̱ndxu̱lú mbáa ndxájulú nikhi̱i̱ bi̱ nikána i̱mba̱ ñajunʼ o ni̱ndxu̱lú mbáa bi̱ ma̱ndoo mambáyúu rí najmañún ikhiin, garmáʼáan a̱jkiu̱lú rí Jeobá naniguʼ rí ikhiin túniñanʼ runi ñajunʼ mba̱yu̱ʼ tsiguuʼ ga̱jma̱a̱ rí tsíniñaʼ runi.