1. Náa biʼyaa rí gíʼdoo numuu niʼthímijna Jesús gajmíi̱n xa̱bi̱i̱ iwáá mbiʼi rí nixtáa náa tsu̱du̱u̱ Ku̱ba̱ʼ rá.

IWÁÁ mbruʼun rí Jesús nixtáa gajmíi̱n xa̱bi̱i̱, mbá skíñúʼ gu̱wa̱ʼ nuthu niʼthí ga̱jma̱a̱ numuu ngajua. Niʼthún kaʼwu rí gíʼmaa maʼndún kuyamijná (Juan 15:12, 17). Ngajua rúʼko̱ gasngájma rí ikhiin ni̱ndxu̱ún xa̱bi̱i̱ (Juan 13:34, 35). Ngajua rí niʼthí Jesús raʼkháa i̱ndó nindxu̱u̱ mbá rí nakumulú. Nindxu̱u̱ mbá rí nasngájma rí xóo eʼni rí na̱nguá kuaʼti̱i̱n mundrígú nimbá. Niʼthí: “Nimbáa na̱nguá gíʼdoo ngajua xóo rígi̱: Rí mbáa maxnáximinaʼ ga̱jma̱a̱ numún bi̱ nambáxu̱u̱ gajmíi̱n. Ikháanʼla nindxa̱la bi̱ nambáxuʼ gajmíi̱nʼ á mu nuni rí natañájuanlaʼ” (Juan 15:13, 14).

2. a) Náa biʼyaa rí nasngájmiin xa̱bi̱i̱ Dios rí mbiʼi xúgi̱ rá. b) Ndiéjunʼ graxe̱ guriʼña̱a̱ náa artículo rígi̱ rá.

² Xa̱bi̱i̱ Dios bi̱ kuwáanʼ rí mbiʼi xúgi̱ nusngájma ngajua rí gajkhun rí na̱nguá kuaʼti̱i̱n mundrígú nimbá, ga̱jma̱a̱ nambáxulúʼ májánʼ (1 Juan 3:10, 11). Nuʼni tsiakimíjna̱ mu muguaʼdáá ngajua rúʼko̱ tséʼniuu má náa xuajen eguwaʼ, ajngáa o xóo nigajáanʼ. Mú mbáa nuraximíjna̱: “Ndíjkha gíʼdoo wéñuʼ numuu muguaʼdáá ngajua rí mbiʼi xúgi̱ rá. Xú káʼnii exnúlú tsiakii Jeobá ga̱jma̱a̱  Jesús rá. Ga̱jma̱a̱, xú káʼnii gándoo guʼyaridáá xkridoo Jesús ga̱jma̱a̱ muguaʼdáá mbá ngajua rí ‹nambáñun eʼwíínʼ› rá.” (1 Cor. 8:1.)

3. Ndiéjunʼ eʼni muni xa̱bu̱ náa “mbiʼi gakhi̱i̱” rí kuwáanʼ rá.

³ Numuu rí kuwáanʼ náa “mbiʼi gakhi̱i̱”, mbaʼin xa̱bu̱ kuwa ga̱jma̱a̱ gamiéjunʼ gakhi̱i̱ (2 Tim. 3:1-5; Sal. 90:10). Mbaʼin nánguá eñún makuwa. Najuiʼthá rí mámbá tsiguʼ nuradímíjná mbá 800,000 xa̱bu̱, xóo muʼthá, rí mámbá 40 segundos nakháñuu mbáa xa̱bu̱. Gíná rí asndu tikhun a̱ngiu̱lú nakumu̱ún xúʼko̱ ga̱jma̱a̱ asndu nuradímíjná.

4. Tsíin xa̱bíi bi̱ nikuwa nákha wajyúúʼ nithi rí nindúún makhañún rá.

⁴ Nákha wajyúúʼ, tikhun xa̱bi̱i̱ Dios nikumu̱ún rí nixmiéjúnʼ wéñuʼ rí asndu nindúún makhañún. Mbá xkri̱da, índo̱ Job nánguá eʼngo̱o̱ ga̱jma̱a̱ gaʼkhu, niʼthí rí naguiyuʼ kaʼyoo vida ndrígóo ga̱jma̱a̱ rí nandoo makhañúu (Job 7:16; 14:13). Xó má Jonás nixtáa gíná wéñuʼ numuu rí tagajnuu májánʼ ñajunʼ rí nikhánúu maʼni ga̱jma̱a̱ niʼthí: “Rí xúgi̱, oh Jeobá, mbá péñu, atríya kaʼyúʼ vida ndrígóʼ, numuu rí itháan májánʼ makhañúʼ ki xóo rí maxtáá” (Jon. 4:3). Ga̱jma̱a̱ gaʼyee Elías raʼkhí kayuʼ nikumu̱u̱ rí asndu nindo̱ʼo̱o̱ Dios rí maniñuʼ makhañúu. Niʼthí: “¡Ikhí rá.! Rí xúgi̱, oh Jeobá, atríya kaʼyúʼ vida ndrígóʼ, numuu rí na̱nguá ni̱ndxu̱ʼ májánʼ xa̱bu̱ ki xóo wajin xiʼñúnʼ” (1 Rey. 19:4). Mú, Jeobá ndiʼyoo rí guáʼdáá numún xa̱bu̱ bugi̱ bi̱ nikuwa jmbu ga̱jma̱a̱ nindoo rí makuwa. Táʼyoo dí raʼkhí xóo nikumu̱ún, rí phú niʼni, niʼni̱i̱ a̱jkiu̱ún ga̱jma̱a̱ ngajua ga̱jma̱a̱ nimbáñun mu maʼndún makuwá ga̱jma̱a̱ rí muni má xúʼko̱ ñajunʼ ndrígóo.

5. Náa numuu rí ndayóoʼ maʼndulú kuʼñúún a̱ngiu̱lú rí mbiʼi xúgi̱ rá.

⁵ Maski ajndu mbaʼin a̱ngiu̱lú tsekanajkúnʼ, mbaʼin nuraʼníí gaʼkhu rí mingíjyúuʼ ga̱jma̱a̱ nda̱ñúnʼ rí maʼndulú kuʼñúún ga̱jma̱a̱ muʼni̱i̱ a̱jkiu̱ún. Tikhun nuxkúún, ga̱jma̱a̱ nunduʼwajmiin. Eʼwíínʼ ndayóoʼ maʼngo̱o̱ a̱jkiu̱ún numuu rí bi̱ nuñajunʼ gajmiún nuta numún. O mbáa néʼngu̱u̱n numuu rí nuñajunʼ itháan wakhííʼ o numuu rí ñajunʼ rí guáʼdáá naʼni néʼngu̱u̱n. Ga̱jma̱a̱ kuwa tikhun bi̱ nuraʼníí xkujndu mingíjyúuʼ náa guʼwún, numuu rí mbáa bi̱ ndi̱ya̱a̱ na̱nguá eʼnigajmaa ga̱jma̱a̱ nuta numún má xúʼko̱. Rí narígá ga̱jma̱a̱ numuu rígi̱ ga̱jma̱a̱ i̱ʼwáʼ xkujndu, mbaʼin cristianos naʼni néʼngu̱u̱n. Tsáa gaʼngo̱o̱ gambáñun mu muraʼníí rígi̱ xá.

6. Xú káʼnii exnún tsiakii Jeobá xa̱bi̱i̱ rá.

⁶ Xú káʼnii exnún tsiakii Dios xa̱bi̱i̱ rá. Mbá rí ikhaa nindxu̱u̱ rí naʼthúún rí maʼndoo kaʼñún má xúʼko̱. Mbáa niguáʼdáá tsiakii xa̱bu̱ Israel índo̱ nidxawíín ajngáa rí niʼthí Jeobá: “Ninindxa̱ʼ májáánʼ náa iduʼ, ikha jngó ma̱ndoo mbuyamajkuaʼ, ga̱jma̱a̱ ikhúúnʼ má nandoʼ ka̱ya̱ʼ”. Ma̱ngaa niʼthúu̱n: “Xámiñaʼ numuu rí ikhúúnʼ xtáá ga̱jma̱ʼ” (Is. 43:4, 5). Ikháánʼ ma̱ndoo ma̱ta̱ya̱a̱ gajkhun rí Dios nandoo kaʼyaʼ ga̱jma̱a̱ ndaʼyoo rí xtaʼdáá numaaʼ. * Jeobá naʼthúún xa̱bi̱i̱: “Numuu rí ikhaa gíʼdoo tsiakii, maʼni kríñanʼ. Ikhaa maʼni mba̱a̱n ga̱jma̱a̱ gagi wéñuʼ” (Sof. 3:16, 17).

7. Xú káʼnii embriguii ngajua ndrígóo Jeobá rí xóo eyoo kaʼyoo a̱ʼdióo mbáa náná rá. (Atayáá timbá xtiʼkhu.)

⁷ Tséʼniuu asndu xú káʼnii xkujndu guraʼníí xa̱bi̱i̱ Dios, ikhaa nakudaminaʼ mambáñun  ga̱jma̱a̱ maʼni̱i̱ a̱jkiu̱ún. Náa libro ndrígóo Isaías niʼthí: “Ikháanʼ muxála. Maʼga̱ kiʼdáanʼ náa nijniun, ga̱jma̱a̱ náa ragómiu̱ún maxtiewanla. Xóo mbáa xa̱bu̱ bi̱ ru̱dúu̱ xóó naʼni̱i̱ a̱jkiu̱u̱n, xúʼko̱ má ikhúúnʼ mani̱i̱ a̱jkia̱la” (Is. 66:12, 13). Ajngáa rígi̱ nasngájma mbá rí mitsaan wéñuʼ: Mbáa náná kayáraʼaa a̱ʼdióo ma̱ngaa naʼtsíin ga̱jma̱a̱. Xúʼko̱ Jeobá naxná mbá xkri̱da rí xóo nandoo kaʼñún xa̱bi̱i̱. Nditháan xámbumulú dí ra̱ʼkhá tháán kuaʼdáá numulúʼ náa ikhaa (Jer. 31:3).

8, 9. Xú káʼnii exnúlú tsiakii ngajua ndrígóo Jesús rá.

⁸ Cristianos bi̱ gajkhun kuaʼdáá imbo̱o̱ numuu mu mbuʼyáá gajkhun rí Jeobá nandoo kaʼyulú. Juan 3:16 naʼthí: “Numuu rí Dios nindoo kaʼñún wéñuʼ xa̱bu̱ numbaaʼ rí asndu nixnáa A̱ʼdióo bi̱ mbáwíi, mú xúgínʼ bi̱ gaguaʼdáá fe xákhañun, makuwá kámuu mbiʼi”. Ga̱jma̱a̱ nguáthá ngajua nisngájma Jesús rí nixnáximinaʼ ga̱jma̱a̱ numulúʼ. Ajngá rawunʼ Dios naʼthúlúʼ rí nimbá xkujndu o gamiéjunʼ xáʼngo̱o̱ gáʼni rí marájñulú náa “ngajua ndrígóo Cristo” (Rom. 8:35, 38, 39). Lá ragájkhun rí ngajua rígi̱ naʼni maʼngulú ráʼ.

⁹ Índo̱ nuraʼníí tsáʼkhá rí naʼni néʼngulú, rí nundxa̱ʼwa̱míjna̱ ga̱jma̱a̱ rí nuʼni ñajunʼ Dios, rí marmáʼáan a̱jkiu̱lú ngajua rí gíʼdoo Cristo náa ikháanʼlu ma̱ndoo maxnúlúʼ tsiakii mu maʼngulú (atraxnuu 2 Corintios 5:14, 15). * Ngajua rígi̱ naxkaxáanʼ mu makuwa má xúʼko̱ ga̱jma̱a̱ muʼni ñajunʼ Jeobá. Maʼni rí maʼngulú muʼni gaʼduunʼ gamiéjunʼ, índo̱ nuxkulú, rí nuni gawúnlú eʼwíínʼ o rí naxmiéjunʼlú wéñuʼ.

10, 11. Tsáa kaʼyoo maʼni̱i̱ a̱jkiu̱ún bi̱ nakáguabiinʼ rá. Arathá.

¹⁰ Imbo̱o̱ rí najmuu Jeobá nindxu̱u̱ congregación mu maxnúlúʼ tsiakii ga̱jma̱a̱ ngajua. Índo̱ nandulúʼ kuʼñúún a̱ngiu̱lú nusngajmá rí nandulúʼ kuʼyáá Dios. Nuʼni asndu xó má eʼngo̱o̱ mu mumbáñuun a̱ngiu̱lú mbuyáá rí guáʼdáá numún náa Jeobá ga̱jma̱a̱  rí ikhaa nandoo kaʼñún (1 Juan 4:19-21). Apóstol Pablo niʼthún cristianos: “Guni̱i̱ a̱jkia̱la mámbáanʼ dí ikháanʼ ga̱jma̱a̱ guxnamíjná tsiakii mámbáanʼ dí ikháanʼ, xúʼko̱ xó má kuwáanʼ runi” (1 Tes. 5:11). Ikha jngó xúgiáanʼ, raʼkháa i̱ndó bi̱ kuya̱ edxu̱u̱ ma̱ndoo muni gakhi̱i̱ a̱jkiu̱ún ga̱jma̱a̱ muxnún tsiakii a̱ngiu̱lú xó má eʼni Jeobá ga̱jma̱a̱ Jesús (atraxnuu Romanos 15:1, 2). *

¹¹ Tikhun a̱ngiu̱lú bi̱ guáʼdáá nandii gakhi̱i̱ mbáa ndayóoʼ mumbañún médico bi̱ najmañún ga̱jma̱a̱ rí muwa̱a̱n thana (Luc. 5:31). Xó má bi̱ kuya̱ edxu̱u̱ ga̱jma̱a̱ eʼwíínʼ cristianos nduyáá májánʼ rí na̱nguá ni̱ndxu̱ún médicos bi̱ najmañún. Mú nduyáá rí gíʼdoo numuu munimbu̱ún kiʼtáñajunʼ rígi̱: “Guthu̱u̱n ajngáa rí maxnún tsiakii bi̱ kuwa gíná, gumbáñuun bi̱ gua̱bi̱nʼ, gaʼngo̱o̱ a̱jkia̱la ku̱ñu̱u̱n xúgínʼ” (1 Tes. 5:14). Ndayóoʼ rí xúgiáanʼ musngajmá ngajua, rí makumulúʼ xóo ekumún eʼwíínʼ ga̱jma̱a̱ rí maʼngo̱o̱ a̱jkiu̱lú kuʼñúún bi̱ nakáguabiinʼ, ga̱jma̱a̱ rí muʼthúún ga̱jma̱a̱ ajngáa guabaaʼ mu muʼni̱i̱ a̱jkiu̱ún. Guraximíjna̱: “Lá ni̱ndxu̱ʼ mbáa bi̱ naʼni̱i̱ a̱jkiu̱ún ga̱jma̱a̱ bi̱ naxná tsiakii ráʼ. Ndiéjunʼ gándoo mani mu mambáñun itháan májánʼ a̱ngui̱nʼ rá.”

12. Araxná mbá xkri̱da xú káʼnii nimbáyúu ngajua dí rígá náa congregación mbáa ndxájulú a̱ʼgu̱.

¹² Xú káʼnii gambáñun ngajua ndrígúlú bi̱ kuwa ga̱jma̱a̱ ga̱ʼkhu̱ rá. Mbáa ndxájulú bi̱ na̱ʼkha̱ Europa naʼthí: “Nguáná, nandoʼ maxíyaminaʼ. Mú gúʼdiin mbaʼin bi̱ numbayúʼ. Congregación ndrígóʼ niʼni kríñunʼ. A̱ngiu̱lú nuxnuʼ má xúʼko̱ tsiakii ga̱jma̱a̱ nandún kuyoʼ. Nguéjmi̱i̱n eyáá rí naxmiéjunʼ, mú xúgínʼ nandún mumbayúʼ má xúʼko̱. Kuwa xa̱bu̱ gajmii bi̱ nuñawunʼ asndu xóo anu̱ʼ ga̱jma̱a̱ ru̱dúʼ. Kuwa xawii mumbayúʼ asndu xú káʼnii má hora rí mbiʼi o rí mbruʼun”. Gajkhun má dí raʼkháa xúgiáanʼ ma̱ndoo muyambáá xúgi̱ kaʼnii. Mú rí gúʼthún mambáñun a̱ngiu̱lú bi̱ numíniiʼ ga̱jma̱a̱ mbá nandii gakhi̱i̱. *

13. Ndiéjunʼ gambáyulú mu muxnún tsiakii a̱ngiu̱lú rá.

¹³ Gajmañulú rí muʼdxawíín (Sant. 1:19). Musngajmá ngajua á mu nuʼdxawíín májánʼ rí nuthi. Xú káʼnii exnáá tsiakii bi̱ nakáguabaaʼ rá. Guʼgíʼ mundxaʼwamíjna̱ xú káʼnii gakumulú á mu ikháanʼ kuwáanʼ xúʼko̱ kaʼnii ga̱jma̱a̱ guʼni̱i̱ graxe̱ mu makru̱ʼu̱lú rí eku̱mu̱u̱. Inulú gíʼmaa masngájma rí naxmiéjunlú kuʼñúún ga̱jma̱a̱ rí nandulúʼ kuʼñúún. Á mu mbáa ndayóoʼ maʼthúlú xúgíʼ rí xtáa ragíʼnuu, gaʼngo̱o̱ a̱jkiu̱lú mu xurujturígú rí naʼthí. Á mu naʼngulú nuʼdxawíín, makru̱ʼu̱lú xúgíʼ rí eku̱mu̱u̱. Ma̱ngaa ikhaa maʼthúlú xúgíʼ ga̱jma̱a̱ magíʼ maʼdxawun rí gúʼthán. Índo̱ nusngájma rí naxmiéjunlú kuʼñúún ikhú nuʼni̱i̱la a̱jkiu̱ún.

14. Ndíjkha jngó ragíʼmaa muʼthá numa rá.

¹⁴ Xúʼthá numa. Á mu mbáa xa̱bu̱ bi̱ xtáa gíná naku̱mu̱u̱ rí nuʼthá numáá, magawúunʼ itháan. Ga̱jma̱a̱, maski ajndu nuʼnimíjna̱ mumbáyii xáʼngulú gúʼni̱i̱ a̱jkiu̱u̱n. Náa Biblia naʼthí: “Xtáa bi̱ tsindxaʼwóo edxu̱u̱ rí maʼthí, naʼni gawúnlú xóo índo̱ narujtáanʼ chídí rí a̱jma̱ inuu, mú, rí nuthi xa̱bu̱ bi̱ nundxa̱ʼwa̱a̱ májánʼ edxu̱ún nindxu̱u̱ xóo rí naʼni thana” (Prov. 12:18). Gajkhun má  rí tsíyulú muʼni gawíínʼ nimbáa ga̱jma̱a̱ rí nuʼthálu mú muʼni á mu tsindxa̱ʼwa̱míjna̱ ginii rí muʼthá. Mu muʼni̱i̱ a̱jkiu̱u̱n mbáa ga̱jma̱a̱ ngajua, guʼnimíjna̱ rí makumulúʼ xóo eku̱mu̱u̱ ikhaa (Mat. 7:12).

15. Náa biʼyaa i̱yi̱i̱ʼ rí ma̱ndoo majmulúʼ mu muʼni̱i̱ a̱jkiu̱ún eʼwíínʼ ga̱jma̱a̱ ngajua rá.

¹⁵ Gajmulú Ajngá rawunʼ Dios (atraxnuu Romanos 15:4, 5). * Náa Biblia na̱ʼkha̱ rí gíʼdoo numuu rí maʼni̱i̱ a̱jkiu̱lú, numuu rí na̱ʼkha̱ náa ‹Dios bi̱ naʼni dí maʼngulú ga̱jma̱a̱ naʼni maʼni̱i̱ a̱jkiu̱lú›. Ma̱ngaa rígá BIBLIOTECA NÁA INTERNET ga̱jma̱a̱ Ikha rí munigajmaa xa̱bi̱i̱ Jeobá, rí mambáyulúʼ muxkamaa textos ma̱ngaa i̱yi̱i̱ʼ rí muʼni̱i̱ ga̱jma̱a̱ a̱jkiu̱ún a̱ngiu̱lú.

16. Náa biʼyaa cualidad rí gíʼmaa muguaʼdáá índo̱ nuxnáá tsiakii mbáa bi̱ xtáa gíná wéñuʼ rá.

¹⁶ Ganindxu̱lú májánʼ xa̱bu̱ ga̱jma̱a̱ gaʼndulúʼ kuʼyamijná. Jeobá nindxu̱u̱ “Anu̱lú bi̱ nagáwiinʼ a̱jkiu̱u̱n ga̱jma̱a̱ Dios bi̱ naʼni̱i̱ a̱jkiu̱lú”, ga̱jma̱a̱ ‹nagáwiinʼ a̱jkiu̱u̱n› náa bi̱ nuni ñajunʼ (atraxnuu 2 Corintios 1:3, 4; * Luc. 1:78; Rom. 15:13). Pablo nixnúlú mbá májánʼ xkri̱da rí ndayóoʼ muguaʼdáá cualidad rígi̱ numuu rí ikhaa ndiʼyáridoo Jeobá. Ikhaa niʼnirámáʼ: “Rí phú ninixu, nini̱ndxu̱xu̱ʼ májánʼ a̱jkiu̱xuʼ náa ikháanʼla, xóo mbáa a̱ʼgu̱ bi̱ nañewu̱u̱n májánʼ e̱ji̱i̱n. Xúʼko̱, ra̱ʼkhá tháán ninduxu kuyala, nidxuxu wéñuʼ índo̱ nitala ajngáa rígi̱, raʼkháa i̱ndó ajngáa rí májánʼ ndrígóo Dios, ma̱ngaa rí asndu makhañúxu ga̱jma̱a̱ numala, numuu rí ninduxu kuyala wéñuʼ” (1 Tes. 2:7, 8). Á mu nusngajmá ngajua xó má Dios, ma̱ndoo mbaʼyoo rí naxtiʼña̱a̱ rí niʼtájkáan índo̱ numbáyii mbáa xa̱bu̱ bi̱ naxmiéjunʼ wéñuʼ.

17. Xú káʼnii gíʼmaa mbuʼñún a̱ngiu̱lú mu muxnún tsiakii ga̱jma̱a̱ ngajua rá.

¹⁷ Xúguaʼthi̱i̱n rí a̱ngiu̱lú mani̱ndxu̱ún jmbiin. Awáán gíʼmaa mbuʼñún. Rí muguaʼthi̱i̱n rí nditháan xakieʼkhun maʼni gawúnlú má ikháanʼ (Ecl. 7:21, 22). Garmáʼáan a̱jkiu̱lú rí Jeobá nakro̱ʼo̱o̱ kaʼyulú. Á mu nduʼyaridáá xkri̱da ndrígóo, makuwáanʼ xawii mu xúʼyaa rí nakiéʼkhun eʼwíínʼ (Efes. 4:2, 32). Xúʼni̱ makumún rí tsénimijna mu muni itháan ñajunʼ ga̱jma̱a̱ xúʼni̱ mbríguiin gajmiún eʼwíínʼ. Rí phú gíʼmaa muʼni, guʼthúún rí májánʼ rí kuwa runi. Rúʼko̱ gáxnún tsiakii ga̱jma̱a̱ mambáñun mu muni ñajunʼ Jeobá ga̱jma̱a̱ gagi (Gál. 6:4).

18. Náa numuu rí nandulúʼ mumbáñuun a̱ngiu̱lú ga̱jma̱a̱ ngajua rá.

¹⁸ Jeobá ndaʼyoo rí mugiu̱u̱ guáʼdáá wéñuʼ numún, xúʼko̱ má eʼñún Jesús ma̱ngaa bi̱ nixnáxi̱ vida ndrígóo (Gál. 2:20). Nandulúʼ kuʼñúún a̱ngiu̱lú ga̱jma̱a̱ xúgíʼ a̱jkiu̱ún ma̱ngaa nandulúʼ muñewu̱u̱n ga̱jma̱a̱ ngajua. Mu muxnún tsiakii, “guʼgua̱ kidxuuʼ rí naʼni marigá tsímáá ga̱jma̱a̱ guxnamíjnálu má xúʼko̱ tsiakii” (Rom. 14:19). Ra̱ʼkhá tháán eyulú ma̱ʼkha̱nú Ku̱ba̱ʼ mitsaan náa rí nditháan xákaguabáanʼ. Nandii, guerra, rí nakháñulu ga̱jma̱a̱ numuu aʼkhá, rí nuxkulú, xkujndu dí narígá náa guʼwúlú ga̱jma̱a̱ rí nunigawúnlú mandáti̱ga̱a̱. Índo̱ ganújngoo mbá mil tsiguʼ, xa̱bu̱ mani̱ndxu̱ún jmbiin. Jeobá mbaʼñún xóo e̱ji̱i̱n bi̱ kuwa náa tsu̱du̱u̱ ku̱ba̱ʼ bi̱ ganújngun náa iwáá tsáʼkhá, “maguma káwíin xóo e̱ji̱i̱n Dios” (Rom. 8:21). Gusngájma má xúʼko̱ ngajua rí nayambáá ga̱jma̱a̱ gumbáñuun eʼwíínʼ mu matu̱ʼu̱u̱n náa numbaaʼ nuxi̱ʼ rí Dios nikudaminaʼ.