1. Náa numuu rí kuwa gagi xa̱bi̱i̱ Jeobá rá. (Atayáá timbá xtiʼkhu.)

XA̱BI̱I̱ Jeobá kúwi̱i̱n gagi. Rí xú káʼnii enduʼwa ga̱jma̱a̱ rí xóo nutamijná naʼni marigá rí tsímáá índo̱ nagimbíi̱n mu mbuyamajkuíí Dios o nakuwa jnduʼ mbá xngaa. Náa numuu rí nadxún wéñuʼ xá. Ga̱jma̱a̱ numuu rí nuniʼniiʼ Jeobá, nuni ñajunʼ ga̱jma̱a̱ nugíʼ nduyaridáá, bi̱ nindxu̱u̱ “Dios gagi” (1 Tim. 1:11; Sal. 16:11). Náa ikhaa e̱ʼkha̱ rí gagi, ikha jngó nandoo makuwáanʼ gagi ga̱jma̱a̱ rígá mbaʼa numuu mu makuwáanʼ xúʼko̱ kaʼnii (Deut. 12:7; Ecl. 3:12, 13).

2, 3. a) Ndiéjunʼ eyoo gáʼthúu̱n rí makuwáanʼ gagi rá. b) Ndiéjunʼ gáʼni rí xákuwáanʼ gagi rá.

² Ndiéjunʼ gándoo gúʼthá ga̱jma̱a̱ numulúʼ rá. Lá nadxulú ráʼ. Ndiéjunʼ gúʼni mu makuwáanʼ itháan gagi rá. Rí makuwáanʼ gagi nandoo gáʼthúu̱n rí makuwaanʼ májánʼ, makuwaanʼ tsímáá ga̱jma̱a̱ rí kuaʼdáá o maʼdxulú wéñuʼ. Náa Biblia nasngájma rí mu ma̱ndoo makuwáanʼ gagi gíʼmaa mambaxúlúʼ gajmiúlú Jeobá. Mú, nguáná maʼni mingíjyúuʼ muxkamaa rí gagi. Náa numuu rá.

³ Rígá mbaʼa rí maʼni rí xákuwáanʼ gagi, xóo rí muʼnimbáti̱ga̱ mbá ñajunʼ, rí muniʼñáʼ bi̱ ndiyáa o índo̱ mbáa naguma expulsar o índo̱ nakháñuu mbáa bi̱ kuʼyáá. Xkujndu rí narígá náa mbá guʼwá, o  índo̱ xa̱bu̱ náa nuñajunʼ nutsijmáanʼlu o náa escuela, índo̱ nuxkulú ga̱jma̱a̱ numuu religión o á mu nuxuda̱nʼ náa guʼwá e̱jua̱nʼ maʼni rí xakuwáanʼ gagi. Ga̱jma̱a̱ xúʼko̱ má gákumulu á mu nandii rí kuaʼdáá na̱jkha̱ raʼni itháan gakhi̱i̱, o nandii rí nándáa thanuu o rí kuwáanʼ gíná wéñuʼ. Mú Jesucristo, bi̱ “gíʼdoo rí gagi ga̱jma̱a̱ bi̱ gíʼdoo xúgíʼ tsiakii” o Xa̱bu̱ Ñajunʼ, nandoo maʼni̱i̱ a̱jkiu̱ún xa̱bu̱ ga̱jma̱a̱ nandoo makuwa gagi (1 Tim. 6:15; Mat. 11:28-30). Náa discurso rí Jesús nixná náa Kúbá, niʼthí mbaʼa rí ma̱ndoo mambáyulúʼ mu makuwáanʼ gagi maski ajndu nuraʼníí mbaʼa tsingíná náa numbaaʼ ndrígóo Satanás.

4, 5. Ndiéjunʼ gíʼmaa muʼni mu muxkamaa ga̱jma̱a̱ muguaʼdáá má xúʼko̱ rí gagi rá.

⁴ Rí timbá rí ndiʼyoo Jesús rí gíʼdoo itháan numuu. Ikhaa niʼthí: “Gagi kuwa bi̱ nduyáá rí ndañúnʼ mbuyáaʼ Dios, numuu dí ikhiin kaʼñúún Reino bi̱ xtáa mekhuíí” (Mat. 5:3). Xú káʼnii esngajmá rí nduʼyáá rí ndayúlú muniʼnííʼ Dios ga̱jma̱a̱ muʼnimbánii ikha ndrígóo rá. Rí muʼnigajmaa Biblia, muʼnimbulúʼ rí naʼtáñajunlú ga̱jma̱a̱ muʼgíʼ muʼni ginii ñajunʼ ndrígóo. Á mu nuʼni, makuwáanʼ itháan gagi ga̱jma̱a̱ muguaʼdáá itháan fe náa rí naʼthí maʼnimbánuu Dios. Ma̱ngaa, “tsímáá rí marigá nda̱wa̱á” rí nuxkamaa náa Ajngá rawunʼ Dios naxnúlú tsiakii mu maʼngulú ga̱jma̱a̱ xkujndu (Tito 2:13).

⁵ Mbá rí mambáyulúʼ muxkamaa ga̱jma̱a̱ muguaʼdáá má xúʼko̱ rí gagi nindxu̱u̱ rí mambaxúlúʼ gajmiúlú Jeobá. Apóstol Pablo niʼnirámáʼ: “Gaʼdxala má xúʼko̱ náa Señor [Jeobá]. Matala mbu̱júu̱: ¡Gaʼdxala!” (Filip. 4:4). Mu mambaxúlúʼ má xúʼko̱ gajmiúlú, ndayóoʼ muguaʼdáá ku̱ma̱ ndrígóo Dios. Náa Ajngá rawunʼ Dios naʼthí: “Tsímáá xtáa xa̱bu̱ bi̱ naxkamaa itháan ku̱ma̱, ga̱jma̱a̱ xa̱biya̱ bi̱ najmañuu maraʼwíí rí maʼni”. Ga̱jma̱a̱ xóó naʼthí: “Nindxu̱u̱ ixi̱ rí ndaʼya náa bi̱ tséniñaaʼ, ga̱jma̱a̱ bi̱ nurajtuun má xúʼko̱ makuwá gagi” (Prov. 3:13, 18).

6. Ndiéjunʼ gambáyulú mu makuwáanʼ gagi rá.

⁶ Mú makuwáanʼ má xúʼko̱ gagi, gíʼdoo numuu rí muʼnimbulúʼ rí nijmañulúʼ náa Biblia. Jesús niʼthí dí rígi̱ gíʼdoo wéñuʼ numuu índo̱ niʼthí: “Á mu ndu̱ya̱a̱ rígi̱, gagi kuwaanʼ á mu nunila” (Juan 13:17; atraxnuu Santiago 1:25). * Rígi̱ nindxu̱u̱ rí phú mambáyulúʼ mu makuwáanʼ májánʼ gajmiúlú Dios ga̱jma̱a̱ makuwáanʼ gagi má xúʼko̱. Mú, xú káʼnii gándoo gakuwáanʼ gagi á mu rígá mbaʼa rí naʼni makuwáanʼ gíná rá. Guʼyáá rí xóó niʼthí Jesús náa Kúbá.

7. Náa numuu rí kuwa gagi bi̱ numbiyaʼ rá.

⁷ “Gagi kuwa xa̱bu̱ bi̱ numbiyaʼ, numuu rí ikhiin muni̱i̱ a̱jkiu̱ún” (Mat. 5:4). Mbáa tikhun xa̱bu̱ muraximíjna̱: “Xú káʼnii gándoo makuwá gagi xa̱bu̱ bi̱ numbiyaʼ rá”. Rí phú gajkhun rí Jesús tándoo gáʼthi ga̱jma̱a̱ numún bi̱ nuxieʼkhá ga̱jma̱a̱ mbá rí asndu ragíʼdoo numuu. Asndu xa̱bu̱ xkawiinʼ numbiyaʼ ga̱jma̱a̱ numuu xkujndu dí rígá náa “mbiʼi gakhi̱i̱ ga̱jma̱a̱ maʼni mingíjyúuʼ makuwáanʼ” (2 Tim. 3:1). Mú rí numbiyaʼ tséʼni muxuʼmamíjná itháan náa Jeobá, rígi̱ na̱nguá eʼni makuwá gagi. Jesús nindxaʼwáminaʼ ga̱jma̱a̱ numún xa̱bu̱ bi̱ nduyááʼ Dios ikha jngó nagawúnʼ índo̱ nduyáá rí numbaaʼ rígi̱ xtáa mitsínguánʼ náa Dios. Naguanu nduyáá rí ikhiin guáʼdáá aʼkhá ma̱ngaa ga̱jma̱a̱ numuu aʼkhá narígá rí xkawiʼ wéñuʼ náa numbaaʼ. Jeobá ndaʼñún xa̱bu̱ buʼko̱ bi̱ nandún mbuyáá rí gajkhun, naʼni̱i̱ a̱jkiu̱ún ga̱jma̱a̱ Biblia ga̱jma̱a̱ naʼni makuwá tsímáá ma̱ngaa rí muguaʼthi̱i̱n  makuwá kámuu (atraxnuu Ezequiel 5:11; * 9:4). *

8. Arathá náa numuu rí na̱ʼkha̱ kayóo gagi rí manindxu̱lúʼ xa̱bu̱ gua̱ba̱ʼ.

⁸ “Gagi kuwa xa̱bu̱ guabiinʼ, numuu rí ikhiin mundrígúu ku̱ba̱ʼ” (Mat. 5:5). Náa numuu rí na̱ʼkha̱ kayóo gagi rí manindxu̱lúʼ xa̱bu̱ gua̱ba̱ʼ rá. Tikhun xa̱bu̱ nákha wajyúúʼ gújkhuʼ a̱jkiu̱ún, nanigu̱nʼ xkujndu, ga̱jma̱a̱ najmangunʼ. Mú niguánu niguáʼdáá ku̱ma̱ gajkhun rí naʼthí náa Biblia, ‹ga̱jma̱a̱ nigíʼ niriʼkumijná rí xú káʼnii ni̱ndxu̱ún›. Rí xúgi̱ ni̱ndxu̱ún xa̱bu̱ gua̱bi̱nʼ, míjínʼ, nambáxu̱u̱n gajmiún xúgínʼ, guáʼdaa gamajkhún, tsékiʼníin nacha̱ ga̱jma̱a̱ naʼngoʼ a̱jkiu̱ún (Col. 3:9-12). Ga̱jma̱a̱ numuu rígi̱, nambáxu̱u̱n májánʼ gajmiún eʼwíínʼ ga̱jma̱a̱ kuwa gagi. Mú, náa Ajngá rawunʼ Dios naʼthí rí xa̱bu̱ bugi̱ “makuwá kámuu mbiʼi náa tsu̱du̱u̱ ku̱ba̱ʼ” (Sal. 37:8-10, 29).

9. a) Mú xú kaʼnii gáta̱ʼa̱a̱n náa tsu̱du̱u̱ Ku̱ba̱ʼ bi̱ ni̱ndxu̱ún “xa̱bu̱ gua̱bi̱nʼ rá”. b) Náa numuu rí ma̱ndoo makuwá gagi bi̱ “naxkidxu̱u̱n ga̱jma̱a̱ nakandawúnʼ ga̱jma̱a̱ numuu rí jmbu” rá.

⁹ Mú xú káʼnii gáta̱ʼa̱a̱n náa tsu̱du̱u̱ Ku̱ba̱ʼ bi̱ ni̱ndxu̱ún “xa̱bu̱ gua̱bi̱nʼ rá.” Xa̱bi̱i̱ Jesús bi̱ kaxtaʼwíin mata̱ʼa̱a̱n índo̱ gánindxu̱ún ndxajkun ga̱jma̱a̱ mutañajunʼ xóo reyes (Rev. 20:6). Ga̱jma̱a̱ mbaʼin wéñuʼ xa̱bu̱ bi̱ na̱nguá guáʼthi̱i̱n magúun mekhuíí, mú guáʼthi̱i̱n makuwá kámuu mbiʼi náa tsu̱du̱u̱ Ku̱ba̱ʼ náa rí mani̱ndxu̱u̱n xa̱bu̱ jmbii, makuwá tsímáá ga̱jma̱a̱ gagi. Náa a̱jma̱ grupo rígi̱ Jesús niʼthí: “Gagi kuwa xa̱bu̱ bi̱ naxkidxu̱u̱n ga̱jma̱a̱ nakandawúnʼ ga̱jma̱a̱ numuu rí jmbu” (Mat. 5:6). Xúgíʼ rí nandún muni mambanúu náa numbaaʼ nuxi̱i̱ʼ (2 Ped. 3:13). Índo̱ Dios gáʼnimbátiga̱a̱ xúgíʼ dí ra̱májánʼ, xa̱bu̱ míjínʼ ma̱ndoo makuwá phú gagi wéñuʼ ga̱jma̱a̱ nditháan xátangi̱i̱n mumbiyaʼ ga̱jma̱a̱ raʼkhí rí niguaʼnii (Sal. 37:17).

10. Ndiéjunʼ eyoo gáʼthúu̱n rí manindxu̱lúʼ xa̱bu̱ bi̱ nagáwiinʼ a̱jkiu̱nʼ rá.

¹⁰ “Gagi kuwa xa̱bu̱ bi̱ nagáwiinʼ a̱jkiu̱ún kuñún eʼwíínʼ, numuu rí mangiin magaʼwíínʼ a̱jkiu̱ún kuñún” (Mat. 5:7). Mbá ajngáa hebreo rí nambánii ga̱jma̱a̱ magáwíinʼ a̱jkiu̱lú nandoo gáʼthúu̱n “rí nakumulú ga̱jma̱a̱ numún eʼwíínʼ” ga̱jma̱a̱ rí manindxu̱lúʼ “xa̱bu̱ májánʼ”. Xúʼko̱ má kayuʼ, náa ajngáa griego nandoo gáʼthúu̱n rí magáwíinʼ a̱jkiu̱lú kuʼñúún eʼwíínʼ. Mú náa Biblia naʼthí, rí magáwíinʼ a̱jkiu̱lú nandoo gáʼthúu̱n itháan ki xóo magáwíinʼ a̱jkiu̱lú kuʼyáá mbáa xa̱bu̱. Nandoo gáʼthi rí mbuʼyáaʼ xú káʼnii mumbáyii.

11. Ndiéjunʼ nijmañulúʼ ga̱jma̱a̱ xkri̱da ndrígóo samaritano rá.

¹¹ (Atraxnuu Lucas 10:30-37). * Xkri̱da ga̱jma̱a̱ numuu samaritano naʼsngúlú májánʼ rí phú nandoo gáʼthúu̱n rí manindxu̱lúʼ xa̱bu̱ bi̱ nagáwiinʼ a̱jkiu̱u̱n. Índo̱ mbáa samaritano ndiʼyoo mbáa xa̱bu̱ bi̱ nixnáá, nigáwiinʼ a̱jkiu̱u̱n ga̱jma̱a̱ nimbáyúu. Nda̱wa̱á rí Jesús niʼthí xkri̱da rígi̱, niʼthí rí gíʼmaa mu̱ʼgua̱ ga̱jma̱a̱ muʼni ikhaa má kayuʼ mangáanʼ. Ikha jngó, guraximíjna̱lú: “Lá nani mangúún xó má niʼni samaritano ráʼ.  Lá nagáwiinʼ a̱jkiu̱nʼ mangúún ráʼ. Índo̱ nda̱yo̱o̱ rí eʼwíínʼ numíniiʼ, lá nasngajmá rí nagáwiinʼ a̱jkiu̱nʼ ka̱ñu̱u̱n xáʼ. Lá ma̱ndoo mbaʼyáaʼ itháan xóo mambáñun xáʼ. Mbá xkri̱da, lá naxnaxíminaʼ mambáñun a̱ngiu̱lú guanuu, gu̱ʼú xuáʼa̱ ga̱jma̱a̱ e̱ji̱n bi̱ na̱nguá guáʼdiin anu̱ún náa rí gajkhun ráʼ. Lá ma̱ndoo magíminaʼ mú mani a̱jkiu̱ún bi̱ kuwa gíná ráʼ.” (1 Tes. 5:14; Sant. 1:27.)

12. Náa numuu rí naʼni makuwáanʼ gagi rí magáwíinʼ a̱jkiu̱lú rá.

¹² Náa numuu naʼni makuwáanʼ gagi rí magáwíinʼ a̱jkiu̱lú rá. Índo̱ numbáñuun eʼwíínʼ nduʼyáá rí ‹kuwáanʼ itháan gagi á mu nuxná ki xóo rí mundrígú›. Á mu xúʼko̱ e̱ʼni̱, muʼni rí maxtáa gagi Jeobá (Hech. 20:35; atraxnuu Hebreos 13:16). * Rey David niʼthí ga̱jma̱a̱ numuu bi̱ nagáwiinʼ a̱jkiu̱ún: “Jeobá gañewu̱u̱n ga̱jma̱a̱ maʼni rí maxtáa má xúʼko̱. Magumbiʼyuu bi̱ xtáa gagi náa tsu̱du̱u̱ ku̱ba̱ʼ” (Sal. 41:1, 2). Á mu nusngajmá rí nagáwiinʼ a̱jkiu̱lú kuʼñúún eʼwíínʼ, Jeobá magáwíinʼ a̱jkiu̱nʼ kaʼyulú, ga̱jma̱a̱ rígi̱ gáʼni rí makuwáanʼ gagi kámuu (Sant. 2:13).

13, 14. Náa numuu rí kuwa gagi xa̱bu̱ bi̱ kaʼwu a̱jkiu̱ún rá.

¹³ Jesús niʼthí: “Gagi kuwa xa̱bu̱ bi̱ mikaʼwu a̱jkiu̱ún, numuu rí ikhiin mbuyáá Dios” (Mat. 5:8). Mu a̱jkiu̱lú mani̱ndxu̱u̱ kaʼwu, rí nundxaʼwamíjná ga̱jma̱a̱ rí nandulúʼ muʼni kaʼwu gíʼmaa mani̱ndxu̱u̱ ma̱ngaa. Gíʼdoo numuu muʼni rígi̱ mu xúʼko̱ Jeobá magruigú rí xóo eʼyamajkuíí (atraxnuu 2 Corintios 4:2; * 1 Tim. 1:5).

¹⁴ Xa̱bu̱ bi̱ kaʼwu a̱jkiu̱ún kuwa gagi numuu rí Jeobá nandoo kaʼñún, bi̱ niʼthí: “Gagi kuwa xa̱bu̱ bi̱ nujñáa xtíñún mbi̱jua̱” (Rev. 22:14). Ndiéjunʼ eyoo gáʼthúu̱n rí mujñáa xtíñún mbi̱jua̱ xá. Náa bi̱ kaxtaʼwíin nandoo gáʼthúu̱n rí Jeobá ndaʼñún xóo xa̱bu̱ bi̱ kaʼwun ga̱jma̱a̱ maʼni rí ni xákhañun nditháan ga̱jma̱a̱ makuwá gagi kámuu mekhuíí. Mú náa xa̱bu̱ bi̱ mbaʼin bi̱ kuáʼti̱i̱n makuwa náa tsu̱du̱u̱ ku̱ba̱ʼ, nandoo gáʼthúu̱n rí Dios nambáxu̱u̱ gajmíi̱n numuu rí ndaʼñún xóo xa̱bu̱ jmbiin. Náa Biblia naʼthí rí “nijña̱a̱ xtíñún rí mbi̱jua̱ ma̱ngaa nuni kaʼwi̱i̱ ga̱jma̱a̱ eʼdiuu Aʼdá Múgú” (Rev. 7:9, 13, 14).

15, 16. Xú káʼnii eyáá Dios bi̱ guáʼdáá a̱jkiu̱ún kaʼwu rá.

¹⁵ Náa Biblia naʼthí rí nimbáa xa̱bu̱ xándoo mbaʼyoo Dios ga̱jma̱a̱ mbaʼya (Éx. 33:20.) Mú, náa numuu rí niʼthí Jesús rí bi̱ guáʼdáá a̱jkiu̱ún kaʼwu “mbuyáá Dios rá.” Náa ajngáa griego rí najuiʼtájuíi “mbuyáá” nandoo gáʼthúu̱n “rí mundxaʼwamíjna̱, mbuʼyáá ga̱jma̱a̱ muniʼnííʼ”. Bi̱ nduyáá Dios ga̱jma̱a̱ ‹idún a̱jkiu̱ún› ni̱ndxu̱ún bi̱ niguanún nininiʼ májánʼ ga̱jma̱a̱ nduyamajkuíí xóo xa̱bu̱ nindxu̱u̱ (Efes. 1:18). Jesús ndiʼyáridoo májánʼ wéñuʼ xóo nindxu̱u̱ Dios. Ikha  jngó niʼthí: “Á mu ikháanʼ nininuwúnʼla, muninuwínʼ Anu̱ʼ ma̱ngaa” (Juan 14:7-9).

¹⁶ Ma̱ndoo mbuʼyáá Dios índo̱ nduʼyáá xú káʼnii nindxu̱u̱, mú ndiéjunʼ imbo̱o̱ rí gándoo gambáyulú mu mbuʼyáá xóo nindxu̱u̱ xá. Mbuʼyáa xú káʼnii eʼni mú mumbayúlú (Job 42:5). Ma̱ngaa ma̱ndoo mundxaʼwamíjna̱ ga̱jma̱a̱ xúgi̱ rí mitsaan nakudaminaʼ maxnún bi̱ nuni tsiakimijna makuwa kaʼwu ga̱jma̱a̱ jmbu. Mú bi̱ kaxtaʼwíin nduyáá Jeobá índo̱ nagabi̱ín mekhuíí (1 Juan 3:2).

17. Náa numuu kuwa gagi bi̱ nduyááʼ rí tsímáá rá.

¹⁷ Jesús ma̱ngaa niʼthí: “Gagi kuwa xa̱bu̱ bi̱ tsekiʼníin gajmiún eʼwíínʼ”, xóo muʼthá, bi̱ nuni marigá rí tsímáá (Mat. 5:9). Ga̱jma̱a̱ ikhiin guáʼdáá májánʼ numuu mu makuwá gagi, discípulo Santiago niʼnirámáʼ: “Ma̱ngaa, rí naxná rí jmbu, tsígoʼ najuiʼdu náa rí tsímáá ga̱jma̱a̱ numún xa̱bu̱ bi̱ nuni marigá rí tsímáá” (Sant. 3:18). Á mu kuaʼdáá xkujndu gajmiúlú mbáa bi̱ náa congregación o náa guʼwúlú, ma̱ndoo muʼtákáñii Jeobá mu mambáyulúʼ muʼnimbánii. Ikhaa maxnúlúʼ xi̱ʼ kaʼwu ndrígóo ga̱jma̱a̱ mambáyulúʼ musngajmá rí májánʼ náa eʼwíínʼ ga̱jma̱a̱ maʼni makuwáanʼ itháan gagi. Jesús niʼthí rí itháan gíʼdoo numuu mbuʼyáaʼ ginii rí muʼni marigá tsímáá, índo̱ ikhaa niʼthí: “Ikha jngó, á mu nadxuʼ jchááʼ tsigijñaʼ náa altar ga̱jma̱a̱ ikhí narmáʼáan a̱jkia̱nʼ rí xtaʼdáá xkujndu ga̱jma̱ʼ ndxájuaʼ, atatsíñaʼ tsigijñaʼ ndrígáʼ ikhí, ayuuʼ, ginii gambaxíʼ ga̱jma̱ʼ ndxájuaʼ ga̱jma̱a̱ índo̱ gídxáʼ araxnáxi̱ tsigijñaʼ ndrígáʼ” (Mat. 5:23, 24).

18, 19. Náa numuu rí nakuwa gagi cristianos maski asndu najuixkúún rá.

¹⁸ “Gagi kuwáanʼ ikháanʼ índo̱ nutanumala o índo̱ nuxkala o nuthi rí minduwaʼ ga̱jma̱a̱ numala numuʼ ikhúúnʼ”. Náa numuu niʼthí Jesús rígi̱ rá. Ikhaa má niriʼña̱a̱: “Gaʼdxalá ga̱jma̱a̱ gakuwáanʼ gagi, numuu rí mba̱a̱ rí gundrígulá náa mekhuíí; numuu rí xúʼko̱ nijuixkúún gaʼyee nákha ginii” (Mat. 5:11, 12). Índo̱ nixnúún apóstoles ga̱jma̱a̱ nithúún rí muniñaʼ rutaraʼa, bugi̱ “nigájna̱án náa Sanedrín, asndu nadxún”. Gajkhun má, rí ikhiin na̱nguá ninigu̱nʼ rí mixnún, mu nidxún “numuu rí ndiyáá rí ikhiin kaʼñún mumíniiʼ ga̱jma̱a̱ numuu mbiʼyuu” Jesús (Hech. 5:41).

¹⁹ Rí mbiʼi xúgi̱, ikháanʼ bi̱ ni̱ndxu̱lú xa̱bi̱i̱ Jeobá naʼngulú ga̱jma̱a̱ gagi índo̱ numíniiʼ ga̱jma̱a̱ nambiʼyuu Jesús o índo̱ nuraʼníí xkujndu rí itháan gakhi̱i̱ (atraxnuu Santiago 1:2-4). * Mangáanʼ na̱nguá enigulúʼ rí mumíniiʼ. Mú, á mu xúgi̱ naʼngulú nuraʼníí xkujndu, Jeobá gáxnulú tsiakii mu maʼngulú muraʼníí. Guʼyáá mbá xkri̱da. Nákha agosto tsiguʼ 1944, xa̱bu̱ ñajunʼ nixuʼmaa Henryk Dornik ga̱jma̱a̱ ndxájuu náa campo de concentración. Xa̱bu̱ sia̱nʼ nithi: “Nimbá nda̱a̱ rí gaʼngulú gúʼniu̱u̱n. Nakujmaa rí nanigu̱nʼ mumíniiʼ”. Mú ndxájulú Dornik niʼthí: “Ikhúúnʼ na̱nguá nixtáá gagi ga̱jma̱a̱ numuu rí nimínuʼ; mú rí niʼni maxtáá gagi rí nindoʼ mani̱ndxu̱u̱ jmbii náa Jeobá, ikha jngó niʼngoʼ”. Ga̱jma̱a̱ xóó niʼthí: “Rí nitajkáan nimbáyuʼ mú ma’ngo̱’, ni’ni rí maxtáá itháan mijngii náa Jeobá. ¡Ikhaa nimbáyuʼ wéñuʼ mu ma’ngo̱’!”.

20. Náa numuu rí naʼni makuwáanʼ gagi rí muʼni ñajunʼ “Dios gagi” rá.

²⁰ Índo̱ “Dios gagi” nandoo kaʼyulú, kuwáanʼ gagi maski asndu nuxkúlú ga̱jma̱a̱ numuu religión ndrígúlú, maski ajndu makiʼníin bi̱ kuʼñúún, naʼniulú nandii o ni̱ndxu̱lú xa̱bu̱ guanii (1 Tim. 1:11). Ma̱ngaa kuwáanʼ gagi numuu rí nakumulú kuʼyáá Dios, “bi̱ xándoo maʼni nduwaʼ”, maʼnimbánuu rí nikudaminaʼ maʼni (Tito 1:2). Rí mundrígúu nda̱wa̱á mani̱ndxu̱u̱ itháan májánʼ ki xóo rí naguaʼnii xúgi̱. Asndu xáʼngulú gundxaʼwamíjna̱ xúgíʼ rí Jeobá gáʼni náa ku̱ba̱ʼ mitsaan. Ga̱jma̱a̱ makuwáanʼ tsímáá wéñuʼ. Rí xóo nimbá miʼtsú tákuwáanʼ (Sal. 37:11).