1. Xú káʼnii rí maʼndulú kuʼyamijná i̱ndó ikháanʼ ma̱ndoo maʼni gachúu rí ni̱ndxu̱lú xa̱bu̱ guabáanʼ rá.

NINDXU̱U̱ mingíjyúuʼ rí muʼgíʼ muʼnimbánii rí ejmañulú náa Ajngá rawunʼ Dios. Náa numuu rá. Numuu rí kuwáanʼ náa “iwáá mbiʼi” ga̱jma̱a̱ naʼni mingíjyúuʼ manindxu̱lúʼ xa̱bu̱ guabaaʼ. Kuwáanʼ náa majñúnʼ xa̱bu̱ bi̱ i̱ndó nandún kuyamijná kanikhiin ga̱jma̱a̱ bi̱ i̱ndó mbújkha̱a̱ eñún, bi̱ najñekhún ga̱jma̱a̱ nunimbaʼumíjna̱, ga̱jma̱a̱ tsíñewa̱a̱n rí nuni (2 Tim. 3:1-3). Rúʼko̱ nakujmaa wéñuʼ ga̱jma̱a̱ xa̱bu̱ nanigu̱nʼ rígi̱. Mbáa xa̱bi̱i̱ Dios ma̱ndoo maʼni gaʼduunʼ rígi̱, mú maxigúu kaʼñún bi̱ nuni xúʼko̱ kaʼnii (Sal. 37:1; 73:3). Asndu maguánu muraximíjna̱ á mu magiʼdoo numuu rí mugíʼ ginii muni rí nda̱ñúnʼ eʼwíínʼ ga̱jma̱a̱ á mu xa̱bu̱ ni xuyamajkhún numuu rí ni̱ndxu̱ún xóo ‹mbáa bi̱ itháan chíʼgíʼ› (Luc. 9:48). Rí muʼni xóo eni xa̱bu̱ numbaaʼ bi̱ i̱ndó naxmiéjunʼ kuyamijná ikhiin maʼni rí ni xambáxulú gajmiúlú a̱ngiu̱lú ga̱jma̱a̱ rí xóo ejmaʼniáanʼ bi̱ ni̱ndxu̱lú cristianos. Ikha jngó, mambáyulúʼ wéñuʼ rí muʼnigajmaa ma̱ngaa rí mbuʼyaridáá xkri̱da májánʼ rí na̱ʼkha̱ raʼthí náa Biblia.

2. Ndiéjunʼ eʼsngúlúʼ rí xóo nini xa̱bi̱i̱ Dios bi̱ niguájun jmbu nákha wajyúúʼ rá.

 ² Mu muʼgíʼ muʼni xóo nini xa̱bi̱i̱ Dios bi̱ niguájun jmbu, gíʼmaa muʼnigajmaa rí nini ikhiin. Xú káʼnii niguánu nimbáxu̱u̱n gajmiún Jeobá xá. Ndiéjunʼ nini mu Jeobá ma̱ndoo kaʼñún xá. Náa ndiya tsiakii mu maʼngu̱u̱n muni rí nandoo xá. Rí muʼnigajmaa xúgi̱ kaʼnii, ganitsu rí na̱ʼkha̱ náa Dios mambáyulúʼ wéñuʼ.

3, 4. a) Náa endrígú ganitsu rí na̱ʼkha̱ náa Dios rá. b) Náa numuu rí nuʼthá rí ndayóoʼ muʼni itháan ki xóo rí muʼnigajmaa mu mambáyulúʼ ganitsu rí na̱ʼkha̱ náa Dios rá.

³ Cristianos nundrígú wéñuʼ xtágabu ga̱jma̱a̱ kiʼsngáa ndrígóo Biblia, i̱yi̱i̱ʼ rí nagájnuu náa Biblia, náa ináa ndrígóo jw.org, canal JW Broadcasting, náa nagimbáanʼ ga̱jma̱a̱ náa asambleas. Mu, mambáyulúʼ ganitsu rí na̱ʼkha̱ náa Dios, raʼkháa i̱ndó ndayóoʼ muʼnigajmaa, numuu rí Jesús niʼthí: “Ganitsu ndrígóʼ nindxu̱u̱ rí mani rí nandoo bi̱ nikungunʼ ga̱jma̱a̱ mambóʼ ñajunʼ ndrígóo” (Juan 4:34).

⁴ Jesús niʼthí rí muʼnimbulúʼ kuʼyáá Dios kagujtuminaʼ ga̱jma̱a̱ rí mu̱ʼphu̱ ganitsu rí na̱ʼkha̱ náa Dios. Xú káʼnii rá. Índo̱ naphu mbá ganitsu májánʼ, nakumulú rí nagiʼmulú ga̱jma̱a̱ nadxulú. Ikhaa má kayúʼ, índo̱ nuʼni rí Dios nandoo, maʼni muguaʼdáá itháan fe ga̱jma̱a̱ makumulúʼ rí mambáyulúʼ ganitsu rí na̱ʼkha̱ náa Dios. Lá ragájkhun rí nguáná kuwáanʼ gíná índo̱ nagájnulú gúʼtaraʼa mú índo̱ natangáanʼlu náa guʼwúlú nadxulú ga̱jma̱a̱ nakumulú rí kuaʼdáá itháan tsiakii ráʼ.

5. Ndiéjunʼ embáyulú índo̱ nani̱ndxu̱lú xa̱bu̱ bi̱ najmañuu rá.

⁵ Índo̱ nuʼnimbánii rí Dios eʼsngúlúʼ, najmañulúʼ itháan (Sal. 107:43). Ga̱jma̱a̱ rí xóo mambáyulúʼ xánindxu̱u̱ ndíí. Náa Biblia naʼthí rí nimbá rí nandulú tsembánii ga̱jma̱a̱ rí majmañulú ga̱jma̱a̱ dí rígi̱ nindxu̱u̱ “ixi̱ rí ndaʼya náa bi̱ tséniñaaʼ, ga̱jma̱a̱ bi̱ nurajtuun má xúʼko̱ makuwá gagi” (Prov. 3:13-18). Mbá miʼtsú, Jesús niʼthún xa̱bi̱i̱: “Á mu ndu̱ya̱a̱ rígi̱, gagi kuwaanʼ á mu nunila” (Juan 13:17). Makuwa gagi má xúʼko̱ á mu tsíniñaʼ runimbu̱ún kuyáá Jesús. Ga̱jma̱a̱ xúʼko̱ má nini. Rí munimbu̱ún ikha ndrígóo ga̱jma̱a̱ rí mbuyaridáá xkri̱da ndrígóo, túni índo̱ nindúún ikhiin, rígi̱ nini náa xúgíʼ vida ndrígu̱ún.

6. Náa numuu dí ragíʼmaa muniʼñáʼ ruʼnimbulú kiʼsngáa ndrígóo Biblia rá.

⁶ Rí mbiʼi xúgi̱, ma̱ngaa gíʼdoo wéñuʼ numuu rí xúniʼñáʼ ruʼnimbulú kiʼsngáa ndrígóo Biblia. Guʼgíʼ mbá xkri̱da. Mbáa xa̱bu̱ bi̱ niʼnigajmaa maʼni̱i̱ carro gíʼdoo ku̱ma̱ ga̱jma̱a̱ rí majmuu mu mañajunʼ. Mú á mu, na̱nguá ejmuu, nda̱a̱ rí embáyúu. Ma̱ngaa, mbáa niʼni tikhu ñajunʼ rí nijmañuu. Mú, á mu nandoo mani̱ndxu̱u̱ mbáa bi̱ naʼni̱i̱ májáánʼ carro, ndayóoʼ mañajunʼ má xúʼko̱ rí niʼnigajmaa. Xúʼko̱ má kayúʼ índo̱ nigíʼdi̱i̱ niʼnigajmaa Biblia niʼgíʼ niʼni rí nijmañulúʼ ga̱jma̱a̱ mbaʼa rí nimbáyulúʼ. Rí xúgi̱, mu makuwáanʼ gagi má xúʼko̱, ndayóoʼ muʼnimbulúʼ kiʼsngáa ndrígóo Jeobá xúgíʼ mbiʼi.

7. Mu manindxu̱lúʼ xa̱bu̱ bi̱ najmañuu, ndiéjunʼ gúʼni ga̱jma̱a̱ xkri̱da rí najmañulúʼ náa Biblia rá.

⁷ Guʼyáá tikhuu náa mbaʼyóoʼ musngájma rí ni̱ndxu̱lú xa̱bu̱ guabaaʼ ga̱jma̱a̱ guʼyáá xú káʼnii niraʼníí rígi̱ xa̱bi̱i̱ Dios bi̱ nikuwa nákha wajyúúʼ. Á mu nandulúʼ mambaxúlúʼ gajmiúlú Dios, raʼkháa i̱ndó muʼnigajmaa i̱yi̱i̱ʼ rígi̱. Gíʼmaa mundxaʼwamíjna̱ xú káʼnii gúʼgíʼ muʼni rí ejmañulú ga̱jma̱a̱ guʼni nacha̱.

8, 9. Ndiéjunʼ eʼsngúlúʼ náa Hechos 14:8-15 ga̱jma̱a̱ numuu Pablo rí ikhaa ninindxu̱u̱ xa̱bu̱ guabaaʼ rá. (Atayáá timbá xtiʼkhu.)

⁸ Jeobá nandoo rí “xúgínʼ xa̱bu̱ makáwíin ga̱jma̱a̱ maguaʼdáá ku̱ma̱ rí gajkhun” (1 Tim. 2:4). Xú káʼnii eʼñún xa̱bu̱ bi̱ xóó tsiniʼnuuʼ rígi̱ rá. Gajkhun rí apóstol Pablo ni̱jkha̱ náa sinagogas mu mbañíínʼ xa̱bu̱ bi̱ nduyáá má ga̱jma̱a̱ numuu Dios. Mú raʼkháa i̱ndó niʼtáruʼun judíos, ma̱ngaa niʼthún bi̱ nduyamajkhún eʼwíínʼ dios. Rí niriʼña̱a̱ nisngájma á mu nindxu̱u̱ xa̱bu̱ guabaaʼ.

⁹ Mbá xkri̱da, nákha timbá miʼtsú rí Pablo nigájnuu xóo misionero, xa̱bu̱ bi̱ kuwa náa Licaonia nikumu̱ún rí ikhaa ga̱jma̱a̱ Bernabé ni̱ndxu̱ún dios Zeus ga̱jma̱a̱ Hermes bi̱ nduya. Lá nindúún majmaʼnuunʼ xúʼko̱ Pablo ga̱jma̱a̱ Bernabé ráʼ. Lá ndiyáá xóo náa ma̱ndoo mbu̱ya̱a̱ xúnʼ nda̱wa̱á rí ikhiin niraʼníí xkujndu náa a̱jma̱ xuajen náa nigún gutaraʼa xáʼ. Lá nindxa̱ʼwa̱míjna̱ dí rúʼko̱ gáyambáá mu mutaraʼa itháan xáʼ. Na̱nguá. Núkhu má ikhú nixkuʼthu xtíñún ga̱jma̱a̱ nixuxi aʼwún náa inún mbaʼin xa̱bu̱: “Náa numuu rí nuni rígi̱ rá. Mangáanʼ ni̱ndxu̱xu̱ʼ xa̱bu̱ numbaaʼ bi̱ kúwi̱i̱n náa tsingíná xó má ikháanʼla” (Hech. 14:8-15).

10. Xú káʼnii nikru̱ʼu̱u̱n Pablo ga̱jma̱a̱ Bernabé rí ni̱ndxu̱ún xóo Licaonios rá.

¹⁰ Pablo ga̱jma̱a̱ Bernabé ndiyáá rí ikhiin ni̱ndxu̱ún xa̱bu̱ aʼkhá xó má xa̱bu̱ buʼko̱. Mú táʼnduun gúthi rí ikhiin nduyamajkuíí dios xó má licaonios. Ikhiin ni̱ndxu̱ún misioneros bi̱ niguáʼdáá mbá ñajunʼ kiejunʼ (Hech. 13:2). Ma̱ngaa, ninindxu̱ún bi̱ kaxtaʼwíin ga̱jma̱a̱ xi̱ʼ kaʼwu ga̱jma̱a̱ guáʼthi̱i̱n magúun mekhuíí. Mú nakru̱ʼu̱u̱n rí xa̱bu̱ buʼko̱ ma̱ndoo magúun mekhuíí á mu nundrigú ajngáa rígi̱.

11. Xú káʼnii gándoo guʼyaridáá Pablo índo̱ nuʼtáraʼa rí xóo ikhaa ninindxu̱u̱ xa̱bu̱ guabaaʼ xá.

¹¹ Xú káʼnii gándoo guʼyaridáá rí xóo xa̱bu̱ guabaaʼ ninindxu̱u̱ Pablo rá. Mbá nindxu̱u̱ rí muʼnigaʼduunʼ rí maʼndulú mbuyamajkulú ga̱jma̱a̱ rí naʼngulú nuʼni ga̱jma̱a̱ tsiakii ndrígóo Jeobá. Gíʼmáanʼ muraximíjna̱: “Xú káʼnii eñu̱u̱n xa̱bu̱ bi̱ natarúʼuun rá. Lá nandxa̱ʼwa̱mínáʼ mangúún xóo endxaʼwamíjna̱ xa̱bu̱ náa xtáá ráʼ.” Ra̱ʼkhá tháán májánʼ nindxu̱u̱ rí xa̱bi̱i̱ Jeobá nduñíínʼ má xúʼko̱ xa̱bu̱ bi̱ nanigu̱nʼ mudxawíín rí gajkhun. Nguáná, rígi̱ naʼni rí tikhun cristianos majmañún i̱ʼwáʼ ajngáa ga̱jma̱a̱ rí naguʼwún nuni xa̱bu̱ náa egún, mú eʼwíínʼ xa̱bu̱ nduñún xóo bi̱ raguáʼdáá numún. A̱ngiu̱lú bugi̱ tsekumu̱ún rí ikhiin guáʼdáá itháan numún ki xóo ikhiin. Rí phú nuni, nugíʼ nakru̱ʼu̱u̱n xú káʼnii eku̱mu̱u̱ mámbáa xa̱bu̱ mu mbuyáá xú káʼnii gumbáyii mu magruigú ajngáa ndrígóo Reino.

12. Xú káʼnii nisngájma Epafras rí nindoo kaʼñún ga̱jma̱a̱ nixmiéjunʼ kaʼñún eʼwíínʼ rá.

¹² I̱mba̱ náa xóo ma̱ndoo musngajmá rí ni̱ndxu̱lú xa̱bu̱ guabaaʼ ga̱jma̱a̱ rí nuʼnimbulúʼ kuʼyáá Jeobá nindxu̱u̱ rí muʼtájkáan ga̱jma̱a̱ numún a̱ngiu̱lú bi̱ guáʼdáá ikhaa má fe (2 Ped. 1:1). Xúʼko̱ niʼni mbáa cristiano bi̱ nigumbiʼyuu Epafras. Náa Biblia i̱ndó naʼthí ga̱jma̱a̱ numuu ikhaa ajtsú nuthu, xúgíʼ rígi̱ niʼnirámáʼ Pablo. Nákha apóstol nixtáa ñawúunʼ xa̱bu̱ ñajunʼ Roma, niʼnirámáʼ náa inún cristianos bi̱ kuwa náa Colosas rí Epafras naʼtájkáan má xúʼko̱ ga̱jma̱a̱ numún (Col. 4:12). Cristiano bugi̱ naʼninunʼ májánʼ ga̱jma̱a̱ naxmiéjunʼ wéñuʼ kaʼñún. Maski ajndu gíʼdoo xkujndu, nixtáa ga̱jma̱a̱ Pablo náa gaʼkhu, tániñuʼ raʼyoo rí eʼwíínʼ ndañún ga̱jma̱a̱ numuu Dios (Filem. 23). Rí phú niʼni nimbáñun ga̱jma̱a̱ nisngájma rí nindoo kaʼñún ga̱jma̱a̱ nixmiéjunʼ. Índo̱  nuʼtájkáan ga̱jma̱a̱ numún a̱ngiu̱lú nambáñun, itháan índo̱ nurawíi mbiʼñún (2 Cor. 1:11; Sant. 5:16).

13. Xú káʼnii gándoo guʼyaridáá xkri̱da ndrígóo Epafras índo̱ nuʼtájkáan rá.

¹³ Tsíin a̱ngiu̱lú bi̱ ndayóoʼ murawíi mbiʼñún índo̱ nuʼtájkáan rá. Xó má Epafras, mbaʼin a̱ngiu̱lú nunda̱ʼa̱ ga̱jma̱a̱ numún a̱ngiu̱lú bi̱ kuwa náa guʼwá nagimbáanʼ o a̱ngiu̱lú bi̱ guáʼdáá mbaʼa xkujndu o bi̱ ndayóoʼ muraʼwíí rí gúni o bi̱ nuraʼníí tsáʼkhá. Eʼwíínʼ índo̱ nutajkáan nurawíi mbiʼñún a̱ngiu̱lú bi̱ kuwa náa guʼwá e̱jua̱nʼ ga̱jma̱a̱ numuu fe ndrígu̱ún rí na̱ʼkha̱ náa jw.org. Ma̱ngaa xámbumulú kuʼñúún bi̱ nikháñun a̱ngiu̱ún, bi̱ nikáwíin náa gamiéjunʼ ga̱jma̱a̱ náa guerras, ga̱jma̱a̱ bi̱ nda̱ñúnʼ mbújkha̱a̱. Nakujmaa kaʼwu rí kuwa mbaʼin a̱ngiu̱lú bi̱ ndayóoʼ muʼtájkáan ga̱jma̱a̱ numún. Índo̱ nuʼni, nusngájma rí tsixmiéjunʼlú kuʼyamijná i̱ndó ikháanʼ, rí ma̱ngaa naxmiéjunlú kuʼñúún eʼwíínʼ (Filip. 2:4). Jeobá naʼdxuun rí nutajkáan xa̱bi̱i̱.

14. Náa numuu eʼthá rí Jeobá nagíʼ májánʼ xkri̱da rí naʼdxawún eʼwíínʼ rá.

¹⁴ I̱mba̱ rí xóo ma̱ndoo musngájma rí ni̱ndxu̱lú xa̱bu̱ guabaaʼ rí muʼdxawíín rí nuthi eʼwíínʼ. Santiago 1:19 naʼthí rí cristianos gíʼmaa “makuwa xawii mu mudxuun”. Jeobá nindxu̱u̱ bi̱ nagíʼ mbá májánʼ xkri̱da (Gén. 18:32; Jos. 10:14). Guʼyáá rí eʼsngúlúʼ náa Éxodo 32:11, 13, 14 (atraxnuu). * Jeobá tséyóoʼ má maʼdxaun rí gáʼthi Moisés, mú niniñuʼ maʼthí rí eku̱mu̱u̱. Tsáa dí ikháanʼlu gáʼngo̱o̱ maʼdxaun mbáa bi̱ nikiéʼkúun ga̱jma̱a̱ maʼni rí gáʼthúu̱n xá. Jeobá naʼngo̱o̱ a̱jkiu̱u̱n índo̱ naʼdxawún bi̱ nutakáñii ga̱jma̱a̱ fe.

15. Xú káʼnii gándoo guʼyaridáá Jeobá rá.

¹⁵ Mámbáa rí ikháanʼ gíʼmaa maraximínáʼ: “Á mu Jeobá, naʼdxawún xa̱bu̱ numbaaʼ xó má niʼni ga̱jma̱a̱ Abrahán, Raquel, Moisés, Josué, Manóah, Elías ga̱jma̱a̱ Ezequías, lá tséyóoʼ mani xúʼko̱ mangúún ráʼ. Lá ma̱ndoo mbayamajkún a̱ngiu̱lú índo̱ guxnuʼ mbá ikha ga̱jma̱a̱ manimbánuu rí nuthi ráʼ. Lá xtáa náa congregación mbáa o náa goʼwóoʼ bi̱ mbaʼyóoʼ madxáwun tsumáá wéñuʼ ráʼ. Lá rígá rí ndayóoʼ mani ga̱jma̱a̱ numún xáʼ.” (Gén. 30:6; Juec. 13:9; 1 Rey. 17:22; 2 Crón. 30:20.)

16. Ndiéjunʼ niʼni David índo̱ Simeí niʼni magigaa rá.

¹⁶ Rí manindxu̱lúʼ xa̱bu̱ guabaaʼ ma̱ngaa nambáyulúʼ maʼngo̱o̱ a̱jkiu̱lú índo̱ eʼwíínʼ nuni makiʼnáanʼ (Efes. 4:2). Mbá xkri̱da xóo rígi̱ nuxkamaa náa 2 Samuel 16:5-13. David gajmíi̱n xa̱bi̱i̱ niʼngu̱u̱n índo̱ Simeí niʼthá wéñunʼ ga̱jma̱a̱ índo̱ nixkúún, mbáa bi̱ kaʼyoo rey Saúl. David gíʼdoo tsiakii mu maʼnimbánuu xkujndu mú niʼngo̱o̱ a̱jkiu̱u̱n. Náa nikhánaa tsiakii mu maʼngo̱o̱ wéñuʼ a̱jkiu̱u̱n xá. Rí naxtiʼña̱a̱ rígi̱ nuxkamaa náa Salmo 3.

17. a) Náa numuu rí David niʼngo̱o̱ a̱jkiu̱u̱n rá. b) Xú káʼnii guʼyaridáá David rá.

¹⁷ Xó má esngájma náa edxu̱u̱ Salmo 3 nigumaraʼmáʼ índo̱ David ‹nigáyúu ga̱jma̱a̱ numuu a̱ʼdióo Absalón›. Náa versículos 1 ga̱jma̱a̱ 2 nambánii ga̱jma̱a̱ rí naʼthí náa 2 Samuel capítulo 16. Salmo 3:4 nagájnuriyoʼ rí xóo David nikumu̱u̱ kaʼyoo  Jeobá. Ikhaa niʼthí: “Mathu̱u̱n Jeobá ga̱jma̱a̱ aʼwóoʼ gakhi̱i̱, ga̱jma̱a̱ ikhaa gáriʼñuʼ asndu náa kúbá ndrígóo rí mikaʼwu”. Ikháanʼ mangáanʼ ma̱ndoo muʼtájkáan índo̱ nuniulú dí raʼkhí. Ikhú Jeobá maxnúlúʼ xi̱ʼ kaʼwu ndrígóo mu maʼngulú. Lá nundxa̱ʼwa̱míjna̱ ga̱jma̱a̱ mbá xkujndu náa mbaʼyóoʼ maʼngo̱o̱ a̱jkiu̱lú o muʼni mba̱a̱ a̱jkiu̱lú kuʼyáá mbáa bi̱ naʼniulú dí raʼkhí ga̱jma̱a̱ mbá rí nda̱a̱ numuu ráʼ. Lá nakumulú rí Jeobá ndaʼyoo rí numíniiʼ ga̱jma̱a̱ mambáyulúʼ xáʼ.

18. Xú káʼnii gambáyulú á mu nuʼni má xúʼko̱ rí Jeobá eʼtáñajunlú rá.

¹⁸ Á mu nuʼni rí nduʼyáá rí nindxu̱u̱ jmbu, maguma tsajkurámáanʼ wéñuʼ. Ikha jngó náa Proverbios 4:7 naʼthí rí “ku̱ma̱ nindxu̱u̱ rí itháan ginii”. Maski ajndu ku̱ma̱ na̱ʼkha̱ náa rí najmañulúʼ, dí nasngájma rí najmañulúʼ nindxu̱u̱ rí guraʼwíí muʼni, raʼkháa ku̱ma̱ rí kuaʼdáá. Náa Biblia naʼthí rí asndu ajkuáan “ra̱ʼkhá tháán ejmañún”, numuu rí nuraxi̱i̱ ganitsu ndrígu̱ún índo̱ naxnáa ruʼwa (Prov. 30:24, 25). Cristo nindxu̱u̱ “ku̱ma̱ ndrígóo Dios” ga̱jma̱a̱ naʼni má xúʼko̱ rí naniguuʼ Anu̱u̱ (1 Cor. 1:24; Juan 8:29). Dios ndaʼyoo rí mbá nindxu̱u̱ rí ma̱ta̱ya̱a̱ káʼnii gátani ga̱jma̱a̱ i̱mba̱ nindxu̱u̱ rí mataʼgíʼ matani. Ikhaa naʼni tsajkurámiinʼ bi̱ ni̱ndxu̱ún xa̱bu̱ guabiinʼ ga̱jma̱a̱ bi̱ naʼngo̱o̱ a̱jkiu̱ún ga̱jma̱a̱ nuni rí nduyáá rí nindxu̱u̱ májánʼ (atraxnuu Mateo 7:21). * Ikha jngó, guñajunʼ mu muʼni rí náa nagimbáanʼ makuwaanʼ kambáxulú náa ma̱ndoo manindxu̱lúʼ xa̱bu̱ guabaaʼ. Gajkhun má rí ndayóoʼ mbiʼi ga̱jma̱a̱ rí maʼngo̱o̱ a̱jkiu̱lú mu muʼgíʼ muʼni rí nduʼyáá rí nindxu̱u̱ jmbu. Mú á mu nuʼni musngajmá rí ni̱ndxu̱lú xa̱bu̱ guabaaʼ ga̱jma̱a̱ makuwaanʼ gagi xúgi̱ ga̱jma̱a̱ kámuu mbiʼi.