NDIÉJUNʼ e̱ʼni̱ índo̱ nandulúʼ mbuʼyáá káʼnii hora nindxu̱u̱. Mbáa nduʼyáá reloj rí gídáʼ ñawúnlú o reloj rí gíʼmaa náa xunʼ. Á mu mbáa naraxulú káʼnii hora, ndiéjunʼ eriʼñáá xá. Rígá mbaʼa enii xóo nuʼthá.

Mbá xkri̱da, gundxa̱ʼwámi̱jna̱ rí ninújngoo mbá hora ga̱jma̱a̱ a̱jma̱ skiñúʼ iwitsu minutos índo̱ niʼni wakhaʼ. Ma̱ndoo muʼthá rí nindxu̱u̱ a la 1:45 rí wakhííʼ, rí tígo̱o̱ mbá cuarto mu maʼni a las dos o rí tígo̱o̱ gu̱wa̱ʼ nítsu minutos mu maʼni a las dos. O, á mu kuwáanʼ náa rí najmún rí veinticuatro horas, mbáa muʼthá rí nindxu̱u̱ a las 13:45.

Índo̱ nuraxnuu Biblia, mbáa nuraximíjna̱: “Xú káʼnii ndiyáá hora xa̱bu̱ bi̱ nikuwa nákha wajyúúʼ rá.” Xó má ikháanʼ, niguáʼdáá mbá awan rí xú káʼnii majmúún mbiʼi. Náa Escrituras Hebreas, naʼthí ga̱jma̱a̱ numuu rí “miʼcha̱”, “wakhaʼ” ga̱jma̱a̱ “wakhííʼ” (Gén. 8:11; 19:27; 43:16; Deut. 28:29; Juec. 19:9). Mú nguáná náa Biblia najmuu i̱ʼwáʼ ajngáa.

Nákha wajyúúʼ kuwa bi̱ nuyejngoo, itháan rí mbruʼun. Mba̱yu̱ʼ tsiguʼ ginii nákha xóó tsegumaa Jesús, israelitas niruiʼtha̱a̱ ajtsú enii rí mbruʼun rí nagumbiʼyuu ‹turnos› (Sal. 63:6). Nákha nixtáa Jesús, judíos nigi̱ʼdi̱i̱ nijmún tiempo xóo ejmúún xa̱bu̱ griegos ga̱jma̱a̱ romanos, rí nuruiʼtha̱a̱ mbruʼun náa a̱jkhu̱ enii turnos.

Turnos rígi̱ najuiʼthá mbaʼa nuthu náa Evangelios. Mbá xkri̱da, ninindxu̱u̱ náa “raga̱jkhu̱ turno rí mbruʼun” índo̱ Jesús ni̱jkha̱ náa inuu iyaʼ mu makuʼmaminaʼ náa barca náa gajtiin xa̱bi̱i̱ (Mat. 14:25). Ga̱jma̱a̱ mbá miʼtsú Jesús niʼthí: “Á mu mbáa xa̱bu̱ gáʼyoo náa hora (o turno) gáʼkha̱ kuʼwáʼ, xágu ga̱jma̱a̱ xániñuʼ mato̱ʼo̱o̱ náa goʼwóo” (Mat. 24:43).

Jesús niʼthí ga̱jma̱a̱ numuu a̱jkhu̱ turnos índo̱ niʼthún xa̱bi̱i̱: “Gakuwáanʼ xawii, numuu rí na̱nguá e̱ya̱a̱ náa mbi̱ʼi̱i̱ ga̱ʼkha̱nú xa̱bu̱ bi̱ goʼwóo, á mu wakhííʼ o tikhu nduʼun o índo̱ nandxaʼwá mbaxtá o índo̱ miʼcha̱ wéñuʼ” (Mar. 13:35). Timbá turno ninindxu̱u̱ “wakhííʼ” nindxu̱u̱ índo̱ narámaaʼ A̱jkha̱ʼ asndu a las 9 rí mbruʼun. Raga̱jma̱ turno nindxu̱u̱ “tikhu nduʼun” a las 9 asndu a las doce rí mbruʼun. Ragajtsú turno nindxu̱u̱ índo̱ “nandxaʼwá mbaxtá” índo̱ nindxu̱u̱ tikhu nduʼun asndu índo̱ naʼni a las 3 rí miʼcha̱. Mbáa náa turno rígi̱ índo̱ nindxaʼwá mbáa mbaxtá mbruʼun rí nirtuwin Jesús (Mar. 14:72). Ga̱jma̱a̱ índo̱ eʼni raga̱jkhu̱ turno índo̱ “miʼcha̱ wéñuʼ” a las tres rí miʼcha̱ asndu índo̱ nagájnuu A̱jkha̱ʼ.

Xó má eʼyáá, maski ajndu nákha wajyúúʼ nda̱a̱ reloj xóo dí rígá xúgi̱, mú xa̱bu̱ niguáʼdáá mbá awan mu majmúún mbiʼi.