1, 2. Xú káʼnii nimbáñun Jesús discípulos ndrígóo índo̱ ikhaa ni̱ga̱bi̱i̱ xá.

MBIʼI rí nigabi̱i̱ Jesús, a̱jmi̱i̱n discípulos nigún rajkhún náa mbá xuajin rí naʼni 11 kilómetros mijngii náa Jerusalén. Ikhiin tséyáá rí Jesús ni̱ga̱bi̱i̱ ma̱ngaa kuwa gíná wéñuʼ numuu rí nirígá xíkhóó. Nda̱a̱ tsu̱ma̱ Jesús nikujmaa náa ikhiin ma̱ngaa ni̱jkha̱ gajmíi̱n. Ikhaa nixnúún tsiakii discípulos ndrígóo. Xú káʼnii niʼni xá. “Asjndo naki mbiʼi ri nixta Moisés, gajma mba xuguinʼ gaʼyo. Ika niʼsjngun mba xugui ri naʼtan naʼ Huaʼtan numu Ika” (Luc. 24:13-15, 27). Ra̱ʼkhá tháán nidxún índo̱ niʼthún májánʼ wéñuʼ rí naʼthí náa Ajngá rawunʼ Dios (Luc. 24:32).

² Ikhú má mbruʼun rúʼko̱ nájmi̱i̱n discípulos nitangi̱i̱n náa xuajin Jerusalén mu mutún iʼwíínʼ discípulos rí niguaʼnin. Índo̱ ikhiin kúwi̱i̱n ruthi, Jesús nikujmaa náa xúgínʼ ikhiin. Mú apóstoles nimíñun wéñuʼ. Ikhiin niguanún tsiánguá. Xú káʼnii nimbáñun xá. Ikhiin nithi: “Asjndo aʼkue ri nirmbaʼta jumu, numu ri mago mafruʼun ri naʼtan naʼ Huaʼtan” (Luc. 24:45.

3. a) Ndiéjunʼ gáʼni rí mawabamijná índo̱ nuʼtáraʼa rá. b) Ndiéjunʼ gambáyuluʼ mu mbuʼyáá awáán ñajunʼ rígi̱ rá.

³ Xó má rí niguaʼnin discípulos mangáanʼ ma̱ndoo makuwáanʼ gíná. Mbáa ra̱ʼkhá tháán kuwaanʼ ruʼni ñajunʼ Jeobá,  mu nuʼni wabamijná índo̱ nduʼyáá rí xa̱bu̱ tsiriʼña májánʼ índo̱ nuʼtáraʼa (1 Cor. 15:58). Mbáa tikhun xa̱bu̱ bi̱ nuʼsngúún Biblia tsiriʼkumijná o nuniñaʼ Jeobá. Xú káʼnii gándoo muʼni mu mbuʼyáá awáán ñajunʼ rí kuwáanʼ ruʼni rá. Mbá rí ma̱ndoo mambáyulúʼ makru̱ʼu̱lú xkri̱da rí nijmuu Jesús rí na̱ʼkha̱ náa Ajngá rawunʼ Dios. Mbuʼyáá ajtsú xkri̱da rúʼko̱ ga̱jma̱a̱ guʼyáá ndiéjunʼ gándoo gájmañulú.

4. Ndiéjunʼ eyoo gáʼthúu̱n xkri̱da ndrígóo Jesús ga̱jma̱a̱ numuu xa̱bu̱ bi̱ naʼdu bi̱ xtáa raʼgu rá.

⁴ (Atraxnuu Marcos 4:26-29.) Ndiéjunʼ eyoo gáʼthúu̱n xkri̱da ndrígóo Jesús ga̱jma̱a̱ numuu xa̱bu̱ bi̱ naʼdu bi̱ xtáa raʼgu rá. Xkri̱da ndrígóo xa̱bu̱ bi̱ xtáa raʼdu nandoo gáʼthúu̱n xa̱bu̱ bi̱ nutaraʼa numuu Reino. Tsígáʼ ni̱ndxu̱u̱ ajngóo ndrígóo Reino rí najuiʼthún xa̱bu̱ bi̱ májánʼ a̱jkiu̱ún. Xó má xúgínʼ xa̱bu̱ ‹nunuʼ rí mbruʼun nuguáxúun rí mbiʼi›. Xúgíʼ gíʼdoo awan rí nda̱ja̱a̱ asndu nákha eʼdu xa̱bu̱ asndu índo̱ eguxi̱i̱. Náa xúgíʼ mbiʼi rúʼko̱ “xoma tsiga najraʼan jame ndaʼya”. Rígi̱ ‹tseʼyoo xú káʼnii eʼya›. Xúʼko̱ má kaʼnii rígá índo̱ mbáa xa̱bu̱ na̱jkha̱ raninuʼ ga̱jma̱a̱ numuu Dios rígi̱ na̱jkha̱ kayáa maʼni ñajunʼ ikhaa, índo̱ naxná xndúu nandoo gáʼthi rí naxnáximinaʼ náa Jeobá ga̱jma̱a̱ najngúun iyááʼ.

5. Náa numuu rí Jesús nijmuu xkri̱da ndrígóo xa̱bu̱ bi̱ naʼgu rá.

⁵ Náa numuu nijmuu Jesús xkri̱da rígi̱ rá. Ikhaa nambáyulúʼ mbuʼyáá rí Jeobá naʼni mbaja̱a̱ rí gajkhun náa a̱jkiu̱ún xa̱bu̱ ‹bi̱ nandún majmañún› (Hech. 13:48; 1 Cor. 3:7). Ikháanʼ nuʼdu tsígáʼ ga̱jma̱a̱ nuxíjyáaʼ, mu xándoo guʼni rí mbaja̱a̱ ga̱jma̱a̱ xándoo gúʼthá nguáthá mba̱yu̱ʼ gája̱a̱. Xó má xkri̱da ndrígóo xa̱bu̱ bi̱ naʼdu tséʼyáá nguáná gája̱a̱ tsígáʼ. Ikháanʼ tséʼyáá xú káʼnii ejkha̱ ra̱ja̱a̱ mbá planta. Mú tsígáʼ ndrígóo Reino ma̱ndoo maxná xndúu nda̱wa̱á. Xa̱bu̱ bi̱ ndiʼkhún nanindxu̱u̱ xa̱bi̱i̱ Jesús na̱jkha̱nú naguxi̱i̱ gajmiúlú rí kiʼdu (Juan 4:36-38).

6. Ndiéjunʼ gíʼmaa mbuʼyáá ga̱jma̱a̱ numuu xa̱bu̱ bi̱ naʼni ñajunʼ Dios rá.

⁶ Ndiéjunʼ gándoo gájmañulú náa xkri̱da rígi̱ rá. Timbá, gíʼmaa mbuʼyáá rí na̱nguá xóo muʼni mbaja̱a̱ mbáa bi̱ nuʼsngáá ga̱jma̱a̱ numuu Biblia. Rí mbuʼyáá rí ikháanʼ na̱nguá kaʼyulúʼ muʼni rí mbaja̱a̱ nacha̱ mambáyulúʼ mu xúʼni̱ rí muxtumaa o muʼni kañíí majngúun iyááʼ. Nuʼni mbá tsiakii mu mumbayíí xa̱bu̱, mu nduʼyáá rí ikhaa kaʼyoo maʼthí á mu maxnáximinaʼ náa Dios. Rí maxnáximinaʼ gíʼmaa magajnúu asndu náa a̱jkiu̱u̱n numuu rí nandoo kaʼyoo Dios. Jeobá xágruigú á mu tséʼni ga̱jma̱a̱ xúgíʼ a̱jkiu̱u̱n (Sal. 51:12; 54:6; 110:3).

7, 8. a) Ndiéjunʼ imbo̱o̱ ejmañuluʼ náa xkri̱da ndrígóo Jesús ga̱jma̱a̱ numuu mbáa xa̱bu̱ bi̱ naʼdu bi̱ xtáa raʼgu rá. Araxná mbá xkri̱da. b) Ndiéjunʼ eʼsngúlúʼ ga̱jma̱a̱ numuu Jeobá ma̱ngaa Jesús xkri̱da rígi̱ rá.

⁷ Raga̱jma̱, á mu nakru̱ʼu̱lú rí naʼsngáa xkri̱da rígi̱ mambáyulúʼ mu xákaguabáanʼ á mu tséʼyáá nditháan ga̱jma̱a̱ numuu ñajunʼ rí kuwáanʼ ruʼni. Gíʼmaa manindxu̱lúʼ mbáa xa̱bu̱ bi̱ naʼngo̱o̱ a̱jkiu̱u̱n (Sant. 5:7, 8). Á mu nuʼni mbá tsiakii mba̱a̱ mu mumbayíí bi̱ nuʼsngáá mu ikhaa tsexnáximinaʼ náa Dios rúʼko̱ tsíyoo gáʼthúu̱n rí tsejmañulú muʼsngáá. Jeobá naniñuʼ rí tsígáʼ rígi̱ mbaja̱a̱ náa a̱jkiu̱u̱n mbáa xa̱bu̱ gua̱ba̱ʼ bi̱ nandoo mariʼkuminaʼ (Mat. 13:23). Ikha jngó, ragíʼmaa muʼthá dí ra̱májánʼ eʼni ñajunʼ rígi̱ numuu rí nda̱a̱ kayuʼ rí eʼyáá. Jeobá nagruigú ñajunʼ rí nuʼni maski ajndu xa̱bu̱ tsiñun gúdxuun, ikhaa ndaʼyoo rí gíʼdoo numuu tsiakii rí kuwáanʼ  ru̱ʼni̱ (atraxnuu Lucas 10:17-20 ga̱jma̱a̱ 1 Corintios 3:8).

⁸ Ragajtsú, nguáná na̱nguá xú mbuʼyáá xú káʼnii ejkha̱ rariʼkuminaʼ mbáa xa̱bu̱. Mbá xkri̱da, a̱jmi̱i̱n xa̱bu̱ gajmii bi̱ nunigajmaa gajmiún mbáa misionero nitháán rí nandún mani̱ndxu̱ún publicador. Misionero niʼthún rí ndayóoʼ muniñaʼ rutsikha ndíí mu ma̱ndoo magún gutaraʼa. Mú ikhiin nithi rí niʼni má mba̱yu̱ʼ gu̱nʼ rí ikhiin niniñaʼ rutsikha ndíí. Náa numuu niniñaʼ xá. Ikhiin nijmañún rí Jeobá tsínigu̱ʼ kaʼñúún bi̱ a̱jma̱ inún ga̱jma̱a̱ rí ikhaa mbaʼñún á mu nutsikha ndíí. Ikha jngó ikhiin niriyaʼ mbá awan: Rí mutsikha ndíí náa inuu misionero o muniñaʼ rutsikha mbá kayuʼ. Índo̱ ni̱jkha̱ rajoo rí nindúún kuyáá Jeobá nimbáñun muraʼwi̱i̱ muni rí májánʼ. Maski ajndu misionero na̱nguá ndiʼyoo nditháan, ni̱jkha̱ rajoo rí nijmañún náa Dios.

9. Ndiéjunʼ eyoo gáʼthúu̱n xkri̱da ndrígóo amaʼ rí nagujtun e̱gi̱ʼ rá.

⁹ (Atraxnuu Mateo 13:47-50.) Ndiéjunʼ eyoo gáʼthúu̱n xkri̱da ndrígóo Jesús ga̱jma̱a̱ numuu amaʼ rí nagujtun e̱gi̱ʼ rá. Jesús niʼthí rí ikháá má nindxu̱u̱ rí miʼtáraʼa ajngóo ndrígóo Reino náa xúgínʼ xa̱bu̱ xó má índo̱ nudama̱ʼa̱ amaʼ náa lamáa. Xó má amaʼ nagujtun mbaʼin wéñuʼ e̱gi̱ʼ asndu mbaʼa enii e̱gi̱ʼ, xúʼko̱ má rí nuʼtáraʼa naxumiin mbaʼin enii xa̱bu̱ (Is. 60:5). Mbaʼin xa̱bu̱ bi̱ nagún náa asamblea ga̱jma̱a̱ náa Conmemoración mámbá tsiguʼ nasngájma rí gajkhun nindxu̱u̱ rígi̱. Tikhun e̱gi̱ʼ bi̱ “míjínʼ” rí nandoo gáʼthúu̱n xa̱bu̱ bi̱ naguanu nakuwa náa congregación cristiana. Mú eʼwíínʼ, na̱nguá míjínʼ ga̱jma̱a̱ Jeobá tsigruiguíin.

10. Náa numuu rí nijmuu Jesús xkri̱da ndrígóo amaʼ rí nagujtun e̱gi̱ʼ rá.

¹⁰ Ndíjkha rí nijmuu xkri̱da rígi̱ Jesús rá. Dí maxtaʼwíin e̱gi̱ʼ tsíyoo gáʼthi índo̱ marigá majphú mba̱a̱ gaʼkhu. Niʼthí rí marigá índo̱ gáʼni iwáá mbiʼi índo̱ na̱jkha̱ mambáa xúgíʼ dí xtáa rarígá náa numbaaʼ. Jesús nisngájma dí raʼkháa xúgínʼ bi̱ kuwa náa gajkhun mumbayíí Jeobá. Mbaʼin nagún náa nagimbáanʼ o niguanu ninigajmaa Biblia gajmiúlú, mu tsíñún gúni ñajunʼ Jeobá (1 Rey. 18:21). Eʼwíínʼ na̱nguá kuwa náa congregación. Tikhun jiáma ga̱jma̱a̱ wa̱ʼxa̱ʼ maski ajndu nákha majkhinʼ anu̱ún ni̱ndxu̱ún cristiano ikhiin xóó tsékawo asndu náa a̱jkiu̱ún xtángoo ndrígóo Jeobá. Tséʼniuu má xú káʼnii nindxu̱u̱, Jesús niʼthí rí mámbáa xa̱bu̱ maraʼwíí rí káʼnii gaʼni. Bi̱ gúraʼwi̱i̱ muni rí jmbu makuwá náa xa̱bu̱ ‹míjínʼ› o mitsiʼñíin ‹náa xúgíʼ xuajin› (Ageo 2:7).

11, 12. a) Xú káʼnii gambáyuluʼ xkri̱da ndrígóo amaʼ rí nagujtun e̱gi̱ʼ rá. b) Ndiéjunʼ eʼsngúlúʼ ga̱jma̱a̱ numuu Jeobá ma̱ngaa Jesús xkri̱da rígi̱ rá.

¹¹ Xú káʼnii embáyuluʼ xkri̱da ndrígóo amaʼ rí nagujtun e̱gi̱ʼ rá. Rí makru̱ʼu̱lú xkri̱da rígi̱ mambáyulúʼ mu xákuwáanʼ gíná wéñuʼ á mu mbáa bi̱ nuʼsngáa o mbáa a̱ʼdiúlú na̱nguá eniguʼ rí gajkhun. Rígi̱ ma̱ndoo marigá maski ajndu ikháanʼ niʼni tsiakimijna wéñuʼ. Rí maʼndún munigajmaa Biblia o rí maʼndún makuwá náa rí gajkhun tsíyoo gáʼthúu̱n rí xa̱bu̱ maʼga̱nú mambaxúu ga̱jma̱a̱ Jeobá. Nda̱wa̱á ikhaa má gáriyaʼ náa xuajñu bi̱ tsiñun gúnimbu̱ún náa Xa̱bu̱ Ñajunʼ ndrígóo Jeobá.

¹² Lá nandoo gáʼthúu̱n rígi̱ rí xa̱bu̱ bi̱ niniñaʼ rí gajkhun ní xúniñuʼ matangi̱ín náa congregación ráʼ. O á mu mbáa xóó tsixnáximinaʼ náa Jeobá lá mbiʼyáá má xúʼko̱ xóo mbáa bi̱ “ra̱májánʼ” ráʼ. Na̱nguá. Xóó ma̱ndoo matu̱ʼu̱u̱n xa̱bu̱  nákha xóó tsírígá majphú mba̱a̱ gaʼkhu. Asndu xóo Jeobá naʼthúún rígi̱: “Gagutangáanʼ náa ikhúúnʼ, ga̱jma̱a̱ ikhúúnʼ matangu̱ún náa ikháanʼla” (Mal. 3:7). Ajngáa rígi̱ nagájnuriyoʼ náa xkri̱da ndrígóo Jesús ga̱jma̱a̱ numuu dxámá bi̱ nitsíjmuu mbújkho̱o̱ (atraxnuu Lucas 15:11-32).

13. Ndiéjunʼ eyoo gáʼthúu̱n xkri̱da ndrígóo dxámá bi̱ nitsíjmuu mbújkho̱o̱ rá.

¹³ Ndiéjunʼ eyoo gáʼthúu̱n xkri̱da ndrígóo dxámá bi̱ nitsíjmuu mbújkho̱o̱ rá. Xó má xa̱bu̱ bi̱ nigáwiinʼ a̱jkiu̱u̱n kaʼyoo a̱ʼdióo xúʼko̱ má kayuʼ nindxu̱u̱ Anu̱lú Jeobá bi̱ xtáa mekhuíí bi̱ nandoo kaʼyulúʼ. Dxámá na̱nda̱ʼa̱a̱ rí kaʼyoo ga̱jma̱a̱ nda̱wa̱á natsíjmuu mbújkho̱o̱ rí nandoo gáʼthúu̱n bi̱ niniñaʼ congregación. Índo̱ nini rígi̱, asndu xóo nigún náa “xuajin dí mitsinguánʼ”, náa numbaaʼ ndrígóo Satanás, dí rígá mitsínguánʼ náa Jeobá (Efes. 4:18; Col. 1:21). Mú tikhun rí ikhiin nundxa̱ʼwa̱míjna̱, ga̱jma̱a̱ nuni mbá tsiakii mu matangi̱i̱n náa xuajñu Jeobá. Ikhaa naʼni mba̱a̱ a̱jkiu̱u̱n kaʼñúún, numuu rí ninindxu̱ún xa̱bu̱ guabinʼ ga̱jma̱a̱ rí nitanga̱a̱ a̱jkiu̱ún (Is. 44:22; 1 Ped. 2:25).

14. Náa numuu rí Jesús nijmuu xkri̱da ndrígóo dxámá bi̱ nitsíjmuu mbújkho̱o̱ rá.

¹⁴ Ndíjkha rí nijmuu xkri̱da rígi̱ Jesús rá. Mu masngájma rí Jeobá nandoo matangi̱i̱n náa ikhaa bi̱ nigájni̱i̱n. Anu̱u̱ dxámá bi̱ naʼthí náa xkri̱da rígi̱ nigi̱ʼthu̱u̱n rí a̱ʼdióo mata̱nga̱a̱. Índo̱ ndiʼyoo rí a̱ʼdióo natanga̱a̱, maski ajndu mitsínguánʼ náa e̱ʼkha̱a̱, anu̱u̱ niʼniratoo mu magruiguíi. Rígi̱ naxkaxi̱i̱n mu matangi̱ín náa Jeobá nacha̱ bi̱ niniñaʼ rí gajkhun. Bi̱ kúwi̱i̱n rexa̱a̱ kuwa mitsinguánʼ náa Dios, rí matangi̱ín maʼniuʼ mingíjyúuʼ ga̱jma̱a̱ matiñu̱nʼ. Mú tsiakii rí gáʼni xáʼni ndíí, asndu mekhuíí marigá gagi á mu natangi̱i̱n (Luc. 15:7).

15, 16. a) Ndiéjunʼ eʼsngúlúʼ xkri̱da ndrígóo dxámá bi̱ nitsíjmuu mbújkho̱o̱ rá. Arathá tikhu xkri̱da. b) Ndiéjunʼ eʼsngúlúʼ ga̱jma̱a̱ numuu Jeobá ma̱ngaa Jesús xkri̱da rígi̱ rá.

¹⁵ Xú káʼnii embáyuluʼ xkridoo dxámá bi̱ nitsíjmuu mbújkho̱o̱ rá. Ikháanʼ mbuʼyaridáá xkri̱da ndrígóo Jeobá. Tsíyulú manindxu̱lúʼ “xa̱bu̱ jmbii wéñuʼ” bi̱ tsíñún gundriguíin xa̱bu̱ bi̱ nixudami̱jna̱ aʼkhá bi̱ nitanga̱a̱ a̱jkiu̱ún. Numuu dí  rígi̱ gaʼni rí xa̱bu̱ maʼni gámbaminaʼ (Ecl. 7:16). Rí i̱ʼwáʼ rí ma̱ndoo majmañulúʼ. Mbáa xa̱bu̱ bi̱ naniñuʼ congregación gíʼma mbuʼyáá xóo “mbáa mugu̱ bi̱ nindáti̱ga̱a̱” ra̱ʼkha̱ rí ni xándoo mata̱nga̱a̱ (Sal. 119:176). Á mu nuxkamaa mbáa xa̱bu̱ bi̱ niríyaminaʼ náa congregación mu na̱nguá xtáa expulsada, lá mumbayíí rí mata̱nga̱a̱ xáʼ. Lá muʼthúún bi̱ kuya̱ edxu̱u̱ mu mumbayíí xáʼ. Muʼni á mu nandulúʼ muʼnimbaníí rí niʼsngúlúʼ Jesús náa xkri̱da ndrígóo dxámá bi̱ nitsíjmuu mbújkho̱o̱.

¹⁶ Atayáá xú káʼnii tikhun xa̱bu̱ bi̱ niniñaʼ Jeobá rí mbiʼi xúgi̱ nuxna̱a̱la núma̱aʼ numuu rí nigáwiinʼ a̱jkiu̱u̱n kaʼñúún Jeobá ga̱jma̱a̱ rí nimbañúún náa congregación. Mbáa ndxájulú bi̱ niniñuʼ Jeobá mbá 25 tsiguʼ niʼthí: “Nadxuʼ wéñuʼ rí nitanga̱án numuu rí nagruígú rí májánʼ wéñuʼ rí naxná Jeobá (Hech. 3:19). Xúgínʼ ni̱ndxu̱ún májánʼ a̱jkiu̱ún ga̱jma̱a̱ nandún kuyaʼ. Rí mbiʼi xúgi̱ gúʼdiin a̱ngui̱nʼ bi̱ nduyamajkuíí Dios”. Mbáa dxáʼgú bi̱ niniñuʼ Jeobá mbá witsu tsiguʼ niʼthí náa numuu rí nitanga̱a̱: “Asndu tséyóo xú káʼnii gáthá rí niku̱mu̱ʼ índo̱ ndi̱yo̱o̱ rí nindúún kuyoʼ xó má rí niʼthí Jesús. Rí maraxtaa náa xuajñu Jeobá gíʼdoo wéñuʼ numuu”.

17, 18. a) Ndiéjunʼ nijmañulúʼ náa nájtsu xkri̱da rí niʼnigajmaa rá. b) Ndiéjunʼ gúʼnimi̱jna̱ muʼni rá.

¹⁷ Ndiéjunʼ nijmañulúʼ náa ajtsú xkri̱da rígi̱ rá. Timbá, gíʼmaa mbuʼyáá rí ikháanʼ na̱nguá kaʼyulúʼ muʼni rí mbáa xa̱bu̱ maxnáximinaʼ náa Jeobá. Rígi̱ kaʼyoo Jeobá. Raga̱jma̱, na̱nguá xóo muguaʼthi̱i̱n rí xúgínʼ bi̱ nagimbíi̱n gajmiúlú ga̱jma̱a̱ bi̱ nunigajmaa gajmiúlú maʼndún makuwá náa rí gajkhun. Ragajtsú, maski ajndu tikhun niniñaʼ rí gajkhun ga̱jma̱a̱ nuniñaʼ Jeobá, nuguaʼthi̱i̱n má xúʼko̱ rí matangi̱ín. Ga̱jma̱a̱ á mu natangi̱ín, mundriguíin májánʼ xó má eyoo Jeobá.

¹⁸ Mámbáa rí ikháanʼlu mbayáaʼ má xúʼko̱ ku̱ma̱, magíiʼ makro̱ʼo̱o̱ ga̱jma̱a̱ rí mbaʼyoo itháan. Índo̱ guraxnuu xkri̱da ndrígóo Jesús, gíʼmaa muraxi̱mi̱jna̱ ndiéjunʼ eyoo gáʼthúu̱n; náa numuu rí niniraʼmáʼ náa Biblia, xú káʼnii gándoo guʼnimbánii rí nijmañulúʼ; ga̱jma̱a̱ ndiéjunʼ eʼthúlú ga̱jma̱a̱ numuu Jeobá ma̱ngaa Jesús. Índo̱ gátani rígi̱ natasngájma rí nakruaʼaʼ xkri̱da ndrígóo Jesús.