RÍ KAYÁ EDXU̱U̱ NÁA INUU I̱YI̱I̱ʼ | MA̱NDOO MARAXTAA MIJNGII NÁA DIOS
Lá naku̱ma̱ʼ rí xtaa mijngii náa Dios ráʼ.
“Rí mambaxáʼ ga̱jma̱ʼ Dios naʼniaʼ maraxtaa májánʼ ga̱jma̱a̱ maraxtaa tsímáá. Naku̱ma̱ʼ rí Dios nda̱yáaʼ má xúʼko̱ rí májánʼ rí eyááʼ ikháánʼ.” (CHRISTOPHER, MBÁA DXÁMÁ BI̱ XTÁA NÁA XUAJIN GHANA)
“Dios ndaʼyoo xúgíʼ ga̱jmá rí xtaʼdáá, ikhaa nandoo kaʼyaʼ ga̱jma̱a̱ nañewanʼ itháan ki xóo rí naku̱ma̱ʼ ikháánʼ.” (HANNAH GÍʼDOO 13 TSIGUʼ, BI̱ XTÁA ESTADOS UNIDOS)
“¡Nindxu̱u̱ itháan májánʼ ga̱jma̱a̱ naʼni̱i̱ a̱jkia̱nʼ wéñuʼ índo̱ natayáá rí nambáxaʼ májánʼ ga̱jma̱ʼ Dios!” (GINA MBÁA A̱ʼGU̱ BI̱ XTÁA NÁA XUAJIN JAMAICA BI̱ GÍʼDOO ITHÁAN RÍ 45 TSIGUʼ)
Raʼkháa i̱ndó Christopher, Hannah, ga̱jma̱a̱ Gina endxaʼwamíjna̱ xúʼko̱ kaʼnii. Mbaʼin xa̱bu̱ bi̱ kuwa náa xúgíʼ tsu̱du̱u̱ Ku̱ba̱ʼ nduyáá rí nandoo nambáxu̱u̱n gajmiún Dios. Xú káʼnii tayáá ikháánʼ rá. Lá naku̱ma̱ʼ rí xtaa mijngii náa Dios ráʼ. O nandaʼ maraxtaa mijngii náa ikhaa xáʼ. Mbáa ikháánʼ natraximínáʼ, lá ma̱ndoo mbáa xa̱bu̱ numbaaʼ mambaxúu ga̱jma̱a̱ Dios bi̱ gíʼdoo xúgíʼ tsiakii ráʼ. Á mu ma̱ndoo, xú káʼnii gándoo gátani rá.
MA̱NDOO MAKUWÁANʼ MIJNGII NÁA DIOS
Náa Biblia naʼthí rí ma̱ndoo mambaxúlúʼ gajmiúlú Dios. Ma̱ngaa naʼthí rí Dios nixná mbiʼyuu Abrahán xóo ‹bi̱ nimbáxu̱u̱ májánʼ ga̱jma̱a̱› (Isaías 41:8). Atayáá ma̱ngaa Santiago 4:8 náa naʼthí: “Ahuaʼ cani naʼ inu Dios [...], ga Ica maxta mijŋgui naʼ icanʼla”. Rígi̱ nasngájma rí ma̱ndoo mambaxúlúʼ gajmiúlú Dios. Mú Dios na̱nguá xú mbuʼyáá, xú káʼnii gándoo mu̱ʼgua̱ kanuu náa ikhaa ga̱jma̱a̱ mambáxulúʼ gajmiúlú xá.
Mu maxtiʼña̱a̱ graxe̱ rúʼko̱, mbuʼyáá xú káʼnii eguanu embáxu̱u̱n xa̱bu̱ numbaaʼ. Ginii nduyáá xú káʼnii mbiʼyuu mámbáa. Nda̱wa̱á índo̱ nutamijná má xúʼko̱ nduyáá xú káʼnii endxa̱ʼwa̱a̱ edxu̱ún ga̱jma̱a̱ káʼnii kumún, rígi̱ naʼni mambaxúún itháan májánʼ. Ga̱jma̱a̱ índo̱ nuni tsiakimijna mu mumbayumíjna̱ ikhú naguanu nambáxu̱u̱n itháan májánʼ. Ikhaa má kayuuʼ gúʼni mu mambaxúlúʼ gajmiúlú Dios. Mbuʼyáá rí xúʼko̱ kaʼnii nindxu̱u̱.
Puede que también le interese
BI̱ NAYEJNGOO
Lá natatsiʼnuʼ mbiʼyuu Dios ráʼ.
Dios naʼthúlúʼ: “Ikhúúnʼ ni̱ndxu̱ʼ Jeobá. Xúʼko̱ mbiʼyuʼ”.
