Xa̱bu̱ Ñajunʼ ma̱ndoo mani̱ndxu̱u̱ ra̱májánʼ gajmíi̱n eʼwíínʼ xa̱bu̱ mu magiʼdoo itháan. Rígi̱ na̱ʼkha̱ rarígá asndu nákha wajyúúʼ. Mbá xkri̱da, náa Biblia na̱ʼkha̱ mbá xtángoo náa naʼthí dí ra̱májánʼ magruigú mbújkha̱a̱ mu maʼni mbá dí ra̱májánʼ índo̱ gambánuu mbá xkujndu, rígi̱ nasngájma rí najmaʼnuʼ má wéñuʼ asndu nákha itháan rí 3,500 tsiguʼ (Éxodo 23:8). Mú raʼkháa i̱ndó rúʼko̱ eyoo gáʼthi. Nguáná Xa̱bu̱ Ñajunʼ naguáʼdáá rí na̱nguá kaʼñúún asndu nuni kuʼwáʼ mbújkha̱a̱ rí nagi̱ʼi̱. Mangiin ma̱ndoo majmúún ñajunʼ rí guáʼdáá mu mumbañún bi̱ nambáxu̱u̱n gajmiún o bi̱ kuñún ga̱jma̱a̱ rúʼko̱ nindxu̱u̱ ra̱májánʼ.

Dí ra̱májánʼ ma̱ndoo marigá asndu xú káʼnii organización, mu itháan narígá náa Xa̱bu̱ Ñajunʼ. Barómetro Global de la Corrupción 2013, rí niʼni organización Transparencia Internacional, niʼthí rí xa̱bu̱ bi̱ kuwa náa xúgíʼ numbaaʼ nduyáá dí rígá mbá witsu institución bi̱ itháan nuni kuʼwáʼ, ikhiin nindxu̱ún partido político, policía, xa̱bu̱ bi̱ kuwa rañajunʼ náa gobierno, bi̱ nuni xtángoo ga̱jma̱a̱ bi̱ kaʼñúún munimbaníí xkujndu. Mbuʼyáá tikhuu informe náa nakujmaa itháan xkujndu rígi̱.

• ÁFRICA: Nákha tsiguʼ 2013, mbá 22,000 xa̱bu̱ bi̱ nuñajunʼ náa gobierno nixruigi̱i̱n numuu rí nikuwa runi dí ra̱májánʼ.

• SUDAMÉRICA: Nákha tsiguʼ 2012, náa xuajin mba̱a̱ Brasil, 25 xa̱bu̱ nixruigi̱i̱n numuu rí nijmún mbújkha̱a̱ rí nigi̱ʼi̱ rí nuxna xúgínʼ xa̱bu̱ mu Xa̱bu̱ Ñajunʼ maxnún i̱ndó ikhiin rí nda̱ñúnʼ. Mbáa rí ikhiin nindxu̱u̱ mbáa jefe ndrígóo Xa̱bu̱ Ñajunʼ.

• ASIA: Náa xuajin Seúl (Corea del Sur), mbá 502 xa̱bu̱ nikháñun náa niguámbáa guʼwá rí naxtango̱jo̱o̱ nákha tsiguʼ 1995. Xa̱bu̱ bi̱ nduyáá dí narígá ndiyáá rí Xa̱bu̱ Ñajunʼ bi̱ kuwa ikhí nijmún mbújkha̱a̱ mu muniñunʼ rí contratista majmúún material rí tséjmaa ga̱jma̱a̱ xúnimbaníí xtángoo dí xú káʼnii gíʼmaa maguma.

• EUROPA: “Ra̱ʼkhá tháán rígá dí ra̱májánʼ náa Europa”, eʼthí Cecilia Malmström bi̱ xtáa náa Asuntos de Interior de la Comisión Europea. Ikhaa naʼthí xóó: “Políticos nánguá gíwanʼ a̱jkiu̱ún dí ragíʼmaa muni dí ra̱máján”.

Raʼkháa i̱ndó xúgi̱ narígá dí ra̱májánʼ náa Xa̱bu̱ Ñajunʼ. Profesora Susan Rose-Ackerman bi̱ ndaʼyoo wéñuʼ ga̱jma̱a̱ numuu dí ra̱májánʼ, niʼnirámáʼ rí reforma ndayóoʼ “maxtiʼkhu̱u̱ rí xú káʼnii eʼni mbújkha̱a̱ Xa̱bu̱ Ñajunʼ”. Maski ajndu nakujmaa rí xóo xambanuu xkujndu rígi̱ mu náa Biblia naʼthí rí maʼga̱nú maxtiʼkhu̱u̱ ga̱jma̱a̱ gajkhun maʼga̱nú marigá.