Á mu Xa̱bu̱ Ñajunʼ nagájnún náa xuajin ga̱jma̱a̱ ikhiin ni̱ndxu̱ún ra̱míjínʼ, xúʼko̱ má Xa̱bu̱ Ñajunʼ mani̱ndxu̱ún ra̱míjínʼ, lá raʼkháa xúʼko̱ tayáá mangáán ráʼ. Mu náa Xa̱bu̱ Ñajunʼ xárígá dí ra̱májánʼ gíʼmaa magajnúu i̱mba̱ níʼkhá. Náa Biblia naʼthí ga̱jma̱a̱ numuu mbáa Xa̱bu̱ Ñajunʼ xúʼko̱ kaʼnii. Jesús má niʼthún xa̱bi̱i̱ rí munda̱ʼa̱a̱ índo̱ gutajkháan. Ikhaa nindxu̱u̱ Reino ndrígóo Dios (Mateo 6:9, 10).

Reino ndrígóo Dios nindxu̱u̱ mbáa Xa̱bu̱ Ñajunʼ bi̱ xtáa gajkhun ga̱jma̱a̱ rí ikhaa xtáa mekhuíí ma̱ngaa rí nacha̱ mariʼkuwíin xúgínʼ Xa̱bu̱ Ñajunʼ (Salmo 2:8, 9; Revelación [Apocalipsis] 16:14; 19:19-21). Mbá rí gáʼni ga̱jma̱á ni̱ndxu̱lú rí maʼni gámbáa dí ra̱májánʼ. Rí xúgi̱ mbuʼyáá náa numuu rí Xa̱bu̱ Ñajunʼ tséʼngu̱u̱n gúni gámbáa ga̱jma̱a̱ náa numuu nandoo nduʼyáá rí Reino ndrígóo Dios maʼngo̱o̱ maʼni gámbáa.

XKUJNDU: Xa̱bu̱ Ñajunʼ kuwa ga̱jma̱a̱ numuu mbújkha̱a̱ rí nuxna xúgínʼ xa̱bu̱. Ra̱ʼkhá tháán mbújkha̱a̱ rígá ikhí rí asndu xa̱bu̱ bi̱ kuwa ruñajunʼ ikhí naxkaxi̱i̱n muni kuʼwáʼ; eʼwíínʼ nundrigú mbújkha̱a̱ ndrígu̱ún xa̱bu̱ bi̱ tsíñún maxtumiin xó má gíʼmaa. Rígi̱ naʼni rí Xa̱bu̱ Ñajunʼ muruma itháan mbújkha̱a̱ mu magoʼ rí nindáti̱ga̱, mú rúʼko̱ naʼni marigá itháan dí ra̱májánʼ. Rígi̱ tsíguámbá, ga̱jma̱a̱ xa̱bu̱ bi̱ nuni rí májánʼ nuni numa̱a̱ xúgíʼ rígi̱.

XÓO MAMBANÚU: Tsiakii rí na̱ʼkha̱ náa Reino ndrígóo Dios na̱ʼkha̱ náa Jeobá, Dios bi̱ gíʼdoo xúgíʼ tsiakii (Revelación 11:15). * Ikhaa na̱nguá eyóoʼ maruma mbújkha̱a̱ mu maríyaaʼ awan rí naʼtáñajunʼ. Ikhaa ma̱ndoo maxnún ga̱jma̱a̱ májánʼ rí ndañún bi̱ gáʼtañajúúnʼ, ga̱jma̱a̱ tsiakii ndrígóo (Isaías 40:26; Salmo 145:16).

XKUJNDU: Mu ma̱ndoo muʼni gámbáa dí ra̱májánʼ “ndayóoʼ mugíʼdi̱i̱ rijma̱a̱ asndu kawáá”, niʼthí Susan Rose-Ackerman, bi̱ niʼthá ga̱jma̱a̱ numuu náa timbá artículo. Índo̱ mbáa Xa̱bu̱ Ñajunʼ nagíiʼ maʼni gámbáa dí ra̱májánʼ náa policía ga̱jma̱a̱ bi̱ kuwa náa ndawaa xuajin, mú naniñuʼ marigá náa Xa̱bu̱ Ñajunʼ bi̱ itháan guáʼdáá numún, xa̱bu̱ na̱nguá enimbu̱ún náa ikhaa. Ga̱jma̱a̱ asndu xa̱bu̱ bi̱ naʼni itháan májánʼ nakiéʼkúun, xó má eʼthí náa Biblia: “Numuu rí nda̱wa̱a̱ náa tsu̱du̱u̱ ku̱ba̱ʼ xa̱bu̱ jmbii bi̱ maʼni má xúʼko̱ rí májánʼ ga̱jma̱a̱ xakiéʼkúun” (Eclesiastés 7:20).

XÓO MAMBANÚU: Rey Jesucristo bi̱ xtáa náa Reino ndrígóo Dios, mani̱ndxu̱u̱ mixtiʼkuii ikhaa nimbá miʼtsú xáʼni gachíminaʼ. Ikhaa nisngájma índo̱ niʼni gaʼduunʼ mbá dí rakáʼyoo. Satanás, Xa̱bu̱ Ñajunʼ bi̱ xtáa náa numbaaʼ rígi̱, niʼthúu̱n maxnúu “xugui xuajin ri mbaʼo ri riga mbamba numba” á mu nasmbáti̱go̱o̱ náa ikhaa ga̱jma̱a̱ ndaʼyámajkuu, mu Jesús nacha̱ niʼni gaʼduunʼ (Mateo 4:8-10; Juan 14:30). Ikhaa ninindxu̱u̱ jmbii wéñuʼ rí asndu nini gaʼduunʼ mbá droga nákha kuwa runi gínáa, maski ajndu rígi̱ maʼni rí xáku̱mu̱u̱, mbáa rígi̱ maʼga̱ kayáa rí maʼni gachúminaʼ (Mateo 27:34). Jesús nisngájma rí majmañuu maʼtáñajunʼ náa Reino, xúgi̱ ikhaa ni̱ga̱bi̱i̱ mu maxtáa mekhuíí (Filipenses 2:8-11).

XKUJNDU: Náa mbaʼa xuajin mba̱ʼu̱ nudrigi̱i̱n bi̱ mani̱ndxu̱ún Xa̱bu̱ Ñajunʼ, rígi̱ naʼni rí xa̱bu̱ murawíin Xa̱bu̱ Ñajunʼ bi̱ nuni dí ra̱májánʼ mú na̱nguá erígá xúʼko̱. Rí phú narígá náa campaña ga̱jma̱a̱ náa nuxna  voto ikhí narígá wéñuʼ dí ra̱májánʼ, asndu náa xuajin náa nda̱a̱ tsingíná. Mbá xkri̱da, xa̱bu̱ bi̱ guáʼdáá wéñuʼ numbañún Xa̱bu̱ Ñajunʼ ga̱jma̱a̱ mbújkha̱a̱ mu majmúún náa campaña.

Juez John Paul Stevens, bi̱ xtáa náa Tribunal Supremo ndrígóo Estados Unidos, niʼnirámáʼ rí xkujndu rúʼko̱ “naʼni rí xárígá rí jmbu ga̱jma̱a̱ xúni̱ rí májánʼ Xa̱bu̱ Ñajunʼ, ga̱jma̱a̱ rí xa̱bu̱ xuajin xúnimbu̱ún náa ikhiin”. Rígi̱ tséʼniúlu tsiánguá rí mbaʼin xa̱bu̱ nundxa̱ʼwa̱míjna̱ rí partidos políticos ni̱ndxu̱ún ra̱míjínʼ.

XÓO MAMBANÚU: Numuu rí Reino ndrígóo Dios nindxu̱u̱ mbáa Xa̱bu̱ Ñajunʼ bi̱ mbajyúuʼ asndu kámuu, mandáti̱ga̱a̱ campaña electoral ga̱jma̱a̱ dí ra̱májánʼ dí rígá ikhí (Daniel 7:13, 14). Ma̱ngaa, Rey ndrígóo Reino rúʼko̱ taxtiyáʼ ga̱jma̱a̱ numuu voto, ikhaa nigíiʼ Dios, ikha jngó na̱nguá xóo maxtiʼkuriyaʼ. Rúʼko̱ naʼni rí maríyaaʼ májánʼ awan rí ma̱ndoo mambáñun xa̱bu̱ bi̱ gáʼtañajúúnʼ asndu kámuu mbiʼi.

XKUJNDU: Mbáa mandxa̱ʼóo edxu̱u̱ rí mu mambáa dí ra̱májánʼ gíʼmaa marigá itháan xtángoo. Xa̱bu̱ bi̱ nduyáá nuthi rí índo̱ narígá itháan xtángoo, itháan má tsenimbaníí rígi̱. Nakiéʼkhún mba̱a̱ mbújkha̱a̱ mu munimbaníí xtángoo dí rígá mu muni gámbáa dí ra̱májánʼ, ga̱jma̱a̱ nda̱a̱ rí eʼngu̱u̱n muni.

XÓO MAMBANÚU: Xtángoo rí na̱ʼkha̱ náa Reino ndrígóo Dios itháan gíʼdoo numuu ki xóo xtángoo ndrígu̱ún xa̱bu̱. Jesús táxná mbá lista náa naʼthí rí ma̱ndoo maguma ga̱jma̱a̱ rí xándoo maguma, ikhaa nixná mbá xtángoo rí na̱ʼkha̱ gi̱jyooʼ: “Ikajngo, mba xugui ri nandaʼla muñaʼla xabo, xkuaʼni-ma guñu manganʼla” (Mateo 7:12). Mú dí nagájnuriyoʼ itháan dí rígá xtángoo rí naʼthí ga̱jma̱a̱ numuu rí nakumún xa̱bu̱ raʼkháa náa rí nuni. Jesús niʼthí: “Gaʼne akianʼ-xtaya xabo numbagajmaʼ, asjndo xoma ri neʼne akianʼ xtayaminaʼ ikan” (Mateo 22:39). Numuu rí Dios naʼngo̱o̱ ndaʼyoo dí rígá náa awúu̱n a̱jkiu̱lú, maʼngo̱o̱ maʼni rí xtángoo rúʼko̱ mambanúu (1 Samuel 16:7).

XKUJNDU: Dí ra̱májánʼ na̱ʼkha̱ náa rí nandaʼ maraʼdáá itháan ga̱jma̱a̱ rí matani rí i̱ndó nandaʼ ikháánʼ,  rígi̱ nakujmaa májánʼ náa xa̱bu̱ bi̱ nuñajunʼ náa gobierno xó má náa xa̱bu̱ xuajin. Guʼwá rí niguámbáa rí niʼthá náa timbá artículo, nikujmaa rí xa̱bu̱ bi̱ nuni guʼwá nixnúún mbújkha̱a̱ xa̱bu̱ bi̱ nuñajunʼ náa gobierno numuu rí nduyáá rí magajnúu itháan mbayííʼ ki xóo rí majmúún material rí itháan májánʼ ga̱jma̱a̱ munimbaníí xtángoo dí rígá.

Mú dí ra̱májánʼ mandáti̱ga̱a̱ ndayóoʼ muxprigún xa̱bu̱ ga̱jma̱a̱ miʼsngúún muni gaʼduunʼ rí maʼndún muguaʼdáá itháan ga̱jma̱a̱ muni rí i̱ndó nandún ikhiin. Rí narígá rí Xa̱bu̱ Ñajunʼ bi̱ kuwa xúgi̱ tséʼngu̱u̱n ga̱jma̱a̱ tsíñún gúni rí marigá rígi̱.

 XÓO MAMBANÚU: Reino ndrígóo Dios ma̱ndoo maʼni gámbáa xkujndu rígi̱ asndu náa nikumu̱u̱, numuu rí naʼsngúún xa̱bu̱ rí gíʼdoo numuu. * Kiʼsngáa rígi̱ naʼniún “mundxaʼjuamijna mu muni ri mejanʼ” (Efesios 4:23). Ga̱jma̱a̱ rúʼko̱ naniñúnʼ muniñaʼ rí maʼndún muguaʼdáá itháan ga̱jma̱a̱ muniñaʼ runi rí nandún ikhiin, nakuwa tsímáá ga̱jma̱a̱ rí guáʼdáá ma̱ngaa naxmiéjunʼ kuñún eʼwíínʼ (Filipenses 2:4; 1 Timoteo 6:6).

XKUJNDU: Maski ajndu kuwa májánʼ o nijuiʼsngúún, tikhun xa̱bu̱ nuraʼwíí muni nduwaʼ. Xa̱bu̱ bi̱ nduyáá nuthi dí rígi̱ numuu rí xa̱bu̱ tséʼngu̱u̱n gúni gámbáa dí ra̱májánʼ. Maski ajndu nguáthá gúni xa̱bu̱ xáʼngu̱u̱n gúni gámbáa xkujndu rígi̱.

XÓO MAMBANÚU: Naciones Unidas bi̱ nañajunʼ mu maʼni gámbáa dí Ra̱májánʼ naʼthí rí mu mambáa rígi̱, Xa̱bu̱ Ñajunʼ ndayóoʼ muni rí marigá “rí jmbu, rí xúni̱ nduwaʼ ga̱jma̱a̱ muni rí kaʼñúún”. Maski ajndu májánʼ rí nundxa̱ʼwa̱a̱ edxu̱ún muni, Reino ndrígóo Dios naʼni itháan: Raʼkháa i̱ndó naʼthúún muni rúʼko̱, na̱nda̱ʼa̱ rí maguma. Náa Biblia naʼthí rí náa Reino na̱nguá makuwá xa̱bu̱ bi̱ nandún maguaʼdáá itháan ga̱jma̱a̱ bi̱ nuni nduwaʼ (1 Corintios 6:9-11; Revelación 21:8).

Xúgínʼ gándoo majmañún mbuyamajkuíí xtángoo rí itháan gíʼdoo numuu náa Reino, xó má nisngajma timbíi̱n xa̱bi̱i̱ Dios. Mbá xkri̱da, índo̱ mbáa discípulo bi̱ nigumbiʼyuu Simón niʼthún maxnún mbújkha̱a̱ apóstoles, ikhiin túdrigú ga̱jma̱a̱ nitháán: “Gatangan [...] numu ri ramajan ri xkuaʼni nitatsaʼhuaminaʼ”. Simón ndiʼyoo rí xtáa raʼni mbá dí ra̱májánʼ ga̱jma̱a̱ ninda̱ʼa̱ rí mutajkáan ga̱jma̱a̱ numuu mu maʼngo̱o̱ maraʼnuu (Hechos 8:18-24).

Tséʼniuu má náa edxa̱ʼ, ikháanʼ ma̱ndoo manindxa̱ʼ mbáa xa̱bi̱i̱ náa Reino ndrígóo Dios (Hechos 10:34, 35). Awan rí nigájnuu miʼsngáa náa xúgíʼ numbaaʼ rí naʼni Reino maʼsngááʼ xú káʼnii gándoo gátani. Bi̱ nutaraʼa numuu Jeobá nandún wéñuʼ musngajmáʼ xú káʼnii nindxu̱u̱ índo̱ nusngáa ga̱jma̱a̱ numuu Biblia. Á mu natríyaaʼ awan nguáthá minutos rí mámbá xmáná, majmañaaʼ itháan “ajnga ri majan nuxiʼ ri naʼtañajun Dios”. Majmañaaʼ i̱ʼwáʼ rí xú phú káʼnii Dios gáʼni gámbáa dí ra̱májánʼ (Lucas 4:43). Aratamíjná gajmiáanʼ bi̱ nutaraʼa numuu Jeobá náa xtaa o ata̱ʼa̱ʼ náa Internet náa ináa ndrígúxu jw.org/jw-tln.