Graxe̱ rí naxtiʼña̱a̱ náa Biblia
Náa numuu rí mbaʼin xa̱bu̱ nundxa̱ʼwa̱míjna̱ rí xtáa mbáa bi̱ Niʼniáanʼ rá.
Lá nda̱wa̱a̱ tsáa niʼniáanʼ ráʼ.
Naʼni 3,000 tsiguʼ, rí mbáa bi̱ niʼthí ajngáa mitsaan niʼnirámáʼ: “Asndu xóo migamíi rí xú káʼnii mitsaan wéñuʼ kiʼniu̱u̱n” (Salmo 139:14). Índo̱ nduʼyáá rí xú káʼnii eja̱a̱ mbáa ada̱ ga̱jma̱a̱ mbóo célula. Lá tséʼniaʼ maguanáʼ tsiánguá ráʼ. Mbaʼin xa̱bu̱ nuthi rí xtáa mbáa bi̱ Niʼni xúgíʼ dí rígá. (Atraxnuu Salmo 139:13-17 ga̱jma̱a̱ Hebreos 3:4.)
Bi̱ niʼni numbaaʼ ma̱ngaa niʼni Ku̱ba̱ʼ náa ma̱ndoo marigá rí ndaʼya (Salmo 36:9). Ikhaa naʼtámijna gajmíi̱n xa̱bu̱ numbaaʼ ga̱jma̱a̱ naʼthúlúʼ xú káʼnii nindxu̱u̱ ikhaa. (Atraxnuu Isaías 45:18.)
Lá niguwaʼ náa xujkhúʼ ráʼ.
Mbaʼa enii rí xú ni̱ndxu̱lú nambriguii rí xú káʼnii ni̱ndxu̱ún xujkhúʼ. Xúʼko̱ káʼnii nindxu̱u̱ numuu rí bi̱ Niʼniáanʼ ikháanʼ ga̱jma̱a̱ xujkhúʼ niʼniáanʼ mu makuwáanʼ náa tsu̱du̱u̱ Ku̱ba̱ʼ. Niʼnii timbáa xa̱biya̱ ga̱jma̱a̱ ku̱ba̱ʼ raʼkháa náa mbáa xujkhúʼ. (Atraxnuu Génesis 1:24 ga̱jma̱a̱ 2:7.)
Xa̱bu̱ ni̱ndxu̱ún mixtiʼkun ki xóo xujkhúʼ, rígá a̱jma̱ enii. Timbá rí xa̱bu̱ ma̱ndoo muniʼniiʼ, maʼndún kuyáá ga̱jma̱a̱ mbuyamajkuíí bi̱ Niʼniáanʼ. Raga̱jma̱, xa̱bu̱ nigumiin mu makuwá kámuu mbiʼi mú xujkhúʼ na̱nguá. Mú rí xúgi̱, xúgínʼ xa̱bu̱ nakháñun numuu rí timbáa xa̱biya̱ táʼnimbo̱o̱ ikha rí nixnúu bi̱ Niʼnii. (Atraxnuu Génesis 1:27 ga̱jma̱a̱ 2:15-17.)
