Omar: Nandoʼ matha̱nʼ rí tséjkhá wéñuʼ náa guʼwá ndxajkun. Mbáa nda̱a̱ wéñuʼ rí muʼtámíjná.

Bruno: Naxnaʼ núma̱aʼ numuu dí naratá rí gajkhun. Ikhúúnʼ mbiʼyuuʼ Bruno. Ikháánʼ rá.

Omar: Omar.

Bruno: Nadxuʼ rí naniʼnínʼ, Omar.

Omar: Xúʼko̱ má mangúún.

Bruno: Lá ma̱ndoo maraxaʼ: Lá nirígá mbá tiempo rí ikháánʼ nidxuʼ má xúʼko̱ náa guʼwá ndxajkun ráʼ.

Omar: Xúʼko̱, nákha chíʼgiúnʼ. Mú niniʼñúʼ ra̱jkhá índo̱ nigájnuʼ náa imbo̱o̱ xuajin mu manigajmaa náa universidad.

Bruno: Káʼnii nitanigajmaa náa universidad rá.

Omar: Historia ga̱jma̱a̱ Ciencias sociales. Nanigu̱ʼ rí nanigajmaa náa historia, rí manigajmaa xú káʼnii xa̱biya̱ ni̱ʼkha̱ raxtáa náa tsu̱du̱u̱ ku̱ba̱ʼ.

Bruno: Xúʼko̱, ra̱ʼkhá tháán májánʼ nindxu̱u̱ rúʼko̱. Mbáa ikháánʼ natayáá rí Biblia nindxu̱u̱ mbá libro náa na̱ʼkha̱ historia. Lá nitanigajmaa mbá miʼtsú libro rígi̱ ráʼ.

Omar: Na̱nguá. Nda̱yo̱o̱ rí nindxu̱u̱ mbá libro májánʼ, mú na̱nguá niku̱mu̱ʼ rí nindxu̱u̱ mbá libro náa na̱ʼkha̱ historia.

Bruno: Ikháánʼ tseratá rí Biblia nindxu̱u̱ ra̱májánʼ. Ikha jngó á mu naguapháán nandoʼ masngajmáʼ tikhuu xkri̱da rí nasngájma rí gajkhun nindxu̱u̱ historia rí na̱ʼkha̱ náa Biblia.

Omar: Ma̱ndoo, mu na̱nguá gúʼdoo Biblia.

Bruno: Xáʼniuu má. Gúʼdoo ikhúúnʼ. Ginii guʼyáá 1 Crónicas tsinaʼ mba̱a̱ 29, tsinaʼ ma̱jkha̱ʼ 26 ga̱jma̱a̱ 27. Muraxnuu rí eʼthí: “David a̱ʼdióo Jesé, niʼtáñajunʼ náa xúgíʼ Israel; ga̱jma̱a̱ mbiʼi rí ikhaa niʼtáñajunʼ náa Israel ninindxu̱u̱ a̱jma̱ skiñúʼ tsiguʼ. Náa Hebrón niʼtáñajunʼ mbá juwan tsiguʼ, ma̱ngaa náa Jerusalén niʼtáñajunʼ mbá a̱jma̱ skiñúʼ ijtsu tsiguʼ”.

Omar: Rúʼko̱ nindxu̱u̱ timbá xkri̱da ráʼ.

Bruno: Xúʼko̱. Nirígá mbiʼi rí xa̱bu̱ bi̱ nithi rí najmañún wéñuʼ ga̱jma̱a̱ numuu Biblia náa numbaaʼ rígi̱ nithi rí historia ndrígóo David ninindxu̱u̱ mbóo cuento.

Omar: Lá gajkhun ráʼ. Náa numuu rá.

Bruno: Numuu rí náa i̱ʼwáʼ libro tséʼthi wéñuʼ rí David ni̱jkha̱nú nixtáa. Mu tsiguʼ 1993, mbá nguáthi̱i̱n xa̱bu̱ bi̱ ni̱ndxu̱ún arqueólogo nixkamaa mbá itsí náa kiʼniraʼmáʼ a̱jma̱ ajngáa rí nandoo gáʼthúu̱n “goʼwóo David” ga̱jma̱a̱ “Rey bi̱ nixtáa náa Israel”.

Omar: Mmm... Na̱nguá e̱yo̱o̱ rúʼko̱.

Bruno: Imba̱a̱ xa̱bu̱ bi̱ na̱ʼkha̱ raʼthí náa Biblia bi̱ mbaʼin nithi rí na̱nguá nixtáa nindxu̱u̱ Poncio Pilato, ikhaa niʼtáñajunʼ nákha nixtáa Jesús.  Náa Lucas 3:1 naʼthí ga̱jma̱a̱ numuu ma̱ngaa eʼwíínʼ Xa̱bu̱ Ñajunʼ bi̱ nikuwa ikhú.

Omar: Gi̱jyooʼ naʼthí: Índo̱ “Poncio Pilato ñajun gobernador naʼ Judea, xoma Herodes ñajun gobernador naʼ Galilea”...

Bruno: Núma̱aʼ. Mba̱yu̱ʼ mbiʼi, bi̱ najmañún wéñuʼ na̱nguá enimbu̱ún rí Poncio Pilato nixtáa. Mú niʼni a̱jma̱ skiñúʼ gu̱wa̱ʼ tsiguʼ nikujmaa náa Oriente Medio imbo̱o̱ itsí náa kiʼniraʼmáʼ mbiʼyuu.

Omar: Ndiʼkhún e̱jkha̱nú e̱yo̱o̱ rígi̱.

Bruno: Nadxuʼ rí ni̱dxu̱ʼnú nitayáá rígi̱.

Omar: Natha̱nʼ mbájmbu, nda̱yo̱o̱ má xúʼko̱ Biblia xóo mbá libro májánʼ, mu tséyóo á mu ma̱ndoo mambáyulúʼ rí mbiʼi xúgi̱. Mbáa i̱ndó naʼthí ga̱jma̱a̱ numuu historia.

Bruno: Mbaʼin xa̱bu̱ nundxaʼwamíjna̱ xóo ikháánʼ mú ikhúúnʼ na̱nguá. Lá natayáá náa numuu ráʼ. Numuu rí nda̱yúlúʼ rí mbiʼi xúgi̱, nindxu̱u̱ ikháá xóo nákha wajyúúʼ. Nda̱yúlúʼ má xúʼko̱ ganitsu, xtíin ga̱jma̱a̱ guʼwá. Ma̱ngaa nda̱yúlúʼ muʼthámijna mbá guʼwáanʼ ga̱jma̱a̱ rí makuwaanʼ tsímáá mbá guʼwáanʼ. Lá raʼkháa xúʼko̱ ráʼ.

Omar: Gajkhun xúʼko̱ nindxu̱u̱.

Bruno: Biblia ma̱ndoo mambáyulúʼ ga̱jma̱a̱ numuu rúʼko̱. Maski ajndu Biblia nindxu̱u̱ mbá libro wayuu mu najmaa rí mbiʼi xúgi̱.

Omar: Lá gajkhun ráʼ.

Bruno: Xúʼko̱. Guʼyáá imbo̱o̱ xú káʼnii gándoo gambáyuluʼ: Xtágabu rí na̱ʼkha̱ náa Biblia niyambáá nákha nigumaraʼmáʼ, ga̱jma̱a̱ nambáyulúʼ asndu rí mbiʼi xúgi̱.

Omar: Atasngájmuʼ mbóo xkri̱da.

Bruno: Náa Biblia nambáyulúʼ xú káʼnii guʼni ga̱jma̱a̱ numuu mbújkha̱a̱, gajmiúlú bi̱ kuwa náa guʼwúlú mangiin bi̱ nambáxulúʼ gajmiúlú. Nindxu̱u̱ xóo mbóo mapa náa nasngájmulúʼ kamba̱a̱ rí itháan májánʼ. Mbá xkri̱da, rí mbiʼi xúgi̱ naʼni mingíjyúuʼ rí mbáa xa̱bu̱ maʼndoo kaʼñúún e̱ji̱i̱n o maʼndoo kaʼyoo a̱ʼgiu̱u̱, lá raʼkháa xúʼko̱ tayáá mangáán ráʼ.

Omar: Gajkhun nindxu̱u̱. A̱ʼgiu̱ʼ ga̱jma̱a̱ ikhúúnʼ niʼni mbá tsiguʼ rí nidamijnaxu ga̱jma̱a̱ naʼni mingíjyúuʼ mutamíjnaxu májánʼ.

Bruno: Náa Biblia na̱ʼkha̱ xtágabu dí nindxu̱u̱ jmbu ga̱jma̱a̱ nayambáá má xúʼko̱. Mbá xkri̱da, guʼyáá Efesios 5:28. Lá nandaʼ matraxnuu ráʼ.

Omar: Xúʼko̱, naʼthí: “Xúgi̱ káʼnii gíʼmaa muni, xa̱bekha gíʼmaa maʼndún kuñún má xúʼko̱ guʼñún xó má eñún kuyamijná ikhiin. Bi̱ nandoo kaʼyoo a̱ʼgiu̱u̱, nandoo kaʼyaminaʼ má ikhaa”.

Bruno: Núma̱aʼ. Lá ragájkhun rí á mu mbáa tátá gaʼnimbánuu xtágabu rígi̱ maxtáa májánʼ gajmíi̱n bi̱ kuwa náa goʼwóo xáʼ.

Omar: Mbáa xúʼko̱, mu itháan ra̱mingíjyúuʼ muʼthá ki xóo rí muʼnimbánii.

Bruno: Gajkhun má, nimbáa na̱nguá nindxu̱u̱ xa̱bu̱ jmbii. Náa capítulo rúʼko̱ na̱ʼkha̱ mbá versículo náa naʼthí rí gíʼmáanʼ manindxu̱lúʼ xa̱bu̱ bi̱ naniñaminaʼ maratha̱a̱n. * Náa xúgínʼ bi̱ nidamijná ndayóoʼ muni xó má rí kaʼyoo ga̱jma̱a̱ xúní rí nandún ikhiin. Ikhúúnʼ ga̱jmu̱ʼ a̱ʼgiu̱ʼ, nimbáyuxuʼ rí naʼthí náa Biblia.

Omar: Mbájmbu má xúʼko̱.

Bruno: Bi̱ nutaraʼa numuu Jeobá kuáʼdááxu mbá sitio náa Internet rí ma̱ndoo mambáñun bi̱ nidamijná ga̱jma̱a̱ bi̱ kuwa mbá guʼwíin. Nandoʼ masngajmáʼ mbá nguáthá minutos rí na̱ʼkha̱ náa Internet.

Omar: Májánʼ má, ma̱ndoo.

Bruno: Ináa nindxu̱u̱ jw.org/jw-tln... Rígi̱ nindxu̱u̱ timbá ináa.

Omar: Naniguʼ xtiʼkhu.

Bruno: Rígá mbá ináa náa Intenet rí nagumbiʼyuu “Mbaʼa i̱yi̱i̱ʼ”. Ikhí mataxkamaa revistas ga̱jma̱a̱ i̱ʼwáʼ i̱yi̱i̱ʼ ga̱jma̱a̱ mixtiʼkhu tema ma̱ngaa  rí mambáñun bi̱ kuwa mbá guʼwíin. Mbá xkri̱da, ikhí mataxkamaa folleto Ajngáa rí májánʼ na̱ʼkha̱ náa Dios. Náa mbá kíxnuu eʼthí: “Xú káʼnii gándoo makuwa gagi xa̱bu̱ bi̱ kuwa náa mbá guʼwíin rá.”

Omar: Ra̱ʼkhá tháán májánʼ tema rígi̱, nandoʼ mba̱yo̱o̱ xú káʼnii gaxtiʼña̱a̱.

Bruno: Náa kíxnuu rígi̱ na̱ʼkha̱ mbaʼa rí mambáyaʼ mu maraxtaa gagi náa guʼwáaʼ. Atayáá kutriga̱ rí kama náa agoo graxe̱ a̱jma̱. Lá nandaʼ matraxnuu a̱jma̱ oración rí námbóo ga̱jma̱a̱ ráʼ.

Omar: Xúʼko̱, naʼthí: “Xa̱bekha ga̱jma̱a̱ gu̱ʼu̱ bi̱ ninigu̱nʼ ndayóoʼ rí maʼndún kuyamijná ga̱jma̱a̱ mbuyamajkumijná nájmi̱i̱n. Xúgínʼ xa̱bu̱ bi̱ nunigu̱nʼ ni̱ndxu̱ún xa̱bu̱ aʼkhá, ikha jngó gíʼmaa rí majmañún muni mba̱a̱ a̱jkiu̱ún kuyamijná, mu xúʼko̱ ma̱ndoo makuwa gagi nájmi̱i̱n”. Mmm, xúʼko̱ má etha mangúún.

Bruno: Núma̱aʼ rí nitraxnuu. Gi̱i̱ na̱ʼkha̱ Efesios 5:33. Lá ma̱ndoo matraxnuu ráʼ.

Omar: Naʼthí: “Mú, mámbáa dí ikháanʼ, gaʼndoo kaʼyoo a̱ʼgiu̱u̱ xó má eyoo kaʼyaminaʼ ikhaa; xúʼko̱ má a̱ʼgu̱ gíʼmaa mbaʼyamajkuu wéñuʼ ajmbio̱o̱”.

Bruno: Lá natayáá rí nagájnuriyoʼ rí gíʼmaa maraxna mu ma̱ndoo matrígú ráʼ.

Omar: Na̱nguá ekroʼoʼ májánʼ.

Bruno: Lá ragájkhun rí xa̱biya̱ nandoo rí mbaʼyamajkhuu a̱ʼgiu̱u̱ xáʼ. Ma̱ngaa, lá ragájkhun rí a̱ʼgu̱ nandoo rí ajmbio̱o̱ maʼthúu̱n rí nandoo kaʼyoo xáʼ.

Omar: Xúʼko̱ má eku̱mu̱ʼ mangúún.

Bruno: Á mu xa̱biya̱ nda̱yáaʼ masngájma rí nandoo kaʼyoo a̱ʼgiu̱u̱, xánindxu̱u̱ mingíjyúuʼ rí a̱ʼgiu̱u̱ masngájma rí ndayamajkhuu ajmbio̱o̱.

Omar: Xúʼko̱ má etha mangúún.

Bruno: Maski ajndu texto rí na̱ʼkha̱ náa Biblia nigumaraʼmáʼ itháan maʼni 2,000 tsiguʼ, ma̱ndoo mambáñun wéñuʼ bi̱ nidamijná. Á mu ikhiin nuni rígi̱ mbuyáá rí nambáñun.

Omar: Na̱jkhánúʼ nda̱yo̱o̱ rí Biblia na̱ʼkha̱ itháan rí ikhúúnʼ na̱nguá nindxa̱ʼwa̱mínáʼ.

Bruno: Nadxuʼ rí natatsaʼwáminaʼ xúʼko̱. Nandoʼ matangaán mu mbuʼyáá xú káʼnii tayáá ikháánʼ graxe̱ ajtsú rí naʼthí: “Lá gíʼmaa matatsiʼñáanʼ a̱ʼgia̱ʼ o ajmbiaʼ á mu ikháánʼ na̱nguá xtaa gagi ráʼ.” Rí nakujmaa náa kíxnuu má rígi̱ náa Internet ndrígúxu̱.