Nigumún náa Székesfehérvár, mbá xuajin rí kaʼyoo Hungría, rí gíʼdoo itháan rí mbá míí tsiguʼ ga̱jma̱a̱ gíʼdoo mbaʼa historia. Mú xóó gíwanʼ a̱jkiu̱nʼ dí nirígá nda̱wa̱á rí nijngoo raga̱jma̱ Guerra náa xúgíʼ numbaaʼ.

Ndiju̱u̱n gajmíi̱nʼ xiʼñúʼ. Naku̱mu̱ʼ ka̱ñu̱u̱n wéñuʼ, itháan bi̱ xíñúʼ Elisabeth. Ikhaa niʼsngóoʼ manimbooʼ ka̱yo̱o̱ Dios. Asndu nákha ikhúúnʼ gúʼdoo ajtsú tsiguʼ niʼniguʼunʼ mani tsajkhun Padrenuestro ga̱jmu̱ʼ mámbá mbruʼun. Mú nikroʼoʼ rí eyoo gáʼthúu̱n tsajkhun rúʼko̱ asndu nákha itháán magúʼdoo 30 tsiguʼ.

Xíñuʼ niña̱wu̱nʼ nákha chíʼgiúnʼ, numuu rí anu̱ʼ ga̱jma̱a̱ ru̱dúʼ nuñajunʼ mbiʼíí mbruʼun numuu dí nuraxi̱i̱ mbújkha̱a̱ mu mutsi mbá guʼwá májánʼ. Mú, mámbá a̱jma̱ nuthu rí mbá gu̱nʼ, mbiʼi sábado nagimbáanʼxu mbá xúgiáanʼ bi̱ kuwáanʼ mbá guʼwáanʼ mu muphiʼtsuxu. Narmáʼáan wéñuʼ a̱jkiu̱nʼ rúʼko̱.

Tsiguʼ 1958, rí nindoo anu̱ʼ ga̱jma̱a̱ ru̱dúʼ ni̱jkha̱nú nirígá: Niʼngu̱u̱n nitsi mbá guʼwá. ¡Rí xúgi̱ ma̱ndoo maxtáá gajmíi̱nʼ! Nidxuʼ wéñuʼ, mú tájyúuʼ rúʼko̱, majun igu̱nʼ nda̱wa̱á anu̱ʼ nikháñu ga̱jma̱a̱ nandii cáncer.

Nigawúnʼ wéñuʼ. Narmáʼáan a̱jkiu̱nʼ rí ni̱thu̱u̱n Dios: “Nitakháñaʼ rí matanikríyaʼ anu̱ʼ. ¡Nandoʼ rí maxtáá ga̱jmu̱ʼ! Náa numuu rí na̱nguá nitadxaunʼ rá.” Ra̱ʼkhá tháán eyooʼ mba̱yo̱o̱ náa xtáa anu̱ʼ. Naraximínaʼ: Lá ni̱jkha̱a̱ mekhuíí, o nikháñu kámuu mbiʼi xáʼ. Nixíguʼ ka̱ñu̱u̱n e̱ji̱n bi̱ xóó guáʼdiin anu̱ún.

Mba̱yu̱ʼ tsiguʼ ni̱jkhá xúgíʼ mbiʼi náa nijnguáan anu̱ʼ. Nasmbátigoʼ náa nijnguáan ga̱jma̱a̱ natajkháan: “Dios atani péñu, nandoʼ mba̱yo̱o̱ náa xtáa anu̱ʼ”. Ma̱ngaa nindo̱ʼo̱o̱ rí mambáyuʼ makro̱ʼo̱ʼ náa numuu rí niʼniáanʼ.

 Índo̱ nigúʼdoo 13 tsiguʼ nitha manigajmaa ajngáa alemán numuu rí niku̱mu̱ʼ rí ikhí náa mbaʼa libro dí rígá náa ajngáaʼ rúʼko̱ gaxtiʼña̱a̱ rí naraximínaʼ. Tsiguʼ 1967 ni̱jkhá gánigajmaa náa xuajin Jena, rí kaʼyoo xuajin Alemania oriental. Niguámbóoʼ nigúxnuu xúgíʼ libro rí niniraʼmá filósofos náa ajngáaʼ rúʼko̱, itháan nigúxnuu náa naʼthí náa numuu rí xtáa xa̱bu̱. Mú maski ajndu nixkamaa mbaʼa rí gíʼdoo numuu, nimbá táriʼña̱a̱ rí naraximínaʼ. Nando̱ʼo̱o̱ má xúʼko̱ Dios rí mariʼña̱a̱ graxe̱ ndrígóʼ.

Tsiguʼ 1970 nitanga̱án náa xuajin Hungría ga̱jma̱a̱ ikhí niniʼníiʼ Rose, bi̱ maʼga̱nú mani̱ndxu̱u̱ a̱ʼgiu̱ʼ. Nákha ikhú Hungría gíʼdoo xkujndu, ikha jngó nda̱wa̱á rí nidamíjnaxu nigayúxu náa Austria. Ninduxu̱ʼ muʼguá Australia, náa Sydney, náa xtáa amuʼ.

Tájyúuʼ nikhánuʼ mbá ñajunʼ náa xuajin Austria. Mbóo mbiʼi, mbáa xa̱bu̱ bi̱ nañajunʼ ga̱jmu̱ʼ niʼthúunʼ rí náa Biblia nariʼña̱a̱ xúgíʼ graxe̱ rí gúʼdoo ga̱jma̱a̱ nixnúʼ a̱jma̱ libro rí naʼthí ga̱jma̱a̱ numuu. Mbá miʼtsú níguxnuu nájma̱ libro mú nindoʼ majmañuʼ itháan, ikha jngó ninirámáʼ mbá i̱yi̱i̱ʼ náa inún bi̱ nini libro rúʼko̱ náa bi̱ nutaraʼa numuu Jeobá, ga̱jma̱a̱ nindu̱ʼu̱u̱n i̱ʼwáʼ i̱yi̱i̱ʼ.

Mbiʼi rí nirámáʼ tsiguʼ rí nidamíjnaxu ni̱ʼkha̱ gáʼyuxuʼ mbáa dxámá bi̱ naʼtáraʼa. Ni̱ʼkha̱ kagu̱u̱ i̱yi̱i̱ʼ rí ninda̱ʼa̱ ga̱jma̱a̱ niʼthúunʼ á mu nandoʼ manigajmaa Biblia. Nacha̱ niriʼñuu rí nandoʼ manigajmaa. Ra̱ʼkhá tháán nindoʼ majmañuʼ, ikha jngó nusngóʼ a̱jma̱ nuthu rí mbá xmáná, ¡ga̱jma̱a̱ ndajyúxu a̱jkhu̱ hora mámbá miʼtsú.

Ra̱ʼkhá tháán edxu̱ʼ rí nusngóʼ ga̱jma̱a̱ numuu Biblia bi̱ nutaraʼa. Índo̱ nisngajmuʼ mbiʼyuu Dios náa Biblia ndrígóʼ ga̱jma̱a̱ ajngáa húngaro tándoo gánimbooʼ gánimboʼ. Ni̱jkhá 27 tsiguʼ náa misa ga̱jma̱a̱ nimbá miʼtsú tádxunʼ mbiʼyuu Jeobá. Niniguʼ wéñuʼ rí náa Biblia nariʼña̱a̱ kaʼwu ga̱jma̱a̱ naʼthí mbájmbu. Mbá rí nijmañuʼ rí xa̱bu̱ bi̱ nikháñun nánguá eyaa, asndu xóo kuwa runuʼ (Eclesiastés 9:5, 10; Juan 11:11-15). Ma̱ngaa ni̱jkha̱nú nijmañuʼ rí marigá mbá numbaaʼ nuxi̱ʼ náa “ní xákhañun itháan” xa̱bu̱ (Revelación [Apocalipsis] 21:3, 4). Rí xúgi̱ nda̱yo̱o̱ “dí maguaxu̱ún xa̱bu̱ bi̱ nikháñun” náa numbaaʼ nuxi̱ʼ ga̱jma̱a̱ ikhí mba̱yo̱o̱ mbu̱júu̱ anu̱ʼ (Hechos 24:15).

Rose nimbáyuʼ ga̱jma̱a̱ xúgíʼ a̱jkiu̱u̱n. Nacha̱ má nijmañuxu ga̱jma̱a̱ niguámbuxuʼ ninigajmaa i̱yi̱i̱ʼ káaʼ a̱jma̱ igu̱nʼ. Na̱jkuáxu̱ mámbá rí nagimbíi̱n xa̱bi̱i̱ Jeobá; ra̱ʼkhá tháán niniguxu̱ʼ rí nandún kuyamijná, májánʼ a̱jkiu̱ún ga̱jma̱a̱ rí kuwa mbá kambáxu̱u̱n (Juan 13:34, 35).

Nákha tsiguʼ 1976, nithuxu rí muʼguá náa Australia. Índo̱ niguánuxu, ndiʼñíinʼxu bi̱ nutaraʼa ga̱jma̱a̱ nindriguáanʼxu májánʼ. Tsiguʼ 1978 nini̱ndxu̱xu̱ʼ xa̱bu̱ bi̱ nutaraʼa numuu Jeobá.

Asndu ndiʼkhún nixtiʼñaʼ rí niraximínaʼ mba̱yu̱ʼ tsiguʼ. Ma̱ngaa nixkamaa Jeobá, anu̱lú bi̱ itháan májánʼ (Santiago 4:8). Rí xúgi̱ gúʼthu̱u̱n ma̱ʼkha̱a̱ anu̱ʼ náa ku̱ba̱ʼ mitsaan rí Dios nikudaminaʼ maxná (Juan 5:28, 29).

Nákha tsiguʼ 1989, nitangáanʼxu náa Hungría mu muthu̱u̱n a̱ngiu̱xu, bi̱ nambáxuxu gajmiúxu̱ ga̱jma̱a̱ iʼwíínʼ xa̱bu̱ ga̱jma̱a̱ numuu fe ndrígúxu̱. Raʼkhá tháán edxu̱xuʼ rí nisngúún mbaʼin wéñuʼ xa̱bu̱. Itháan rí 70 xa̱bu̱ niguánu ninindxu̱u̱n xa̱bi̱i̱ Jeobá, ma̱ngaa ru̱dúʼ bi̱ nandoʼ ka̱yo̱o̱ wéñuʼ.

Mbá 17 tsiguʼ nitakháñu Dios ga̱jma̱a̱ nindo̱ʼo̱o̱ mariʼña̱a̱ graxe̱ ndrígóʼ, ga̱jma̱a̱ ninújngoo mbá 39 tsiguʼ rí niriʼña̱a̱ má. Asndu mbiʼi xúgi̱ natakháñuu má xúʼko̱, mú rí xúgi̱ natha: “Núma̱aʼ Anu̱ʼ bi̱ xtaa mekhuíí, rí nitriʼña̱a̱ rí nitakháñaʼ nákha dxámá ni̱ndxu̱ʼ”.