Maski ajndu ñajunʼ rí xtaʼdáá ndayóoʼ matatsaʼwa̱a̱ wéñuʼ edxa̱ʼ o matiejunʼ gakhii, xagumaʼ rí “náa xúgíʼ ñajunʼ rí gakhi̱i̱ na̱jkha̱nú narígá rí májánʼ” (Proverbios 14:23). Ndiéjunʼ rí májánʼ rá. Rí nuñajunʼ nambáyulúʼ mu muguaʼdáá rí nda̱yúlúʼ. Gajkhun má rí Dios naʼthí maxnún rí nda̱ñúnʼ bi̱ nuni tsiakimijna muni ñajunʼ (Mateo 6:31, 32). Mú ikháanʼ ndayóoʼ muʼni rí kaʼyulúʼ ga̱jma̱a̱ muñajunʼ májánʼ (2 Tesalonicenses 3:10).

Atayáá ñajunʼ ndrígáʼ xóo mbá rí nandaʼ makánaʼ. Ñajunʼ rí kuaʼdáá nambáyulúʼ muʼnimbaníí rí kaʼyulúʼ muʼni. Josué, gíʼdoo 25 tsiguʼ, ikhaa naʼthí: “Rí matiejuminaʼ nindxu̱u̱ mbá rí májánʼ. Á mu naʼngaʼ naratsi xúgíʼ rí eyááʼ, nandoo gáʼthi rí ñajunʼ ndrígáʼ naʼni rí kaʼyoo”.

Ma̱ngaa rí matiejunʼ wéñuʼ naʼni dí maraʼdáá numaaʼ. Xú káʼnii rá. Mingíjyúuʼ rí matiejunʼ gakhii ga̱jma̱a̱ ma̱ndoo maʼskhaʼ, mu á mu nuxprigumíjná ga̱jma̱a̱ á mu nuʼni tsiakimijna, nadxuluʼ índo̱ nduʼyáá rí nixná rí itháan májánʼ; xúʼko̱ xundxaʼwáá edxu̱lúʼ muraʼwíí kamba̱a̱ rí itháan ragákhii (Proverbios 26:14). Ga̱jma̱a̱ rúʼko̱ naʼni rí maraxtaa tsímáá. Aaron, bi̱ niʼthá ga̱jma̱a̱ numuu náa timbá artículo niʼthí: “Mbáa asndu niʼni néʼngoʼ índo̱ niguámbá mbiʼi, o iʼwíínʼ túyáá kayuʼ  ñajunʼ rí nini; mú ikhúúnʼ nda̱yo̱o̱ rí niʼngo̱ʼ nini mbá rí nandoʼ ga̱jma̱a̱ naniguʼ rí xú káʼnii ku̱mu̱ʼ”.

Náa Biblia naʼni mba̱a̱ xa̱bu̱ bi̱ najmañuu naʼni ñajunʼ rí gíʼdoo ga̱jma̱a̱ a̱ʼgu̱ bi̱ nañajunʼ nacha̱ ga̱jma̱a̱ ñawúunʼ (Proverbios 22:29; 31:13). Mú xándoo majmañaaʼ matiejunʼ káaʼ mbá mbiʼíí, ga̱jma̱a̱ nimbáa xa̱bu̱ tsínigu̱ʼ maʼni rí tsijmañu maʼni. Mbáa ikha jngó mbaʼin tsínigu̱nʼ ñajunʼ rí guáʼdáá: Numuu rí tsenimi̱jna̱ majmañún májánʼ.

Mbáa xa̱bu̱ ma̱ndoo majmañuu manigu̱ʼ maʼni asndu xú káʼnii má ñajunʼ á mu nandxa̱ʼwáminaʼ májánʼ, xóo muʼthá, á mu najmañuu mañajunʼ májánʼ. William bi̱ gíʼdoo 23 tsiguʼ naʼthí: “Rí matani tsiakimínaʼ itháan ga̱jma̱a̱ ma̱ta̱ya̱a̱ rí nikánaʼ maʼni maraxtaa tsímáá. Xáku̱ma̱ʼ rúʼko̱ á mu tsítani tsiakimínáʼ”.

Xatatsaʼwamínáʼ i̱ndó nguáthá mbújkha̱a̱ gúninumaaʼ. Atraxi̱mínáʼ: “Ndíjkha rí gíʼdoo wéñuʼ numuu ñajunʼ ndrígóʼ rá. Ndiéjunʼ gárígá a mu nimbáa xáʼni o maguma raʼkhí ñajunʼ rá. Xú káʼnii embañun ñajunʼ rí nani rá.”

Graxe̱ rí naguma iwáá kayuʼ ma̱ndoo mambáyulúʼ rí manigulúʼ muñajunʼ. Ma̱ngaa Jesucristo niʼthí: “Ihua gagui xta tsi naxna raʼka xo ri majana” (Hechos 20:35). Ma̱ngaa bi̱ nambáñun ñajunʼ rí nuʼni, xóo xa̱bu̱ bi̱ nutsi o xa̱bu̱ bi̱ nutañajunlú, ma̱ngaa kúwi̱i̱n eʼwíínʼ bi̱ nambáñun: Bi̱ kuwa náa guʼwúlú ga̱jma̱a̱ bi̱ nda̱ñúnʼ itháan.

Bi̱ kuwa náa guʼwúlú. Índo̱ xa̱bu̱ bi̱ guáʼdiin e̱ji̱n nunimijna muxnún rí nda̱ñúnʼ bi̱ kuwa náa guʼwún. A̱jma̱ enii rí xóo numbañún. Timbá, nuxnún rí itháan nda̱ñúnʼ xóo ganitsu, xtíin ga̱jma̱a̱ guʼwá. Xúʼko̱ nunimbaníí ñajunʼ rí Dios naxnún rí muxnún rí nda̱ñúnʼ ‹bi̱ kuwa náa guʼwún› (1 Timoteo 5:8). Raga̱jma̱, nusngúún ga̱jma̱a̱ xkri̱da ndrígu̱ún rí gíʼmaa muñajunʼ májánʼ. Shane naʼthí: “Anu̱ʼ nañajunʼ májánʼ wéñuʼ: Ñajunʼ rí naʼni májánʼ nindxu̱u̱ ga̱jma̱a̱ nañajunʼ gakhii xúgíʼ mbiʼi, itháan niñajunʼ náa naʼtóo ixi̱. Náa ikhaa nijmañuʼ rí gíʼdoo numuu ñajunʼ rí nani ga̱jma̱a̱ ñawúunʼ, índo̱ nani mbá rí mambáñun xa̱bu̱.

Bi̱ itháan nda̱ñúnʼ. Apóstol Pablo niʼthún cristianos rí gíʼmaa ‹muñajunʼ wéñuʼ›. Náa numuu rá. ‹Mu xúʼko̱ ma̱ndoo muxnún itháan bi̱ ndañúnʼ› (Efesios 4:28). Á mu nuʼnimijna rí muxnún rí ndañúnʼ bi̱ kuwa náa guʼwúlúʼ, mbáa maʼngo̱o̱ mumbáñun bi̱ nda̱ñúnʼ (Proverbios 3:27). Xúʼko̱ kaʼnii, rí muñajunʼ wéñuʼ maʼni makuwáanʼ gagi numuu rí nuxnún eʼwíínʼ.

Náa discurso rí nixná náa Kúbá, Jesús niʼthún xa̱bi̱i̱ rí á mu mbáa bi̱ naʼtáñajunʼ naʼthúún rí magún gajmiún mbá milla rí aʼmbaʼ, gagun a̱jma̱ milla gajmiún (Mateo 5:41). Xú káʼnii gándoo  gatanimbaníí ajngáa rígi̱ rá. Xátani káaʼ chíʼgíʼ, atani itháan rí nunda̱ʼa̱ʼ. Atagíminaʼ matani itháan ñajunʼ: Atani itháan nacha̱ ga̱jma̱a̱ itháan májánʼ. Atagíʼ májánʼ edxa̱ʼ matani asndu ñajunʼ rí itháan ma̱jkha̱ʼ.

Á mu natani rúʼko̱, manigua̱ʼ matani ñajunʼ rí xtaʼdáá. Náa numuu rá. Numuu rí tsextumáán matani, natani numuu rí nanigua̱ʼ. Ikháánʼ ni̱ndxa̱ʼ bi̱ naraʼwíí rí maʼni raʼkháa imba̱a̱ (Filemón 14). Rúʼko̱ naʼni rí marmáʼáan a̱jkiu̱lú rí naʼthí náa proverbio: “Bi̱ nuñajunʼ nacha̱ ga̱jma̱a̱ ñawúunʼ ikhiin gutañajunʼ, bi̱ naskhúún ga̱jma̱a̱ ñawúunʼ muñajunʼ náa nuñajunʼ esclavo” (Proverbios 12:24). Gajkhun rí xaguáʼnu manindxu̱lúʼ xóo esclavos o ní má xúʼni̱ ñajunʼ gakhi̱i̱. Á mu tseʼni tsiekimijna makumulú xúgi̱ kaʼnii: Rí ni̱ndxu̱lú esclavos ndrígu̱ún eʼwíínʼ. “Ayuʼ a̱jma̱ milla” ga̱jma̱a̱ makumaʼ rí ikháánʼ má eratáñajuminaʼ.

Maski ajndu rí matiejunʼ májánʼ nindxu̱u̱ májánʼ wéñuʼ, garmáʼáan a̱jkia̱nʼ dí raʼkháa i̱ndó rúʼko̱ rígá matani (Proverbios 13:4). Ikha jngó xúxnáá wéñuʼ numuu náa ñajunʼ rí kuaʼdáá. Eclesiastés 4:6 naʼthí: “Itháan májánʼ mbá ñawáanʼ rí mbi̱ya̱a̱ xa̱ʼ ki xóo a̱jma̱ ñawáanʼ rí matiejunʼ gakhi̱i̱”. Ndiéjunʼ eʼsngúlúʼ rígi̱ rá. Mbáa xa̱bu̱ bi̱ nañajunʼ mbanda̱ʼkho tseʼyoo rí nakhánúu ga̱jma̱a̱ numuu ñajunʼ rí naʼni numuu rí ikhí nañajunʼ xúgíʼ mbiʼi ga̱jma̱a̱ najmuu xúgíʼ tsiakii ndrígóo. Eclesiastés naʼthí rí ndíí nindxu̱u̱ asndu xóo rí matraxkáá giñánʼ.

Biblia mambáyaʼ ma̱ta̱ya̱a̱ ñajunʼ rí xtaʼdáá xóo rí gíʼmaa. Gajkhun rí náa Biblia naxnulu xtágabu rí muñajunʼ gakhii, mu ma̱ngaa naʼni marmáʼáan a̱jkiu̱lú rí gíʼma mbuʼyáá rí “itháan gíʼdoo numuu” (Filipenses 1:10). Xú káʼnii nindxu̱u̱ tikhuu rá. Maraxtaa itháan gajmiáanʼ bi̱ kuwa náa guʼwáaʼ ga̱jma̱a̱ bi̱ nambáxa̱ʼ gajmiáanʼ. Mú itháan gíʼdoo numuu matani rí nandoo Dios xóo rí matraxnuu Biblia ga̱jma̱a̱ matatsaʼwa̱a̱ edxa̱ʼ rí nitraxnuu.

Xa̱bu̱ bi̱ nuñajunʼ xó má kaʼyoo, nuñajunʼ itháan gagi. William, bi̱ niʼthá ga̱jma̱a̱ numuu náa timbá artículo naʼthí: “Mbáa xa̱bu̱ náa nixtáá niñejunʼ nindxu̱u̱ mbá xkri̱da májánʼ rí xú káʼnii muñajunʼ xóo rí kaʼyoo. Nañajunʼ wéñuʼ ga̱jma̱a̱ kuwa gagi xa̱bu̱ bi̱ nutsi numuu rí májánʼ wéñuʼ eʼni ñajunʼ ndrígóo. Mú índo̱ naguámbá mbiʼi, naniñuʼ xúgíʼ ñajunʼ ga̱jma̱a̱ naxtáa gajmíi̱n bi̱ kuwa náa goʼwóo ga̱jma̱a̱ náa religión ndrígóo. Ga̱jma̱a̱ gajkhun rí tséniʼnííʼ nimbáa xa̱bu̱ bi̱ xtáa gagi wéñuʼ xóo ikhaa”.