1-3. Náa numuu rí mani̱ndxu̱u̱ mingíjyúuʼ mutaraʼa náa xúgíʼ tsu̱du̱u̱ Ku̱ba̱ʼ rá.

JESUCRISTO nikuʼmiin xa̱bi̱i̱ mu magún gúrataʼa ajngóo náa “xuguinʼ xabo”. Mu munimbaníí rí niʼtáñajunʼ, ikhiin ndiyóoʼ mutaraʼa náa xúgíʼ tsu̱du̱u̱ Ku̱ba̱ʼ (Mat. 24:14; 28:19). ¡Ra̱ʼkhá tháán mba̱a̱ ñajunʼ gánindxu̱u̱!

² Xa̱bi̱i̱ Jesús nindúún kuyáá wéñuʼ ga̱jma̱a̱ náa ajngáa rí nutaraʼa. Mú mbáa nikumún rí maʼni miʼskoo mutaraʼa náa xúgíʼ tsu̱du̱u̱ Ku̱ba̱ʼ. Náa numuu rá. Rígá mbaʼa numuu. Timbá, numuu rí ikhiin ninindxu̱u̱n nguéjmi̱i̱n. Raga̱jma̱, numuu rí ikhiin nisngáa rí Jesús ninindxu̱u̱ A̱ʼdióo Dios, mú xa̱bu̱ ndiyáá rí Jesús nikháñu. Ragajtsú, numuu rí mbaʼin xa̱bu̱ nithi rí xa̱bi̱i̱ Jesús na̱nguá nigún náa escuela (Hech. 4:13). Xa̱bu̱ ede̱ ninigajmaa náa escuela rí nigiʼdoo numuu, mu xa̱bi̱i̱ Jesús na̱nguá. Ma̱ngaa ajngáa rí nisngáa ninindxu̱u̱ mixtiʼkhu ki xóo costumbre ndrígu̱ún judíos. Costumbre rúʼko̱ rígá asndu nákha wajyúúʼ. Mbáa ikha jngó xa̱bi̱i̱ Jesús niraximijna: “Á mu xa̱bu̱ tseyamajkhulú, xú káʼnii gudxawunlu xá.

³ Rí maʼni a̱jkhu̱, xa̱bi̱i̱ Jesús nduyáá rí xa̱bu̱ mawiñunʼ kuñún, ga̱jma̱a̱ muxkúún, asndu muradíin, numuu rí Jesús niʼthún rí xúʼko̱  guguaʼnii (Luc. 21:16, 17). Rí maʼni witsu, ma̱ngaa nduyáá rí tikhun bi̱ kuwa náa guʼwún ga̱jma̱a̱ bi̱ nambáxu̱u̱n gajmiún muxnaxi̱i̱n. Rí maʼni majun, nduyáá rí tikhun xa̱bi̱i̱ Jesús musngáa rí minduwaʼ. Rí maʼni juwan, nduyáá rí gíʼmaa mutaraʼa náa xuajin rí migamíi wéñuʼ (Mat. 24:10-12). Índo̱ nindxa̱ʼwa̱míjna̱ ga̱jma̱a̱ numuu rígi̱ xa̱bi̱i̱ Jesús nuraximijna xú káʼnii gándoo gutaraʼa “asndu náa guambari̱go̱o̱ ku̱ba̱ʼ” (Hech. 1:8).

4. Ndiéjunʼ nirígá índo̱ xa̱bi̱i̱ Jesús nitaraʼa rá.

⁴ Xa̱bi̱i̱ Jesús ndiyáá rí maʼni mingíjyúuʼ mutaraʼa náa xúgíʼ tsu̱du̱u̱ Ku̱ba̱ʼ. Mú ninimbu̱ún ga̱jma̱a̱ nitaraʼa náa xuajin Jerusalén, Samaria ga̱jma̱a̱ náa i̱ʼwáʼ xuajin. Ndiéjunʼ nirígá rá. Nda̱wa̱á rí niʼni 30 tsiguʼ, nitaraʼa náa mbaʼa xuajen mba̱ʼu̱ rí asndu Pablo niʼthí rí nitaraʼa má ajngáa “naʼ xoguiʼ inu numbaʼ”. Ga̱jma̱a̱ mbaʼin xa̱bu̱ nigún ki̱dxu̱ʼ Cristo (Col. 1:6, 23). Muʼgíiʼ mbá xkri̱da, gundxaʼwamíjna̱ rí nigíʼnuu Pablo ga̱jma̱a̱ rí niʼni náa Chipre (atraxnuu Hechos 13:6-11). Náa Biblia naʼthí: “Índo̱ procónsul [o gobernador bi̱ xtáa náa Roma, Sergio Paulo], ndiʼyoo dí nirígá, niʼnimbo̱o̱, numuu rí niguanúu tsiánguá ga̱jma̱a̱ kiʼsngáa ndrígóo Jeobá” (Hechos 13:12, TNM).

5. a) Ndiéjunʼ niʼthún Jesús xa̱bi̱i̱ ndrígóo rá. b) Ndiéjunʼ eʼthí mbá libro ga̱jma̱a̱ numuu siglo timbá rá.

⁵ Xa̱bi̱i̱ Jesús ndiyáá rí xáʼngu̱u̱n gúni ndajkuíin ñajunʼ rígi̱ náa xúgíʼ tsu̱du̱u̱ Ku̱ba̱ʼ. Mú ma̱ngaa ndiyáá rí Jesús niʼthí rí maxtáa gajmíi̱n ga̱jma̱a̱ rí Dios mambáñún ga̱jma̱a̱ xi̱ʼ kaʼwu ndrígóo (Mat. 28:20). Lá nirígá i̱ʼwáʼ rí nimbáñun xáʼ. Mbáa xúʼko̱. Mbá libro naʼthí rí nákha timbá siglo ninindxu̱u̱ mbá mbiʼi májánʼ mu mugi̱ʼdi̱i̱ mutaraʼa cristianos. Ma̱ngaa naʼthí rí cristianos nindxa̱ʼwa̱míjna̱ rí Dios niríyaʼ awan mu mambáñun nákha siglo timbá.

6. a) Ndiéjunʼ gúʼyáá náa artículo rígi̱ rá. b) Ndiéjunʼ gúʼyáá náa imbo̱o̱ artículo rá.

⁶ Lá gajkhun rí Jeobá niríyaʼ awan nákha siglo timbá mu ma̱ndoo mutaraʼa cristianos ráʼ. Tséʼyáá, numuu rí naa Biblia tséʼthi. Mú nduʼyáá rí Jeobá nindoo rí xa̱bi̱i̱ mutaraʼa. Mú ma̱ngaa nduʼyáá rí Satanás táʼngo̱o̱ gárikhun. Náa artículo rígi̱ gúʼyáá tikhu rí nimbáñun xa̱bi̱i̱ Jesús mu mutaraʼa nákha siglo timbá. Ga̱jma̱a̱ náa imbo̱o̱ artículo mbuʼyáá rí nambáyulúʼ rí mbiʼi xúgi̱ mu muʼtáraʼa náa xúgíʼ numbaaʼ.

7. a) Xú káʼnii ninindxu̱u̱ tsímáá dí nirígá náa Roma rá. b) Ndíjkha rí ninindxu̱u̱ kiejunʼ nákha ikhú rá.

⁷ Timbá rí nimbáñun xa̱bi̱i̱ Jesús nindxu̱u̱ tsímáá rí nirígá náa Roma. Nákha siglo timbá, romanos kuwa rutañajunʼ náa mbaʼa xuajin. Índo̱ ikhiin kuwa rutañajunʼ, nirígá tsímáá rí nigumbiʼyuu tsímáá dí nirígá náa Roma. Ikhú Xa̱bu̱ Ñajunʼ tséniñuʼ rí xa̱bu̱ muxmijná. Mú nirígá tikhuu guerra ma̱jkha̱ʼ xó má niʼtáriyaʼ Jesús (Mat. 24:6). Mbá xkri̱da, romanos nini gámbáa Jerusalén nákha tsiguʼ 70. Ma̱ngaa nirígá tikhu guerra náa ndawaa gajmiún i̱ʼwáʼ xuajen mba̱ʼu̱. Mú mbaʼin xa̱bu̱ kuwa tsímáá. Rígi̱ ndijyúuʼ mbá 200 tsiguʼ. Mbá libro naʼthí rí nimbá nuthu takuwa tsímáá xa̱bu̱ mba̱yu̱ʼ tsiguʼ xóo ikhú. Ga̱jma̱a̱ numuu tsímáá rí nirígá náa Roma, xa̱bi̱i̱ Jesús nindoo nigún i̱mba̱ níʼkhá ga̱jma̱a̱ táʼniuu mingíjyúuʼ mutaraʼa.

8. Xú káʼnii nimbáñuun cristianos dí nirígá tsímáá náa Roma rá.

⁸ Mbá 250 tsiguʼ nda̱wa̱á rí nixtáa Cristo, mbáa xa̱bu̱ bi̱ nagumbiʼyuu Orígenes niʼthí  xú káʼnii tsímáá rí nirígá náa Roma nimbáñun xa̱bi̱i̱ Jesús. Numuu rí romanos nini makuwá tsímáá náa mbaʼa xuajin mba̱ʼu̱, xa̱bi̱i̱ Jesús nindoo nigún gutaraʼa náa xúgíʼ xuajin rúʼko̱ ga̱jma̱a̱ táʼniun mingíjyúuʼ magún. Xa̱bu̱ na̱nguá kuwa ruxmijná náa guerras, i̱ndó kuwa tsímáá náa guʼwún. Orígenes má naʼthí dí rúʼko̱ nimbáñun xa̱bu̱ mu mudxawíín ajngáa rí tsímáá ga̱jma̱a̱ rí discípulos nandún kuñún. Maski ajndu nguáná nixkúún, rí tsímáá dí nirígá náa Roma, nimbáñun xa̱bi̱i̱ Jesús mu mutaraʼa náa xúgíʼ xuajin (atraxnuu Romanos 12:18-21).

9, 10. Náa numuu rí xa̱bi̱i̱ Jesús táʼniun miʼskhoo magún náa xúgíʼ xuajen rá.

⁹ Imbo̱o̱ rí nimbáñun xa̱bi̱i̱ Jesús mu mutaraʼa, numuu rí ikhú táʼniun mingíjyúuʼ magún i̱mba̱ níʼkhá. Romanos nini itháan rí 80,000 kilómetros (50,000 millas) kamba̱a̱. Soldados bi̱ kuwa náa Roma nijmún kamba̱a̱ rígi̱ mu magún nacha̱ guñewa̱a̱n mbañúnʼ ga̱jma̱a̱ muxprigún xa̱bu̱. Cristianos nagún ikhí mu magún náa tapo̱o̱ xaná, náa ku̱ba̱ʼ gíná ga̱jma̱a̱ náa kúbá índo̱ nagún gutaraʼa.

¹⁰ Mú romanos raʼkháa i̱ndó nagún náa kamba̱a̱, ma̱ngaa nagún náa lamáa ga̱jma̱a̱ náa mañu. Niguaʼdáá mbaʼa náa naguáʼnu barco ga̱jma̱a̱ itháan rí 900 ruta. Ma̱ngaa cristianos nijmún barcos mu magún náa xúgíʼ xuajen rí kaʼyoo Roma. Ga̱jma̱a̱, na̱nguá ndiyóoʼ pasaporte o i̱ʼwáʼ i̱yi̱i̱ʼ mu magún i̱ʼwáʼ xuajin. Rí magún náa kamba̱a̱ ga̱jma̱a̱ náa lamáa na̱nguá migamíi. Náa kamba̱a̱ kuwa mbá nguéjmi̱i̱n bi̱ nuni kuʼwáʼ, numuu rí nduyáá rí soldados bi̱ kuwa náa Roma nuxnún castigo rí gakhi̱i̱ wéñuʼ. Ga̱jma̱a̱ náa lamáa nirígá mbaʼa barcos ndrígu̱ún soldados romanos, ikha jngó xa̱bu̱ tsimiñun rí piratas muni gíníi. Náa Biblia naʼthí rí Pablo nimínuʼ náa lamáa ga̱jma̱a̱ ni̱jkha̱ náa barco rí nijngún náa iyaʼ, mu tséʼthi rí nini gínáa piratas (2 Cor. 11:25, 26).

11. Ndíjkha rí cristianos nijmún ajngáa griego rá.

¹¹ Mbaʼa xuajin rí naʼtáñajunʼ Roma nákha ginii nitañajunʼ griegos. Ikha jngó náa xuajin rúʼko̱ nuthi ajngáa griego. Ikha numuu rúʼko̱ rí xa̱bi̱i̱ Jesús nindoo nitaruʼun xa̱bu̱ ga̱jma̱a̱ ajngáa griego rí nuthi xúgínʼ xa̱bu̱. Ma̱ngaa nandoo nuthi rí naʼthí náa Escrituras Hebreas, numuu rí nirígá mbá rí nitajuíi rí nijmaʼnuʼ wéñuʼ náa ajngáa griego. Judiós bi̱ nikuwa náa Egipto nitajuíi rígi̱ ga̱jma̱a̱ nigumbiʼyuu Septuaginta. Ma̱ngaa, xúgíʼ Biblia nigumaraʼmáʼ náa ajngáa griego. Ajngáa rígi̱ itháan májánʼ mu maʼthí rí naʼsngáa náa Biblia, numuu rí gíʼdoo mbaʼa ajngáa. Ma̱ngaa nimbáñun cristianos bi̱ kuwa náa i̱ʼwáʼ xuajin mba̱ʼu̱ mutamijná ga̱jma̱a̱ makuwá mbá kambáxu̱u̱n.

12. a) Ndiéjunʼ ninindxu̱u̱ códice rá. b) Náa numuu rí códice ninindxu̱u̱ itháan májánʼ ki xóo rollo rá. c) Nguáná nigi̱ʼdi̱i̱ nijmún códice mbaʼin cristianos rá.

¹² Ndiéjunʼ nijmún timbíin cristianos mu mutaraʼa rá. Nákha ginii nijmún rollos. Mú rollos niʼniún mingíjyúuʼ majmúún ga̱jma̱a̱ majngruigu̱u̱n kudún. Índo̱ mbáa nandoo maguxnuu gíʼdoo murmbaʼtáá ga̱jma̱a̱ mumbuxi̱i̱ mbu̱júu̱. Ga̱jma̱a̱ káaʼ mbóó níjniúu kiʼniraʼmáʼ. ¡I̱ndó i̱yi̱i̱ʼ ndrígóo Mateo na̱ʼkha̱ náa mbá rollo kañiʼ! Nda̱wa̱á xa̱bu̱ nigi̱ʼdi̱i̱ nijmún códice rí nambrigui ga̱jma̱a̱ libro. Códice ní ra̱mingíjyúuʼ majmúún, numuu rí i̱ndó ndayóoʼ mbayáaʼ ináa mu maxkamaa rí nandoo maguxnuu. Xa̱bu̱ bi̱ nduyáá  nuthi rí niʼni mbá 100 tsiguʼ nda̱wa̱á rí nixtáa Cristo rí mbaʼin cristianos nijmún códice.

13, 14. a) Xú káʼnii nimbáyúu Pablo rí ikhaa ninindxu̱u̱ xa̱bu̱ romano rá. b) Xú káʼnii nimbáñun cristianos xtángoo ndrígóo Roma rá.

¹³ Imbo̱o̱ rí nimbáñun mutaraʼa xa̱bi̱i̱ Jesús ninindxu̱u̱ xtángoo dí rígá náa Roma. Mbá xkri̱da, Pablo ninindxu̱u̱ romano. Rúʼko̱ niña̱wu̱u̱n mbaʼa nuthu índo̱ ni̱jkha̱ i̱ʼwáʼ xuajin. Mbá miʼtsú soldados romanos nirajtun náa xuajin Jerusalén ga̱jma̱a̱ nigíʼ muxpajtii. Mú ikhaa niʼthún rí nindxu̱u̱ mbáa xa̱bu̱ romano ga̱jma̱a̱ náa xtángoo naʼthí rí ginii gíʼmaa mbuyáá káʼnii niʼni ga̱jma̱a̱ nda̱wa̱á guthi káʼnii gagiʼnuu. Ikhú soldados niniñaʼ. Náa Biblia ma̱ngaa naʼthí rí bi̱ naʼtáñajúúnʼ soldados nimiñuu wéñuʼ índo̱ ndiʼyoo rí niruʼwóo mbáa xa̱bu̱ romano (Hech. 22:25-29).

¹⁴ Náa xuajen Filipos, Pablo túni gínáa numuu rí ninindxu̱u̱ xa̱bu̱ romano (Hech. 16:35-40). Náa xuajin Éfeso, mbá grupo xa̱bu̱ bi̱ nakiʼníin wéñuʼ nindúún muxnún tikhun cristianos. Mú Túngaa niʼni wíyúu rawúúnʼ ga̱jma̱a̱ niʼthún rí na̱nguá enimbaníí xtángoo ndrígóo Roma (Hech. 19:35-41). Ga̱jma̱a̱ náa xuajin Cesarea, Pablo ninda̱ʼa̱ rí magún ku̱ya̱a̱ náa Roma mu maʼtímijná ga̱jma̱a̱ Xa̱bu̱ Ñajunʼ bi̱ itháan gíʼdoo numuu ma̱ngaa maʼthí ga̱jma̱a̱ numuu ajngáa rí naʼtáraʼa (Hech. 25:8-12). Xó má eʼyáá rí cristianos nijmún xtángoo ndrígóo Roma mu muñambámi̱jna̱ ga̱jma̱a̱ muniñunʼ mutaraʼa (Filip. 1:7).

15. Náa nikuwa xa̱bu̱ judíos nákha siglo timbá rá.

¹⁵ Guʼyáá imbo̱o̱ rí nimbáñun xa̱bi̱i̱ Jesús mutaraʼa náa xúgíʼ tsu̱du̱u̱ Ku̱ba̱ʼ. Nákha siglo timbá judíos nikuwa náa mbaʼa xuajin mba̱ʼu̱, raʼkháa i̱ndó náa xuajin Israel. Náa numuu rá. Nákha ginii, judíos nirajtun ga̱jma̱a̱ nigún kudiin náa Asiria. Tsiguʼ nda̱wa̱á iʼwíínʼ judíos nigún kudiin Babilonia. Ikha jngó índo̱ persas kuwa rutañajunʼ náa Babilonia, nikuwa mbaʼin judíos náa xuajin rí nutañajunʼ persas (Est. 9:30). Índo̱ Jesús nixtáa náa tsu̱du̱u̱ Ku̱ba̱ʼ, náa xuajin rí kaʼyoo Roma nikuwa mbá 60 millón xa̱bu̱. Náa xúgínʼ xa̱bu̱ nakumún rí itháan rí a̱jkhu̱ millón xa̱bu̱ ninindxu̱ún judíos. Nikuwa náa naʼtáñajunʼ Egipto ga̱jma̱a̱ náa norte ndrígóo África, asndu náa Asia Menor (Turquía), Grecia ga̱jma̱a̱ Mesopotamia (Irak). Xóo eʼyáá, judíos nikuwa náa mbaʼa xuajin mba̱ʼu̱. Maski ajndu xúʼko̱, tsíniñaʼ religión ndrígu̱ún (Mat. 23:15).

16, 17. a) Náa numuu ninindxu̱u̱ májánʼ rí nikuwa judíos náa mbaʼa xuajin mba̱ʼu̱ rá. b) Ndiéjunʼ nini cristianos xó má nini xa̱bu̱ judíos rá.

¹⁶ Náa numuu rí ninindxu̱u̱ májánʼ rí nikuwa  judíos náa mbaʼa xuajin mba̱ʼu̱ rá. Ga̱jma̱a̱ numuu rúʼko̱ mbaʼin bi̱ na̱nguá nindxu̱ún judíos niniʼnuʼ Escrituras Hebreas ga̱jma̱a̱ tikhun rí enimbu̱ún judíos. Mbá xkri̱da, nidxawíín rí xtáa mbáwíi Dios gajkhun ga̱jma̱a̱ rí xa̱bi̱i̱ gíʼmaa makuwa xóo eʼthí xtángoo. Ma̱ngaa nidxawíín rí náa Escrituras Hebreas na̱ʼkha̱ náa Dios ga̱jma̱a̱ na̱ʼkha̱ mbaʼa rí kiʼtáriyaʼ numuu Mesías (Luc. 24:44). Ga̱jma̱a̱ numuu rígi̱, índo̱ cristianos nigi̱ʼdi̱i̱ nitaruʼun, judíos ga̱jma̱a̱ bi̱ raʼkhíin judíos, xúʼko̱ niniʼnuʼ tikhu kiʼsngáa ndrígu̱ún cristianos. Ga̱jma̱a̱ cristianos nimbáñun rígi̱. Mbá xkri̱da, Pablo niguʼun maʼga̱ náa egimbu̱ún judíos ga̱jma̱a̱ najmuu Escrituras mu maʼtáruʼun (atraxnuu Hechos 17:1, 2).

¹⁷ Cristianos nini mbaʼa rí nuni xa̱bu̱ judíos. Mbá xkri̱da, nagimbúu̱n mu mbuyamajkuíí Dios náa guʼwá nagimbíin ga̱jma̱a̱ náa paʼta tiga. Ikhí nuni ajmúú, nutajkháan ga̱jma̱a̱ nunigajmaa Escrituras. Rí mbiʼi xúgi̱ xa̱bi̱i̱ Dios nuʼni xúʼko̱ kaʼnii.

18, 19. a) Ga̱jma̱a̱ numuu rí nirígá nákha siglo timbá, ndiéjunʼ nindoo nini cristianos rá. b) Nda̱wa̱á rí niguámbulú ndiʼyáá náa artículo rígi̱, káʼnii tatsaʼwáminaʼ ga̱jma̱a̱ numuu Jeobá rá.

¹⁸ Náa artículo rígi̱ ndiʼyáá rí nákha siglo timbá ninindxu̱u̱ kiejunʼ. Timbá, xuajin náa naʼtáñajunʼ Roma nirígá rí tsímáá. Raga̱jma̱, mbaʼin xa̱bu̱ nithi mbóó ajngáa. Ragajtsú, nirígá xtángoo rí niñewu̱u̱n xuajin. Ga̱jma̱a̱ rí maʼni a̱jkhu̱, rí táʼniun mingíjyúuʼ magún i̱ʼwáʼ xuajin. Rí maʼni witsu, mbaʼin xa̱bu̱ bi̱ naguwáʼ i̱mba̱ níʼkhá niniʼnuʼ judíos ga̱jma̱a̱ Escrituras Hebreas. Ga̱jma̱a̱ numuu xúgíʼ rígi̱, cristianos nindoo nitaraʼa má xúʼko̱.

¹⁹ Mbá 400 tsiguʼ nákha xóó tséʼkha̱ Cristo, mbáa filósofo griego niʼthí rí mingíjyúuʼ nindxu̱u̱ rí majmaʼniʼ bi̱ Niʼniáanʼ, ga̱jma̱a̱ rí maʼni mingíjyúuʼ muʼthúún xúgínʼ xa̱bu̱ ga̱jma̱a̱ numuu. Mú, Jesús niʼthí: “Ri niguana maxaxo muni xabo, indo-ma Dios tsi maʼngo maʼne” (Luc. 18:27). Nakujmaa májánʼ rí Jeobá embáñun cristianos mutaraʼa. Ikhaa nandoo rí xúgínʼ xa̱bu̱ bi̱ kuwa náa xúgíʼ tsu̱du̱u̱ Ku̱ba̱ʼ muniʼniiʼ ga̱jma̱a̱ mudxawíín ajngóo (Mat. 28:19). Ga̱jma̱a̱ rí mbiʼi xúgi̱, xú káʼnii etaraʼa náa xúgíʼ tsu̱du̱u̱ Ku̱ba̱ʼ rá. Guʼyáá rígi̱ náa imbo̱o̱ artículo.