Xámiñulu ga̱jma̱a̱ gundxaʼwáá májánʼ edxu̱lúʼ xó má Jesús
“Maski ajndu ikháanʼ nimbá miʼtsú túya̱a̱, nandala ku̱ya̱a̱ wéñuʼ. Maski ajndu xúgi̱ tséya̱a̱.” (1 PEDRO 1:8)
1, 2. a) Ndiéjunʼ gíʼmaa muʼni á mu nandulúʼ makuwáanʼ kámuu mbiʼi rá. b) Ndiéjunʼ gambáyuluʼ mu muguajún jmbu asndu índo̱ gártumuu mbiʼi rá.
RÍ MANINDXA̱ʼ mbáa xa̱bi̱i̱ Jeobá nindxu̱u̱ xóo rí matagíʼdi̱i̱ mi̱dxu̱ʼ náa mbá kámbá. Náa maʼga̱ kañán maraxtaa kámuu mbiʼi. Jesús niʼthí: “Tsi maʼngo maʼnegakeminaʼ asjndo naʼ mariguo, tsuʼkue tsi majriyaʼ” (Mat. 24:13). Ndiéjunʼ gíʼmaa muʼni á mu nandulúʼ makáwáanʼ kámuu mbiʼi rá. Ndayóoʼ manindxu̱lúʼ xa̱bu̱ jmbii asndu índo̱ gakháñulu o asndu índo̱ gámbá numbaaʼ rígi̱. Mú rígá rí ma̱ndoo maʼnijngáanʼ mu xánindxu̱lú xa̱bu̱ jmbii (1 Juan 2:15-17). Ndiéjunʼ gambáyuluʼ mu muguajún jmbu asndu índo̱ gártumuu mbiʼi rá.
2 Ndayóoʼ mbuʼyaridáá xkri̱da ndrígóo Jesús. Náa Biblia naʼsngúlúʼ xú káʼnii ninindxu̱u̱ Jesús. Á mu nuʼnigajmaa Biblia ga̱jma̱a̱ numuu ikhaa, maʼndulú kuʼyáá ma̱ngaa maguaʼdáá fe náa ikhaa (atraxnuu 1 Pedro 1:8, 9). Apóstol Pedro niʼthí rí mbuʼyaridáá májánʼ wéñuʼ xkridoo Jesús (1 Ped. 2:21). Á mu nuʼni, maguajún jmbu asndu índo̱ gártumuu mbiʼi. * Náa artículo rí niʼnigajmaa̱ ginii ndiʼyáá xú káʼnii ganindxu̱lú xa̱bu̱ gua̱ba̱ʼ ga̱jma̱a̱ rí magáwiinʼ a̱jkiu̱lú xó má Jesús. Náa artículo rígi̱ mbuʼyáá xú káʼnii gándoo muʼni mu xámiñulu ga̱jma̱a̱ rí muraʼwíí muʼni rí májánʼ xóo ikhaa.
JESÚS TÁMIÑUU
3. a) Ndiéjunʼ eyoo gáʼthúu̱n rí xámiñaʼ rá. b) Ndiéjunʼ gambáyuluʼ mu xámiñulu rá.
3 Rí xámiñaʼ nandoo gáʼthúu̱n rí maʼngaaʼ índo̱ gáraʼdáá xkujndu. Ma̱ngaa nandoo gáʼthúu̱n rí matani má xúʼko̱ rí májánʼ, matani rí gíʼmaa ga̱jma̱a̱ manindxu̱lúʼ xa̱bu̱ jmbii náa Dios índo̱ gúraʼní xkujndu. Numuu rí tsémiñulu ga̱jma̱a̱ tsíyulú muʼni rí tséniguʼ Dios, tseʼniñámi̱jna̱ rí gamíi rí kuaʼdáá náa inún eʼwíínʼ maʼni gacháanʼ (1 Sam. 11:7; Pro. 29:25). Á mu tsémiñulu ga̱jma̱a̱ nduʼyáá rí gajkhun ni̱ndxu̱u̱ rí gáʼni Jeobá nda̱wa̱á, rúʼko̱ gáʼnii maʼngulú muraʼníí xkujndu (Sal. 27:14). Ga̱jma̱a̱ á mu tsémiñulu ma̱ngaa á mu nandulúʼ kuʼñúún iʼwíínʼ, mumbáñunlú maski asndu ikháanʼ gamíi makhañúlúʼ (Juan 15:13). Ndiéjunʼ gambáyuluʼ mu xámiñulu rá. Rí makumulúʼ kuʼyáá Jeobá ga̱jma̱a̱ rí mbuʼyaridáá xkri̱da ndrígóo Jesús (Sal. 28:7).
4. Xú káʼnii támiñuu Jesús índo̱ nixtáa náa temblo rá. (Atayáá timbá xtiʼkhu.)
4 Mbá mbiʼi, Jesús támiñuu índo̱ nixtáa ‹náa templo, ikhí gíiʼ náa majñúnʼ xa̱bu̱ ede̱ bi̱ nusngáa› (atraxnuu Lucas 2:41-47). Ikhaa gíʼdoo mbá 12 tsiguʼ, ga̱jma̱a̱ xa̱bu̱ bi̱ nusngáa nduyáá wéñuʼ ga̱jma̱a̱ numuu xtángoo ndrígóo Moisés. Ma̱ngaa ga̱jma̱a̱ numuu costumbre ndrígu̱ún judíos, rígi̱ naʼni mingíjyúuʼ munimbu̱ún kuyáá xtángoo. Mú Jesús támiñuu kaʼñúún xa̱bu̱ ede̱ bi̱ nusngáa. Ikha jngó niʼniún mbaʼa graxe̱. Mú tánindxu̱u̱ graxe̱ rí maʼni asndu tsáa ada̱a̱. Ninindxu̱u̱ graxe̱ rí niʼni mundxaʼwamíjna̱ ga̱jma̱a̱ rí mugíʼ edxu̱ún. Mbáa asndu xa̱bu̱ bi̱ nusngáa nini graxe̱ rí maʼni mugi̱ʼdu̱u̱n, mu táʼngu̱u̱n gúní rí nandún. Bi̱ nidxawíín rí niʼthí Jesús, asndu xa̱bu̱ bi̱ nusngáa, niguanún tsiánguá numuu rí ndaʼyoo wéñuʼ ga̱jma̱a̱ rí niʼthí. Jesús támiñuu ga̱jma̱a̱ niʼthí rí gajkhun.
5. Xú káʼnii nisngájma Jesús rí támiñuu índo̱ niʼtáráʼa rá.
5 Jesús támiñuu índo̱ niʼtáráʼa ga̱jma̱a̱ nisngájma mbaʼa enii rígi̱. Mbá xkri̱da, támiñuu índo̱ niʼthún iʼwíínʼ rí xa̱bu̱ ede̱ kuwa runi nduwiinʼ (Mat. 23:13-36). Jesús taniñaminaʼ rí xa̱bu̱ numbaaʼ muni̱i̱ rí xáʼnimbo̱o̱ kaʼyoo Dios (Juan 16:33). Niʼtáráʼa má xúʼko̱ maski asndu nigíʼ murikháá (Juan 5:15-18; 7:14). Ma̱ngaa, nixkawíin a̱jma̱ nuthu bi̱ kuwa ragujua náa templo bi̱ nandún makhánun wéñuʼ mbújkha̱a̱ (Mat. 21:12, 13; Juan 2:14-17).
Índo̱ niraxi̱i̱, Jesús támiñuu ga̱jma̱a̱ niʼthí rí ikhaa nindxu̱u̱ Cristo ma̱ngaa A̱ʼdióo Dios
6. Xú káʼnii rí támiñuu Jesús índo̱ nitumuu mbiʼi rí makhañúu náa tsu̱du̱u̱ Ku̱ba̱ʼ rá.
6 Guʼyáá xú káʼnii támiñuu Jesús índo̱ nitumuu mbiʼi rí makhañún náa tsu̱du̱u̱ Ku̱ba̱ʼ. Ikhaa ndiʼyoo ndiéjunʼ gágíʼnuu índo̱ Judas gaxnáxi̱i̱. Maski asndu xúʼko̱ ikhaa niʼthúu̱n: “Rí mitani, atani-ma nacha” (Juan 13:21-27). Índo̱ soldados nigún murugua̱a̱, Jesús tarkaʼo minaʼ. Maski ajndu muxiyáa, nixnáximinaʼ ga̱jma̱a̱ niʼthún soldados rí muniñuʼ magúun discípulos ndrígóo (Juan 18:1-8). Índo̱ niraxi̱i̱ náa Guʼwá Ñajunʼ rí itháan gíʼdoo numuu náa xa̱bu̱ judíos, Jesús támiñuu ga̱jma̱a̱ niʼthí rí ikhaa nindxu̱u̱ Cristo ma̱ngaa A̱ʼdióo Dios. Ndxajkun bi̱ phú kayá edxu̱u̱ xtáa rayaʼ mbá numuu mu maxíyáa, mú Jesús na̱nguá nimiñuu (Mar. 14:60-65). Ikhaa niwi̱ji̱ jmbu asndu índo̱ nixiyáa. Ikha jngó, índo̱ inu muxiyáa niʼthí: “Xoguiʼ-ma nembanu-ra.” (Juan 19:28-30.)
XAMIÑULÚ XÓ MÁ JESÚS
7. a) Dxámá, wáxá, xú káʼnii ku̱ma̱ʼ rí ni̱ndxa̱ʼ mbáa xa̱bi̱i̱ Jeobá rá. b) Xú káʼnii gándoo matasnga̱jmá rí tsímiñaʼ rá.
7 Xú kaʼnii gándoo rí jiáma xámiñun xó má Jesús índo̱ nagúun náa escuela rá. Mbaʼin jiáma ga̱jma̱a̱ wa̱ʼxa̱ʼ nutún bi̱ nambáxu̱u̱n gajmiún ma̱ngaa náa maestros rí ni̱ndxu̱ún Testigos. Á mu ni̱ndxa̱ʼ mbáa dxámá, ma̱ndoo matasnga̱jmá rí tsimiñaʼ índo̱ gárata rí ni̱ndxa̱ʼ Testigo maski asndu náa escuela mutsijmáán. Xúʼko̱ gatasngajmá rí nanigua̱ʼ manindxa̱ʼ xa̱bi̱i̱ Jeobá (atraxnuu Salmo 86:12). Mbáa asndu tikhun maestros maʼndún rí matanimbaaʼ náa evolución. Mú ma̱ndoo ma̱ta̱ya̱a̱ rí Biblia naʼthí má xúʼko̱ rí gajkhun. Á mu mbáa naraxaʼ náa numuu rí natatsimbaaʼ rí Dios niʼni xúgíʼ, ma̱ndoo matriʼña̱a̱ ga̱jma̱a̱ folleto El origen de la vida (1 Ped. 3:15). Rúʼko̱ gáʼni rí maʼdxaʼ numuu rí niratá rí gajkhun rí na̱ʼkha̱ raʼthí náa Biblia.
8. Náa numuu rí tsémiñulu índo̱ nuʼtáraʼa rá.
8 Ma̱ngaa tsímiñulu índo̱ nuʼtáraʼa (Hech. 14:3). Náa numuu rí xámiñulu índo̱ nuʼtáraʼa rá. Timbá, numuu rí nuʼtáraʼa xó má eʼsngáa náa Biblia. Ga̱jma̱a̱ náa Biblia naʼthí rí gajkhun (Juan 17:17). Raga̱jma̱, numuu rí “Icanʼxuʼ mbo-u cambaxiʼxuʼ naʼ ñajunʼ ri numuu Dios”, ga̱jma̱a̱ ikhaa nambáyulúʼ jma̱a̱ xi̱ʼ kaʼwu ndrígóo (1 Cor. 3:9; Hech. 4:31). Dí ragajtsú, numuu rí nandulúʼ kuʼyáá Jeobá ga̱jma̱a̱ náa xa̱bu̱. Rúʼko̱ naʼni rí muʼtáraʼa xó má eʼngulú (Mat. 22:37-39). Numuu rí tsémiñulu, ikha jngó tsíniʼñaʼ ruʼtáraʼa. Nandulúʼ muʼtáruʼun rí gajkhun xa̱bu̱ bi̱ nini nduwiinʼ xa̱bu̱ ede̱ (2 Cor. 4:4). Muʼtáraʼa má xúʼko̱ maski asndu tsíñún gudxawíín o muxkulú (1 Tes. 2:1, 2).
9. Xú káʼnii gándoo gusngajmá rí tsímiñuluʼ índo̱ nuraʼníí xkujndu rá.
9 Ma̱ngaa ma̱ndoo musngajmá rí tsémiñulu índo̱ naguáʼdáá xkujndu. Á mu nakumulu kuʼyáá Jeobá, ikhaa naxnulu tsiakii ga̱jma̱a̱ fe rí nda̱yúlúʼ mu maʼngulú. Mbá xkri̱da, á mu nakháñuu mbáa bi̱ kuʼyáá o mbáa bi̱ nambáxulúʼ gajmiúlú, nakuwáanʼ gíná, mú nuʼnimbulúʼ dí marigá nda̱wa̱á. Nduʼyáá rí Jeobá gáxnulú tsiakii, numuu rí ikhaa “ñajunʼ Dios su naʼnila aʼcunʼlu” (2 Cor. 1:3, 4; 1 Tes. 4:13). Á mu naʼniulú nandii ga̱jma̱a̱ na̱ʼkhu̱ wéñuʼ, tsendrígulú nimbá thana rí na̱nguá nindxu̱u̱ májánʼ náa iduu Dios (Hech. 15:28, 29). O á mu kuwáanʼ gíná wéñuʼ maʼni rí xákuwáanʼ májánʼ, mú tsekaguabáanʼ. Nduʼyáá rí Jeobá nambáñun má xúʼko̱ bi̱ numíniiʼ (Sal. 34:18; 1 Juan 3:19, 20). *
JESÚS NIRAʼWÍÍ MAʼNI RÍ MÁJÁNʼ
10. a) Ndiéjunʼ gíʼmaa muʼni mu muraʼwíí muʼni rí májánʼ rá. b) Á mu nuraʼwíí muʼni rí májánʼ, xú káʼnii gusngájma rí gúʼthá ga̱jma̱a̱ rí gúʼni rá.
10 Mu muraʼwíí muʼni rí májánʼ gíʼmaa mbuʼyáá xú káʼnii mixtiʼkhu nindxu̱u̱ rí májánʼ ga̱jma̱a̱ dí ra̱májánʼ ga̱jma̱a̱ muraʼwíí rí májánʼ (Pro. 15:21; Heb. 5:14). Á mu nuraʼwíí muʼni rí májánʼ, musngajmá rí xú káʼnii gúʼthá ga̱jma̱a̱ rí gúʼni. Xú káʼnii gúʼni rá. Gíʼmaa muraʼwíí májánʼ rí gúʼthá mu xáʼni gawúnʼ iʼwíínʼ, rígi̱ gíʼmaa mambáñún. Rúʼko̱ rí nandoo Dios muʼni (Pro. 11:12, 13). Ma̱ngaa musngajmá á mu tsikiʼnáanʼ nacha̱ (Pro. 14:29). Índo̱ nuraʼwíí muʼni rí májánʼ nambáxulúʼ itháan gajmiúlú Jeobá. Xú káʼnii gándoo gájmañulú muraʼwíí muʼni rí májánʼ rá. Muʼnigajmaa Biblia ga̱jma̱a̱ muʼni xó má eʼthí ikhí (Pro. 2:1-5, 10, 11). Ma̱ngaa mambáyulúʼ muʼnigajmaa xkridoo Jesús ga̱jma̱a̱ muʼni xóo niʼni ikhaa.
11. Xú káʼnii Jesús niraʼwíí maʼni rí májánʼ ga̱jma̱a̱ rí niʼthí xá.
11 Xú káʼnii niraʼwíí Jesús maʼni rí májánʼ rá. Guʼyáá ajtsú enii. Timbá, niraʼwíí maʼni rí májánʼ índo̱ niʼthí. Índo̱ niʼtáráʼa, niʼsngáa májánʼ wéñuʼ ikha jngó bi̱ nidxawíín niguanún tsiánguá Mat. 7:28; Luc. 4:22). Ma̱ngaa niguxnuu ga̱jma̱a̱ niʼtáriyaʼ rí naʼthí náa Escrituras mbaʼa nuthu. Ikhaa ndaʼyoo májánʼ náa gíwanʼ raʼthí náa Escrituras mámbá rí nandoo maʼtáriyaʼ (Mat. 4:4, 7, 10; 12:1-5; Lucas 4:16-21). Ga̱jma̱a̱ índo̱ ikhaa niʼtáriyaʼ, nirkao asndu náa a̱jkiu̱ún xa̱bu̱. Mbá xkri̱da, nda̱wa̱á rí nigabi̱i̱, Jesús niʼtámijna gajmíi̱n discípulos índo̱ kuwa ragún náa kamba̱a̱ mu maguanu náa mbá xuajin chíʼgíʼ. Ikhú niʼthún rí kiʼtáriyaʼ ga̱jma̱a̱ numuu ikhaa. Rúʼko̱ nixnúún tsiakii, ikha jngó nithi: “Asjndo xo agu nirmaʼan naʼ aun akianʼlo ri niʼke raʼtanʼlo jamba” (Luc. 24:27, 32).
(12, 13. Xú káʼnii xkri̱da esngájma rí Jesús tákiʼnáa nacha̱ ga̱jma̱a̱ rí nikro̱ʼo̱o̱ rí xtáa rarígá rá.
12 Raga̱jma̱, Jesús nisngájma xú káʼnii nindxu̱u̱ índo̱ niraʼwíí maʼni rí májánʼ. Ikhaa tákiʼnáa mbá nacha̱ (Pro. 16:32). Rí niʼni, niñawumínáʼ mu xákiʼnáa ga̱jma̱a̱ ninindxu̱u̱ xa̱bu̱ májánʼ a̱jkiu̱u̱n (Mat. 11:29). Ma̱ngaa niʼngo̱o̱ a̱jkiu̱u̱n índo̱ xa̱bi̱i̱ nini dí raʼkhí (Mar. 14:34-38; Luc. 22:24-27). Ga̱jma̱a̱ tákiʼnáa índo̱ nini gínáa (1 Ped. 2:23).
13 Jesús ma̱ngaa nikro̱ʼo̱o̱ rí naguaʼnii xa̱bu̱. Mbá xkri̱da, gundxaʼwamíjna̱ náa a̱ʼgu̱ bi̱ gíʼdoo mbá nandii rí naxidii wéñuʼ eʼdi (atraxnuu Marcos 5:25-34). Ikhaa ni̱jkha̱ náa kuwa mbaʼin xa̱bu̱ mu maxkamaa Jesús ga̱jma̱a̱ maxkajma xtíñuu. Náa xtángoo naʼthí rí ikhaa ragíʼmaa maxkajmaa nimbáa xa̱bu̱ (Lev. 15:25-27). Mú Jesús táriyúu. Ikhaa ndaʼyoo náa numuu Dios nixná xtángoo. Ndiʼyoo dí rúʼko̱ xóo rí gínáa ga̱jma̱a̱ rí magaʼwíínʼ a̱jkiu̱u̱n kaʼyoo gíʼdoo itháan numuu ki xó rí maʼnimbánuu kuduun rí naʼthí xtángoo (Mat. 23:23). Ikha jngó Jesús niʼthúu̱n a̱ʼgu̱: “Aʼdeʼ, numu ri xtaʼda fe ikajngo nigumamandan, ayu hui-ra, nihuiji-ma ri naʼneguina-ra.” ¡Ra̱ʼkhá tháán májánʼ xkri̱da!
14. a) Ndiéjunʼ rí itháan nigiʼdoo numuu náa Jesús rá. b) Ndiéjunʼ niraʼwíí maʼni mu mambáyúu maʼtáraʼa má xúʼko̱ Jesús rá.
14 Ragajtsú, Jesús nisngájma rí xú káʼnii nixtáa rí naraʼwíí maʼni rí májánʼ. Rí maʼtáraʼa nigiʼdoo itháan numuu náa ikhaa (Luc. 4:43). Ikha jngó niraʼwíí rí nimbáyúu mu maʼtáraʼa má xúʼko̱. Ndiéjunʼ niraʼwíí maʼni xáʼ. Ikhaa na̱nguá nigiʼdoo wéñuʼ mu maríyaʼ itháan mbiʼi ga̱jma̱a̱ tsiakii ndrígóo mu maʼtáraʼa (Luc. 9:58). Ga̱jma̱a̱ niʼni ratiin xa̱bi̱i̱ mu mutaraʼa má xúʼko̱ nda̱wa̱á rí ikhaa gakháñu (Luc. 10:1-12; Juan 14:12). Ma̱ngaa, niʼthún rí mambáñún má xúʼko̱ asndu índo̱ gártumuu mbiʼi (Mat. 28:19, 20).
GURAʼWÍÍ MUʼNI RÍ MÁJÁNʼ XÓ MÁ JESÚS
Mú muraʼwíí májánʼ rí gúʼthá, ndayóoʼ mundxaʼwáá edxu̱lúʼ rí nda̱ñúnʼ xa̱bu̱ (Atayáá kutriga̱ 15)
15. Xú káʼnii gándoo guraʼwíí muʼni rí májánʼ ga̱jma̱a̱ rí gúʼthá rá.
15 Xó má ndiʼyáá ginii, i̱mba̱ rí xóo mbuʼyaridáá Jesús mu muraʼwíí muʼni rí májánʼ índo̱ rí gúʼthá. Nindxu̱u̱ índo̱ gúʼthún a̱ngiu̱lú ajngáa rí maxnún tsiakii raʼkháa ajngáa rí maʼni gawúunʼ (Efes. 4:29). Índo̱ gúʼtáraʼa, ajngáa rí muʼthá gíʼmaa maʼni “xuri manigunʼ xabo”, xóo muʼthá, gíʼmaa muʼthúún ga̱jma̱a̱ gamajkhu xa̱bu̱ (Col. 4:6). Mú muraʼwíí májánʼ rí xóo muʼthá, nuʼnimi̱jna̱ mbuʼyáá ndiéjunʼ rí nda̱ñúnʼ xa̱bu̱ ga̱jma̱a̱ ndiéjunʼ rí naxmiéjunʼ. Á mu nuʼthá ga̱jma̱a̱ májánʼ, mbáa maʼni rí xa̱bu̱ mudxawíín ga̱jma̱a̱ markao asndu náa a̱jkiu̱ún rí gúʼthún. Ma̱ngaa, najmulú má xúʼko̱ Biblia mu muʼthá ga̱jma̱a̱ numuu rí nakumulú. Nuʼni rígi̱, numuu rí ajngóo Biblia gíʼdoo itháán tsiakii ki xóo rí muʼthá ikháanʼ (Heb. 4:12).
16, 17. a) Ndiéjunʼ gándoo gámbayulú mu xákiʼnáanʼ nacha̱ rá. b) Xú káʼnii esngajmá rí nakru̱ʼu̱lú rí kuwa raguaʼniin xa̱bu̱ rá. c) Ndiéjunʼ gambáyuluʼ mu muʼtáraʼa má xúʼko̱ rá.
16 Ma̱ngaa nusngajmá rí nuraʼwíí muni rí májánʼ ga̱jma̱a̱ rí xú káʼnii ni̱ndxu̱lú. Xú káʼnii eʼni rá. Índo̱ nuñewa̱a̱n rí xákiʼnáanʼlu. Ndiéjunʼ gambáyuluʼ mu xákiʼnáanʼ nacha̱ rá. (Sant. 1:19.) Índo̱ mbáa gáʼthulúʼ o maʼni rí makiʼnáanʼ, guʼgíiʼ mbuʼyáá náa numuu rí xúʼko̱ niʼni. Xúʼko̱ gáʼni rí xáʼniulu mingíjyúuʼ muʼni mba̱a̱ a̱jkiu̱lú kuʼyáá (Pro. 19:11). Ma̱ngaa gíʼmaa musngájma rí nakru̱ʼu̱lú. Xú káʼnii rá. Xáguaʼthi̱i̱n rí a̱ngiu̱lú mani̱ndxu̱ún xa̱bu̱ jmbiin. Garmáʼáan a̱jkiu̱lú rí ikhiin ma̱ndoo muguaʼdáá xkujndu rí ikháanʼ tsekru̱ʼu̱lú. Imbo̱o̱ ikhoo rí ma̱ndoo musngájma rí nakru̱ʼu̱lú nindxu̱u̱ rí muʼdxawíín rí gúthi iʼwíínʼ. Ragíʼmaa muʼthá má xúʼko̱ rí maguma xó má eyulú ikháanʼ (Filip. 4:5).
17 Ma̱ngaa nusngajmá rí nuraʼwíí muni rí májánʼ ga̱jma̱a̱ rí xú káʼnii kuwáanʼ. Ikháanʼlu nduʼyáá dí ra̱ʼkhá tháán gíʼdoo numuu rí muʼtáraʼa. Ndiéjunʼ gambáyuluʼ mu muʼtáraʼa má xúʼko̱ rá. Rí muʼni ginii ñajunʼ Jeobá ga̱jma̱a̱ rí xaguaʼdáá wéñuʼ. Rúʼko̱ maniñulu muriyaʼ itháan mbiʼi ga̱jma̱a̱ tsiakii mu muʼtáraʼa nákha xóó tsetumuu mbiʼi (Mat. 6:33; 24:14).
18. Ndiéjunʼ gíʼmaa muʼni á mu nandulúʼ makuwáanʼ kámuu mbiʼi rá.
18 Nadxulú rí ndiʼyáá rí xú káʼnii Jesús nindxu̱u̱ xa̱bu̱ gua̱ba̱ʼ, rí nagáwíínʼ a̱jkiu̱u̱n, rí tsímiñuu ga̱jma̱a̱ rí naraʼwíí maʼni rí májánʼ. Rí majmañulúʼ má xúʼko̱ rí xóo xa̱bu̱ nindxu̱u̱ ikhaa mambáyulúʼ wéñuʼ. Ikha jngó guʼyaridáá má xúʼko̱ xkri̱da ndrígóo Jesús. Xúʼko̱ gáʼni rí mu̱ʼgua̱ kanuu itháan mijngii náa Jeobá ga̱jma̱a̱ ma̱ndoo makuwáanʼ kámuu mbiʼi.
^ párr. 2 Ajngáa rí naʼthí náa 1 Pedro 1:8, 9 nijuiʼthún cristianos bi̱ guáʼthi̱i̱n magúun mekhuíí. Mú ma̱ngaa ma̱ndoo mambáñún bi̱ guáʼthi̱i̱n makuwa kámuu náa tsu̱du̱u̱ Ku̱ba̱ʼ.
^ párr. 9 Mataxkamaa xkri̱da ndrígu̱ún xa̱bu̱ bi̱ tamiñun índo̱ niraʼníí xkujndu dí gakhii náa La Atalaya 1 ñajunʼ gu̱nʼ diciembre tsiguʼ 2000, ináa 24 asndu 28; ¡Despertad! 22 ñajunʼ gu̱nʼ abril tsiguʼ 2003, ináa 18 asndu 21, ga̱jma̱a̱ náa ¡Despertad! 22 ñajunʼ gu̱nʼ enero tsiguʼ 1995, ináa 11 asndu 15.