Tikhun a̱ngiu̱lú bi̱ ndajkúun nuthi xúʼko̱ kaʼnii. Mú ikhiin nduyáá rí Jeobá nandoo rí xa̱bi̱i̱ mudamijná i̱ndó gajmiún ‹bi̱ nakumún kuyáá Dios›. Rígi̱ nandoo gáʼthúu̱n rí i̱ndó gíʼmaa mbuʼyáa mbáa xa̱bu̱ bi̱ nijngúun iyááʼ (1 Corintios 7:39). Náa numuu rí nundxa̱ʼwa̱míjna̱ xúʼko̱ kaʼnii a̱ngiu̱lú rá.

Tikhun nundxa̱ʼwa̱míjna̱ xúʼko̱ kaʼnii numuu rí naku̱mún rí kuwa itháan a̱ngiu̱lú gu̱ʼu̱ bi̱ xóó tsínuju̱nʼ ki xóo xa̱bekha. Ga̱jma̱a̱ gajkhun nindxu̱u̱ rígi̱ náa mbaʼa xuajin mba̱ʼu̱. Mbá xkri̱da, náa Corea, náa mbá 100 xa̱bi̱i̱ Jeobá, 57 ni̱ndxu̱ún a̱ngiu̱lú gu̱ʼu̱ ga̱jma̱a̱ 43 ni̱ndxu̱ún xa̱bekha. Ga̱jma̱a̱ náa Colombia, náa mbá 100 xa̱bi̱i̱ Jeobá, 66 ni̱ndxu̱ún a̱ngiu̱lú gu̱ʼu̱ ga̱jma̱a̱ 34 ni̱ndxu̱ún xa̱bekha.

Náa i̱ʼwáʼ xuajin rígá costumbre rí novio naxnún mbújkha̱a̱ o regalos anu̱u̱ novia mu mbayáa. Índo̱ anu̱u̱ novia o ru̱dúu̱ na̱nguá ni̱ndxu̱ún xa̱bi̱i̱ Jeobá mbáa munda̱ʼa̱ wéñuʼ mbújkha̱a̱ o regalos rí minumuu wéñuʼ. Mú mbaʼin a̱ngiu̱lú xa̱bekha bi̱ xóó tsínigu̱nʼ tséʼngu̱u̱n gutsi regalos rígi̱. Ikha jngó tikhun a̱ngiu̱lú gu̱ʼu̱ bi̱ kuwa náa xuajin rúʼko̱ naku̱mún rí xándoo mbu̱ya̱a̱ mbáa xa̱bi̱i̱ Jeobá. *

Á mu mbá miʼtsú naku̱ma̱ʼ xúʼko̱ kaʼnii, garmáʼáan  a̱jkia̱nʼ rí Jeobá ndaʼyoo rígi̱ ga̱jma̱a̱ nakro̱ʼo̱o̱ rí ratagíʼniin (2 Crónicas 6:29, 30).

Maski ajndu xúʼko̱, Jeobá naʼthí rí gíʼmaa mbuʼyáa i̱ndó bi̱ nindxu̱u̱ xa̱bi̱i̱ ikhaa. Náa numuu rá. Numuu rí ndaʼyoo rí rúʼko̱ nindxu̱u̱ itháan májánʼ náa ikháanʼ ga̱jma̱a̱ nandoo mañewunlú. Ikhaa tsíyoo rí muraʼwíí mbá rí maʼni makuwáanʼ gíná. Nákha nixtáa gaʼyee Nehemías, mbaʼin judíos ninigu̱nʼ gajmiún gu̱ʼu̱ bi̱ tseni ñajunʼ Jeobá. Ikha jngó Nehemías niʼni marmáʼáan a̱jkiún rí nigíʼnuu rey Salomón. Niʼthún rí Dios nindoo kaʼyoo Salomón ga̱jma̱a̱ nigíiʼ xóo rey náa Israel. Mú Salomón ninigúnʼ gajmíi̱n gu̱ʼu̱ bi̱ tséni ñajunʼ Jeobá, ga̱jma̱a̱ ikhiin nini̱i̱ rí ikhaa makudaminaʼ aʼkhá (Nehemías 13:23-26). Jeobá i̱ndó nandoo makuwa májánʼ. Ikha jngó naʼthúún cristianos rí gu̱ya̱a̱ xa̱bu̱ bi̱ naʼni ñajunʼ ikhaa (Salmo 19:7-10; Isaías 48:17, 18). Nduʼyáá rí ikhaa kaʼyoo maʼthúlú rí ma̱ndoo o xándoo muʼni. Ma̱ngaa nuxnáa núma̱aʼ ga̱jma̱a̱ numuu xtágabu ndrígóo numuu rí xúʼko̱ nasngájma rí nandoo kaʼyulúʼ ma̱ngaa nambáyulúʼ má xúʼko̱ (Proverbios 1:5).

Á mu ndayáa mbáa bi̱ tsíyoo kaʼyoo Jeobá, mbáa xa̱bu̱ buʼko̱ maʼni rí matatsiʼñáanʼ ratani̱ ñajunʼ. Ikháánʼ tsíyaaʼ matagíʼnii xúʼko̱ kaʼnii (2 Corintios 6:14). Garmáʼáan a̱jkia̱nʼ rí xtágabu ndrígóo Jeobá nambáyulúʼ má xúʼko̱. Mbaʼin xa̱bi̱i̱ Jeobá rí mbiʼi xúgi̱ niraʼwíí muni rí májánʼ. Mú eʼwíínʼ tséni xúʼko̱.

Mbáa ndxájulú bi̱ xtáa náa Australia bi̱ nagumbiʼyuu Maggy nigíʼdu̱u̱ nijngruigo̱o̱ ga̱jma̱a̱ mbáa bi̱ raʼkháa xa̱bi̱i̱ Jeobá. * Ikhaa naʼthí rí nindáti̱go̱o̱ mbaʼa reunión mu maxtáa ga̱jma̱a̱. Ga̱jma̱a̱ rúʼko̱ niʼni rí maʼnigachúu rí nimbáxu̱u̱ ga̱jma̱a̱ Jeobá. Imba̱a̱ dxáʼgú bi̱ xtáa náa India bi̱ nagumbiʼyuu Ratana nigíʼdu̱u̱ nijngruigo̱o̱ ga̱jma̱a̱ mbáa bi̱ na̱jkha̱ ga̱jma̱a̱ náa guʼwá nisngáá. Ndxámá nigíʼdu̱u̱ niʼnigajmaa Biblia, mu i̱ndó mu maxtáa ga̱jma̱a̱ ikhaa. Nda̱wa̱á Ratana niniñuʼ raʼni ñajunʼ Jeobá ga̱jma̱a̱ niriʼkhu̱u̱ religión ndrígóo mu mbayáa ikhaa.

Mbáa ndxájulú bi̱ xtáa náa Camerún bi̱ nagumbiʼyuu Ndenguè ninúju̱nʼ índo̱ ikhaa nigiʼdoo 19 tsiguʼ ga̱jma̱a̱ mbáa xa̱bu̱ bi̱ na̱nguá nindxu̱u̱ xa̱bi̱i̱ Jeobá. Ikhaa niʼthúu̱n rí ma̱ndoo mani̱ndxu̱u̱ má xúʼko̱ xa̱bi̱i̱ Jeobá. Mú a̱jma̱ xmáná nda̱wa̱á rí ndiyáa ikhaa niʼthúu̱n rí ní xáʼga̱ náa nagimbáanʼ. Ndenguè naʼthí rí xtáa gíná wéñuʼ ga̱jma̱a̱ nambiyaʼ má xúʼko̱. Ndiʼyoo rí na̱nguá niraʼwíí májánʼ xú maxtáa. Ma̱ngaa nagáwiinʼ a̱jkiu̱u̱n xúgíʼ mbiʼi.

Mbáa natatsaʼwáminaʼ: “Kúwi̱i̱n a̱ngiu̱lú bi̱ ndi̱ya̱a̱ mbáa xa̱bu̱ bi̱ tseni ñajunʼ Jeobá ga̱jma̱a̱ ikhiin májánʼ a̱jkiún”. Lá gajkhun rúʼko̱ ráʼ. Mú, á mu ikháanʼ ndayáa mbáa xa̱bu̱ xúʼko̱ kaʼnii, xú káʼnii gáraxtaa ga̱jma̱ʼ Jeobá rá. Xú káʼnii gáʼniaʼ rí na̱nguá nitanimbánii xtángoo rí nixnáʼ Jeobá ráʼ. Ga̱jma̱a̱, xú káʼnii gáxtáa Jeobá rá. (Proverbios 1:33.)

Mbaʼin a̱ngiu̱lú nunimbu̱ún xtágabu ndrígóo Jeobá ga̱jma̱a̱ nudiin i̱ndó bi̱ ni̱ndxu̱ún xa̱bi̱i̱ Jeobá. Ikhiin nduyáá rí májánʼ nindxu̱u̱ rí niraʼwíí muni. Ma̱ngaa nuni numuu rí nandún maxtáa gagi Jeobá. Mbá xkri̱da, mbáa ndxájulú a̱ʼgu̱ bi̱ xtáa náa Japón bi̱ nagumbiʼyuu Michiko nindoo maʼnimbo̱o̱ kaʼyoo Dios, mu a̱ngui̱i̱n nindúún rí manújunʼ ga̱jma̱a̱ mbáa bi̱ na̱nguá nindxu̱u̱ xa̱bi̱i̱ Jeobá. Ma̱ngaa ndiʼyoo xú káʼnii bi̱ nambáxu̱u̱ gajmíi̱n nunigu̱nʼ gajmiún xa̱bi̱i̱ Jeobá rígáa ikhaa na̱nguá xóó enújunʼ. Rúʼko̱ nigawúnʼ wéñuʼ ikhaa. Mú ikhaa naʼthí rí nimbáyúu rí marmáʼáan a̱jkiu̱u̱n rí tséyóoʼ mbi̱ya̱a̱ xa̱bu̱ mu maraxtaa gagi. Rí phú itháan gíʼdoo numuu rí matani ñajunʼ Jeobá, bi̱ nindxu̱u̱ mbáa Dios gagi (1 Timoteo 1:11). Ikhaa ndaʼyoo rí Jeobá naxná rí nandulúʼ. Ikha jngó naʼthí rí á mu mbáa nandoo manigúnʼ o manújunʼ, mu tsexkamaa mbáa bi̱ naʼni ñajunʼ Jeobá, itháan májánʼ maxtáa mbáwíi xóó. Nda̱wa̱á, Michiko ndiyáa mbáa xa̱bi̱i̱ Jeobá bi̱ májánʼ a̱jkiu̱u̱n. Ga̱jma̱a̱ nadxuu wéñuʼ rí niʼnimbo̱o̱ náa Jeobá.

Ma̱ngaa kúwi̱i̱n a̱ngiu̱lú bi̱ niguaʼti̱i̱n mbu̱ya̱a̱ mbáa bi̱ kaʼyoo mbu̱ya̱a̱. Mbá xkri̱da, mbáa  ndxájulú bi̱ xtáa náa Australia bi̱ nagumbiʼyuu Bill naʼthí rí ikhaa ninigiu̱ʼ kaʼñúún gu̱ʼu̱ bi̱ na̱nguá ni̱ndxu̱ún xa̱bi̱i̱ Jeobá. Ikhaa na̱nguá ninindxu̱u̱ májánʼ a̱jkiu̱u̱n wéñuʼ gajmíi̱n numuu rí táʼndoo mbayáa mbáa bi̱ na̱nguá nindxu̱u̱ xa̱bi̱i̱ Jeobá. Nda̱wa̱á, Bill ninigu̱nʼ kaʼñúún tikhun a̱ngiu̱lú gu̱ʼu̱. Mú ikhiin tánigunʼ kuyáá. Bill nigi̱ʼthu̱u̱n 30 tsiguʼ asndu índo̱ nixkamaa mbáa ndxájulú bi̱ nigiʼdoo ikháá má meta xóo ikhaa. Ikhaa naʼthí rí tsigáwiinʼ nditháan a̱jkiu̱u̱n. Ikhaa nadxuu wéñuʼ numuu rí ikhaa ga̱jma̱a̱ a̱ʼgiu̱u̱ nandoo nutaraʼa, nunigajmaa ga̱jma̱a̱ nuni mbóó ñajunʼ Jeobá. Ma̱ngaa naniguʼ maxtáa gajmíi̱n bi̱ nambáxu̱u̱ gajmíi̱n a̱ʼgiu̱u̱ numuu rí mangiin nuni ñajunʼ Jeobá. Ikhaa naʼthí rí á mu nuʼnimbulúʼ xtágabu rí na̱ʼkha̱ náa Biblia naʼni makuwa itháan májánʼ bi̱ nidamijná.

Á mu xóó tséyáa xa̱bu̱ numuu rí nandaʼ matanimbaʼ rí naʼthí Jeobá, ndiéjunʼ gándoo gámbáyaʼ maraʼti̱i̱n rá. Lá nandoo natatsaʼwáminaʼ rí Jeobá xtáa gagi wéñuʼ índo̱ ndaʼyoo rí nandaʼ matanimbaaʼ náa ikhaa xáʼ. (1 Samuel 15:22; Proverbios 27:11.) Ma̱ngaa mambáyaʼ rí maratajkáan nángi eʼni mu maratha̱a̱n xú káʼnii ku̱ma̱ʼ (Salmo 62:8). Ga̱jma̱a̱ á mu natani tsiakimínaʼ matraʼníí tsáʼkhá o dí ra̱májánʼ, mambaxáʼ itháan májánʼ ga̱jma̱ʼ Jeobá. Garmáʼáan a̱jkia̱nʼ rí xtaʼdáá wéñuʼ numaʼ náa ikhaa. Ikhaa naxmiéjunʼ wéñuʼ rí nda̱yáaʼ. Ikhaa tséʼthi maxnáʼ mbáa xa̱bu̱ mbi̱ya̱a̱, mú ikhaa ndaʼyoo xú káʼnii gámbáyaʼ mu maraxtaa gagi (Salmo 145:16; Mateo 6:32).

Mbáa nguáná maku̱ma̱ʼ xó má David. Mbá mbiʼi nixtáa gíná wéñuʼ rí nindo̱ʼo̱o̱ Jeobá mambáyúu nacha̱ wéñuʼ numuu rí nánguá gíʼdoo tsiakii (Salmo 143:5-7, 10). Mú xátatsiʼñáminaʼ. Araʼthi̱i̱n rí Jeobá mariʼña̱a̱ rí naratajkáan. Atraxnuu Biblia ga̱jma̱a̱ atatsaʼwáminaʼ ga̱jma̱a̱ numuu rí natraxnuu. Xúʼko̱ gáta̱ya̱a̱ ndiéjunʼ gíʼthu̱u̱n matani Jeobá ga̱jma̱a̱ xú káʼnii nimbáñun xa̱bi̱i̱ nákha wajyúúʼ. Rígi̱ mambáyaʼ maku̱ma̱ʼ xtayáá ga̱jma̱a̱ matanimbaaʼ náa ikhaa.

Ndiéjunʼ gándoo gátani itháan nákha xóó naraʼti̱i̱n rá. Ma̱ndoo matani tsiakiminaʼ mu mambaxáʼ itháan ga̱jma̱ʼ Jeobá ga̱jma̱a̱ manindxa̱ʼ mbáa xa̱bu̱ májánʼ. Ma̱ngaa majmañaaʼ mambaxáʼ májánʼ gajmiáanʼ eʼwíínʼ, maraxna rí xtaʼdáá, matiejunʼ ga̱jma̱a̱ manindxa̱ʼ jmbii náa Jeobá. Rígi̱ gáʼyoo mu maraxtaa tsímáá índo̱ gíyáa xa̱bu̱ (Génesis 24:16-21; Rut 1:16, 17; 2:6, 7, 11; Proverbios 31:10-27). Atiajunʼ má xúʼko̱ náa miʼtáraʼa ga̱jma̱a̱ náa congregación. Rígi̱ gámbáyaʼ mu matraʼwíí matani rí májánʼ. Bill naʼthí rí xúgíʼ tsiguʼ rí nixtáa mbáwíi ninújngoo nacha̱ wéñuʼ numuu rí ninindxu̱u̱ precursor.

Rí matanimbaaʼ xtayáá Jeobá ga̱jma̱a̱ mbi̱ya̱a̱ mbáa xa̱bu̱ “su nacumu caʼyo Dios” ma̱ndoo xóó. Á mu nuraʼwíí mbuʼyáa mbáa xa̱bi̱i̱ Jeobá, mbuʼyamajkuíí Dios ga̱jma̱a̱ makuwáanʼ tsímáá. Náa Biblia naʼthí rí xa̱bu̱ bi̱ naʼnimbo̱o̱ ga̱jma̱a̱ xúgíʼ a̱jkiu̱u̱n kaʼyoo Jeobá maxtáa gagi kámuu mbiʼi (Salmo 112:1, 3). Ikha jngó, xambumaʼ nimbá mbiʼi xtángoo ndrígóo Jeobá rí mbi̱ya̱a̱ i̱ndó xa̱bu̱ “su nacumu caʼyo Dios”.