“Jeobá Dios nigíwanʼ xa̱biya̱ náa ixi̱ ri̱ʼi̱ Edén mu maʼdu ga̱jma̱a̱ mañewu̱u̱n. Ga̱jma̱a̱ Jeobá Dios nixná xtángoo náa xa̱biya̱: ‹Xúgíʼ xndúu ixi̱ dí rígá náa ku̱ba̱ʼ mitsaan ma̱ndoo miʼtsu asndu magiʼmaʼ. Mú ixi̱ ku̱ma̱ dí májánʼ ga̱jma̱a̱ dí ra̱májánʼ, xándoo miʼtsu, numuu rí índo̱ giʼtsu xndúu ixi̱ rúʼko̱, makañáʼ›.” (Génesis 2:15-17.)

Dios nigíwanʼ timbáa xa̱biya̱ bi̱ nigumbiʼyuu Adán náa ixi̱ ri̱ʼi̱ Edén, mbá ku̱ba̱ʼ mitsaan náa nikuwa wéñuʼ xujkhúʼ ga̱jma̱a̱ iná. Náa nixtáa Adán nirígá mbaʼa ixi̱ rí naxná xndúu ga̱jma̱a̱ ma̱ndoo mikhu asndu kaʼnii má rí eyoo. I̱ndó niʼthúu̱n Jeobá rí xándoo mikhu mbá xndúu ixi̱. Dios niʼthúu̱n rí á mu tséʼnimbo̱o̱ makhañúu.

Ndiéjunʼ nikro̱ʼo̱o̱ Adán índo̱ nijuiʼtháán rí xákhu xndúu ixi̱ rá. Ikhaa ndaʼyoo káʼnii nindxu̱u̱ rí makhañúlúʼ. Ikhaa ndiʼyoo xú káʼnii nikháñun xujkhúʼ. Á mu Adán nigumaa xó má xujkhúʼ, rí niʼthúu̱n Dios Adán xágiʼdoo numuu, numuu rí makhañúu má. Timbáa xa̱biya̱ nikro̱ʼo̱o̱ rí á mu naʼnimbo̱o̱ náa Dios ga̱jma̱a̱ ndaʼyamajkhuu ixi̱ rúʼko̱, maxtáa kámuu.

Tikhun nundxa̱ʼwa̱míjna̱ rí ixi̱ nindoo gáʼthúu̱n dí ragíʼmaa mubúunʼ, mu ragájkhun rígi̱, numuu rí Jeobá niʼthúu̱n Adán ga̱jma̱a̱ Eva: “Ga̱mi̱dia̱ʼlaʼ a̱ga̱ʼne mbaʼáa̱nʼlaʼ, a̱go̱ne̱ matíí-mi̱jna̱ ná inuu ju̱ba̱ʼ. Xúʼkhue̱n-máʼ a̱gu̱tha̱n-ñájuíín ju̱ba̱ʼ” (Génesis 1:28). Ninindxu̱u̱ mbá ixi̱ gajkhun. Jeobá nixná mbiʼyuu “ixi̱ ku̱ma̱ dí májánʼ ga̱jma̱a̱ dí ra̱májánʼ” numuu rí nindoo gáʼthúu̱n rí ikhaa kaʼyoo maʼthí ndiéjunʼ ñajunʼ dí májánʼ ga̱jma̱a̱ dí ra̱májánʼ muni xa̱bu̱. Á mu Adán tikhu xndúu ixi̱ rúʼko̱, raʼkháa i̱ndó masngájma rí naʼnimbo̱o̱, ma̱ngaa masngájma rí naxnáa núma̱aʼ bi̱ Niʼni xúgíʼ rí májánʼ ga̱jma̱a̱ numuu ikhaa.

Dios niʼthúu̱n Adán: “Nitso xndúu ixe̱ rí ni̱tha̱a̱nʼ ma̱xéʼtso”. Ga̱jma̱a̱ numuu rígi̱, “maruñánʼ rí matiejunʼ gakhi̱i̱ mu makánáʼ rí miʼtsu asndu índo̱ gídxúʼ náa ku̱ba̱ʼ rí nigumán ga̱jma̱a̱. Numuu rí yujndaʼ nindxa̱ʼ ga̱jma̱a̱ yujndaʼ má gídxúʼ” (Génesis 3:17, 19).

Adán ni̱ʼkhu̱ xndúu ixi̱ dí ragíʼmaa mikhu, ga̱jma̱a̱ Dios táʼyoo dí ragíʼdoo numuu rí táʼnimbo̱o̱, numuu rí niʼni rí nindoo ikhaa, na̱nguá nixnáa núma̱aʼ nditháan ga̱jma̱a̱ rí niʼni Jeobá ga̱jma̱a̱ numuu. Índo̱ ni̱ʼkhu̱ xndúu ixi̱, Adán nánguá nindoo kaʼyoo Jeobá ga̱jma̱a̱ nindoo maraʼwíí kambo̱o̱ ikhaa, ga̱jma̱a̱ rígi̱ niʼni marigá mba̱a̱ wéñuʼ gaʼkhu.

Xó má Jeobá niʼthúu̱n Adán, ni̱jkha̱nú mbá mbiʼi rí nikháñu. Dios niʼnii ga̱jma̱a̱ yujndaʼ ga̱jma̱a̱ niʼthúu̱n rí ikhí má gátanga̱a̱. Timbáa xa̱biya̱ táʼga gáxtáa i̱mba̱ níʼkhá nda̱wa̱á rí nikháñu. Ikhaa ninindxu̱u̱ yujndaʼ rí tséʼya (Génesis 2:7; Eclesiastés 9:5, 10).

“Ga̱jma̱a̱ numuu mbáwíi xa̱bu̱ nito̱ʼo̱o̱ aʼkhá náa numbaaʼ. Ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, rí nakháñulú nigadráʼa náa xúgínʼ xa̱bu̱ numuu rí xúgínʼ xa̱bu̱ nixuda̱mi̱jna̱ aʼkhá.” (Romanos 5:12.)

Rí táʼnimbo̱o̱ Adán, aʼkhá rí nikudaminaʼ, ni̱ʼkha̱ kagu̱u̱ mba̱a̱ gaʼkhu. Ginii Adán niʼni mbáti̱ga̱ rí maxtáa, mu raʼkháa rí maxtáa i̱ndó 70 u 80 tsiguʼ: Nindátigo̱o̱ rí maxtáa kámuu mbiʼi. Ma̱ngaa ikhaa nigiʼdoo aʼkhá ikha jngó xúgínʼ e̱ji̱i̱n nigumii ga̱jma̱a̱ aʼkhá.

Xúgiáanʼ naguwáʼ náa Adán, ikha jngó ikháanʼ kuaʼdáá aʼkhá ga̱jma̱a̱ nda̱wa̱á nakháñulú. Pablo niʼthí májánʼ wéñuʼ xú káʼnii ni̱ndxu̱lú ga̱jma̱a̱ ajngáa rígi̱: “Ikhúúnʼ ni̱ndxu̱ʼ mbáa xa̱bu̱ numbaaʼ, bi̱ nigujuamínáʼ náa aʼkhá. ¡Ra̱ʼkhá tháán migínáa xa̱bu̱ ni̱ndxu̱ʼ! Xú káʼnii gándoo gánikríyaminaʼ náa rí makhañúʼ rá.” Ikhaa má niriʼña̱a̱: “¡Núma̱a̱ Dios ga̱jma̱a̱ numuu Jesucristo!” (Romanos 7:14, 24, 25).

“Ana necuŋguaʼ muri maʼni macahuinli naʼ aʼcun xabu su cuhua naʼ inu xoguiʼ numbaʼ riguiʼ.” (1 Juan 4:14.)

Jeobá niríyaʼ awan mu ma̱ndoo makáwáanʼ náa aʼkhá ga̱jma̱a̱ náa rí makhañúlúʼ kámuu mbiʼi. Ndiéjunʼ niʼni xá. Nikunguanʼ A̱ʼdióo bi̱ nandoo kaʼyoo wéñuʼ náa tsu̱du̱u̱ Ku̱ba̱ʼ mu maxtáa xóo xa̱bu̱ bi̱ ragíʼdoo aʼkhá xó má Adán. Mú Jesús “taʼni nditan ri ramejanʼ” (1 Pedro 2:22). Ikha jngó ikhaa na̱nguá kaʼyoo makhañúu ga̱jma̱a̱ ma̱ndoo maxtáa kámuu mbiʼi.

Mú Jeobá niniñuʼ rí xa̱bu̱ sia̱nʼ muxiya̱a̱ A̱ʼdióo ga̱jma̱a̱ ajtsú mbiʼi nda̱wa̱á nikuxi̱i̱. Jesús nituxi̱i̱ xóo mbáa ángel ga̱jma̱a̱ nda̱wa̱á ni̱jkha̱a̱ mekhuíí. Ikhí nixnáxi̱ náa Anu̱u̱ rí ikhaa nikháñu xóo xa̱bu̱ jmbi mu maʼnikríyaʼ rí Adán niʼnimbáti̱ga̱. Jeobá nigruigú tsigijñaʼ ndrígóo A̱ʼdióo ga̱jma̱a̱ rúʼko̱ niʼni rí xúgínʼ xa̱bu̱ bi̱ gaguaʼdáá fe náa Jesús ma̱ndoo makuwá kámuu mbiʼi (Romanos 3:23, 24; 1 Juan 2:2).

Xúʼko̱ kaʼnii, Jesús niʼninuma̱a̱ rí Adán niʼnimbáti̱ga̱. Nikháñu mu ma̱ndoo makuwáanʼ kámuu mbiʼi. Náa Biblia naʼthí rí Jesús nikháñu “numuu rí májánʼ wéñuʼ a̱jkiu̱u̱n Dios rí Jesús nikháñu ga̱jma̱a̱ numuu xúgínʼ xa̱bu̱ ga̱jma̱a̱ xúʼko̱ nimbáñun” (Hebreos 2:9).

Xúgíʼ rígi̱ mbaʼa rí naʼthúlúʼ ga̱jma̱a̱ numuu Jeobá. Numuu rí kuaʼdáá aʼkhá maʼniulú mingíjyúuʼ muʼnimbánii xtángoo ndrígóo Dios mu makáwáanʼ. Ikha jngó rí nandoo kaʼyulúʼ ga̱jma̱a̱ rí nagáwiinʼ a̱jkiu̱u̱n kaʼyulúʼ, Dios nindoo maʼnimbánuu ikhaa mínaʼ xtángoo ndrígóo. Mú maʼni káwáanʼ náa nakháñulú ndiyóoʼ maʼni numuu mba̱a̱ wéñuʼ: Nixnáa mínaʼ A̱ʼdióo mu makhañúu (Romanos 5:6-8).

“Cristo ni̱ga̱bi̱i̱ náa xa̱bu̱ bi̱ nikháñun, bi̱ ni̱ga̱bi̱i̱ ginii náa xúgínʼ bi̱ nunuʼ náa nikháñun. Rí nakháñulú nito̱ʼo̱o̱ ga̱jma̱a̱ numuu mbáwíi xa̱biya̱, rí magabiín bi̱ nikháñun ma̱ngaa na̱ʼkha̱ ga̱jma̱a̱ numuu mbáa xa̱biya̱. Ga̱jma̱a̱ numuu Adán xúgínʼ nakháñun, xúʼko̱ ma̱ngaa náa Cristo xúgínʼ mbuya.” (1 Corintios 15:20-22.)

Gajkhun má dí Jesús nixtáa ga̱jma̱a̱ nikháñu, mú xú káʼnii eʼyáá rí ni̱ga̱bi̱i̱ mbu̱júu̱ xá. Mbá rí nakujmaa kaʼwu rí Jesús ni̱ga̱bi̱i̱ nindxu̱u̱ rí nisngájmaminaʼ náa mbaʼin xa̱bu̱ náa mixtiʼkhu xuajin. Mbá miʼtsú nikujmaa náa itháan rí 500 xa̱bu̱. Apóstol Pablo niʼthí ga̱jma̱a̱ numuu rí nisngájmaminaʼ náa i̱yi̱i̱ʼ rí niʼnirámáʼ náa inún cristianos bi̱ kuwa náa Corinto. Asndu niʼthí rí tikhun bi̱ ndiyáá rígi̱ kuwa xóó, nindoo gáʼthi rí ikhiin ma̱ndoo muthi rí ndiyáá ga̱jma̱a̱ rí nidxawíín (1 Corintios 15:3-8).

Ra̱ʼkhá tháán májánʼ rí Pablo nixna mbiʼyuu Cristo “bi̱ ni̱ga̱bi̱i̱ ginii”, numuu dí rúʼko̱ nandoo gáʼthi rí makuwá iʼwíínʼ xa̱bu̱ bi̱ magabiín. Mínaʼ Jesús niʼthí rí maʼga̱nú mbiʼi rí “xúgínʼ bi̱ kajtiin náa iñá wa̱jinʼ mudxawíín aʼwóo” (Juan 5:28, 29).

“Numu ri mapu-neʼne akuin Dios-jaʼyo numba ri nixnu Ade tsi mbahui, ikajngo jamba tsi najumu-jiʼya eʼne, maxandatiga, indo tsuʼkue tsi mbaʼya asjndo jamu.” (Juan 3:16.)

Ináa rí na̱ʼkha̱ ginii náa Biblia naʼthí ga̱jma̱a̱ numuu rí nigi̱ʼdi̱i̱ nikháñun xa̱bu̱ ga̱jma̱a̱ índo̱ nindáti̱ga̱ ixi̱ ri̱ʼi̱ Edén. Ináa rí námbá naʼthí ga̱jma̱a̱ numuu mbiʼi índo̱ mambáa rí nakháñulú ga̱jma̱a̱ rí Dios maʼni̱i̱ mitsaan Ku̱ba̱ʼ. Índo̱ gáʼkha̱nú mbiʼi rúʼko̱ xa̱bu̱ ma̱ndoo makuwá gagi kámuu mbiʼi. Revelación (Apocalipsis) 21:4 naʼthí rí “ní xakhañun itháan”, mu mbuʼyáá rí gajkhun rí Dios maʼnimbánuu rí nikudaminaʼ, xóó naʼthí náa , versículo 5: “Ajngáa rígi̱ nindxu̱u̱ gajkhun ga̱jma̱a̱ xúʼko̱ gárígá”. Xúgíʼ rí nakudaminaʼ maʼni Jeobá, naʼnimbánuu tsiakii.

Lá natatsimbaaʼ ikháánʼ rí “ajngáa rígi̱ nindxu̱u̱ gajkhun ga̱jma̱a̱ xúʼko̱ gárígá” ráʼ. Á mu xúʼko̱, gajmañaʼ itháan ga̱jma̱a̱ numuu Jesús ga̱jma̱a̱ araʼdáá fe náa ikhaa; xúʼko̱ Jeobá ma̱ndoo kaʼyaʼ. Ikhaa raʼkháa i̱ndó maʼni tsajkurámáánʼ rí mbiʼi xúgi̱, ikhaa maxnáʼ rí maraxtaa náa Ku̱ba̱ʼ mitsaan, náa ní xárígá rí nakháñulú “ní xarígá xtambiyaʼ, gitsawaʼskha asndu má gaʼkhu”.