1, 2. Ndiéjunʼ eyáá mbaʼin superintendentes ndrígóo circuito rá.

ÍNDO̱ mbáa superintendente ndrígóo circuito xtáa náa mbá congregación, xtáa inuu mambóo mbá reunión rí gíʼdoo gajmíi̱n bi̱ kuya̱ edxu̱u̱ náa nagimbáanʼ. Ikhaa ra̱ʼkhá tháán eyoo kaʼñúún numuu rí nuñajunʼ wéñuʼ. Ma̱ngaa, tikhun guaʼdáá tsiguúnʼ rí mani̱ndxu̱ún asndu xóo anu̱ún. Mú rígá rí gíʼdoo wéñuʼ numuu rí naʼni maxmiéjunʼ itháan. Rí ni̱ʼkha̱ gáʼñun nákhi ginii niʼthún rí muriyaʼ mbiʼi mu muniratiin eʼwíínʼ a̱ngiu̱lú. Ikha jngó naʼniún graxe̱: “A̱ngui̱nʼ, ndiéjunʼ ninila mu muniratiin eʼwíínʼ xa̱bekha náa congregación rá.” Ikhú mbáa bi̱ kayá edxu̱u̱ nariʼña̱a̱: “Rí phú gajkhun, mbá chíʼgíʼ má ninixu”. Ga̱jma̱a̱ xúʼko̱ má nithi eʼwíínʼ.

² Á mu ikháánʼ ni̱ndxa̱ʼ mbáa bi̱ kayá edxu̱u̱, mbáa xúʼko̱ má gátriʼña̱a̱ mangáán. Mbaʼin superintendentes ndrígóo circuito nduyáá rí mbaʼa congregación na̱nguá eriyaʼ mbiʼi mu muniratiin eʼwíínʼ a̱ngiu̱lú. Mbuʼyáá ndíjkha.

3. a) Náa biʼyaa versículos rí na̱ʼkha̱ náa Biblia nasngájma rí gíʼdoo wéñuʼ numuu miʼniratiin eʼwíínʼ a̱ngiu̱lú rá. b) Náa numuu rí gíʼmaa manigulúʼ xúgiáanʼ artículo rígi̱ ga̱jma̱a̱ rí e̱ʼkha̱ rá. (Atayáá nota.) c) Ndíjkha rí tikhun bi̱ kuya̱ edxu̱u̱ naʼniún mingíjyúuʼ muriyaʼ mbiʼi muniratiin eʼwíínʼ rá.

 ³ Xóo mbáa bi̱ kayá edxu̱u̱, ikháánʼ natayáá rí gíʼdoo numuu magumaratiin eʼwíínʼ. * Ma̱ngaa natayáá rí xúgi̱ ndayóoʼ rí itháan a̱ngiu̱lú muyambáá náa congregación ga̱jma̱a̱ i̱ʼwáʼ rí magajnúu nda̱wa̱á (atraxnuu Isaías 60:22). Náa Biblia naʼthí rí bi̱ kuya̱ edxu̱u̱ gíʼmaa musngúún eʼwíínʼ (atraxnuu 2 Timoteo 2:2). Maski ajndu xúʼko̱, mbáa ikháánʼ naʼniaʼ mingíjyúuʼ matríyaʼ mbiʼi mu matani rúʼko̱. Náa numuu rá. Numuu rí ndayóoʼ matiewu̱u̱n bi̱ kuwa náa guʼwáaʼ ga̱jma̱a̱ matiejunʼ. Ma̱ngaa ndayóoʼ matani ñajunʼ náa congregación ga̱jma̱a̱ i̱ʼwáʼ rí ndayóoʼ matanimbánii nacha̱. Mú xó má gúʼyáá, gíʼdoo wéñuʼ numuu rí matríyaʼ mbiʼi mu mataniratiin eʼwíínʼ.

4. Ndiéjunʼ gándoo gundxaʼwamíjna̱ tikhun bi̱ kuya̱ edxu̱u̱ rá.

⁴ Náa numuu rí tikhun bi̱ kuya̱ edxu̱u̱ tseriyaʼ wéñuʼ mbiʼi muniratiin eʼwíínʼ rá. Mbáa nundxa̱ʼwa̱míjna̱ dí rígá i̱ʼwáʼ dí gíʼdoo itháan numuu ga̱jma̱a̱ dí ndayóoʼ munimbánii nacha̱. O mbáa naku̱mún rí nda̱a̱ rí gagiʼnuu congregación á mu tseniratiin nacha̱ eʼwíínʼ. Mú, lá gajkhun rúʼko̱ ráʼ. Gajkhun má rí rígá tikhu rí ndayóoʼ mambanúu nacha̱. Á mu ikháánʼ  tsetaniratiin nacha̱ eʼwíínʼ, mbáa natani gawíínʼ congregación.

5, 6. a) Ndiéjunʼ garigá á mu tsítriʼkhu̱u̱ aceite náa mbá carro rá. b) Ndiéjunʼ garigá á mu bi̱ kuya̱ edxu̱u̱ tseniratiin eʼwíínʼ a̱ngiu̱lú rá.

⁵ Atatsaʼwáminaʼ náa xkri̱da rígi̱. Mu mbá carro mañajunʼ, ndiéjunʼ rí gíʼdoo itháan numuu, mataxíñanʼ gasolina o matriʼkhui̱i̱ aceite dxe̱ʼ. Mbáa maxtáa tsáa mandxaʼwáminaʼ rí itháan gíʼdoo numuu maxíñanʼ gasolina, numuu rí á mu tsítani rúʼko̱, mawiji̱ carro. Á mu natatsaʼwáminaʼ xúʼko̱ migamíi gáʼni. Á mu tsítriʼkhu̱u̱ aceite maʼga̱nú maʼchúu carro. Nda̱wa̱á mbaʼyóoʼ wéñuʼ mbiʼi ga̱jma̱a̱ mbújkha̱a̱ mu maguma̱a̱ májáánʼ. Xú káʼnii embánii xkri̱da rígi̱ náa congregación rá.

⁶ Ndiéjunʼ dí itháan gíʼdoo numuu rá. Matanimbánii ñajunʼ dí rígá náa congregación o mataniratiin eʼwíínʼ dxe̱ʼ. Tikhun bi̱ kuya̱ edxu̱u̱ mundxa̱ʼwa̱a̱ edxu̱ún rí itháan gíʼdoo numuu munimbánii nacha̱ ñajunʼ rí guáʼdáá náa congregación numuu rí á mu tséni xúʼko̱ kaʼnii, congregación mamínuʼ. Gajkhun má rí náa Biblia naʼthí rí gíʼmaa mbuʼyáá ndiéjunʼ rí itháan gíʼdoo numuu maguma (Filip. 1:10). Á mu bi̱ kuya̱ edxu̱u̱ tsíguapiin kayuʼ mu muniratiin eʼwíínʼ a̱ngiu̱lú, ndiéjunʼ gárígá rá. Rí nda̱wa̱á náa congregación xakuwa mbaʼin a̱ngiu̱lú bi̱ nigumaratiin mu muni xúgíʼ ñajunʼ.

7. Xú káʼnii gíʼmaa mbuʼñún bi̱ kuya̱ edxu̱u̱ bi̱ nuriyaʼ mbiʼi muniratiin eʼwíínʼ rá.

⁷ Asndu nditháan xátatsa̱ʼwa̱a̱ edxa̱ʼ dí ragíʼdoo numuu mataniratiin eʼwíínʼ. Bi̱ kuya̱ edxu̱u̱ bi̱ naxmiéjunʼ dí garigá nda̱wa̱á náa congregación nuriyaʼ mbiʼi mu muniratiin eʼwíínʼ. Bi̱ nuni rígi̱ ñajúúnʼ míjínʼ bi̱ kuya̱ edxu̱u̱ ga̱jma̱a̱ dí guáʼdáá wéñuʼ numún náa congregación (atraxnuu 1 Pedro 4:10). Xú káʼnii eyambáá náa congregación índo̱ bi̱ kuya̱ edxu̱u̱ nuriyaʼ mbiʼi muniratiin eʼwíínʼ rá.

8. a) Náa numuu rí bi̱ kuya̱ edxu̱u̱ ndayóoʼ muniratiin eʼwíínʼ rá. b) Ndiéjunʼ ñajunʼ guáʼdáá bi̱ kuya̱ edxu̱u̱ bi̱ nigún gúni ñajunʼ náa ndayóoʼ itháan rá. (Atayáá náa kúgumaʼá “ Mbá ñajunʼ rí ndayóoʼ maguma nacha̱”.)

⁸ Náa numuu rí bi̱ kuya̱ edxu̱u̱ ndayóoʼ muniratiin eʼwíínʼ rá. Asndu bi̱ kuya̱ edxu̱u̱ bi̱ najmañún wéñuʼ gíʼmaa mani̱ndxu̱ún xa̱bu̱ guabiinʼ ga̱jma̱a̱ makru̱ʼu̱u̱n rí á mu na̱jkha̱ ranii ní xándoo muni itháan ñajunʼ xóo eni xúgi̱ (Miq. 6:8). Bi̱ kuya̱ edxu̱u̱ gíʼmaa mbuyáá rí marigá mbiʼi rí maguaʼdáá xkujndu rí xáxnun muni ñajunʼ ndrígu̱ún (Ecl. 9:11, 12; Sant. 4:13, 14). Ma̱ngaa, numuu rí nandún kuñún wéñuʼ a̱ngiu̱lú náa congregación ikhaa numuu rúʼko̱ nuni mbá tsiakii mu musngúún eʼwíínʼ rí ikhiin nijmañún (atraxnuu Salmo 71:17, 18).

9. Nguáná gáʼyóóʼ muguaʼdiin itháan a̱ngiu̱lú bi̱ nigumaratiin rá.

⁹ Bi̱ kuya̱ edxu̱u̱ bi̱ nuniratiin eʼwíínʼ mangiin guáʼdáá wéñuʼ numún numuu rí xúʼko̱ nuni rí congregación maʼni itháan gujkhuʼ. Nuni rí makuwíin itháan a̱ngiu̱lú bi̱ muyambáá rí congregación makuwá mbá kambáxu̱u̱n ga̱jma̱a̱ rí makuwa jmbuu náa Dios. Ga̱jma̱a̱ rúʼko̱ rí gíʼdoo wéñuʼ numuu náa iwáá mbiʼi rí kuwáanʼ. Mú magiʼdoo itháan numuu nda̱wa̱á, índo̱ marigá majphú mba̱a̱ gaʼkhu (Ezeq. 38:10-12; Miq. 5:5, 6). Ikha jngó, a̱ngui̱nʼ bi̱  kuya̱ edxu̱u̱, á mu na̱nguá kuwáanʼ runiratiin eʼwíínʼ, gugíʼdi̱i̱ asndu nákha xúgi̱.

10. Mu muguaʼdáá mbiʼi muniratiin eʼwíínʼ, ndiéjunʼ gíʼmaa muni tikhun bi̱ kuya̱ edxu̱u̱ rá.

¹⁰ Ndu̱ya̱a̱ má xu rí kuaʼdáá wéñuʼ ñajunʼ náa congregación. Mbáa mbaʼyóoʼ matríyaʼ itháan mbiʼi mu mataniratiin eʼwíínʼ ki xóo matani ñajunʼ rí xtaʼdáá (Ecl. 3:1). Á mu natani xúʼko̱ najmaʼ májánʼ mbiʼi ga̱jma̱a̱ mayambáá náa congregación nda̱wa̱á.

11. a) Ndíjkha rí gíʼdoo wéñuʼ numuu rí nithi tikhun bi̱ kuya̱ edxu̱u̱ bi̱ kuwa náa i̱ʼwáʼ xuajin mba̱ʼu̱ rá. b) Xó má eʼthí Proverbios 15:22, ndíjkha rí ni̱ndxu̱u̱ májánʼ rí mbuʼyáá rí ethi eʼwíínʼ a̱ngiu̱lú rá.

¹¹ Mbaʼin bi̱ kuya̱ edxu̱u̱ bi̱ kuwa náa mbaʼa xuajin mba̱ʼu̱ nambáñun wéñuʼ rí nuniratiin eʼwíínʼ a̱ngiu̱lú. Ndiʼkhún nixtaxu̱u̱n tikhun xú káʼnii eni ikhiin. * Mbríguu xtágabu rí nixna xúgínʼ maski ajndu mixtiʼkhu xóo kuwa. Rígi̱ nasngájma rí xtágabu rí naxná náa Biblia nayambáá mu muʼniratiin eʼwíínʼ náa xúgíʼ congregación dí rígá náa numbaaʼ (1 Cor. 4:17). Proverbios 15:22 naʼthí rí á mu mbáa xa̱bu̱ tséraxu̱u̱n eʼwíínʼ, ra̱májánʼ ganindxu̱u̱ rí gáʼni. Ikha jngó, náa artículo rígi̱ ga̱jma̱a̱ rí na̱ʼkha̱ muʼthá xtágabu rí nixna bi̱ kuya̱ edxu̱u̱. Ga̱jma̱a̱ mbuʼyáá xú káʼnii mbáa bi̱ kayá edxu̱u̱ ma̱ndoo majmuu xtágabu rígi̱.

12. Ndiéjunʼ rí ndayóoʼ maʼni ginii bi̱ kayá edxu̱u̱ ga̱jma̱a̱ ndíjkha rá.

¹² Timbá rí gíʼmaa maʼni bi̱ kayá edxu̱u̱ rí maʼniratoo a̱jkiu̱u̱n ndxájulú bi̱ mambáyúu. Náa numuu rá. Guʼyáá mbá xkri̱da. Índo̱ mbáa xa̱bu̱ nandoo maʼdu tsígáʼ, ginii naʼni mújúnʼ ku̱ba̱ʼ. Numuu rí xúʼko̱ nambáyúu magaja̱a̱ májánʼ planta. Xúʼko̱ má kaʼnii, índo̱ mbáa bi̱ kayá edxu̱u̱ nandoo maʼnirataa mbáa ndxájulú, ginii ndayóoʼ maʼniratoo a̱jkiu̱u̱n. Náa numuu rá. Numuu rí xúʼko̱ ndxájulú maxtáa xawii majmañuu. Xú káʼnii gándoo  maʼniratoo a̱jkiu̱u̱n xá. Ma̱ndoo matayaridáá rí niʼni Samuel, mbáa gaʼyee nákha wajyúúʼ.

13-15. a) Ndiéjunʼ niʼthúu̱n Jeobá maʼni Samuel rá. b) Xú káʼnii Samuel niʼniratoo a̱jkiu̱u̱n Saúl rá. (Atayáá timbá xtiʼkhu.) c) Ndíjkha rí gíʼmaa mbuyáá bi̱ kuya̱ edxu̱u̱ xú káʼnii Samuel niʼniratoo Saúl rá.

¹³ Naʼni itháan rí ajtsú míí tsiguʼ, Jeobá niʼthúu̱n Samuel rí makuʼmaa mbáa xa̱bu̱ bi̱ na̱ʼkha̱ náa tribu ndrígóo Benjamín, mu magíiʼ xóo xa̱bu̱ ede̱ náa xuajen Israel (1 Sam. 9:15, 16). Samuel ni̱jkha̱nú ndiʼyoo rí ní xánindxu̱u̱ xa̱bu̱ ede̱ náa xuajin Israel numuu rí Jeobá ndiyáaʼ imba̱a̱ xa̱bu̱. Mu maʼnirataa xa̱bu̱ buʼko̱, Samuel niríyaʼ mbá awan rí maʼni.

¹⁴ I̱mba̱ néjtsuu Samuel nininiʼ Saúl. Ga̱jma̱a̱ Jeobá niʼthúu̱n: ‹Gi̱jyooʼ xtáa xa̱biya̱›. Ikhú, Samuel niʼni awan rí niríyaʼ mu ma̱ndoo maʼtámijná ga̱jma̱a̱ Saúl. Niʼthúu̱n maʼga̱ gakuiʼtsu ga̱jma̱a̱ niʼni magiʼi náa rí phú itháan májánʼ náa mesa. Ikhú Samuel niʼthúu̱n rí niniñuʼ xuwiʼ rí itháan májánʼ mu makánáá ikhaa. Nda̱wa̱á rí niphiʼtsu niʼthúu̱n Saúl maʼga̱ ga̱jma̱a̱ náa goʼwóo ikhú nigún tsímáá mbá xngaa rutamijná mbá kamba̱a̱. Índo̱ niguánu nitsimún náa tsu̱du̱u̱ guʼwá ga̱jma̱a̱ nitamijná má xúʼko̱ asndu índo̱ nigúun gúnuʼ. Imbo̱o̱ mbiʼi, Samuél nixtrámuʼ aceite náa edxu̱u̱ Saúl mu masngájma rí Jeobá ndiyáaʼ. Nda̱wa̱á ni̱ʼkhu̱ chítúʼ ga̱jma̱a̱ niʼthúu̱n itháan rí maʼni. Ikhú Saúl xtáa xawii mu maʼga̱a̱ gánimbánuu rí ndayóoʼ maʼni (1 Sam. 9:17-27; 10:1).

¹⁵ Samuel nigíiʼ Saúl mu mani̱ndxu̱u̱ xa̱bu̱ ede̱ náa mbá xuajin mba̱a̱. Gajkhun má dí rúʼko̱ ni̱ndxu̱u̱ mixtiʼkhu wéñuʼ ki xóo dí matanirataa mbáa ndxájulú mu mani̱ndxu̱u̱ bi̱ mbayá edxu̱u̱ o mbá siervo ministerial náa congregación. Á mu bi̱ kuya̱ edxu̱u̱ nduyáá xú káʼnii Samuel niʼniratoo a̱jkiu̱u̱n Saúl, ma̱ndoo majmañún mbaʼa ikha. Guʼyáá a̱jma̱.

16. a) Índo̱ Samuel niʼdxuun rí israelitas nunda̱ʼa̱a̱ mbáa rey, xú káʼnii nikumu̱u̱ xá. b) Ndiéjunʼ niʼni Samuel índo̱ Jeobá niʼthúu̱n rí magíiʼ xóo rey Saúl rá.

¹⁶ Araxnatíʼñaminaʼ mataniratiin eʼwíínʼ ma̱ngaa atani ga̱jma̱a̱ xúgíʼ a̱jkia̱nʼ. Índo̱ Samuel niʼdxuun rí israelitas nindúún rí mbáa xa̱bu̱ mani̱ndxu̱u̱ rey nixtáa gíná ga̱jma̱a̱ nikumu̱u̱ rí tsíñún kuyáá (1 Sam. 8:4-8). Samuel táʼndoo magíiʼ mbáa rey náa ikhiin. Ikha jngó ndiyóoʼ rí Jeobá maʼthúu̱n ajtsú nuthu rí maʼdxun rí ethi israelitas (1 Sam. 8:7, 9, 22). Maski ajndu xúʼko̱, Samuel takiʼnáa ga̱jma̱a̱ xa̱bu̱ bi̱ mariʼkuriyaʼ. Índo̱ Jeobá niʼthúu̱n Samuel rí magíiʼ xóo rey, ikhaa niʼni ga̱jma̱a̱ gagi. Niʼnimbo̱o̱ numuu rí nindoo kaʼyoo Jeobá, raʼkháa numuu rí katsudáá.

17. a) Xú káʼnii eyaridáá mbaʼin bi̱ kuya̱ edxu̱u̱ xkri̱da ndrígóo Samuel rá. b) Xú káʼnii kumún bi̱ kuya̱ edxu̱u̱ rá.

¹⁷ Rí mbiʼi xúgi̱, mbaʼin bi̱ kuya̱ edxu̱u̱ bi̱ najmañún wéñuʼ nduyaridáá xkridoo Samuel ga̱jma̱a̱ nanigu̱nʼ muniratiin eʼwíínʼ (1 Ped. 5:2). Numuu rí ikhiin májánʼ a̱jkiu̱ún, tsímiñun muxnún eʼwíínʼ tikhuu ñajunʼ rí eni náa congregación. Nduñún a̱ngiu̱lú bugi̱ xóo bi̱ nuyambáá bi̱ guáʼdáá wéñuʼ numún (2 Cor. 1:24; Heb. 13:16). Ga̱jma̱a̱  nanigu̱nʼ índo̱ nduyáá xú káʼnii a̱ngiu̱lú najmún rí najmañún nuni mu muyambáá náa congregación (Hech. 20:35).

18, 19. a) Xú káʼnii gándoo mbáa bi̱ kayá edxu̱u̱ maʼnirataa mbáa ndxájulú mu maxtáa xawii rá. b) Ndíjkha rí gíʼdoo numuu maʼni rígi̱ xá.

¹⁸ Xáni̱ndxa̱ʼ i̱ndó bi̱ naʼsngáa, gambaxáʼ ga̱jma̱ʼ. Índo̱ Samuel nininiʼ Saúl, núkhu má ikhú ma̱ndoo maxtrámuʼ aceite náa edxu̱u̱ mu magíiʼ xóo rey. Ikhú Saúl ma̱ndoo mani̱ndxu̱u̱ rey, mu xóó na̱nguá xtáa xawii mu maʼni ñajunʼ rígi̱. Ikha jngó, Samuel nixmiéjunʼ maʼniratoo ginii a̱jkiu̱u̱n Saúl. Xú káʼnii rá. Rí niʼni ginii, niphiʼtsu mbóó, nigún mbóó, nitamijná wéñuʼ ga̱jma̱a̱ nida̱a̱ xúu̱nʼ mbóó nda̱wa̱á nigíiʼ xóo rey. Samuel nigi̱ʼthu̱u̱n asndu índo̱ Saúl maxtáa xawii, ga̱jma̱a̱ nda̱wa̱á nigíiʼ xóo rey.

¹⁹ Ikháánʼ gíʼmaa matani xúʼko̱ kaʼnii. Nákha xóó tsetaniratáá ndxájulú atambáxaʼ ga̱jma̱ʼ. Xúʼko̱ gáʼni rí ndxájulú xámiñu. Rí gátani ikháánʼ ma̱ndoo mani̱ndxu̱u̱ mixtiʼkhu xó má rí naguma náa mámbá xuajin o rí naguʼún nuni ikhí. Maski ajndu tsiguapán, atríyaʼ mbiʼi mu mambaxáʼ ga̱jma̱ʼ. Rí matani rígi̱ gíʼdoo wéñuʼ numuu, xúʼko̱ gátasngajmáá rí ikhaa gíʼdoo numuu náa ikháánʼ (atraxnuu Romanos 12:10). Ga̱jma̱a̱ ndxájulú maxnáa núma̱aʼ numuu rí ikháánʼ natambáyii ga̱jma̱a̱ natayangajua̱a̱.

20, 21. a) Ndiéjunʼ eʼni mbáa ndxájulú bi̱ kayá májánʼ edxu̱u̱ rá. b) Ndiéjunʼ gúʼyáá náa imbo̱o̱ artículo rá.

²⁰ Mbáa ndxájulú bi̱ kayá májánʼ edxu̱u̱ raʼkháa i̱ndó naʼniratiin eʼwíínʼ, ma̱ngaa nandoo kaʼñúún (mataxkamaa mbá ku̱ma̱ rí nagujtuminaʼ náa Juan 5:20). Ndíjkha rí gíʼdoo wéñuʼ numuu rígi̱ rá. Numuu rí xúʼko̱ a̱ngiu̱lú makumún rí guáʼdáá numún, ga̱jma̱a̱ mugíiʼ majmañún (Prov. 17:17; Juan 15:15).

²¹ Nda̱wa̱á rí niʼniratoo a̱jkiu̱u̱n ndxájulú, bi̱ kayá edxu̱u̱ ma̱ndoo magíʼdu̱u̱ maʼsngóo. Xú káʼnii gáʼni xá. Náa imbo̱o̱ artículo gúʼyáá ndiéjunʼ gándoo gáyambáá.