1. Náa numuu rí gíʼmaa mambáxulúʼ itháán májánʼ gajmiúlú Jeobá rá.

BI̱ NUʼTÁRAʼA numuu Jeobá kuaʼdáá mbóo rí gíʼdoo numuu. Rí nambáxulúʼ májánʼ gajmiúlú Jeobá. Gíʼdoo wéñuʼ numuu rí mambáxulúʼ itháán májánʼ asndu xó má eʼngulú. Náa numuu rá. Numuu rí numbaaʼ ndrígóo Satanás ga̱jma̱a̱ dí xa̱bu̱ aʼkhá ni̱ndxu̱lú maʼni rí xándoo mambáxulúʼ.

2. a) Ndiéjunʼ ni̱ndxu̱u̱ rí matambaxáʼ ga̱jma̱ʼ mbáa rá. (Atayáá nota.) b) Ndiéjunʼ gándoo gúʼni mu mambáxulúʼ itháan májánʼ gajmiúlú Jeobá rá.

² Lá natayáá Jeobá ikháánʼ xóo mbáa bi̱ nambáxa̱ʼ ga̱jma̱ʼ ráʼ. Lá manigua̱ʼ rí matambaxáʼ itháan májánʼ ga̱jma̱ʼ ikhaa xáʼ. Santiago 4:8 naʼthúlúʼ xú káʼnii gándoo gúʼni: “Ahuaʼcani naʼ inu Dios [...], ga Ica maxtaa mijŋgui naʼ icanʼla”. Xó má eʼyáá, mu ikháánʼ ga̱jma̱a̱ Jeobá mambaxála májánʼ, rígá rí ndayóoʼ muni nájmáanʼla. * Á mu ikháánʼ nataxuʼmaminaʼ náa Jeobá, ikhaa makuʼmaminaʼ náa ikháánʼ. Á mu  itháán nataxuʼmaminaʼ náa Jeobá, itháan májánʼ gambaxáʼ ga̱jma̱ʼ ikhaa. Ga̱jma̱a̱ ikháánʼ maku̱ma̱ʼ xóo Jesús índo̱ niʼthí rí ‹bi̱ nikunguanʼ ni̱ndxu̱u̱ gajkhun›. Ma̱ngaa niʼthí: “Ikun ri nanenuhuinʼ” (Juan 7:28, 29). Guʼyáá dí gíʼmaa muʼni mu mu̱ʼgua̱ itháan mijngii náa Jeobá.

3. Xú gándoo guʼtámijna gajmiúlú Jeobá rá.

³ Á nandulúʼ makuwáanʼ itháan mijngii náa Jeobá, gíʼdoo wéñuʼ numuu rí muʼthámijna má xúʼko̱ gajmiúlú. Xú káʼnii gándoo gúʼni rúʼko̱ rá. Guʼgíʼ mbá xkri̱da. Á mu a̱jmi̱i̱n bi̱ nambáxu̱u̱n kuwa mitsínguánʼ nandún mutamijná, ndiéjunʼ gíʼmaa muni xá. Ndayóoʼ muniraʼmáʼ i̱yi̱i̱ʼ o mutamijná ga̱jma̱a̱ teléfono. Xúʼko̱ má kaʼnii ni̱ndxu̱u̱ ga̱jma̱a̱ Jeobá. Xú káʼnii gándoo gúʼtámíjná gajmiúlú xá. Índo̱ nuʼtájkáan má xúʼko̱ (atraxnuu Salmo 142:2). Ga̱jma̱a̱ ikhaa naʼthúlúʼ náa Biblia. Ikha jngó, mu mudxaʼwíín rí gaʼthúlú gíʼmaa muraxnuu má xúʼko̱ ga̱jma̱a̱ mundxaʼwáá edxu̱lúʼ rí eraxnuu (atraxnuu Isaías 30:20, 21). Xó má gúʼyáá náa artículo rígi̱, á mu nuʼtámíjná gajmiúlú Jeobá, mambáxulu itháan májánʼ gajmiúlú.

4, 5. a) Xú káʼnii eʼthúlúʼ Jeobá ga̱jma̱a̱ numuu Biblia rá. b) Arathá ga̱jma̱a̱ mbá xkri̱da.

⁴ Nduʼyáá rí ajngáa rí na̱ʼkha̱ náa Biblia mambáñun xúgínʼ xa̱bu̱ numbaaʼ. Mú, Biblia ma̱ndoo mambáyulúʼ mámbáa rí ikháanʼ mu mu̱ʼgua̱ kanuu náa Dios. Ikha jngó ndayóoʼ mbuʼyáá xú káʼnii ekumulú índo̱ nuraxnuu ga̱jma̱a̱ índo̱ nuʼnigajmaa Biblia. Ma̱ngaa gíʼmaa mundxaʼwamíjna̱ xú káʼnii gúgíʼ muʼni rí nuraxnuu. Índo̱ gúʼni xúgíʼ rígi̱, asndu xóo Jeobá xtáa raʼtúlú náa Biblia. Índo̱ nduʼyáá rí ikhaa nambáyulúʼ, nambáxulúʼ itháan májánʼ gajmiúlú (Heb. 4:12; Sant. 1:23-25).

⁵ Guʼgíiʼ mbá xkri̱da. Náa Mateo 6:19, 20, Jesús niʼthí: “Maxuʼya-güeñaʼla ri mapu-ihua guiʼdo numu naʼ numba rigueʼ”. Rígi̱ nandoo gáʼthúu̱n rí Jeobá gíʼmaa magiʼdoo itháan numuu náa ikháanʼ. Xú káʼnii ekumulú índo̱ nuraxnuu ajngáa rígi̱ rá. Á mu kuwáanʼ ruʼnimbulú xtágabu rígi̱, makumulúʼ rí Jeobá nadxuu ga̱jma̱á ni̱ndxu̱lú. Mú, á mu nduʼyáá rí ndayóoʼ muʼni itháan ñajunʼ Dios ga̱jma̱a̱ rí xuguaʼdáá wéñuʼ. Ikhú makru̱ʼu̱lú rí Jeobá xtáa rambáyulú mbuʼyáá rí gíʼmáanʼ muʼni mu muʼguánú itháan mijngii náa ikhaa.

6, 7. a) Índo̱ nuʼnigajmaa Biblia, xú káʼnii embáxulú gajmiúlú Jeobá rá. b) Ndiéjunʼ phú eyulú majmañulúʼ índo̱ nuʼnigajmaa Biblia rá.

⁶ Gajkhun má rí índo̱ nuʼnigajmaa Biblia, nduʼyáá rí eyóoʼ muriʼkhui̱i̱ mu muʼni itháan májánʼ ñajunʼ Dios. Mú ma̱ngaa nuxkamaa xú káʼnii májánʼ xa̱bu̱ ni̱ndxu̱u̱ ikhaa ga̱jma̱a̱ rí naʼni, numuu rí nandoo kaʼyulúʼ. Índo̱ najmañulúʼ xúgíʼ rígi̱, nandulúʼ kuʼyáá itháan. Ikhú, ikhaa nandoo kaʼyulúʼ  itháan ga̱jma̱a̱ nda̱wa̱á nambáxulúʼ itháan májánʼ gajmiúlú (atraxnuu 1 Corintios 8:3).

⁷ Á mu nandulúʼ mu̱ʼgua̱ kanuu náa Jeobá, gíʼdoo wéñuʼ numuu rí muʼnigajmaa Biblia ga̱jma̱a̱ mbá numuu májánʼ. Jesús niʼthí rí ndayóoʼ muʼni mu makuwáanʼ kámuu mbiʼi, ndayóoʼ muniʼnííʼ itháan Jeobá (Juan 17:3). Gajkhun má rí náa Biblia najmañulúʼ mbaʼa rí gíʼdoo numuu. Mú raʼkháa rúʼko̱ rí phú nandulúʼ índo̱ nuʼnigajmaa. Rí phú gíʼmaa muʼni muniʼnííʼ itháan májánʼ Jeobá (atraxnuu Éxodo 33:13; Sal. 25:4).

8. a) Índo̱ nuraxnuu rí Jeobá niʼniuu rey Azarías, ndiéjunʼ gákumún tikhun rá. b) Numuu rí ikháanʼ nuniʼnííʼ májánʼ Jeobá, ndiéjunʼ rí eʼyáá rá.

⁸ Á mu nduʼyáá Jeobá xóo mbáa bi̱ nambáxulúʼ májánʼ gajmiúlú, xaxmiéjunlú á mu náa Biblia nguáná tséʼthulú náa numuu niʼni xúʼko̱ kaʼnii Jeobá. Mbá xkri̱da, gundxaʼwámi̱jna̱ ga̱jma̱a̱ numuu mbá historia ndrígóo mbáa rey bi̱ nixtáa náa Judá bi̱ nigumbiʼyuu Azarías. Índo̱ nixtáa raʼtáñajunʼ, xa̱bu̱ ndiyamajkhún xándú. Mú rey na̱nguá niʼni xóo kuwa runi ikhiin, numuu rí náa Biblia naʼthí rí ikhaa “niʼni má xúʼko̱ rí jmbu náa iduu Jeobá” (2 Rey. 15:1-5). Maski ajndu xúʼko̱, Dios niʼni magiʼdoo mbá nandii mbiiʼ. Náa numuu rá. Náa Biblia tséʼthi. Tikhun makumún rí Jeobá tánindxu̱u̱ jmbii ga̱jma̱a̱ nda̱a̱ numuu nixnúu castigo. Mú ikháanʼ nuniʼnííʼ májánʼ Jeobá ga̱jma̱a̱ nduʼyáá májánʼ rí ikhaa naʼni má xúʼko̱ rí jmbu (Jer. 30:11). Ikha jngó, maski ajndu tséʼyáá náa numuu rí Dios nixnúu gamiéjunʼ rey, nduʼyáá rí ikhaa niʼni rí jmbu.

9. Náa numuu rí Jeobá niʼni mamínuʼ rey Azarías rá.

⁹ Ma̱ngaa náa Biblia nuxkamaa i̱ʼwáʼ xú káʼnii nixtáa rey Azarías, najmaʼniiʼ ma̱ngaa xóo Uzías (2 Rey. 15:7, 32). Náa 2 Crónicas 26:3-5 ga̱jma̱a̱ 16-21 naʼthí rí ikhaa niʼni “rí jmbu náa iduu Jeobá”. Mú ma̱ngaa naʼthí rí nigíʼdu̱u̱ niʼnimbamínáʼ. Mbá mbiʼi nindoo maʼni rí kaʼñúún muni ndxajkun. Mbá 81 ndxajkun nitháán dí ra̱májánʼ maʼni xúʼko̱ kaʼnii ga̱jma̱a̱ nigíʼ murikháá. Mú rey niʼnimbamínáʼ wéñuʼ rí asndu nikiʼnáa gajmíi̱n ga̱jma̱a̱ táʼnimbo̱o̱ kaʼñúún. Rígi̱ nambáyulúʼ makru̱ʼu̱lú náa numuu rí Jeobá niʼni mamínuʼ.

10. a) Náa numuu rí tséyóoʼ mbuʼyáá xúgíʼ rí naʼni Jeobá rá. b) Xú káʼnii gándoo gákuwáanʼ gajkhun rí Jeobá naʼni má xúʼko̱ rí jmbu rá.

¹⁰ Rí ndiʼyáá ginii naʼsngúlúʼ mbá ikhaa rí gíʼdoo wéñuʼ numuu. Historia ndrígóo rey Azarías na̱ʼkha̱ mbaʼa rí nasngájma náa numuu rí Dios niʼni mamínuʼ. Mú náa Biblia na̱ʼkha̱ mbaʼa historia náa tsesngájma kuduun kayuʼ rí nirígá. Índo̱ gúʼyáá xúʼko̱ kaʼnii, lá maku̱ma̱ʼ rí Jeobá táʼni rí jmbu ráʼ. O muʼthá rí Dios naʼni má xúʼko̱ rí jmbu ráʼ. (Deut. 32:4.) Náa Biblia na̱ʼkha̱ mbaʼa rí mambáyulúʼ muniʼnííʼ itháan májánʼ Jeobá ga̱jma̱a̱ makumulúʼ kuʼyáá. Á mu nuniʼnííʼ ga̱jma̱a̱ nandulúʼ kuʼyáá, tséyóoʼ mbuʼyáá xúgíʼ rí naʼni. Ndiéjunʼ gándoo gambáyuluʼ mbuʼyáá rí gajkhun Jeobá naʼni má xúʼko̱ rí jmbu rá. Rí matanigajmaa Biblia. Xúʼko̱ muʼguánú mambáxulúʼ májánʼ gajmiúlú Jeobá (Sal. 77:12, 13).

11-13. Ndíjkha rí nduʼyáá rí Dios naʼdxun índo̱ nuʼtájkáan rá. (Atayáá timbá xtiʼkhu.)

¹¹ Índo̱ nuʼtájkáan, nuʼni mba̱a̱ Dios, nuxnáa  núma̱aʼ ga̱jma̱a̱ nunda̱ʼa̱a̱ rí mambáyulúʼ. Rúʼko̱ naʼni makuwáanʼ itháan mijngii náa ikhaa (Sal. 32:8). Mú á mu nandulúʼ mambaxúlúʼ itháan májánʼ gajmiúlú Jeobá, ndayóoʼ mbuʼyáá májánʼ rí ikhaa naʼdxuun índo̱ nuʼtájkáan.

¹² Tikhun nuthi rí Dios tséʼdxuun índo̱ nuʼtájkáan. Nuthi rí i̱ndó nayambáá mu makuwáanʼ májánʼ. Ikhiin nuthi, rí muʼtájkáan nambáyulúʼ mundxaʼwamíjna̱ náa xkujndu ndrígúlú ga̱jma̱a̱ muʼgíʼ mbuʼyáá xú káʼnii guʼnimbánii. Gajkhun rí muʼtájkáan mambáyulúʼ xúʼko̱ kaʼnii. Mú índo̱ nuʼtájkáan náa Jeobá, ikhaa phú gajkhun naʼdxaunlúʼ. Ndíjkha rí nduʼyáá rá.

¹³ Gundxa̱ʼwámi̱jna̱ ga̱jma̱a̱ numuu Jesús. Nákha xóó tséʼkha̱ náa tsu̱du̱u̱ Ku̱ba̱ʼ, ndiʼyoo xú káʼnii Jeobá niriʼña̱a̱ rí nitajkáan xa̱bu̱ numbaaʼ. Ga̱jma̱a̱ índo̱ nixtáa náa tsu̱du̱u̱ Ku̱ba̱ʼ, Jesús niʼtájkáan ga̱jma̱a̱ niʼthúu̱n Dios rí endxa̱ʼóo edxu̱u̱ ga̱jma̱a̱ rí nikumu̱u̱. Mbá miʼtsú niʼtájkáan kañiʼ mbruʼun (Luc. 6:12; 22:40-46). Ma̱ngaa ikhaa niʼsngúún xa̱bi̱i̱ mutajkáan. Lá maʼni xúgíʼ rúʼko̱ Jesús á mu rí Jeobá tseʼdxaun xúgíʼ rí nuʼtájkáan ráʼ. Na̱nguá. Ikhaa ndiʼyoo májánʼ rí Dios naʼdxun rí nutajkáan xa̱bu̱. Ikha jngó niʼthúu̱n: “Ana, snumaʼla numu ri nitadxahuin ri natanʼloʼ. Jamba miʼtsu natadxahuin ri natanʼloʼ” (Juan 11:41, 42). Mangáanʼ nduʼyáá gajkhun rí Jeobá naʼdxaunlú índo̱ nuʼtájkáan (Sal. 65:2).

14, 15. a) Náa numuu eyóoʼ muʼthán Jeobá rí phú nda̱yúlúʼ índo̱ nuʼtájkáan rá. b) Xú káʼnii nimbáyúu rí niʼtájkáan mbáa ndxájulú rá.

¹⁴ Mbáa nguáná xúʼyáá kaʼwu xú káʼnii Jeobá nariʼña̱a̱ rí nuʼtájkáan. Á mu nuʼtháán rí phú eyúluʼ, mbuʼyáá kaʼwu rí nariʼña̱a̱. Ikhú, ikhaa mambaxúu májánʼ gajmiúlú. Á mu rí nuʼtháán ga̱jma̱a̱ xúgíʼ a̱jkiu̱lú rí naʼni maxmiéjunʼlú, ikhaa ma̱ʼkha̱ kanuu náa ikháanʼ.

¹⁵ Guʼyáá mbá xkri̱da ndrígóo mbáa ndxájulú bi̱ nagumbiʼyuu Carmen. * Ikhaa naʼthí rí nákha xóó tséniñuʼ ñajunʼ nagájnuu raʼtáraʼa, mu ikhaa tsínigu̱ʼ maʼtáraʼa. Índo̱ niniñuʼ ñajunʼ, mbáa bi̱ kayá edxu̱u̱ nimbáyúu mani̱ndxu̱u̱ precursora regular. Ikhaa naʼthí: Niriʼña mani, mú ma̱ngaa nigíʼdu̱u̱ nitakáñuu Jeobá xúgíʼ mbiʼi rí mambáyuʼ mu mataráʼa ga̱jma̱a̱ gagi. Ma̱ngaa, nindo̱ʼo̱o̱ xúgíʼ mbiʼi Jeobá rí manigu̱ʼ maʼtáraʼa. Lá niʼdxuun Dios rí niʼtájkáan xáʼ. Rí xúgi̱ Carmen ni̱ndxu̱u̱ precursora ajtsú tsiguʼ. Ikhaa naʼthí rí xúgíʼ mbiʼi rí na̱jkha̱ gaʼtáraʼa ma̱ngaa índo̱ numbayíí a̱ngiu̱lú gu̱ʼu̱, najmañuu maʼtáraʼa itháan  májánʼ. ¡Rí xúgi̱ nanigu̱ʼ wéñuʼ maʼtáraʼa! Mú rí itháan gíʼdoo numuu eʼthí: Rí xúgi̱ nambáxuʼ itháan májánʼ gajmuʼ Jeobá. Xó má eʼyáá, rí niʼtákáñuu Jeobá nimbáyúu mambaxúu itháan májánʼ ga̱jma̱a̱ Jeobá.

16, 17. a) Ndiéjunʼ gáʼyóóʼ muʼni mu mambáxulúʼ itháan májánʼ gajmiúlú Dios rá. b) Ndiéjunʼ guʼyáá náa imbo̱o̱ artículo rá.

¹⁶ Ma̱ndoo muxuʼmámíjná náa Jeobá kámuu mbiʼi. Ikha jngó, guʼdxawíín má xúʼko̱ rí naʼthúlúʼ índo̱ nuʼnigajmaa Biblia, ga̱jma̱a̱ guʼtámíjná má xúʼko̱ gajmiúlú índo̱ nuʼtájkáan. Á mu nuʼni xúʼko̱ kaʼnii mambáxulúʼ itháan májánʼ gajmiúlú Dios mámbá mbiʼi. Ga̱jma̱a̱ ikhaa gambáyuluʼ muraʼníí xkujndu.

¹⁷ Maski ajndu nuʼtájkáan má xúʼko̱ náa Jeobá, mbáa muraʼníí xóó xkujndu. Ga̱jma̱a̱ ikhú muniʼñáaʼ rakumulú kuʼyáá Jeobá. Makumulú rí ikhaa tséʼdxuun rí nuʼtájkáan ga̱jma̱a̱ muraximíjna á mu xóó nambáxulúʼ má xúʼko̱ gajmiúlú. Á mu nakumulú xúʼko̱ kaʼnii, ndiéjunʼ gándoo muʼni rá. Mbuʼyáá náa imbo̱o̱ artículo.