Linda: Lucía, nadxuʼ rí ndi̱ya̱ʼ nákha timbá xmáná náa nigumariyaʼ xóo nikháñu Jesús. * Xú káʼnii nitayáá rá.

Lucía: Niniguʼ wéñuʼ. Mu tákroʼoʼ tikhuu rí nithi ikhí. Nadxaun rí gíʼmaa magumariyaʼ rí xóo nixtáa Jesús índo̱ naʼni Navidad ga̱jma̱a̱ rí xóo nigabi̱i̱ índo̱ naʼni Semana Santa, mu tsédxuun rí nagumariyaʼ rí xóo nikháñu.

Linda: Xúʼko̱, rí nagumariyaʼ rúʼko̱ itháan najmaʼnuʼ wéñuʼ. Mú bi̱ nutaráʼaxu numuu Jeobá ndu̱ya̱a̱xu rí gíʼdoo wéñuʼ numuu muniku̱ma̱a̱xu rí nikháñu Jesús mámbá tsiguʼ. Ma̱ndoo matha̱nʼ náa numuu á mu nawapháán mbá xngaa.

Lucía: Ma̱ndoo má.

Linda: Rí phú numuu rí bi̱ nutaraʼa numuu Jeobá nuniku̱ma̱a̱ rí nikháñu Jesús numuu rí ikhaa mínaʼ niʼtáñajunʼ. Mbuʼyáá rí nirígá mbruʼun nákha xóó tsekháñu. Lá narmáʼáan a̱jkia̱nʼ rí Jesús nikuiʼtsu gajmíi̱n apóstoles ndrígóo mbá mbruʼun kiejunʼ ráʼ.

Lucía: Ah, gajkhun. Dí iwáá nikuiʼtsu gajmíi̱n.

Linda: Xúʼko̱ kaʼnii. Ma̱ngaa nagumbiʼyuu Ganitsuwañu Señor. Mu índo̱ kuwa ruphiʼtsu, Jesús niʼthún májánʼ rí muni xa̱bi̱i̱. Na̱ʼkha̱ raʼthí gi̱jyooʼ náa Lucas 22:19. Lá nandaʼ matraxnuu ráʼ.

Lucía: Xáʼniuu má. Gi̱jyooʼ naʼthí: “Aʼkue niriyeʼ pan, niʼtun snumaʼla Dios, aʼkue nixpiʼta, nixnu. Aʼkue niʼten: Rigueʼ ñajun xuyuʼ ri miʼxnaxi gajma numaʼla. Xaʼni gunila ri marmaʼan akianʼla-juyoʼ”.

Linda: Núma̱aʼ wéñuʼ. Atayáá rí niʼthí Jesús náa na̱jkha̱ mambáa versículo: “Xaʼni gunila ri marmaʼan akianʼla-juyoʼ”. Nákhi wapha niʼthún rí ikhaa rígi̱ gíʼmaa muniku̱ma̱a̱. Niʼthún rí maxnáximinaʼ ga̱jma̱a̱ numún xa̱bi̱i̱. Náa Mateo 20:28, Jesús niʼthún xúgi̱ kaʼnii. Atayáá dí eʼthí gi̱jyooʼ: “Xo Ade Xabo, taʼke ri magumambaʼhui, xabo niʼke gaʼnembaʼun, jame maxne ri ndaʼye gajma, numu ri maʼtsihuin mbaʼin xabo”. Xóo muʼthá, bi̱ nutaráʼaxu numuu Jeobá nuniriyaxu mbiʼi rí nikháñu Jesús mu muniku̱ma̱a̱ rí ikhaa nixnáximinaʼ mu maʼni káwáanʼ. Ga̱jma̱a̱ numuu rí nikháñu ma̱ndoo makáwáanʼ á mu nuʼnimbulúʼ.

Lucía: Nadxun má rí Jesús nikháñu mu maʼni káwáanʼ. Mú tsíkroʼoʼ xú káʼnii eʼni káwáanʼ rí ikhaa nikháñu.

Linda: Gajkhun má. Rí niʼtsiwáanʼ Jesús o rí nixnáximinaʼ, naʼni mingíjyúuʼ makru̱ʼu̱lú. Mú nindxu̱u̱ mbá kiʼsngáa rí itháan mitsaan rí na̱ʼkha̱ náa Biblia. Lá ma̱ndoo muʼtamíjna imbá chíʼgíʼ rá.

Lucía: Ma̱ndoo, xó má naguaphúún.

Linda: Májánʼ wéñuʼ. Xíkhoo ninigajmaa mbu̱júu̱ rígi̱ ga̱jma̱a̱ maʼgíiʼ matha̱nʼ xóo rí xáʼni mingíjyúuʼ makruaʼaʼ.

Lucía: Májánʼ.

Linda: Ginii ndayóoʼ makru̱ʼu̱lú ndiéjunʼ nirígá náa ixi̱ ri̱ʼi̱ Edén índo̱ Adán ga̱jma̱a̱ Eva nikiéʼkun. Guraxnuu rí eʼthí náa Romanos 6:23. Lá nandaʼ matraxnuu ráʼ.

Lucía: Xáʼniuu. Naʼthí: “Índo̱ nakháñulú nuʼninuma̱a̱ aʼkhá. Mú Dios namináanʼ dí makuwáanʼlu kámuu mbiʼi ga̱jma̱a̱ numuu Cristo Jesús bi̱ nindxu̱u̱ Señor ndrígiulúʼ”.

Linda: Núma̱aʼ. Guʼyáá versículo rígi̱. Atayáá ndiéjunʼ e̱ʼkha̱ raʼthí “índo̱ nakháñulú nuʼninuma̱a̱ aʼkhá”. Rígi̱ ninindxu̱u̱ mbá xtángoo rí Dios nigíʼ nákha wajyúúʼ: Rí nuʼninuma̱a̱ ga̱jma̱a̱ numuu aʼkhá ni̱ndxu̱u̱ rí nakháñulú. Mú nákha wajyúúʼ nimbáa takudaminaʼ aʼkhá. Dios niʼni jmbii Adán ga̱jma̱a̱ Eva, xóo muʼthá, rí na̱nguá guáʼdáá nimbá aʼkhá. Mangiin e̱jñún xaguaʼdáá aʼkhá índo̱ gagumiin. Ikha jngó, na̱nguá xóo makhañúu nimbáa. Xó má Adán ga̱jma̱a̱ Eva mangiin e̱jñún ma̱ndoo makuwá tsímáá kámuu mbiʼi. Mú, xó má natayáá, nirígá mbá rí niʼni gachúu xúgíʼ rígi̱. Lá narmáʼáan a̱jkia̱nʼ ndiéjunʼ ninindxu̱u̱ rá.

Lucía: Xúʼko̱, rí Adán ga̱jma̱a̱ Eva ni̱ʼphu̱ xndúu ixi̱ dí ragíʼmaa mu̱phu̱.

Linda: Gajkhun xó má ratá. Xúʼko̱ niʼni rí nixudami̱jna̱ aʼkhá; Adán ga̱jma̱a̱ Eva niraʼwíí rí xúnimbu̱ún náa Dios. Ni̱ndxu̱ún xa̱bu̱ aʼkhá. Rí niraʼwíí muni niʼni marigá dí ra̱májánʼ wéñuʼ náa ikhiin gajmiún e̱jñún.

Lucía: Ga̱jma̱a̱ ndíjkha rí asndu mangáanʼ á mu ikháanʼ tuxuʼdámi̱jna̱ aʼkhá rá.

Linda: Magíiʼ mbá xkri̱da. Lá xtaʼdáá mbá molde mu mataxuʼmbúʼ pan rá.

Lucía: Gúʼdóʼ.

Linda: Atatsaʼwáminaʼ rí naratsi mbóo nuxi̱ʼ ga̱jma̱a̱ nákha xóó tsejmaʼ naxpatrígú kaʼyáʼ, ga̱jma̱a̱ ikhú nagixmbiraʼa. Xú káʼnii gagájnuu xúgíʼ pan rí gátani ga̱jma̱a̱ molde rúʼko̱ rá. Lá ragájkhun rí magajnúu xó má molde ráʼ.

Lucía: Xúʼko̱ káʼnii.

Linda: Xúʼko̱ kayuʼ, índo̱ Adán ga̱jma̱a̱ Eva niraʼwíí rí xúnimbu̱ún náa Dios ikhú nichíin ga̱jma̱a̱ numuu aʼkhá. Numuu rí nixudami̱jna̱ aʼkhá nákha xóó tsekúwi̱i̱n e̱jñún, ikhú xúgínʼ nagumiin ga̱jma̱a̱ aʼkhá. Náa Biblia, aʼkhá raʼkháa i̱ndó nandoo gáʼthúu̱n xúgíʼ dí ra̱májánʼ rí nuni xa̱bu̱, ma̱ngaa nandoo gáʼthi rí naguaʼa makiéʼkulu numuu rí ni̱ndxu̱lú xa̱bu̱ aʼkhá. Ikha jngó, maski asndu ikháanʼ rakuáʼdáá aʼkhá ga̱jma̱a̱ numuu rí niʼni Adán ga̱jma̱a̱ Eva —asndu nditháan tagumáanʼ—, xúgiáanʼ bi̱ ni̱ndxu̱lú xa̱bu̱ numbaaʼ naguaʼa makiéʼkulúʼ numuu rí nagumáanʼ ga̱jma̱a̱ aʼkhá. Ga̱jma̱a̱ xó má niraxnuu náa Romanos 6:23, “índo̱ nakháñulú nuʼninuma̱a̱ aʼkhá”.

Lucía: Mú, náa numuu rí asndu mangáanʼ nakháñulú rá. Raʼkhí ni̱ndxu̱u̱ rígi̱.

Linda: Gajkhun má rakáʼyoo magíʼnulú xúʼko̱. Mú Dios ni̱ndxu̱u̱ jmbii. Ikha jngó Adán ga̱jma̱a̱ Eva ndiʼyoo rí makhañún ga̱jma̱a̱ numuu rí nini. Mú, Dios taniñúnʼ má xúʼko̱ e̱ji̱i̱n. Ndiyáaʼ xú káʼnii gáʼnii mu ma̱ndoo maʼni káwíin náa gamiéjunʼ rúʼko̱. Ikhú niyambáá tsigijñaʼ ndrígóo Cristo.  Muraxnuu mbu̱júu̱ Romanos 6:23. Nda̱wa̱á rí niʼthí “índo̱ nakháñulú nuʼninuma̱a̱ aʼkhá”, náa versículo naʼthí rí “mú Dios namináanʼ dí makuwáanʼlu kámuu mbiʼi ga̱jma̱a̱ numuu Cristo Jesús bi̱ nindxu̱u̱ Señor ndrígiulúʼ”. Ikha jngó rí nikháñu Cristo naʼni káwáanʼ náa aʼkhá ga̱jma̱a̱ rí nakháñuluʼ. *

Linda: Rígá imbo̱o̱ rí na̱ʼkha̱ náa versículo rí nandoʼ matha̱nʼ.

Lucía: Ndiéjunʼ ni̱ndxu̱u̱ rá.

Linda: Atayáá rí eʼthí gi̱jyooʼ: “Mú Dios namínáanʼ dí makuwáanʼlu kámuu mbiʼi ga̱jma̱a̱ numuu Cristo Jesús bi̱ ni̱ndxu̱u̱ Señor ndrígiulúʼ”. Á mu Jesús ni̱ndxu̱u̱ bi̱ nimínuʼ ga̱jma̱a̱ bi̱ ndiʼyóoʼ makhañúu mu maʼni káwáanʼ, náa numuu rí tséʼthí gi̱jyooʼ rí “Jesús namínáanʼ” rá. *

Lucía: Pfff... Tséyóo.

Linda: Índo̱ túnimbu̱ún kuyáá Dios náa ixi̱ ri̱ʼi̱ Edén, Adán ga̱jma̱a̱ Eva nikiéʼkun inuu bi̱ Niʼniwíin. Ga̱jma̱a̱ numuu rúʼko̱ niʼni rí magawúnʼ wéñuʼ. Mú ikhú Jeobá ndiyáaʼ xóo maʼnimbánuu rígi̱: Mbáa a̱ʼdióo bi̱ xtáa mekhuíí ma̱ʼkha̱ náa tsu̱du̱u̱ Ku̱ba̱ʼ, maxtáa xóo mbáa xa̱bu̱ jmbii ga̱jma̱a̱ maxnáximinaʼ mu maʼtsiwíin xa̱bu̱. * Ikha jngó dí niʼtsiwáanʼ ni̱ndxu̱u̱ mbá regalo ndrígóo Dios. Ma̱ngaa rígá imbo̱o̱ rí nandoo gáʼthúu̱n regalo rígi̱. Lá nitatsaʼwáminaʼ xú káʼnii nikumu̱u̱ Dios índo̱ nixiyáa Jesús rá.

Lucía: Na̱nguá.

Linda: Nda̱yo̱o̱ tikhuu juguetes. Lá xtaʼdiin e̱ji̱n ráʼ.

Lucía: Gúʼdiin a̱jmi̱i̱n; mbáa ndxámá ga̱jma̱a̱ mbáa ndxáʼgú.

Linda: Mbáa ikháánʼ natatsaʼwáminaʼ xú káʼnii nikumu̱u̱ Jeobá mekhuíí índo̱ ndiʼyoo xú káʼnii nikháñu a̱ʼdióo. Xú káʼnii nikumu̱u̱ índo̱ nirugua̱a̱ Jesús, ninduʼwajmaa ga̱jma̱a̱ nixnáá xá. Atatsaʼwáminaʼ xú káʼnii nikumu̱u̱ índo̱ ndiʼyoo rí a̱ʼdióo xtáa ramínuʼ náa ixi̱.

Lucía: Nimbá miʼtsú tandxaʼwamínaʼ xúʼko̱ káʼnii. ¡Phú ra̱májánʼ!

Linda: Tséʼyáá xú káʼnii phú nikumu̱u̱ Dios. Mú náa Biblia naʼtulúʼ náa numuu rí niniñuʼ mamínuʼ A̱ʼdióo. Náa Juan 3:16 naʼthí ga̱jma̱a̱ ajngáa rí mitsaan wéñuʼ. Lá nandaʼ matraxnuu ráʼ.

Lucía: Xúʼko̱. Naʼthí: “Numu ri mapu-neʼne akuin Dios-jaʼyo numba ri nixnu Ade tsi mbahui, ikajngo jamba tsi najumu-jiʼya eʼne, maxandatiga, indo tsuʼkue tsi mbaʼya asjndo jamu”.

Linda: Núma̱aʼ. Atayáá mbu̱júu̱ náa nagi̱ʼdu̱u̱ versículo. Ikhí naʼthí: “Mapu-neʼne akuin Dios-jaʼyo numba”. Rúʼko̱ rí gíʼdoo numuu: Rí nindoo kaʼyulúʼ. Rúʼko̱ nixkaxi̱i̱ makunguanʼ A̱ʼdióo náa tsu̱du̱u̱ Ku̱ba̱ʼ mu makhañúu ga̱jma̱a̱ numulúʼ. Nda̱a̱ imbo̱o̱ xóo rígi̱. Rúʼko̱ ni̱ndxu̱u̱ rí nuniriyaʼxuʼ mámbá tsiguʼ bi̱ nutaráʼaxu numuu Jeobá. Na̱nguá eyoo á mu nimbáyaʼ rí nitha̱nʼ.

Lucía: Xúʼko̱ káʼnii. Núma̱aʼ wéñuʼ rí nitríyaʼ mbiʼi.